35. பரிக்கா²ரனித்³தே³ஸவண்ணனா

259-260. கி³ரிகூடந்தி மகரத³ந்தகம். ஸிப்³பி³துஞ்ச சி²ந்தி³துஞ்ச ந வட்டதீதி ஸப்³ப³த்த² யோஜனா. த³ண்டே³தி ச²த்தத³ண்டே³.

261. ஸிப்³பி³தும் வா பஞ்ஜரம் வினந்தி⁴தும் வா தி²ரத்த²ம் ச²த்தே ப³ந்தி⁴தும் த³ண்டே³ லேகா² வட்டதீதி ஸம்ப³ந்தோ⁴. ஸசே வுத்தப்பகாரம் அகப்பியச²த்தம் லப⁴தி, க⁴டகம்பி வாளரூபம்பி சி²ந்தி³த்வா தா⁴ரேதப்³ப³ம், லேகா²பி க⁴ம்ஸேத்வா அபனேதப்³பா³, ஸுத்தகேன வா த³ண்டோ³ வேடே²தப்³போ³.

262. அனுவாதம் ஸந்தா⁴ய ‘‘அந்தே வா’’தி வுத்தம். த்³வின்னம் பட்டானம் ஸங்க⁴டிதட்டா²னம் ஸந்தா⁴ய ‘‘பட்டமுகே² வாபீ’’தி வுத்தம். வரகஸீஸாகாரேன ஸிப்³ப³னம் ஸந்தா⁴ய ‘‘வேணிகா’’தி ச ஸதபதா³காரேன ஸிப்³ப³னம் ஸந்தா⁴ய ‘‘ஸங்க²லிகாபி வா’’தி ச வுத்தம். ஸதபதி³ஸதி³ஸம் அஞ்ஞம் வா ஸூசிவிகாரம் ந கப்பதி, பகதிஸூசிகம்மமேவ வட்டதீதி அத்தோ². பாளிகண்ணிகஆதி³கம் சீவரே ந ச கப்பதீதி ஸம்ப³ந்தோ⁴.

263-4. சதுகோணாவ (பாரா. அட்ட². 1.85) கப்பரேதி ஸம்ப³ந்தோ⁴. அக்³கி⁴கந்தி அக்³கி⁴யம் சேதியஸதி³ஸம். ஏத்தா²தி க³ண்டி²பாஸகபட்டே. கோணஸுத்தா ச பீளகாதி ந கேவலம் சதுகோணா க³ண்டி²கபாஸகபட்டாவ கப்பந்தி, அத² கோ² து³விஞ்ஞேய்யா கோணஸுத்தபீளகா ச கப்பரேதி அத்தோ². க³ந்த⁴ம் தேலம் வாதி க³ந்த⁴ம் வா தேலம் வா.

265. ரத்தந்தி (பாரா. அட்ட². 1.85) ரஜிதம். அஞ்ஞேன வாதி முக்³க³ராதி³னா வா. கத்வாதி ட²பேத்வா. பஹாரே ந ச முட்டி²னாதி முட்டி²னா ந பஹாரேய்யாதி அத்தோ².

266-7. ச²த்தவட்டியம் (பாரா. அட்ட². 1.85) லேக²ம் ட²பேத்வா த⁴ம்மகரணே லேகா² ந வட்டதீதி ஸம்ப³ந்தோ⁴. குஞ்சிகாய ச பிப்ப²லே ச மணிகா ச பீளகா ச ந வட்டதீதி ஸம்ப³ந்தோ⁴. தத்த² மணிகாதி ஏகா ஏவ வட்டமணிகா. பீளகா முத்தராஜிஸதி³ஸா ப³ஹூ.

268-9. மாலாத்³யரணியந்தி (பாரா. அட்ட². 1.85) அரணியம் மாலாதி³ வண்ணமட்ட²ம் ந வட்டதீதி ஸம்ப³ந்தோ⁴. ஏவம் ஸப்³ப³த்த². திபுஸீஸமயே பத்தமண்ட³லே பி⁴த்திகம்மஞ்ச ந வட்டதீதி அத்தோ². ஹித்வாதி ட²பேத்வா. ஸூசிஸண்டா³ஸகோ (பாரா. அட்ட². 1.85) நாம ஸூசிம் ட³ம்ஸாபேத்வா க⁴ம்ஸிதும் கதோ தா³ருமயோ. ‘‘அனுஜானாமி, பி⁴க்க²வே, மகரத³ந்தகம் சி²ந்தி³து’’ந்தி (சூளவ. 253) வுத்தத்தா பத்தமண்ட³லே மகரத³ந்தகம் வட்டதி, அஞ்ஞம் பி⁴த்திகம்மாதி³விகாரமேவ ந வட்டதி, தஸ்மா கி³ரிகூடம் பத்தமண்ட³லே ட²பேத்வா அவஸேஸே ந வட்டதீதி வேதி³தப்³ப³ம்.

272. ஸேனாஸனேதி (பாரா. அட்ட². 1.85) பாஸாதா³தி³ஸேனாஸனேதி அத்தோ².

273. புமித்தி²ரூபரஹிதந்தி புரிஸரூபஇத்தி²ரூபரஹிதந்தி அத்தோ². பரிக்கா²ரவினிச்ச²யோ.

பரிக்கா²ரனித்³தே³ஸவண்ணனா நிட்டி²தா.