ஸங்கா⁴தி³ஸேஸகண்ட³ம்

1. ஸுக்கவிஸ்ஸட்டி²ஸிக்கா²பத³வண்ணனா

அஞ்ஞத்ர ஸுபினந்தாதி ஸ்வாயம் து³ப்³ப³லவத்து²கத்தா சேதனாய படிஸந்தி⁴ம் ஆகட்³டி⁴தும் அஸமத்தா², ஸுபினே உபட்டி²தம் நிமித்தஞ்ஹி து³ப்³ப³லம். பவத்தே பன அஞ்ஞேஹி குஸலாகுஸலேஹி உபத்த²ம்பி⁴தா விபாகம் தே³தி. கிஞ்சாபி விபாகம் தே³தி, அத² கோ² அவிஸயே உப்பன்னத்தா அப்³போ³ஹாரிகாவ ஸுபினந்தசேதனாதி லிகி²தம். யம் பனேத்த² ‘‘ஸுபினே உபட்டி²தம் நிமித்தஞ்ஹி து³ப்³ப³ல’’ந்தி வுத்தம், தம் அனேகந்தம், ந ச ஆரம்மணது³ப்³ப³லதாய சித்தப்பவத்தி து³ப்³ப³லா அதீதானாக³தாரம்மணாய, பஞ்ஞத்தாரம்மணாய வா அது³ப்³ப³லத்தா. தஸ்மா து³ப்³ப³லவத்து²கத்தாதி து³ப்³ப³லஹத³யவத்து²கத்தாதி நோ தக்கோதி (வஜிர. டீ. பாராஜிக 236-237) ஆசரியோ. அவத்து²கதாய து³ப்³ப³லபா⁴வோ யுஜ்ஜதீதி சே? ந, அவத்து²காய பா⁴வனாபப⁴வாய அதிரேகப³லவஸம்ப⁴வதோ. பா⁴வனாப³லஸமப்பிதஞ்ஹி சித்தம் அரூபம்பி ஸமானம் அதிபா⁴ரம்பி கரஜகாயம் க³ஹேத்வா ஏகசித்தக்க²ணேனேவ ப்³ரஹ்மலோகம்பி பாபேத்வா ட²பேதி, தப்படிபா⁴க³ம் அனப்பிதம்பி காமாவசரசித்தம் கரஜகாயம் ஆகாஸே லங்க⁴னஸமத்த²ம் கரோதி. கிம் பனேத்த² தம் அனுமானகரணம்? யேன சித்தஸ்ஸேவ ஆனுபா⁴வோதி பஞ்ஞாயேய்ய சித்தானுபா⁴வேன ட²பனலங்க⁴னாதி³கிரியாவிஸேஸனிப்³ப³த்தித³ஸ்ஸனதோ. பகதிசித்தஸமுட்டா²னரூபம் விய அஸம்ஸட்ட²த்தா, நிக்க²மனத்தா ச வத்தி²ஸீஸம், கடி, காயோதி திதா⁴ ஸுக்கஸ்ஸ டா²னம் பகப்பேந்தி ஆசரியா. ஸப்பவிஸம் விய தம் த³ட்ட²ப்³ப³ம், ந ச விஸே டா²னனியமோ, கோத⁴வஸேன பஸ்ஸந்தஸ்ஸ ஹோதி. ஏவமஸ்ஸ ந டா²னனியமோ, ராக³வஸேன உபக்கமந்தஸ்ஸ ஹோதீதி நோ தக்கோதி ஆசரியோ.

‘‘த³கஸோதம் அனோதிண்ணேபீ’’தி இத³ம் ‘‘ஓதிண்ணமத்தே’’தி இமினா விருஜ்ஜ²தீதி சே, தம் த³ஸ்ஸேதும் ‘‘டா²னதோ பன சுத’’ந்திஆதி³மாஹ. தஸ்ஸத்தோ² – நிமித்தே உபக்கமம் கத்வா ஸுக்கம் டா²னா சாவேத்வா புன விப்படிஸாரவஸேன த³கஸோதோரோஹணம் நிவாரேதும் ந ஸக்கா, ததா²பி அதி⁴வாஸாதி⁴ப்பாயேன அதி⁴வாஸேத்வா அந்தரா த³கஸோததோ உத்³த⁴ம் நிவாரேதும் அஸக்குணேய்யதாய ‘‘ப³ஹி நிக்க²ந்தே வா’’தி வுத்தம், தஸ்மா டா²னா சுதஞ்ஹி அவஸ்ஸம் த³கஸோதம் ஓதரதீதி அட்ட²கதா²ய அதி⁴ப்பாயோ. தஸ்மா உப⁴யம் ஸமேதீதி க³ஹேதப்³போ³.

ஏத்தா²ஹ – கஸ்மா இமஸ்மிம் ஸிக்கா²பதே³ ‘‘யோ பன பி⁴க்கூ²’’திஆதி³னா காரகோ ந நித்³தி³ட்டோ²தி? வுச்சதே – அதி⁴ப்பாயாபேக்கா²ய பா⁴வதோ காரகோ ந நித்³தி³ட்டோ² தஸ்ஸ ஸாபேக்க²பா⁴வத³ஸ்ஸனத்த²ம். கத²ம்? கண்டு³வனாதி³அதி⁴ப்பாயசேதனாவஸேன சேதேந்தஸ்ஸ கண்டு³வனாதி³உபக்கமேன உபக்கமந்தஸ்ஸ மேது²னராக³வஸேன ஊருஆதீ³ஸு து³க்கடவத்தூ²ஸு, வணாதீ³ஸு து²ல்லச்சயவத்தூ²ஸு ச உபக்கமந்தஸ்ஸ ஸுக்கவிஸட்டி²யா ஸதிபி ந ஸங்கா⁴தி³ஸேஸோ ‘‘அனாபத்தி பி⁴க்கு² ந மோசனாதி⁴ப்பாயஸ்ஸா’’தி (பாரா. 263) வசனதோ. தஸ்மா தத³த்த²த³ஸ்ஸனத்த²ம் இத⁴ காரகோ ந நித்³தி³ட்டோ². அஞ்ஞதா² ‘‘யோ பன பி⁴க்கு² ஸஞ்சேதனிகம் ஸுக்கவிஸட்டி²ம் ஆபஜ்ஜேய்ய, ஸங்கா⁴தி³ஸேஸோ’’தி நித்³தி³ட்டே² காரகே ‘‘சேதேதி ந உபக்கமதி முச்சதி, அனாபத்தீ’’தி (பாரா. 262) வுத்தவசனவிரோதோ⁴. ததா² ‘‘ஸஞ்சேதனிகாய ஸுக்கவிஸட்டி²யா அஞ்ஞத்ர ஸுபினந்தா ஸங்கா⁴தி³ஸேஸோ’’தி பு⁴ம்மே நித்³தி³ட்டே²பி ஸோ ஏவ விரோதோ⁴ ஹேத்வத்த²னியமஸித்³தி⁴தோ. தஸ்மா தது³ப⁴யம்பி வசனக்கமம் அவத்வா ‘‘ஸஞ்சேதனிகா ஸுக்கவிஸட்டி² அஞ்ஞத்ர ஸுபினந்தா ஸங்கா⁴தி³ஸேஸோ’’தி வுத்தம். தத்த² நிமித்தத்தே² பு⁴ம்மவசனாபா⁴வதோ ஹேத்வத்த²னியமோ ந கதோ ஹோதி. தஸ்மிம் அகதே ஸஞ்சேதனிகா ஸுக்கவிஸட்டி² அஞ்ஞத்ர ஸுபினந்தா ஸங்கா⁴தி³ஸேஸோதி, உபக்கமே அஸதி அனாபத்தீதி அயமத்தோ² தீ³பிதோ ஹோதீதி வேதி³தப்³ப³ம்.

