7. ஸம்விதா⁴னஸிக்கா²பத³வண்ணனா

ஸம்வித³ஹித்வாதி ‘‘ஏஹி, அஸுககா³மம் க³ச்சா²மா’’தி வா ‘‘ஸ்வே அஹம் க³ச்சா²மி, த்வம்பி ஆக³ச்சே²ய்யாஸீ’’தி வா வத்வா. தஞ்ச கோ² ஸம்வித³ஹனம் அத்த²தோ ஸங்கேதகம்மந்தி ஆஹ ‘‘க³மனகாலே ஸங்கேதம் கத்வாதி அத்தோ²’’தி. அகப்பியபூ⁴மியம் ஸம்வித³ஹந்தஸ்ஸாதி அந்தோகா³மே, பி⁴க்கு²னிஉபஸ்ஸயத்³வாரே, ரதி²காய, அஞ்ஞேஸு வா சதுக்கஸிங்கா⁴டகஹத்தி²ஸாலாதீ³ஸு ட²த்வா ஸம்வித³ஹந்தஸ்ஸ. தேனாஹ ‘‘தத்த² ட²பேத்வா’’திஆதி³. ஆஸன்னஸ்ஸாபீதி அச்சாஸன்னஸ்ஸாபி, ரதனமத்தந்தரஸ்ஸாபீதி அதி⁴ப்பாயோ. அஞ்ஞஸ்ஸ கா³மஸ்ஸாதி யதோ நிக்க²மதி, ததோ அஞ்ஞஸ்ஸ கா³மஸ்ஸ. தம் ஓக்கமந்தஸ்ஸாதி தம் அந்தரகா³மஸ்ஸ உபசாரம் ஓக்கமந்தஸ்ஸ. ஸசே தூ³ரம் க³ந்துகாமோ ஹோதி, கா³மூபசாரக³ணனாய ஓக்கமந்தே ஓக்கமந்தே புரிமனயேனேவ ஆபத்தி. தேனாஹ ‘‘இதி கா³மூபசாரோக்கமனக³ணனாய பாசித்தியானீ’’தி. தஸ்ஸ தஸ்ஸ பன கா³மஸ்ஸ அதிக்கமனே அனாபத்தி. கா³மே அஸதீதி அத்³த⁴யோஜனப்³ப⁴ந்தரே கா³மே அஸதி. தஸ்மிம் பன கா³மே ஸதி கா³மந்தரக³ணனாயேவ பாசித்தியானி. அத்³த⁴யோஜனக³ணனாய பாசித்தியந்தி அத்³த⁴யோஜனே அத்³த⁴யோஜனே பாசித்தியம், ஏகமேகம் அத்³த⁴யோஜனம் அதிக்கமந்தஸ்ஸ ‘‘இதா³னி அதிக்கமிஸ்ஸாமீ’’தி பட²மபாதே³ து³க்கடம், து³தியபாதே³ பாசித்தியந்தி அத்தோ². இமஸ்மிஞ்ஹி நயே அதிக்கமனே ஆபத்தி, ஓக்கமனே அனாபத்தி.

விஸங்கேதேனாதி (பாசி. அட்ட². 185) ஏத்த² ‘‘புரேப⁴த்தம் க³மிஸ்ஸாமா’’தி வத்வா பச்சா²ப⁴த்தம் க³ச்ச²ந்தி, ‘‘அஜ்ஜ வா க³மிஸ்ஸாமா’’தி ஸ்வே க³ச்ச²ந்தி, ஏவம் காலவிஸங்கேதேயேவ அனாபத்தி. த்³வாரவிஸங்கேதே, பன மக்³க³விஸங்கேதே, வா ஸதிபி ஆபத்தியேவ. ஆபதா³ஸூதி ரட்ட²பே⁴தே³ சக்கஸமாருள்ஹா ஜானபதா³ பரியாயந்தி, ஏவரூபாஸு ஆபதா³ஸு அனாபத்தி. சக்கஸமாருள்ஹாதி ச இரியாபத²சக்கம் வா ஸகடசக்கம் வா ஸமாருள்ஹாதி அத்தோ². மாதுகா³மஸிக்கா²பதே³னாதி (பாசி. 413 ஆத³யோ) ஸப்பாணகவக்³கே³ ஸத்தமஸிக்கா²பதே³ன.

ஸம்விதா⁴னஸிக்கா²பத³வண்ணனா நிட்டி²தா.