பாசித்தியகண்ட³ம்
4. போ⁴ஜனவக்³கோ³
2. க³ணபோ⁴ஜனஸிக்கா²பத³வண்ணனா
தே³வத³த்தோ காலே விஞ்ஞாபேத்வா பு⁴ஞ்ஜதி, தப்பச்சயா ப⁴க³வதா ‘‘க³ணபோ⁴ஜனே பாசித்திய’’ந்தி (பாசி. 209) ஸிக்கா²பத³ம் பஞ்ஞத்தம். பத³பா⁴ஜனே பன ‘‘நிமந்திதா பு⁴ஞ்ஜந்தீ’’தி (பாசி. 218) நிமந்தனமேவ க³ஹேத்வா விப⁴த்தம். அந்த⁴கட்ட²கதா²யம் பன வத்து²வஸேன விஞ்ஞத்தியா யாசனம்பி வுத்தந்தி லிகி²தம். கஸ்மா? பரிவாரே ஏவ ‘‘க³ணபோ⁴ஜனம் த்³வீஹாகாரேஹி பஸவதி விஞ்ஞத்திதோ வா நிமந்தனதோ வா’’தி (பரி. 322) வுத்தத்தா. தஸ்மா அட்டு²ப்பத்தியம்யேவ பாகடத்தா பத³பா⁴ஜனே ந வுத்தந்தி வேதி³தப்³ப³ம். ‘‘‘ஏகதோ க³ண்ஹந்தீ’தி ச க³ஹிதப⁴த்தாபி அஞ்ஞே யாவ க³ண்ஹந்தி, தாவ சே திட்ட²ந்தி, ஏகதோ க³ண்ஹந்தி ஏவ நாமா’’தி ச, ‘‘யோ கோசி பப்³ப³ஜிதோதி ஸஹத⁴ம்மிகேஸு, தித்தி²யேஸு வாதி அத்தோ²’’தி ச, ‘‘ஸமயாபா⁴வோதி ஸத்தன்னம் அனாபத்திஸமயானம் அபா⁴வோ’’தி ச, ‘‘ஸமயலத்³த⁴கேன ஸஹ சத்தாரோ ஹோந்தீ’’தி ச, ‘‘ஸமயலத்³த⁴கோ ஸயமேவ முச்சதி, ஸேஸானம் க³ணபூரகத்தா ஆபத்திகரோ ஹோதீ’’தி ச லிகி²தம்.
ஏத்தா²ஹ – ‘‘படிக்³க³ஹணமேவ ஹேத்த² பமாண’’ந்தி வுத்தம், அத² கஸ்மா பாளியம் ‘‘க³ணபோ⁴ஜனம் நாம யத்த² சத்தாரோ…பே… பு⁴ஞ்ஜந்தீ’’தி (பாசி. 218) வுத்தந்தி? வுச்சதே – தத்த² ‘‘பு⁴ஞ்ஜந்தீ’’தி படிக்³க³ஹணனியமவசனம். ந ஹி அப்படிக்³க³ஹிதகம் பி⁴க்கூ² பு⁴ஞ்ஜந்தீதி.
க³ணபோ⁴ஜனஸிக்கா²பத³வண்ணனா நிட்டி²தா.
3. பரம்பரபோ⁴ஜனஸிக்கா²பத³வண்ணனா
அஞ்ஞத்ர ஸமயாதி பன நிமந்தனதோ பஸவனதோ போ⁴ஜனாபேக்க²ம் பாசித்தியந்தி ஏகே. ஏகோ பி⁴க்கு² பிண்டா³ய சரந்தோ ப⁴த்தம் லப⁴தி, தமஞ்ஞோ சூபாஸகோ நிமந்தேத்வா க⁴ரே நிஸீதா³பேஸி, ந ச தாவ ப⁴த்தம் ஸம்பஜ்ஜதி. ஸசே ஸோ பி⁴க்கு² பிண்டா³ய சரித்வா லத்³த⁴ப⁴த்தம் பு⁴ஞ்ஜதி, ஆபத்தி. கஸ்மாதி சே? ‘‘பரம்பரபோ⁴ஜனம் நாம பஞ்சன்னம் போ⁴ஜனானம் அஞ்ஞதரேன போ⁴ஜனேன நிமந்திதோ தம் ட²பேத்வா அஞ்ஞம் பஞ்சன்னம் போ⁴ஜனானம் அஞ்ஞதரம் போ⁴ஜனம் பு⁴ஞ்ஜதி, ஏதம் பரம்பரபோ⁴ஜனம் நாமா’’தி (பாசி. 227) வுத்தத்தா. பட²மகதி²னஸதி³ஸானி, இத³ம் பன கிரியாகிரிய’’ந்தி பாடோ².
பரம்பரபோ⁴ஜனஸிக்கா²பத³வண்ணனா நிட்டி²தா.
