3. நக்³க³வக்³கோ³

1-2. நக்³கா³தி³ஸிக்கா²பத³வண்ணனா

இத³ந்தி இத³ம் உத³கஸாடிகசீவரம்.

து³தியம் உத்தானத்த²மேவ.

நக்³கா³தி³ஸிக்கா²பத³வண்ணனா நிட்டி²தா.

3. சீவரஸிப்³ப³னஸிக்கா²பத³வண்ணனா

விஸிப்³பே³த்வாதி விஜடேத்வா. து⁴ரம் நிக்கி²த்தமத்தேதி து⁴ரே நிக்கி²த்தமத்தே, து⁴ரம் நிக்கி²பித்வா ஸசேபி பச்சா² ஸிப்³ப³தி, ஆபத்தியேவாதி அத்தோ².

சீவரஸிப்³ப³னஸிக்கா²பத³வண்ணனா நிட்டி²தா.

4. ஸங்கா⁴டிசாரஸிக்கா²பத³வண்ணனா

‘‘இத³ம் மே சீவரம் மஹக்³க⁴ம் ஈதி³ஸே சோரப⁴யே ந ஸக்கா தா⁴ரேதுந்தி ஏவரூபாஸு ஆபதா³ஸூ’’தி ஏத்த² பாடோ². ஸோ பன காகபத³ஸஞ்ஜனிதமோஹேஹி லேக²கேஹி உபரிஸிக்கா²பதே³ லிகி²தோ. கிஞ்சாபி தத்த² லிகி²தோ, ஏத்தே²வ பன த³ட்ட²ப்³போ³.

ஸங்கா⁴டிசாரஸிக்கா²பத³வண்ணனா நிட்டி²தா.

5. சீவரஸங்கமனீயஸிக்கா²பத³வண்ணனா

ஆபதா³ஸு வா தா⁴ரேதீதி ஸசே அபாருதம் வா அனிவத்த²ம் வா சோரா ஹரந்தி, ஏவரூபாஸூ ஆபதா³ஸு தா⁴ரேதி, அனாபத்தி.

சீவரஸங்கமனீயஸிக்கா²பத³வண்ணனா நிட்டி²தா.

6. க³ணசீவரஸிக்கா²பத³வண்ணனா

அஞ்ஞஸ்மிம் பரிக்கா²ரேதி யத்த² கத்த²சி தா²லகாதீ³னம் வா ஸப்பிதேலாதீ³னம் வா அஞ்ஞதரஸ்மிம். ‘‘ஸமக்³க⁴காலே த³ஸ்ஸதா²’’தி ஏவம் ஆனிஸம்ஸம் த³ஸ்ஸேத்வா நிவாரேந்தியாதி ‘‘கித்தகம் அக்³க⁴னகம் தா³துகாமத்தா²’’தி புச்சி²த்வா (பாசி. அட்ட². 909) ‘‘ஏத்தகம் நாமா’’தி வுத்தே ‘‘ஆக³மேத² தாவ, இதா³னி வத்த²ம் மஹக்³க⁴ம், கதிபாஹேன கப்பாஸே ஆஹடே ஸமக்³க⁴ம் ப⁴விஸ்ஸதி, தஸ்மிம் காலே த³ஸ்ஸதா²’’தி ஏவம் ஆனிஸம்ஸம் த³ஸ்ஸேத்வா நிவாரேந்தியா.

க³ணசீவரஸிக்கா²பத³வண்ணனா நிட்டி²தா.

7-10. படிபா³ஹனாதி³ஸிக்கா²பத³வண்ணனா

ஆனிஸம்ஸம் த³ஸ்ஸேத்வா படிபா³ஹந்தியாதி ‘‘ஏகிஸ்ஸா ஏகம் ஸாடகம் நப்பஹோதி, ஆக³மேத² தாவ, கதிபாஹேன உப்பஜ்ஜிஸ்ஸதி, ததோ பா⁴ஜேஸ்ஸாமா’’தி (பாசி. அட்ட². 915) ஏவம் ஆனிஸம்ஸம் த³ஸ்ஸேத்வா படிபா³ஹந்தியா அனாபத்தி.

அட்ட²மனவமானி உத்தானத்தா²னேவ.

ஸேஸந்தி ‘‘த⁴ம்மிகே வேமதிகாயா’’திஆதி³கம் அவஸேஸம். தத்த² ஆனிஸம்ஸம் த³ஸ்ஸேத்வா படிபா³ஹந்தியாதி ‘‘பி⁴க்கு²னிஸங்கோ⁴ ஜிண்ணசீவரோ, கதி²னானிஸம்ஸமூலகோ மஹாலாபோ⁴’’தி (பாசி. அட்ட². 931) ஏவரூபம் ஆனிஸம்ஸம் த³ஸ்ஸேத்வா படிபா³ஹந்தியா அனாபத்தி.

படிபா³ஹனாதி³ஸிக்கா²பத³வண்ணனா நிட்டி²தா.

நக்³க³வக்³கோ³ ததியோ.