2. து³தியஅனியதஸிக்கா²பத³வண்ணனா

நஹேவ கோ² பன படிச்ச²ன்னந்தி ஏத்த² பன யம்பி ப³ஹி பரிக்கி²த்தம் அந்தோ விவடம் பரிவேணங்க³ணாதி³, தம்பி அந்தோக³த⁴ந்தி வேதி³தப்³ப³ம். ‘‘ஏவரூபஞ்ஹி டா²னம் அப்படிச்ச²ன்னேயேவ க³ஹித’’ந்தி மஹாபச்சரியம் (பாரா. அட்ட². 2.453) வுத்தம். ஸங்கா⁴தி³ஸேஸேன வாதி காயஸம்ஸக்³க³து³ட்டு²ல்லோபா⁴ஸனஸங்கா²தேன ஸங்கா⁴தி³ஸேஸேன வா. தேனேவ ஹி பத³பா⁴ஜனே ‘‘ஸா சே ஏவம் வதே³ய்ய ‘அய்யோ, மயா தி³ட்டோ² நிஸின்னோ மாதுகா³மேன ஸத்³தி⁴ம் காயஸம்ஸக்³க³ம் ஸமாபஜ்ஜந்தோ’’’திஆதி³ (பாரா. 455) வுத்தம். இத³ம் ஸிக்கா²பத³ம் து³ட்டு²ல்லவாசாவஸேன ஆக³தம். து³ட்டு²ல்லவாசஞ்ச ஸுத்வா தம் மாதுகா³மோபி ந படிச்சா²தே³தி. ததா² ஹி து³ட்டு²ல்லவாசாஸிக்கா²பதே³ (பாரா. 283 ஆத³யோ) யா பன தா இத்தி²யோ ஹிரிமனா, தா நிக்க²மித்வா பி⁴க்கூ² உஜ்ஜா²பேஸும், தஸ்மா இத⁴ இத்தீ²பி அனாபத்திம் கரோதீதி ஆஹ ‘‘இத்தீ²பீ’’தி. அத² வா இத⁴ அப்படிச்ச²ன்னத்தா இத்தீ²பி அனாபத்திம் கரோதி, பட²மே பன படிச்ச²ன்னத்தா இத்தி²ஸதம்பி அனாபத்திம் ந கரோதீதி ஏவமேத்த² அத்தோ² த³ட்ட²ப்³போ³. அனந்தோ⁴ அப³தி⁴ரோதி ஏத்த² காயஸம்ஸக்³க³வஸேன அனந்தோ⁴ வுத்தோ, து³ட்டு²ல்லவாசாவஸேன அப³தி⁴ரோ.

ஸமுட்டா²னாதீ³ஸு இத³ம் ஸிக்கா²பத³ம் திஸமுட்டா²னம் – காயசித்ததோ வாசாசித்ததோ காயவாசாசித்ததோ ஸமுட்டா²தி, கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், ஸுக²மஜ்ஜ²த்தவேத³னாஹி த்³விவேத³னம். தேனாஹ ‘‘ஸமுட்டா²னாதீ³னி பனேத்த² அதி³ன்னாதா³னஸதி³ஸானேவா’’தி. ஏத்த² ச காயஸம்ஸக்³க³ம் ஸமாபஜ்ஜந்தோ து³ட்டு²ல்லம்பி ப⁴ணதி, து³ட்டு²ல்லம் ப⁴ணந்தோ நிஸீத³தி சாதி ‘‘காயவாசாசித்ததோ ச ஸமுட்டா²தீ’’தி வுத்தம், து³ட்டு²ல்லமேவ வா ஸந்தா⁴ய வுத்தந்தி க³ஹேதப்³ப³ம்.

து³தியஅனியதஸிக்கா²பத³வண்ணனா நிட்டி²தா.

‘‘அனியதுத்³தே³ஸோ சாயம் தி³ட்டா²தி³ஸமூலகசோத³னாய வத்து²ம் படிஜானமானோவ ஆபத்தியா காரேதப்³போ³, ந இதரோதி ஆபத்திரோபனாரோபனலக்க²ணத³ஸ்ஸனத்த²ம் வுத்தோ’’தி வத³ந்தி.

இதி கங்கா²விதரணியா பாதிமோக்க²வண்ணனாய

வினயத்த²மஞ்ஜூஸாயம் லீனத்த²ப்பகாஸனியம்

அனியதவண்ணனா நிட்டி²தா.