4. காணமாதாஸிக்கா²பத³வண்ணனா
த்³வத்திபத்தபூரா படிக்³க³ஹேதப்³பா³தி ததா²னீதபூவேஹி அத்தி²கேன உக்கட்ட²பத்தப்பமாணவஸேன க³ஹேதப்³பா³. ‘‘மா கோ² த்வம் ஏத்த² படிக்³க³ண்ஹீ’’தி அபாதே²ய்யாதி³அத்தா²ய ஸஜ்ஜிதஸஞ்ஞாய அதிரேகப்படிக்³க³ஹணேன ஆரோசனே, அஸம்விபா⁴கே³ ச ந முச்சதி அசித்தகத்தா ஸிக்கா²பத³ஸ்ஸ. அத² உக்³க³ஹிதகம் க³ண்ஹாதி, ந முச்சதி ஏவ. அஸம்விபா⁴கே³ பன அனாபத்தி அகப்பியத்தா. அசித்தகதா பண்ணத்திஜானனாபா⁴வேனேவ, ந வத்து²ஜானனாபா⁴வேனாதி ஏகே. ‘‘ந பாதே²ய்யாதி³அத்தா²ய ஸஜ்ஜிதபா⁴வஜானன’’ந்தி அங்கே³ஸு அவுத்தத்தா ஸசே ஸஞ்சிச்ச ந வத³தி, பாசித்தியந்தி போராணா வத³ந்தி. அதிரேகப்படிக்³க³ஹணந்தி தத்த² பஞ்சமம்வ அங்க³ம் வுத்தம், தஸ்மா அப்படிக்³க³ஹிதத்தா ந பாசித்தியம், கத்தப்³பா³கரணதோ பன து³க்கடம். அஞ்ஞதா² கிரியாகிரியம் இத³ம் ஆபஜ்ஜதி. அனிவாரணம், அனாரோசனம் வா ச²ட்ட²மங்க³ம் வத்தப்³ப³ம் ஸியா.
காணமாதாஸிக்கா²பத³வண்ணனா நிட்டி²தா.
5. பட²மபவாரணாஸிக்கா²பத³வண்ணனா
பு⁴த்தாவீ பவாரணம் நாம பஞ்சங்கி³கம். தேஸு ‘‘அஸனம் பஞ்ஞாயத்தீ’’தி ஏதேனேவ ‘‘பு⁴த்தாவீ’’தி ஏதஸ்ஸ ஸித்³த⁴த்தா விஸும் அத்த²ஸித்³தி⁴ ந தி³ஸ்ஸதி. தி³ஸ்ஸதி சே, அங்கா³னம் ச²க்கத்தத³ஸ்ஸனந்தி (வஜிர. டீ. பாசித்திய 238-239) லிகி²தம். ‘‘போ⁴ஜனம் பஞ்ஞாயதீ’’தி அபி⁴ஹடம் ஸந்தா⁴ய வுத்தம்.
கோட்டேத்வா கதசுண்ணம்பீதி பி-காரேன குண்ட³கம் ஸம்பிண்டே³தி. ஸமபாகப⁴ஜ்ஜிதானம் பன ஆதபஸுக்கா²னம் வா குண்ட³கம் வா யே கேசி தண்டு³லா வாதி ஏத்தகமேவ வுத்தத்தா ஸமபாகப⁴ஜ்ஜிதானம் வீஹீனம், வீஹிபலாஸானம் வா தண்டு³லசுண்ணம் பவாரேதி. ததா² க²ரபாகப⁴ஜ்ஜிதானம் குண்ட³கம்பி பவாரேதி. ப⁴ஜ்ஜிதஸத்துயோ பிண்டே³த்வா கதோ அபக்கஸத்துமோத³கோபி பவாரேதீதி லிகி²தம். ஸசே அவஸிட்ட²ம் நத்தி², ந பவாரேதி. கஸ்மா? அஸனஸங்கா²தஸ்ஸ விப்பகதபோ⁴ஜனஸ்ஸ அபா⁴வதோ.
அகப்பியமம்ஸம் பன கிஞ்சாபி படிக்கி²பிதப்³ப³ட்டா²னே டி²தம், கா²தி³யமானம் பன மம்ஸபா⁴வம் ந ஜஹாதி, தஸ்மா பவாரேதி. போ⁴ஜனஸாலாய பு⁴ஞ்ஜந்தோ சே அத்தனோ அபாபுணனகோட்டா²ஸம் அபி⁴ஹடம் படிக்கி²பதி, ந பவாரேதி. காமம் படிக்கி²பதி, பத்தே பன ஆராமிகா ஆகிரந்தி, தம் பு⁴ஞ்ஜிதும் ந வட்டதி. இத³ஞ்ஹி பு³த்³த⁴ப்படிகுட்டா²ய அனேஸனாய உப்பன்னேயேவ ஸங்க²ம் க³ச்ச²தி. யதா² ஹி ஸங்க⁴தோ லத்³த⁴ம் பிண்ட³ம் து³ஸ்ஸீலோ தே³தி, தஞ்சே படிக்கி²பதி, ந பவாரேதி, ஏவம்ஸம்பத³மித³ந்தி ச, விபா⁴கோ³ லஜ்ஜீ சே தே³தி, தம் ஸோ ந அஜ்ஜோ²ஹரிதுகாமதாய படிக்கி²பதி, பவாரேதீதி ச, ‘‘ஸமம்ஸரஸம் ஸமச்ச²ரஸ’’ந்தி ஆபஜ்ஜனதோ ‘‘மம்ஸரஸ’’ந்தி வுத்தே பன படிக்கி²பதோ ஹோதி, ‘‘மம்ஸஸ்ஸ ரஸம் மம்ஸரஸ’’ந்தி அயம் விக்³க³ஹோ நாதி⁴ப்பேதோதி ச வுத்தம். ப⁴த்தமிஸ்ஸகம் யாகு³ம் ஆஹரித்வா ‘‘யாகு³ம் க³ண்ஹதா²’’தி வத³தி, ந பவாரேதி. ‘‘ப⁴த்தம் க³ண்ஹதா²’’தி வுத்தே பவாரேதி. கஸ்மா? யேனாபுச்சி²தோ, தஸ்ஸ அத்தி²தாய. ஏத்த² பன ‘‘யாகு³மிஸ்ஸகம் க³ண்ஹதா²’’தி வத³தி, தத்ர சே யாகு³ ப³ஹுதரா வா ஹோதி, ஸமஸமா வா. ப⁴த்தம் மந்த³ம், ந பவாரேதி. யாகு³ சே மந்தா³, ப⁴த்தம் ப³ஹுதரம், பவாரேதி. இத³ஞ்ச ஸப்³ப³அட்ட²கதா²ஸு வுத்தத்தா ந ஸக்கா படிக்கி²பிதும். காரணம் பனேத்த² து³த்³த³ஸம். ‘‘ப⁴த்தமிஸ்ஸகம் க³ண்ஹதா²’’தி வத³தி. தத்ர ப⁴த்தம் ப³ஹுதரம் வா ஸமகம் வா அப்பதரம் வா ஹோதி, பவாரேதி ஏவ. ப⁴த்தம் வா யாகு³ம் வா அனாமஸித்வா ‘‘மிஸ்ஸகம் க³ண்ஹதா²’’தி வத³தி. தத்ர சே ப⁴த்தம் ப³ஹுதரம், ஸமகம் வா ஹோதி, பவாரேதி. அப்பதரம் ந பவாரேதி. தம் ஸப்³ப³ம் வீமம்ஸிதப்³ப³ந்தி.
