4. அக்³க³ஞ்ஞஸுத்தவண்ணனா

வாஸேட்ட²பா⁴ரத்³வாஜவண்ணனா

111. ஏத்தா²தி ‘‘புப்³பா³ராமே, மிகா³ரமாதுபாஸாதே³’’தி ஏதஸ்மிம் பத³த்³வயே. கோயம் புப்³பா³ராமோ, கத²ஞ்ச புப்³பா³ராமோ, கா ச மிகா³ரமாதா, கத²ஞ்சஸ்ஸா பாஸாதோ³ அஹோஸீதி ஏதஸ்மிம் அந்தோலீனே அனுயோகே³. அயம் இதா³னி வுச்சமானா அனுபுப்³பி³கதா² ஆதி³தோ பட்டா²ய ஸங்கே²பேனேவ அனுபுப்³பி³கதா². பது³முத்தரம் ப⁴க³வந்தம் ஏகம் உபாஸிகம் அக்³கு³பட்டா²யிகட்டா²னே ட²பேந்திம் தி³ஸ்வான தத்த² ஸஞ்ஜாதகா³ரவப³ஹுமானா தமேவத்த²ம் புரக்க²த்வா ப⁴க³வந்தம் நிமந்தேத்வா. மேண்ட³கபுத்தஸ்ஸாதி மேண்ட³கஸேட்டி²புத்தஸ்ஸ. ஸோதாபன்னா அஹோஸி ததா² கதாதி⁴காரத்தா.

மாதுட்டா²னே ட²பேஸி அத்தனோ ஸீலாசாரஸம்பத்தியா க³ருட்டா²னியத்தா. உபயோக³ந்தி தத்த² தத்த² அப்பேதப்³ப³ட்டா²னே அப்பனாவஸேன வினியோக³ம் அக³மம்ஸு. அஞ்ஞேஹி ச வேளுரியலோஹிதங்கமஸாரக³ல்லாதீ³ஹி. ப⁴ஸ்ஸதீதி ஓதரதி. ஸுத்³த⁴பாஸாதோ³வ ந ஸோப⁴தீதி கேவலோ ஏகபாஸாதோ³ ஏவ விஹாரோ ந ஸோப⁴தி. நியூஹானி ப³ஹூனி நீஹரித்வா கத்தப்³ப³ஸேனாஸனானி ‘‘து³வட்³ட⁴கே³ஹானீ’’தி வத³ந்தி. மஜ்ஜே² க³ப்³போ⁴ ஸமந்ததோ அனுபரியாயதோதி ஏவம் த்³விக்க²த்தும் வட்³டே⁴த்வா கதஸேனாஸனானி து³வட்³ட⁴கே³ஹானி. சூளபாஸாதா³தி கு²த்³த³கபாஸாதா³.

உத்தரதே³வீவிஹாரோ நாம நக³ரஸ்ஸ பாசீனத்³வாரஸமீபே கதவிஹாரோ.

தித்தி²யலிங்க³ஸ்ஸ அக்³க³ஹிதத்தா நேவ தித்தி²யபரிவாஸம் வஸந்தி. அனுபஸம்பன்னபா⁴வதோ ஆபத்தியா ஆபன்னாய அபா⁴வதோ ந ஆபத்திபரிவாஸம் வஸந்தி. பி⁴க்கு²பா⁴வந்தி உபஸம்பத³ம். தேவிஜ்ஜஸுத்தந்தி இமஸ்மிம் தீ³க⁴னிகாயே தேவிஜ்ஜஸுத்தம் ஸுத்வா.

113. அனுவத்தமானா சங்கமிம்ஸு அனனுசங்கமனே யதா²தி⁴ப்பேதஸ்ஸ அத்த²ஸ்ஸ புச்ச²னாதீ³னம் அஸக்குணேய்யத்தா. தேஸந்தி தேஸம் த்³வின்னம். தேனாஹ ‘‘பண்டி³ததரோ’’தி. அத்தா²தி ப⁴வத்த². குலஸம்பன்னாதி ஸம்பன்னகுலா உதி³தோதி³தே ப்³ராஹ்மணகுலே உப்பன்னா. ப்³ராஹ்மணகுலாதி கேனசி பாரிஜுஞ்ஞேன அனுபத்³து³தா ஏவ ப்³ராஹ்மணகுலா. தேனாஹ ‘‘போ⁴கா³தி³ஸம்பன்ன’’ந்திஆதி³. இமே ப்³ராஹ்மணா உச்சா ஹுத்வா ‘‘இமம் வஸலம் பப்³ப³ஜ்ஜம் பப்³ப³ஜிம்ஸூ’’திஆதி³னா ஜாதிஆதீ³னி க⁴ட்டேந்தா அக்கோஸந்தி. பரிபா⁴ஸந்தீதி பரிப⁴வித்வா பா⁴ஸந்தி. அத்தனோ அனுரூபாயாதி அத்தனோ அஜ்ஜா²ஸயஸ்ஸ அனுரூபாய. அந்தரந்தரா விச்சி²ஜ்ஜ பவத்தியமானா பரிபா⁴ஸா பரிபுண்ணா நாம ந ஹோதி க²ண்ட³பா⁴வதோ, தப்³பி³பரியாயதோ பரிபுண்ணா நாம ஹோதீதி ஆஹ ‘‘அந்தரா’’திஆதி³.

அப்பதிட்ட²தாயாதி அபஸ்ஸயரஹிதத்தா. விபி⁴ன்னோதி வினட்டோ².

