பாராஜிககண்ட³ம்

அபி⁴லாபமத்தமேவாதி ஏத்த² த³ஹரவஸேன ‘‘ப⁴ந்தே’’தி ச வுட்³ட⁴வஸேன ‘‘ஆவுஸோ’’தி ச தத்த² து³விதோ⁴ அபி⁴லாபோ, இத⁴ பன வுட்³ட⁴த³ஹரானம் ‘‘அய்யா’’தி ஏகமேவ.

காயஸம்ஸக்³கே³ வுத்தனயேனாதி ஏத்த² தப்³ப³ஹுலனயேன கிரியஸமுட்டா²னதா வுத்தா. ‘‘காயஸம்ஸக்³க³ம் ஸமாபஜ்ஜேய்யா’’தி அவத்வா பன ‘‘ஸாதி³யேய்யா’’தி வுத்தத்தா அகிரியதோபி ஸமுட்டா²தீதி வேதி³தப்³ப³ம். யதா² சேத்த², ஏவம் ஹேட்டா² ‘‘மனுஸ்ஸித்தி²யா தயோ மக்³கே³ மேது²னம் த⁴ம்மம் படிஸேவந்தஸ்ஸ ஆபத்தி பாராஜிகஸ்ஸா’’திஆதி³னா (பாரா. 56) நயேன கிரியஸமுட்டா²னதம் வத்வா தத³னந்தரம் ‘‘பி⁴க்கு²பச்சத்தி²கா மனுஸ்ஸித்தி²ம் பி⁴க்கு²ஸ்ஸ ஸந்திகம் ஆனேத்வா வச்சமக்³கே³ன அங்க³ஜாதம் அபி⁴னிஸீதே³ந்தி, ஸோ சே பவேஸனம் ஸாதி³யதீ’’திஆதி³னா (பாரா. 58) நயேன அகிரியஸமுட்டா²னஸ்ஸபி வுத்தத்தா பட²மபாராஜிகாயபி தப்³ப³ஹுலனயேனேவ கிரியஸமுட்டா²னதா வேதி³தப்³பா³. ந ஹி பவேஸனஸாதி³யனாதி³ம்ஹி கிரியஸமுட்டா²னதா தி³ஸ்ஸதி.

அங்க³ஜாதசலனஞ்சேத்த² ந ஸாரதோ த³ட்ட²ப்³ப³ம் ‘‘ஸோ சே பவேஸனம் ந ஸாதி³யதி, பவிட்ட²ம் ந ஸாதி³யதி, டி²தம் ந ஸாதி³யதி, உத்³த⁴ரணம் ஸாதி³யதி, ஆபத்தி பாராஜிகஸ்ஸா’’தி (பாரா. 58) ஏத்த² டி²தனஸாதி³யனே பகதியாபி பரிபுண்ணசலனத்தா. ஸாதி³யனபச்சயா படிஸேவனசலனஞ்சேத்த² ந தி³ஸ்ஸதேவாதி தப்³ப³ஹுலனயேனேவ கிரியஸமுட்டா²னதா க³ஹேதப்³பா³.

