14. பூ⁴மினித்³தே³ஸோ

பூ⁴மியோதி –

136. ஸம்முதுஸ்ஸாவனந்தா ச, கோ³னிஸாதீ³ க³ஹாபதி;

கப்பியா பூ⁴மியோ யாஸு, வுத்த²ம் பக்கஞ்ச கப்பதி.

137. வாஸத்தா²ய கதே கே³ஹே, ஸங்கி⁴கே வேகஸந்தகே;

கப்பியா குடி லத்³த⁴ப்³பா³, ஸஹஸேய்யப்பஹோனகே.

138. கே³ஹே ஸங்க⁴ஸ்ஸ வேகஸ்ஸ, கரமானேவமீரயம்;

பட²மிட்ட²கத²ம்பா⁴தி³ம், ட²பேய்யுஸ்ஸாவனந்திகா;

‘‘கப்பியகுடிம் கரோம, கப்பியகுடிம் கரோமா’’தி.

139. யேபு⁴ய்யேனாபரிக்கி²த்தோ, ஆராமோ ஸகலோபி வா;

வுச்சதே ‘‘கோ³னிஸாதீ³’’தி, ஸம்முதீ ஸங்க⁴ஸம்மதா.

140. பி⁴க்கு²ம் ட²பேத்வா அஞ்ஞேஹி, தி³ன்னோ தேஸம்வ ஸந்தகோ;

அத்தா²ய கப்பகுடியா, கே³ஹோ க³ஹபதீ மதோ.

141. அகப்பகுடியா வுத்த²ஸப்பிஆதீ³ஹி மிஸ்ஸிதம்;

வஜேய்ய அந்தோவுத்த²த்தம், புரிமம் காலிகத்³வயம்.

142. தேஹேவ பி⁴க்கு²னா பக்கம், கப்பதே யாவஜீவிகம்;

நிராமிஸம்வ ஸத்தாஹம், ஸாமிஸே ஸாமபாகதா.

143. உஸ்ஸாவனந்திகா யேஹி, த²ம்பா⁴தீ³ஹி அதி⁴ட்டி²தா;

தேஸுயேவாபனீதேஸு, தத³ஞ்ஞேஸுபி திட்ட²தி.

144. ஸப்³பே³ஸு அபனீதேஸு, ப⁴வே ஜஹிதவத்து²கா;

கோ³னிஸாதீ³ பரிக்கி²த்தே, ஸேஸா ச²த³னவிப்³ப⁴மாதி.