15. உபஜ்ஜா²சரியவத்தனித்³தே³ஸவண்ணனா

145. உபஜ்ஜா²சரியேதி ஏத்த² (மஹாவ. 64, 67, 74, 78-79; சூளவ. 375, 377; 379-382; மஹாவ. அட்ட². 64, 67, 75, 76, 77) ஆசரியோ நாம நிஸ்ஸயாசரியோ பப்³ப³ஜ்ஜாசரியோ உபஸம்பதா³சரியோ த⁴ம்மாசரியோதி சதுப்³பி³தோ⁴. ஏதேஸு ஹி நிஸ்ஸயந்தேவாஸிகேன யாவ ஆசரியம் நிஸ்ஸாய வஸதி, தாவ ஸப்³ப³மாசரியவத்தம் காதப்³ப³ம். பப்³ப³ஜ்ஜாஉபஸம்பதா³த⁴ம்மந்தேவாஸிகேஹி பன நிஸ்ஸயமுத்தகேஹிபி ஆதி³தோ பட்டா²ய யாவ சீவரரஜனம், தாவ வத்தம் காதப்³ப³ம். அனாபுச்சி²த்வா பத்ததா³னாதி³ம்ஹி பன ஏதேஸம் அனாபத்தி. ஏதேஸு ச பப்³ப³ஜ்ஜந்தேவாஸிகோ ச உபஸம்பத³ந்தேவாஸிகோ ச ஆசரியஸ்ஸ யாவஜீவம் பா⁴ரோ, நிஸ்ஸயந்தேவாஸிகோ ச த⁴ம்மந்தேவாஸிகோ ச யாவ ஸமீபே வஸதி, தாவதே³வ. ஸுட்டு² பியஸீலோ ஸுபேஸலோ, ஸிக்கா²காமோதி அத்தோ². த³ந்தகட்ட²ம் தே³ந்தேன ஏகம்ஸம் உத்தராஸங்க³ம் கரித்வா மஹந்தம் மஜ்ஜி²மம் கு²த்³த³கந்தி தீணி த³ந்தகட்டா²னி உபனேதப்³பா³னி. தேஸு யம் தீணி தி³வஸானி க³ண்ஹாதி, தம் ஸல்லக்கே²த்வா சதுத்த²தி³வஸதோ பட்டா²ய தாதி³ஸம்யேவ ஸம்மா உபோ⁴ஹி ஹத்தே²ஹி தா³தப்³ப³ம். ஸசே யம் வா தம் வா க³ண்ஹாதி, யதா²லத்³த⁴ம் உபனேதப்³ப³ம். தோயந்தி ஸீதஞ்ச உண்ஹஞ்ச உத³கம் உபனேத்வா யம் தீணி தி³வஸானி வளஞ்ஜேதி, சதுத்த²தி³வஸதோ பட்டா²ய தாதி³ஸம் உபனேதப்³ப³ம். ஸசே த்³வேபி வளஞ்ஜேதி, து³வித⁴ம்பி உபனேதப்³ப³ம். ஸசே யாகு³ ஹோதி, பா⁴ஜனம் தோ⁴வித்வா உபனேதப்³ப³ம்.

