37. உக்³க³ஹனித்³தே³ஸோ

உக்³க³ஹோதி –

281. கம்மசேதியஸங்க⁴ஞ்ஞ-புக்³க³லத்த²ம் க³ணஸ்ஸ ச;

த³ஸபே⁴த³ம்பி ரதனம், உக்³க³ண்ஹந்தஸ்ஸ து³க்கடம்.

282. நிஸ்ஸக்³கி³ தேஸு அத்தத்த²ம், த்³வீஸு ஸேஸேஸு து³க்கடம்;

அனாமஸித்வா வுத்தே து, க³ணம் ஸங்க⁴ஞ்ச புக்³க³லம்.

283. ‘‘சேத்யஸ்ஸ நவகம்மஸ்ஸ, த³ம்மீ’’தி ந படிக்கி²பே;

வதே³ கப்பியகாரானம், ‘‘வத³ந்தேவமிமே’’ இதி.

284. கே²த்தம் வத்து²ம் தளாகம் வா, தே³ந்தே தா³ஸபஸ்வாதி³கம்;

படிக்கி²பித்வா க³ண்ஹேய்ய, கப்பியேன கமேன ச;

கே²த்தாதீ³னி விஹாரஸ்ஸ, வுத்தே த³ம்மீதி வட்டதி.

285. நவமாதிககேதா³ர-தளாககிரியானவே;

மத்திகுத்³த⁴ரணம் ப³ந்தோ⁴, தி²ரகாரோ ச ஆளியா.

286. திரேகபா⁴க³க³ஹணம், கேதா³ரே அனவே நவே;

அபரிச்ச²ன்னபா⁴கே³ ச, ஸஸ்ஸே ‘‘தே³தே²த்தகே’’ இதி;

கஹாபணுட்டா²பனஞ்ச, ஸப்³பே³ஸம்பி அகப்பியம்.

287. அவத்வா கஸ வப்பிச்சாதே³த்திகாய ச பூ⁴மியா;

பதிட்டா²பேதி பூ⁴மிம் வா, பா⁴கோ³ தே³ய்யோதி ஏத்தகோ.

288. பூ⁴மிபா⁴கே³ கதம் ஸஸ்ஸம், ஏத்தகே க³ண்ஹதே²த்தகம்;

க³ண்ஹனத்த²ம் வத³ந்தேவம், பமாணம் த³ண்ட³ரஜ்ஜுபி⁴.

289. மினனே ரக்க²ணே ட²த்வா, க²லே தம்னீஹராபனே;

கோட்டா²தி³படிஸாமனே, தஸ்ஸேவேதமகப்பியம்.

290. படிஸாமேய்ய பாசித்தி, யம் கிஞ்சி கி³ஹிஸந்தகம்;

ப⁴ண்டா³கா³ரிகஸீஸேன, ஸசேபி பிதுஸந்தகம்.

291. பிதூனம் கப்பியம் வத்து²ம், அவஸ்ஸம் படிஸாமியம்;

அத்தனோ ஸந்தகம் கத்வா, லப்³ப⁴தே படிஸாமிதும்.

292. தே³ஹீதி படிஸாமேத்வா, வுத்தே சாபி படிக்கி²பே;

பாதேத்வான க³தே லப்³ப⁴ம், பலிபோ³தோ⁴தி கோ³பிதும்.

293. கம்மம் கரோந்தோ ஆராமே, ஸகம் வட்³ட⁴கிஆத³யோ;

பரிக்கா²ரஞ்ச ஸயன-ப⁴ண்ட³ம் வா ராஜவல்லபா⁴.

294. தே³ஹீதி படிஸாமேத்வா, வத³ந்தி யதி³ ச²ந்த³தோ;

ந கரேய்ய ப⁴யா டா²னம், கு³த்தம் த³ஸ்ஸேது வட்டதி.

295. ப³லக்காரேன பாதேத்வா, க³தேஸு படிஸாமிதும்;

பி⁴க்கு²ம் மனுஸ்ஸா ஸங்கந்தி, நட்டே² வத்து²ம்ஹி தாதி³ஸே.

296. விஹாராவஸத²ஸ்ஸந்தோ, ரதனம் ரத்னஸம்மதம்;

நிக்கி²பேய்ய க³ஹேத்வான, மக்³கே³ரஞ்ஞேபி தாதி³ஸே;

ஸாமிகானாக³மம் ஞத்வா, பதிரூபம் கரீயதீதி.