ப²லம் வா கந்த³மூலாதி³ வா பஞ்சஹி ஸமணகப்பேஹி கப்பியம் அகதந்தி ஏத்த² கப்பியம் அகாராபிதேஹி கத³லிப²லாதீ³ஹி ஸத்³தி⁴ம் அதிரித்தம் காராபேத்வாபி தம் கத³லிப²லாதி³ம் ட²பேத்வா அவஸேஸம் பு⁴ஞ்ஜிதும் வட்டதி. அமிஸ்ஸகரஸத்தா புன தானி கப்பியம் காராபேத்வா அஞ்ஞஸ்மிம் பா⁴ஜனே ட²பேத்வா காரேத்வா பு⁴ஞ்ஜிதும் வட்டதி. கஸ்மா? புப்³பே³ தேஸு வினயகம்மஸ்ஸ அனாருள்ஹத்தாதி வத³ந்தி.
பத்தே ரஜம் பதிதம் அப்படிக்³க³ஹிதமேவ ஹோதி. தஸ்மா படிக்³க³ஹேத்வாவ பி⁴க்கா² க³ண்ஹிதப்³பா³. ‘‘அபடிக்³க³ஹேத்வா க³ண்ஹதோ வினயது³க்கட’’ந்தி (பாசி. அட்ட². 265) வுத்தத்தா ஏதமஞ்ஞேஸம்பி ந வட்டதீதி வத³ந்தி. ‘‘தம் பன புன படிக்³க³ஹேத்வா பு⁴ஞ்ஜந்தஸ்ஸ அனாபத்தீ’’தி ஏத்தா²பி ஏவமேவ. இமஸ்மிம் பன ‘‘அதிரித்தம் கதம் அனதிரித்தகதம் ஹோதீ’’தி ஏத்தா²பி ஏவமேவ. இமஸ்மிம் பன ‘‘அதிரித்தம் கதம், அனதிரித்தம் கதம் ஹோதீ’’திஆதீ³ஹி உபபரிக்கி²த்வா வினிச்ச²யோ வேதி³தப்³போ³தி தீ³பிதம். அலமேதம் ஸப்³ப³ந்தி இத³ம்பி தே அதி⁴கம், இதோ அஞ்ஞம் ந லச்ச²ஸீதி அத்தோ².
ஆஹாரத்தா²யாதி விகாலே ஏவாதி ஏகே. ‘‘பட²மகதி²னஸதி³ஸானி. இத³ம் பன கிரியாகிரிய’’ந்தி பாடோ². காயகம்மம் அஜ்ஜோ²ஹரணதோ. வசீகம்மம் வாசாய ‘‘அதிரித்தம் கரோத², ப⁴ந்தே’’தி அகாராபனதோதி வேதி³தப்³ப³ம்.
பட²மபவாரணாஸிக்கா²பத³வண்ணனா நிட்டி²தா.
6. து³தியபவாரணாஸிக்கா²பத³வண்ணனா
‘‘பு⁴த்தஸ்மிம் பாசித்திய’’ந்தி (பாசி. 243) மாதிகாயம் வுத்தத்தா ‘‘போ⁴ஜனபரியோஸானே பாசித்திய’’ந்தி வுத்தம், ந அஜ்ஜோ²ஹாரே அஜ்ஜோ²ஹாரே.
து³தியபவாரணாஸிக்கா²பத³வண்ணனா நிட்டி²தா.
7. விகாலபோ⁴ஜனஸிக்கா²பத³வண்ணனா
ஜம்பு³தீ³பஸ்ஸ காலேன பரிச்சே²தோ³தி ஏவம் கிர.
விகாலபோ⁴ஜனஸிக்கா²பத³வண்ணனா நிட்டி²தா.
