1. முஸாவாத³வக்³கோ³

1. முஸாவாத³ஸிக்கா²பத³வண்ணனா

பாசித்தியேஸு முஸாவாத³வக்³க³ஸ்ஸ பட²மே ஸம்பஜானமுஸாவாதே³தி புப்³பே³பி ஜானித்வா வசனக்க²ணேபி ஜானந்தஸ்ஸேவ முஸாவாத³ப⁴ணனே. ப⁴ணனஞ்ச நாம இத⁴ அபூ⁴தஸ்ஸ வா பூ⁴ததம், பூ⁴தஸ்ஸ வா அபூ⁴ததம் கத்வா காயேன வா வாசாய வா விஞ்ஞாபனப்பயோகோ³, நிமித்தத்தே² சேதம் பு⁴ம்மவசனம். தஸ்மா யோ ஸம்பஜானமுஸாவாத³ம் வத³தி, தஸ்ஸ தம்னிமித்தம் தம்ஹேது தப்பச்சயா பாசித்தியம் ஹோதீதி ஏவமேத்த² அஞ்ஞேஸு ச ஈதி³ஸேஸு அத்தோ² வேதி³தப்³போ³.

ஸாவத்தி²யம் ஹத்த²கம் ஸக்யபுத்தம் ஆரப்³ப⁴ அவஜானித்வா படிஜானனாதி³வத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், உத்தரிமனுஸ்ஸத⁴ம்மாரோசனத்த²ம் முஸா ப⁴ணந்தஸ்ஸ பாராஜிகம், அமூலகேன பாராஜிகேன அனுத்³த⁴ம்ஸனத்த²ம் ஸங்கா⁴தி³ஸேஸோ, ஸங்கா⁴தி³ஸேஸேன அனுத்³த⁴ம்ஸனத்த²ம் பாசித்தியம், ஆசாரவிபத்தியா அனுத்³த⁴ம்ஸனத்த²ம் து³க்கடம், ‘‘யோ தே விஹாரே வஸீ’’திஆதி³னா (பாரா. 220) பரியாயேன உத்தரிமனுஸ்ஸத⁴ம்மாரோசனத்த²ம் படிவிஜானந்தஸ்ஸ முஸா ப⁴ணிதே து²ல்லச்சயம், அப்படிவிஜானந்தஸ்ஸ து³க்கடம், கேவலம் முஸா ப⁴ணந்தஸ்ஸ இத⁴ பாசித்தியம். அனுபதா⁴ரேத்வா ஸஹஸா ப⁴ணந்தஸ்ஸ, ‘‘அஞ்ஞம் ப⁴ணிஸ்ஸாமீ’’தி அஞ்ஞம் ப⁴ணந்தஸ்ஸ, உம்மத்தகாதீ³னஞ்ச அனாபத்தி. விஸம்வாத³னபுரேக்கா²ரதா, விஸம்வாத³னசித்தேன யமத்த²ம் வத்துகாமோ, தஸ்ஸ புக்³க³லஸ்ஸ விஞ்ஞாபனபயோகோ³ சாதி இமானேத்த² த்³வே அங்கா³னி. ஸமுட்டா²னாதீ³னி அதி³ன்னாதா³னஸதி³ஸானீதி.

முஸாவாத³ஸிக்கா²பத³வண்ணனா நிட்டி²தா.

2. ஓமஸவாத³ஸிக்கா²பத³வண்ணனா

து³தியே ஓமஸவாதே³தி ஓவிஜ்ஜ²னவசனே, ஜாதினாமகோ³த்தகம்மஸிப்பஆபா³த⁴லிங்க³கிலேஸஆபத்திஅக்கோஸேஸு பூ⁴தேன வா அபூ⁴தேன வா யேன கேனசி பாராஜிகம் ஆபன்னம் வா அனாபன்னம் வா யம்கிஞ்சி பி⁴க்கு²ம் யாய காயசி வாசாய வா ஹத்த²முத்³தா³ய வா அனஞ்ஞாபதே³ஸேன அக்கோஸனவசனே பாசித்தியந்தி அத்தோ².

