நிஸ்ஸக்³கி³யகண்ட³ம்

1. சீவரவக்³கோ³

1. கதி²னஸிக்கா²பத³வண்ணனா

நிஸ்ஸக்³கி³யகண்டே³ திண்ணம் கதி²னஸிக்கா²பதா³னம், வஸ்ஸிகஸாடிகஅச்சேகசீவரஸாஸங்கஸிக்கா²பதா³னஞ்ச ஏகதே³ஸனாய ததா²கிண்ணாபத்திக்க²ந்தா⁴வ வேதி³தப்³பா³ –

கதி²னம் யஸ்ஸ சத்தாரோ, ஸஹஜா ஸமயத்³வயம்;

ச²ன்னம் ஸிக்கா²பதா³னஞ்ச, ஏகதே³ஸவினிச்ச²யோ.

தத்த² கதி²னந்தி ‘‘ஸங்க⁴ஸ்ஸ அனுமோத³னாய, க³ணஸ்ஸ அனுமோத³னாய, புக்³க³லஸ்ஸ அத்தா²ரா ஸங்க⁴ஸ்ஸ அத்த²தம் ஹோதி கதி²ன’’ந்தி (பரி. 414) வசனதோ தேஸம்யேவ அனுமோத³னாதி³த⁴ம்மானம் ஸங்க³ஹோ கதி²னம் நாம. யதா²ஹ ‘‘கதி²னம் ஜானிதப்³ப³ந்தி தேஸஞ்ஞேவ த⁴ம்மானம் ஸங்க³ஹோ ஸமவாயோ நாமம் நாமகம்ம’’ந்திஆதி³ (பரி. 412). தஸ்மா கதி²னந்தி இத³ம் ப³ஹூஸு த⁴ம்மேஸு நாமமத்தம், ந பரமத்த²தோ ஏகோ த⁴ம்மோ. கோ பனஸ்ஸ அத்தா²ரோதி? ததே³கதே³ஸோவ கீ²ரஸ்ஸ தா⁴ரா விய. யதா² சாஹ ‘‘அத்தா²ரோ ஏகேன த⁴ம்மேன ஸங்க³ஹிதோ வசீபே⁴தே³னா’’தி. ஸஹஜா நாம அட்ட² மாதிகா, த்³வே பலிபோ³தா⁴, பஞ்சானிஸம்ஸாதி இமே பன்னரஸ த⁴ம்மா. ஸமயத்³வயம் நாம கதி²னத்தா²ரஸமயோ, சீவரஸமயோ சாதி. தத்த² கதி²னத்தா²ரஸமயோ வஸ்ஸானஸ்ஸ பச்சி²மோ மாஸோ. சீவரஸமயோ நாம அனத்த²தே கதி²னே அயம் கத்திகமாஸோ, அத்த²தே சத்தாரோ ஹேமந்திகா சாதி பஞ்ச மாஸா.

தத்த² அட்ட² மாதிகா நாம பக்கமனந்திகாத³யோ. தா ஸப்³பா³பி அத்தா²ரேன ஏகதோ உப்பஜ்ஜந்தி நாம. தப்³பா⁴வபா⁴விதாய அத்தா²ரே ஸதி உத்³தா⁴ரோ ஸம்ப⁴வதி. தத்த² கதி²னத்தா²ரேன ஏகுப்பாதா³ ஏகனிரோதா⁴ அந்தருப்³பா⁴ரோ ஸஹுப்³பா⁴ரோ, அவஸேஸா கதி²னுப்³பா⁴ரா ஏகுப்பாதா³, நானானிரோதா⁴ ச. தத்த² ஏகனிரோதா⁴தி அத்தா²ரேன ஸஹ நிரோதா⁴, அந்தருப்³பா⁴ரஸஹுப்³பா⁴ரானம் உத்³தா⁴ராபா⁴வோ ஏகக்க²ணே ஹோதீதி அத்தோ². ஸேஸா நானா நிருஜ்ஜ²ந்தி நாம. தேஸு ஹி உத்³தா⁴ரபா⁴வம் பத்தேஸுபி அத்தா²ரோ திட்ட²தி ஏவாதி அட்ட²கதா²யம் அத்த²விபா⁴வனா. ஸசே அத்த²தே கதி²னே பி⁴க்கு²ஸ்மிம் ஸாபேக்கே² தம்ஹா ஆவாஸா பக்கமந்தே ஸங்கோ⁴ அந்தருப்³பா⁴ரம் கரோதி, தஸ்ஸ பி⁴க்கு²னோ பட²மமேவ மூலாவாஸே நிட்டி²தசீவரபலிபோ³தா⁴பா⁴வேபி ஸதி அந்தருப்³பா⁴ரே பலிபோ³தோ⁴ சி²ஜ்ஜதி ஸதிபி ஸாபேக்க²தாய ஸஉஸ்ஸாஹத்தா. இமினா பரியாயேன பக்கமனந்திகோ கதி²னுத்³தா⁴ரோ அத்தா²ரேன ஏகுப்பாதோ³ நானானிரோதோ⁴ ஹோதி. ததா² அந்தருப்³பா⁴ரே ஸதி ஸுணந்தஸ்ஸாபி யாவ சீவரனிட்டா²னம் ந க³ச்ச²தி, தாவ பரிஹாரஸம்ப⁴வதோ நிட்டா²னந்திகோ. யாவ ஸன்னிட்டா²னம் ந க³ச்ச²தி, தாவ பரிஹாரஸம்ப⁴வதோ ஸன்னிட்டா²னந்திகோ. யாவ ந நஸ்ஸதி, தாவ பரிஹாரஸம்ப⁴வதோ நாஸனந்திகோ. யாவ ந ஸுணாதி, தாவ பரிஹாரஸம்ப⁴வதோ ஸவனந்திகோ. யாவ சீவராஸா ந சி²ஜ்ஜதி, தாவ பரிஹாரஸம்ப⁴வதோ ஆஸாவச்சே²தி³கோ. யாவ ஸீமம் நாதிக்கமதி, தாவ பரிஹாரஸம்ப⁴வதோ ஸீமாதிக்கந்திகோ. அத்தா²ரேன ஏகுப்பாதோ³ நானானிரோதோ⁴ ஹோதீதி வேதி³தப்³போ³.

தத்த² அந்தருப்³பா⁴ரஸஹுப்³பா⁴ரா த்³வே அந்தோஸீமாயம் ஏவ ஸம்ப⁴வந்தி, ந ப³ஹிஸீமாயம். பக்கமனஸவனஸீமாதிக்கந்திகா ப³ஹிஸீமாயமேவ ஸம்ப⁴வந்தி, ந அந்தோஸீமாயம். நிட்டா²னஸஅஆட்டா²னாஸாவச்சே²தி³கா அந்தோஸீமாயஞ்சேவ ப³ஹிஸீமாயஞ்ச. அந்தருப்³பா⁴ரோ ஸங்கா⁴யத்தோ, பக்கமனனிட்டா²னஸன்னிட்டா²னஸீமாதிக்கந்திகா புக்³க³லாதீ⁴னா, ஸேஸா தது³ப⁴யவிபரீதா.

தத்த² ‘‘நிட்டி²தசீவரஸ்மி’’ந்தி இமினா சீவரபலிபோ³தா⁴பா⁴வமேவ தீ³பேதி. ந ஆவாஸபலிபோ³தா⁴பா⁴வம். ‘‘உப்³ப⁴தஸ்மிம் கதி²னே’’தி இமினா உப⁴யபலிபோ³தா⁴பா⁴வம் தீ³பேதி, தஸ்மா உப⁴யபலிபோ³தா⁴பா⁴வதீ³பனத்த²ம் ததே³வ வத்தப்³ப³ந்தி சே? ந, விஸேஸத்தா. கத²ம்? காமஞ்சேதம் தஸ்மா ‘‘உப்³ப⁴தஸ்மிம் கதி²னே’’தி கேஸஞ்சி கதி²னுத்³தா⁴ரானம் நானானிரோத⁴த்தா, ஸங்க⁴புக்³க³லாதீ⁴னானதீ⁴னத்தா ச அந்தோப³ஹிஉப⁴யஸீமாஸு நியமானியமதோ ச உப்³ப⁴தஸ்மிம் கதி²னே ஸங்க⁴ஸ்ஸ, ந புக்³க³லஸ்ஸ உப்³ப⁴தம் ஹோதி, ததா²பி ‘‘உப்³ப⁴தஸ்மிம் கதி²னே’’தி இத³ம் ஸாமஞ்ஞவசனம். தஸ்மா ‘‘நிட்டி²தசீவரஸ்மி’’ந்தி இமினா நியமேதி.

கிம் வுத்தம் ஹோதி – ஸங்க⁴ஸ்ஸ அந்தருப்³பா⁴ரேன உப்³ப⁴தஸ்மிம் கதி²னே அச்சி²ன்னசீவரபலிபோ³தோ⁴ ப³ஹிஸீமாக³தோ பச்சா² க³ந்த்வா அத்தனோ ஸீமாக³தோ அனிட்டி²தசீவரோ ஆனிஸம்ஸம் லப⁴தி ஏவாதி கத்வா ‘‘நிட்டி²தசீவரஸ்மி’’ந்தி வுத்தந்தி வேதி³தப்³ப³ம். தத்த² ஆவாஸபலிபோ³தோ⁴ நாம வஸதி வா தஸ்மிம் ஆவாஸே, ஸாபேக்கோ² வா பக்கமதி. சீவரபலிபோ³தோ⁴ நாம சீவரம் அகதம் விப்பகதம், சீவராஸானுபச்சி²ன்னா, தப்³பி³பரீதேன அபலிபோ³தோ⁴ வேதி³தப்³போ³. தத்த² அனத்த²தகதி²னானம் சீவரகாலஸமயே நியமதோ சத்தாரோ ஆனிஸம்ஸா லப்³ப⁴ந்தி, அஸமாதா³னசாரோ அனியமதோ. தேன ஸாஸங்கஸிக்கா²பத³ம் வுத்தம். கத²ம் சத்தாரோ நியதாதி சே? ‘‘சீவரகாலஸமயோ நாம அனத்த²தே கதி²னே வஸ்ஸானஸ்ஸ பச்சி²மோ மாஸோ’’தி (பாரா. 649) வசனதோ அனத்த²தகதி²னானம் தஸ்மிம் மாஸே யாவத³த்த²சீவரம் ஸித்³த⁴ம், ததா² ததியகதி²னஸிக்கா²பதே³ (பாரா. 497 ஆத³யோ) அகாலசீவரம் நாம பிட்டி²ஸமயதோ பட்டா²ய தம் படிக்³க³ஹேத்வா ஸங்க⁴தோ லபி⁴தப்³ப³ம் சே, யாவ சீவரகாலஸமயம் நிக்கி²பித்வா பா⁴ஜேத்வா க³ஹேதப்³ப³ம். புக்³க³லிகம் சே, வஸ்ஸானஸ்ஸ ச²ட்ட²பக்க²ஸ்ஸ பஞ்சமிதோ பட்டா²ய யாவ சீவரகாலஸமயம் அனதி⁴ட்டி²தம் அவிகப்பிதம் வட்டதி அச்சேகசீவரஸிக்கா²பதே³ன அனுஞ்ஞாதத்தா, ந ததோ பரம். ததா³ உப்பன்னசீவரஸ்ஸ படிஸித்³த⁴த்தா பட²மகதி²னேன. தத்த² அட்ட²கதா²யம் வுத்தனயோ ஸங்கி⁴கம் ஸந்தா⁴ய, ததா² போராணக³ண்டி²பதே³ சாதி வேதி³தப்³ப³ம்.

பட²மகதி²னே (பாரா. 459 ஆத³யோ) பட²மபஞ்ஞத்தியா, அவிஸேஸேன வா ஏகாத³ஸமே தி³வஸே ஆபத்தி. வஸ்ஸானஸ்ஸ ஹி அந்தோனிவாரணத்த²ம் அட்ட²கதா²ய ‘‘நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே’’தி (பாரா. 462 ஆத³யோ) வுத்தம். ஏஸேவ நயோ து³தியே, ததியே ச. தேன சீவரகாலதோ புரே வா அந்தோ வா உப்பன்னம் சீவரகாலதோ உத்³த⁴ம் ஏகதி³வஸம்பி பரிஹாரம் ந லப⁴தி. யதி³ லபே⁴ய்ய, அச்சேகசீவரஸிக்கா²பத³விரோதோ⁴. ‘‘யாவ சீவரகாலஸமயம் நிக்கி²பிதப்³ப³ம், ததோ சே உத்தரி நிக்கி²பேய்ய, நிஸ்ஸக்³கி³ய’’ந்தி (பாரா. 648) ஹி தத்த² வுத்தம். வஸ்ஸாவாஸிகபா⁴வேன ஸங்க⁴தோ லத்³த⁴ம் வுட்ட²வஸ்ஸத்தா அத்தனோ ஸந்தகபூ⁴தம் அச்சேகசீவரம் சீவரகாலஸமயம் அதிக்காமயதோ ஏவ ஆபத்தி, ந அச்சேகசீவரகாலம் அதிக்காமயதோ ஆபத்தீதி. ‘‘அனத்த²தே கதி²னே ஏகாத³ஸமாஸே உப்பன்ன’’ந்தி (பாரா. 500) வசனதோ யோ ச தத்த² சீவருப்பாதோ³, ஸோ ச நேஸம் ப⁴விஸ்ஸதீதி ஸித்³த⁴ம், அனாமந்தசாரக³ணபோ⁴ஜனஸிக்கா²பதே³ ‘‘அஞ்ஞத்ர ஸமயா’’தி (பாசி. 222 ஆத³யோ) வுத்தத்தா ஸேஸத்³வயம் ஸித்³த⁴மேவ. தஸ்மா ‘‘காலேபி ஆதி³ஸ்ஸ தி³ன்னம், ஏதம் அகாலசீவர’’ந்தி (பாரா. 500) வசனதோ ஆதி³ஸ்ஸ தி³ன்னசீவரம் பரிஹாரம் ந லப⁴தி.

