6. குடிகாரஸிக்கா²பத³வண்ணனா

கிம் ப⁴ந்தேதி ஏத்தகேபி வுத்தே. புச்சி²தோ யத³த்தா²ய பவிட்டோ², தம் கதே²தும் லப⁴தி புச்சி²தபஞ்ஞத்தா பி⁴க்கா²சாரவத்தேதி லிகி²தம். ஹத்த²கம்மம் யாசிதோ ‘‘உபகரணம், மூலம் வா த³ஸ்ஸதீ’’தி யாசதி, வட்டதி, ந வட்டதீதி? வட்டதி ஸேனாஸனே ஓபா⁴ஸபரிகதா²தீ³னம் லத்³த⁴த்தாதி ஏகே. திஹத்தா² வாதி ஏத்த² வட்³ட⁴கிஹத்தே²ன திஹத்தா². ‘‘பமாணயுத்தோ மஞ்சோதி பகதிவித³த்தி²யா நவவித³த்தி²ப்பமாணமஞ்சோ, ஸோ தத்த² இதோ ச ந ஸஞ்சரதி, தஸ்மா சதுஹத்த²வித்தா²ரா ந ஹோதீ’’திஆதி³ லிகி²தம். அகுடியா பன வத்து²தே³ஸனாகிச்சம் நத்தி² உல்லித்தாவலித்தம் காதும் வுத்தத்தா. ‘‘உல்லித்தாதி³பா⁴வோ…பே… ‘ச²த³னமேவ ஸந்தா⁴ய வுத்தோ’தி யுத்தமித³ம். கஸ்மாதி சே? யஸ்மா மத்திகாமயபி⁴த்திம் உட்டா²பேத்வா உபரி உல்லித்தம் வா அவலித்தம் வா உப⁴யம் வா பி⁴த்தியா க⁴டிதம் கரோந்தஸ்ஸ ஆபத்தி ஏவ வினாபி பி⁴த்திலேபேனா’’தி லிகி²தம். ஏவமேத்த² த²ம்ப⁴துலாபிட்ட²ஸங்கா⁴டாதி³ நிரத்த²கம் ஸியா. தஸ்மா விசாரேத்வாவ க³ஹேதப்³ப³ம். ‘‘உபோஸதா²கா³ரம்பி ப⁴விஸ்ஸதி, அஹம்பி வஸிஸ்ஸாமீ’’தி வா ‘‘பி⁴க்கூ²ஹி வா ஸாமணேரேஹி வா ஏகதோ வஸிஸ்ஸாமீ’’தி வா கரோந்தஸ்ஸ வட்டதி ஏவ. கஸ்மா? ‘‘அத்துத்³தே³ஸ’’ந்தி வுத்தத்தாதி லிகி²தம்.

இத³ம் பன ஸிக்கா²பத³ம் சதுத்த²பாராஜிகம் விய நிதா³னாபேக்க²ம். ந ஹி வக்³கு³முதா³தீரியா பி⁴க்கூ² ஸயமேவ அத்தனோ அஸந்தம் உத்தரிமனுஸ்ஸத⁴ம்மம் முஸாவாத³லக்க²ணம் பாபேத்வா பா⁴ஸிம்ஸு. அஞ்ஞமஞ்ஞஞ்ஹி தே உத்தரிமனுஸ்ஸத⁴ம்மவண்ணம் பா⁴ஸிம்ஸு. ந ச தாவதா பாராஜிகவத்து² ஹோதி, தத்தகேன பன லேஸேன ப⁴க³வா தம் வத்து²ம் நிதா³னம் கத்வா பாராஜிகம் பஞ்ஞபேஸி, ததா² இதா⁴பி. ந ஹி நிதா³னே ‘‘அதே³ஸிதவத்து²காயோ ஸாரம்பா⁴யோ அபரிக்கமனாயோ’’தி வுத்தம். ‘‘அப்பமாணிகாயோ’’தி பன வுத்தத்தா பமாணமதிக்கமந்தஸ்ஸ ஸங்கா⁴தி³ஸேஸோவ நிதா³னாபேக்கோ². தத்த² ஸாரம்பே⁴ அபரிக்கமனே ஸங்கா⁴தி³ஸேஸப்பஸங்க³ம் விய தி³ஸ்ஸமானம் ‘‘விப⁴ங்கோ³ தம்னியமகோ’’தி வுத்தத்தா விப⁴ங்கே³ ந நிவாரேதி. ததா² மஹல்லகே.

ஏத்தா²ஹ – கிமத்த²ம் மாதிகாயம் து³க்கடவத்து² வுத்தம், நனு விப⁴ங்கே³ ஏவ வத்தப்³ப³ம் ஸியாதி? ஏவமேதம். கிம் நு பி⁴க்கூ² அபி⁴னேதப்³பா³ வத்து²தே³ஸனாய, தேஹி பி⁴க்கூ²ஹி வத்து² தே³ஸேதப்³ப³ம், கீதி³ஸம்? அனாரம்ப⁴ம் ஸபரிக்கமனந்தி. இதரஞ்ஹி ‘‘ஸாரம்பே⁴ சே பி⁴க்கு² வத்து²ஸ்மிம் அபரிக்கமனே’’தி ஏவம் அனுப்பஸங்க³வஸேன ஆக³தத்தா வுத்தம். யஸ்மா வத்து² நாம அத்தி² ஸாரம்ப⁴ம் அபரிக்கமனம், அத்தி² அனாரம்ப⁴ம் ஸபரிக்கமனம், அத்தி² ஸாரம்ப⁴ம் ஸபரிக்கமனம், அத்தி² அனாரம்ப⁴ம் அபரிக்கமனந்தி ப³ஹுவித⁴ம், தஸ்மா ப³ஹுவித⁴த்தா வத்து² தே³ஸேதப்³ப³ம் அனாரம்ப⁴ம் ஸபரிக்கமனம், நேதரந்தி வுத்தம் ஹோதி. கிமத்தி²கா பனேத்த² வத்து²தே³ஸனாதி சே? க³ருகாபத்திபஞ்ஞாபனஹேதுபரிவஜ்ஜனுபாயத்தா. வத்து²அதே³ஸனா ஹி க³ருகாபத்திபஞ்ஞாபனஹேதுபூ⁴தா. க³ருகாபத்திபஞ்ஞாபனம் அகதவிஞ்ஞத்திகி³ஹிபீளாஜனனம், அத்தது³க்க²பரது³க்க²ஹேதுபூ⁴தோ ச ஸாரம்ப⁴பா⁴வோதி ஏதே வத்து²தே³ஸனாபதே³ஸேன உபாயேன பரிவஜ்ஜிதா ஹோந்தி. ந ஹி பி⁴க்கூ² அகப்பியகுடிகரணத்த²ம் கி³ஹீனம் வா பீளானிமித்தம், ஸாரம்ப⁴வத்து²குடிகரணத்த²ம் வா வத்து²ம் தே³ஸேந்தீதி. ஹோந்தி சேத்த² –

‘‘து³க்கடஸ்ஸ ஹி வத்தூ²னம், மாதிகாய பகாஸனா;

க³ருகாபத்திஹேதூனம், தேஸம் ஏவம் பகாஸிதா.

‘‘வத்து²ஸ்ஸ தே³ஸனுபாயேன, க³ருகாபத்திஹேதுயோ;

வஜ்ஜிதா ஹோந்தி யம் தஸ்மா, ஸாரம்பா⁴தி³ ஜஹாபித’’ந்தி.

குடிகாரஸிக்கா²பத³வண்ணனா நிட்டி²தா.