இதரே தயோ வண்ணாதி க²த்தியாத³யோ வண்ணா ஹீனா. நனு க²த்தியாவ ஸேட்டா² வண்ணா யதா² பு³த்³தா⁴ ஏதரஹி க²த்தியகுலே ஏவ உப்பன்னாதி? ஸச்சமேதம், தே பன அத்தனோ மிச்சா²பி⁴மானேன, மிச்சா²கா³ஹேன ச ‘‘ப்³ராஹ்மணோவ ஸேட்டோ² வண்ணோ’’தி வத³ந்தி, தம் தேஸம் வசனமத்தம். ‘‘ஸுஜ்ஜ²ந்தீதி ஸுத்³தா⁴ ஹோந்தி, ந நிந்த³ம் க³ரஹம் பாபுணந்தீ’’தி வத³ந்தி. ஸுஜ்ஜ²ந்தி வா ஸம்ஸாரதோ ஸுஜ்ஜ²ந்தி, ந ஸேஸா வண்ணா அஸுக்கஜாதிகத்தா, மந்தஜ்ஜே²னாபா⁴வதோ சாதி. ப்³ரஹ்முனோ முக²தோ ஜாதா வேத³வசனதோ ஜாதாதி முக²தோ ஜாதா. ததோ ஏவ ப்³ரஹ்முனோ மஹாப்³ரஹ்முனோ வேத³வசனதோ விஜாதாதி ப்³ரஹ்மஜா. தேன து³விதே⁴னாபி நிம்மிதாதி ப்³ரஹ்மனிம்மிதா. வேத³வேத³ங்கா³தி³ப்³ரஹ்மதா³யஜ்ஜம் அரஹந்தீதி ப்³ரஹ்மதா³யாதா³. முண்ட³கே ஸமணகேதி ஏத்த² க-காரோ க³ரஹாயந்தி ஆஹ ‘‘நிந்த³ந்தா ஜிகு³ச்ச²ந்தா வத³ந்தீ’’தி. இப்³பே⁴தி ஸுத்³தே³, தே பன க⁴ரப³ந்த⁴னேன ப³த்³தா⁴ நிஹீனதராதி ஆஹ ‘‘க³ஹபதிகே’’தி. கண்ஹேதி கண்ஹஜாதிகே. ப³ந்த⁴னட்டே²ன ப³ந்து⁴, கஸ்ஸ பன ப³ந்தூ⁴தி ஆஹ ‘‘மாரஸ்ஸ ப³ந்து⁴பூ⁴தே’’தி. பாதா³பச்சேதி பாத³தோ ஜாதாபச்சே. அயம் கிர ப்³ராஹ்மணானம் லத்³தி⁴ ‘‘ப்³ராஹ்மணா ப்³ரஹ்முனோ முக²தோ ஜாதா, க²த்தியா உரதோ, ஊரூஹி வேஸ்ஸா, பாத³தோ ஸுத்³தா³’’தி.

114. யஸ்மா பட²மகப்பிககாலே சதுவண்ணவவத்தா²னம் நத்தி², ஸப்³பே³வ ஸத்தா ஏகஸதி³ஸா, அபரபா⁴கே³ பன தேஸம் பயோக³பே⁴த³வஸேன அஹோஸி, தஸ்மா வுத்தம் ‘‘போராணம்…பே… அஜானந்தா’’தி. லத்³தி⁴பி⁴ந்த³னத்தா²யாதி ‘‘ப்³ராஹ்மணா ப்³ரஹ்முனோ புத்தா ஓரஸா முக²தோ ஜாதா’’தி ஏவம் பவத்தாய லத்³தி⁴யா வினிவேட²னத்த²ம். புத்தப்படிலாப⁴த்தா²யாதி ‘‘ஏவம் மயம் பேத்திகம் இணம் ஸோதே⁴ஸ்ஸாமா’’தி லத்³தி⁴யம் ட²த்வா புத்தப்படிலாபா⁴ய. அயஞ்ஹேத்த² த⁴ம்மிகானம் ப்³ராஹ்மணானம் அஜ்ஜா²ஸயோ. ஸஞ்ஜாதபுப்பா²தி ரஜஸ்ஸலா. இத்தீ²னஞ்ஹி குமாரிபா⁴வப்பத்திதோ பட்டா²ய பச்சி²மவயதோ ஓரம் அஸதி விப³ந்தே⁴ அட்ட²மே அட்ட²மே ஸத்தாஹே க³ப்³பா⁴ஸயஸஞ்ஞிதே ததியே ஆவத்தே கதிபயா லோஹிதபீளகா ஸண்ட²ஹித்வா அக்³க³ஹிதபுப்பா² ஏவ பி⁴ஜ்ஜந்தி, ததோ லோஹிதம் பக்³க⁴ரதி, தத்த² உதுஸமஞ்ஞா, புப்ப²ஸமஞ்ஞா ச. நேஸந்தி ப்³ராஹ்மணானம். ஸச்சவசனம் ஸியாதி ‘‘ப்³ரஹ்முனோ புத்தா’’திஆதி³வசனம் ஸச்சம் யதி³ ஸியா, ப்³ராஹ்மணீனம்…பே… முக²ம் ப⁴வேய்ய, ந சேதம் அத்தி².

சதுவண்ணஸுத்³தி⁴வண்ணனா

115. முக²ச்சே²த³கவாத³ந்தி ‘‘ப்³ராஹ்மணா மஹாப்³ரஹ்முனோ முக²தோ ஜாதா’’தி வாத³ஸ்ஸ சே²த³கவாத³ம். அரியபா⁴வே அஸமத்தா²தி அனரியபா⁴வாவஹா. பகதிகாளகாதி ஸபா⁴வேனேவ ந ஸுத்³தா⁴. கண்ஹோதி கிலிட்டோ² உபதாபகோ. தேனாஹ ‘‘து³க்கோ²தி அத்தோ²’’தி.