அபரகத்திகாயமேவ வா உப்³ப⁴தஸ்மிம் கதி²னே லப⁴தி, ஏவம் ‘‘உப்³ப⁴தஸ்மிம் கதி²னே’’தி வுத்தத்தாதி சே? ந வத்தப்³ப³ம். ச² டா²னானி ஹி ஸாபேக்க²தாய வுத்தானி. து³ட்ட²தோ³ஸத்³வயே அதி⁴கரணசதுத்த²ம், பட²மானியதே ஸோதஸ்ஸ ரஹோ, ததியகதி²னே ஆதி³ஸ்ஸ தி³ன்னம் சீவரம், அச்சேகசீவரஸிக்கா²பதே³ ‘‘ஸஞ்ஞாணம் கத்வா நிக்கி²பிதப்³ப³’’ந்தி பத³ம், து³ட்டு²ல்லாரோசனப்படிச்சா²த³னத்³வயே அதி⁴கரணம், பாராஜிகவசனஞ்ச, தீஸு கதி²னஸிக்கா²பதே³ஸு ‘‘அட்ட²ன்னம் மாதிகானம் அஞ்ஞதராயா’’தி வசனந்தி. தத்த² ஆதி³ஸ்ஸ தி³ன்னம் சீவரம் ஸங்கி⁴கம் பா⁴ஜிதப்³ப³சீவரம் ஸந்தா⁴ய வுத்தம், ந புக்³க³லிகம். ஸஞ்ஞாணம் கத்வா நிக்கி²பிதப்³ப³ந்தி வஸ்ஸாவாஸிகசீவரம் ஸந்தா⁴ய வுத்தம். அவுட்ட²வஸ்ஸேன பச்சா² தா³தப்³ப³த்தா ஸஞ்ஞாணம் காதப்³ப³ம், ந ஞாதிப்பவாரிததோ லத்³த⁴ம் புக்³க³லிகம் ஸந்தா⁴ய. தஸ்மா து³வித⁴ம் அச்சேகசீவரம் ஸங்கே⁴ நின்னம், புக்³க³லே நின்னஞ்சாதி ஸித்³த⁴ம். தத்த² ஸங்கே⁴ பரிணதம் அச்சேகசீவரம் வஸ்ஸூபனாயிகதி³வஸதோ பட்டா²ய, பிட்டி²ஸமயதோ பட்டா²ய வா யாவ பவாரணா நிக்கி²பிதும் வட்டதி ஏவ ஸங்கி⁴கத்தா, புக்³க³லிகம்பி ‘‘வஸ்ஸம்வுட்ட²காலே க³ண்ஹதா²’’தி தி³ன்னத்தா. தாதி³ஸஞ்ஹி யாவ வஸ்ஸம்வுட்டோ² ந ஹோதி, தாவ தஸ்ஸேவ தா³யகஸ்ஸ ஸந்தகம் ஹோதி. ஏத்தகோ விஸேஸஹேது.

‘‘அனச்சேகசீவரே அனச்சேகசீவரஸஞ்ஞீ சீவரகாலஸமயம் அதிக்காமேதி, அனாபத்தீ’’தி வசனதோ அச்சேகசீவரகஸ்ஸேவ ஸோ அபராதோ⁴. யேன ‘‘விரோதோ⁴’’தி வசனம் த³ஸ்ஸேய்யாதி ந வினயே விஸேஸஹேது பரியேஸிதப்³போ³. பு³த்³த⁴விஸயத்தா பமாணந்தி சே? ந, யதி³ ஏவம் ஏத்த² அத்தனோ ஸந்தகபூ⁴தம்பி அச்சேகசீவரம் ஸஞ்ஞாணம் கத்வா நிக்கி²பிதப்³ப³மேவ, ந அதி⁴ட்டா²தப்³ப³ம் ந விகப்பேதப்³ப³ம் ந விஸ்ஸஜ்ஜேதப்³ப³ம். ததோ ‘‘அனாபத்தி, அந்தோஸமயே அதி⁴ட்டே²தி விகப்பேதி விஸ்ஸஜ்ஜேதீ’’திஆதி³வசனவிரோதோ⁴ (பாரா. 651) அதி⁴வாஸேதப்³போ³ ஸியா. ததா² ‘‘வஸ்ஸானஸ்ஸ பச்சி²மே மாஸே கதி²னுத்³தா⁴ரே கதே தஸ்மிம் மாஸே அத்த²தே கதி²னே கதி²னுத்³தா⁴ரதி³வஸம் அதிக்காமேதி, நிஸ்ஸக்³கி³யம் ஹோதீ’’தி வசனதோ நிஸ்ஸக்³கி³யம் ஹோதீதி அயம்பி அத்த²விரோதோ⁴ அதி⁴வாஸேதப்³போ³ ஸியா. தஸ்மிஞ்ச ‘‘அனச்சேகசீவரே அனாபத்தீ’’தி வுத்தம், தஞ்ச அனதி⁴ட்டி²தம் அவிகப்பிதமேவாதி ஏத்தகோ விஸேஸஹேது. அதிரேகசீவரஞ்சேதம் பட²மஸிக்கா²பதே³னாபத்தி, இதரம் சே அனாபத்தியேவாதி இமஸ்ஸ அத்த²ஸ்ஸ அயம் ப⁴க³வதோ விஸேஸஹேது. ததா² அதிரேகத³ஸாஹானாக³தாயேவ கத்திகபுண்ணமாய ஸங்க⁴ஸ்ஸ வஸ்ஸாவாஸிகத்த²ம் அச்சேகசீவரம் விய த³த³மானம் ந க³ஹேதப்³ப³ம், த³ஸாஹானாக³தாய ஏவ க³ஹேதப்³ப³ந்தி ஏத்தகோ விஸேஸஹேது. ததோ அட்ட²கதா²னயவிரோதோ⁴ ச அதி⁴வாஸேதப்³போ³ ஸியா. தத்த² ‘‘அதி⁴ட்டி²ததோ பட்டா²ய உப்பன்னம் அச்சேகசீவரம் ந ஹோதீ’’தி வத்வா அஞ்ஞதா² நயோ த³ஸ்ஸிதோ. போராணக³ண்டி²பதே³ ஸோ ச நயோ ஸங்கி⁴கம் உபாதா³ய வுத்தத்தா ந விருஜ்ஜ²தீதி நேவ ஸோ ச படிக்கி²த்தோ. யதா² அனச்சேகசீவரம் ச²ட்டி²தோ பட்டா²ய உப்பன்னம் அதிரேகத³ஸாஹானாக³தாயபி படிக்³க³ஹேதப்³ப³ம், படிக்³க³ஹேத்வா சீவரகாலஸமயம் அதிக்காமயதோபி அனாபத்தீதி அயம்பி நயோ அதி⁴வாஸேதப்³போ³ ஸியா. ததோ பட²மகதி²னவிரோதோ⁴. த³ஸாஹானாக³தாய ஏவ படிக்³க³ஹேதப்³ப³ம், படிக்³க³ஹேத்வா சீவரகாலஸமயம் அதிக்காமயதோ அனாபத்தீதி சே, தம் த்³வே த³ஸாஹே லப⁴தீதி ஏத்தகோ விஸேஸஹேது.

அந்தரா அனாபத்திக்கே²த்தசீவரகாலப்பவிட்ட²த்தா அதி⁴ட்ட²ஹித்வா பச்சுத்³த⁴டம் விய தம் புனபி த³ஸாஹே லப⁴தீதி சே? ந, காலப்பவேஸோ அதி⁴ட்டா²னம் விய ஹோதீதி சே? ந, ‘‘வஸ்ஸிகஸாடிகம் வஸ்ஸானம் சாதுமாஸம் அதி⁴ட்டா²தும், ததோ பரம் விகப்பேது’’ந்தி வசனவிரோத⁴ம் கத்வா, ததோ பரம் த³ஸாஹம் அவிகப்பேந்தஸ்ஸாபி அனாபத்தி ஸியா. அபிச யம் வுத்தம் அட்ட²கதா²யம் ‘‘வஸ்ஸிகஸாடிகா அந்தோவஸ்ஸே லத்³தா⁴ சேவ நிட்டி²தா ச, அந்தோத³ஸாஹே அதி⁴ட்டா²தப்³பா³, த³ஸாஹாதிக்கமே நிட்டி²தா, தத³ஹேவ அதி⁴ட்டா²தப்³பா³, த³ஸாஹே அப்பஹோந்தே சீவரகாலம் நாதிக்காமேதப்³பா³’’தி (பாரா. அட்ட². 2.630). தேன ஆபத்திதோ ந முச்சேய்ய. காலப்பவேஸோ ஹி அதி⁴ட்டா²னபரியாயோ ந ஜாதோதி. ஏத்தாவதா யதா²வுத்தோ அத்த²விகப்போ பாளினயேனேவ பதிட்டா²பிதோ ஹோதி.

அபிசேத்த² யம் வுத்தம் அட்ட²கதா²யம் ‘‘த³ஸாஹே அப்பஹோந்தே சீவரகாலம் நாதிக்காமேதப்³பா³’’தி, தத்த²பி சீவரகாலே உப்பன்னம், த³ஸாஹே அப்பஹோந்தே சஸ்ஸ கரணம் நத்தி², தம் அச்சேகசீவரம் அகாலசீவரமிவ சீவரகாலம் நாதிக்காமேதப்³ப³ந்தி ஸித்³த⁴மேதம். பாளிதோ ச தஞ்சே அந்தோகாலே உப்பஜ்ஜதி, த³ஸாஹே அப்பஹோந்தேபி உப்பஜ்ஜதி, ஏவம் உப்பன்னம் அச்சேகசீவரம் அச்சேகசீவரமேவ ந ஹோதி. ந ஹி தம் காலவிஸேஸவஸேன அச்சேகசீவரஸங்க²ம் க³ச்ச²தி. வுத்தஞ்ஹேதம் ‘‘அச்சேகசீவரம் நாம ஸேனாய வா க³ந்துகாமோ ஹோதி, பவாஸம் வா க³ந்துகாமோ ஹோதி, கி³லானோ வா ஹோதி, க³ப்³பி⁴னீ வா ஹோதி, அஸ்ஸத்³த⁴ஸ்ஸ வா ஸத்³தா⁴ உப்பன்னா ஹோதி…பே… ‘வஸ்ஸாவாஸிகம் த³ஸ்ஸாமீ’தி ஏவம் ஆரோசிதம், ஏதம் அச்சேகசீவரம் நாமா’’தி (பாரா. 649). தஸ்மா யதா² தம் சீவரம் நாதிக்காமேதப்³ப³ம், ததா² அனச்சேகசீவரம்பீதி ஸித்³த⁴ம் ஹோதி. தேன வுத்தம் அட்ட²கதா²யம் ‘‘த³ஸாஹே அப்பஹோந்தே சீவரகாலம் நாதிக்காமேதப்³பா³’’தி. அபிச யதி³ ஏவம் தம் அச்சேகசீவரஸிக்கா²பத³மேவ அச்சேகசீவரம் சீவரகாலம் நாதிக்காமேதப்³ப³ந்தி இமஸ்ஸ பன அத்த²விஸேஸஸ்ஸ த³ஸ்ஸனத்த²ம் ப⁴க³வதா பஞ்ஞத்தம்.

மஹாஅட்ட²கதா²யம் பன தம் ஏவம் வுத்தம் – காமஞ்சேத³ம் ‘‘த³ஸாஹபரமம் அதிரேகசீவரம் தா⁴ரேதப்³ப³’’ந்தி இமினா ஸித்³த⁴ம், அட்டு²ப்பத்திவஸேன பன அபுப்³ப³ம் விய அத்த²ம் த³ஸ்ஸேத்வா ஸிக்கா²பத³ம் ட²பிதந்தி அத்த²விஸேஸதீ³பனபயோஜனதோ. தஸ்மா தம் தஸ்ஸ அத்த²விஸேஸத³ஸ்ஸனத்த²ம் வுத்தந்தி ஸித்³த⁴மேவ. தஸ்மாபி வேதி³தப்³ப³மேவ யம் கிஞ்சி சீவரம் சீவரகாலஸமயம் நாதிக்காமேதப்³ப³ந்தி. அபிச யம் வுத்தம் அட்ட²கதா²யம் ‘‘ச²ட்டி²தோ பட்டா²ய பன உப்பன்னம் அனச்சேகசீவரம்பி பச்சுத்³தா⁴ரேத்வா ட²பிதசீவரம்பி ஏதம் பரிஹாரம் லப⁴தீ’’தி (பாரா. அட்ட². 2.646-649). தேன ‘‘அனச்சேகசீவரே அனச்சேகசீவரஸஞ்ஞீ சீவரகாலஸமயம் அதிக்காமேதி, அனாபத்தீ’’தி (பாரா. 650) இமினாபி அனச்சேகசீவரஸ்ஸாபி அச்சேகசீவரபரிஹாரலாப⁴ம் தீ³பேதீதி.

ஏத்தாவதா யதா²வுத்தோ து³தியோ அத்த²விகப்போ பாளினயேன, அட்ட²கதா²னயேன ச பதிட்டா²பிதோ ஹோதி. ஏவம் தாவ பகிண்ணகாய அதி⁴கதா² பரதோ பாட²தோ வித்தா²ரிதா ஹோதீதி அபகிண்ணகம்.