ஸாவத்தி²யம் ச²ப்³ப³க்³கி³யே பி⁴க்கூ² ஆரப்³ப⁴ ஓமஸனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், தேஹியேவ த³ஸஹி அக்கோஸவத்தூ²ஹி ‘‘ஸந்தி இதே⁴கச்சே சண்டா³லா’’திஆதி³னா (பாசி. 26) நயேன அஞ்ஞாபதே³ஸம் கத்வா அக்கோஸந்தஸ்ஸ, ‘‘சோரோஸி க³ண்டி²பே⁴த³கோஸீ’’திஆதீ³ஹி பாளிமுத்தகபதே³ஹி அக்கோஸந்தஸ்ஸ, யதா² ததா² வா அனுபஸம்பன்னம் அக்கோஸந்தஸ்ஸ ச து³க்கடம். இத⁴ பி⁴க்கு²னீபி அனுபஸம்பன்னஸங்க்²யம் க³ச்ச²தி. அனக்கோஸிதுகாமஸ்ஸ கேவலம் த³வகம்யதாய வத³தோ ஸப்³ப³த்த² து³ப்³பா⁴ஸிதம். அத்த²த⁴ம்மஅனுஸாஸனிபுரேக்கா²ரானம், உம்மத்தகாதீ³னஞ்ச அனாபத்தி. யம் அக்கோஸதி, தஸ்ஸ உபஸம்பன்னதா, அனஞ்ஞாபதே³ஸேன ஜாதிஆதீ³ஹி அக்கோஸனம், ‘‘மம் அக்கோஸதீ’’தி ஜானனா, அத்த²புரேக்கா²ரதாதீ³னம் அபா⁴வோதி இமானேத்த² சத்தாரி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, வேத³னா பன இத⁴ து³க்கா²தி.

ஓமஸவாத³ஸிக்கா²பத³வண்ணனா நிட்டி²தா.

3. பேஸுஞ்ஞஸிக்கா²பத³வண்ணனா

ததியே பி⁴க்கு²பேஸுஞ்ஞேதி பி⁴க்கு²ஸ்ஸ பேஸுஞ்ஞே, ஜாதிஆதீ³ஹி அக்கோஸவத்தூ²ஹி பி⁴க்கூ² அக்கோஸந்தஸ்ஸ பி⁴க்கு²னோ ஸுத்வா வசனம் பி⁴க்கு²னோ பியகம்யதாய வா பே⁴தா³தி⁴ப்பாயேன வா யோ அக்குத்³தோ⁴, தஸ்ஸ பி⁴க்கு²ஸ்ஸ காயேன வா வாசாய வா உபஸம்ஹடே தஸ்மிம் பேஸுஞ்ஞகரணவசனே பாசித்தியந்தி அத்தோ².

ஸாவத்தி²யம் ச²ப்³ப³க்³கி³யே பி⁴க்கூ² ஆரப்³ப⁴ பேஸுஞ்ஞஉபஸம்ஹரணவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், வுத்தனயேனேவ அஞ்ஞாபதே³ஸேன அக்கோஸந்தஸ்ஸ வசனூபஸம்ஹாரே வா பாளிமுத்தகஅக்கோஸூபஸம்ஹாரே வா அனுபஸம்பன்னஸ்ஸ ச உபஸம்ஹாரே து³க்கடம். இதா⁴பி பி⁴க்கு²னீ அனுபஸம்பன்னட்டா²னே டி²தா. ந பியகம்யதாய, ந பே⁴தா³தி⁴ப்பாயேன கேவலம் பாபக³ரஹிதாய வத³ந்தஸ்ஸ, உம்மத்தகாதீ³னஞ்ச அனாபத்தி. ஜாதிஆதீ³ஹி அனஞ்ஞாபதே³ஸேன அக்கோஸந்தஸ்ஸ பி⁴க்கு²னோ ஸுத்வா வசனம் பி⁴க்கு²ஸ்ஸ உபஸம்ஹரணம், பியகம்யதாபே⁴தா³தி⁴ப்பாயேஸு அஞ்ஞதரதா, தஸ்ஸ விஜானனாதி இமானேத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானேவாதி.