இமஸ்மிம் ஸிக்கா²பதே³ த்³வே ஆபத்திஸஹஸ்ஸானி ஹோந்தி. கத²ம்? அத்தனோ ஹத்தா²தி³பே⁴தே³ அஜ்ஜ²த்தரூபே ராகூ³பத்த²ம்ப⁴னவஸேன அங்க³ஜாதே கம்மனியப்பத்தே ஆரோக்³யத்தா²ய நீலம் மோசேந்தஸ்ஸ ஏகா ஆபத்தி, அஜ்ஜ²த்தரூபே ஏவ ராகூ³பத்த²ம்பே⁴ பீதகாதீ³னம் மோசனவஸேன நவாதி த³ஸ. ஏவம் ‘‘ஸுக²த்தா²யா’’திஆதீ³னம் நவன்னம் வஸேனாதி ராகூ³பத்த²ம்பே⁴ அஜ்ஜ²த்தரூபவஸேன ஸதம். ஏவமேவம் வச்சப்பஸ்ஸாவவாதஉச்சாலிங்க³பாணகத³ட்டூ²பத்த²ம்பே⁴ஸு ச ஸதம் ஸதம் கத்வா ஸப்³ப³ம் பஞ்சஸதம். யதா² அஜ்ஜ²த்தரூபே பஞ்சஸதம், ஏவம் ப³ஹித்³தா⁴ரூபே வா அஜ்ஜ²த்தப³ஹித்³தா⁴ரூபே வா ஆகாஸே வா கடிம் கம்பேந்தோதி த்³வே ஸஹஸ்ஸானி ஆபத்தியோ ஹோந்தீதி.

ஸுக்கவிஸ்ஸட்டி²ஸிக்கா²பத³வண்ணனா நிட்டி²தா.

2. காயஸம்ஸக்³க³ஸிக்கா²பத³வண்ணனா

‘‘ஓதிண்ணோ’’தி இமினாஸ்ஸ ஸேவனாதி⁴ப்பாயதா த³ஸ்ஸிதா. தேனேவ ‘‘காயஸம்ஸக்³க³ராக³ஸமங்கி³ஸ்ஸேதம் அதி⁴வசன’’ந்தி வுத்தம். ‘‘விபரிணதேன…பே… ஸத்³தி⁴’’ந்தி இமினாஸ்ஸ வாயாமோ த³ஸ்ஸிதோ. ‘‘ஸத்³தி⁴’’ந்தி ஹி பத³ம் ஸம்யோக³ம் தீ³பேதி, ஸோ ச ஸம்யோகோ³ ஸமாக³மோ. கேன சித்தேன? விபரிணதேன சித்தேன, ந பத்தப்படிக்³க³ஹணாதி⁴ப்பாயாதி³னாதி அதி⁴ப்பாயோ. ‘‘காயஸம்ஸக்³க³ம் ஸமாபஜ்ஜேய்யா’’தி இமினாஸ்ஸ வாயமதோ ப²ஸ்ஸப்படிவிஜானனா த³ஸ்ஸிதா ஹோதி. வாயமித்வா ப²ஸ்ஸம் படிவிஜானந்தோ ஹி ஸமாபஜ்ஜதி நாம. ஏவமஸ்ஸ திவங்க³ஸம்பத்தி த³ஸ்ஸிதா ஹோதி. அத² வா ஓதிண்ணோ விபரிணதேன சித்தேன யக்கா²தி³னா ஸத்தோ விய. உபயோக³த்தே² வா ஏதம் கரணவசனம், ஓதிண்ணோ விபரிணதம் சித்தம் கூபாதி³ம் விய ஸத்தோ. அத² வா ‘‘ராக³தோ உத்திண்ணோ ப⁴விஸ்ஸாமீ’’தி பி⁴க்கு²பா⁴வம் உபக³தோபி யோ பன பி⁴க்கு² ததோ உத்திண்ணாதி⁴ப்பாயதோ விபரிணதேன சித்தேன ஹேதுபூ⁴தேன தமேவ ராக³ம் ஓதிண்ணோ. மாதுகா³மேன அத்தனோ ஸமீபம் வா ஆக³தேன, அத்தனா உபக³தேன வா. ஏதேன மாதுகா³மஸ்ஸ ஸாரத்ததா வா ஹோது, விரத்ததா வா, ஸா இத⁴ அப்பமாணம்.

ஹத்த²க்³கா³ஹம் வாதி ஏத்த² ஹத்தே²ன ஸப்³போ³பி உபாதி³ன்னகோ காயோ ஸங்க³ஹிதோ, ந பி⁴ன்னஸந்தானோ தப்படிப³த்³தோ⁴ வத்தா²லங்காராதி³. வேணிக்³க³ஹணேன அனுபாதி³ன்னகோ அபி⁴ன்னஸந்தானோ கேஸலோமனக²க்³க³த³ந்தக்³கா³தி³கோ கம்மபச்சயஉதுஸமுட்டா²னோ க³ஹிதோதி வேதி³தப்³ப³ம். தேனேவாஹ ‘‘அந்தமஸோ லோமேன லோமம் பு²ஸந்தஸ்ஸாபீ’’தி. தேன அஞ்ஞதரஸ்ஸ வா…பே… பராமஸனந்தி ஏத்த² அனுபாதி³ன்னகானம்பி ஸேஸலோமாதீ³னம் அங்க³பா⁴வோ வேதி³தப்³போ³. ஏவம் ஸந்தே ‘‘ப²ஸ்ஸம் படிஜானந்தஸ்ஸ ஸங்கா⁴தி³ஸேஸோ’’தி இமினா விருஜ்ஜ²தீதி சே? ந, தத³த்த²ஜானனதோ. பு²ட்ட²பா⁴வம் படிவிஜானந்தோபி ப²ஸ்ஸம் படிஜானாதி நாம, ந காயவிஞ்ஞாணுப்பத்தியா ஏவ. அனேகந்திகஞ்ஹேத்த² காயவிஞ்ஞாணம். தஸ்மா ஏவ இத⁴ ப²ஸ்ஸப்படிவிஜானனம் அங்க³ந்த்வேவ ந வுத்தம். தஸ்மிஞ்ஹி வுத்தே டா²னமேதம் விஜ்ஜதி ‘‘ந ச மே லோமக⁴ட்டனேன காயவிஞ்ஞாணம் உப்பன்னம், தஸ்மிம் ‘ந ப²ஸ்ஸம் படிஜானாமீ’தி அனாபன்னஸஞ்ஞீ ஸியா’’தி. ‘‘வேணீ நாம கஹாபணமாலாதி³ஸம்பயுத்தம், தத்த² ‘வேணிம் க³ண்ஹிஸ்ஸாமீ’தி கஹாபணமாலாதி³ம் ஏவ க³ண்ஹாதி, ந லோமம், நத்தி² ஸங்கா⁴தி³ஸேஸோ’’தி வத³ந்தி. வீமம்ஸிதப்³ப³ம்.

