8. ஸஹத⁴ம்மிகவக்³கோ³

4. பஹாரஸிக்கா²பத³வண்ணனா

அங்கே³ஸு ந மோக்கா²தி⁴ப்பாயதா விய அமரணாதி⁴ப்பாயதா வத்தப்³பா³தி சே? ந வத்தப்³பா³. கஸ்மா? யோ பி⁴க்கு² ஸயம் பஹாரம் தா³துகாமோ, ஸோ அதி⁴ப்பாயேன தஸ்ஸ மரணே பயோக³விரஹோவாதி கத்வா அமரணாதி⁴காரத்தா கேவலம் அமரணாதி⁴ப்பாயோ ஏவ ஸோதி தா விய தா ந வுத்தா. மோக்கா²தி⁴ப்பாயஸ்ஸ பன கோபோ நத்தி², தஸ்மா அனாபத்தீதி வுத்தம்.

பஹாரஸிக்கா²பத³வண்ணனா நிட்டி²தா.

5. தலஸத்திகஸிக்கா²பத³வண்ணனா

தலமேவ தலஸத்திகம். ‘‘போத²னஸமத்த²ட்டே²ன ஸத்திக’’ந்தி ஏகே. யஸ்மா பஹரிதுகாமதாய பஹரதோ புரிமேன பாசித்தியம், கேவலம் உச்சாரேதுகாமதாய உக்³கி³ரணமத்தே கதே இமினா பாசித்தியம். இமினா பன விரஜ்ஜி²த்வா பஹாரோ தி³ன்னோ, தஸ்மா நபஹரிதுகாமதாய தி³ன்னத்தா து³க்கடம். கிமித³ம் து³க்கடம் பஹாரபச்சயா, உதா³ஹு உக்³கி³ரணபச்சயாதி? பஹாரபச்சயா ஏவ து³க்கடம், புரிமம் உக்³கி³ரணபச்சயா பாசித்தியந்தி ஸது³க்கடம் பாசித்தியம் யுஜ்ஜதி. புரிமஞ்ஹி உக்³கி³ரணம், பச்சா² பஹாரோ. ந ச பச்சி²மம் பஹாரம் நிஸ்ஸாய புரிமம் உக்³கி³ரணம் அனாபத்திவத்து²கம் ப⁴விதுமரஹதீதி நோ தக்கோதி (வஜிர. டீ. பாசித்திய 456) ஆசரியோ.

தலஸத்திகஸிக்கா²பத³வண்ணனா நிட்டி²தா.

7. ஸஞ்சிச்சஸிக்கா²பத³வண்ணனா

பரோ குக்குச்சம் உப்பாதே³து வா, மா வா, தம் அப்பமாணம். ‘‘குக்குச்சுபாத³ன’’ந்தி ததியமங்க³ம் தஸ்ஸ அதி⁴ப்பாயவஸேன வுத்தந்தி வேதி³தப்³ப³ம்.

ஸஞ்சிச்சஸிக்கா²பத³வண்ணனா நிட்டி²தா.

8. உபஸ்ஸுதிஸிக்கா²பத³வண்ணனா

உபஸ்ஸுதிந்தி யதா² உபகுஜ்ஜ²ம் ‘‘ஸமீபகுஜ்ஜ²’’ந்தி வுச்சதி, ததா² உபஸ்ஸுதி ‘‘ஸமீபஸ்ஸுதீ’’தி வேதி³தப்³பா³. யத்த² டி²தோ ஸுணாதி, தம் டா²னந்தி அத்தோ². ஸுதீதி பனேத்த² பரேஸம் வசனஸத்³தோ³ ச. ஸோ ஹி ஸுய்யதீதி ஸுதி நாம. உபஸுய்யதி வா ஏத்தா²தி உபஸ்ஸுதி. ஓகாஸோ ஹி ஸுதி நாம. இமேஸம் ஸுத்வாதி ஏத்த² ‘‘வசன’’ந்தி பாட²ஸேஸோ.

ஸமுட்டா²னாதீ³னி அதீதத்³வயஸதி³ஸானீதி ந க³ஹேதப்³பா³னி. தே²ய்யஸத்த²ஸமுட்டா²னம். ஸியா கிரியம் க³ந்த்வா ஸவனே. ஸியா அகிரியம் டி²தட்டா²னம் ஆக³ந்த்வா வத³ந்தானம் அஜானாபனவஸேன ஸமுட்டா²னதோ. ‘‘ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³ன’’ந்தி லிகி²தம்.

உபஸ்ஸுதிஸிக்கா²பத³வண்ணனா நிட்டி²தா.