பேஸுஞ்ஞஸிக்கா²பத³வண்ணனா நிட்டி²தா.

4. பத³ஸோத⁴ம்மஸிக்கா²பத³வண்ணனா

சதுத்தே² பத³ஸோ த⁴ம்மம் வாசேய்யாதி ஸங்கீ³தித்தயம் அனாருள்ஹம்பி ராஜோவாத³திக்கி²ந்த்³ரியசதுபரிவத்தனனந்தோ³பனந்த³குலும்பஸுத்தமக்³க³கதா²தி³த⁴ம்மஞ்ச ஸங்கீ³தித்தயமாருள்ஹம் திபிடகத⁴ம்மஞ்ச பத³ம் பத³ம் வாசேய்ய, பதா³னுபத³அன்வக்க²ரஅனுப்³யஞ்ஜனேஸு ஏகேகம் கோட்டா²ஸந்தி அத்தோ². பாசித்தியந்தி ஏதேஸு பதா³தீ³ஸு பி⁴க்கு²ஞ்ச பி⁴க்கு²னிஞ்ச ட²பேத்வா யம்கஞ்சி கோட்டா²ஸம் அவஸேஸபுக்³க³லேஹி ஸத்³தி⁴ம் ஏகதோ ப⁴ணந்தஸ்ஸ பதா³தி³க³ணனாய பாசித்தியம்.

ஸாவத்தி²யம் ச²ப்³ப³க்³கி³யே பி⁴க்கூ² ஆரப்³ப⁴ பத³ஸோ த⁴ம்மவாசனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம். உபஸம்பன்னே அனுபஸம்பன்னஸஞ்ஞினோ வேமதிகஸ்ஸ வா து³க்கடம். அனுபஸம்பன்னேன ஸத்³தி⁴ம் ஏகதோ உத்³தே³ஸக்³க³ஹணே, ஸஜ்ஜா²யகரணே, தஸ்ஸ ஸந்திகே உத்³தே³ஸக்³க³ஹணே, யேபு⁴ய்யேன பகு³ணக³ந்த²ம் ப⁴ணந்தஸ்ஸ, ஓஸாரேந்தஸ்ஸ ச க²லிதட்டா²னே ‘‘ஏவம் ப⁴ணாஹீ’’தி வசனே ச ஏகதோ ப⁴ணந்தஸ்ஸாபி, உம்மத்தகாதீ³னஞ்ச அனாபத்தி. அனுபஸம்பன்னதா, வுத்தலக்க²ணம் த⁴ம்மம் பத³ஸோ வாசனதா, ஏகதோ ஓஸாபனஞ்சாதி இமானேத்த² தீணி அங்கா³னி. பத³ஸோத⁴ம்மஸமுட்டா²னம், கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், வசீகம்மம், திசித்தம், திவேத³னந்தி.

பத³ஸோத⁴ம்மஸிக்கா²பத³வண்ணனா நிட்டி²தா.

