5. பத்தனித்³தே³ஸவண்ணனா

60. இதா³னி பா⁴ஜனவிகதிம் த³ஸ்ஸேதும் ‘‘பத்தோ சா’’தி உத்³த⁴டம். ஏத்த² பன பட²மகா³தா² ஸுவிஞ்ஞேய்யா.

61. து³தியே ‘‘மக³த⁴னாளித்³வயதண்டு³லஸாதி⁴த’’ந்தி வத்தப்³பே³ விப⁴த்திலோபம் அகத்வா கா³தா²ப³ந்த⁴ஸுக²த்த²ம் ‘‘மக³தே⁴ நாளித்³வயதண்டு³லஸாதி⁴த’’ந்தி வுத்தம், பசிதந்தி அத்தோ². ஏத்த² (பாரா. 602; பாரா. அட்ட². 2.602; கங்கா². அட்ட². பத்தஸிக்கா²பத³வண்ணனா) மக³த⁴னாளி நாம அட்³ட⁴தேரஸபலம் க³ண்ஹாதி. ஓத³னந்தி ஏத்த² ஸப்³ப³ப்பகாரஸம்பன்னம் அவஸ்ஸாவிதோத³னம் க³ஹேதப்³ப³ம். ஓத³னஸ்ஸ சதுத்த²பா⁴க³ப்பமாணம் நாதிக⁴னம் நாதிதனுகம் ஹத்த²ஹாரியமுக்³க³ஸூபஞ்ச ஆலோபஸ்ஸ ஆலோபஸ்ஸ அனுரூபம் யாவ சரிமகாலோபப்பஹோனகம் மச்ச²மம்ஸாதி³ப்³யஞ்ஜனஞ்ச யோ பத்தோ க³ண்ஹாதி, ஸோ உக்கட்டோ² நாமாதி அத்தோ². ஸப்பிதேலதக்கரஸகஞ்ஜிகாதீ³னி பன க³ணனூபகா³னி ந ஹோந்தி, தானி ஹி ஓத³னக³திகானேவ ஹோந்தி, நேவ ஹாபேதும், ந வட்³டே⁴தும் ஸக்கோந்தி. ஏவமேதம் ஸப்³ப³ம் பக்கி²த்தம் ஸசே பத்தஸ்ஸ ஹேட்டி²மராஜிஸமம் திட்ட²தி, ஸுத்தேன வா ஹீரேன வா சி²ந்த³ந்தஸ்ஸ ஸுத்தஸ்ஸ வா ஹீரஸ்ஸ வா ஹேட்டி²மந்தம் பு²ஸதி, அயம் உக்கட்டோ² நாம பத்தோ. ஸசே தம் ராஜிம் அதிக்கமித்வா தூ²பீகதம் திட்ட²தி, அயம் உக்கட்டோ²மகோ நாம பத்தோ. ஸசே தம் ராஜிம் ந ஸம்பாபுணாதி, அந்தோக³தமேவ ஹோதி, அயம் உக்கட்டு²க்கட்டோ² நாம பத்தோ.

62. ‘‘மஜ்ஜி²மோ நாம பத்தோ நாளிகோத³னம் க³ண்ஹாதீ’’தி வுத்தத்தா ‘‘மஜ்ஜி²மோ தஸ்ஸுபட்³டோ⁴ வா’’தி வுத்தம். ஏத்தா²பி வுத்தப்பகாரேன மஜ்ஜி²மோ மஜ்ஜி²மோமகோ மஜ்ஜி²முக்கட்டோ²தி பத்தத்திகம் வேதி³தப்³ப³ம். ‘‘ஓமகோ நாம பத்தோ பத்தோ²த³னம் க³ண்ஹாதீ’’தி (பாரா. 602) வசனதோ ‘‘ததோபட்³டோ⁴’’தி வுத்தம். மக³த⁴னாளியா உபட்³ட⁴னாளிகோத³னஞ்ச ததூ³பியம் ஸூபம் ப்³யஞ்ஜனஞ்ச க³ண்ஹாதி, ஸோ ஓமகோ நாம. இதா⁴பி ஓமகோ ஓமகோமகோ ஓமகுக்கட்டோ²தி பத்தத்திகம் வேதி³தப்³ப³ம். இமேஸு பன நவஸு பத்தேஸு உக்கட்டு²க்கட்டோ² ச ஓமகோமகோ ச அபத்தோ. ஏதேஸு அதி⁴ட்டா²தப்³ப³கிச்சம் நத்தி², ஸேஸா ஸத்த பத்தா அதி⁴ட்டா²தப்³பா³, விகப்பேதப்³பா³ சாதி அத்தோ².

