பாசித்தியகண்ட³ம்

1. பட²மவக்³க³வண்ணனா

பட²மே ஹரிதபத்தவண்ணோ ஹரிதகோ. சாபலஸுணம் அமிஞ்ஜகோ. அங்குரமத்தமேவ ஹி தஸ்ஸ ஹோதி. பலண்டு³காத³யோ ஸபா⁴வேனேவ வட்டந்தி. ஸூபஸம்பாகாதீ³ வினாபி அந்தமஸோ யாகு³ப⁴த்தேபி பக்கி²பிதும் வட்டதீதி லிகி²தம், ‘‘பி⁴க்கு²னியாபி கி³லானாய புரேப⁴த்தமேவ லஸுணம் கப்பதி, ந அகி³லானாயா’’தி அப⁴யகி³ரீனம் உக்³க³ஹோதி.

து³தியே ஆபா³த⁴பச்சயா பி⁴க்கு²னிஸங்க⁴ம் ஆபுச்சி²த்வா ஸம்ஹராபேதும் வட்டதி, பி⁴க்கு²ஸ்ஸ ஏத்த² ச லஸுணே ச து³க்கடம்.

ஸத்தமே ‘‘ஸமுட்டா²னாதீ³னி அத்³தா⁴னமக்³க³ஸிக்கா²பத³ஸதி³ஸானீ’’தி பாடோ².

நவமே குட்டோ நாம க⁴ரகுட்டோ. பாகாரோ நாம பரிக்கே²பபாகாரோ.

ச²ட்³டி³தகே²த்தேதி புராணகே²த்தே. ஸங்க⁴ஸந்தகே பி⁴க்கு²ஸ்ஸ ச²ட்³டே³தும் வட்டதி ஸங்க⁴பரியாபன்னத்தா. பி⁴க்கு²னீனம்பி ஸங்க⁴ஸந்தகே பி⁴க்கு²ஸங்க⁴ஸந்தகே வுத்தனயேனேவ வட்டதி. ஏவம் ஸந்தேபி ஸாருப்பவஸேன காதப்³ப³ந்தி லிகி²தம்.

த³ஸமே ‘‘ஸயம் தானி வத்தூ²னி கரோந்தியா’’திஆதி³ இத⁴ ஸிக்கா²பதே³ நத்தி². கஸ்மா? ஏளகலோமஸமுட்டா²னத்தா. யதி³ ஏவம் கஸ்மா வுத்தந்தி சே? ஸுத்தானுலோமமஹாபதே³ஸதோ. யதி³ நச்சாதீ³னி பஸ்ஸிதும் வா ஸுணிதும் வா ந லப⁴தி, பகே³வ அத்தனா காதுந்தி நயதோ லப்³ப⁴மானத்தா வுத்தம். இதரதா² மஹாபதே³ஸா நிரத்த²கா ஸியும். ‘‘ஏவம் அஞ்ஞத்த²பி நயோ நேதப்³போ³. ஸமுட்டா²னம்பி இத⁴ வுத்தமேவ அக்³க³ஹேத்வா ச²ஸமுட்டா²னவஸேன க³ஹேதப்³ப³’’ந்தி ஆசரியா. இத⁴ வுத்தம் ஸமுட்டா²னம் நாம மூலபூ⁴தஸ்ஸ அந்தரா வுத்தாபத்தியா, தஸ்மா ஏளகலோமஸமுட்டா²னமேவாதி அபரே. ஆராமே ட²த்வாதி ந கேவலம் ட²த்வா, ததோ க³ந்த்வா பன ஸப்³பி³ரியாபதே²ஹிபி லப⁴தி. ஆராமே டி²தாதி பன ஆராமபரியாபன்னாதி அத்தோ². இதரதா² நிஸின்னாபி ந லபே⁴ய்யாதி.

பட²மவக்³க³வண்ணனா நிட்டி²தா.

2. து³தியவக்³க³வண்ணனா

பஞ்சமே உபசாரோ த்³வாத³ஸஹத்தோ². ‘‘ஸமுட்டா²னாதீ³னி கதி²னஸதி³ஸானி, இத³ம் பன கிரியாகிரிய’’ந்தி பாடோ².

ஸத்தமே து⁴வபஞ்ஞத்தேதி பி⁴க்கு²னீனம் அத்தா²ய. குலானீதி குலக⁴ரானி.

து³தியவக்³க³வண்ணனா நிட்டி²தா.

