39. வஸ்ஸூபனாயிகனித்³தே³ஸோ

வஸ்ஸூபனாயிகா சேவாதி –

309. புரிமிகா பச்சி²மிகா, து³வே வஸ்ஸூபனாயிகா;

தத்தா²லயபரிக்³கா³ஹோ, வசீபே⁴தோ³ ச ஏதி³ஸோ.

310. ‘‘இமஸ்மிம் விஹாரே இமம், தேமாஸம் வஸ்ஸம் உபேமி;

இத⁴ வஸ்ஸம் உபேமீ’’தி, சித்துப்பாதே³த்த² ஆலயோ.

311. நோபேதுகாமோ ஆவாஸம், தத³ஹூதிக்கமேய்ய வா;

ப⁴வேய்ய து³க்கடாபத்தி, ஜானம் வானுபக³ச்ச²தோ.

312. து³தியம் உபக³ச்சே²ய்ய, சி²ன்னவஸ்ஸோனுபாக³தோ;

ந பக்கமேய்ய தேமாஸம், அவஸித்வான சாரிகம்.

313. மாதாபிதூனமத்தா²ய, பஞ்சன்னம் ஸஹத⁴ம்மினம்;

கி³லானதது³பட்டா²க-ப⁴த்தமேஸிஸ்ஸமோஸத⁴ம்.

314. புச்சி²ஸ்ஸாமி உபட்டி²ஸ்ஸம், க³ந்த்வானபி⁴ரதம் அஹம்;

வூபகாஸிஸ்ஸம் குக்குச்சம், தி³ட்டி²ம் க³ருகமாதி³கம்.

315. கரிஸ்ஸம் வாபி காரேஸ்ஸம், வினோத³னம் விவேசனம்;

வுட்டா²னம் வாபி உஸ்ஸுக்கம், க³ந்துமிச்சேவமாதி³னா;

லப்³ப⁴ம் ஸத்தாஹகிச்சேன, பஹிதாபஹிதேபி வா.

316. ஸங்க⁴கம்மே வஜே த⁴ம்ம-ஸ்ஸவனத்த²ம் நிமந்திதோ;

க³ரூஹி பஹிதோ வாபி, க³ரூனம் வாபி பஸ்ஸிதும்.

317. ந ப⁴ண்ட³தோ⁴வனுத்³தே³ஸ-ஞாதுபட்டா²கத³ஸ்ஸனே;

லப்³ப⁴ம் ந பாபுணேய்யஜ்ஜே-வாக³மிஸ்ஸந்துதூ³ரகோ³.

318. ஸேஸஞாதீஹி பஹிதே, பி⁴க்கு²னிஸ்ஸிதகேன ச;

உபாஸகோபாஸிகாஹி, நித்³தி³ஸித்வாவ பேஸிதே.

319. வஸ்ஸச்சே²தே³ அனாபத்தி, அந்தராயே ஸதத்தனோ;

ஸங்க⁴ஸாமக்³கி³யா வா நோ, சி²ன்னவஸ்ஸோ பவாரயே.

320. அஜ்ஜோ²காஸே ச ருக்க²ஸ்ஸ, ஸுஸிரே விடபேபி வா;

ச²வகுடிச²த்தசாடீ-ஸூபக³ந்தும் ந வட்டதி.

321. அஸேனாஸனிகேனாபி, உபக³ந்தும் ந லப்³ப⁴தி;

பவாரேதுஞ்ச லப்³ப⁴தி, நாவாஸத்த²வஜூபகோ³தி.