8. ஸன்னிதி⁴காரகஸிக்கா²பத³வண்ணனா
‘‘து³த்³தோ⁴தோ ஹோதீ’’திஆதி³னா நயேன இத⁴ வுத்தத்தா, ‘‘து³த்³தோ⁴தம் பத்தம் தோ⁴வித்வா புன
தத்த² அச்சோ²த³கம் வா ஆஸிஞ்சித்வா, அங்கு³லியா வா க⁴ம்ஸித்வா நிஸ்னேஹபா⁴வோ ஜானிதப்³போ³’’தி (பாசி. அட்ட². 253) ஸமந்தபாஸாதி³காயம் வுத்தத்தா ச மத்திகாபத்தஸ்ஸ கபாலேன பீதோ ஸ்னேஹோ ஸன்னிதி⁴ம் கரோதீதி ஸித்³த⁴ந்தி லிகி²தம். ஸயம் படிக்³க³ஹேத்வா அபரிச்சத்தமேவாதி ஏத்த² அபரிச்சத்தம் நாம அனுபஸம்பன்னானம் நிரபேக்க²அபரிச்சத்தம் அவிஜஹிதம். ‘‘படிக்³க³ஹணந்தி ஏத்த² படிக்³க³ஹிதபா⁴வமவிஜஹிதமேவ ஸன்னிதி⁴ம் ஜனேதீ’’தி த⁴ம்மஸிரித்தே²ரோ, தம் ‘‘படிக்³க³ண்ஹாதி, ஆபத்தி து³க்கடஸ்ஸா’’தி (பாசி. 255) பாளியா விருஜ்ஜ²தி. தஸ்ஸ பன புன படிக்³க³ண்ஹனகிச்சாபா⁴வதோ வீமம்ஸிதப்³ப³ம்.
ஸன்னிதி⁴காரகஸிக்கா²பத³வண்ணனா நிட்டி²தா.
9. பணீதபோ⁴ஜனஸிக்கா²பத³வண்ணனா
‘‘தேஸம் மம்ஸஞ்ச கீ²ரத³தீ⁴னி ச இத⁴ அதி⁴ப்பேதானீ’’தி இத³ம் பாசித்தியவத்து²பரிச்சே²தோ³, ந பன கப்பியகீ²ராதி³பரிச்சே²தோ³, தஸ்மா யஸ்ஸ கஸ்ஸசி கீ²ராதீ³னி வட்டந்தீதி ச, ‘‘மஹானாமஸிக்கா²பதே³ன காரேதப்³போ³’’தி ஸங்க⁴வஸேன பவாரிதே பே⁴ஸஜ்ஜத்தா²ய ஸப்பிஆதி³பே⁴ஸஜ்ஜபஞ்சகம் விஞ்ஞாபேதி சே, தத்த² ‘‘ந பே⁴ஸஜ்ஜகரணீயேன பே⁴ஸஜ்ஜம் விஞ்ஞாபேதீ’’தி ஏத்த² ஸங்க³ஹம் க³ச்ச²தி, தஸ்மா ‘‘தேன பாசித்திய’’ந்தி (வஜிர. டீ. பாசித்திய 261) ச லிகி²தம்.
பணீதபோ⁴ஜனஸிக்கா²பத³வண்ணனா நிட்டி²தா.
10. த³ந்தபோனஸிக்கா²பத³வண்ணனா
‘‘ஸரீராவயவேனா’’தி வுத்தத்தா முகே²ன படிக்³க³ஹணம் அனுஞ்ஞாதம். ‘‘சிஞ்சாதி³பத்தேஸு பூ⁴மியம் அத்த²தேஸு ந வட்டதி, கல்லகே²த்தே தத்த² வட்டதீ’’தி ச, ‘‘ஸாமம் க³ஹேத்வா’’தி இமினா ந கேவலம் ஸப்பத³ட்ட²ம்யேவ, அஞ்ஞம்பி த³ட்ட²ம் விஸேஸேதி. ஸாமம் க³ஹேத்வா பரிபு⁴ஞ்ஜிதும் வட்டதீ’’தி ச லிகி²தம்.
த³ந்தபோனஸிக்கா²பத³வண்ணனா நிட்டி²தா.
போ⁴ஜனவக்³கோ³ சதுத்தோ².
5. அசேலகவக்³கோ³
1. அசேலகஸிக்கா²பத³வண்ணனா
அசேலகாத³யோ யஸ்மா, தித்தி²யாவ மதா இத⁴;
தஸ்மா தித்தி²யனாமேன, திகச்சே²தோ³ கதோ ததோ.
அதித்தி²யஸ்ஸ நக்³க³ஸ்ஸ, ததா² தித்தி²யலிங்கி³னோ;
க³ஹட்ட²ஸ்ஸாபி பி⁴க்கு²ஸ்ஸ, கப்பதீதி வினிச்ச²யோ.
அதித்தி²யஸ்ஸ சித்தேன, தித்தி²யஸ்ஸ ச லிங்கி³னோ;
ஸோதாபன்னாதி³னோ தா³தும், கப்பதீதீத⁴ நோ மதி.
அசேலகஸிக்கா²பத³வண்ணனா நிட்டி²தா.
3. ஸபோ⁴ஜனஸிக்கா²பத³வண்ணனா
அனுபவிஸித்வா நிஸீத³னசித்தேன ஸசித்தகதாதி வேதி³தப்³பா³.
ஸபோ⁴ஜனஸிக்கா²பத³வண்ணனா நிட்டி²தா.
4-5. ரஹோபடிச்ச²ன்னரஹோனிஸஜ்ஜஸிக்கா²பத³வண்ணனா
சதுத்த²ம் பட²மானியதே, பஞ்சமம் து³தியானியதே வுத்தனயமேவ. இத⁴ பஞ்சமம் உபனந்த³ஸ்ஸ சதுத்த²ம் ஹோதி.
ரஹோபடிச்ச²ன்னரஹோனிஸஜ்ஜஸிக்கா²பத³வண்ணனா நிட்டி²தா.