காயஸம்ஸக்³க³ஸிக்கா²பத³வண்ணனா நிட்டி²தா.

3. து³ட்டு²ல்லவாசாஸிக்கா²பத³வண்ணனா

‘‘கதா³ தே மாதா பஸீதி³ஸ்ஸதீ’’தி ஆயாசனம் து³ட்டு²ல்லவாசாய ஸிகா²பத்தலக்க²ணத³ஸ்ஸனத்த²ம் வுத்தம், ந மேது²னுபஸம்ஹிதேயேவ து³ட்டு²ல்லவாசாதி த³ஸ்ஸனத்த²ம். ‘‘உப⁴தோப்³யஞ்ஜனகாஸீ’’தி வசனம் பன புரிஸனிமித்தேன அஸங்கா⁴தி³ஸேஸவத்து²னா மிஸ்ஸவசனம், புரிஸஉப⁴தோப்³யஞ்ஜனகஸ்ஸ ச இத்தி²னிமித்தம் படிச்ச²ன்னம், இதரம் பாகடம். யதி³ தம்பி ஜனேதி, கத²ம் ‘அனிமித்தாஸீ’திஆதீ³னி பதா³னி ந ஸங்கா⁴தி³ஸேஸம் ஜனேந்தீ’’தி ஏகே, தம் ந யுத்தம் புரிஸஸ்ஸாபி நிமித்தாதி⁴வசனத்தா. ‘‘மேது²னுபஸம்ஹிதாஹி ஸங்கா⁴தி³ஸேஸோ’’தி (பாரா. 248) மாதிகாயம் லக்க²ணஸ்ஸ வுத்தத்தா ச மேது²னுபஸம்ஹிதாஹி ஓபா⁴ஸனே படிவிஜானந்தியா ஸங்கா⁴தி³ஸேஸோ, அப்படிவிஜானந்தியா து²ல்லச்சயம், இதரேஹி ஓபா⁴ஸனே படிவிஜானந்தியா து²ல்லச்சயம், அப்படிவிஜானந்தியா து³க்கடந்தி ஏகே, விசாரேத்வா க³ஹேதப்³ப³ம். ஏத்தா²ஹ – ‘‘ஸிக²ரணீ’’திஆதீ³ஹி அக்கோஸந்தஸ்ஸ படிக⁴சித்தம் உப்பஜ்ஜதி, கஸ்மா ‘‘திவேத³ன’’ந்தி அவத்வா ‘‘த்³விவேத³ன’’ந்தி வுத்தந்தி? ராக³வஸேன அயம் ஆபத்தி, ந படிக⁴வஸேன. தஸ்மா ராக³வஸேனேவ பவத்தோ அக்கோஸோ இத⁴ அதி⁴ப்பேதோ. தஸ்மா ‘‘த்³விவேத³ன’’ந்தி வசனம் ஸுவுத்தமேவ.

து³ட்டு²ல்லவாசாஸிக்கா²பத³வண்ணனா நிட்டி²தா.

4. அத்தகாமஸிக்கா²பத³வண்ணனா

து³ட்டு²ல்லோபா⁴ஸனே வுத்தப்பகாராயாதி து³ட்டு²ல்லாது³ட்டு²ல்லஜானனஸமத்தா²ய. பரஸ்ஸ பி⁴க்கு²னோ அத்தகாமபாரிசரியாய வண்ணப⁴ணனே து³க்கடம், ‘‘யோ தே விஹாரே வஸதி, தஸ்ஸ அக்³க³தா³னம் மேது²னம் த⁴ம்மம் தே³ஹீ’’தி பரியாயவசனேபி து³க்கடம், ‘‘அத்தகாமபாரிசரியாய வண்ணம் பா⁴ஸேய்ய, யா மாதி³ஸம் ஸீலவந்த’’ந்தி ச வுத்தத்தாதி ஏகே. பஞ்சஸு அங்கே³ஸு ஸப்³பா⁴வா ஸங்கா⁴தி³ஸேஸோவாதி ஏகே, விசாரேத்வா க³ஹேதப்³ப³ம். ‘‘இமஸ்மிம் ஸிக்கா²பத³த்³வயே காயஸம்ஸக்³கே³ விய யக்கி²பேதீஸுபி து³ட்டு²ல்லத்தகஆமவசனே து²ல்லச்சயந்தி வத³ந்தி. அட்ட²கதா²ஸு பன நாக³த’’ந்தி (வஜிர. டீ. பாராஜிக 295) லிகி²தம். உப⁴தோப்³யஞ்ஜனகோ பன பண்ட³கக³திகோவ.

அத்தகாமஸிக்கா²பத³வண்ணனா நிட்டி²தா.