ஸுக்கபா⁴வோ நாம பரிஸுத்³த⁴தாதி ஆஹ ‘‘நிக்கிலேஸபா⁴வேன பண்ட³ரா’’தி. ஸுக்கோதி ந கிலிட்டோ² அனுபதாபகோதி வுத்தம் ‘‘ஸுகோ²தி அத்தோ²’’தி.

116. உப⁴யவோகிண்ணேதி வசனவிபல்லாஸேன வுத்தந்தி ஆஹ ‘‘உப⁴யேஸு வோகிண்ணேஸூ’’தி. மிஸ்ஸீபூ⁴தேஸூதி ‘‘கதா³சி கண்ஹா த⁴ம்மா, கதா³சி ஸுக்கா த⁴ம்மா’’தி ஏவம் ஏகஸ்மிம் ஸந்தானே, ஏகஸ்மிம்யேவ ச அத்தபா⁴வே பவத்தியா மிஸ்ஸீபூ⁴தேஸு, ந பன ஏகஜ்ஜ²ம் பவத்தியா. ஏத்தா²தி அனந்தரவுத்தத⁴ம்மாவ அன்வாதி⁴ட்டா²தி ஆஹ ‘‘கண்ஹஸுக்கத⁴ம்மேஸூ’’தி. யஸ்மா ச தே ப்³ராஹ்மணா ந சேவ தே த⁴ம்மே அதிக்கந்தா, யாய ச படிபதா³ய அதிக்கமேய்யும், ஸாபி தேஸம் படிபதா³ நத்தி², தஸ்மா வுத்தம் ‘‘வத்தமானாபீ’’தி. நானுஜானந்தி அயதா²பு⁴ச்சவாத³பா⁴வதோ. அனுஜானனஞ்ச நாம அப்³ப⁴னுமோத³னந்தி தத³பா⁴வம் த³ஸ்ஸேந்தேன ‘‘நானுமோத³ந்தி, ந பஸம்ஸந்தீ’’தி வுத்தம். சதுன்னம் வண்ணானந்தி நித்³தா⁴ரணே ஸாமிவசனம். தேஸந்தி பன ஸம்ப³ந்தே⁴பி வா ஸாமிவசனம். தே ச ப்³ராஹ்மணா ந ஏவரூபா ந ஏதி³ஸா, யாதி³ஸோ அரஹா ஏகதே³ஸேனாபி தேன தேஸம் ஸதி³ஸதாபா⁴வதோ, தஸ்மா தேன காரணேன நேஸம் ப்³ராஹ்மணானம் ‘‘ப்³ராஹ்மணோவ ஸேட்டோ² வண்ணோ’’தி வாத³ம் விஞ்ஞூ யதா²பூ⁴தவாதி³னோ பு³த்³தா⁴த³யோ அரியா நானுஜானந்தி.

ஆரகத்தாதீ³ஹீதி ஏத்த² கிலேஸானம் ஆரகத்தா பஹீனபா⁴வதோ தூ³ரத்தா அரஹம், கிலேஸாரீனம் ஹதத்தா அரஹம், ஸம்ஸாரசக்கஸ்ஸ அரானம் ஹதத்தா அரஹம், பச்சயாதீ³னம் அரஹத்தா அரஹம், பாபகரணே ரஹாபா⁴வேன அரஹந்தி ஏவமத்தோ² வேதி³தப்³போ³. அயமேத்த² ஸங்கே²போ, வித்தா²ரோ பன விஸுத்³தி⁴மக்³கே³ (விஸுத்³தி⁴. 1.125 ஆத³யோ), தம் ஸம்வண்ணனாஸு (விஸுத்³தி⁴. டீ. 1.124) ச வுத்தனயேன வேதி³தப்³போ³. ஆஸவானம் கீ²ணத்தாதி சதுன்னம்பி ஆஸவானம் அனவஸேஸதோ பஹீனத்தா. ப்³ரஹ்மசரியவாஸந்தி மக்³க³ப்³ரஹ்மசரியவாஸம். தஸ்ஸ வாஸஸ்ஸ பரியோஸிதத்தா வுத்த²வாஸோ, த³ஸன்னம்பி வா அரியவாஸானம் வுத்த²த்தா வுத்த²வாஸோ. வுத்தஞ்ஹேதம் –

‘‘த³ஸயிமே, பி⁴க்க²வே, அரியாவாஸா, யத³ரியா ஆவஸிம்ஸு வா ஆவஸந்தி வா ஆவஸிஸ்ஸந்தி வா. கதமே த³ஸ? இத⁴, பி⁴க்க²வே, பி⁴க்கு² பஞ்சங்க³விப்பஹீனோ ஹோதி ச²ளங்க³ஸமன்னாக³தோ ஏகாரக்கோ² சதுராபஸ்ஸேனோ பனுண்ணபச்சேகஸச்சோ ஸமவயஸடே²ஸனோ அனாவிலஸங்கப்போ பஸ்ஸத்³த⁴காயஸங்கா²ரோ ஸுவிமுத்தசித்தோ ஸுவிமுத்தபஞ்ஞோ. இமே கோ², பி⁴க்க²வே, த³ஸ அரியாவாஸா’’தி (அ. நி. 10.19).