5. பட²மஸஹஸேய்யஸிக்கா²பத³வண்ணனா

பஞ்சமே அனுபஸம்பன்னேனாதி பி⁴க்கு²ம் ட²பேத்வா அந்தமஸோ பாராஜிகவத்து²பூ⁴தேன திரச்சா²னக³தேனாபி. உத்தரிதி³ரத்ததிரத்தந்தி த்³வின்னம் வா திண்ணம் வா ரத்தீனம் உபரி. ஸஹஸேய்யந்தி ஸப்³ப³ச்ச²ன்னபரிச்ச²ன்னே யேபு⁴ய்யேன ச²ன்னபரிச்ச²ன்னே வா ஸேனாஸனே புப்³பா³பரியேன வா ஏகக்க²ணேன வா ஏகதோ நிபஜ்ஜனம். கப்பேய்யாதி வித³ஹேய்ய ஸம்பாதே³ய்ய. தத்த² ச²த³னம் அனாஹச்ச தி³யட்³ட⁴ஹத்து²ப்³பே³தே⁴ன பாகாராதி³னா பரிச்சி²ன்னம்பி ஸப்³ப³பரிச்ச²ன்னமிச்சேவ வேதி³தப்³ப³ம், தஸ்மா இமினா லக்க²ணேன ஸமன்னாக³தோ ஸசேபி ஸத்தபூ⁴மிகோ பாஸாதோ³ ஏகூபசாரோ ஹோதி, ஸதக³ப்³ப⁴ம் வா சதுஸாலம், யோ தத்த² வா அஞ்ஞத்த² வா தாதி³ஸே தேன வா அஞ்ஞேன வா அனுபஸம்பன்னேன ஸஹ திஸ்ஸோ ரத்தியோ ஸயித்வா சதுத்த²தி³வஸே அத்த²ங்க³தே ஸூரியே அனுபஸம்பன்னே நிபன்னே க³ப்³ப⁴த்³வாரம் பிதா⁴ய வா அபிதா⁴ய வா நிபஜ்ஜதி, பட²மனிபன்னோ வா தஸ்மிம் நிபஜ்ஜந்தே ந வுட்டா²தி, தஸ்ஸ உபி⁴ன்னம் உட்ட²ஹித்வா நிபஜ்ஜனப்பயோக³க³ணனாய அனுபஸம்பன்னக³ணனாய ச பாசித்தியம். அயமேத்த² ஸங்கே²போ, வித்தா²ரோ பன ஸமந்தபாஸாதி³காயம் (பாசி. அட்ட². 51) ஸப்³ப³ப்பகாரதோ வுத்தோ.

ஆளவியம் ஸம்ப³ஹுலே பி⁴க்கூ² ஆரப்³ப⁴ அனுபஸம்பன்னேன ஸஹஸேய்யவத்து²ஸ்மிம் பஞ்ஞத்தம், ‘‘உத்தரிதி³ரத்ததிரத்த’’ந்தி அயமேத்த² அனுபஞ்ஞத்தி, ஸாதா⁴ரணபஞ்ஞத்தி, அனாணத்திகம், திகபாசித்தியம், உபஸம்பன்னே அனுபஸம்பன்னஸஞ்ஞினோ வேமதிகஸ்ஸ வா உபத்³த⁴ச்ச²ன்னபரிச்ச²ன்னாதீ³ஸு ச து³க்கடம். ஊனகதி³ரத்ததிரத்தம் வஸந்தஸ்ஸ, ததியாய ரத்தியா புராருணா நிக்க²மித்வா புன வஸந்தஸ்ஸ, ஸப்³ப³ச்ச²ன்னஸப்³பா³பரிச்ச²ன்னாதீ³ஸு வஸந்தஸ்ஸ, இதரஸ்மிம் நிஸின்னே நிபஜ்ஜந்தஸ்ஸ, நிபன்னே வா நிஸீத³ந்தஸ்ஸ, உம்மத்தகாதீ³னஞ்ச அனாபத்தி. பாசித்தியவத்து²கஸேனாஸனம், தத்த² அனுபஸம்பன்னேன ஸஹ நிபஜ்ஜனம், சதுத்த²தி³வஸே ஸூரியத்த²ங்க³மனந்தி இமானேத்த² தீணி அங்கா³னி. ஸமுட்டா²னாதீ³னி ஏளகலோமஸதி³ஸானேவாதி.

பட²மஸஹஸேய்யஸிக்கா²பத³வண்ணனா நிட்டி²தா.

6. து³தியஸஹஸேய்யஸிக்கா²பத³வண்ணனா

ச²ட்டே² மாதுகா³மேனாதி அந்தமஸோ தத³ஹுஜாதாயபி மனுஸ்ஸித்தி²யா. தி³ஸ்ஸமானரூபா பன யக்கி²பேதியோ பண்ட³கோ மேது²னவத்து²பூ⁴தா ச திரச்சா²னித்தி²யோ இத⁴ து³க்கடவத்து²கா ஹோந்தி.