சீவரபலிபோ³தோ⁴, ஆவாஸபலிபோ³தோ⁴ சாதி த்³வே பலிபோ³தா⁴. தேஸு ஏகபலிபோ³தே⁴பி ஸதி அனாமந்தசாராதி³ஆனிஸம்ஸம் லப⁴தி, தம் இத⁴ நத்தீ²தி த³ஸ்ஸேதும் ‘‘நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே’’தி வுத்தம். தஸ்மா ஏவ ‘‘அத்த²தகதி²னஸ்ஸ ஹி பி⁴க்கு²னோ’’திஆதி³ வுத்தம். கதி²னத்தா²ராரஹஸ்ஸாதி ஏத்த² ‘‘அட்ட²ஹி அங்கே³ஹி ஸமன்னாக³தோ புக்³க³லோ ப⁴ப்³போ³ கதி²னம் அத்த²ரிதும் – புப்³ப³கரணம் ஜானாதி, பச்சுத்³தா⁴ரம் ஜானாதி, அதி⁴ட்டா²னம் ஜானாதி, அத்தா²ரம் ஜானாதி, மாதிகம் ஜானாதி, பலிபோ³த⁴ம் ஜானாதி, உத்³தா⁴ரம் ஜானாதி, ஆனிஸம்ஸம் ஜானாதீ’’தி (பரி. 409) வசனதோ இமேஹி அட்ட²ஹி அங்கே³ஹி ஸமன்னாக³தோ புக்³க³லோ கதி²னத்தா²ராரஹோ நாம. புப்³ப³கரணம் நாம தோ⁴வனவிசாரணச்சே²த³னஸிப்³ப³னரஜனகப்பகரணம்.

‘‘சீவரம் நாம கோ²ம’’ந்திஆதி³னா பாளிவஸேன ஜாதிஞ்ச பமாணஞ்ச த³ஸ்ஸேத்வா இதா³னி அதிரேகசீவரம் த³ஸ்ஸேதும் ‘‘யம் பன வுத்தம் அதி⁴ட்டி²தவிகப்பிதேஸூ’’திஆதி³ வுத்தம். ட²பிதட்டா²னம் ஸல்லக்கே²த்வா’’தி வுத்தேபி யஸ்மிம் டா²னே யம் ட²பிதம், தஸ்மிம் தம் பச்சா² ஹோது வா, மா வா, அதி⁴ட்டா²னம் ருஹதேவ. புரே பச்சா² ட²பனட்டா²னம் ந பமாணம்.

அந்திமவத்து²ம் அஜ்ஜா²பன்னஸ்ஸ பி⁴க்கு²பா⁴வபரிச்சாக³வஸேன ஸேதவத்த²னிவாஸனம் வா காஸாவசஜனம் வா ஹீனாயாவத்தனம்.

ஏகாத³ஸமே அருணுக்³க³மனேதி அந்திமம் ட²பேத்வா ததோ புரிமதரஸ்மிந்தி அத்தோ² வேதி³தப்³போ³. தத்த² அந்திமம் நாம அபரகத்திகாய பட²மாருணுக்³க³மனம். தஞ்ஹி காலத்தா நிஸ்ஸக்³கி³யம் ந கரோதி. இத⁴ ‘‘நிட்டி²தசீவரஸ்மிம் பி⁴க்கு²னா’’தி கரணவசனம் நிதா³னானபேக்க²ம் நிதா³னே கரணாபா⁴வதோ. தஸ்மா ஏவ ‘‘த³ஸாஹபரம’’ந்தி அயமேத்த² அனுபஞ்ஞத்தீதி வுத்தம். ‘‘அனுஜானாமி, பி⁴க்க²வே, திசீவரம் அதி⁴ட்டா²தும் ந விகப்பேது’’ந்திஆதி³ (மஹாவ. 358) வசனதோ ச இத⁴ ‘‘விகப்பேதீ’’தி அவிஸேஸேன வுத்தவசனம் விருத்³த⁴ம் விய தி³ஸ்ஸதி, ந ச விருத்³த⁴ம் ததா²க³தா பா⁴ஸந்தி, தஸ்மா ஏவமஸ்ஸ அத்தோ² வேதி³தப்³போ³ – திசீவரம் திசீவரஸங்கே²பேன பரிஹாரதோ அதி⁴ட்டா²துமேவ அனுஜானாமி, ந விகப்பேதும். வஸ்ஸிகஸாடிகம் பன சதுமாஸதோ பரம் விகப்பேதுமேவ, ந அதி⁴ட்டா²துந்தி. ஏவஞ்ச பன ஸதி யோ திசீவரே ஏகேன சீவரேன விப்பவஸிதுகாமோ ஹோதி, தஸ்ஸ திசீவராதி⁴ட்டா²னம் பச்சுத்³த⁴ரித்வா விப்பவாஸஸுக²த்த²ம் விகப்பனாய ஓகாஸோ தி³ன்னோ ஹோதி, த³ஸாஹாதிக்கமே ச அனாபத்தீதி. ஏதேன உபாயேன ஸப்³ப³த்த² விகப்பனாய அபடிஸித்³த⁴பா⁴வோ வேதி³தப்³போ³தி லிகி²தம்.

இமஸ்ஸ பன ஸிக்கா²பத³ஸ்ஸ அயம் ஸங்கே²பவினிச்ச²யோ – அனத்த²தே கதி²னே ஹேமந்தானம் பட²மதி³வஸதோ பட்டா²ய, அத்த²தே கதி²னே கி³ம்ஹானம் பட²மதி³வஸதோ பட்டா²ய உப்பன்னசீவரம் ஸந்தா⁴ய ‘‘நிட்டி²தசீவரஸ்மி’’ந்திஆதி³ வுத்தம். ஏத்தா²ஹ – ‘‘ரஜகேஹி தோ⁴வாபேத்வா ஸேதகம் காராபேந்தஸ்ஸாபி அதி⁴ட்டா²னம் அதி⁴ட்டா²னமேவா’’தி (பாரா. அட்ட². 2.465) வசனதோ அரஜிதேபி அதி⁴ட்டா²னம் ருஹதீதி. தேன ஸூசிகம்மம் கத்வா ரஜித்வா கப்பபி³ந்து³ம் த³த்வா அதி⁴ட்டா²தப்³ப³ந்தி நியமோ காதப்³போ³, ந காதப்³போ³தி? கத்தப்³போ³வ. பத்தோ விய அதி⁴ட்டி²தோ யதா² புன ஸேதபா⁴வம் வா தம்ப³பா⁴வம் வா பத்தோ அதி⁴ட்டா²னம் ந விஜஹதி, ந ச பன தாதி³ஸோ யம் அதி⁴ட்டா²னம் உபக³ச்ச²தி, ஏவமேதம் த³ட்ட²ப்³ப³ந்தி. ‘‘ஸ்வே கதி²னம் உத்³த⁴ரிஸ்ஸதீ’’தி லத்³த⁴சீவரம் ஸசே அஜ்ஜேவ ந அதி⁴ட்டா²தி, அருணுக்³க³மனே ஏவ நிஸ்ஸக்³கி³யம் ஹோதி. கஸ்மா? ‘‘நிட்டி²தசீவரஸ்மி’’ந்திஆதி³னா (பாரா. 462-463;) ஸிக்கா²பத³ஸ்ஸ வுத்தத்தா. கதி²னப்³ப⁴ந்தரே த³ஸாஹதோ உத்தரிபி பரிஹாரம் லப⁴தி, கதி²னதோ பன பச்சா² ஏகதி³வஸம்பி ந லப⁴தி. யதா² கிம் – யதா² அத்த²தகதி²னோ ஸங்கோ⁴ திசீவரம் அத்த²ததி³வஸதோ பட்டா²ய யாவ உப்³பா⁴ரா ஆனிஸம்ஸம் லப⁴தி, ந ததோ பரம், ஏவம் அத்த²ததி³வஸதோ பட்டா²ய யாவ உப்³பா⁴ரா லப⁴தி, உத்³த⁴தே பன கதி²னே ஏகதி³வஸம்பி ந லப⁴தி. ஏத்தா²ஹ – உப்³ப⁴ததி³வஸதோ பட்டா²ய புன த³ஸாஹம் லப⁴தீதி? ந, கஸ்மா? ‘‘அனுஜானாமி, பி⁴க்க²வே, த³ஸாஹபரமம் அதிரேகசீவரம் தா⁴ரேது’’ந்தி வசனதோ. கதி²னப்³ப⁴ந்தரேபி ஏகாத³ஸே அருணுக்³க³மனே நிஸ்ஸக்³கி³யந்தி ஆபன்னம். தம் பன அதிப்பஸங்க³ம் நிவாரேதும் ‘‘நிட்டி²தசீவரஸ்மி’’ந்திஆதி³ வுத்தம், ந கதி²னதி³வஸானி அதி³வஸானீதி தீ³பனத்த²ம். அயமத்தோ² தத்த² தத்த² ஆவிப⁴விஸ்ஸதி. அத² வா வஸ்ஸிகஸாடிகா அனதிரித்தப்பமாணா நாமம் க³ஹேத்வா வுத்தனயேனேவ சத்தாரோ வஸ்ஸிகே மாஸே அதி⁴ட்டா²தப்³பா³, ததோ பரம் பச்சுத்³த⁴ரித்வா விகப்பேதப்³பா³தி வுத்தம். ஏத்த² ‘‘பச்சுத்³த⁴ரித்வா’’தி வசனே உபோஸத²தி³வஸே ஏவ பச்சுத்³த⁴ரித்வா விகப்பேத்வா ட²பிதம் ஹோதி, ததோ பரம் ஹேமந்தஸ்ஸ பட²மதி³வஸதோ பட்டா²ய பச்சுத்³த⁴ரணாபா⁴வா. ஏவம் கதி²னப்³ப⁴ந்தரே உப்பன்னசீவரம்பி வேதி³தப்³ப³ந்தி லிகி²தம்.

கதி²னஸிக்கா²பத³வண்ணனா நிட்டி²தா.

2. உதோ³ஸிதஸிக்கா²பத³வண்ணனா

‘‘அத்த²தகதி²னஸ்ஸ பஞ்ச மாஸே ப³த்³த⁴ஸீமாயம் யத்த² கத்த²சி சீவரம் நிக்கி²பித்வா பக்கமந்தஸ்ஸ அனாபத்தீ’’தி அட்ட²கதா²யம் வுத்தம். ‘‘அப³த்³த⁴ஸீமாயபி வட்டதீ’’தி இத³ம் அப³த்³த⁴ஸீமாயம் கதி²னத்தா²ரஞ்ச ஆரஞ்ஞகஸிக்கா²பத³ஞ்ச ஸாதே⁴தீதி லிகி²தம். இதா³னி –

‘‘சி²ன்னம் து⁴தங்க³ம் ஸாஸங்க-ஸம்மதோ ஸந்தருத்தரம்;

அசீவரஸ்ஸானாபத்தி, பச்சுத்³தா⁴ராதி³ஸித்³தி⁴தோ’’தி. (வஜிர. டீ. பாராஜிக 479) –

இத³ம் பகிண்ணகம் வேதி³தப்³ப³ம்.

தத்ராயம் சோத³னாபுப்³ப³ங்க³மவினிச்ச²யோ – கேசி ‘‘தி³கு³ணம் ஸங்கா⁴டி’’ந்தி (மஹாவ. 348) வசனதோ ‘‘ஏகச்சிகா ஸங்கா⁴டி நாதி⁴ட்டா²தப்³பா³. ஸசே அதி⁴ட்டா²தி, ந ருஹதீ’’தி வத்வா உபஸம்பதா³பேக்கா²னம்பி தி³கு³ணம்யேவ ஸங்கா⁴டிம் த³த்வா உபஸம்பாதே³ந்தி, தே இமினா ஸுத்தலேஸேன ஸஞ்ஞாபேதப்³பா³. ப⁴க³வதா ஹி ‘‘சி²ன்னகம் ஸங்கா⁴டிம், சி²ன்னகம் உத்தராஸங்க³ம், சி²ன்னகம் அந்தரவாஸக’’ந்தி பட²மம் அனுஞ்ஞாதம். ததோ ‘‘அஞ்ஞதரஸ்ஸ பி⁴க்கு²னோ திசீவரே கரியமானே ஸப்³ப³ம் சி²ன்னகம் நப்பஹோதி. த்³வே சி²ன்னகானி ஏகம் அசி²ன்னகம் நப்பஹோதி, த்³வே அசி²ன்னகானி ஏகம் சி²ன்னகம் நப்பஹோதீ’’தி இமஸ்மிம் வத்து²ஸ்மிம் ‘‘அனுஜானாமி, பி⁴க்க²வே, அன்வாதி⁴கம்பி ஆரோபேது’’ந்தி (மஹாவ. 360) அனுஞ்ஞாதம், தஸ்மா ஏகச்சிகாபி ஸங்கா⁴டி வட்டதீதி ஸித்³த⁴ம். யா சி²ஜ்ஜமானாபி நப்பஹோதி, தஸ்ஸா குதோ தி³கு³ணதாதி? அட்ட²கதா²யம்பிஸ்ஸ வுத்தம் ‘‘அன்வாதி⁴கம்பி ஆரோபேதுந்தி ஆக³ந்துகபத்தம்பி தா³தும், இத³ம் பன அப்பஹோனகே ஆரோபேதப்³ப³ம். ஸசே பஹோதி, ஆக³ந்துகபத்தம் ந வட்டதி, சி²ந்தி³தப்³ப³மேவா’’தி (மஹாவ. அட்ட². 360). கதி²னம் பன சி²ன்னகமேவ வட்டதி, ஆவேணிகலக்க²ணத்தா, ‘‘சி²ன்னகம் தி³கு³ணம் நப்பஹோதீ’’தி வசனாபா⁴வதோ சாதி ஸன்னிட்டா²னமேத்த² க³ந்தப்³ப³ந்தி.