வுஸ்ஸதீதி வா வுஸிதம், அரியமக்³கோ³, அரியப²லஞ்ச, தம் ஏதஸ்ஸ அத்தீ²தி அதிஸயவசனிச்சா²வஸேன அரஹா ‘‘வுஸிதவா’’தி வுத்தோ. கரணீயம் நாம பரிஞ்ஞாபஹானஸச்சி²கிரியாபா⁴வனா து³க்க²ஸ்ஸந்தம் காதுகாமேஹி ஏகந்ததோ கத்தப்³ப³த்தா, தம் பன யஸ்மா சதூஹி மக்³கே³ஹி பச்சேகம் சதூஸு ஸச்சேஸு காதப்³ப³ம் கதம், தஸ்மா வுத்தம் ‘‘சதூஹி…பே… கதகரணீயோ’’தி. ஓஸீதா³பனட்டே²ன பா⁴ரா வியாதி பா⁴ரா, கிலேஸா, க²ந்தா⁴ ச. வுத்தஞ்ஹி ‘‘பா⁴ரா ஹவே பஞ்சக்க²ந்தா⁴’’தி (ஸம். நி. 3.22) ஓஹாரிதோதி அபனீதோ. ஸகோ அத்தோ² ஸத³த்தோ²தி ஏத்த² த³-காரோ பத³ஸந்தி⁴கரோ. காமம் தி³ட்டி²ஆத³யோபி ஸம்யோஜனானி ஏவ, ததா²பி தண்ஹாய ப⁴வஸம்யோஜனட்டோ² ஸாதிஸயோ. யதா²ஹ ‘‘அவிஜ்ஜானீவரணானம் ஸத்தானம் தண்ஹாஸம்யோஜனான’’ந்தி. (ஸம். நி. 2.125, 126, 127, 132, 134, 136, 142; 3.5.520; கதா². 75) ததோ ஸா ஏவ ஸுத்தே (தீ³. நி. 2.400; ம. நி. 1.93, 133; 3.373; ஸம். நி. 3.1081; படி. ம. 1.34 ஆத³யோ) ஸமுத³யஸச்சபா⁴வேன வுத்தா, தஸ்மா வுத்தம் ‘‘ப⁴வஸம்யோஜனம் வுச்சதி தண்ஹா’’தி. ஸம்மத³ஞ்ஞா விமுத்தோதி ஸம்மா அஞ்ஞாய ஜானனபூ⁴தாய அக்³க³மக்³க³பஞ்ஞாய ஸம்மா யதா²பூ⁴தம் யம் யதா² ஜானிதப்³ப³ம், தம் ததா² ஜானித்வா விமுத்தோ. இமஸ்மிம் லோகேதி இமஸ்மிம் ஸத்தலோகே. இத⁴த்தபா⁴வேதி இமஸ்மிம் அத்தபா⁴வே, பரத்தபா⁴வேதி பரஸ்மிம் அத்தபா⁴வே, இத⁴லோகே, பரலோகே சாதி அத்தோ².

117. அந்தரவிரஹிதாதி விபா⁴க³விரஹிதா. தேனாஹ ‘‘அத்தனோ குலேன ஸதி³ஸா’’தி. அனுயந்தீதி அனுயந்தா, அனுயந்தா ஏவ ஆனுயந்தா, அனுவத்தகா. தேனாஹ ‘‘வஸவத்தினோ’’தி.

118. நிவிட்டா²தி ஸத்³தே⁴ய்யவத்து²ஸ்மிம் அனுபவிஸனவஸேன நிவிட்டா². ததோ ஏவ தஸ்மிம் அதி⁴கம் நிவிஸனதோ அபி⁴னிவிட்டா². அசலட்டி²தாதி அசலபா⁴வே டி²தா.

யந்தி யம் கதே²தப்³ப³த⁴ம்மம் அனுபதா⁴ரேத்வா, தத³த்த²ஞ்ச அப்பச்சக்க²ம் கத்வா கத²னம், ஏதம் அட்டா²னம் அகாரணம் தஸ்ஸ போ³தி⁴மூலேயேவ ஸமுச்சி²ன்னத்தா. விச்சி²ந்த³ஜனனத்த²ந்தி ரதனத்தயஸத்³தா⁴ய விச்சி²ந்த³ஸ்ஸ உப்பாத³னத்த²ம், அஞ்ஞத²த்தாயாதி அத்தோ². ஸோதி மாரோ. முஸாவாத³ம் காதும் நாஸக்கீ²தி ஆக³தப²லஸ்ஸ அரியஸாவகஸ்ஸ புரதோ முஸா வத்தும் ந விஸஹி, தஸ்மா ஆம மாரோஸ்மீதி படிஜானி. ஸிலாபத²வியந்தி ரதனமயஸிலாபத²வியம். ஸினேரும் கிர பரிவாரேத்வா டி²தோ பூ⁴மிப்பதே³ஸோ ஸத்தரதனமயோ, ‘‘ஸுவண்ணமயோ’’தி கேசி, ஸா வித்தா²ரதோ, உப்³பே³த⁴தோ அனேகயோஜனஸஹஸ்ஸபரிமாணா அதிவிய நிச்சலா. கிம் த்வம் ஏத்தா²தி கிம் காரணா த்வம் ஏத்த². ‘‘டி²தோ’’தி அச்ச²ரம் பஹரி. டா²தும் அஸக்கோந்தோதி அரியஸாவகஸ்ஸ புரதோ டா²தும் அஸக்கோந்தோ. அயஞ்ஹி அரியத⁴ம்மாதி⁴க³மஸ்ஸ ஆனுபா⁴வோ, யம் மாரோபி நாம மஹானுபா⁴வோ உஜுகம் படிப்பரிதும் ந ஸக்கோதி.