ஸாவத்தி²யம் ஆயஸ்மந்தம் அனுருத்³த⁴த்தே²ரம் ஆரப்³ப⁴ மாதுகா³மேன ஸஹஸேய்யவத்து²ஸ்மிம் பஞ்ஞத்தம், ஸேஸம் அனந்தரஸிக்கா²பதே³ வுத்தனயேனேவ வேதி³தப்³ப³ம் அஞ்ஞத்ர ரத்திபரிச்சே²தா³, தத்ர ஹி சதுத்த²தி³வஸே ஆபத்தி, இத⁴ பன பட²மதி³வஸேபீதி.

து³தியஸஹஸேய்யஸிக்கா²பத³வண்ணனா நிட்டி²தா.

7. த⁴ம்மதே³ஸனாஸிக்கா²பத³வண்ணனா

ஸத்தமே உத்தரிச²ப்பஞ்சவாசாஹீதிஏத்த² ஏகோ கா³தா²பாதோ³ ஏகா வாசாதி ஏவம் ஸப்³ப³த்த² வாசாபமாணம் வேதி³தப்³ப³ம். த⁴ம்மம் தே³ஸேய்யாதி பத³ஸோத⁴ம்மஸிக்கா²பதே³ வுத்தலக்க²ணம் த⁴ம்மம் வா அட்ட²கதா²த⁴ம்மம் வா பா⁴ஸேய்ய. அஞ்ஞத்ர விஞ்ஞுனா புரிஸவிக்³க³ஹேனாதி வினா விஞ்ஞுனா புரிஸேன. மனுஸ்ஸவிக்³க³ஹம் க³ஹேத்வா டி²தேன பன யக்கே²ன வா பேதேன வா திரச்சா²னேன வா ஸத்³தி⁴ம் டி²தாயபி த⁴ம்மம் தே³ஸேதும் ந வட்டதி. பாசித்தியந்தி து³தியானியதே வுத்தலக்க²ணேன மனுஸ்ஸேன வினா விஞ்ஞுமனுஸ்ஸித்தி²யா ச²ன்னம் வாசானம் உபரி பதா³தி³வஸேன த⁴ம்மம் தே³ஸேந்தஸ்ஸ பதா³தி³க³ணனாய, ப³ஹூனம் தே³ஸயதோ மாதுகா³மக³ணனாய ச பாசித்தியம்.

ஸாவத்தி²யம் உதா³யித்தே²ரம் ஆரப்³ப⁴ மாதுகா³மஸ்ஸ த⁴ம்மதே³ஸனாவத்து²ஸ்மிம் பஞ்ஞத்தம், ‘‘அஞ்ஞத்ர விஞ்ஞுனா’’தி அயமேத்த² அனுபஞ்ஞத்தி, ஸாதா⁴ரணபஞ்ஞத்தி, அனாணத்திகம், திகபாசித்தியம், அமாதுகா³மே மாதுகா³மஸஞ்ஞினோ வேமதிகஸ்ஸ வா யக்கி²பேதிபண்ட³கமனுஸ்ஸவிக்³க³ஹதிரச்சா²னித்தீ²னம் தே³ஸேந்தஸ்ஸ ச து³க்கடம். ச²ஹி வாசாஹி, ததோ வா ஓரம் தே³ஸேந்தஸ்ஸ, வுத்தலக்க²ணே வா புரிஸே ஸதி, ஸயம் வா உட்டா²ய, புன நிஸீதி³த்வா மாதுகா³மஸ்ஸ வா உட்ட²ஹித்வா புன நிஸின்னஸ்ஸ, அஞ்ஞஸ்ஸ வா மாதுகா³மஸ்ஸ தே³ஸயதோ, ‘‘தீ³க⁴னிகாயோ நாம ப⁴ந்தே கிமத்தி²யோ’’தி ஏவம் பன புட்டே² ஸப்³ப³ம்பி தீ³க⁴னிகாயம் தே³ஸேந்தஸ்ஸ, அஞ்ஞஸ்ஸத்தா²ய வுச்சமானம் மாதுகா³மே ஸுணந்தே, உம்மத்தகாதீ³னஞ்ச அனாபத்தி. வுத்தலக்க²ணஸ்ஸ த⁴ம்மஸ்ஸ ச²ன்னம் வாசானம் உபரி தே³ஸனா, வுத்தலக்க²ணோ மாதுகா³மோ, இரியாபத²பரிவத்தாபா⁴வோ, கப்பியகாரகஸ்ஸாபா⁴வோ, அபஞ்ஹாவிஸ்ஸஜ்ஜனாதி இமானேத்த² பஞ்ச அங்கா³னி. ஸமுட்டா²னாதீ³னி பத³ஸோத⁴ம்மஸதி³ஸானேவ, கேவலம் இத⁴ கிரியாகிரியம் ஹோதீதி.

