10. நச்சகீ³தஸிக்கா²பத³வண்ணனா

நச்சந்தி நடாத³யோ வா நச்சந்து, ஸோண்டா³ வா அந்தமஸோ மோரஸுவமக்கடாத³யோபி, ஸப்³ப³மேதம் நச்சமேவ. தேனாஹ ‘‘நச்சந்தி அந்தமஸோ மோரனச்சம்பீ’’தி. கீ³தந்தி நடாதீ³னம் வா கீ³தம் ஹோது, அரியானம் பரினிப்³பா³னகாலே ரதனத்தயகு³ணூபஸம்ஹிதம் ஸாது⁴கீளிதகீ³தம் வா, அந்தமஸோ ‘‘த³ந்தகீ³தம்பி கா³யிஸ்ஸாமா’’தி புப்³ப³பா⁴கே³ ஓகூஜந்தா கரோந்தி, ஸப்³ப³மேதம் கீ³தமேவ. தேனாஹ ‘‘கீ³தந்தி அந்தமஸோ த⁴ம்மபா⁴ணககீ³தம்பீ’’தி. தத்த² த⁴ம்மபா⁴ணககீ³தம் நாம அஸஞ்ஞதபி⁴க்கூ²னம் தம் தம் வத்தம் பி⁴ந்தி³த்வா அதிதீ³க⁴ம் கத்வா கீ³தஸ்ஸரேன த⁴ம்மப⁴ணனம், தம்பி நேவ பி⁴க்கு²னோ, ந பி⁴க்கு²னீனம் வட்டதி. ததா² ஹி வுத்தம் பரமத்த²ஜோதிகாய கு²த்³த³கட்ட²கதா²ய (கு². பா. அட்ட². 2.பச்சி²மபஞ்சஸிக்கா²பத³வண்ணனா) ‘‘த⁴ம்மூபஸம்ஹிதம் கீ³தம் வட்டதி, கீ³தூபஸம்ஹிதோ பன த⁴ம்மோ ந வட்டதீ’’தி. தஸ்மா த⁴ம்மம் ப⁴ணந்தேன ஜாதகவத்தாதி³ம் தம் தம் வத்தம் அவினாஸேத்வா சதுரஸ்ஸேன (சூளவ. அட்ட². 249) வத்தேன பரிமண்ட³லானி பத³ப்³யஞ்ஜனானி த³ஸ்ஸேதப்³பா³னி. வாதி³தந்தி தந்திப³த்³தா⁴தி³வாத³னீயப⁴ண்ட³வாதி³தம் வா ஹோது, குடபே⁴ரிவாதி³தம் வா அந்தமஸோ உத³கபே⁴ரிவாதி³தம்பி, ஸப்³ப³மேவேதம் வாதி³தமேவ. தேனாஹ ‘‘வாதி³தந்தி அந்தமஸோ உத³கபே⁴ரிவாதி³த’’ந்தி. யம் பன நிட்டு²ப⁴ந்தீ வா ஸாஸங்கே வா டி²தா அச்ச²ரிகம் வா போ²டேதி, பாணிம் வா பஹரதி, தத்த² அனாபத்தி. த³ஸ்ஸனேன சேத்த² ஸவனம்பி ஸங்க³ஹிதம் விரூபேகஸேஸனயேன. ஆலோசனஸபா⁴வதாய வா பஞ்சன்னம் விஞ்ஞாணானம் ஸவனகிரியாயபி த³ஸ்ஸனஸங்கே²பஸப்³பா⁴வதோ ‘‘த³ஸ்ஸனாய’’இச்சேவ வுத்தந்தி ஆஹ ‘‘ஏதேஸு யம் கிஞ்சி த³ஸ்ஸனாய க³ச்ச²ந்தியா’’தி. யத்த² டி²தாதி ஏவம் க³ந்த்வா யஸ்மிம் பதே³ஸே டி²தா.

நனு ச ஸயம்னச்சனாதீ³ஸு பாசித்தியம் பாளியம் ந வுத்தம், அத² கத²ம் க³ஹேதப்³ப³ந்தி ஆஹ ‘‘ஸப்³ப³அட்ட²கதா²ஸு வுத்த’’ந்தி, இமினா பாளியம் அவுத்தேபி அட்ட²கதா²பமாணேன க³ஹேதப்³ப³ந்தி த³ஸ்ஸேதி. ஸமுட்டா²னாதீ³னி ஏளகலோமஸதி³ஸானீதி பன மாதிகாக³தபாசித்தியஸ்ஸேவ வஸேன வுத்தம், ஸப்³பே³ஸம் வஸேன பன ச²ஸமுட்டா²னந்தி க³ஹேதப்³ப³ம். ‘‘ஆராமே ட²த்வா’’தி இத³ம் நித³ஸ்ஸனமத்தம் ஸேஸஇரியாபதே²ஹி யுத்தாய பஸ்ஸந்தியா அனாபத்தியா இச்சி²தப்³ப³த்தா. இதரதா² ஹி நிஸின்னாபி பஸ்ஸிதும் ந லபே⁴ய்ய. ‘‘பஸ்ஸிஸ்ஸாமீ’’தி விஹாரதோ விஹாரம் க³ச்ச²ந்தியா ஆபத்தியேவ. ஆஸனஸாலாய நிஸின்னா பஸ்ஸதி, அனாபத்தி, ‘‘பஸ்ஸிஸ்ஸாமீ’’தி உட்ட²ஹித்வா க³ச்ச²ந்தியா ஆபத்தி. வீதி²யம் ட²த்வா கீ³வம் பரிவத்தேத்வா பஸ்ஸந்தியாபி ஆபத்தியேவ. பி⁴க்கு²ஸ்ஸாபி ஏஸேவ நயோ, ஆபத்திபே⁴தோ³வ நானம்.

நச்சகீ³தஸிக்கா²பத³வண்ணனா நிட்டி²தா.

லஸுணவக்³கோ³ பட²மோ.