மக்³கோ³ ஏவ மூலம் மக்³க³மூலம், தஸ்ஸ. ஸஞ்ஜாதத்தா உப்பன்னத்தா. தேன மக்³க³மூலேன பதிட்டி²தஸந்தானே லத்³த⁴பதிட்டா². ப⁴க³வதோ தே³ஸனாத⁴ம்மம் நிஸ்ஸாய அரியாய ஜாதியா ஜாதோ ‘‘ப⁴க³வந்தம் நிஸ்ஸாய அரியபூ⁴மியம் ஜாதோ’’தி வுத்தோ. ‘‘உரே வஸித்வா’’தி இத³ம் த⁴ம்மகோ⁴ஸஸ்ஸ உரதோ ஸமுட்டா²னதாய வுத்தம். உரே வாயாமஜனிதாபி⁴ஜாதிதாய வா ஓரஸோ. முக²தோ ஜாதேன ஜாதோ ‘‘முக²தோ ஜாதோ’’தி வுத்தோ. காரணகாரணேபி ஹி காரணே விய வோஹாரோ ஹோதி ‘‘திணேஹி ப⁴த்தம் ஸித்³த⁴’’ந்தி. கேசி பன ‘‘விமோக்க²முக²ஸ்ஸ வஸேன ஜாதத்தா முக²தோ ஜாதோ’’தி வத³ந்தி, தத்தா²பி வுத்தனயேனேவ அத்தோ² வேதி³தப்³போ³. புரிமேனத்தே²ன யோனிஜோ, ஸேத³ஜோ, முக²ஜோதி தீஸு ஸம்ப³ந்தே⁴ஸு முக²ஜேன ஸம்ப³ந்தே⁴ன ப⁴க³வதோ புத்தபா⁴வோ விபா⁴விதோ. அத்த²த்³வயேனாபி த⁴ம்மஜபா⁴வோயேவ தீ³பிதோ. அரியத⁴ம்மப்பத்திதோ லத்³த⁴விஸேஸோ ஹுத்வா பவத்தோ தது³த்தரகாலிகோ க²ந்த⁴ஸந்தானோ ‘‘அரியத⁴ம்மதோ ஜாதோ’’தி வேதி³தப்³போ³, அரியத⁴ம்மம் வா மக்³க³ப²லம் நிஸ்ஸாய, உபனிஸ்ஸாய ச ஜாதோ ஸப்³போ³பி த⁴ம்மப்பப³ந்தோ⁴ ‘‘அரியத⁴ம்மதோ ஜாதோ’’தி க³ஹேதப்³போ³. தேஸம் பன அரியத⁴ம்மானம் அபரியோஸிதகிச்சதாய அரியபா⁴வேன அபி⁴னிப்³ப³த்திமத்தம் உபாதா³ய ‘‘அரியத⁴ம்மதோ ஜாதத்தா’’தி வுத்தம். பரியோஸிதகிச்சதாய ததா² நிப்³ப³த்திபாரிபூரிம் உபாதா³ய ‘‘நிம்மிதத்தா’’தி வுத்தம், யதோ ‘‘த⁴ம்மஜோ த⁴ம்மனிம்மிதோ’’தி வுத்தம். ‘‘நவலோகுத்தரத⁴ம்மதா³யம் ஆதி³யதீதி த⁴ம்மதா³யாதோ³’’ திபி பாடோ². அஸ்ஸாதி ‘‘ப⁴க³வதோம்ஹிபுத்தோ’’திஆதி³னா வுத்தஸ்ஸ வாக்யஸ்ஸ. அத்த²ம் த³ஸ்ஸேந்தோதி பா⁴வத்த²ம் பகாஸேந்தோ. ததா²க³தஸ்ஸ அனஞ்ஞஸாதா⁴ரணஸீலாதி³த⁴ம்மக்க²ந்த⁴ஸ்ஸ ஸமூஹனிவேஸவஸேன த⁴ம்மகாயதாய ந கிஞ்சி வத்தப்³ப³ம் அத்தி², ஸத்து²ட்டா²னியஸ்ஸ பன த⁴ம்மகாயதம் த³ஸ்ஸேதும் ‘‘கஸ்மா ததா²க³தோ த⁴ம்மகாயோதி வுத்தோ’’தி ஸயமேவ புச்ச²ம் ஸமுட்டா²பேத்வா ‘‘ததா²க³தோ ஹீ’’திஆதி³னா தமத்த²ம் விஸ்ஸஜ்ஜேதி. ஹத³யேன சிந்தேத்வாதி ‘‘இமம் த⁴ம்மம் இமஸ்ஸ தே³ஸேஸ்ஸாமீ’’தி தஸ்ஸ உபக³தஸ்ஸ வேனேய்யஜனஸ்ஸ போ³த⁴னத்த²ம் சித்தேன சிந்தேத்வா. வாசாய அபி⁴னீஹரீதி ஸத்³த⁴ம்மதே³ஸனாவாசாய கரவீகருதமஞ்ஜுனா ப்³ரஹ்மஸ்ஸரேன வேனேய்யஸந்தானாபி⁴முக²ம் தத³ஜ்ஜா²ஸயானுரூபம் ஹிதமத்த²ம் நீஹரி உபனேஸி. தேனாதி தேன காரணேன ஏவம்ஸத்³த⁴ம்மாதி⁴முத்திபா⁴வேன. அஸ்ஸாதி ததா²க³தஸ்ஸ. த⁴ம்மமயத்தாதி த⁴ம்மபூ⁴தத்தா. இதா⁴தி⁴ப்பேதத⁴ம்மோ ஸேட்ட²ட்டே²ன ப்³ரஹ்மபூ⁴தோதி ஆஹ ‘‘த⁴ம்மகாயத்தா ஏவ ப்³ரஹ்மகாயோ’’தி. ஸப்³ப³ஸோ அத⁴ம்மம் பஜஹித்வா அனவஸேஸதோ த⁴ம்மோ ஏவ பூ⁴தோதி த⁴ம்மபூ⁴தோ. ததா²ரூபோ ச யஸ்மா ஸபா⁴வதோ த⁴ம்மோ ஏவாதி வத்தப்³ப³தம் அரஹதீதி ஆஹ ‘‘த⁴ம்மஸபா⁴வோ’’தி.