த⁴ம்மதே³ஸனாஸிக்கா²பத³வண்ணனா நிட்டி²தா.

8. பூ⁴தாரோசனஸிக்கா²பத³வண்ணனா

அட்ட²மே உத்தரிமனுஸ்ஸத⁴ம்மந்தி சதுத்த²பாராஜிகே வுத்தலக்க²ணம் உத்தரிமனுஸ்ஸானம் ஜா²யீனஞ்சேவ அரியானஞ்ச த⁴ம்மம். பூ⁴தஸ்மிம் பாசித்தியந்தி அத்தனி ஜா²னாதி³த⁴ம்மே ஸதி தம் பி⁴க்கு²ஞ்ச பி⁴க்கு²னிஞ்ச ட²பேத்வா அஞ்ஞஸ்ஸ ஆரோசயதோ பாசித்தியம்.

வேஸாலியம் வக்³கு³முதா³தீரியே பி⁴க்கூ² ஆரப்³ப⁴ தேஸம் பூ⁴தாரோசனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், நிப்பரியாயேன அத்தனி விஜ்ஜமானம் ஜா²னாதி³த⁴ம்மம் ஆரோசேந்தஸ்ஸ ஸசே யஸ்ஸ ஆரோசேதி, ஸோ அனந்தரமேவ ‘‘அயம் ஜா²னலாபீ⁴’’தி வா ‘‘அரியோ’’தி வா யேன கேனசி ஆகாரேன தமத்த²ம் ஜானாதி, பாசித்தியம். நோ சே ஜானாதி, து³க்கடம். பரியாயேன ஆரோசிதம் பன ஜானாது வா, மா வா, து³க்கடமேவ. ததா²ரூபே காரணே ஸதி உபஸம்பன்னஸ்ஸ ஆரோசயதோ, ஆதி³கம்மிகஸ்ஸ ச அனாபத்தி. யஸ்மா பன அரியானம் உம்மத்தகாதி³பா⁴வோ நத்தி², ஜா²னலாபி⁴னோ பன தஸ்மிம் ஸதி ஜா²னா பரிஹாயந்தி, தஸ்மா தே இத⁴ ந க³ஹிதா. உத்தரிமனுஸ்ஸத⁴ம்மஸ்ஸ பூ⁴ததா, அனுபஸம்பன்னஸ்ஸ ஆரோசனம், தங்க²ணவிஜானனா, அனஞ்ஞாபதே³ஸோதி இமானேத்த² சத்தாரி அங்கா³னி. பூ⁴தாரோசனஸமுட்டா²னம், கிரியம், நோஸஞ்ஞாவிமோக்க²ம், அசித்தகம், பண்ணத்திவஜ்ஜம், காயகம்மம், வசீகம்மம், குஸலாப்³யாகதசித்தேஹி த்³விசித்தம், ஸுக²மஜ்ஜ²த்தவேத³னாஹி த்³விவேத³னந்தி.

பூ⁴தாரோசனஸிக்கா²பத³வண்ணனா நிட்டி²தா.