6. சாரித்தஸிக்கா²பத³வண்ணனா
ஸப⁴த்தோ ஸமானோதி நிமந்தனப⁴த்தோதி போராணா. ஸந்தம் பி⁴க்கு²ம், அனாபுச்சா², புரேப⁴த்தம் பச்சா²ப⁴த்தம், அஞ்ஞத்ர ஸமயாதி அயமேத்த² சதுப்³பி³தா⁴ அனுபஞ்ஞத்தி. தத்த² ஸமயா த்³வே ஸமயா. ப⁴த்தியக⁴ரந்தி நிமந்திதஸ்ஸ க⁴ரம் வா ஸலாகாப⁴த்தாதி³தா³யகானம் வா க⁴ரம். ‘‘ஸமுட்டா²னாதீ³னி பட²மகதி²னஸதி³ஸானி, இத³ம் பன கிரியாகிரிய’’ந்தி பாடோ², ‘‘இத⁴ நிமந்தனா அகப்பியனிமந்தனா’’தி ஏகே.
புரேப⁴த்தஞ்ச பிண்டா³ய, சரித்வா யதி³ பு⁴ஞ்ஜதி;
ஸியா பரம்பராபத்தி, பச்சா²ப⁴த்தம் ந ஸா ஸியா.
பச்சா²ப⁴த்தஞ்ச க³மிகோ, புப்³ப³கே³ஹம் யதி³ க³ச்சே²;
ஏகே ஆபத்தியேவாதி, அனாபத்தீதி ஏகச்சே.
குலந்தரஸ்ஸோக்கமனே, ஆபத்திமதயோ ஹி தே;
ஸமானப⁴த்தபச்சாஸா, இதி ஆஹு இதா⁴பரே.
மதா க³ணிகப⁴த்தேன, ஸமேந்தி நம் நிமந்தனே;
விஸ்ஸஜ்ஜனம் ஸமானந்தி, ஏகே ஸம்முக²தாபரே.
ஸன்னிட்டா²னத்தி²கேஹேவ, விசாரேதப்³ப³பே⁴த³தோ;
விஞ்ஞூ சாரித்தமிச்சேவ, ஸிக்கா²பத³மித³ம் விதூ³. (வஜிர. டீ. பாசித்திய 294);
சாரித்தஸிக்கா²பத³வண்ணனா நிட்டி²தா.
7. மஹானாமஸிக்கா²பத³வண்ணனா
பணீதபோ⁴ஜனஸிக்கா²பதே³ ‘‘மஹானாமஸிக்கா²பதே³ன காரேதப்³போ³’’தி (கங்கா². அட்ட². பணீதபோ⁴ஜனஸிக்கா²பத³வண்ணனா) யம் வுத்தம், தஸ்ஸத்தோ² ஸங்க⁴வஸேன பவாரிதே பே⁴ஸஜ்ஜத்தா²ய ஸப்பிஆதி³பே⁴ஸஜ்ஜபஞ்சகம் விஞ்ஞாபேதி சே, ‘‘நபே⁴ஸஜ்ஜேன கரணீயேன பே⁴ஸஜ்ஜம் விஞ்ஞாபேதீ’’தி (பாசி. 309) வசனேன பாசித்தியந்தி (வஜிர. டீ. பாசித்திய 310) லிகி²தம். ‘‘தயா இமினாவ பவாரிதம்ஹா, அம்ஹாகஞ்ச இமினா ச இமினா ச அத்தோ²’’தி யதா²பூ⁴தம் ஆசிக்கி²த்வா விஞ்ஞாபேதும் கி³லானோவ லப⁴தி, ந இதரோதி ச, ‘‘அஞ்ஞஸ்ஸ அத்தா²யா’’தி அஸ்ஸ ஞாதகப்பவாரிதே, அத்தனோ வா ஞாதகப்பவாரிதேதி அத்தோ²தி ச, ‘‘அபரியந்தப்பவாரணாய பவாரிதே’’தி ஸங்க⁴வஸேன, புக்³க³லவஸேன ச பவாரேத்வா தா³யகா. தஸ்மா ‘‘ஸங்க⁴ப்பவாரணதா’’தி வத்வா ‘‘புக்³க³லப்பவாரணதா’’தி ந வுத்தந்தி ச, ‘‘பரியந்தாதிக்கமோ’’தி வசனேன கி³லானோ க³ஹிதோ, தஸ்மா ‘‘கி³லானாகி³லானதா’’தி ந வுத்தம். ஏவம் ஸந்தேபி ‘‘ஸங்க⁴ப்பவாரணாய பவாரணதா’’தி பாடோ²தி ச லிகி²தம், வீமம்ஸிதப்³ப³ம்.
மஹானாமஸிக்கா²பத³வண்ணனா நிட்டி²தா.
8. உய்யுத்தஸேனாஸிக்கா²பத³வண்ணனா
ஹத்தி²ஆதீ³ஸு ஏகமேகந்தி அந்தமஸோ ஏகபுரிஸாருள்ஹஹத்தி²ம்பி, ஏகம் ஸரஹத்த²ம் புரிஸம்பி. ஸமுட்டா²னாதீ³னி ஏளகலோமஸதி³ஸானி, இத³ம் பன லோகவஜ்ஜம், அகுஸலசித்தம் திவேத³ன’’ந்தி பாடோ².
உய்யுத்தஸேனாஸிக்கா²பத³வண்ணனா நிட்டி²தா.
