6. ஆராமவக்³கோ³

1-2. ஆராமபவிஸனாதி³ஸிக்கா²பத³வண்ணனா

ஸீஸானுலோகிகாயாதி ஸீஸம் அனுலோகேந்தியா. யத்த² வா பி⁴க்கு²னியோ ஸன்னிபதிதாதி யத்த² பி⁴க்கு²னியோ பட²மதரம் ஸஜ்ஜா²யனசேதியவந்த³னாதி³அத்த²ம் ஸன்னிபதிதா. ஆபதா³ஸூதி கேனசி உபத்³து³தா ஹோதி, ஏவரூபாஸு ஆபதா³ஸு பவிஸிதும் வட்டதி.

து³தியம் உத்தானத்த²மேவ.

ஆராமபவிஸனாதி³ஸிக்கா²பத³வண்ணனா நிட்டி²தா.

3-4. க³ணபரிபா⁴ஸனாதி³ஸிக்கா²பத³வண்ணனா

ஸேஸந்தி ‘‘அத்த²த⁴ம்மஅனுஸாஸனிபுரேக்கா²ராயா’’திஆதி³கம் அவஸேஸம். தத்த² அனுஸாஸனிபுரேக்கா²ராயாதி ‘‘இதா³னிபி த்வம் பா³லா அப்³யத்தா’’திஆதி³னா (பாசி. அட்ட². 1036) நயேன அனுஸாஸனிபக்கே² ட²த்வா வத³ந்தியா அனாபத்தி.

சதுத்த²ம் உத்தானத்த²மேவ.

க³ணபரிபா⁴ஸனாதி³ஸிக்கா²பத³வண்ணனா நிட்டி²தா.

5. குலமச்ச²ரினீஸிக்கா²பத³வண்ணனா

குலே மச்ச²ரோ குலமச்ச²ரோதி புரிமஸ்மிம் பக்கே² ஸகத்தே² இனீபச்சயோ, தம் குலம் அஸ்ஸத்³த⁴ம் அப்பஸன்னந்தி குலஸ்ஸ அகு³ணம், அயஸம் வா பா⁴ஸந்தியாதி அத்தோ². பி⁴க்கு²னீனம் அவண்ணம் பா⁴ஸந்தியாதி ‘‘பி⁴க்கு²னியோ து³ஸ்ஸீலா பாபத⁴ம்மா’’தி (பாசி. அட்ட². 1043) பி⁴க்கு²னீனம் அகு³ணம், அயஸம் வா பா⁴ஸந்தியா.

ஸந்தம்யேவ ஆதீ³னவந்தி குலஸ்ஸ வா பி⁴க்கு²னீனம் வா ஸந்தம்யேவ அகு³ணம்.

குலமச்ச²ரினீஸிக்கா²பத³வண்ணனா நிட்டி²தா.

6-8. அபி⁴க்கு²காவாஸாதி³ஸிக்கா²பத³வண்ணனா

ஸமந்தபாஸாதி³காயம் வுத்தோதி ஸமந்தபாஸாதி³காய ஓவாத³வக்³க³ஸ்ஸ பட²மஸிக்கா²பதே³ (பாசி. அட்ட². 144) வுத்தோ.

ஸத்தமட்ட²மானி உத்தானத்தா²னேவ.

அபி⁴க்கு²காவாஸாதி³ஸிக்கா²பத³வண்ணனா நிட்டி²தா.

9-10. ஓவாதூ³பஸங்கமனாதி³ஸிக்கா²பத³வண்ணனா

உபோஸத²ஸ்ஸ புச்ச²னம் உபோஸத²புச்சா², ஸாவகபச்சயம், ரஸ்ஸத்தஞ்ச கத்வா ‘‘உபோஸத²புச்ச²க’’ந்தி வுத்தாதி ஆஹ ‘‘உபோஸத²புச்ச²ன’’ந்தி. ஓவாத³த்தா²யாதி ஓவாத³யாசனத்தா²ய.

த³ஸமம் உத்தானத்த²மேவ.

ஓவாதூ³பஸங்கமனாதி³ஸிக்கா²பத³வண்ணனா நிட்டி²தா.

ஆராமவக்³கோ³ ச²ட்டோ².