5. ஸஞ்சரித்தஸிக்கா²பத³வண்ணனா

அலம்வசனீயாதி ந வசனீயா, நிவாரணே அலம்-ஸத்³தோ³, ந அலம்வசனீயா நாலம்வசனீயா. ‘‘படிக்³க³ண்ஹாதி வீமம்ஸதி பச்சாஹரதி, ஆபத்தி ஸங்கா⁴தி³ஸேஸஸ்ஸா’’தி (பாரா. 305) வுத்தத்தா யஸ்ஸ ஏகந்தேன ஸங்கா⁴தி³ஸேஸோ ஹோதி, தஸ்ஸ படிக்³க³ண்ஹனவீமம்ஸனபயோகா³ ஏதே து³க்கடது²ல்லச்சயா நத்தீ²தி வத³ந்தீதி லிகி²தம். கிஞ்சாபி ஏத்த² ‘‘இத்தீ² நாம மனுஸ்ஸித்தீ², ந யக்கீ² ந பேதீ ந திரச்சா²னக³தா. புரிஸோ நாம மனுஸ்ஸபுரிஸோ, ந யக்கோ² ந பேதோ ந திரச்சா²னக³தோ’’தி பாளி நத்தி², ததா²பி காயஸம்ஸக்³கா³தீ³ஸு ‘‘மாதுகா³மோ நாம மனுஸ்ஸித்தீ²’’தி (பாரா. 285) இத்தி²வவத்தா²னஸ்ஸ கதத்தா இதா⁴பி மனுஸ்ஸித்தீ² ஏவாதி பஞ்ஞாயதி. மேது²னபுப்³ப³பா⁴க³ஸாமஞ்ஞதோ இத்தி²வவத்தா²னேன புரிஸவவத்தா²னம் கதமேவ ஹோதி. தேனேவாஹ ‘‘யேஸு ஸஞ்சரித்தம் ஸமாபஜ்ஜதி, தேஸம் மனுஸ்ஸஜாதிகதா’’தி (கங்கா². அட்ட². ஸஞ்சரித்தஸிக்கா²பத³வண்ணனா). காயஸம்ஸக்³கா³தீ³ஸு ச பண்ட³கயக்கி²பேதியோ து²ல்லச்சயவத்து²காவ வுத்தா, ததா² இதா⁴பி, பண்ட³கஸபா⁴வத்தா மனுஸ்ஸஉப⁴தோப்³யஞ்ஜனகோ ச து²ல்லச்சயவத்து²கோவ ஹோதி. ஸேஸா மனுஸ்ஸபுரிஸஅமனுஸ்ஸபண்ட³கஉப⁴தோப்³யஞ்ஜனகதிரச்சா²னக³தபுரிஸாத³யோ து³க்கடவத்து²காவ மிச்சா²சாரத³ஸ்ஸனஸபா⁴வதோதி வேதி³தப்³ப³ம்.

ஸஞ்சரித்தஸிக்கா²பத³வண்ணனா நிட்டி²தா.

6. குடிகாரஸிக்கா²பத³வண்ணனா

கிம் ப⁴ந்தேதி ஏத்தகேபி வுத்தே. புச்சி²தோ யத³த்தா²ய பவிட்டோ², தம் கதே²தும் லப⁴தி புச்சி²தபஞ்ஞத்தா பி⁴க்கா²சாரவத்தேதி லிகி²தம். ஹத்த²கம்மம் யாசிதோ ‘‘உபகரணம், மூலம் வா த³ஸ்ஸதீ’’தி யாசதி, வட்டதி, ந வட்டதீதி? வட்டதி ஸேனாஸனே ஓபா⁴ஸபரிகதா²தீ³னம் லத்³த⁴த்தாதி ஏகே. திஹத்தா² வாதி ஏத்த² வட்³ட⁴கிஹத்தே²ன திஹத்தா². ‘‘பமாணயுத்தோ மஞ்சோதி பகதிவித³த்தி²யா நவவித³த்தி²ப்பமாணமஞ்சோ, ஸோ தத்த² இதோ ச ந ஸஞ்சரதி, தஸ்மா சதுஹத்த²வித்தா²ரா ந ஹோதீ’’திஆதி³ லிகி²தம். அகுடியா பன வத்து²தே³ஸனாகிச்சம் நத்தி² உல்லித்தாவலித்தம் காதும் வுத்தத்தா. ‘‘உல்லித்தாதி³பா⁴வோ…பே… ‘ச²த³னமேவ ஸந்தா⁴ய வுத்தோ’தி யுத்தமித³ம். கஸ்மாதி சே? யஸ்மா மத்திகாமயபி⁴த்திம் உட்டா²பேத்வா உபரி உல்லித்தம் வா அவலித்தம் வா உப⁴யம் வா பி⁴த்தியா க⁴டிதம் கரோந்தஸ்ஸ ஆபத்தி ஏவ வினாபி பி⁴த்திலேபேனா’’தி லிகி²தம். ஏவமேத்த² த²ம்ப⁴துலாபிட்ட²ஸங்கா⁴டாதி³ நிரத்த²கம் ஸியா. தஸ்மா விசாரேத்வாவ க³ஹேதப்³ப³ம். ‘‘உபோஸதா²கா³ரம்பி ப⁴விஸ்ஸதி, அஹம்பி வஸிஸ்ஸாமீ’’தி வா ‘‘பி⁴க்கூ²ஹி வா ஸாமணேரேஹி வா ஏகதோ வஸிஸ்ஸாமீ’’தி வா கரோந்தஸ்ஸ வட்டதி ஏவ. கஸ்மா? ‘‘அத்துத்³தே³ஸ’’ந்தி வுத்தத்தாதி லிகி²தம்.

இத³ம் பன ஸிக்கா²பத³ம் சதுத்த²பாராஜிகம் விய நிதா³னாபேக்க²ம். ந ஹி வக்³கு³முதா³தீரியா பி⁴க்கூ² ஸயமேவ அத்தனோ அஸந்தம் உத்தரிமனுஸ்ஸத⁴ம்மம் முஸாவாத³லக்க²ணம் பாபேத்வா பா⁴ஸிம்ஸு. அஞ்ஞமஞ்ஞஞ்ஹி தே உத்தரிமனுஸ்ஸத⁴ம்மவண்ணம் பா⁴ஸிம்ஸு. ந ச தாவதா பாராஜிகவத்து² ஹோதி, தத்தகேன பன லேஸேன ப⁴க³வா தம் வத்து²ம் நிதா³னம் கத்வா பாராஜிகம் பஞ்ஞபேஸி, ததா² இதா⁴பி. ந ஹி நிதா³னே ‘‘அதே³ஸிதவத்து²காயோ ஸாரம்பா⁴யோ அபரிக்கமனாயோ’’தி வுத்தம். ‘‘அப்பமாணிகாயோ’’தி பன வுத்தத்தா பமாணமதிக்கமந்தஸ்ஸ ஸங்கா⁴தி³ஸேஸோவ நிதா³னாபேக்கோ². தத்த² ஸாரம்பே⁴ அபரிக்கமனே ஸங்கா⁴தி³ஸேஸப்பஸங்க³ம் விய தி³ஸ்ஸமானம் ‘‘விப⁴ங்கோ³ தம்னியமகோ’’தி வுத்தத்தா விப⁴ங்கே³ ந நிவாரேதி. ததா² மஹல்லகே.