9. ஸேனாவாஸஸிக்கா²பத³வண்ணனா
கேனசி பலிபு³த்³த⁴ஸ்ஸாதி வேரிகேன வா இஸ்ஸரேன வா கேனசி ருத்³த⁴ஸ்ஸ. ஸேனாபரிக்கே²பேன வா பரிக்கே²பாரஹட்டா²னேன வா ஸஞ்சரணட்டா²னபரியந்தேன வா பரிச்சி²ந்தி³தப்³பா³.
ஸேனாவாஸஸிக்கா²பத³வண்ணனா நிட்டி²தா.
அசேலகவக்³கோ³ பஞ்சமோ.
6. ஸுராபானவக்³கோ³
1. ஸுராபானஸிக்கா²பத³வண்ணனா
‘‘ஸுரா’’தி வா ‘‘ந வட்டதீ’’தி வா ஜானித்வா பிவனே அகுஸலமேவாதி லிகி²தம். அகுஸலசித்தந்தி யேபு⁴ய்யேன தம் ஸந்தா⁴ய கிர வுத்தம். அத² கஸ்மா வினயட்ட²கதா²யம் ‘‘அகுஸலேனேவ பாதப்³ப³தாயா’’தி (பாசி. அட்ட². 329) வுத்தந்தி சே? ஸசித்தகபக்கே² அகுஸலேனேவ பாதப்³ப³தாயாதி.
ஸுராபானஸிக்கா²பத³வண்ணனா நிட்டி²தா.
2. அங்கு³லிபதோத³கஸிக்கா²பத³வண்ணனா
காயஸம்ஸக்³க³ஸங்கா⁴தி³ஸேஸாபத்திபா⁴வே ஸமானேபி பி⁴க்கு²னியாபி அனுபஸம்பன்னேபி து³க்கடம், உபஸம்பன்னே ஏவ பாசித்தியந்தி ஏவம் புக்³க³லாபேக்க²ம் த³ஸ்ஸேதும் ‘‘அங்கு³லிபதோத³கே பாசித்திய’’ந்தி வுத்தம். ஸதி கரணீயேதி ஏத்த² புரிஸம் ஸதி கரணீயே ஆமஸதோதி அதி⁴ப்பாயோ, ந இத்தி²ம்.
அங்கு³லிபதோத³கஸிக்கா²பத³வண்ணனா நிட்டி²தா.
3. ஹஸத⁴ம்மஸிக்கா²பத³வண்ணனா
‘‘சிக்க²ல்லம் வா’’தி வசனதோ ஸக்க²ரம்பி கி²பனகீளாய கீளதோ து³க்கடமேவ. உபரிகோ³ப்ப²கே பாசித்தியம், அஞ்ஞத்த² து³க்கடந்தி பாசித்தியவத்து²அத்த²வஸேன ‘‘உத³கே ஹஸத⁴ம்மே பாசித்திய’’ந்தி வுத்தம்.
இத³ம் ஸஞ்ஞாவிமோக்க²ம் சே, திகபாசித்தியம் கத²ம்;
கீளிதம்வ அகீளாதி, மிச்சா²கா³ஹேன தம் ஸியா.
ஏத்தாவதா கத²ம் கீளா, இதி கீளாயம் ஏவாயம்;
அகீளாஸஞ்ஞீ ஹோதேத்த², வினயத்த²ம் ஸமாத³யே.
ஏகந்தாகுஸலோ யஸ்மா, கீளாயாபி⁴ரதமனோ;
தஸ்மா அகுஸலம் சித்தம், ஏகமேவேத்த² லப்³ப⁴தீதி. (வஜிர. டீ. பாசித்திய 336);
ஹஸத⁴ம்மஸிக்கா²பத³வண்ணனா நிட்டி²தா.
4. அனாத³ரியஸிக்கா²பத³வண்ணனா
தஸ்ஸ வசனந்தி ‘‘அயம் உக்கி²த்தகோ வா வம்பி⁴தோ வா க³ரஹிதோ வா இமஸ்ஸ வசனம் அகதம் ப⁴விஸ்ஸதீ’’தி அனாத³ரியம் கரோதி. த⁴ம்மந்தி கதா²யம் த⁴ம்மோ நஸ்ஸேய்ய வா வினஸ்ஸேய்ய வா அந்தரதா⁴யேய்ய வா, தம் வா அஸிக்கி²துகாமோ அனாத³ரியம் கரோதி. ‘‘லோகவஜ்ஜம் அதிக்கமித்வா ‘இத³ம் அம்ஹாகம் ஆசரியுக்³க³ஹோ’தி வத³ந்தஸ்ஸ ந வட்டதீ’’தி (வஜிர. டீ. பாசித்திய 344) லிகி²தம்.
அனாத³ரியஸிக்கா²பத³வண்ணனா நிட்டி²தா.
6. ஜோதிஸிக்கா²பத³வண்ணனா
‘‘விஸிப்³ப³னாபேக்கோ²’’தி வுத்தத்தா அஞ்ஞஸ்ஸ வட்டதி, அஞ்ஞேஸஞ்ச.
ஜோதினேகமனேகே வா, ஜாலேந்தி முனயோ ஸஹ;
ஏகோ ஸோபேதி நானேகோ, அதி⁴ப்பாயவிஸேஸதோ.
ஜோதிஸிக்கா²பத³வண்ணனா நிட்டி²தா.
8. து³ப்³ப³ண்ணகரணஸிக்கா²பத³வண்ணனா
மோரக்கி²மண்ட³லமங்கு³லபிட்டீ²னந்தி ந ஏகந்ததோ, அதி⁴கம், ஓரஞ்சாதி வத³ந்தி. ஏககோணேபி வட்டதி, ஏவம் யத்த² கத்த²சி ஏகபி³ந்து³பி வட்டதீதி.
