45. பவாரணானித்³தே³ஸவண்ணனா

433. ‘‘அனுஜானாமி, பி⁴க்க²வே, பஞ்சன்னம் ஸங்கே⁴ பவாரேது’’ந்தி (மஹாவ. 215) வுத்தத்தா ‘‘ஸேஸா ஸங்க⁴ப்பவாரணா’’தி (மஹாவ. 215 ஆத³யோ) வுத்தா.

434. அஜ்ஜ பவாரணாதி ஏத்த² (மஹாவ. 215 ஆத³யோ) பன சாதுத்³த³ஸிகாய பவாரணாய ‘‘அஜ்ஜ பவாரணா சாதுத்³த³ஸீ’’தி புப்³ப³கிச்சம் காதப்³ப³ம், பன்னரஸியம் ‘‘அஜ்ஜ பவாரணா பன்னரஸீ’’தி.

437. தே²ரேஸு உக்குடிகம் நிஸஜ்ஜ பவாரேந்தேஸு ஸயம் பன நவோ யாவ பவாரேதி, தாவ உக்குடிகோவ அச்ச²தூதி அத்தோ². ‘‘ந பி⁴க்க²வே தே²ரேஸு உக்குடிகம் நிஸின்னேஸு பவாரயமானேஸு ஆஸனேஸு அச்சி²தப்³ப³ம். யோ அச்சே²ய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, தத³மந்தரா உக்குடிகம் நிஸீதி³தும், யாவ பவாரேதி, பவாரேத்வா ஆஸனே நிஸீதி³து’’ந்தி (மஹாவ. 211) ஹி வுத்தம்.

440-2. ஏவம் தேவாசிகப்பவாரணம் த³ஸ்ஸேத்வா இதா³னி த்³வேவாசிகஏகவாசிகஸமானவஸ்ஸிகப்பவாரணாஸு கத்தப்³ப³ம் த³ஸ்ஸேதும் ‘‘தா³னேனா’’திஆதி³மாஹ. தத்த² தா³னேனாதி தா³னேன வா. த⁴ம்மஸாகச்சா²தி இமினா த⁴ம்மகதா²ஸுத்தஸங்கா³யனாவினயவினிச்ச²யாத³யோ க³ஹிதா. தா³னேன வா த⁴ம்மஸாகச்சா²ய வா கலஹேன வா ரத்தியா கே²பிதபா⁴வதோ தேவாசிகாய ஓகாஸே அஸதி த³ஸவிதே⁴ வா அந்தராயே அனுரூபதோ உத்திம் ட²பேத்வா பவாரேய்யாதி ஸம்ப³ந்தோ⁴.

இதா³னி யதா²னுரூபதோ ஞத்தி ட²பிதா, தம் த³ஸ்ஸேதும் ‘‘ஸுணாது மே’’திஆதி³மாஹ. யதா²ட²பிதஞத்தியாதி ஏத்த² ஸப்³ப³ஸங்கா³ஹிகாசேஞத்திட²பிதா, தேவாசிகத்³வேவாசிகஏகவாசிகானம் வஸேன பவாரேதப்³ப³ம், ஸமானவஸ்ஸிகப்பவாரணாவ ஏகா ந வட்டதி. ஸசே ‘‘ஸங்கோ⁴ தேவாசிகம் பவாரேய்யா’’தி ட²பிதா, தேவாசிகா ஏவ வட்டதி, த்³வேவாசிகாத³யோ ந வட்டந்தி. ‘‘த்³வேவாசிகம் பவாரேய்யா’’தி வுத்தே த்³வேவாசிகஞ்ச தேவாசிகஞ்ச வட்டதி, ஏகவாசிகஸமானவஸ்ஸிகா ந வட்டந்தி. ‘‘ஏகவாசிகம் பவாரேய்யா’’தி வுத்தே பன ஸமானவஸ்ஸிகம் ட²பேத்வா ஸேஸா வட்டந்தி. ‘‘ஸமானவஸ்ஸிக’’ந்தி பன வுத்தே ஸப்³ப³ம் வட்டதீதி. ஆதி³கே சேத்த² ஆஹரேதி ஏத்த² பவாரணாயபி புப்³பே³ உபோஸதே² வுத்தே ‘‘யதி³ ஸமா ஆக³ச்சே²ய்யு’’ந்திஆதி³கே வாரே ஆஹரேதி அத்தோ².

443. இதா³னி வத்தப்³ப³ம் ஸந்தா⁴ய ‘‘ஏவ’’ந்தி வுத்தம். திவக்³கோ³ ச சதுவக்³கோ³ ச திசதுவக்³கோ³.

450. ‘‘ந பி⁴க்க²வே ஸாபத்திகேன பவாரேதப்³ப³ம். யோ பவாரேய்ய, ஆபத்தி து³க்கடஸ்ஸா’’தி (மஹாவ. 235) வுத்தத்தா ஸாபத்திகேனபி வேமதிகேனபி பவாரியமானே ஆபத்திம் ஸரந்தேனபி உபோஸதே² வுத்தனயேன படிபஜ்ஜிதப்³ப³ம். ‘‘வக்³கே³ ஸமக்³கே³ வக்³கோ³தி-ஸஞ்ஞினோ விமதிஸ்ஸ வா’’திஆதி³கா³தா²தோ பட்டா²ய யாவ ‘‘அந்தராயம் வ ஸங்க⁴ம் வா-தி⁴ட்டா²தும் ஸீமமேவ வா’’தி அவஸானகா³தா², தாவ ஸேஸா உபோஸதே² வுத்தா கா³தா²யோதி அதி⁴ப்பேதா.

451. பவாரிதே சாதி (மஹாவ. 213 ஆத³யோ) பட²மபவாரணாய ஸங்க⁴ம்ஹி பவாரிதேதி அதி⁴ப்பாயோ. ஏத்த² அவுத்தோ²தி பச்சி²மிகாய உபக³தோ அபரினிட்டி²தத்தா ‘‘அவுத்தோ²’’தி வுச்சதி.

452. சாதுமாஸினீதி கத்திகபுண்ணமீ. ஏத்த² வுத்த²வஸ்ஸா நாம பச்சி²மிகாய உபக³தா. பவாரணாவினிச்ச²யோ.

பவாரணானித்³தே³ஸவண்ணனா நிட்டி²தா.