10. அனனுஞ்ஞாதஸிக்கா²பத³வண்ணனா

தேஸம் அத்தி²பா⁴வம் அஜானந்தியாதி (பாசி. அட்ட². 1163) தேஸம் மாதாதீ³னம் அத்தி²பா⁴வம் அஜானந்தியா. அனனுஞ்ஞாதஸமுட்டா²னந்தி யம் வாசதோ, காயவாசதோ, வாசாசித்ததோ, காயவாசாசித்ததோ ச ஸமுட்டா²தி, தம் அனனுஞ்ஞாதஸமுட்டா²னம். கத²ம்? அப்³பா⁴னகம்மாதீ³ஸு கேனசிதே³வ கரணீயேன க²ண்ட³ஸீமாயம் நிஸின்னா ‘‘பக்கோஸத² ஸிக்க²மானம், இதே⁴வ நம் உபஸம்பாதே³ஸ்ஸாமா’’தி உபஸம்பாதே³தி, ஏவம் வாசதோ ஸமுட்டா²தி. ‘‘உபஸ்ஸயதோ உட்டா²ய உபஸம்பாதே³ஸ்ஸாமீ’’தி வத்வா க²ண்ட³ஸீமம் க³ச்ச²ந்தியா காயவாசதோ ஸமுட்டா²தி. த்³வீஸு டா²னேஸு பண்ணத்திம் ஜானித்வா வீதிக்கமம் கரோந்தியா வாசாசித்ததோ, காயவாசாசித்ததோ ச ஸமுட்டா²தி. அனனுஜானாபேத்வா உபஸம்பாத³னதோ கிரியாகிரியம்.

அனனுஞ்ஞாதஸிக்கா²பத³வண்ணனா நிட்டி²தா.