119. ஸேட்ட²ச்சே²த³கவாத³ந்தி ‘‘ப்³ராஹ்மணோவ ஸேட்டோ² வண்ணோ’’தி (தீ³. நி. 3.116) ஏவம் வுத்தஸேட்ட²பா⁴வச்சே²த³கவாத³ம். அபரேனபி நயேனாதி யதா²வுத்தஸேட்ட²ச்சே²த³கவாத³தோ அபரேனபி போராணகலோகுப்பத்தித³ஸ்ஸனனயேன. ஸேட்ட²ச்சே²த³…பே… த³ஸ்ஸேதுந்தி ஸோபி ஹி ‘‘ப்³ராஹ்மணோவ ஸேட்டோ² வண்ணோ, ஹீனா அஞ்ஞே வண்ணா’’தி, ‘‘ப்³ராஹ்மணா ப்³ரஹ்முனோ புத்தா ஓரஸா முக²தோ ஜாதா ப்³ரஹ்மஜா’’தி (தீ³. நி. 3.114) ச ஏவம் பவத்தாய மிச்சா²தி³ட்டி²யா வினிவேட²னோ ஜாதிப்³ராஹ்மணானம் ஸேட்ட²பா⁴வஸ்ஸ சே²த³னதோ ஸேட்ட²ச்சே²த³னவாதோ³ நாம ஹோதீதி த³ஸ்ஸேதுந்தி அத்தோ².

இத்த²பா⁴வந்தி இமம் பகாரதம் மனுஸ்ஸபா⁴வம். ஸாமஞ்ஞஜோதனா ஹி விஸேஸே அவதிட்ட²தி, பகரணவஸேன வா அயமத்தோ² அவச்சி²ன்னோ த³ட்ட²ப்³போ³. மனேனேவ நிப்³ப³த்தாதி பா³ஹிரபச்சயேன வினா கேவலம் உபசாரஜா²னமனஸாவ நிப்³ப³த்தா. யாய உபசாரஜ்ஜா²னசேதனாய தே தத்த² நிப்³ப³த்தா, நீவரணவிக்க²ம்ப⁴னாதி³னா உளாரோ தஸ்ஸா பவத்திவிஸேஸோ, தஸ்மா ஜா²னப²லகப்போ தஸ்ஸா ப²லவிஸேஸோதி ஆஹ ‘‘ப்³ரஹ்மலோகே வியா’’திஆதி³. ‘‘ஸயம்பபா⁴’’தி பதா³னம் தத்த² ஸூரியாலோகாதீ³ஹி வினா அந்த⁴காரம் வித⁴மந்தா ஸயமேவ பபா⁴ஸந்தீதி ஸயம்பபா⁴, அந்தலிக்கே² ஆகாஸே சரந்தீதி அந்தலிக்க²சரா, தத³ஞ்ஞகாமாவசரஸத்தானம் விய ஸரீரஸ்ஸ விசரணட்டா²னஸ்ஸ அஸுப⁴தாபா⁴வதோ ஸுப⁴ம், ஸுபே⁴வ திட்ட²ந்தீதி ஸுப⁴ட்டா²யினோதி அத்தோ² வேதி³தப்³போ³.

ரஸபத²விபாதுபா⁴வவண்ணனா

120. ஸப்³ப³ம் சக்கவாளந்தி அனவஸேஸம் கோடிஸதஸஹஸ்ஸம் சக்கவாளம். ஸமதனீதி ஸஞ்சா²தே³ந்தீ விப்ப²ரி, ஸா பன தஸ்மிம் உத³கே பதிட்டி²தா அஹோஸீதி ஆஹ ‘‘பதிட்ட²ஹீ’’தி. வண்ணேன ஸம்பன்னாதி ஸம்பன்னவண்ணா. மக்கி²கண்ட³கரஹிதந்தி மக்கி²காஹி ச தாஸம் அண்ட³கேஹி ச ரஹிதம்.

அதீதானந்தரேபி கப்பே லோலோயேவ. கஸ்மா? ஏவம் சிரபரிசிதலோலதாவஸேன ஸப்³ப³பட²மம் ததா² அகாஸீதி த³ஸ்ஸேதி. கிமேவித³ந்தி ‘‘வண்ணதோ, க³ந்த⁴தோ ச தாவ ஞாதம், ரஸதோ பன கிமேவித³ம் ப⁴விஸ்ஸதீ’’தி ஸம்ஸயஜாதோ வத³தி. திட்ட²தீதி அட்டா²ஸி.

சந்தி³மஸூரியாதி³பாதுபா⁴வவண்ணனா

121. ஆலுப்பகாரகந்தி ஏத்த² ஆலோபபரியாயோ ஆலுப்ப-ஸத்³தோ³தி ஆஹ ‘‘ஆலோபம் கத்வா’’தி. பச்சக்க²பூ⁴தானம்பி சந்தி³மஸூரியானம் பவத்தியம் லோகியானம் ஸம்மோஹோ ஹோதி, தம் வித⁴மிதும் ‘‘கோ பன தேஸ’’ந்திஆதி³னா அட்ட² பஞ்ஹாவிஸ்ஸஜ்ஜனானி க³ஹிதானி. தத்த² தேஸந்தி சந்தி³மஸூரியானம். கஸ்மிந்தி கஸ்மிம் டா²னே. ‘‘கோ உபரீ’’தி ஏதேனேவ கோ ஹேட்டா²தி அயமத்தோ² வுத்தோயேவ. ததா² ‘‘கோ ஸீக⁴ம் க³ச்ச²தீ’’தி இமினா கோ ஸணிகம் க³ச்ச²தீதி அயம்பி அத்தோ² வுத்தோயேவ. வீதி²யோதி க³மனவீதி²யோ. ஏகதோதி ஏகஸ்மிம் க²ணே பாதுப⁴வந்தி. ஸூரியமண்ட³லே பன அத்த²ங்க³தே சந்த³மண்ட³லம் பஞ்ஞாயித்த². ச²ந்த³ம் ஞத்வா வாதி ருசிம் ஞத்வா விய.