து⁴தங்க³ந்தி அனுபஸம்பன்னானம் தேசீவரிகது⁴தங்கா³பா⁴வதோ திசீவரேனேவ தேசீவரிகோதி, தேஸம் அதி⁴ட்டா²னாபா⁴வதோ ‘‘அதி⁴ட்டி²தேனேவா’’தி வத்தப்³ப³ம் ஹோதூதி சே? ந, து⁴தங்க³பே⁴தே³ன விரோத⁴ப்பஸங்க³தோ. சதுத்த²சீவரஸாதி³யனேன ஹி து⁴தங்க³பே⁴தோ³, ந திசீவரவிப்பவாஸேன, நாபி அதிரேகசீவரஸாதி³யனேன, நாபி அதிரேகசீவரதா⁴ரணேன. யஸ்மா பன பி⁴க்கூ²னம் ஏவ ப⁴க³வதா அதி⁴ட்டா²னவஸேன நவ சீவரானி அனுஞ்ஞாதானி, ஜாதிவஸேன ச வுத்தானி, ந ஏவம் அனுபஸம்பன்னானம், தஸ்மா நேஸம் சீவரனியமாபா⁴வா ந தம் து⁴தங்க³ம் அனுஞ்ஞாதம் க³ஹட்டா²னம் விய. தஸ்மா தஸ்ஸ ஸமாதா³னவிதா⁴னே அவசனதோ ச ஸன்னிட்டா²னமேத்த² க³ந்தப்³ப³ந்தி.

ஸாஸங்கஸம்மதோதி கங்கா²விதரணியம் (கங்கா². அட்ட². ஸாஸங்கஸிக்கா²பத³வண்ணனா) ஸாஸங்கஸிக்கா²பதே³ விஸும் அங்கா³னி ந வுத்தானி, ‘‘ஸேஸமேத்த² சீவரவக்³க³ஸ்ஸ து³தியஸிக்கா²பதே³ வுத்தனயேனேவ வேதி³தப்³ப³’’ந்தி வுத்தம், ந ச பனேதம் வுத்தம். தத்த² ரத்திவிப்பவாஸோ சதுத்த²மங்க³ம், இத⁴ சா²ரத்தவிப்பவாஸோ, அயமேத்த² விஸேஸோதி. தஸ்மா அங்க³ஸாமஞ்ஞதோ ச ஸம்முதிஸாமஞ்ஞதோ ச ஸாஸங்கஸிக்கா²பத³மேவித³ந்தி இத³ம் நிப்பதே³ஸம், தம் ஸப்பதே³ஸம் மாஸபரமத்தா. தத்த² ப³ஹிகா³மேபி கா³மஸீமம் ஓக்கமித்வா வஸித்வா பக்கமந்தஸ்ஸ அனாபத்தி, இத⁴ ந ததா². இத⁴ அனந்தரே அனந்தரே அருணுக்³க³மனே நிஸ்ஸக்³கி³யம், தத்த² ஸத்தமேதி அயம் இமேஸம் த்³வின்னம் விஸேஸோ. அங்கா³னி பன சீவரனிக்கே²பனங்க³ஸம்பத்திதோ விபரியாயேன, இத⁴ வுத்தனயேன ச ஸித்³த⁴த்தா ந வுத்தானி. தானி காமம் ந வுத்தானி, ததா²பி சதுத்த²மங்க³ம் விஸேஸிதப்³ப³ம், ந பன விஸேஸிதம். கிம் காரணம்? இத⁴ வுத்தனிஸ்ஸஜ்ஜனக்கமேன நிஸ்ஸஜ்ஜித்வா ஆபத்திதே³ஸனதோ, தத்தா²பன்னாபத்திவிமோக்க²தீ³பனத்த²ம். ஸம்வச்ச²ரவிப்பவுத்த²ம்பி ரத்திவிப்பவுத்த²மேவ, பகே³வ சா²ரத்தவிப்பவுத்த²ம். ஏவம் ஸந்தேபி தத்த² யதா²வுத்தஅங்க³ஸம்பத்தியா ஸதி தத்த² வுத்தனயேனேவ நிஸ்ஸஜ்ஜிதப்³ப³ம். ஹேமந்தே, கி³ம்ஹே வா நிஸ்ஸஜ்ஜதி சே? இத⁴ வுத்தனயேனாபி நிஸ்ஸஜ்ஜிதும் வட்டதீதி ஞாபனத்த²ம் சதுத்த²மங்க³ம் ந விஸேஸிதந்தி நோ தக்கோதி ஆசரியோ. மாஸாதிக்கந்தம், த³ஸாஹாதிக்கந்தம்பி சீவரம் ‘‘த³ஸாஹாதிக்கந்த’’ந்தி வத்வா நிஸ்ஸட்ட²மேவ, ந ஊனமாஸம் ஹுத்வா ‘‘த³ஸாஹாதிக்கந்த’’ந்தி வத்வா, மாஸாதிக்கந்த’’ந்தி வத்வாதி ஏகே. ததா²பி ஸசே பச்சாஸாசீவரம் ஹோதி, நிஸ்ஸக்³கி³யம். ‘‘த³ஸாஹாதிக்கந்த’’ந்தி வத்வா மூலசீவரம் பன ‘‘மாஸாதிக்கந்த’’ந்தி வத்வா நிஸ்ஸஜ்ஜிதப்³ப³ம்.

‘‘ஸந்தருத்தர’’ந்தி வா ‘‘ஸங்கா⁴டி’’ந்தி வா ‘‘சீவர’’ந்தி வா கிம் திசீவரம், உதா³ஹு அஞ்ஞம்பீதி? கிஞ்சேத்த² – யதி³ திசீவரமேவ படிஸித்³த⁴ம், பரியாபன்னவஸேன அச்சி²ன்னசீவரஅஅச²ந்த³னதோ⁴வாபனவிஞ்ஞத்திஆதி³விரோதோ⁴. அத² அஞ்ஞம்பி ‘‘நிட்டி²தசீவரஸ்மி’’ந்தி ஏவமாதி³னா விரோதோ⁴தி? வுச்சதே – ந நியமதோ வேதி³தப்³ப³ம் யதா²ஸம்ப⁴வம் க³ஹேதப்³ப³தோ. ததா² ஹி ‘‘சீவரம் நிக்கி²பித்வா ஸந்தருத்தரேன ஜனபத³சாரிகம் பக்கமந்தீ’’தி (பாரா. 471) ஏவமாதீ³ஸு திசீவரமேவ, ‘‘ந, பி⁴க்க²வே, ஸந்தருத்தரேன கா³மோ பவிஸிதப்³போ³ (மஹாவ. 362), ஸந்தருத்தரபரமம் ததோ சீவரம் ஸாதி³தப்³ப³’’ந்தி (பாரா. 523-524) ஏவமாதீ³ஸு யம் கிஞ்சி, ததா² ‘‘ஸகு³ணம் கத்வா ஸங்கா⁴டியோ தா³தப்³பா³, நிவாஸனம் தா³தப்³ப³ம், ஸங்கா⁴டி தா³தப்³பா³, ஹந்த³ தே, ஆவுஸோ, ஸங்கா⁴டி, தே³ஹி மே பட’’ந்தி ஏவமாதீ³ஸு. வுத்தஞ்ஹேதம் ‘‘ஸப்³ப³ஞ்ஹி சீவரம் ஸங்க⁴டிதட்டே²ன ‘ஸங்கா⁴டீ’தி வுச்சதீ’’தி (பாசி. அட்ட². 898). ததா² ‘‘நிட்டி²தசீவரஸ்மி’’ந்தி ஏத்தா²பீதி ஏகே. அந்தோஸமயே யாவத³த்த²ம் சீவரம் அனுஞ்ஞாதம், தம் ஸப்³ப³ம் கரியமானம் கதா³ நிட்டா²னம் க³ச்சி²ஸ்ஸதி, தஸ்மா திசீவரமேவாதி ஏகே.

அசீவரஸ்ஸானாபத்தி பச்சுத்³தா⁴ராதி³ஸித்³தி⁴தோதி கிம் வுத்தம் ஹோதி – உதோ³ஸிதஸிக்கா²பத³ஸ்ஸ நிப்பயோஜனபா⁴வப்பஸங்க³தோ திசீவரவிப்பவாஸே தேசீவரஸ்ஸ ஆபத்தீதி ஏகே. தத்தே²தம் வுச்சதி ந ஹோதி ஆபத்தி பச்சுத்³தா⁴ராதி³ஸித்³தி⁴தோ. ‘‘அனாபத்தி அந்தோஅருணே பச்சுத்³த⁴ரதி விஸ்ஸஜ்ஜேதீ’’தி (பாரா. 496) ஹி வுத்தம். அஞ்ஞதா² பச்சுத்³த⁴ரந்தஸ்ஸ, அந்தோஅருணே விஸ்ஸஜ்ஜேந்தஸ்ஸ ச யாவ அஞ்ஞோ நாதி⁴ட்டா²தி, தாவ ஆபத்திம் ஆபஜ்ஜதி யதா²வுத்தனயேனேவ. அஞ்ஞதா² ஸத்தப்³ப⁴ந்தரேன விப்பவாஸஸ்ஸாதி விப்பவாஸதோ யதா²ருதம்யேவ ஸதி விப்பவாஸே விப்பவாஸதோ, அவிப்பவாஸே ஸதி அவிப்பவாஸதோதி.

உதோ³ஸிதஸிக்கா²பத³வண்ணனா நிட்டி²தா.

3. அகாலசீவரஸிக்கா²பத³வண்ணனா

அபரிக்கி²த்தஸ்ஸ பரிக்கே²பாரஹட்டா²னஸ்ஸ து³ப்³பி³ஜானத்தா தம் த³ஸ்ஸேதும் ‘‘அபிச பி⁴க்கூ²ன’’ந்திஆதி³ வுத்தம். விஹாரபரியந்தே நிவிட்ட²து⁴வஸன்னிபாதட்டா²னதோ வா பரியந்தே டி²தபோ⁴ஜனஸாலதோ வா நிப³த்³த⁴வஸனகஆவாஸதோ வாதி ஏவம் க³ஹேதப்³ப³ம். ஸசே விஹாரே ஸன்னிபதிதபி⁴க்கூ²ஹி ஸத்³தி⁴ம் ஏகாப³த்³தா⁴ ஹுத்வா யோஜனஸதம்பி பூரேத்வா நிஸீத³ந்தி, யோஜனஸதம்பி உபசாரஸீமா ஹோதீதி அத்தோ². ‘‘ஸமானஸம்வாஸகஸீமாயா’’தி வுத்தே க²ண்ட³ஸீமாதீ³ஸு டி²தானம் ந பாபுணாதி, தாஸம் விஸும் ஸமானஸம்வாஸகஸீமத்தாதி ச ஸமானஸம்வாஸகஅவிப்பவாஸஸீமானம் இத³ம் நானத்தம். ‘‘அவிப்பவாஸஸீமாய த³ம்மீ’’தி தி³ன்னம் பன கா³மே டி²தானம் ந பாபுணாதி. கஸ்மா? ‘‘ட²பேத்வா கா³மஞ்ச கா³மூபசாரஞ்சா’’தி (மஹாவ. 144) வசனதோ. ‘‘ஸமானஸம்வாஸகஸீமாயா’’தி தி³ன்னம் பன யஸ்மிம் டா²னே அவிப்பவாஸஸீமா அத்தி², தத்த² டி²தானம்பி. ‘‘தத்ர டி²தானஞ்ச பாபுணாதீ’’தி ச, ‘‘க²ண்ட³ஸீமாயம் ட²த்வா ‘ஸீமட்ட²கஸங்கோ⁴ க³ண்ஹாதூ’தி வுத்தே உபசாரஸீமாய ஏவ பரிச்சி²ந்தி³த்வா தா³தப்³ப³’’ந்தி ச, ‘‘தேஸம் ப³ஹிஸீமட்டா²னம்பி பாபுணாதி யாவ கதி²னஸ்ஸுப்³பா⁴ராதி அத்தோ²’’தி ச, ‘‘அனத்த²தே பன கதி²னே அந்தோஹேமந்தே ஸசே விஹாரம் பவிஸித்வா ‘வஸ்ஸம்வுட்ட²ஸங்க⁴ஸ்ஸ த³ம்மீ’தி வத³தி, யே தத்த² வஸ்ஸச்சே²த³ம் அகத்வா பச்சி²மவஸ்ஸம்வுட்டா², தேஸம் ப³ஹிஸீமட்டா²னம்பி பாபுணாதீ’’தி வினயத⁴ரா பரிச்சி²ந்த³ந்தி, அட்ட²கதா²யம் பன அனாக³தம். தஸ்மா ஸமந்தபாஸாதி³காயம் ‘‘லக்க²ணஞ்ஞூ வத³ந்தீ’’தி (மஹாவ. அட்ட². 379) வுத்தந்தி ச, ‘‘‘சீவரமாஸதோ பட்டா²ய யாவ ஹேமந்தஸ்ஸ பச்சி²மோ தி³வஸோ, தாவ வஸ்ஸாவாஸிகம் தே³மா’தி வுத்தே கதி²னம் அத்த²தம் வா ஹோது, அனத்த²தம் வாதி யம் ஸமந்தபாஸாதி³காவசனம் (மஹாவ. அட்ட². 379), ஏத்தா²பி யதி³ அத்த²தம், புரிமவஸ்ஸம்வுட்டா² பஞ்ச மாஸே. யதி³ அனத்த²தம், பச்சி²மவஸ்ஸம்வுட்டா² சத்தாரோ மாஸே லப⁴ந்தீதி வினிச்ச²யோ’’தி ச லிகி²தம்.

