22. உபாஹனனித்³தே³ஸவண்ணனா

175. கு³ணங்கு³ணூபாஹனாதி (மஹாவ. அட்ட². 245) சதுபடலதோ பட்டா²ய வுச்சதி, ந ஏகத்³விதிபடலதோ பட்டா²ய ‘‘அனுஜானாமி, பி⁴க்க²வே, ஏகபலாஸிகம் உபாஹனம், ந பி⁴க்க²வே தி³கு³ணா உபாஹனா தா⁴ரேதப்³பா³, ந திகு³ணா உபாஹனா தா⁴ரேதப்³பா³, ந கு³ணங்கு³ணூபாஹனா தா⁴ரேதப்³பா³, யோ தா⁴ரேய்ய, ஆபத்தி து³க்கடஸ்ஸா’’தி (மஹாவ. 245) வுத்தத்தா. ‘‘அனுஜானாமி, பி⁴க்க²வே, ஓமுக்கம் கு³ணங்கு³ணூபாஹனம், ந பி⁴க்க²வே நவா கு³ணங்கு³ணூபாஹனா தா⁴ரேதப்³பா³, யோ தா⁴ரேய்ய, ஆபத்தி து³க்கடஸ்ஸா’’தி (மஹாவ. 247) வுத்தத்தா ‘‘நவா’’தி வுத்தம். ஸப்³ப³த்தா²பி மஜ்ஜி²மதே³ஸே கி³லானோபி நவம் கு³ணங்கு³ணூபாஹனம் ந லப⁴தி, ஏகவாரம்பி அஞ்ஞேஹி பரிபு⁴த்தம் ஓமுக்கஉபாஹனஸங்கா²தம் லப⁴தி, பச்சந்திமேஸு ஜனபதே³ஸு கி³லானோ நவம்பி லப⁴தீதி வேதி³தப்³ப³ம் ‘‘அனுஜானாமி, பி⁴க்க²வே, ஸப்³ப³பச்சந்திமேஸு ஜனபதே³ஸு கு³ணங்கு³ணூபாஹன’’ந்தி (மஹாவ. 259) அவிஸேஸேன வுத்தத்தா.

ஸப்³ப³ஸ்ஸாதி கி³லானஸ்ஸாபி அகி³லானஸ்ஸாபீதி அத்தோ². மஜ்ஜி²மதே³ஸேபி பச்சந்திமதே³ஸேபி ஆராமே ஆராமூபசாரே கி³லானஸ்ஸாபி அகி³லானஸ்ஸாபி ‘‘அனுஜானாமி, பி⁴க்க²வே, அஜ்ஜா²ராமே உபாஹனம் தா⁴ரேது’’ந்தி (மஹாவ. 249) வுத்தத்தா கப்பியந்தி அத்தோ². ஸப்³ப³த்தா²தி ஆராமேபி கா³மேபி. அகல்லகஸ்ஸாதி கி³லானஸ்ஸ. ஏத்த² பன மஜ்ஜி²மதே³ஸே கி³லானஸ்ஸ கு³ணங்கு³ணூபாஹனா பரிபு⁴த்தாவ ஆராமேபி கா³மேபி வட்டதி, பச்சந்திமதே³ஸே அபரிபு⁴த்தாபி. மஜ்ஜி²மதே³ஸேபி பச்சந்திமதே³ஸேபி ப⁴க³வதா கி³லானஸ்ஸேவ உபாஹனா அனுஞ்ஞாதா ‘‘அனுஜானாமி, பி⁴க்க²வே, யஸ்ஸ பாதா³ வா து³க்கா², பாதா³ வா ப²லிதா, பாத³கி²லோ வா ஆபா³தோ⁴, உபாஹனம் தா⁴ரேது’’ந்தி (மஹாவ. 249) ச ‘‘அனுஜானாமி, பி⁴க்க²வே, கி³லானேன பி⁴க்கு²னா ஸஉபாஹனேன கா³மம் பவிஸிது’’ந்தி (மஹாவ. 256) வுத்தத்தா ச. மஜ்ஜி²மதே³ஸே ச கி³லானோ நவம் கு³ணங்கு³ணூபாஹனம் தா⁴ரேதும் யதி³ லப⁴தி, கத²ம் பதே³ஸபஞ்ஞத்தி ஹோதீதி? ஸப்³ப³த்த² பன ப⁴க³வதா கி³லானஸ்ஸேவ உபாஹனா அனுஞ்ஞாதா, தஸ்மா மஜ்ஜி²மதே³ஸே கி³லானோ நவம் கு³ணங்கு³ணூபாஹனம் லப⁴தீதி க³ஹேதப்³ப³ந்தி வத³ந்தி.

176-9. ஸப்³பா³வ நீலகா (மஹாவ. 246; மஹாவ. அட்ட². 246) ஸப்³ப³னீலகா. ஏஸ நயோ ஸப்³ப³த்த² ஓதா³தகாதீ³ஸுபி. ஓதா³தம் பன நேவ பாளியம், ந அட்ட²கதா²யம் படிக்கி²த்தம், அனுலோமவஸேன பன இத⁴ படிக்கி²த்தந்தி வேதி³தப்³ப³ம். மஹாரங்க³ரத்தா ஸதபதி³பிட்டி²வண்ணா. மஹானாமரங்க³ரத்தா மந்த³ரத்தா. மஞ்ஜேட்டி²கா கணவேரபுப்ப²வண்ணா. புப்ப²லதாதீ³ஹி விசித்தா சித்ரா. நீலபீதாதி³வத்³தி⁴காதி ஏத்த² ஆதி³-ஸத்³தே³ன ஓதா³தலோஹிதமஞ்ஜேட்டி²கமஹாரங்க³மஹானாமரங்க³ரத்தாதி³வஸேன வத்³தி⁴கா க³ஹிதா. ஸீஹப்³யக்³கு⁴த்³தா³ஜினதீ³பீனம் சம்மேஹி சாதி ஸம்ப³ந்தோ⁴. கோசீதி கி³லானோபி அகி³லானோபி.

180. ஸகலம் வா ஏகதே³ஸகம் வா ரஜனம் சோளேன (மஹாவ. அட்ட². 246) புஞ்சி²த்வா வளஞ்ஜேய்யாதி அத்தோ². க²ல்லகாதி³கம் பன ஸப்³ப³ம் ஹாரித்வா வளஞ்ஜேதப்³ப³ம். உபாஹனவினிச்ச²யோ.

உபாஹனனித்³தே³ஸவண்ணனா நிட்டி²தா.