ஸங்கா⁴தி³ஸேஸகண்ட³ம்

1. உஸ்ஸயவாதி³காஸிக்கா²பத³வண்ணனா

பி⁴க்கு²னீனம் ஸங்கா⁴தி³ஸேஸம் பத்வா வுட்டா²னவித⁴யோ ஸந்த³ஸ்ஸனத்த²ம் ‘‘அயம் பி⁴க்கு²னீ…பே… ஆபன்னா’’தி புக்³க³லனியமம் கத்வா பாராஜிகதோ அதி⁴ப்பாயந்தி ‘‘நிஸ்ஸாரணீயம் ஸங்கா⁴தி³ஸேஸ’’ந்தி ஆபத்தினாமக்³க³ஹணஞ்ச கதம். ‘‘ஸமுட்டா²னாதீ³னி பட²மகதி²னஸதி³ஸானி, இத³ம் பன கிரியமேவா’’தி பாடோ².

உஸ்ஸயவாதி³காஸிக்கா²பத³வண்ணனா நிட்டி²தா.

2. சோரிவுட்டா²பிகாஸிக்கா²பத³வண்ணனா

கத்த²சி அக³ந்த்வா நிஸின்னட்டா²னே ஏவ நிஸீதி³த்வா கரோந்தியா வாசாசித்ததோ, க²ண்ட³ஸீமாதி³க³தாய காயவாசாசித்ததோ.

சோரிவுட்டா²பிகாஸிக்கா²பத³வண்ணனா நிட்டி²தா.

3. ஏககா³மந்தரக³மனஸிக்கா²பத³வண்ணனா

‘‘ஆபோ⁴க³ம் வினா’’தி வுத்தத்தா ஆபோ⁴கே³ ஸதி அனாபத்தி, இமஸ்மிம் பன ஸிக்கா²பதே³ ஸமந்தபாஸாதி³காயம் உபசாராதிக்கமே ஆபத்தி வுத்தா, இத⁴ ஓக்கமே. த்³வீஸுபி வுத்தம் அத்த²தோ ஏகமேவ கா³மந்தரக³மனஸங்கா⁴தி³ஸேஸம் உபசாரஸ்ஸ ஸந்தா⁴ய வுத்தத்தா. க³ணம்ஹா ஓஹீயனஸ்ஸ விரோதோ⁴. ‘‘அரஞ்ஞே’’தி இத³ம் அத்த²வஸேன வுத்தம், கா³மந்தரேபி ஹோதி ஏவ.

ஸிக்கா²பதா³ பு³த்³த⁴வரேன வண்ணிதாதி கா³தா²ய வஸேன, அட்ட²கதா²யம்பி கா³மந்தரபரியாபன்னம் நதி³பாரந்தி வுத்தம்.

ஏககா³மந்தரக³மனஸிக்கா²பத³வண்ணனா நிட்டி²தா.

‘‘சா²த³னபச்சயா பன து³க்கடம் ஆபஜ்ஜதீ’’தி இத³ம் –

‘‘ஆபஜ்ஜதி க³ருகம் ஸாவஸேஸம்;

சா²தே³தி அனாத³ரியம் படிச்ச;

ந பி⁴க்கு²னீ நோ ச பு²ஸேய்ய வஜ்ஜம்;

பஞ்ஹாமேஸா குஸலேஹி சிந்திதா’’தி. (பரி. 481) –

இமாய விருஜ்ஜ²தி. தஸ்மா பமாத³லேகா² விய தி³ஸ்ஸதீதி க³வேஸிதப்³போ³ ஏத்த² அத்தோ². பி⁴க்கூ²னம் மானத்தகதா²யம் ‘‘பரிக்கி²த்தஸ்ஸ விஹாரஸ்ஸ பரிக்கே²பதோ, அபரிக்கி²த்தஸ்ஸ பரிக்கே²பாரஹட்டா²னதோ த்³வே லேட்³டு³பாதே அதிக்கமித்வா’’தி (கங்கா². அட்ட². நிக³மனவண்ணனா) வுத்தம், இத⁴ பன ‘‘கா³மூபசாரதோ ச பி⁴க்கூ²னம் விஹாரூபசாரதோ ச த்³வே லேட்³டு³பாதே’’திஆதி³ வுத்தம். தத்ர பி⁴க்கூ²னம் வுத்தப்பகாரப்பதே³ஸம் அதிக்கமித்வா கா³மேபி தம் கம்மம் காதும் வட்டதி, பி⁴க்கு²னீனம் பன கா³மே ந வட்டதி. தஸ்மா ஏவம் வுத்தந்தி ஏகே. அபரே பன பி⁴க்கூ²னம்பி கா³மே ந வட்டதி. பி⁴க்கு²விஹாரோ நாம புப்³பே³ ஏவ கா³மூபசாரம் அதிக்கமித்வா டி²தோ, தஸ்மா கா³மம் அவத்வா விஹாரூபசாரமேவ ஹேட்டா² வுத்தம். பி⁴க்கு²னீனம் விஹாரோ கா³மே ஏவ வட்டதி, ந ப³ஹி, தஸ்மா கா³மூபசாரஞ்ச விஹாரூபசாரஞ்ச உப⁴யமேவேத்த² த³ஸ்ஸிதம். தஸ்மா உப⁴யத்தா²பி அத்த²தோ நானாத்தம் நத்தீ²தி வத³ந்தி. யம் யுஜ்ஜதி, தம் க³ஹேதப்³ப³ம்.

ஸங்கா⁴தி³ஸேஸவண்ணனா நிட்டி²தா.