4. ஆமிஸஸிக்கா²பத³வண்ணனா

தண்ஹாதி³ட்டீ²ஹி ஆமஸிதப்³ப³தோ ஆமிஸம், சீவராதி³, ஆமிஸமேவ ஹேது ஆமிஸஹேது. தேனாஹ ‘‘சீவராதீ³னம் அஞ்ஞதரஹேதூ’’தி. ஆதி³ஸத்³தே³ன பிண்ட³பாதஸேனாஸனகி³லானபச்சயஸக்காரக³ருகாரமானனவந்த³னபூஜனானம் க³ஹணம். அவண்ணகாமதாயாதி அயஸகாமதாயேவ.

த⁴ம்மகம்மேதிஆதீ³ஸு பி⁴க்கு²னோவாத³ஸம்முதிகம்மம் ‘‘கம்ம’’ந்தி வேதி³தப்³ப³ம். தத்த² திகபாசித்தியந்தி த⁴ம்மகம்மே த⁴ம்மகம்மஸஞ்ஞிவேமதிகஅத⁴ம்மகம்மஸஞ்ஞீனம் வஸேன தீணி பாசித்தியானி. ததே²வ அத⁴ம்மகம்மே திகது³க்கடம் வேதி³தப்³ப³ம். அஸம்மதந்தி ஸம்மதேன வா ஸங்கே⁴ன வா பா⁴ரம் கத்வா ட²பிதம் உபஸம்பன்னம். நனு ஓவாத³ஸம்முதி உபஸம்பன்னஸ்ஸேவ தீ³யதி, ந ஸாமணேரஸ்ஸாதி ஆஹ ‘‘தத்தா²’’திஆதி³. ஸம்மதேன வா ஸங்கே⁴ன வா ட²பிதோ பன ப³ஹுஸ்ஸுதோ ஸாமணேரோ ‘‘அஸம்மதோ’’தி வேதி³தப்³போ³. பகதியா சீவராதி³ஹேது ஓவத³ந்தம் பன ஏவம் ப⁴ணந்தஸ்ஸாதி பகதியா சீவராதி³ஹேது ஓவத³ந்தம் ‘‘ஏஸ சீவராதி³ஹேது ஓவத³தீ’’தி ஸஞ்ஞாய ஏவம் ப⁴ணந்தஸ்ஸ. ‘‘ந சீவராதி³ஹேது ஓவத³தீ’’தி ஸஞ்ஞாய பன ஏவம் ப⁴ணந்தஸ்ஸ து³க்கடம். அனாமிஸந்தரதாதி ஆமிஸசித்தாபா⁴வோ, ‘‘ஆமிஸஹேது ஓவதி³ஸ்ஸாமீ’’தி ஏவம் பவத்தஅஜ்ஜா²ஸயாபா⁴வோதி அத்தோ². சித்தபரியாயோ ஹேத்த² அந்தரஸத்³தோ³ ‘‘யஸ்ஸந்தரதோ ந ஸந்தி கோபா’’திஆதீ³ஸு (உதா³. 20) விய.

ஆமிஸஸிக்கா²பத³வண்ணனா நிட்டி²தா.