ஏத்தா²ஹ – கிமத்த²ம் மாதிகாயம் து³க்கடவத்து² வுத்தம், நனு விப⁴ங்கே³ ஏவ வத்தப்³ப³ம் ஸியாதி? ஏவமேதம். கிம் நு பி⁴க்கூ² அபி⁴னேதப்³பா³ வத்து²தே³ஸனாய, தேஹி பி⁴க்கூ²ஹி வத்து² தே³ஸேதப்³ப³ம், கீதி³ஸம்? அனாரம்ப⁴ம் ஸபரிக்கமனந்தி. இதரஞ்ஹி ‘‘ஸாரம்பே⁴ சே பி⁴க்கு² வத்து²ஸ்மிம் அபரிக்கமனே’’தி ஏவம் அனுப்பஸங்க³வஸேன ஆக³தத்தா வுத்தம். யஸ்மா வத்து² நாம அத்தி² ஸாரம்ப⁴ம் அபரிக்கமனம், அத்தி² அனாரம்ப⁴ம் ஸபரிக்கமனம், அத்தி² ஸாரம்ப⁴ம் ஸபரிக்கமனம், அத்தி² அனாரம்ப⁴ம் அபரிக்கமனந்தி ப³ஹுவித⁴ம், தஸ்மா ப³ஹுவித⁴த்தா வத்து² தே³ஸேதப்³ப³ம் அனாரம்ப⁴ம் ஸபரிக்கமனம், நேதரந்தி வுத்தம் ஹோதி. கிமத்தி²கா பனேத்த² வத்து²தே³ஸனாதி சே? க³ருகாபத்திபஞ்ஞாபனஹேதுபரிவஜ்ஜனுபாயத்தா. வத்து²அதே³ஸனா ஹி க³ருகாபத்திபஞ்ஞாபனஹேதுபூ⁴தா. க³ருகாபத்திபஞ்ஞாபனம் அகதவிஞ்ஞத்திகி³ஹிபீளாஜனனம், அத்தது³க்க²பரது³க்க²ஹேதுபூ⁴தோ ச ஸாரம்ப⁴பா⁴வோதி ஏதே வத்து²தே³ஸனாபதே³ஸேன உபாயேன பரிவஜ்ஜிதா ஹோந்தி. ந ஹி பி⁴க்கூ² அகப்பியகுடிகரணத்த²ம் கி³ஹீனம் வா பீளானிமித்தம், ஸாரம்ப⁴வத்து²குடிகரணத்த²ம் வா வத்து²ம் தே³ஸேந்தீதி. ஹோந்தி சேத்த² –

‘‘து³க்கடஸ்ஸ ஹி வத்தூ²னம், மாதிகாய பகாஸனா;

க³ருகாபத்திஹேதூனம், தேஸம் ஏவம் பகாஸிதா.

‘‘வத்து²ஸ்ஸ தே³ஸனுபாயேன, க³ருகாபத்திஹேதுயோ;

வஜ்ஜிதா ஹோந்தி யம் தஸ்மா, ஸாரம்பா⁴தி³ ஜஹாபித’’ந்தி.

குடிகாரஸிக்கா²பத³வண்ணனா நிட்டி²தா.

7. விஹாரகாரஸிக்கா²பத³வண்ணனா

கிரியாமத்ததோ ஸமுட்டா²னபா⁴வதோ அகிரியமேவேதம். தம் தே³ஸனாஅகரணவஸேன. பி⁴க்கூ² வா அனபி⁴னேய்யாதி ஏத்த² வா-ஸத்³தோ³ அவதா⁴ரணத்தோ²தி வேதி³தப்³போ³. ‘‘ஆயஸ்மா ச²ன்னோ சேதியருக்க²ம் சே²தா³பேஸீ’’தி (பாரா. 365) ஆக³தத்தா இத³ம்பி நிதா³னாபேக்க²ந்தி வேதி³தப்³ப³ம்.

விஹாரகாரஸிக்கா²பத³வண்ணனா நிட்டி²தா.

8. து³ட்ட²தோ³ஸஸிக்கா²பத³வண்ணனா

‘‘கஸ்மா மம வந்த³னாதீ³னி…பே… ‘க⁴டிதேயேவ ஸீஸம் ஏதீ’தி வுத்தத்தா அந்திமவத்து²அஜ்ஜா²பன்னகம் வந்தி³தும் ந வட்டதீ’’தி வத³ந்தி, தம் ந க³ஹேதப்³ப³ம். பரிவாராவஸானே உபாலிபஞ்சகே ‘‘கதி நு கோ², ப⁴ந்தே, அவந்தி³யா’’திஆதி³னா (பரி. 467) வுத்தபாளியம் அவுத்தத்தா, ‘‘பச்சா² உபஸம்பன்னேன புரே உபஸம்பன்னோ வந்தி³யோ’’தி (பரி. 468) வுத்தத்தா ச, தஸ்மா ஏவ இமிஸ்ஸம் கங்கா²விதரணியம் ‘‘உபஸம்பன்னோதி ஸங்க்²யுபக³மன’’ந்தி வுத்தம். ஸுத்தாதி⁴ப்பாயோ பன ஏவம் க³ஹேதப்³போ³ – அவந்த³ந்தோ ஸாமீசிப்படிக்கே²பஸங்கா²தாய சோத³னாய சோதே³தி நாமாதி த³ஸ்ஸனத்த²ம் வுத்தந்தி. தஸ்மா ஏவ ‘‘ஏத்தாவதா ச சோத³னா நாம ஹோதீ’’தி வுத்தம். இத⁴ அதி⁴ப்பேதம் ஆபத்திஆபஜ்ஜனாகாரம் த³ஸ்ஸேதும் ‘‘‘கஸ்மா மம வந்த³னாதீ³னி ந கரோஸீ’திஆதி³ வுத்த’’ந்தி லிகி²தம்.

கதூபஸம்பத³ந்தி யஸ்ஸ உபஸம்பதா³ ருஹதி, தம், பண்ட³காத³யோ. ட²பனக்கே²த்தந்தி ஏத்த² ஸப்³ப³ஸங்கா³ஹிகம், புக்³க³லிகஞ்சாதி து³வித⁴ம் பவாரணாட²பனம். தத்த² ஸப்³ப³ஸங்கா³ஹிகே ‘‘ஸுணாது மே, ப⁴ந்தே, ஸங்கோ⁴…பே… தேவாசிகம் பவாரே’’தி ஸு-காரதோ யாவ ரே-காரோ. புக்³க³லிகட²பனே பன ‘‘ஸங்க⁴ம், ப⁴ந்தே, பவாரேமி…பே… பஸ்ஸந்தோ படீ’’தி ஸம்-காரதோ யாவ அயம் ஸப்³ப³பச்சி²மோ டி-காரோ, ஏத்த²ந்தரே ஏகபதே³பி ட²பேந்தேன ட²பிதா ஹோதி. உபோஸதே² பன இமினானுஸாரேன விஸேஸோ வேதி³தப்³போ³ ‘‘கரேய்யா’’தி ரே-காரே அனதிக்கமந்தே.