3. ததியவக்³க³வண்ணனா

சதுத்தே² ஸங்கா⁴டிஆதி³வஸேன அதி⁴ட்டி²தானம் ஸங்கா⁴டிசாரம்.

பஞ்சமே ‘‘இத³ம் பன கிரியாகிரிய’’ந்தி பாடோ².

ச²ட்டே² அஞ்ஞஸ்மிம் பரிக்கா²ரே து³க்கடந்தி தா²லகாதீ³னம் வா ஸப்பிதேலாதீ³னம் வா அஞ்ஞதரஸ்மிம்.

ததியவக்³க³வண்ணனா நிட்டி²தா.

4. சதுத்த²வக்³க³வண்ணனா

ச²ட்டே² ஸம்ஸட்ட²விஹாரஸிக்கா²பதே³ ‘‘ஸேஸமேத்த² பட²மஅரிட்ட²ஸிக்கா²பதே³ வுத்தவினிச்ச²யஸதி³ஸமேவா’’தி பாடோ².

சதுத்த²வக்³க³வண்ணனா நிட்டி²தா.

5. பஞ்சமவக்³க³வண்ணனா

‘‘சித்தாகா³ரம் நாம யத்த² கத்த²சி மனுஸ்ஸானம் கீளிதும் ரமிதும் கதம் ஹோதீ’’திஆதி³னா (பாசி. 979) பாளியம் வுத்தத்தா சித்தாகா³ராதீ³னி ஸப்³பே³ஸம் அத்தா²ய கதானி, ந ரஞ்ஞோ ஏவ.

ஸத்தமே ஏதேன நிஸ்ஸஜ்ஜிதும் கப்பியம் வுத்தம். ‘‘நிஸ்ஸஜ்ஜித்வா பரிபு⁴ஞ்ஜதீ’’தி (பாசி. 1007) பாளி ச அத்தி². ‘‘ஸமுட்டா²னாதீ³னி கதி²னஸதி³ஸானி, இத³ம் பன கிரியாகிரிய’’ந்தி பாடோ². அட்ட²மேபி ஏஸோவ பாடோ².

பஞ்சமவக்³க³வண்ணனா நிட்டி²தா.

6. ச²ட்ட²வக்³க³வண்ணனா

த³ஸமே ‘‘ஸமுட்டா²னாதீ³னி கதி²னஸதி³ஸானி, இத³ம் பன கிரியாகிரிய’’ந்தி பாடோ².

ச²ட்ட²வக்³க³வண்ணனா நிட்டி²தா.

8. அட்ட²மவக்³க³வண்ணனா

பட²மது³தியததியேஸு ‘‘கி³ஹிக³தா’’தி வா ‘‘குமாரிபூ⁴தா’’தி வா ந வத்தப்³பா³. வத³ந்தி சே, கம்மம் குப்பதி.

ஏகாத³ஸமே ச²ந்த³ம் அவிஸ்ஸஜ்ஜேத்வாதி ‘‘யதா²ஸுக²’’ந்தி அவத்வா. ஏத்த² பன அயம் வினிச்ச²யோ – ‘‘பாரிவாஸிகச²ந்த³தா³னேனா’’தி இத³ம் உத்³த⁴ரித்வா ‘‘வுட்டி²தாய பரிஸாயா’’தி (பாசி. 1168) பத³பா⁴ஜனம் வுத்தம். ஏதஸ்ஸ பன ஸமந்தபாஸாதி³காயம் ‘‘வுட்டி²தாய பரிஸாயாதி ச²ந்த³ம் விஸ்ஸஜ்ஜேத்வா காயேன வா வாசாய வா ச²ந்த³விஸ்ஸஜ்ஜனமத்தேன வா வுட்டி²தாயா’’தி (பாசி. அட்ட². 1167) வுத்தம். இத⁴ ச²ந்த³ஸ்ஸ பன அவிஸ்ஸட்ட²த்தா கம்மம் காதும் வட்டதீதி வுத்தம். தஸ்மா ச²ந்த³ம் அவிஸ்ஸஜ்ஜேத்வாவ த்³வாத³ஸஹத்த²பாஸே விஹரித்வா புன ஸன்னிபாதகரணஞ்ச வட்டதீதி லிகி²தம்.

அட்ட²மவக்³க³வண்ணனா நிட்டி²தா.

9. நவமவக்³க³வண்ணனா

ததியே ‘‘ஸேஸம் வுத்தனயேன வேதி³தப்³ப³ம், இத³ம் பன அகுஸலசித்த’’ந்தி பாடோ².