‘‘யேஹி மய்ஹம் யாகு³ பீதாதி யேஹி நிமந்திதேஹி மய்ஹம் யாகு³ பீதாதி அதி⁴ப்பாயோ. தஸ்மா யேஹி நிமந்திதேஹி யாகு³ பீதா, தேஸம்யேவ பாபுணாதீதி வுத்தம். அஞ்ஞதா² ‘யேஹி மய்ஹம் யாகு³ பீதா’தி வுத்தே நிமந்திதா வா ஹோந்து, அனிமந்திதா வா, யேஹி பீதா, தேஸம் பாபுணிதப்³பா³னீ’’தி வத³ந்தி. ஏத்த² ‘‘நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே’’தி வத³ந்தோ ஞாபேதி ஏத்த²ந்தரே திண்ணம்பி அகாலசீவரானம் உப்பத்திஅபா⁴வந்தி. கஸ்மா பன பத³பா⁴ஜனே வித்தா²ரிதானீதி? வுச்சதே – இத³ம் பன ஸிக்கா²பத³ம் அதி⁴ட்டா²னம் ஸந்தா⁴ய ந வுத்தம் கிந்து பட²மஸிக்கா²பதே³ த³ஸாஹபரமம் அனுஜானித்வா தஸ்மிம் அப்பஹோந்தே ஸசே பச்சாஸா அத்தி², தமேவ வட்³டே⁴த்வா மாஸமனுஜானந்தோ இமம்பி அத்த²விஸேஸம் தீ³பேதி. அகாலசீவரம் நாம ஸம்முகீ²பூ⁴தேன பா⁴ஜேதப்³ப³ம். தம் பன ‘‘ஆகங்க²மானேன பி⁴க்கு²னா படிக்³க³ஹேதப்³ப³’’ந்தி இமினா ஸிக்கா²பதே³ன வட்³டே⁴த்வா வுத்தந்தி. தஸ்மா தீணிபி பத³பா⁴ஜனே வித்தா²ரிதானீதி.

‘‘கி²ப்பமேவ காரேதப்³ப³ந்தி ஸீக⁴ம் அந்தோத³ஸாஹேயேவ காரேதப்³ப³’’ந்தி இத³ம் பன பஹோனகபா⁴வே புரிமஸிக்கா²பத³லக்க²ணேனாதி தீ³பேதும் வுத்தம். தஸ்மா ஏவம் ‘‘ஸீக⁴’’ந்தி வா ‘‘லஹு’’ந்தி வா ஆதி³னா அவத்வாபி ‘‘த³ஸாஹா’’தி வுத்தந்தி. அத்த²தகதி²னஸ்ஸ ஏவம் ஹோது, அனத்த²தே பன கதி²னே கத²ந்தி வுத்தே அனத்த²தஸ்ஸ படிக்கே²பதம் த³ஸ்ஸேதீதி வுத்தோ அபஸ்ஸந்தோ விகா⁴தம் ஆபஜ்ஜதீதி (வஜிர. டீ. பாராஜிக 499-500) லிகி²தம்.

அகாலசீவரஸிக்கா²பத³வண்ணனா நிட்டி²தா.

4. புராணசீவரஸிக்கா²பத³வண்ணனா

‘‘ஸாகியானியோ விய ஸுத்³த⁴பி⁴க்கு²ஸங்கே⁴ வா’’தி இத³ம் ‘‘பி⁴க்கு²னீ நாம உப⁴தோஸங்கே⁴ உபஸம்பன்னா’’தி (பாரா. 505) இமினா விருஜ்ஜ²தீதி சே? ந, அதி⁴ப்பாயாஜானனதோ. பி⁴க்கூ²னம் ஸந்திகே உபஸம்பதா³ய படிக்கி²த்தத்தா தத³னுப்பஸங்க³ப⁴யா ஏவம் வுத்தந்தி வேதி³தப்³ப³ம்.

ஏகேன வத்து²னாதி யேன கேனசி பட²மேன. அவுத்தா வா தோ⁴வதீதி அவுத்தா தோ⁴வதி, ரஜதி ஆகோடேதீதி அத்தோ². ‘‘‘அவுத்தா’தி வசனதோ அவாதா³பேத்வா தோ⁴வனாதீ³ஸு அனாபத்தீ’’தி லிகி²தம். இத⁴ சீவரம் நாம நிவாஸனபாருபனூபக³மேவ. யதி³ ஏவம் ‘‘நிவாஸனபாருபனூபக³மேவ வத்தப்³ப³’’ந்தி சே? தம் ந வத்தப்³ப³ம் ‘‘புராணசீவர’’ந்தி இமினாவ ஸித்³த⁴த்தா. வுத்தஞ்ஹேதம் ‘‘புராணசீவரம் நாம ஸகிம் நிவத்த²ம்பி ஸகிம் பாருதம்பீ’’தி (பாரா. 505).

புராணசீவரஸிக்கா²பத³வண்ணனா நிட்டி²தா.

5. சீவரப்படிக்³க³ஹணஸிக்கா²பத³வண்ணனா

உபசாரோ த்³வாத³ஸஹத்தோ². அசித்தகத்தா கத²ம் பம்ஸுகூலம் வட்டதீதி சே? தாய தஸ்ஸ பி⁴க்கு²னோ அதி³ன்னத்தா, பி⁴க்கு²னா ச ததோ பி⁴க்கு²னிதோ அக்³க³ஹிதத்தா ச.

சீவரப்படிக்³க³ஹணஸிக்கா²பத³வண்ணனா நிட்டி²தா.

6. அஞ்ஞாதகவிஞ்ஞத்திஸிக்கா²பத³வண்ணனா

ஞாதகப்பவாரிதே வா விஞ்ஞாபேந்தஸ்ஸாதி ஏத்த² ச ஸங்க⁴வஸேன பவாரிதேஸு பமாணமேவ வட்டதி. புக்³க³லிகப்பவாரணாய யம் யம் பவாரேதி, தம் தம்யேவ விஞ்ஞாபேதப்³ப³ந்தி லிகி²தம்.

அஞ்ஞாதகவிஞ்ஞத்திஸிக்கா²பத³வண்ணனா நிட்டி²தா.

7. ததுத்தரிஸிக்கா²பத³வண்ணனா

பகதியா ஸந்தருத்தரேன சரதி கதி²னபலிபோ³த⁴வஸேன வா ஸாஸங்கஸிக்கா²பத³வஸேன வா. ஏத்த² ஸியா – ‘‘ந மத்தம் ஜானித்வா ப³ஹும் சீவரம் விஞ்ஞாபேஸ்ஸந்தி, து³ஸ்ஸவாணிஜ்ஜம் வா’’திஆதி³னா (பாரா. 522) உஜ்ஜா²யந்தானம் ஸுத்வா ப⁴க³வாபி ச²ப்³ப³க்³கி³யே பி⁴க்கூ² ‘‘கத²ஞ்ஹி நாம தும்ஹே மோக⁴புரிஸா ந மத்தம் ஜானித்வா ப³ஹும் சீவரம் விஞ்ஞாபேஸ்ஸதா²’’தி (பாரா. 522) வத்வா ஸிக்கா²பத³ஸ்ஸ பஞ்ஞத்தத்தா ச இமிஸ்ஸம் கங்கா²விதரணியம் ‘‘ப³ஹுசீவரவிஞ்ஞாபனவத்து²ஸ்மிம் பஞ்ஞத்த’’ந்தி வுத்தத்தா, ஸமந்தபாஸாதி³காயம் ‘‘ந ஹி அனச்சி²ன்னசீவரா அத்தனோ அத்தா²ய ஸாகா²பலாஸம் ப⁴ஞ்ஜிதும் லப⁴ந்தி, அச்சி²ன்னசீவரானம் பன அத்தா²ய லப⁴ந்தீ’’தி வுத்தத்தா ச அஞ்ஞஸ்ஸத்தா²ய பமாணம் விஞ்ஞாபேதும் வட்டதீதி சே? ந, கஸ்மா? அஞ்ஞாதகவிஞ்ஞத்திஸிக்கா²பத³ஸ்ஸ அட்டு²ப்பத்தியா ஏவ அஞ்ஞாதகவிஞ்ஞத்தி வாரிதா. தஸ்ஸ ஸிக்கா²பத³ஸ்ஸ அனாபத்தி. பாளியம் (பாரா. 521) ‘‘அஞ்ஞஸ்ஸத்தா²யா’’தி இமிஸ்ஸா அனாபத்திபாளியா அஞ்ஞஸ்ஸத்தா²ய விஞ்ஞாபேந்தோ தஸ்ஸ ஞாதகப்பவாரிதே ஏவ விஞ்ஞாபேதி, ந அஞ்ஞேதி வசனதோ ச வாரிதா. தஸ்மா ப⁴க³வாபி ‘‘ப³ஹும் சீவரம் விஞ்ஞாபேஸ்ஸதா²’’தி (பாரா. 522) விக³ரஹித்வா ஸிக்கா²பத³ம் பஞ்ஞாபேந்தோ ‘‘அபி⁴ஹட்டு²ம் பவாரேய்யா’’தி வுத்தனயேனேவ பமாணதோ க³ஹணம் அனுஜானி, ந அஞ்ஞஸ்ஸத்தா²ய பமாணதோ விஞ்ஞாபனம். யஸ்மா பனிமம் ஸிக்கா²பத³ம் அஞ்ஞஸ்ஸத்தா²ய விஞ்ஞாபனவத்து²ஸ்மிம்யேவ பஞ்ஞத்தம், தஸ்மா இத⁴ ‘‘அஞ்ஞஸ்ஸத்தா²யா’’தி ந வுத்தம், ந ந லப்³ப⁴தீதி கத்வா.

அட்ட²கதா²ஸு ‘‘அஞ்ஞாதகப்பவாரிதட்டா²னே பகதியா ப³ஹும்பி வட்டதி, அச்சி²ன்னகாரணா பமாணமேவ வட்டதீ’’தி வுத்தம். தம் ‘‘அனாபத்தி ஞாதகானம் பவாரிதான’’ந்தி (பாரா. 526) வுத்தஅனாபத்திபாளியா ந ஸமேதீதி ஸமந்தபாஸாதி³காயம் (பாரா. அட்ட². 2.526) வுத்தத்தா இதா⁴பி வுத்தனயேனேவ ஞாதகப்பவாரிதே விஞ்ஞாபேந்தஸ்ஸ அத்தனோ த⁴னேன க³ண்ஹந்தஸ்ஸ அனாபத்தீதி லிகி²தம். ‘‘அஞ்ஞஸ்ஸத்தா²யா’’தி நிதா³னவிரோத⁴தோ ந வுத்தம், ததா²பி அனந்தரே வுத்தனயேனேவ லப்³ப⁴தி ஏவாதி வத³ந்தி.

ததுத்தரிஸிக்கா²பத³வண்ணனா நிட்டி²தா.

8. உபக்க²டஸிக்கா²பத³வண்ணனா

பட²மஉபக்க²டே ‘‘புப்³பே³ அப்பவாரிதோ’’தி (பாரா. 528) வசனதோ தஸ்மிம் க²ணே பவாரிதோபி அப்பவாரிதோவ ஹோதீதி வேதி³தப்³ப³ம்.

உபக்க²டஸிக்கா²பத³வண்ணனா நிட்டி²தா.

9. து³தியஉபக்க²டஸிக்கா²பத³வண்ணனா

து³தியஉபக்க²டேன கிம் பயோஜனந்தி சே? நத்தி² பயோஜனம், கேவலம் அட்டு²ப்பத்திவஸேன பன பஞ்ஞத்தம் பி⁴க்கு²னியா ரஹோனிஸஜ்ஜஸிக்கா²பத³ம் விய. ஏவம் ஸந்தே ஸங்கீ³திகாரகேஹி ஸங்கீ³திம் அனாரோபேதப்³ப³ம் ப⁴வேய்ய வினாபி தேன தத³த்த²ஸித்³தி⁴தோ, அனிஸ்ஸரத்தா, அனாரோபேதும் அனுஞ்ஞாதத்தா ச. வுத்தஞ்ஹேதம் ‘‘ஆகங்க²மானோ, ஆனந்த³, ஸங்கோ⁴…பே… ஸமூஹனேய்யா’’தி (தீ³. நி. 2.216; சூளவ. 441). இத³ம் ஸப்³ப³மகாரணம். ந ஹி பு³த்³தா⁴ அப்பயோஜனம் வசனம் நிச்சா²ரேந்தி, பகே³வ ஸிக்கா²பத³ம். தேனேவாஹ அட்ட²கதா²யம் ‘‘இமினாவ நயேன அத்தோ² வேதி³தப்³போ³. இத³ஞ்ஹி புரிமஸ்ஸ அனுபஞ்ஞத்திஸதி³ஸ’’ந்திஆதி³. அனுபஞ்ஞத்தி ச நிப்பயோஜனம் நத்தி². தம்ஸதி³ஸஞ்சேதம், ந நிப்பயோஜனந்தி த³ஸ்ஸிதம் ஹோதி. ஏவம் ஸந்தே கோ பனேத்த² அத்த²விஸேஸோதி? ததோ ஆஹ ‘‘கேவலம் தத்த² ஏகஸ்ஸ பீளா கதா, இத⁴ த்³வின்னம், அயமேத்த² விஸேஸோ’’தி. இமினா அத்த²விஸேஸேன கோ பனஞ்ஞோ அதிரேகத்தோ² த³ஸ்ஸிதோதி? போராணக³ண்டி²பதே³ தாவ வுத்தம் ‘‘ஏகஸ்மிம்பி வத்து²ஸ்மிம் உபி⁴ன்னம்பி பீளா காதும் ந வட்டதீதி அயமதிரேகத்தோ² த³ஸ்ஸிதோ’’தி. தேனேதம் தீ³பேதி ‘‘ந கேவலம் படிலத்³த⁴சீவரக³ணனாய ஏவ ஆபத்திக³ணனா, பீளிதபுக்³க³லஸங்கா²தவத்து²க³ணனாயபீ’’தி.

ஹோந்தி சேத்த² –

‘‘வத்து²தோ க³ணனாயபி, ஸியா ஆபத்தி நேகதா;

இதி ஸந்த³ஸ்ஸனத்த²ஞ்ச, து³தியூபக்க²டம் இத⁴.