து³ட்ட²தோ³ஸஸிக்கா²பத³வண்ணனா நிட்டி²தா.

9. அஞ்ஞபா⁴கி³யஸிக்கா²பத³வண்ணனா

அஞ்ஞபா⁴கோ³ வா அஸ்ஸ அத்தீ²தி யதா² ஸுவண்ணஸ்ஸேத³ம் ஸோவண்ணமித்யத்ர ஸுவண்ணவா அனேன ஸுவண்ணோ இத்யுச்சதே. தம் படிமாய ஸரீரம், ஸிலாபுத்தகஸ்ஸ ஸரீரந்தி ச நித³ஸ்ஸனம். ச²க³லகஸ்ஸ ‘‘த³ப்³போ³’’தி தி³ன்னம் நாமம் ‘‘தே³ஸோ’’தி வுச்சதி. கஸ்மா? தே²ரம் அனுத்³த⁴ம்ஸேதும் தே²ரஸ்ஸாபி அபதி³ஸிதப்³ப³த்தா. அஞ்ஞம்பி வத்து²ம் ந தே²ரம்யேவ. லிஸ்ஸதி ஸிலிஸ்ஸதி வோஹாரமத்தேனேவந அத்த²தோ. ஈஸகம் அல்லீயதீதி லேஸோதி அதி⁴ப்பாயோ. லிஸஸேலச²கோலஅல்லீபா⁴வே. தேன வுத்தம் ‘‘ஈஸகம் அல்லீயதீதி லேஸோ’’தி. யஸ்மா தே³ஸலேஸா அத்த²தோ நின்னானாகரணம், தஸ்மா ‘‘கிஞ்சிதே³ஸம் லேஸமத்தம் உபாதா³யா’’தி பத³ம் உத்³த⁴ரித்வா ‘‘த³ஸ லேஸா ஜாதிலேஸோ’’திஆதி³ (பாரா. 394) பத³பா⁴ஜனே வுத்தம்.

அட்டு²ப்பத்திவஸேனேவ ஆவிபூ⁴தந்தி ஏத்த² கிஞ்ச பி⁴ய்யோ அனியமத்தா. ந ஹி மேத்தியபூ⁴மஜகானம் விய அஞ்ஞேஸம் ஸப்³பே³ஸம்பி ‘‘ச²க³லகமேவேத்த² அஞ்ஞபா⁴கி³யம் அதி⁴கரணம் ஹோதி, அஞ்ஞம் கோ³மஹிம்ஸாதி³கம்பி ஹோதி, ந ச மேத்தியபூ⁴மஜகா விய ஸப்³பே³பி நாமலேஸமத்தமேவ உபாதி³யந்தி, அஞ்ஞம்பி ஜாதிலேஸாதி³ம் உபாதி³யந்தி, தஸ்மா அனியமத்தா ந விப⁴த்தம். கிஞ்ச பி⁴ய்யோ ததா²வுத்தே ச²க³லகஸ்ஸேவ அஞ்ஞபா⁴கி³யதா ஸம்ப⁴வதி, ந அஞ்ஞஸ்ஸ, யேன ஸோவ த³ஸ்ஸிதோ. லேஸோ ச நாம லேஸோவ, ந ஜாதிஆதி³, யேன ஸோவ த³ஸ்ஸிதோதி ஏவம் மிச்சா²கா³ஹப்பஸங்க³தோதி வேதி³தப்³ப³ம். இத⁴ ச…பே… ஸஞ்ஞினோபீதி இமஸ்மிம் ஸிக்கா²பதே³ ச அமூலகஸிக்கா²பதே³ சாதி அத்தோ².

அஞ்ஞபா⁴கி³யஸிக்க²ம் யோ, நேவ ஸிக்க²தி யுத்திதோ;

க³ச்சே² வினயவிஞ்ஞூஹி, அஞ்ஞபா⁴கி³யதம்வ ஸோ. (வஜிர. டீ. பாராஜிக 408);

அஞ்ஞபா⁴கி³யஸிக்கா²பத³வண்ணனா நிட்டி²தா.

11. பே⁴தா³னுவத்தகஸிக்கா²பத³வண்ணனா

திண்ணம் உத்³த⁴ம் கம்மாரஹா…பே… கரோதீதி ஏத்த² ‘‘இமே சத்தாரோ’’தி வா ‘‘இமஞ்ச இமஞ்சா’’தி வா வத்வா காதும் ந வட்டதீதி லிகி²தம்.

பே⁴தா³னுவத்தகஸிக்கா²பத³வண்ணனா நிட்டி²தா.

12. து³ப்³ப³சஸிக்கா²பத³வண்ணனா

து³க்கே²ன வத்தப்³போ³ து³ப்³ப³சோ. வுச்சமானோ ந ஸஹதி.

து³ப்³ப³சஸிக்கா²பத³வண்ணனா நிட்டி²தா.

நிக³மனவண்ணனா

‘‘நாமமத்தவஸேனா’’தி பாடோ². ‘‘நாமகோ³த்தவஸேனா’’தி லிகி²தம். இத³ம் வுத்தம் ஹோதி – ‘‘அயம் கிரியா பி⁴க்கூ²னம் காதும் ந வட்டதீ’’தி ஜானித்வா ஸசே சா²தே³தி, ச²ன்னாவ ஹோதீதி அத்தோ². ஸபா⁴க³மத்தமேவாதி அவேரிஸபா⁴க³மத்தமேவாதி அதி⁴ப்பாயோ.

வத்து² சேவ கோ³த்தஞ்சாதி ஏத்த² வத்தூ²தி வீதிக்கமனம் அஸுசிமுச்சனம். கோ³த்தந்தி க³ம் தாயதீதி கோ³த்தம், ஸஜாதிதோ அஞ்ஞத்த² க³ந்தும் அத³த்வா க³ம் பு³த்³தி⁴ம், வசனஞ்ச தாயதீதி அத்தோ². வத்து² ச ஸஜாதிமேவ க³ச்ச²தி. ஸஜாதி நாமேத்த² அஞ்ஞேஹி விஸிட்டா²விஸிட்ட²பூ⁴தா கிரியா, ந காயஸம்ஸக்³கா³தி³. நாமஞ்சேவ ஆபத்தி சாதி ஏத்த² ஆபத்தீதி வீதிக்கமேனாபன்னாபத்தியா நாமம்.

