15. உபஜ்ஜா²சரியவத்தனித்³தே³ஸோ

உபஜ்ஜா²சரியவத்தானீதி –

145. நிஸ்ஸாயுபஜ்ஜா²சரியே, வஸமானோ ஸுபேஸலோ;

த³ந்தகட்டா²ஸனம் தோயம், யாகு³ம் காலே த³தே³ ஸதா³.

146. பத்தே வத்தம் சரே கா³ம-ப்பவேஸே க³மனாக³மே;

ஆஸனே பாத³பீடே² ச, கத²லோபாஹனசீவரே.

147. பரிபோ⁴ஜனீயபானீய-வச்சப்பஸ்ஸாவடா²னிஸு;

விஹாரஸோத⁴னே வத்தம், புன பஞ்ஞாபனே ததா².

148. ந பப்போ²டேய்ய ஸோதே⁴ந்தோ, படிவாதே ச ஸங்க³ணே;

விஹாரம் பி⁴க்கு² பானீய-ஸாமந்தா ஸயனாஸனம்.

149. ந்ஹானே ந்ஹாதஸ்ஸ காதப்³பே³, ரங்க³பாகே ச தோ⁴வனே;

ஸிப்³ப³னே சீவரே தே²வே, ரஜந்தோ ந வஜே டி²தே.

150. ஏகச்சஸ்ஸ அனாபுச்சா², பத்தம் வா சீவரானி வா;

ந த³தே³ய்ய ந க³ண்ஹேய்ய, பரிக்கா²ரஞ்ச கிஞ்சனம்.

151. ஏகச்சம் பச்ச²தோ காதும், க³ந்தும் வா தஸ்ஸ பச்ச²தோ;

பிண்ட³பாதஞ்ச நின்னேதும், நீஹராபேதுமத்தனோ.

152. கிச்சயம் பரிகம்மம் வா, கேஸச்சே²த³ஞ்ச அத்தனோ;

காராபேதும் வ காதும் வா, அனாபுச்சா² ந வட்டதி.

153. கா³மம் ஸுஸானம் நிஸ்ஸீமம், தி³ஸம் வா க³ந்துமிச்ச²தோ;

அத்தனோ கிச்சயம் வாபி, அனாபுச்சா² ந வட்டதி.

154. உப்பன்னம் அரதிம் தி³ட்டி²ம், குக்குச்சம் வா வினோத³யே;

கரேய்ய வாபி உஸ்ஸுக்கம், ஸங்கா⁴யத்தேஸு கம்மஸு.

155. கி³லானேஸு உபட்டே²ய்ய, வுட்டா²னம் நேஸமாக³மே;

வத்தபே⁴தே³ன ஸப்³ப³த்த², அனாத³ரேன து³க்கடந்தி.