‘‘காயஸம்ஸக்³க³ஸிக்கா²ய, விப⁴ங்கே³ விய கிந்தேதம்;

ஏகித்தி²யாபி நேகதா, ஆபத்தீனம் பயோக³தோ’’தி. (வஜிர. டீ. பாராஜிக 532);

அபிசேதம் ஸிக்கா²பத³ம் தம்ஜாதிகேஸு ஸிக்கா²பதே³ஸு ஸப்³பே³ஸுபி க³ஹேதப்³ப³வினிச்ச²யஸ்ஸ த³ஸ்ஸனப்பயோஜனந்தி வேதி³தப்³ப³ம். ஆஹ ச –

‘‘அஞ்ஞாதிகாய ப³ஹுதாய விமிஸ்ஸதாய;

ஆபத்தியாபி ப³ஹுதா ச விமிஸ்ஸதா ச;

இச்சேவமாதி³விதி⁴ஸம்ப⁴வத³ஸ்ஸனத்த²ம்;

ஸத்தா² உபக்க²டமித³ம் து³தியம் அவோசா’’தி. (வஜிர. டீ. பாராஜிக 532);

தஸ்ஸாயம் ஸங்கே²பதோ அதி⁴ப்பாயபுப்³ப³ங்க³மா விசாரணா – புராணசீவரம் ஏகமேவ பி⁴க்கு² பி⁴க்கு²னீஹி த்³வீஹி, ப³ஹூஹி வா தோ⁴வாபேதி, பி⁴க்கு²னிக³ணனாய பாசித்தியக³ணனா. ததா² த்³வின்னம், ப³ஹூனம் வா ஸாதா⁴ரணம் ஏகமேவ சீவரம் அஞ்ஞத்ர பாரிவத்தகா படிக்³க³ண்ஹாதி, இதா⁴பி ததா² த்³வின்னம், ப³ஹூனம் வா ஸாதா⁴ரணமேகம் விஞ்ஞாபேதி, விஞ்ஞத்தபுக்³க³லக³ணனாய ஆபத்திக³ணனா. ததா² அஞ்ஞேஸுபி ஏவரூபேஸு ஸிக்கா²பதே³ஸு நயோ நேதப்³போ³. அயம் தாவ ப³ஹுதாய நயோ.

விமிஸ்ஸதாய பன ஞாதிகாய, அஞ்ஞாதிகாய ச ஏகம் தோ⁴வாபேதி, ஏகதோ நிட்டா²பனே ஏகம் பாசித்தியம். அத² ஞாதிகா பட²மம் தோ²கம் தோ⁴வித்வா டி²தா, புன அஞ்ஞாதிகா ஸுதோ⁴தம் கரோதி, நிஸ்ஸக்³கி³யம் பாசித்தியம். அத² அஞ்ஞாதிகா பட²மம் தோ⁴வதி, பச்சா² ஞாதிகா ஸுதோ⁴தம் கரோதி, அஞ்ஞாதிகாய பயோக³வஸேன பி⁴க்கு²னோ து³க்கடமேவ. அஞ்ஞாதிகாய, ஞாதிகாய ச அஞ்ஞாதிகஸஞ்ஞீ, வேமதிகோ, ஞாதிகஸஞ்ஞீ வா தோ⁴வாபேதி, யதா²வுத்தனயேன நிஸ்ஸக்³கி³யது³க்கடாதி³ஆபத்திபே⁴த³க³ணனா வேதி³தப்³பா³. ததா² அஞ்ஞாதிகாய, ஞாதிகாய ச ஸந்தகம் சீவரம் உபோ⁴ஹி ஏகதோ தி³ய்யமானம் படிக்³க³ண்ஹாதி, நிஸ்ஸக்³கி³யமேவ. அத² அஞ்ஞாதிகாய ஏவ ஹத்த²தோ படிக்³க³ண்ஹாதி, நிஸ்ஸக்³கி³யமேவ. அத² ஞாதிகாய ஹத்த²தோ படிக்³க³ண்ஹாதி, அனாபத்தி. அத² உபோ⁴ஸு அஞ்ஞாதிகாதி³ஸஞ்ஞீ, வுத்தனயேனேவ நிஸ்ஸக்³கி³யது³க்கடாதி³ஆபத்திபே⁴த³க³ணனா வேதி³தப்³பா³. ததா² அஞ்ஞாதிகவிஞ்ஞத்திஆதீ³ஸுபி யதா²ஸம்ப⁴வம் நயோ நேதப்³போ³. அயம் விமிஸ்ஸதாய நயோ.

ஆதி³ஸத்³தே³ன பன அனேகே அஞ்ஞாதிகா விஞ்ஞத்தா, விஞ்ஞத்தபுக்³க³லக³ணனாய து³க்கடம். ஏகோ தே³தி, ஏகோ ந தே³தி, நிஸ்ஸக்³கி³யம். அத² அவிஞ்ஞத்தோ தே³தி, ந நிஸக்³கி³யம். அத² விஞ்ஞத்தாவிஞ்ஞத்தானம் ஸாதா⁴ரணம் விஞ்ஞத்தோ தே³தி, நிஸ்ஸக்³கி³யம். உபோ⁴ தே³ந்தி, நிஸ்ஸக்³கி³யமேவ. அவிஞ்ஞத்தோ தே³தி, நிஸ்ஸக்³கி³யேன அனாபத்தி. விஞ்ஞத்தஸ்ஸ வசனேன அவிஞ்ஞத்தோ தே³தி, அனாபத்தி ஏவ. ததா² உபக்க²டாதீ³ஸுபி யதா²ஸம்ப⁴வம் நயோ நேதப்³போ³.

ஏத்தாவதா ஸங்கே²பதோ அஞ்ஞாதிகாயாதி³கா³தா² வுத்தாதி⁴ப்பாயா ஹோதி. யம் பனேத்த² பி⁴க்கு²னியா ரஹோனிஸஜ்ஜஸிக்கா²பத³ம் நிப்பயோஜனதாய நித³ஸ்ஸனம் வுத்தம், தஸ்ஸ பயோஜனவிஸேஸோ தஸ்மிம்யேவ ஆவிப⁴விஸ்ஸதீதி. ஏவமேவ அஞ்ஞத்த²பி வசனேன, விஸேஸஅட்டு²ப்பத்திவஸேன ச ஸிக்கா²பதே³ஸு ஞாதப்³ப³ம் விஸேஸப்பயோஜனந்தி.

து³தியஉபக்க²டஸிக்கா²பத³வண்ணனா நிட்டி²தா.

10. ராஜஸிக்கா²பத³வண்ணனா

‘‘டா²னம் ப⁴ஞ்ஜதி, ஆக³தகாரணம் வினாஸேதீ’’தி வுத்தத்தா புன சோத³னம் ந லப⁴தீதி ஏகே. ஆக³மனஸ்ஸ ஸாத்த²கம் ந ஹோதி, சீவரம் ந லபி⁴ஸ்ஸதி படிஸந்தா²ரஸ்ஸ கதத்தாதி ஏகே. சோத³னாலக்க²ணம் ந ஹோதீதி கத்வா வுத்தந்தி ஏகே. ‘‘த⁴ம்மதே³ஸனாதி⁴ப்பாயாதி³னா ந படிஸந்தா²ரோ காதப்³போ³’’தி உபதிஸ்ஸத்தே²ரோ ‘‘‘ஆக³தகாரணம் வினாஸேதீ’தி சோத³னாடா²னானி ப⁴ஞ்ஜதி, சோதே³துகாமோ அகத்தப்³ப³மகாஸி, தப்பச்சயா வத்தபே⁴தே³ து³க்கட’’ந்தி ச வத³தி. த⁴ம்மஸிரித்தே²ரோ பன ‘‘ஆஸனே சே நிஸீத³தி, ஏகாய நிஸஜ்ஜாய த்³வே டா²னானி ப⁴ஞ்ஜதி. ஆமிஸம் சே படிக்³க³ண்ஹாதி, ஏகேன படிக்³க³ஹணேன த்³வே டா²னானி ப⁴ஞ்ஜதி. த⁴ம்மம் சே பா⁴ஸதி, த⁴ம்மதே³ஸனாஸிக்கா²பதே³ வுத்தபரிச்சே²தா³ய ஏகாய வாசாய த்³வே டா²னானி ப⁴ஞ்ஜதி. தம் ஸந்தா⁴ய ‘ஆக³தகாரணம் வினாஸேதீ’தி வுத்த’’ந்தி வத³தி. ‘‘ஏஸோ கோ²’’தி வுத்தேன ஸஞ்ஞத்தோ ஏகோ, ‘‘அயம் வேய்யாவச்சகரோதி…பே… அவுத்தேபி சோதே³தும் வட்டதீ’’தி வுத்தோ து³தியோ, ஸசே பன தூ³தோ க³ச்ச²ந்தோவ ‘‘அஹம் தஸ்ஸ ஹத்தே² த³ஸ்ஸாமீ’’திஆதி³னா வுத்தோ ததியோ, ‘‘அஞ்ஞம் வா பேஸேத்வா ஆரோசாபேதீ’’தி வுத்தோ சதுத்தோ²தி யதா² பி⁴க்கு²னா நித்³தி³ட்டா² சத்தாரோ, ததே²வ தூ³தேன நித்³தி³ட்டா² சத்தாரோ. முக²வேவடிககப்பியகாரகோ, பரம்முக²கப்பியகாரகோ சேதி ஏதேஸு அஞ்ஞாதகஅப்பவாரிதேஸு விய படிபஜ்ஜிதப்³ப³ந்தி லிகி²தம்.

ராஜஸிக்கா²பத³வண்ணனா நிட்டி²தா.

சீவரவக்³கோ³ பட²மோ.

2. ஏளகலோமவக்³கோ³

1. கோஸியஸிக்கா²பத³வண்ணனா

காராபேய்யாதி அத்தனோ ச பரஸ்ஸ ச உபி⁴ன்னஞ்ச கோஸியம் ஏகதோ க³ண்ஹித்வா வுத்தம், உபோ⁴ வா ஏகதோ கரோந்தீதி அத்த²தோ வேதி³தப்³ப³ம். தத்த² அத்தனா கதம் சே, ‘‘நிஸ்ஸஜ்ஜனகாலே ஸயம் கதம் நிஸ்ஸக்³கி³ய’’ந்தி வத்தப்³ப³ம். உபோ⁴ஹி சே கதம், யதா²பாளிமேவ.

கோஸியஸிக்கா²பத³வண்ணனா நிட்டி²தா.

2. ஸுத்³த⁴காளகஸிக்கா²பத³வண்ணனா

யதா² பட²மே ‘‘ஏகேனபி கோஸியம்ஸுனா’’தி (கங்கா². அட்ட². கோஸியஸிக்கா²பத³வண்ணனா) வுத்தம், ததா² இத⁴ ‘‘ஏகேனபி அஞ்ஞேன அமிஸ்ஸிதான’’ந்தி வசனாபா⁴வதோ அஞ்ஞேன மிஸ்ஸபா⁴வே ஸதிபி அபஞ்ஞாயமானரூபகம் சே, ‘‘ஸுத்³த⁴காளக’’மிச்சேவ வுச்சதீதி வத³ந்தி.

ஸுத்³த⁴காளகஸிக்கா²பத³வண்ணனா நிட்டி²தா.

3. த்³வேபா⁴க³ஸிக்கா²பத³வண்ணனா

‘‘துலயித்வா’’தி வசனதோ யதா² துலாதா⁴ரணாய காளகாதி⁴கா ந ஹோந்தி, ததா² காளகானம் த்³வே பா⁴கா³ க³ஹேதப்³பா³ உக்கட்ட²பரிச்சே²தே³ன. ‘‘ஏகஸ்ஸாபி காளகலோமஸ்ஸ அதிரேகபா⁴வே நிஸ்ஸக்³கி³யந்தி வசனம் துலாதா⁴ரணாய கிஞ்சாபி ந ஸமேதி, அசித்தகத்தா பன ஸிக்கா²பத³ஸ்ஸ புப்³பே³ துலாய தா⁴ரயித்வா ட²பிதேஸு ஏகம்பி லோமம் தத்த² பதேய்ய, நிஸ்ஸக்³கி³யந்தி அயமதி⁴ப்பாயோதி நோ தக்கோ’’தி ஆசரியோ. வுத்தபரிச்சே²தே³ன அக்³க³ஹணம் அகிரியா, ஸந்த²தகரணம் கிரியா.

த்³வேபா⁴க³ஸிக்கா²பத³வண்ணனா நிட்டி²தா.

4. ச²ப்³ப³ஸ்ஸஸிக்கா²பத³வண்ணனா

‘‘ஓரேன சே ச²ன்னம் வஸ்ஸான’’ந்தி வுத்தத்தா ச²ப்³ப³ஸ்ஸே பரிபுண்ணே காதும் வட்டதீதி நிட்டா²னதி³வஸதோ பட்டா²ய ச²ன்னம் வஸ்ஸானம் பரிச்சே²தோ³ வேதி³தப்³போ³. யானி பனேத்த² அதிரேகச²ப்³ப³ஸ்ஸவஸேன வா ஸம்முதிவஸேன வா கதானி, ஸப்³பா³னி தானி ஏகதோ பரிபு⁴ஞ்ஜிதும் வட்டந்தீதி. கி³லானஸ்ஸ ச ஏகம் நப்பஹோதீதி அனேகம்பி வட்டதி. யதோ பட்டா²ய ரோக³ஸ்ஸ மந்த³தாய ஸந்த²தம் ஆதா³ய க³ந்தும் ஸக்கோதி, ததோ பட்டா²ய ஸம்முதி வா ரோகோ³ வா ந ரக்க²தீதி ஏகே. அபிச ச²வஸ்ஸபு³த்³த⁴னிம்மலம் ஸிக்கா²பத³ம் விசாரேதும் க³ம்பீ⁴ரத்தா. தஸ்மா ச²வஸ்ஸே கம்மம் கதந்தி.

