1. லஸுணஸிக்கா²பத³வண்ணனா

‘‘லஸுண’’ந்தி கிஞ்சாபி அவிஸேஸேன வுத்தம், ததா²பி மக³தே⁴ஸு ஜாதம் லஸுணமேவ இதா⁴தி⁴ப்பேதம், தம்பி ப⁴ண்டி³கலஸுணமேவாதி ஆஹ மக³த⁴ரட்டே² ஜாத’’ந்திஆதி³.

ப⁴ண்டி³கலஸுணந்தி போட்டலிகலஸுணமேவ, ஸம்புண்ணமிஞ்ஜானமேதம் அதி⁴வசனம். தேனாஹ ‘‘ந ஏகத்³விதிமிஞ்ஜக’’ந்தி. அஜ்ஜோ²ஹாரே அஜ்ஜோ²ஹாரேதி (பாசி. அட்ட². 795) ஏத்த² ஸசே த்³வே தயோ ப⁴ண்டி³கே ஏகதோயேவ ஸங்கா²தி³த்வா அஜ்ஜோ²ஹரதி, ஏகம் பாசித்தியம். ப⁴ஞ்ஜித்வா ஏகேகமிஞ்ஜகம் கா²த³ந்தியா பன பயோக³க³ணனாய பாசித்தியானி.

பலண்டு³காதீ³னம் வண்ணேன வா மிஞ்ஜாய வா நானாத்தம் வேதி³தப்³ப³ம் – வண்ணேன தாவ பலண்டு³கோ நாம பண்டு³வண்ணோ ஹோதி, ப⁴ஞ்ஜனகோ லோஹிதவண்ணோ, ஹரிதகோ ஹரிதபண்ணவண்ணோ. மிஞ்ஜாய பன பலண்டு³கஸ்ஸ ஏகா மிஞ்ஜா ஹோதி, ப⁴ஞ்ஜனகஸ்ஸ த்³வே, ஹரிதகஸ்ஸ திஸ்ஸோ. சாபலஸுணோ அமிஞ்ஜகோ. அங்குரமத்தமேவ ஹி தஸ்ஸ ஹோதி. மஹாபச்சரியாதீ³ஸு பன ‘‘பலண்டு³கஸ்ஸ தீணி மிஞ்ஜானி, ப⁴ஞ்ஜனகஸ்ஸ த்³வே, ஹரிதகஸ்ஸ ஏக’’ந்தி (பாசி. அட்ட². 797) வுத்தம். ஏதே பலண்டு³காத³யோ ஸபா⁴வேனேவ வட்டந்தி. ஸூபஸம்பாகாதீ³ஸு பன மாக³த⁴கம்பி வட்டதி. தஞ்ஹி பச்சமானேஸு முக்³க³ஸூபாதீ³ஸு வா மச்ச²மம்ஸவிகதியா வா தேலே வா ப³த³ரஸாளவாதீ³ஸு வா அம்பி³லஸாகாதீ³ஸு வா உத்தரிப⁴ங்கே³ஸு வா யத்த² கத்த²சி அந்தமஸோ யாகு³ப⁴த்தேபி பக்கி²த்தம் வட்டதி. ப³த³ரஸாளவம் (ஸாரத்த². டீ. பாசித்திய 3.793-797) நாம ப³த³ரப²லானி ஸுக்கா²பேத்வா சுண்ணேத்வா கத்தப்³பா³ கா²த³னீயவிகதி.

லஸுணஸிக்கா²பத³வண்ணனா நிட்டி²தா.