146. பத்தே வத்தம் சரேதி ‘‘யாகு³ம் பீதஸ்ஸ உத³கம் த³த்வா பா⁴ஜனம் படிக்³க³ஹேத்வா நீசம் கத்வா ஸாது⁴கம் அபரிக⁴ம்ஸந்தேன தோ⁴வித்வா படிஸாமேதப்³ப³’’ந்தி (மஹாவ. 66, 78; சூளவ. 376, 380) வுத்தம் பத்தே வத்தம் சரேதி அத்தோ². கா³மப்பவேஸே வத்தம் சரேதி ஏவம் ஸப்³ப³த்த². ‘‘ஸசே உபஜ்ஜா²யோ வா ஆசரியோ வா கா³மம் பவிஸிதுகாமோ ஹோதி, நிவாஸனம் தா³தப்³ப³ம், படினிவாஸனம் படிக்³க³ஹேதப்³ப³ம், காயப³ந்த⁴னம் தா³தப்³ப³ம், ஸகு³ணம் கத்வா ஸங்கா⁴டியோ தா³தப்³பா³, தோ⁴வித்வா பத்தோ ஸோத³கோ தா³தப்³போ³’’தி (மஹாவ. 66, 78; சூளவ. 376, 380) இத³ம் கா³மப்பவேஸனே வத்தம் நாம. ‘‘ஸசே உபஜ்ஜா²யோ வா ஆசரியோ வா பச்சா²ஸமணம் ஆகங்க²தி, திமண்ட³லம் படிச்சா²தே³ந்தேன பரிமண்ட³லம் நிவாஸேத்வா காயப³ந்த⁴னம் ப³ந்தி⁴த்வா ஸகு³ணம் கத்வா ஸங்கா⁴டியோ பாருபித்வா க³ண்டி²கம் படிமுஞ்சித்வா தோ⁴வித்வா பத்தம் க³ஹேத்வா உபஜ்ஜா²யஸ்ஸ வா ஆசரியஸ்ஸ வா பச்சா²ஸமணேன ஹோதப்³ப³’’ந்திஆதி³னா (மஹாவ. 66, 78; சூளவ. 376, 380) நயேன வுத்தம் க³மனே வத்தம் நாம. ‘‘நிவத்தந்தேன பட²மதரம் ஆக³ந்த்வா ஆஸனம் பஞ்ஞாபேதப்³ப³’’ந்திஆதி³னா (மஹாவ. 66, 78; சூளவ. 376, 380) நயேன வுத்தம் ஆக³மே வத்தம் நாம. ‘‘உபஜ்ஜா²யம்ஹி வுட்டி²தே ஆஸனம் உத்³த⁴ரிதப்³ப³ம், பாதோ³த³கம் பாத³பீட²ம் பாத³கத²லிகம் படிஸாமேதப்³ப³’’ந்தி (மஹாவ. 66, 78; சூளவ. 376, 380) ஏவம் வுத்தம் ஆஸனாதீ³ஸு வத்தம் நாம. உபாஹனாய வத்தம் நாம ‘‘உபாஹனா புஞ்சி²தப்³பா³, உபாஹனா புஞ்ச²ந்தேன பட²மம் ஸுக்கே²ன சோளகேன புஞ்சி²தப்³பா³, பச்சா² அல்லேனா’’திஆதி³னா (சூளவ. 357, 359) வுத்தம். சீவரே வத்தம் நாம ‘‘ஸசே சீவரம் ஸின்னம் ஹோதி, முஹுத்தம் உண்ஹே ஓதாபேதப்³ப³ம், ந ச உண்ஹே சீவரம் நித³ஹிதப்³ப³’’ந்திஆதி³னா (மஹாவ. 66, 78; சூளவ. 376, 380) வுத்தம்.

147. பரிபோ⁴ஜனீயபானீய-வச்சப்பஸ்ஸாவடா²னிஸூதி ஏத்த² ஸசே பானீயம் ந ஹோதி, பானீயம் உபட்டா²பேதப்³ப³ம். ஸசே பரிபோ⁴ஜனீயம் ந ஹோதி, பரிபோ⁴ஜனீயம் உபட்டா²பேதப்³ப³ம். ஸசே வச்சகுடி உக்லாபா ஹோதி, வச்சகுடி ஸம்மஜ்ஜிதப்³பா³. ததா² பஸ்ஸாவட்டா²னே ஏவம் வத்தம் சரிதப்³ப³ந்தி அத்தோ². ‘‘விஹாரம் ஸோதே⁴ந்தேன பட²மம் பத்தசீவரம் நீஹரித்வா ஏகமந்தம் நிக்கி²பிதப்³ப³’’ந்திஆதி³னா நயேன வுத்தம் விஹாரஸோத⁴னே வத்தம் நாம. ‘‘பூ⁴மத்த²ரணம் ஓதாபேத்வா ஸோதே⁴த்வா பப்போ²டேத்வா அதிஹரித்வா யதா²பஞ்ஞத்தம் பஞ்ஞாபேதப்³ப³’’ந்திஆதி³னா (மஹாவ. 66, 78; சூளவ. 376, 380) வுத்தம் புன பஞ்ஞாபனே வத்தம் நாம.

148. இதா³னி விஹாரம் ஸோதே⁴ந்தேன ஏவம் ஸோதே⁴தப்³ப³ந்தி தம் த³ஸ்ஸேதும் ‘‘ந பப்போ²டேய்யா’’திஆதி³மாஹ. தஸ்ஸத்தோ² – விஹாரம் ஸோதே⁴ந்தோ பி⁴க்கு² பூ⁴மத்த²ரணாதி³ஸயனாஸனம் படிவாதே வா பங்க³ணே வா பானீயஸாமந்தா வா ந பப்போ²டேய்யாதி. பங்க³ணேதி ப³ஹூனம் ஸன்னிபாதே டா²னே.