ச²ப்³ப³ஸ்ஸஸிக்கா²பத³வண்ணனா நிட்டி²தா.

5. நிஸீத³னஸிக்கா²பத³வண்ணனா

கஸ்மா பனேத்த² ‘‘ஸந்த²தம் பன பி⁴க்கு²னா’’தி ஸிக்கா²பத³ம் அபஞ்ஞபேத்வா ‘‘நிஸீத³னஸந்த²த’’ந்தி பஞ்ஞத்தம், நனு ஏத்த² காரணேன ப⁴விதப்³ப³ந்தி? அத்தி² காரணம், சீவரஸஞ்ஞிதாய ஸந்த²தானம் உஜ்ஜி²தத்தா தேஸம் அசீவரபா⁴வத³ஸ்ஸனத்த²ம் ததா² பஞ்ஞத்தம் ப⁴க³வதாதி வுத்தம் ஹோதி. தஸ்மா தே பி⁴க்கூ² தேசீவரிகது⁴தங்க³பே⁴த³ப⁴யா ஸந்த²தே சதுத்த²சீவரஸஞ்ஞிதாய ஸந்த²தானி உஜ்ஜி²த்வா தேரஸ து⁴தங்கா³னி ஸமாத³யிம்ஸு, ப⁴க³வா ச தேஸம் ஸந்த²தம் அனுஜானி. ததோ தேஸம் பி⁴க்கூ²னம் ஏவம் ஹோதி ‘‘நிஸீத³னசீவரஸண்டா²னம்பேதம் நிஸீத³னஸந்த²தம் நோ ப⁴க³வதா அனுஞ்ஞாதம் சதுத்த²சீவரபா⁴வேன, பகே³வ கதஸந்த²தம் வா’’தி. ததோ ‘‘ஸந்த²தே தேஸம் சீவரஸஞ்ஞிதா ந ப⁴விஸ்ஸதீ’’தி தத³த்த²ம் ப⁴க³வதா ‘‘ஸந்த²த’’ந்தி அபஞ்ஞபேத்வா ‘‘நிஸீத³னஸந்த²த’’ந்தி பஞ்ஞத்தந்தி அதி⁴ப்பாயோ. இமேஸு பன பஞ்சஸு ஸந்த²தேஸு புரிமானி தீணி வினயகம்மம் கத்வா படிலபி⁴த்வாபி பரிபு⁴ஞ்ஜிதும் ந வட்டந்தி அகப்பியத்தா, பச்சி²மானி த்³வே வட்டந்தீதி (வஜிர. டீ. பாராஜிக 566-567) லிகி²தம். கத²ம் பஞ்ஞாயதீதி சே? ‘‘அனாபத்தி அஞ்ஞேன கதம் படிலபி⁴த்வா பரிபு⁴ஞ்ஜதீ’’தி (பாரா. 570) வசனதோதி வேதி³தப்³ப³ம்.

நிஸீத³னஸிக்கா²பத³வண்ணனா நிட்டி²தா.

6. ஏளகலோமஸிக்கா²பத³வண்ணனா

‘‘அத்³தா⁴னமக்³க³ப்படிபன்னஸ்ஸா’’தி இமினா பகதியா தீ³க⁴மக்³க³ம் படிபன்னஸ்ஸ உப்பன்னானிபி தியோஜனபரமமேவ ஹரிதப்³பா³னி, பகே³வ அப்படிபன்னஸ்ஸாதி த³ஸ்ஸேதி. படிபன்னஸ்ஸ சே, அத்³தா⁴னம் நாம படிபன்னஸ்ஸ அகாமா வஸ்ஸம்வுட்ட²பி⁴க்கு²னியா மக்³க³ப்படிபத்தி வியாதி த³ஸ்ஸேதி. அத்³தா⁴னமக்³க³ப்படிபன்னஸ்ஸ நிஸ்ஸக்³கி³யந்தி வா ஸம்ப³ந்தோ⁴. தேனேவ வாஸாதி⁴ப்பாயஸ்ஸ படிப்பஸ்ஸத்³த⁴க³மனுஸ்ஸாஹத்தா ‘‘அப்படிபன்னோ’’தி ஸங்க²ம் க³தஸ்ஸ அனாபத்தீதி ஸித்³த⁴ம். இமஸ்மிம் பன அத்த²விகப்பே ‘‘பி⁴க்கு²னோ பனேவ ஏளகலோமானி உப்பஜ்ஜேய்யும்…பே… அஸந்தேபி ஹாரகே அத்³தா⁴னமக்³க³ப்படிபன்னஸ்ஸ நிஸ்ஸக்³கி³யம் பாசித்திய’’ந்தி யோஜனா வேதி³தப்³பா³. யஸ்மா வா ஏளகலோமானம் உப்பத்திட்டா²னதோ பட்டா²ய தியோஜனபரமதா அதி⁴ப்பேதா, மக்³க³ம் அப்படிபன்னஸ்ஸ ச தியோஜனபரமதா நத்தி², தஸ்மா ‘‘அத்³தா⁴னமக்³க³ப்படிபன்னஸ்ஸ உப்பஜ்ஜேய்யு’’ந்தி வுத்தம். தேன அச்சி²ன்னம் படிலபி⁴த்வா ஹரதோ ச அனாபத்தீதி ஸித்³த⁴ம். படிலாபோ⁴ ஹி தேஸம் உப்பத்தி நாமாதி.

‘‘ஆகங்க²மானேன பி⁴க்கு²னா படிக்³க³ஹேதப்³பா³னீ’’தி இமினா அத்தனா படிக்³க³ஹிதானம்யேவ தியோஜனாதிக்கமே ஆபத்தீதி த³ஸ்ஸேதி. தேன அனாகங்க²மானேன பரஸந்தகானி படிக்³க³ஹிதானி ஹரந்தஸ்ஸ அனாபத்தீதி ஸித்³த⁴ம்.

அங்கே³ஸு ‘‘அத்தனோ ஸந்தகதா’’தி நத்தி², அயமத்தோ² ‘‘பி⁴க்கு²னோ உப்பஜ்ஜேய்யு’’ந்தி இமினா, ‘‘அச்சி²ன்னம் படிலபி⁴த்வா’’தி இமினா ச தீ³பிதோ ஹோதீதி வேதி³தப்³போ³. போராணக³ண்டி²பதே³ ச ‘‘அஞ்ஞம் பி⁴க்கு²ம் ஹராபேந்தோ க³ச்ச²தி சே, த்³வின்னம்பி அனாபத்தீ’’தி வுத்தம். தஸ்மா த்³வே பி⁴க்கூ² தியோஜனபரமம் பத்வா அஞ்ஞமஞ்ஞஸ்ஸ ப⁴ண்ட³ம் பரிவத்தேத்வா சே ஹரந்தி, அனாபத்தீதி ஸித்³த⁴ம்.

தியோஜனபரமம் ஸஹத்தா² ஹரிதப்³பா³னீதி தியோஜனபரமமேவ அத்தனா ஹரிதப்³பா³னி, தம் கிமத்த²ந்தி? ஸீமாய ஏதபரமதோ. வுத்தஞ்ஹேதம் ‘‘அனுஜானாமி, பி⁴க்க²வே, தியோஜனபரமம் ஸீமம் ஸம்மன்னிது’’ந்தி (மஹாவ. 140). வாஸாதி⁴ப்பாயேன, பச்சாக³மனாதி⁴ப்பாயேன வா க³ச்ச²தோ ஏதபரமதா ச. வுத்தஞ்ஹேதம் ‘‘ச²ப்³ப³க்³கி³யா பி⁴க்கூ² அதிமஹதியோ ஸீமாயோ ஸம்மன்னந்தி…பே… பி⁴க்கூ² உபோஸத²ம் ஆக³ச்ச²ந்தா உத்³தி³ஸ்ஸமானேபி பாதிமோக்கே² ஆக³ச்ச²ந்தி, உத்³தி³ட்ட²மத்தேபி ஆக³ச்ச²ந்தி, அந்தராபி பரிவஸந்தீ’’தி (மஹாவ. 140).

அஸந்தே ஹாரகேதி ஆணத்தியா ஹாரகே அஸதி. கம்ப³லஸ்ஸ உபரி நிஸீதி³த்வா க³ச்ச²ந்தஸ்ஸ ஸசே ஏகம்பி லோமம் சீவரே லக்³க³ம் ஹோதி, தியோஜனாதிக்கமே ஆபத்தி ஏவ கம்ப³லதோ விஜடிதத்தாதி லிகி²தம். தம் கம்ப³லஸ்ஸ படிக்³க³ஹிதத்தா அத்தனோ அத்தா²ய படிக்³க³ஹிதமேவ ஹோதீதி யுத்தம்.

ஏளகலோமஸிக்கா²பத³வண்ணனா நிட்டி²தா.

8. ஜாதரூபஸிக்கா²பத³வண்ணனா

‘‘நிப்³ப³த்தருக்க²ச்சா²யாபி ருக்க²பரிச்சே²த³ம் அனதிக்கந்தா’’தி லிகி²தம்.

ஜாதரூபஸிக்கா²பத³வண்ணனா நிட்டி²தா.

9. ரூபியஸம்வோஹாரஸிக்கா²பத³வண்ணனா

ஜாதரூபரஜதபரிவத்தனந்தி உக்கட்ட²பரிச்சே²தே³ன வுத்தம்.

ரூபியஸம்வோஹாரஸிக்கா²பத³வண்ணனா நிட்டி²தா.

10. கயவிக்கயஸிக்கா²பத³வண்ணனா

அஸந்தே பாசித்தியம் தே³ஸேதப்³ப³மேவாதி ஏத்த² கிம் ஸுத்³தி⁴கம் பாசித்தியம், உதா³ஹு நிஸ்ஸக்³கி³யந்தி? நிஸ்ஸக்³கி³யம் பாசித்தியமேவ.

கயவிக்கயஸிக்கா²பத³வண்ணனா நிட்டி²தா.

தத்ரித³ம் பகிண்ணகம்

அட்ட²மஸிக்கா²பத³ம் பரேன அத்தனோ அத்தா²ய தி³ய்யமானஸ்ஸ வா பாரிவத்தகபா⁴வேன தி³ய்யமானஸ்ஸ வா பம்ஸுகூலஸ்ஸ வா ரூபியஸ்ஸ உக்³க³ண்ஹனஉக்³க³ண்ஹாபனஸாதி³யனானி படிக்கி²பதி.

நவமம் பரஸ்ஸ வா அத்தனோ வா ரூபியபரிவத்தனம் படிக்கி²பதி.

த³ஸமம் அரூபியபரிவத்தனம். ‘‘அரூபியே அரூபியஸஞ்ஞீ பஞ்சன்னம் ஸஹ அனாபத்தீ’’தி (பாரா. 591; வி. வி. டீ. 1.591; வஜிர. டீ. பாராஜிக 587) ச வசனம் இதரேஹி ஸஹ ஆபத்தீதி தீ³பேதி. அரூபியஞ்ச து³க்கடவத்து². தஸ்மா தஸ்ஸ பரிவத்தனே ஸதி நிஸ்ஸக்³கி³யந்தி ஏகந்தேன வுத்தம். பஞ்சன்னம் ஸஹ து³க்கடவத்தூ²னம் பரிவத்தனே அனாபத்திப்பஸங்க³தோ அனாபத்தி ஏவாதி போராணாதி சே? ந, கப்பியவத்தூ²னம்யேவ தத்த² ஆக³தத்தா. யதி³ கப்பியவத்து² நிஸ்ஸக்³கி³யம், பகே³வ து³க்கடவத்தூ²தி சே? ந, ஆபத்திக³ருகலஹுகபா⁴வேன வத்து²க³ருகலஹுகனியமாபா⁴வதோ.

நிஸ்ஸக்³கி³யவத்து²தோ ஹி முத்தாமணிவேளுரியாதி³ மஹக்³க⁴ப்பஹோனகம்பி து³க்கடவத்தூ²தி கத்வா நிஸ்ஸக்³கி³யவத்து²தோ முத்தாதி³ லஹுகம் ஹோதி. லஹுகேபி வத்து²ஸ்மிம் யதே²வ து³க்கடவத்து²னோ படிக்³க³ஹணே து³க்கடம், ததே²வ தஸ்ஸ வா தேன வா சேதாபனேபி து³க்கடம் யுத்தந்தி (பாரா. அட்ட². 2.589) அட்ட²கதா²சரியா.

அத² வா யம் வுத்தம் ‘‘கப்பியவத்தூ²னம்யேவ தத்த² ஆக³தத்தா’’தி, தத்த² கிஞ்சாபி து³க்கடவத்தூ²னிபி அதி⁴ப்பேதானி, ந பன பாளியம் வுத்தானி அனாபத்திவாரப்பஸங்க³ப⁴யாதி வுத்தம் ஹோதி. முத்தாதீ³ஸுபி வுத்தேஸு அனாபத்தியம் கப்பியகாரகஸ்ஸ ஆசிக்க²தி, ‘‘இத³ம் முத்தாதி³ அம்ஹாகம் அத்தி², அம்ஹாகஞ்ச இமினா ச இமினா ச வேளுரியாதி³னா அத்தோ²’’தி ப⁴ணதி, த³ஸமேன ஆபஜ்ஜதீதி அதி⁴ப்பாயோ ஸியா. யஸ்மா ச இத³ம் கப்பியகாரகஸ்ஸ ஆசிக்க²னாதி³ஸம்வோஹாரோ ச, தஸ்மா தம் நவமேன வுத்தந்தி வேதி³தப்³ப³ம். கிஞ்சாபி கயவிக்கயேவ ஹோதி கப்பியவத்தூ²ஹி அனுஞ்ஞாதம், இமினாவ நயேன கிஞ்சாபி து³க்கடவத்து²பி த³ஸமே அதி⁴ப்பேதம் ஆபஜ்ஜதி, அட்ட²கதா²விரோத⁴தோ பன நாதி⁴ப்பேதமிச்சேவ க³ஹேதப்³போ³.