9. து³ட்டு²ல்லாரோசனஸிக்கா²பத³வண்ணனா

நவமே பி⁴க்கு²ஸ்ஸாதி பாராஜிகம் அனஜ்ஜா²பன்னஸ்ஸ. து³ட்டு²ல்லந்தி கிஞ்சாபி த்³வின்னம் ஆபத்திக்க²ந்தா⁴னமேதம் அதி⁴வசனம், இத⁴ பன ஸங்கா⁴தி³ஸேஸமேவ அதி⁴ப்பேதம். அஞ்ஞத்ர பி⁴க்கு²ஸம்முதியாதி யம் ஸங்கோ⁴ அபி⁴ண்ஹாபத்திகஸ்ஸ பி⁴க்கு²னோ ஆயதிம் ஸம்வரத்தா²ய ஆபத்தீனஞ்ச குலானஞ்ச பரியந்தம் கத்வா வா அகத்வா வா திக்க²த்தும் அபலோகேத்வா கதிகம் கரோதி, தம் ட²பேத்வா, அயதா²கதிகாய ‘‘அயம் அஸுசிம் மோசேத்வா ஸங்கா⁴தி³ஸேஸம் ஆபன்னோ’’திஆதி³னா நயேன வத்து²னா ஸத்³தி⁴ம் ஆபத்திம் க⁴டேத்வா ஆரோசேந்தஸ்ஸ பாசித்தியம்.

ஸாவத்தி²யம் ச²ப்³ப³க்³கி³யே பி⁴க்கூ² ஆரப்³ப⁴ து³ட்டு²ல்லாபத்திஆரோசனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம், அது³ட்டு²ல்லாய து³ட்டு²ல்லஸஞ்ஞினோ வேமதிகஸ்ஸ வா து³க்கடம், அவஸேஸே ச² ஆபத்திக்க²ந்தே⁴, அனுபஸம்பன்னஸ்ஸ புரிமபஞ்சஸிக்கா²பத³வீதிக்கமஸங்கா²தம் து³ட்டு²ல்லம் வா இதரம் அது³ட்டு²ல்லம் வா அஜ்ஜா²சாரம் ஆரோசேந்தஸ்ஸாபி து³க்கடமேவ. வத்து²மத்தம் வா ஆபத்திமத்தம் வா ஆரோசேந்தஸ்ஸ, பி⁴க்கு²ஸம்முதிபரிச்சே²த³ம் அனதிக்கமித்வா ஆரோசேந்தஸ்ஸ, உம்மத்தகாதீ³னஞ்ச அனாபத்தி. வுத்தலக்க²ணஸ்ஸ பி⁴க்கு²னோ ஸவத்து²கோ ஸங்கா⁴தி³ஸேஸோ, அனுபஸம்பன்னஸ்ஸ ஆரோசனம், பி⁴க்கு²ஸம்முதியா அபா⁴வோதி இமானேத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, வேத³னா பன இத⁴ து³க்கா²யேவாதி.

து³ட்டு²ல்லாரோசனஸிக்கா²பத³வண்ணனா நிட்டி²தா.

