40. அவேப⁴ங்கி³யனித்³தே³ஸோ

அவேப⁴ங்கி³யந்தி –

322. ஆராமாராமவத்தூ²னி, விஹாரோ தஸ்ஸ வத்து² ச;

மஞ்சோ பீட²ம் பி⁴ஸி பி³ப்³போ³-ஹனாதி³ஸயனாஸனம்.

323. லோஹகும்பீ⁴ கடாஹோ ச,

லோஹபா⁴ணகவாரகோ;

குடா²ரீ வாஸி ப²ரஸு,

குத்³தா³லோ ச நிகா²த³னம்.

324. வல்லி வேளு திணம் பண்ணம், முஞ்ஜபப்³ப³ஜமத்திகா;

தா³ருமத்திகப⁴ண்டா³னி, பஞ்சேதே அவிபா⁴ஜியா.

325. து²ல்லச்சயம் பா⁴ஜயதோ, பா⁴ஜிதாபி அபா⁴ஜிதா;

க³ருப⁴ண்டா³னி வுச்சந்தி, ஏதேவிஸ்ஸஜ்ஜியானி ச.

326. வல்லிட்³ட⁴பா³ஹுமத்தாபி, வேளு அட்ட²ங்கு³லாயதோ;

திணாதி³ முட்டி²மத்தம்பி, பண்ணம் ஏகம்பி மத்திகா.

327. பாகதா பஞ்சவண்ணா வா, ஸுதா⁴கங்கு³ட்ட² ஆதி³கா;

தாலபக்கப்பமாணாபி, தி³ன்னா வா தத்த²ஜாதகா.

328. ரக்கி²தா ஸங்கி⁴கா ரஜ்ஜு-யோத்தாதீ³பி அபா⁴ஜியா;

நிட்டி²தே பா⁴ஜியா கம்மே, ஸங்கி⁴கே சேதியஸ்ஸ வா.

329. பத்தாதி³ பி⁴க்கு²ஸாருப்பம், ததா² விப்பகதாகதம்;

பா⁴ஜியம் லோஹப⁴ண்டே³ஸு, வாரகம் பாத³க³ண்ஹகம்.

330. வேளும்ஹி பா⁴ஜியா தேல-நாளி கத்தரத³ண்ட³கோ;

ச²த்தத³ண்ட³ஸலாகாயோ, ததோ²பாஹனத³ண்ட³கோ.

331. அனுஞ்ஞாதவாஸித³ண்டோ³, கரண்டோ³ பாத³க³ண்ஹகோ;

அரணஞ்ஜனிஸிங்கா³தி³, பி⁴க்கூ²பகரணம் ததா².

332. தச்சி²தானிட்டி²தம் தா³ருப⁴ண்ட³ம் த³ந்தஞ்ச பா⁴ஜியம்;

பி⁴க்கூ²பகரணே பாத³க⁴டகோ மத்திகாமயோ.

333. பா⁴ஜியம் கப்பியம் சம்மம், ஏளசம்மமபா⁴ஜியம்;

க³ருனா க³ருப⁴ண்ட³ஞ்ச, தா²வரம் தா²வரேன ச.

334. தா²வரம் பரிவத்தேய்ய, ததா² கத்வா ச பு⁴ஞ்ஜது;

வல்லாதி³ம் பா²திகம்மேன, க³ண்ஹே ஸேஸமபா⁴ஜியந்தி.