63. அதிரேகபத்தோதி (பாரா. 601) அனதி⁴ட்டி²தோ அவிகப்பிதோ. ஸகோதி ஸஸந்தகோ. கப்போதி கப்பியோ. அயமேவேத்த² ஸங்கே²போ – யோ பத்தோ காகணிகமத்தஸ்ஸாபி மூலஸ்ஸ தா³தப்³ப³ஸ்ஸ நத்தி²தாய ஸகோ. அயோபத்தோ பஞ்சஹி பாகேஹி மத்திகாபத்தோ த்³வீஹி பாகேஹி பக்கத்தா கப்போ. ஸோ த³ஸாஹபரமம் காலம் அனதி⁴ட்டி²தோ அவிகப்பிதோ தா⁴ரேய்யோதி.

64. அச்சே²தா³த³யோ சீவரே வுத்தப்பபே⁴தா³யேவ. சி²த்³தே³னாதி (பாரா. அட்ட². 2.608; கங்கா². அட்ட². பத்தஸிக்கா²பத³வண்ணனா) ஏத்த² யஸ்ஸ பத்தஸ்ஸ முக²வட்டிதோ ஹேட்டா² த்³வங்கு³லப்பதே³ஸே யேன சி²த்³தே³ன கங்கு³ஸித்த²ம் நிக்க²மதி, தத்தகேன சி²த்³தே³ன பி⁴ஜ்ஜதி. தஸ்மிம் பன அயசுண்ணாதீ³ஹி படிபாகதிகே கதே த³ஸாஹப்³ப⁴ந்தரே புன அதி⁴ட்டா²தப்³ப³ம். பத்தாதி⁴ட்டா²னமுஜ்ஜ²தீதி பத்தோ அதி⁴ட்டா²னம் உஜ்ஜ²தி.

65. இதா³னி பரிஹரணவிதி⁴ம் த³ஸ்ஸேதும் ‘‘பத்தம் ந படிஸாமேய்ய ஸோத³க’’ந்திஆதி³ ஆரத்³த⁴ம். ஸோத³கம் (சூளவ. 254) பத்தம் ந படிஸாமேய்ய, ஆதபே ச ஸோத³கம் பத்தம் ந ஓதபேதி அதி⁴ப்பாயோ. ந நித³ஹேதி நிருத³கம் கத்வாபி அதிகாலம் ந நித³ஹேதி அதி⁴ப்பாயோ. பு⁴ம்யாதி பூ⁴மியம். ந ட²பேதி தட்டிகாசம்மக²ண்டா³தீ³ஸு யேன கேனசி அனத்த²தாய பம்ஸுஸக்க²ரமிஸ்ஸாய பூ⁴மியா ந ட²பேய்யாதி அத்தோ². நோ ச லக்³க³யேதி ஏத்த²பி நாக³த³ந்தாதீ³ஸு (சூளவ. 254) யத்த² கத்த²சி லக்³க³ந்தஸ்ஸ து³க்கடமேவ.

66. மிட்³ட⁴ந்தேதி (சூளவ. 254; சூளவ. அட்ட². 254) மிட்³ட⁴பரியந்தே. ஸசே பன பரிவத்தேத்வா தத்தே²வ பதிட்டா²தி, ஏவரூபாய வித்தி²ண்ணாய மிட்³டி⁴யா அப்³ப⁴ந்தரபரிச்சே²தே³ ட²பேதும் வட்டதி, ந பரியந்தே. பரிப⁴ண்ட³ந்தேதி பா³ஹிரபஸ்ஸே கதாய தனுகமிட்³டி⁴யா அந்தேதி அத்தோ². அங்கே வாதி (சூளவ. 254) த்³வின்னம் ஊரூனம் மஜ்ஜே². ஏத்த² பன அம்ஸப³த்³த⁴கே அம்ஸகூடே லக்³கே³த்வா அங்கே ட²பேதும் வட்டதி, ந இதரதா². ஆதபத்தகேதி ச²த்தே. ஏத்த² ப⁴த்தபூரோபி அம்ஸகூடே லக்³கி³தபத்தோபி ட²பேதும் ந வட்டதி.