புன ஆக³தாக³தானம் பி⁴க்கூ²னம் ஆரோசேந்தேனாதி ஏத்த² த்³வின்னம் ஆரோசேந்தேன ‘‘ஆயஸ்மந்தா தா⁴ரேந்து’’திண்ணம் வா அதிரேகானம் வா ஆரோசேந்தேன ‘‘ஆயஸ்மந்தோ தா⁴ரேந்தூ’’தி ஏவம் ஆரோசனவிதா⁴னம் வேதி³தப்³ப³ம். வத்தபே⁴த³ஞ்ச ரத்திச்சே²த³ஞ்ச அகத்வாதி ஏத்த² ட²பேத்வா நவகதரம் பாரிவாஸிகம் அவஸேஸானம் அந்தமஸோ மூலாயபடிகஸ்ஸனாரஹாதீ³னம்பி அபி⁴வாத³னாதி³ஸாதி³யனே, படிபாடியா நிஸீத³னே, ஓவத³னே, கம்மிகானம் க³ரஹணே சாதிஆதீ³ஸு வத்தபே⁴தோ³ ஹோதி. த³ஸ்ஸனஸவனவிஸயேஸு அனாரோசனே ச பி⁴க்கூ²ஹி ஏகச்ச²ன்னே வஸனே ச அஜானந்தஸ்ஸேவ விஹாரே பி⁴க்கூ²னம் ஆக³ந்த்வா க³மனே சாதிஆதீ³ஸு ரத்திச்சே²தோ³ ஹோதி. நானாஸம்வாஸகேஹி வினயகம்மாபா⁴வதோ தேஸம் அனாரோசனே ரத்திச்சே²தோ³ ந ஹோதி. ‘‘த்³வே லேட்³டு³பாதே அதிக்கமித்வா’’தி வசனதோ அந்தோ ந வட்டதி. நிக்கி²த்தவத்தேனேவ ஹுத்வா விசரந்தேன யஸ்ஸ ஸந்திகே புப்³பே³ ஸமாதி³யித்வா ஆரோசிதம், தஸ்ஸாபி ஸந்திகே பச்சா² நிக்கி²பனகாலே ஆரோசேத்வாவ நிக்கி²பிதப்³ப³ம். தஸ்மா புன ஸமாதா³னகாலேபி ஸோ சே ததோ க³ச்ச²தி, தம் தி³வஸம் அக³ந்த்வா தி³வா ஆரோசேத்வாபி யதி³ ஏவம் அதீததி³வஸம் ஹோதி, ‘‘அருணே உட்டி²தே தஸ்ஸ ஸந்திகே ஆரோசேத்வா வத்தம் நிக்கி²பித்வா விஹாரம் க³ந்தப்³ப³ந்தி தஸ்ஸ ஸந்திகே ஆரோசேத்வா வத்தம் நிக்கி²பிதப்³ப³’’ந்தி வுத்தம். அபிச ‘‘விஹாரம் க³ந்த்வா யம் ஸப்³ப³பட²மம் பி⁴க்கு²ம் பஸ்ஸதி, தஸ்ஸ ஆரோசேத்வா நிக்கி²பிதப்³ப³’’ந்தி வுத்தம். ஸசே ரத்திச்சே²தோ³ ஹோதி, விஹாரஸீமாபரியாபன்னானம் ஸப்³பே³ஸம் ஆரோசேதப்³ப³ம் ஸியா. ‘‘தஸ்ஸ ஆரோசேத்வா’’தி இத³ம் பன புப்³பே³ அனாரோசிதம் ஸந்தா⁴ய வத்தபே⁴த³ரக்க²ணத்த²ம் வுத்தம். தஸ்மா ஏவ ஸமந்தபாஸாதி³காயம் (சூளவ. அட்ட². 97) ஏவம் வுத்தம் ‘‘அஞ்ஞம் விஹாரதோ நிக்க²ந்தம் வா ஆக³ந்துகம் வா’’தி.

ஸுத்³த⁴ந்தபரிவாஸே பன ஸசே ‘‘மாஸமத்தம் அஸுத்³தோ⁴ம்ஹீ’’தி அக்³க³ஹேஸி, பரிவஸந்தோ புன ஊனம் வா அதி⁴கம் வா ஸன்னிட்டா²னம் கரோதி, தத்தகம்பி பரிவஸிதப்³ப³மேவ, பரிவாஸதா³னகிச்சம் நத்தி². அயஞ்ஹி ஸுத்³த⁴ந்தபரிவாஸோ நாம உத்³த⁴ம்பி ஆரோஹதி, ஹேட்டா²பி ஓரோஹதி. இத³மஸ்ஸ லக்க²ணம்.

ஸமோத³ஹித்வாதி மூலாபத்திட்டா²னே ட²பேத்வா, பக்கி²பித்வாதி அத்தோ². அப்படிச்ச²ன்னா சே அந்தராபத்தி, மூலாய படிகஸ்ஸனம் அகத்வா புப்³பே³ க³ஹிதபரிவாஸேனேவ பரிவஸிதப்³ப³ம். யோ பன ஆபத்திம் ஆபஜ்ஜித்வா விப்³ப⁴மித்வா புன உபஸம்பன்னோ ஹுத்வாபி படிச்சா²தே³தி, யோ ச புப்³பே³ படிச்சா²தே³த்வா பச்சா² ந படிச்சா²தே³தி, யோ ச உப⁴யத்த² படிச்சா²தே³தி, ஸப்³பே³ஸம் படிச்ச²ன்னதி³வஸவஸேன பரிவாஸோ தா³தப்³போ³. ‘‘புரிமஸ்மிம் ஆபத்திக்க²ந்தே⁴ வா’’தி ச ‘‘பச்சி²மஸ்மிம் ஆபத்திக்க²ந்தே⁴ வா’’தி (சூளவ. 166 ஆத³யோ) ச பாளியம் வுத்தத்தா த்³வே பி⁴க்கூ² விஸுத்³தி⁴கம் ஆபன்னா ஹோந்தி, தே ஸுத்³தி⁴கதி³ட்டி²னோ ஹோந்தி. ஏகோ சா²தே³தி, ஏகோ ந சா²தே³தி. யோ சா²தே³தி, ஸோ து³க்கடம் தே³ஸாபேதப்³போ³. ‘‘உபோ⁴பி யதா²த⁴ம்மம் காராபேதப்³பா³’’தி (சூளவ. 181) வசனதோ யம் கஞ்சி ஆபத்திம் சா²தே³த்வா து³க்கடம் ஆபஜ்ஜதீதி வேதி³தப்³போ³.