10. பத²வீக²ணனஸிக்கா²பத³வண்ணனா

த³ஸமே பத²விந்தி து³விதா⁴ பத²வீ ஜாதபத²வீ அஜாதபத²வீதி. தத்த² ஜாதபத²வீ ஸுத்³த⁴மிஸ்ஸபுஞ்ஜவஸேன திவிதா⁴, தத்த² ஸுத்³த⁴பத²வீ நாம பகதியா ஸுத்³த⁴பம்ஸு வா ஸுத்³த⁴மத்திகா வா. மிஸ்ஸபத²வீ நாம யத்த² பம்ஸுதோ வா மத்திகாதோ வா பாஸாணஸக்க²ரகத²லமரும்ப³வாலுகாஸு அஞ்ஞதரஸ்ஸ ததியபா⁴கோ³ ஹோதி. புஞ்ஜபத²வீ நாம ‘‘அதிரேகசாதுமாஸம் ஓவட்டோ² பம்ஸுபுஞ்ஜோ வா மத்திகாபுஞ்ஜோ வா’’தி (பாசி. 86) வுத்தம், வுத்தலக்க²ணேன பன மிஸ்ஸகபுஞ்ஜோபி பிட்டி²பாஸாணே டி²தஸுகு²மரஜம்பி ச தே³வே பு²ஸாயந்தே ஸகிம் திந்தம் சதுமாஸச்சயேன திந்தோகாஸோ புஞ்ஜபத²விஸங்க²மேவ க³ச்ச²தி. திவிதா⁴பி சேஸா பத²வீ உத்³த⁴னபத்தபசனாதி³வஸேன வா யதா² ததா² வா அத³ட்³டா⁴ ‘ஜாதபத²வீ’தி வுச்சதி, த³ட்³டா⁴ பன வுத்தப்பமாணதோ அதி⁴கதரபாஸாணாதி³மிஸ்ஸா வா அஜாதபத²வீ நாம ஹோதி, கோ பன வாதோ³ ஸுத்³த⁴பாஸாணாதி³பே⁴தா³ய. தத்த² யா ‘ஜாதபத²வீ’தி வுத்தா, அயம் அகப்பியபத²வீ. யோ பி⁴க்கு² தம் ஏவரூபம் பத²விம் ஸயம் க²ணதி, க²ணனபே⁴த³னவிலேக²னபசனாதீ³ஹி விகோபேதி, தஸ்ஸ பயோக³க³ணனாய பாசித்தியம். யோ பன க²ணாபேதி, வுத்தனயேனேவ விகோபாபேதி, தஸ்ஸ ‘‘இமம் பதே³ஸ’’ந்தி வா ‘‘இமம் பத²வி’’ந்தி வா ஏவம் நியமேத்வா ‘‘க²ண, பி⁴ந்தா³’’திஆதி³னா நயேன ஆணாபேந்தஸ்ஸ ஆணத்தியா து³க்கடம், ஸகிம் ஆணத்தே தி³வஸம்பி க²ணந்தே ஆணாபகஸ்ஸ ஏகமேவ பாசித்தியம், ஸசே இதரோ புனப்புனம் ஆணாபேதி, வாசாய வாசாய பாசித்தியம்.

ஆளவியம் ஆளவகே பி⁴க்கூ² ஆரப்³ப⁴ பத²விக²ணனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, ஸாணத்திகம், பத²வியா வேமதிகஸ்ஸ, அபத²வியா பத²விஸஞ்ஞினோ சேவ வேமதிகஸ்ஸ ச து³க்கடம். ஓகாஸம் அனியமேத்வா ‘‘போக்க²ரணிம் க²ண, ஆவாடம் க²ண, கந்த³ம் க²ணா’’திஆதீ³னி ப⁴ணந்தஸ்ஸ, ஆதபேன ஸுஸ்ஸித்வா ப²லிதகத்³த³மம் வா கோ³கண்டகம் வா ஹேட்டா² பத²வியா அஸம்ப³த்³த⁴ம் பி⁴ஜ்ஜித்வா பதிதனதி³தடம் வா மஹந்தம்பி நங்க³லச்சி²ன்னமத்திகாபிண்ட³ந்திஏவமாதீ³னி ஸப்³ப³ஞ்ச அஜாதபத²விம் விகோபேந்தஸ்ஸ, ‘‘இமஸ்ஸ த²ம்ப⁴ஸ்ஸ ஆவாடம் ஜான, மத்திகம் தே³ஹி, மத்திகம் ஆஹர, பம்ஸுனா மே அத்தோ², மத்திகம் கப்பியம் கரோஹீ’’தி ப⁴ணந்தஸ்ஸ, அஸஞ்சிச்ச ருக்கா²தி³பவட்டனேன பி⁴ந்த³ந்தஸ்ஸ, அஸதியா பாத³ங்கு³ட்ட²காதீ³ஹி விலேக²ந்தஸ்ஸ, ஜாதபத²விபா⁴வம் வா, ‘‘க²ணாமி வா அஹ’’ந்தி அஜானந்தஸ்ஸ, உம்மத்தகாதீ³னஞ்ச அனாபத்தி. ஜாதபத²வீ, பத²விஸஞ்ஞிதா, க²ணனக²ணாபனானம் அஞ்ஞதரந்தி இமானேத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ம் பன பண்ணத்திவஜ்ஜம், திசித்தம், திவேத³னந்தி.

பத²வீக²ணனஸிக்கா²பத³வண்ணனா நிட்டி²தா.

முஸாவாத³வக்³கோ³ பட²மோ.