து³ப்³ப³ண்ணகரணஸிக்கா²பத³வண்ணனா நிட்டி²தா.
9. விகப்பனஸிக்கா²பத³வண்ணனா
‘‘ஸமுட்டா²னாதீ³னி பட²மகதி²னஸதி³ஸானி, இத³ம் பன கிரியாகிரிய’’ந்தி பாடோ². ஏத்த² பரிபோ⁴கே³ன காயகம்மம். அபச்சுத்³த⁴ரணேன வசீகம்மம்.
விகப்பனஸிக்கா²பத³வண்ணனா நிட்டி²தா.
10. அபனிதா⁴னஸிக்கா²பத³வண்ணனா
ஸஸூசிகே ஸூசிக⁴ரே ஸூசிக³ணனாய ஆபத்தியோதி போராணா.
அபனிதா⁴னஸிக்கா²பத³வண்ணனா நிட்டி²தா.
ஸுராபானவக்³கோ³ ச²ட்டோ².
7. ஸப்பாணகவக்³கோ³
1. ஸஞ்சிச்சஸிக்கா²பத³வண்ணனா
வத்து²க³ணனாய கம்மப³ந்த⁴க³ணனாசேதனாமாரணானம், ந கம்மப³ந்த⁴க³ணனாய சேதனாமாரணா. ஏத்த² ஏகசேதனாய ப³ஹுபாணகா மரந்தீதி அயம் விபா⁴கோ³ வேதி³தப்³போ³.
ஸஞ்சிச்சஸிக்கா²பத³வண்ணனா நிட்டி²தா.
2. ஸப்பாணகஸிக்கா²பத³வண்ணனா
ஸப்பாணகந்தி பாணகானம் மரணவஸேன பாசித்தியம், ந ஸப்பாணகஉத³கபரிபோ⁴க³வஸேன பாசித்தியம், தஸ்மா ஏவ ‘‘பண்ணத்திவஜ்ஜ’’ந்தி வுத்தம். அஸுத்³த⁴சித்தத்தா பாசித்தியம், ஸுத்³த⁴சித்தே அனாபத்தி. பதீ³புஜ்ஜலனே விய பண்ணத்திவஜ்ஜதா வுத்தாதி லிகி²தம்.
ஜலே பக்கி²பனம் புப்³ப³ம், ஜலப்பவேஸனம் இத³ம்;
ஏவம் உபி⁴ன்னம் நானாத்தம், ஞேய்யம் ஞாணவதா ஸதா³தி. (வஜிர. டீ. பாசித்திய 387)
ஸப்பாணகஸிக்கா²பத³வண்ணனா நிட்டி²தா.
5. ஊனவீஸதிவஸ்ஸஸிக்கா²பத³வண்ணனா
அஞ்ஞம் உபஸம்பாதே³தீதி –
உபஜ்ஜா²யோ ஸசே ஸாமம், கம்மவாசஞ்ச ஸாவேதி;
கம்மம் ருஹதி இச்சேகே, நேதி வினயகோவிதோ³.
து³க்கடம் விஹிதம் யஸ்மா, ஆசரியஸ்ஸ க³ணஸ்ஸ ச;
தஸ்மா பி⁴ன்னாவ ஆசரிய-உபஜ்ஜா²யா விஸும் இதா⁴தி.
ஊனவீஸதிவஸ்ஸஸிக்கா²பத³வண்ணனா நிட்டி²தா.
7. ஸம்விதா⁴னஸிக்கா²பத³வண்ணனா
இத⁴ ஏகதோஉபஸம்பன்னா, ஸிக்க²மானா, ஸாமணேரீதி இமா திஸ்ஸோபி ஸங்க³ஹம் க³ச்ச²ந்தி, இமாஸம் பன திஸ்ஸன்னம் ஸமயோ ரக்க²தி, அயமிமாஸம், மாதுகா³மஸ்ஸ ச விஸேஸோதி வேதி³தப்³ப³ம்.
ஸம்விதா⁴னஸிக்கா²பத³வண்ணனா நிட்டி²தா.
9. உக்கி²த்தஸம்போ⁴க³ஸிக்கா²பத³வண்ணனா
‘‘தம் தி³ட்டி²ம் அப்படினிஸ்ஸட்டே²னாதி லத்³தி⁴னானாஸம்வாஸகம் ஸந்தா⁴யா’’தி லிகி²தம். திசித்தந்தி ஏத்த² விபாகாப்³யாகதசித்தேன ஸஹஸேய்யம் கப்பேய்யாதி ஏவமத்தோ² த³ட்ட²ப்³போ³. அஞ்ஞதா² ஸசித்தகத்தா ஸிக்கா²பத³ஸ்ஸ கிரியாப்³யாகதம் ஸந்தா⁴ய ந யுஜ்ஜதி.
உக்கி²த்தஸம்போ⁴க³ஸிக்கா²பத³வண்ணனா நிட்டி²தா.