தேஸு க³தேஸு வா அக³தேஸு வா புரிமனயேனேவ படிபஜ்ஜிதப்³ப³ந்தி ஏத்த² ஊனே க³ணே சரணம், அனுட்ட²ஹனம் ஏகரத்தம்பி க³ணேன விப்பவாஸம், ஸசே ரத்தியா ஏகக்க²ணேன ஸங்கோ⁴ வஸதி, ஸசே ஸோ புரே அருணமேவ கேனசி கரணீயேன க³தோதி ஏத்த²பி மானத்தேபி ஏவம் ஜாதே. ‘‘அயஞ்ச யஸ்மா க³ணஸ்ஸ ஆரோசேத்வா, பி⁴க்கூ²னஞ்ச அத்தி²பா⁴வம் ஸல்லக்கே²த்வாவ வஸி, தேனஸ்ஸ ஊனே க³ணே சரணதோ³ஸோ வா விப்பவாஸோ வா ந ஹோதீ’’தி (சூளவ. அட்ட². 97) ஸமந்தபாஸாதி³காயம் வுத்தம். தஸ்மா தேன ஆரோசிதே முஹுத்தம்பி நிஸீதி³த்வா க³தேபி விப்பவாஸோ நத்தி². பாரிவாஸிகஸ்ஸ, உக்கி²த்தகஸ்ஸ ச பகதத்தேன தஸ்மிம் வஸனம் உத³கபாதேன வாரிதம், தஸ்மா நானூபசாரேபி ஏகச்ச²ன்னே ந வட்டதி.

இதா³னி பாட²விசாரணா வேதி³தப்³பா³ – ‘‘நவ பட²மாபத்திகா சத்தாரோ யாவததியகா’’தி இத³ம் ஸபா⁴வனியமவசனம். தேன வுட்டா²னம் அனியமந்தி த³ஸ்ஸேதி. ஏகச்சாபத்திவுட்டா²னஞ்ஹி கம்மதோபி ஹோதி அகம்மதோபி, ந ஏவம் ஆபஜ்ஜனந்தி வுத்தம் ஹோதி. அஞ்ஞதரம் வா அஞ்ஞதரம் வாதி தேஸம் த்³விதா⁴ பி⁴ன்னானம்பி வுட்டா²னக்கமபே⁴தா³பா⁴வதீ³பகவசனம். யாவதீஹம், தாவதீஹந்தி ஏத்த² அஹபரிச்சே²தோ³ அருணவஸேன. ‘‘ஜான’’ந்தி இமினா ஜானனப்படிச்ச²ன்னஸ்ஸ அகாமா பரிவத்த²ப்³ப³ந்தி த³ஸ்ஸேதி. தேன பி⁴க்கு²னா அகாமா பரிவத்த²ப்³ப³ந்தி தேன பி⁴க்கு²னா வஸதா அகாமா பரிவத்த²ப்³ப³ம், ந பரிவத்திதலிங்கே³னாதி த³ஸ்ஸனத்த²ம் வுத்தம். பரிவுத்த²பரிவாஸேனாதி ஆதி³ம்ஹி பரிவுத்த²பரிவாஸேனேவ பரிவாஸதோ உத்தரி இதிவாரேன ஆதி³தோ பி⁴க்கு²னாவ சா²ரத்தம், பரிவத்திதலிங்கே³ன உத்³த⁴ம்பி பி⁴க்கு²மானத்தாய படிபஜ்ஜிதப்³ப³ம், ந பரிவாஸே விய தப்பச்சயா அசிண்ணமானத்தோ. சிண்ணமானத்தோவ அப்³பே⁴தப்³போ³, ந இதரோ, ந பரிவாஸே விய மானத்தாரஹே, பக்க²மானத்தஞ்ச சரந்தியா பி⁴க்கு²னியா லிங்க³ம் பரிவத்தாதிக்கமே ஸதி சிண்ணமானத்தோ பி⁴க்கு² ஹோதி, புன பி⁴க்கு²மானத்தம் க³ஹேத்வா சிண்ணமானத்தோவ பி⁴க்கு² அப்³பே⁴தப்³போ³தி த³ஸ்ஸேதி.

யத்த² ஸியாதி யஸ்ஸம் ஸமானஸம்வாஸகஸீமாயம்பி வீஸதிக³ணோ பி⁴க்கு²ஸங்கோ⁴ அத்தி². ஏகேனபி சே ஊனோ வீஸதிக³ணோதி ந யுஜ்ஜதி, ஊனோ சே. ந ஹி வீஸதிக³ணோ, ஸங்கோ⁴ சே ஊனோ. தஸ்மா ‘‘ஏகேனபி சே ஊனோ ஸங்கோ⁴’’தி ஏத்தகமேவ வத்தப்³ப³ந்தி சே? ந, சதுவக்³க³பஞ்சவக்³க³த³ஸவக்³க³ப்பஸங்க³னிவாரணப்பயோஜனதோ. தஸ்மா வீஸதிவக்³கோ³ பி⁴க்கு²ஸங்கோ⁴ சே பி⁴க்கு²னா ஏகேனபி ஊனோ, நட்டோ² த³ட்ட²ப்³போ³. கேசி பன வினயே அப்பகதஞ்ஞுனோ ‘‘யதா² அதிரேகசதுவக்³கோ³பி ஸங்கோ⁴ சதுவக்³க³கரணீயே கம்மே ‘சதுவக்³கோ³’தி வுச்சதி, ததா² பஞ்சவக்³க³த³ஸவக்³க³கரணீயே கம்மே அதிரேகபஞ்சவக்³க³த³ஸவக்³கோ³பி ‘பஞ்சவக்³க³த³ஸவக்³கோ³’தி வுச்சதி. தஸ்மா ஊனோபி சதுவக்³க³பஞ்சவக்³க³த³ஸவக்³க³வீஸதிவக்³கோ³வா’’தி மஞ்ஞேய்யும், தேஸம் மஞ்ஞனானிவாரணத்த²ம் ‘‘ஏகேனபி சே ஊனோ’’திஆதி³ வுத்தம். அத² வா வீஸதி பி⁴க்கு²ஸங்கோ⁴ சே, ட²பேத்வா ஏகேனபி சே ஊனோ அப்பகதத்தோ, தம் ட²பேத்வா ஏகேனபி சேதி ஏவமேத்த² அத்தோ² த³ட்ட²ப்³போ³. அயம் தத்த² ஸாமீசீதி வசனம் யம் வுத்தம் ஸப்³ப³த்த² ‘‘தஸ்ஸ ஆபத்தியா பரிவாஸம் தே³தி, மூலாய படிகஸ்ஸதி, மானத்தம் தே³தி, அப்³பே⁴தீ’’தி, தஸ்ஸ ஆவிபா⁴வகரணத்த²ம் வுத்தந்தி வேதி³தப்³ப³ம். தேன தேஸு அயம் யதா²வுத்தா ஸாமீசி நியதா இச்சி²தப்³பா³, ந ராஜஸிக்கா²பதா³தீ³ஸு விய அனியதா. தத்த² ஹி கேனசி அந்தராயேன தம் ஸாமீசிமகரோந்தேபி அனாபத்தீதி தீ³பிதம் ஹோதி.

ஸங்கா⁴தி³ஸேஸவண்ணனா நிட்டி²தா.