உப⁴யந்தி அந்தோ, ப³ஹி ச.

உஜுகந்தி ஆயாமதோ, வித்தா²ரதோ, உப்³பே³த⁴தோ ச. பரிமண்ட³லதோதி பரிக்கே²பதோ.

உஜுகம் ஸணிகம் க³ச்ச²தி அமாவாஸியம் ஸூரியேன ஸத்³தி⁴ம் க³ச்ச²ந்தோ தி³வஸே தி³வஸே தோ²கம் தோ²கம் ஓஹீயந்தோ புண்ணமாஸியம் உபட்³ட⁴மக்³க³மேவ ஓஹீயனதோ. திரியம் ஸீக⁴ம் க³ச்ச²தி ஏகஸ்மிம்பி மாஸே கதா³சி த³க்கி²ணதோ, கதா³சி உத்தரதோ த³ஸ்ஸனதோ. ‘‘த்³வீஸு பஸ்ஸேஸூ’’தி இத³ம் யேபு⁴ய்யவஸேன வுத்தம். சந்த³ஸ்ஸ புரதோ, பச்ச²தோ, ஸமஞ்ச தாரகா க³ச்ச²ந்தியேவ. அத்தனோ டா²னந்தி அத்தனோ க³மனட்டா²னம். ந விஜஹந்தி அத்தனோ வீதி²யாவ க³ச்ச²னதோ. ஸூரியஸ்ஸ உஜுகம் க³மனஸ்ஸ ஸீக⁴தா சந்த³ஸ்ஸ க³மனம் உபாதா³ய வேதி³தப்³பா³. திரியம் க³மனம் த³க்கி²ணதி³ஸதோ உத்தரதி³ஸாய, உத்தரதி³ஸதோ ச த³க்கி²ணதி³ஸாய க³மனம் த³ந்த⁴ம் ச²ஹி ச²ஹி மாஸேஹி இஜ்ஜ²னதோ. ஸோதி ஸூரியோ. காளபக்க²உபோஸத²தோதி காளபக்கே² உபோஸதே² சந்தே³ன ஸஹேவ க³ந்த்வா ததோ பரம். பாடிபத³தி³வஸேதி ஸுக்கபக்க²பாடிபத³தி³வஸே. ஓஹாய க³ச்ச²தி அத்தனோ ஸீக⁴கா³மிதாய, தஸ்ஸ ச த³ந்த⁴கா³மிதாய. லேகா² விய பஞ்ஞாயதி பச்சி²மதி³ஸாயம். யாவ உபோஸத²தி³வஸாதி யாவ ஸுக்கபக்க²உபோஸத²தி³வஸா. ‘‘சந்தோ³ அனுக்கமேன வட்³டி⁴த்வா’’தி இத³ம் உபரிபா⁴க³தோ பதிதஸூரியாலோகதாய ஹேட்ட²தோ பவத்தாய ஸூரியஸ்ஸ தூ³ரபா⁴வேன தி³வஸே தி³வஸே அனுக்கமேன பரிஹாயமானாய அத்தனோ சா²யாய வஸேன அனுக்கமேன சந்த³மண்ட³லப்பதே³ஸஸ்ஸ வட்³ட⁴மானஸ்ஸ விய தி³ஸ்ஸமானதாய வுத்தம், தஸ்மா அனுக்கமேன வட்³டி⁴த்வா விய. உபோஸத²தி³வஸே புண்ணமாயம் பரிபுண்ணோ ஹோதி, பரிபுண்ணமண்ட³லோ ஹுத்வா தி³ஸ்ஸதீதி அத்தோ². தா⁴வித்வா க³ண்ஹாதி சந்த³ஸ்ஸ த³ந்த⁴க³திதாய, அத்தனோ ச ஸீக⁴க³திதாய. அனுக்கமேன ஹாயித்வாதி ஏத்த² ‘‘அனுக்கமேன வட்³டி⁴த்வா’’தி ஏத்த² வுத்தனயேன அத்தோ² வேதி³தப்³போ³. தத்த² பன சா²யாய ஹாயமானதாய மண்ட³லம் வட்³ட⁴மானம் விய தி³ஸ்ஸதி, இத⁴ சா²யாய வட்³ட⁴மானதாய மண்ட³லம் ஹாயமானம் விய தி³ஸ்ஸதி.