அபிச பி⁴க்கு²னியாபி பட²மபாராஜிகே தஸ்ஸ ஸாதி³யனஸ்ஸ ஸரூபேன வுத்தத்தா தத³னுரூபவஸேன விப⁴ங்க³னயமனோலோகேத்வா ‘‘கிரியஸமுட்டா²ன’’மிச்சேவ வுத்தம். யதா² சேதேஸு தப்³ப³ஹுலனயேன கிரியஸமுட்டா²னதா வுத்தா, ததா² ஸுராதீ³னம் அகுஸலேனேவ பாதப்³ப³தா. இதரதா² ‘‘யம் அகுஸலேனேவ ஆபஜ்ஜதி, அயம் லோகவஜ்ஜா, ஸேஸா பண்ணத்திவஜ்ஜா’’தி வுத்தே லோகவஜ்ஜபண்ணத்திவஜ்ஜானம் நியமலக்க²ணஸித்³தி⁴ ஹோதி, ததா² தம் அவத்வா ‘‘யஸ்ஸா ஸசித்தகபக்கே² சித்தம் அகுஸலமேவ ஹோதி, அயம் லோகவஜ்ஜா, ஸேஸா பண்ணத்திவஜ்ஜா’’தி (கங்கா². அட்ட². பட²மபாராஜிகவண்ணனா) வுத்தே லோகவஜ்ஜவசனம் நிரத்த²கம் ஸியா வத்து²அஜானனபக்கே²பி அகுஸலேனேவ பாதப்³ப³த்தா. யஸ்மா தத்த² ஸுராபானவீதிக்கமஸ்ஸ அகுஸலசித்துப்பாதோ³ நத்தி², தஸ்மா க²ந்த⁴கட்ட²கதா²யம் ‘‘மஜ்ஜபானே பன பி⁴க்கு²னோ அஜானித்வாபி பீ³ஜதோ பட்டா²ய மஜ்ஜம் பிவந்தஸ்ஸ பாசித்தியம். ஸாமணேரோ ஜானித்வாவ பிவந்தோ ஸீலபே⁴த³ம் ஆபஜ்ஜதி, ந அஜானித்வா’’தி (மஹாவ. அட்ட². 108) வுத்தம், ந வுத்தம் ‘‘வத்து²அஜானனபக்கே² பாணாதிபாதாதீ³னம் ஸித்³தி⁴கரஅகுஸலசித்துப்பாத³ஸதி³ஸே சித்துப்பாதே³ ஸதிபி ஸாமணேரோ ஸீலபே⁴த³ம் நாபஜ்ஜதீ’’தி. அபி⁴னிவேஸவசனம் பாணாதிபாதாதீ³ஹி ஸமானக³திகத்தா ஸாமணேரானம் ஸுராபானஸ்ஸ. ‘‘ஸுராமேரயிமே’’தி வத்து²ம் ஜானித்வா பாதப்³ப³தாதி³வஸேன வீதிக்கமந்தஸ்ஸ அகுஸலஸ்ஸ அஸம்ப⁴வோ நத்தி². தேன வுத்தம் ‘‘யஸ்ஸா ஸசித்தகபக்கே²’’திஆதி³.

கிஞ்சேத்த² – யுத்திவசனேன அரஹந்தானம் அப்பவிஸனதோ ஸசித்தகாசித்தகபக்கே²ஸு அகுஸலனியமோதி சே? ந, த⁴ம்மதாவஸேன ஸேக்கா²னம்பி அப்பவிஸனதோ. அசித்தகபக்கே² அகுஸலனியமாபா⁴வத³ஸ்ஸனத்த²ம் ஸுபந்தஸ்ஸ முகே² பக்கி²த்தஜலபி³ந்து³மிவ ஸுராபி³ந்து³ஆத³யோ உதா³ஹரிதப்³பா³. தப்³ப³ஹுலனயேன ஹி அத்தே² க³ஹிதே புப்³பே³னாபரம் அட்ட²கதா²ய ஸமேதி ஸத்³தி⁴ம் பாளியா சாதி. ஆசரியாபி ஸுராபானே அகுஸலனியமாபா⁴வமேவ வத³ந்தி. ஏகச்சே பன கிரியஸமுட்டா²னதா பனஸ்ஸ தப்³ப³ஹுலனயமேவ, ந பட²மபாராஜிகே. கத²ம்? காயஸம்ஸக்³க³ஸிக்கா²பத³ம் பட²மபாராஜிகஸமுட்டா²னம். ஏத்த² பி⁴க்கு²ஸ்ஸ ச பி⁴க்கு²னியா ச காயஸம்ஸக்³க³பா⁴வே ஸதி பி⁴க்கு²னீ காயங்க³ம் அசோபயமானாபி சித்தேனேவ அதி⁴வாஸேதி, ஆபஜ்ஜதி, ந ஏவம் பி⁴க்கு². பி⁴க்கு² பன சோபயமானோவ ஆபஜ்ஜதி, ஏவமேவ பட²மபாராஜிகேபி சோபனே ஸதி ஏவ ஆபஜ்ஜதி, நாஸதி. பவேஸனம் ஸாதி³யதீதி ஏத்த² பவேஸனஸாதி³யனம் நாம ஸேவனசித்துப்பாத³னம், மக்³கே³ன வா மக்³க³ப்படிபன்னம்பி இச்ச²ந்தி. தஸ்ஸாபி காயசலனம் ஏகந்தம் அத்தி² ஏவ. ஏவம் ஸந்தேபி வீமம்ஸித்வா க³ஹேதப்³ப³ந்தி வத³ந்தீதி லிகி²தம்

பாராஜிகவண்ணனா நிட்டி²தா.