10. கண்டகஸிக்கா²பத³வண்ணனா
‘‘அயம் ஸமணுத்³தே³ஸோ பாராஜிகோ ஹோதி. ஸசே தம் தி³ட்டி²ம் படினிஸ்ஸஜ்ஜதி, ஸங்க⁴ஸ்ஸ ஆரோசேத்வா ஸங்கா⁴னுமதியா பப்³பா³ஜேதப்³போ³’’தி போராணக³ண்டி²பதே³ வுத்தம், தம் ந யுத்தம். த³ண்ட³கம்மனாஸனா ஹி இதா⁴தி⁴ப்பேதா. யதி³ ஸோ பாராஜிகோ ஹோதி, லிங்க³னாஸனா நாம ஸியா. ‘‘தே படிஸேவதோ நாலம் அந்தராயாயா’’தி ச தி³ட்டி² ஸத்த²ரி அஸத்தா²தி³தி³ட்டி² ந ஹோதி. ஸசே ஸா யஸ்ஸ உப்பஜ்ஜதி, ஸோ பாராஜிகோ ஹோதி, தஸ்மிம்பி ஏவமேவ படிபஜ்ஜிதப்³ப³ம், ஸம்வரே அதிட்ட²ந்தோ லிங்க³னாஸனாய நாஸேதப்³போ³தி (வஜிர. டீ. பாசித்திய 428) ஆசரியஸ்ஸ தக்கோ.
கண்டகஸிக்கா²பத³வண்ணனா நிட்டி²தா.
ஸப்பாணகவக்³கோ³ ஸத்தமோ.
8. ஸஹத⁴ம்மிகவக்³கோ³
4. பஹாரஸிக்கா²பத³வண்ணனா
அங்கே³ஸு ந மோக்கா²தி⁴ப்பாயதா விய அமரணாதி⁴ப்பாயதா வத்தப்³பா³தி சே? ந வத்தப்³பா³. கஸ்மா? யோ பி⁴க்கு² ஸயம் பஹாரம் தா³துகாமோ, ஸோ அதி⁴ப்பாயேன தஸ்ஸ மரணே பயோக³விரஹோவாதி கத்வா அமரணாதி⁴காரத்தா கேவலம் அமரணாதி⁴ப்பாயோ ஏவ ஸோதி தா விய தா ந வுத்தா. மோக்கா²தி⁴ப்பாயஸ்ஸ பன கோபோ நத்தி², தஸ்மா அனாபத்தீதி வுத்தம்.
பஹாரஸிக்கா²பத³வண்ணனா நிட்டி²தா.
5. தலஸத்திகஸிக்கா²பத³வண்ணனா
தலமேவ தலஸத்திகம். ‘‘போத²னஸமத்த²ட்டே²ன ஸத்திக’’ந்தி ஏகே. யஸ்மா பஹரிதுகாமதாய பஹரதோ புரிமேன பாசித்தியம், கேவலம் உச்சாரேதுகாமதாய உக்³கி³ரணமத்தே கதே இமினா பாசித்தியம். இமினா பன விரஜ்ஜி²த்வா பஹாரோ தி³ன்னோ, தஸ்மா நபஹரிதுகாமதாய தி³ன்னத்தா து³க்கடம். கிமித³ம் து³க்கடம் பஹாரபச்சயா, உதா³ஹு உக்³கி³ரணபச்சயாதி? பஹாரபச்சயா ஏவ து³க்கடம், புரிமம் உக்³கி³ரணபச்சயா பாசித்தியந்தி ஸது³க்கடம் பாசித்தியம் யுஜ்ஜதி. புரிமஞ்ஹி உக்³கி³ரணம், பச்சா² பஹாரோ. ந ச பச்சி²மம் பஹாரம் நிஸ்ஸாய புரிமம் உக்³கி³ரணம் அனாபத்திவத்து²கம் ப⁴விதுமரஹதீதி நோ தக்கோதி (வஜிர. டீ. பாசித்திய 456) ஆசரியோ.
தலஸத்திகஸிக்கா²பத³வண்ணனா நிட்டி²தா.
7. ஸஞ்சிச்சஸிக்கா²பத³வண்ணனா
பரோ குக்குச்சம் உப்பாதே³து வா, மா வா, தம் அப்பமாணம். ‘‘குக்குச்சுபாத³ன’’ந்தி ததியமங்க³ம் தஸ்ஸ அதி⁴ப்பாயவஸேன வுத்தந்தி வேதி³தப்³ப³ம்.
ஸஞ்சிச்சஸிக்கா²பத³வண்ணனா நிட்டி²தா.
8. உபஸ்ஸுதிஸிக்கா²பத³வண்ணனா
உபஸ்ஸுதிந்தி யதா² உபகுஜ்ஜ²ம் ‘‘ஸமீபகுஜ்ஜ²’’ந்தி வுச்சதி, ததா² உபஸ்ஸுதி ‘‘ஸமீபஸ்ஸுதீ’’தி வேதி³தப்³பா³. யத்த² டி²தோ ஸுணாதி, தம் டா²னந்தி அத்தோ². ஸுதீதி பனேத்த² பரேஸம் வசனஸத்³தோ³ ச. ஸோ ஹி ஸுய்யதீதி ஸுதி நாம. உபஸுய்யதி வா ஏத்தா²தி உபஸ்ஸுதி. ஓகாஸோ ஹி ஸுதி நாம. இமேஸம் ஸுத்வாதி ஏத்த² ‘‘வசன’’ந்தி பாட²ஸேஸோ.
ஸமுட்டா²னாதீ³னி அதீதத்³வயஸதி³ஸானீதி ந க³ஹேதப்³பா³னி. தே²ய்யஸத்த²ஸமுட்டா²னம். ஸியா கிரியம் க³ந்த்வா ஸவனே. ஸியா அகிரியம் டி²தட்டா²னம் ஆக³ந்த்வா வத³ந்தானம் அஜானாபனவஸேன ஸமுட்டா²னதோ. ‘‘ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³ன’’ந்தி லிகி²தம்.
உபஸ்ஸுதிஸிக்கா²பத³வண்ணனா நிட்டி²தா.