9. கம்மப்படிபா³ஹனஸிக்கா²பத³வண்ணனா

அப்பமத்தகவிஸ்ஸஜ்ஜனகேன பன சீவரம் கரோந்தஸ்ஸ ஸேனாஸனக்க²ந்த⁴கவண்ணனாயம் (சூளவ. 328) வுத்தப்பபே⁴தா³னி ஸூசிஆதீ³னி அனபலோகேத்வாபி தா³தப்³பா³னி. ததோ அதிரேகம் தே³ந்தேன அபலோகனகம்மம் காதப்³ப³ம். ஏவம் கதம் பன அபலோகனம் கம்மலக்க²ணமேவாதி அதி⁴ப்பாயோ. ஏவம் ஸப்³ப³த்த² கம்மலக்க²ணம் வேதி³தப்³ப³ம். கா³மஸீமாவிஹாரேஸு ஓஸாரணாதீ³னி ஸங்க⁴கம்மானியேவ ந வட்டந்தி. விஸ்ஸஜ்ஜியவேப⁴ங்கி³யானி பன வட்டந்தி. ‘‘ஸங்க⁴ஸ்ஸ ஸந்தக’’ந்தி ஸாமஞ்ஞதோ அவத்வா ‘‘இமஸ்மிம் விஹாரே ஸங்க⁴ஸ்ஸ ஸந்தக’’ந்தி அபலோகேதப்³ப³ந்தி ச, ‘‘ஸமுட்டா²னாதீ³னி அதி³ன்னாதா³னஸதி³ஸானி, இத³ம் பன து³க்க²வேத³ன’’ந்தி பாடோ²தி ச லிகி²தம்.

கம்மப்படிபா³ஹனஸிக்கா²பத³வண்ணனா நிட்டி²தா.

10. ச²ந்த³ம்அத³த்வாக³மனஸிக்கா²பத³வண்ணனா

ஸன்னிபாதம் அனாக³ந்த்வா சே ச²ந்த³ம் ந தே³தி, அனாபத்தீதி ஏகே. து³க்கடந்தி ஏகே த⁴ம்மகம்மந்தராயகரணாதி⁴ப்பாயத்தா.

ச²ந்த³ம்அத³த்வாக³மனஸிக்கா²பத³வண்ணனா நிட்டி²தா.

11. து³ப்³ப³லஸிக்கா²பத³வண்ணனா

அகப்பியேன வாதி ஸுவண்ணரஜதமயமஞ்சாதி³னா. கப்பியமஞ்சோ ஸம்படிச்சி²தப்³போ³தி ‘‘ஸங்க⁴ஸ்ஸ தே³மா’’தி தி³ன்னம் ஸந்தா⁴ய வுத்தம், தேஹி பன ‘‘விஹாரஸ்ஸ தே³மா’’தி வுத்தே ஸுவண்ணரஜதமயாதி³அகப்பியமஞ்சாபி ஸம்படிச்சி²தப்³பா³தி ச, ‘‘அரஞ்ஜரோ ப³ஹுஉத³கக³ண்ஹனகோ’’தி ச, ‘‘ஸங்கி⁴கபஅபோ⁴கே³ன வாதி ஸசே ஆராமிகாத³யோ படிஸாமேத்வா படிதே³ந்தி, பரிபு⁴ஞ்ஜிதும் வட்டதீ’’தி ச, ‘‘கம்ஸலோஹாதி³பா⁴ஜனம் ஸங்க⁴ஸ்ஸ தி³ன்னம்பி பாரிஹாரியம் ந வட்டதீ’’தி (சூளவ. அட்ட². 321) ஸமந்தபாஸாதி³காயம் வுத்தத்தா அத்தனோ ஹத்தே²ன க³ஹேத்வா படிஸாமிதும் ந லப⁴தீதி ச, ‘‘வேத⁴கோ காயப³ந்த⁴னஸ்ஸாதி வத³ந்தீ’’தி ச, ‘‘ஹிங்கு³ ஹிங்கு³லிஹரிதாலமனோஸிலா அஞ்ஜனானீ’’தி பாடோ²தி ச, ‘‘தா³ருமயோ வா…பே… அபாத³கோபி ஸமுக்³கோ³’’தி பாடோ²தி ச, ‘‘தா³ருமயோ தும்போ³தி தா³ருமயோ உத³கதும்போ³’’தி ச, ‘‘த²ம்ப⁴துலாஸோபானப²லகாதீ³ஸூ’’தி ச லிகி²தம்.

து³ப்³ப³லஸிக்கா²பத³வண்ணனா நிட்டி²தா.

12. பரிணாமனஸிக்கா²பத³வண்ணனா

ஏகோ பி⁴க்கு² உக்கி²த்தகஸ்ஸ தா³துகாமோ ஹோதி, தஸ்ஸ தா³னம் நிவாரேத்வா அஞ்ஞஸ்ஸ தா³பேதி, அனாபத்தி. ததா² ஸத்³தா⁴தே³ய்யவினிபாதனம் கரோந்தஸ்ஸ தா³பேதி, அத்தனோ நிஸ்ஸிதகா இத்த²ன்னாமஸ்ஸ பத்தம் தா³துகாமா ஆபுச்ச²ந்தி, ‘‘விஸபா⁴கோ³ ஏஸோ, ஸபா⁴க³ஸ்ஸ தே³ஹீ’’தி வத³தி. அனாபத்தி அத்தனோ பா⁴ரபூ⁴தத்தா. தஸ்ஸ பன தா³துகாமம் அஞ்ஞஸ்ஸ தா³பேதி, ஆபத்தி ஏவ. ஸப்³ப³த்த² ஆபுச்சி²த்வா தா³துகாமம் யதா²ஸுக²ம் விசாரேதும் லப⁴தி.

பரிணாமனஸிக்கா²பத³வண்ணனா நிட்டி²தா.

ஸஹத⁴ம்மிகவக்³கோ³ அட்ட²மோ.