சதுத்தே² வுத்தனயேனாதி ததியே வுத்தனயேன.

ஏகாத³ஸமே ‘‘ஸமுட்டா²னாதீ³னி கதி²னஸதி³ஸானி, இத³ம் பன கிரியாகிரிய’’ந்தி பாடோ².

த்³வாத³ஸமே ‘‘ஸமுட்டா²னாதீ³னி பத³ஸோத⁴ம்மஸதி³ஸானி, இத³ம் பன கிரியாகிரிய’’ந்தி பாடோ².

தேரஸமே ‘‘ஸம்கச்சிகம் நாம அத⁴க்க²கம் உப்³ப⁴னாபி⁴, தஸ்ஸா படிச்சா²த³னத்தா²யா’’தி (பாசி. 1226) பாளியம் வுத்தத்தா இதா⁴பி ‘‘அத⁴க்க²கஉப்³ப⁴னாபி⁴ஸங்கா²தஸ்ஸ ஸரீரஸ்ஸ படிச்சா²த³னத்த²’’ந்தி பாடோ². அபரிக்கே²பே ஆபத்திபரிச்சே²த³ம் ஸமந்தபாஸாதி³கவஸேன அக்³க³ஹேத்வா இத⁴ வுத்தனயேன க³ஹேதப்³ப³ந்தி லிகி²தம்.

நவமவக்³க³வண்ணனா நிட்டி²தா.

ஸுத்³த⁴பாசித்தியவண்ணனா நிட்டி²தா.

ஸமுட்டா²னவினிச்ச²யவண்ணனா

ஸமுட்டா²னானம் வினிச்ச²யே பன கி³ரக்³க³ஸமஜ்ஜாதீ³னி ‘‘அசித்தகானி லோகவஜ்ஜானீ’’தி வுத்தத்தா ‘‘நச்ச’’ந்தி வா ‘‘க³ந்த⁴’’ந்தி வா அஜானித்வாபி த³ஸ்ஸனேன, விலிம்பனேன வா ஆபஜ்ஜனதோ வத்து²அஜானனசித்தேன அசித்தகானி. ‘‘நச்ச’’ந்தி வா ‘‘க³ந்த⁴’’ந்தி வா ஜானித்வா பஸ்ஸந்தியா, விலிம்பந்தியா வா அகுஸலத்தா ஏவ லோகவஜ்ஜானி. சோரிவுட்டா²பனாதீ³னி ‘‘சோரீ’’திஆதி³னா வத்து²ம் ஜானித்வா கரணேயேவ ஆபஜ்ஜனத்தா ஸசித்தகானி. உபஸம்பதா³தீ³னம் ஏகந்தாகுஸலசித்தேனேவ அகத்தப்³ப³த்தா பண்ணத்திவஜ்ஜானி. ‘‘இத⁴ ஸசித்தகாசித்தகதா பண்ணத்திஜானனாஜானனதாய அக்³க³ஹேத்வா வத்து²ஜானனாஜானனதாய க³ஹேதப்³ப³’’ந்தி லிகி²தம். அதி⁴ப்பேதத்தா ஸங்கே²பதோ த³ஸ்ஸனாபா⁴வா –

அசித்தகத்தம் த்³விதா⁴ மதம், வத்து²பண்ணத்திஅஞ்ஞாணா;

வுத்தம் ஞாணம் த்³விதா⁴ இத⁴, ஸகனாமேன அஞ்ஞாதம்.

பரனாமஞ்ச ஜானனம், வத்து²ஸ்ஸேகம் ப³லக்காரே;

ஏகதா⁴ ஸமசாரிகே, தஸ்மிம் தப்படிப³ந்தோ⁴தி.

பரனாமேன ஜானனம், த்³விதா⁴ முத்தாதி³கே ஏகம்;

ஏகம் லோமாதி³கே மதந்தி, அயம் பே⁴தோ³ வேதி³தப்³போ³.

ஸேஸமேத்த² உத்தானம், அனுத்தானத்தே² வுத்தவினிச்ச²யத்தா ந உத்³த⁴டந்தி;

ஸமுட்டா²னவினிச்ச²யவண்ணனா நிட்டி²தா.

பி⁴க்கு²னீபாதிமோக்க²வண்ணனா நிட்டி²தா.

கங்கா²விதரணீபுராணடீகா நிட்டி²தா.

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