கா பனேத்த² காரணச்சா²யாதி, பஞ்சன்னம் ஸஹ தத்த² அனாபத்திப்பஸங்க³தோ அனாபத்தி ஏவாதி சே? ந, தத்த² அனாக³தத்தா. அனாக³தகாரணா வுத்தந்தி சே? ந, பஞ்சன்னம் ஸஹ ஆபத்திவத்து²கஸ்ஸ அனாபத்திவாரலாபே⁴ விஸேஸகாரணாபா⁴வா, அகப்பியத்தா பஞ்சன்னம் ஸஹாபி ஆபத்தியா ப⁴விதப்³ப³ந்தி ஸித்³தோ⁴ அட்ட²கதா²வாதோ³.

அபரோ நயோ – யதி³ து³க்கடவத்து²னா கயவிக்கயே நிஸ்ஸக்³கி³யம், கப்பியவத்து²ம்ஹி வுத்தபரியாயோ தத்த² லப்³பே⁴ய்ய, ந பன லப்³ப⁴தீதி நவமே ஏவ தானி வத்தப்³பா³னி. தஸ்மா ஸம்வோஹாரோ நாம கயவிக்கயோபி அஞ்ஞதா² பரிவத்தனம் பரியாதி³யித்வா பவத்தோ, கயவிக்கயஞ்ச மோசேத்வா ‘‘இமினா இமம் தே³ஹீ’தி சேதாபேதி, வட்டதீ’’தி அவத்வா த³ஸமஸ்ஸ அனாபத்திவாரே வுத்தனயேனேவ தேஸம் பரிவத்தனே நிஸ்ஸக்³கி³யானுமதிவிரோத⁴தோ அட்ட²கதா²யம் வுத்தனயேனேவ து³க்கடவத்து²னா சேதாபனே து³க்கடமேவ. நேஸம் கயவிக்கயேன நிஸ்ஸக்³கி³யந்தி சே? ந, ஸப்³ப³ஸ்ஸபி கயவிக்கயத்தா. தேனேவ வுத்தம் ‘‘அந்த⁴கட்ட²கதா²யம் பன ‘ஸசே கயவிக்கயம் ஸமாபஜ்ஜேய்ய, நிஸ்ஸக்³கி³யம் பாசித்திய’ந்தி பா⁴ஸிதம், தம் து³ப்³பா⁴ஸிதம். கஸ்மா? ந ஹி தா³னக்³க³ஹணதோ அஞ்ஞோ கயவிக்கயோ நாம அத்தீ²’’தி (பாரா. அட்ட². 2.589), அத்தனோ மதியா கயவிக்கயலக்க²ணஸம்மதே த³ஸமஸ்ஸ அனாபத்திவாரே வுத்தனயேனேவ தேஸம் பரிவத்தனே நிஸ்ஸக்³கி³யானுமதிவிரோத⁴தோ ச. ப⁴வது வா அத்தனோ படிஸித்³த⁴மித³ம் காரணம், த³ஸமே அவஸ்ஸமேவ ஜானிதப்³பா³னீதி தானி கயவிக்கயானேவாதி தேஸம் நிஸ்ஸக்³கி³யபா⁴வஞ்ச க³தானீதி ஏவம்பி ஸித்³தோ⁴ அட்ட²கதா²வாதோ³.

ஏத்தா²ஹு போராணா – ‘‘அத்தனோ ஸந்தகம் ரூபியம் பரஹத்த²க³தம் கரோதி அஜ்ஜா²சரதி, து³க்கடம். பரஸ்ஸ ரூபியம் அத்தனோ ஹத்த²க³தம் கரோதி, அட்ட²மேன நிஸ்ஸக்³கி³யம். உக்³க³ஹிதவத்து²பரிவத்தனே கத²ம் ஜாதம்? அப்³போ³ஹாரிகம் ஜாதம். அத² பரஸ்ஸ ரூபியம் அத்தனோ ஹத்த²க³தம் பட²மம் கரோதி, ரூபியப்படிக்³க³ஹணஸ்ஸ கதத்தா அட்ட²மேன நிஸ்ஸக்³கி³யம். அத்தனோ ஸந்தகம் ரூபியம் பரஸ்ஸ ஹத்த²க³தம் பச்சா² கரோதி, ஸம்வோஹாரேன நிஸ்ஸக்³கி³ய’’ந்தி. ‘‘ரூபியஸ்ஸ க³ஹணமத்தேன அட்ட²மேன ஆபத்தி, பச்சா² பரிவத்தனே நவமேனா’’தி ஹி தத்த² வுத்தம், தம் பன யுத்தம். ‘‘அஜ்ஜா²சரதி, து³க்கட’’ந்தி து³வுத்தம். து³க்கடஸ்ஸ அனியமப்பஸங்க³தோ நிஸ்ஸஜ்ஜனவிதா⁴னேஸு த³ஸ்ஸிதோவ. கிம் வுத்தம் ஹோதி – யதி³ த்³வீஹி நிஸ்ஸக்³கி³யேஹி ப⁴விதப்³ப³ம், நிஸ்ஸஜ்ஜனவிதா⁴னே ‘‘அஹம், ப⁴ந்தே, ரூபியம் படிக்³க³ஹேஸிம், நானாப்பகாரகஞ்ச ரூபியஸம்வோஹாரம் ஸமாபஜ்ஜி’’ந்தி வத்தப்³ப³ம் ப⁴வேய்ய ‘‘ரூபியம் சேதாபேதீ’’தி ஸப்³ப³த்த² பாளியம் ரூபியப்படிக்³க³ஹணஸ்ஸ வுத்தத்தா.

ஏத்தாவதா யம் போராணக³ண்டி²பதே³ வுத்தம் ‘‘து³க்கடவத்து²னா கயவிக்கயம் பரிஹரந்தேன சதூஸு நிஸ்ஸக்³கி³யவத்தூ²ஸு ஏகேகஸ்மிம் க³ஹிதே அட்ட²மேன நிஸ்ஸக்³கி³யம் ஹோதி. து³க்கடவத்து²னா து³க்கடவத்து²ந்தி ‘‘இமினா இத³ம் தே³ஹீ’’தி க³ஹிதே தேனேவ நிஸ்ஸக்³கி³யம் ஹோதி. ‘‘கயவிக்கயம்பி நீஹரித்வா க³ஹிதே து³க்கடம், சேதாபிதரூபியக்³க³ஹணே அட்ட²மேன, பரிவத்தனே நவமேனாதிஆதி³னா அத்தனா அனுக்³க³ஹேத்வா கப்பியவஸேன நீஹரித்வா பஞ்சஹி ஸஹத⁴ம்மிகேஹி ஸத்³தி⁴ம் பரிவத்தேதும் வட்டதீ’’தி, தம் விஸோதி⁴தம் ஹோதி. அபரம்பி தத்த² வுத்தம் ‘‘நிஸ்ஸஜ்ஜிதப்³பே³ அஸதி கத²ம் பாசித்தியம், து³ன்னிஸ்ஸட்ட²ரூபியம்பி ‘ந ச²ட்³டே³தீ’தி வத³ந்தஸ்ஸ விஸ்ஸட்டோ² உபாஸகோ தம் க³ஹேத்வா அஞ்ஞம் சே பி⁴க்கு²னோ தே³தி, கப்பதீ’’தி, தஞ்ச து³வுத்தம். ந ஹி க³ஹிதத்தா ததோ அஞ்ஞம் வத்து² ஹோதி. புன அபரஞ்ச தத்த² வுத்தம் ‘‘இமம் ‘க³ண்ஹாஹீ’தி வத³ந்தஸ்ஸ ஸத்³தா⁴தே³ய்யவினிபாதது³க்கடம், ‘ஏதம் தே³ஹீ’தி வத³ந்தஸ்ஸ விஞ்ஞத்திது³க்கட’’ந்தி, தஞ்ச து³வுத்தம். தத்த² ஹி பயோக³து³க்கடம் யுத்தம் விய பஞ்ஞாயதி.

பகிண்ணகம் நிட்டி²தம்.

ஏளகலோமவக்³கோ³ து³தியோ.

3. பத்தவக்³கோ³

1. பத்தஸிக்கா²பத³வண்ணனா

த்³வே அபத்தா, தஸ்மா ஏதே பா⁴ஜனபரிபோ⁴கே³ன பரிபு⁴ஞ்ஜிதப்³பா³, நஅதி⁴ட்டா²னூபகா³னவிகப்பனூபக³தாதி அத்தோ²தி ச. ஸமணஸாருப்பேன பக்கந்தி அயோபத்தோ பஞ்சஹி பாகேஹி பக்கோ ஹோதி, மத்திகாபத்தோ த்³வீஹி. ‘‘பி⁴க்கு²னியா பத்தஸன்னிச்சயஸ்ஸ வாரிதத்தா (வஜிர. டீ. பாராஜிக 602) பி⁴க்கு²ஸ்ஸபி தம் ‘அனனுரூப’ந்தி கத்வா ‘புராணபத்தம் பச்சுத்³த⁴ரித்வா’தி வுத்த’’ந்தி ச லிகி²தம், தம் ந யுத்தம் பாளியம் ‘‘ஸன்னிச்சயம் கரேய்யாதி அனதி⁴ட்டி²தோ அவிகப்பிதோ’’தி (பாசி. 735) வுத்தத்தா. ஸோ ஹி கதி²னக்க²ந்த⁴கே (மஹாவ. 306 ஆத³யோ) நிச்சயஸன்னிதி⁴ விய ஏகோபி புனதி³வஸே ‘‘ஸன்னிச்சயோ’’தி வுச்சதி. அனந்தரஸிக்கா²பதே³ பன ‘‘து³தியோ வாரிதோ’’தி அதி⁴ட்டா²னம் நியதம். தஸ்மா த்³வே பத்தே அதி⁴ட்டா²தும் ந லப⁴தி. ஸசே ஏகதோ அதி⁴ட்டா²தி, த்³வேபி அனதி⁴ட்டி²தா ஹோந்தி. விஸும் விஸும் அதி⁴ட்டா²தி, து³தியோ அனதி⁴ட்டி²தோ. விகப்பேதும் பன ப³ஹூபி லப⁴தி. காகணிகமத்தம்பீதி ஏத்த² பி-காரோ ‘‘ஏகபாகம்பி ஜனேதீ’’தி பாகம் ஸம்பிண்டே³தி. அத² வா ஸசே ஏகபாகேனேவ ஸாருப்போ, வட்டதீதி பாகபரிமாணம் ந வுத்தந்தி க³ஹேதப்³ப³ம். அபத்தத்தா அதி⁴ட்டா²னூபகோ³ ந ஹோதி. அபச்சுத்³த⁴ரந்தேன விகப்பேதப்³போ³தி புராணபத்தம் அபச்சுத்³த⁴ரந்தேன ஸோ பத்தோ விகப்பேதப்³போ³தி அத்தோ²தி லிகி²தம்.

பத்தஸிக்கா²பத³வண்ணனா நிட்டி²தா.

2. ஊனபஞ்சப³ந்த⁴னஸிக்கா²பத³வண்ணனா

பவாரிதேதி ஏத்த² ஸங்க⁴வஸேன பவாரிதட்டா²னே பஞ்சப³ந்த⁴னேனேவ வட்டதி, புக்³க³லிகவஸேன பவாரிதட்டா²னே ஊனபஞ்சப³ந்த⁴னேனாபி வட்டதீதி லிகி²தம்.

யோ ஊனபஞ்சப³ந்த⁴னத்த²ம், வுத்தம்பி சேதம் கரோ ஸோ;

ஊனபஞ்சப³ந்த⁴னத்த²ம், பத்வான ஸந்திகே.

ஊனபஞ்சப³ந்த⁴னஸிக்கா²பத³வண்ணனா நிட்டி²தா.

3. பே⁴ஸஜ்ஜஸிக்கா²பத³வண்ணனா

‘‘படிஸாயனீயானி படிக்³க³ஹேத்வா’’தி வத³ந்தேன பாத³மக்க²னாதீ³னம் அத்தா²ய படிக்³க³ஹேத்வா ட²பேதும் வட்டதீதி தீ³பிதந்தி லிகி²தம். ‘‘யேஸம் மம்ஸம் கப்பதீ’’தி வசனேன யேஸம் மம்ஸம் ந கப்பதி, தேஸம் ஸப்பிஆதி³ ந கப்பதீதி வத³ந்தா அஜானித்வா வத³ந்தி. யேஸஞ்ஹி மம்ஸம் கப்பதி, தேஸம் ஸப்பீதிஆதி³ ஸத்தாஹகாலிகனிஸ்ஸக்³கி³யவத்து²பரிச்சே²த³த³ஸ்ஸனத்த²ம் வுத்தம். ததா² பணீதபோ⁴ஜனஸிக்கா²பதே³ யேஸம் மம்ஸம் கப்பதி, தேஸம்யேவ கீ²ராதி³ பணீதபோ⁴ஜனம், நேதரந்தி த³ஸ்ஸேதும் வுத்தந்தி. மது⁴ நாம மது⁴கரிப⁴மரமக்கி²கானம் ஆஸயேஸு நிய்யாஸஸதி³ஸம் மஹாமது⁴ ஹோதி, தம் யாவஜீவிகந்தி ச லிகி²தம்.

பே⁴ஸஜ்ஜஸிக்கா²பத³வண்ணனா நிட்டி²தா.

பத்தவக்³கோ³ ததியோ.

நிஸ்ஸக்³கி³யபாசித்தியவண்ணனா நிட்டி²தா.