5. உப்³ப⁴ஜாணுமண்ட³லிகாஸிக்கா²பத³வண்ணனா

அஸாதா⁴ரணேஸு பன சதுன்னம் தாவ பாராஜிகானம் பட²மே அவஸ்ஸுதாதி காயஸம்ஸக்³க³ராகே³ன திந்தா, கிலின்னாதி அத்தோ². து³தியபதே³பி ஏஸேவ நயோ. புரிஸபுக்³க³லஸ்ஸாதி காயஸம்ஸக்³க³ம் ஸமாபஜ்ஜிதும் விஞ்ஞுஸ்ஸ மனுஸ்ஸஜாதிகஸ்ஸ புரிஸஸங்கா²தஸ்ஸ புக்³க³லஸ்ஸ. அத⁴க்க²கந்தி அத்தனோ அக்க²கானம் அதோ⁴. உப்³ப⁴ஜாணுமண்ட³லந்தி ஜாணுமண்ட³லானம் உபரி, ஏத்த² ச உப்³ப⁴கப்பரம்பி உப்³ப⁴ஜாணுமண்ட³லேனேவ ஸங்க³ஹிதம். ஆமஸனந்தி ஆமஜ்ஜனம் பு²ட்டோ²காஸம் அனதிக்கமித்வா தத்தே²வ ஸங்க⁴ட்டனம். பராமஸனந்தி இதோ சிதோ ச ஸஞ்சரணம். க³ஹணந்தி க³ஹிதமத்தம். சு²பனந்தி அஸங்க⁴ட்டேத்வா பு²ட்ட²மத்தம். படிபீளனந்தி அங்கே³ க³ஹேத்வா நிப்பீளனம். ஸாதி³யேய்யாதி யா பி⁴க்கு²னீ அத்தனோ யதா²பரிச்சி²ன்னே காயே புரிஸஸ்ஸ ஏதம் ஆமஸனாதி³ம் ஸாதி³யதி, ஸயம் வா பன தேன காயேன புரிஸஸ்ஸ யம்கிஞ்சி காயப்பதே³ஸம் ஸாத³யமானா சு²பதி, அயம் உப்³ப⁴ஜாணுமண்ட³லிகா நாம பாராஜிகாதி அயமேத்த² ஸங்கே²போ.

‘‘நிதா³னம் புக்³க³லம் வத்து²’’ந்திஆதி³கே (கங்கா². அட்ட². பட²மபாராஜிகவண்ணனா) தேன வித்தா²ரவினிச்ச²யே யஸ்மா ஸப்³பா³னேவ அஸாதா⁴ரணபஞ்ஞத்தியோ ஹோந்தி, தஸ்மா இதோ பட்டா²ய ஸந்திம் அனுபஞ்ஞத்திம் வத்வா ஸாதா⁴ரணபஞ்ஞத்தீதி வா அஸாதா⁴ரணபஞ்ஞத்தீதி வா ந வக்கா²ம, ஆணத்தியம் யத்த² ஆணத்தி நத்தி², தத்த² கிஞ்சி அவத்வா யத்த² அத்தி², தத்தே²வ வக்கா²ம, விபத்திவிசாரணா வுத்தாயேவ.

அவஸேஸம் பன ஸப்³ப³த்த² வத்தப்³ப³ம், தயித³ம் வுச்சதி, இத³ம் தாவ ஸிக்கா²பத³ம் ஸாவத்தி²யம் ஸுந்த³ரீனந்த³ம் ஆரப்³ப⁴ காயஸம்ஸக்³க³ம் ஸமாபஜ்ஜனவத்து²ஸ்மிம் பஞ்ஞத்தம், ஏகதோஅவஸ்ஸுதே யதா²பரிச்சி²ன்னேன காயேன புரிஸஸ்ஸ காயம், உப⁴தோஅவஸ்ஸுதேபி காயேன காயப்படிப³த்³த⁴ம், யதா²பரிச்சி²ன்னகாயப்படிப³த்³தே⁴ன வா அவஸேஸகாயேன வா தஸ்ஸ காயம் ஆமஸந்தியா து²ல்லச்சயம், யக்க²பேதபண்ட³கதிரச்சா²னக³தமனுஸ்ஸவிக்³க³ஹானம் உப⁴தோஅவஸ்ஸுதே யதா²பரிச்சி²ன்னேன காயேன காயம் ஆமஸந்தியாபி து²ல்லச்சயம், ஸசே பன புரிஸஸ்ஸ காயஸம்ஸக்³க³ராகோ³ நத்தி², பாராஜிகக்கே²த்தேபி து²ல்லச்சயமேவ. அவஸேஸே பன காயப்படிப³த்³தே⁴ன காயப்படிப³த்³தா⁴தி³பே⁴தே³, மேது²னராக³கே³ஹஸிதபேமேஸு ச ஸப்³ப³த்த² து³க்கடம். அஸஞ்சிச்ச, அஸ்ஸதியா, அஜானந்தியா, அஸாதி³யந்தியா, உம்மத்திகாதீ³னஞ்ச அனாபத்தி. அங்கா³னி ஸமுட்டா²னாதீ³னி ச பி⁴க்கு²பாதிமோக்கே² காயஸம்ஸக்³கே³ வுத்தனயேனேவ வேதி³தப்³பா³னீதி.

உப்³ப⁴ஜாணுமண்ட³லிகாஸிக்கா²பத³வண்ணனா நிட்டி²தா.