67. உச்சி²ட்டோ²த³கம் (சூளவ. 255; சூளவ. அட்ட². 255) நாம முக²விக்கா²லனோத³கம், தம் பத்தே நிட்டு²பி⁴த்வா பத்தேன ந நீஹரேய்யாதி அத்தோ². சலகஞ்ச அட்டி²கஞ்ச சலகட்டி²கம். ஏதேஸு யம் கிஞ்சி பத்தேன நீஹரந்தஸ்ஸ து³க்கடம். பத்தம் படிக்³க³ஹம் கத்வா ஹத்த²ம் தோ⁴விதும்பி ந லப⁴தி. ஹத்த²தோ⁴விதவத்த²தோ⁴விதஉத³கம்பி பத்தே ஆகிரித்வா நீஹரிதும் ந வட்டதி. அனுச்சி²ட்ட²பத்தம் உச்சி²ட்ட²ஹத்தே²ன க³ஹேதும்பி ந வட்டதி. ஹத்த²ம் பன ப³ஹி தோ⁴வித்வா க³ஹேதும் வட்டதி. மச்ச²மம்ஸப²லாப²லாதீ³னி கா²த³ந்தோ யம் முகே²ன லுஞ்சித்வா லுஞ்சித்வா கா²த³தி, தம் வா தேஸம் அட்டி²ஆதி³கம் வா முக²தோ நீஹடம் புன அகா²தி³துகாமோ ச²ட்³டே³துகாமோ பத்தே ட²பேதும் ந லப⁴தி. ஸிங்கி³வேரனாளிகேரக²ண்டா³தீ³னி கா²த³ந்தேஹி ட³ம்ஸித்வா ட³ம்ஸித்வா புன ட²பேதும் லப⁴தி. ‘‘ந பி⁴க்க²வே பத்தஹத்தே²ன கவாடம் பணாமேதப்³ப³ம், யோ பணாமேய்ய, ஆபத்தி து³க்கடஸ்ஸா’’தி (சூளவ. 255) வுத்தத்தா யேன கேனசி ஸரீராவயவேன பத்தம் க³ஹேத்வா டி²தோ யேன கேனசி ஸரீராவயவேன கவாடம் பணாமேதும் ந லப⁴தி, தஸ்மா ‘‘பத்தஹத்தோ²வா’’தி வுத்தம். அம்ஸகூடே லக்³கி³த்வா டி²தஸ்ஸ வட்டதி.

68. பூ⁴மிஆதா⁴ரகேதி ஏத்த² த³ந்தவல்லிவேத்தவாகாதீ³ஹி கதே வலயாதா⁴ரகே. தா³ருத³ண்டா³தா⁴ரேதி ஏகதா³ருனா கதஆதா⁴ரகே ச ப³ஹூஹி த³ண்டே³ஹி கதஆதா⁴ரகே சாதி அத்தோ². தித³ண்டே³ ந வட்டதி. ஏதேஸு பன ஸுஸஜ்ஜிதேஸு ஏகம் பத்தம் ட²பேத்வாவ தஸ்ஸுபரி ஏகம் ட²பேதும் வட்டதி, தயோ பன ந வட்டந்தி. ஏகம் நிக்குஜ்ஜித்வாவ பூ⁴மியந்தி ஏத்த² பூ⁴மியம் கடஸாரகாதீ³ஸு அஞ்ஞதரம் பத்த²ரித்வா தஸ்ஸுபரி நிக்குஜ்ஜித்வா வா உக்குஜ்ஜித்வா வா ஏகம் ட²பேய்ய, த்³வே ட²பேதும் ந வட்டதீதி அதி⁴ப்பாயோ. த்³வே பன ட²பேந்தேன உபரி ட²பிதபத்தம் ஏகேன பஸ்ஸேன பூ⁴மியம் பு²ஸாபேத்வா ட²பேதும் வட்டதீதி வத³ந்தி.

69-70. இதா³னி அகப்பியபத்தே த³ஸ்ஸேதும் ‘‘தா³ருரூபியஸோவண்ணா’’திஆதி³ ஆரத்³த⁴ம். தத்த² மணிவேளுரியாமயாதி (சூளவ. 252; சூளவ. அட்ட². 252) மணீதி இந்த³னீலகப³ரகதாதி³. ஸசே க³ஹட்டா² ப⁴த்தக்³கே³ ஸுவண்ணரூபியதட்டகாதீ³ஸு ஸூபப்³யஞ்ஜனம் கத்வா உபனாமேந்தி, ஆமஸிதும்பி ந வட்டதி. க⁴டிகடாஹஜா (சூளவ. 255; சூளவ. அட்ட². 255) ச தும்ப³கடாஹஜா ச க⁴டிதும்ப³கடாஹஜா. ஏத்த² தும்ப³கடாஹஜாநாம அலாபு³. பத்தவினிச்ச²யோ.

பத்தனித்³தே³ஸவண்ணனா நிட்டி²தா.