7. மஹானாமஸிக்கா²பத³வண்ணனா

பணீதபோ⁴ஜனஸிக்கா²பதே³ ‘‘மஹானாமஸிக்கா²பதே³ன காரேதப்³போ³’’தி (கங்கா². அட்ட². பணீதபோ⁴ஜனஸிக்கா²பத³வண்ணனா) யம் வுத்தம், தஸ்ஸத்தோ² ஸங்க⁴வஸேன பவாரிதே பே⁴ஸஜ்ஜத்தா²ய ஸப்பிஆதி³பே⁴ஸஜ்ஜபஞ்சகம் விஞ்ஞாபேதி சே, ‘‘நபே⁴ஸஜ்ஜேன கரணீயேன பே⁴ஸஜ்ஜம் விஞ்ஞாபேதீ’’தி (பாசி. 309) வசனேன பாசித்தியந்தி (வஜிர. டீ. பாசித்திய 310) லிகி²தம். ‘‘தயா இமினாவ பவாரிதம்ஹா, அம்ஹாகஞ்ச இமினா ச இமினா ச அத்தோ²’’தி யதா²பூ⁴தம் ஆசிக்கி²த்வா விஞ்ஞாபேதும் கி³லானோவ லப⁴தி, ந இதரோதி ச, ‘‘அஞ்ஞஸ்ஸ அத்தா²யா’’தி அஸ்ஸ ஞாதகப்பவாரிதே, அத்தனோ வா ஞாதகப்பவாரிதேதி அத்தோ²தி ச, ‘‘அபரியந்தப்பவாரணாய பவாரிதே’’தி ஸங்க⁴வஸேன, புக்³க³லவஸேன ச பவாரேத்வா தா³யகா. தஸ்மா ‘‘ஸங்க⁴ப்பவாரணதா’’தி வத்வா ‘‘புக்³க³லப்பவாரணதா’’தி ந வுத்தந்தி ச, ‘‘பரியந்தாதிக்கமோ’’தி வசனேன கி³லானோ க³ஹிதோ, தஸ்மா ‘‘கி³லானாகி³லானதா’’தி ந வுத்தம். ஏவம் ஸந்தேபி ‘‘ஸங்க⁴ப்பவாரணாய பவாரணதா’’தி பாடோ²தி ச லிகி²தம், வீமம்ஸிதப்³ப³ம்.

மஹானாமஸிக்கா²பத³வண்ணனா நிட்டி²தா.