38. குலதூ³ஸனனித்³தே³ஸோ

தூ³ஸனந்தி –

297. புப்ப²ம் வேளும் ப²லம் சுண்ணம், த³ந்தகட்ட²ஞ்ச மத்திகம்;

ஸங்க³ஹணத்த²ம் த³த³தோ, குலதூ³ஸனது³க்கடம்.

298. து²ல்லச்சயம் க³ருப⁴ண்ட³ம், இஸ்ஸரேனேத்த² ஸங்கி⁴கம்;

தே³ந்தஸ்ஸ து³க்கடாதீ³னி, தே²ய்யா ஸங்க⁴ஞ்ஞ ஸந்தகம்.

299. குலஸங்க³ஹா ரோபேதும், ரோபாபேதுஞ்ச ஸப்³ப³தா²;

ப²லபுப்பூ²பக³ம் ருக்க²ம், ஜக்³கி³துஞ்ச ந வட்டதி.

300. நிமித்தோபா⁴ஸதோ கப்பவோஹாரபரியாயதோ;

அத்தனோ பரிபோ⁴க³த்த²ம், ரோபனாதீ³னி லப்³ப⁴ரே.

301. வுத்தாவ வேஜ்ஜிகா ஜங்க⁴பேஸனே கி³ஹிகம்மஸு;

ட²பேத்வா பிதரோ ப⁴ண்டு³ம், வேய்யாவச்சகரம் ஸகம்.

302. து³க்கடம் பத³வாரேன, ஹரணே தூ³தஸாஸனம்;

ஸாஸனம் அக்³க³ஹேத்வாபி, பட²மம் வத³தோ புன.

303. உப்பன்னபச்சயா ஏவம், பஞ்சன்னம்பி அகப்பியா;

அபூ⁴தாரோசனாரூப-ஸம்வோஹாருக்³க³ஹாதி³ஸா.

304. ஹராபேத்வா ஹரித்வாபி, பிதூனம் ஸேஸஞாதினம்;

பத்தானம் வத்து²பூஜத்த²ம், தா³தும் புப்பா²னி லப்³ப⁴தி;

மண்ட³னத்த²ஞ்ச லிங்கா³தி³-பூஜத்த²ஞ்ச ந லப்³ப⁴தி.

305. ததா² ப²லம் கி³லானானம், ஸம்பத்திஸ்ஸரியஸ்ஸ ச;

பரிப்³ப³யவிஹீனானம், தா³தும் ஸபரஸந்தகம்.

306. பா⁴ஜேந்தே ப²லபுப்ப²ம்ஹி, தே³ய்யம் பத்தஸ்ஸ கஸ்ஸசி;

ஸம்மதேனாபலோகேத்வா, தா³தப்³ப³மிதரேன து.

307. விஹாரே வா பரிச்சி²ஜ்ஜ, கத்வான கதிகம் ததோ;

தே³ய்யம் யதா²பரிச்சே²த³ம், கி³லானஸ்ஸேதரஸ்ஸ வா;

யாசமானஸ்ஸ கதிகம், வத்வா ருக்கா²வ த³ஸ்ஸியா.

308. ஸிரீஸகஸவாதீ³னம், சுண்ணே ஸேஸே ச நிச்ச²யோ;

யதா²வுத்தனயோ ஏவ, பண்ணம்பேத்த² பவேஸயேதி.