149. ந்ஹானேதி ‘‘ஸசே உபஜ்ஜா²யோ நஹாயிதுகாமோ ஹோதி, நஹானம் படியாதே³தப்³ப³ம். ஸசே ஸீதேன அத்தோ² ஹோதி, ஸீதம் படியாதே³தப்³ப³’’ந்திஆதி³னா (மஹாவ. 66; சூளவ. 376) வுத்தம் நஹானே வத்தம் நாம, ‘‘உபஜ்ஜா²யஸ்ஸ க³த்ததோ உத³கம் ஸம்மஜ்ஜிதப்³ப³ம், நிவாஸனம் தா³தப்³ப³’’ந்திஆதி³னா (மஹாவ. 66; சூளவ. 376) வுத்தம் நஹாதஸ்ஸ காதப்³ப³ம் நாம. ரங்க³பாகேதி ‘‘ஸசே உபஜ்ஜா²யஸ்ஸ ஆசரியஸ்ஸ ரஜனம் பசிதப்³ப³ம் ஹோதி, ஸத்³தி⁴விஹாரிகேன அந்தேவாஸிகேன பசிதப்³ப³’’ந்தி (மஹாவ. 66, 78; சூளவ. 376, 380) வுத்தம். தோ⁴வனேதி ‘‘ஸசே உபஜ்ஜா²யஸ்ஸ ஆசரியஸ்ஸ சீவரம் தோ⁴விதப்³ப³ம் ஹோதி, ஸத்³தி⁴விஹாரிகேன அந்தேவாஸிகேன தோ⁴விதப்³ப³ம், உஸ்ஸுக்கம் வா காதப்³ப³’’ந்தி (மஹாவ. 66, 78; சூளவ. 376, 380) வுத்தம். ஸிப்³ப³னேதி ‘‘ஸசே உபஜ்ஜா²யேன ஆசரியேன சீவரம் காதப்³ப³ம் ஹோதி, ஸத்³தி⁴விஹாரிகேன அந்தேவாஸிகேன காதப்³ப³’’ந்தி (மஹாவ. 66, 78; சூளவ. 376, 380) வுத்தம். சீவரே தே²வே டி²தே ரஜந்தோ ந வஜே ந பக்கமேய்யாதி அத்தோ². ‘‘சீவரம் ரஜந்தேன ஸாது⁴கம் ஸம்பரிவத்தகம் ஸம்பரிவத்தகம் ரஜிதப்³ப³ம், ந ச அச்சி²ன்னே தே²வே பக்கமிதப்³ப³’’ந்தி (மஹாவ. 66, 78; சூளவ. 376, 380) ஹி வுத்தம்.

150. ஏகச்சஸ்ஸாதி ஆசரியுபஜ்ஜா²யானம் விஸபா⁴க³ஸ்ஸ அனத்த²காமஸ்ஸ வேரிபுக்³க³லஸ்ஸ. அனாபுச்சா²தி ஆசரியுபஜ்ஜா²யானம் அனாரோசேத்வா. கிஞ்சனந்தி யம் கிஞ்சி.

151-2. தஸ்ஸாதி ஏகச்சஸ்ஸ. நின்னேதுந்தி நீஹரிதும். கிச்சயம் பரிகம்மம் வாதி வேய்யாவச்சம் வா பிட்டி²பரிகம்மாதி³பரிகம்மம் வா அத்தனா தஸ்ஸ காதும் வா தேன அத்தனோ காராபேதும் வாதி ஏவமத்தோ² வேதி³தப்³போ³.

153. ஸசே ஆசரியுபஜ்ஜா²யா அஞ்ஞத்த² க³தா ஹோந்தி, பரிவேணம் க³ந்த்வா அபஸ்ஸந்தேஹி கா³மம் பவிஸிதும் வட்டதி. கா³மம் பவிஸந்தோ ஸசே பஸ்ஸதி, ஆபுச்சி²தப்³ப³மேவாதி வத³ந்தி. ‘‘உபஜ்ஜா²யம் அனாபுச்சா² ந தி³ஸா பக்கமிதப்³பா³’’தி (மஹாவ. 66, சூளவ. 376) ஹி வுத்தம். அத்தனோ கிச்சயம் நாம அந்தோவிஹாரேபி அத்தனோ பத்தபசனசீவரகம்மகேஸச்சே²த³னாதி³.

154. ஸங்கா⁴யத்தகம்மானி நாம பரிவாஸமானத்தஅப்³பா⁴னதஜ்ஜனீயனியஸ்ஸபப்³பா³ஜனீயபடிஸாரணீயஉக்கே²பனாத³யோ.

155. வுட்டா²னம் நேஸமாக³மேதி ‘‘ஸசே உபஜ்ஜா²யோ வா ஆசரியோ வா கி³லானோ ஹோதி, யாவஜீவம் உபட்டா²தப்³போ³, வுட்டா²னமஸ்ஸ ஆக³மேதப்³ப³’’ந்தி (மஹாவ. 66; சூளவ. 376) ஹி வுத்தம். உபஜ்ஜா²சரியவத்தவினிச்ச²யோ.

உபஜ்ஜா²சரியவத்தனித்³தே³ஸவண்ணனா நிட்டி²தா.