யாய வீதி²யா ஸூரியே க³ச்ச²ந்தே வஸ்ஸவலாஹகா தே³வபுத்தா ஸூரியாபி⁴தாபஸந்தத்தா அத்தனோ விமானதோ ந நிக்க²மந்தி, கீளாபஸுதா ஹுத்வா ந விசரந்தி, ததா³ கிர ஸூரியஸ்ஸ விமானம் பகதிமக்³க³தோ அதோ⁴ ஓதரித்வா விசரதி, தஸ்ஸ ஓருய்ஹ சரணேனேவ சந்த³விமானம்பி அதோ⁴ ஓருய்ஹ சரதி தக்³க³திகத்தா, தஸ்மா ஸா வீதி² உத³காபா⁴வேன அஜானுரூபதாய ‘‘அஜவீதீ²’’தி ஸமஞ்ஞம் க³தா. யாய பன வீதி²யா ஸூரியே க³ச்ச²ந்தே வஸ்ஸவலாஹகா தே³வபுத்தா ஸூரியாபி⁴தாபாபா⁴வதோ அபி⁴ண்ஹம் அத்தனோ விமானதோ ப³ஹி நிக்க²மித்வா கீளாபஸுதா இதோ சிதோ ச விசரந்தி, ததா³ கிர ஸூரியவிமானம் பகதிமக்³க³தோ உத்³த⁴ம் ஆருஹித்வா விசரதி, தஸ்ஸ உத்³த⁴ம் ஆருய்ஹ சரணேனேவ சந்த³விமானம்பி உத்³த⁴ம் ஆருய்ஹ சரதி தக்³க³திகத்தா, தக்³க³திகதா ச ஸமானக³தினா வாதமண்ட³லேன விமானஸ்ஸ பே²ல்லிதப்³ப³த்தா, தஸ்மா ஸா வீதி² உத³கப³ஹுபா⁴வேன நாகா³னுரூபதாய ‘‘நாக³வீதீ²’’தி ஸமஞ்ஞம் க³தா. யதா³ ஸூரியோ உத்³த⁴மனாருஹந்தோ, அதோ⁴ ச அனோதரந்தோ பகதிமக்³கே³னேவ க³ச்ச²தி, ததா³ வஸ்ஸவலாஹகா யதா²காலம், யதா²ருசி ச விமானதோ நிக்க²மித்வா ஸுகே²ன விசரந்தி, தேன காலேன காலம் வஸ்ஸனதோ லோகே உதுஸமதா ஹோதி, தாய உதுஸமதாய ஹேதுபூ⁴தாய ஸா சந்தி³மஸூரியானம் க³தி க³வானுரூபதாய ‘‘கோ³வீதீ²’’தி ஸமஞ்ஞம் க³தா. தேன வுத்தம் ‘‘அஜவீதீ²’’திஆதி³.

ஏவம் ‘‘கதி நேஸம் வீதி²யோ’’தி பஞ்ஹம் விஸ்ஸஜ்ஜேத்வா ‘‘கத²ம் விசரந்தீ’’தி பஞ்ஹம் விஸ்ஸஜ்ஜேதும் ‘‘சந்தி³மஸூரியா’’திஆதி³ வுத்தம். தத்த² ஸினேருதோ ப³ஹி நிக்க²மந்தீதி ஸினேருஸமீபேன தம் பத³க்கி²ணம் கத்வா க³ச்ச²ந்தா ததோ க³மனவீதி²தோ ப³ஹி அத்தனோ திரியக³மனேன சக்கவாளாபி⁴முகா² நிக்க²மந்தி. அந்தோ விசரந்தீதி ஏவம் ச² மாஸே க²ணே க²ணே ஸினேருதோ அபஸக்கனவஸேன ததோ நிக்க²மித்வா சக்கவாளஸமீபம் பத்தா, ததோபி ச² மாஸே க²ணே க²ணே அபஸக்கனவஸேன நிக்க²மித்வா ஸினேருஸமீபம் பாபுணந்தா அந்தோ விசரந்தி. இதா³னி தமேவத்த²ம் ஸங்கே²பேன வுத்தம் விவரிதும் ‘‘தேஹீ’’திஆதி³ வுத்தம். ஸினேருஸ்ஸ, சக்கவாளஸ்ஸ ச யம் டா²னம் வேமஜ்ஜ²ம், தஸ்ஸ, ஸினேருஸ்ஸ ச யம் டா²னம் வேமஜ்ஜ²ம், தேன க³ச்ச²ந்தா ‘‘ஸினேருஸமீபேன விசரந்தீ’’தி வுத்தா, ந ஸினேருஸ்ஸ அக்³கா³ளிந்த³அல்லீனா. சக்கவாளஸமீபேன சரித்வாதி ஏத்தா²பி ஏஸேவ நயோ. மஜ்ஜே²னாதி ஸினேருஸ்ஸ, சக்கவாளஸ்ஸ ச உஜுகம் வேமஜ்ஜே²ன மக்³கே³ன. சித்ரமாஸே மஜ்ஜே²னாதி ஏத்தா²பி ஏஸேவ நயோ.

ஏகப்பஹாரேனாதி ஏகவேலாய, ஏகேனேவ வா அத்தனோ ஏகப்பஹாரேன. மஜ்ஜ²ன்ஹிகோதி டி²தமஜ்ஜ²ன்ஹிகோ காலோ ஹோதி. ததா³ ஹி ஸூரியமண்ட³லம் உக்³க³ச்ச²ந்தம் ஹுத்வாபி இமஸ்மிம் தீ³பே டி²தஸ்ஸ உபட்³ட⁴மேவ தி³ஸ்ஸதி, உத்தரகுரூஸு டி²தஸ்ஸ ஓக³ச்ச²ந்தம் ஹுத்வா. ஏவஞ்ஹி ஏகவேலாயமேவ தீஸு தீ³பேஸு ஆலோககரணம்.

யேஸு கத்திகாதி³னக்க²த்தஸமஞ்ஞா, தானிபி தாரகரூபானி யேவாதி வுத்தம் ‘‘ஸேஸதாரகரூபானி சா’’தி, நக்க²த்தஸஞ்ஞிததாரகரூபதோ அவஸிட்ட²தாரகரூபானீதி அத்தோ². உப⁴யானிபி தானி தே³வதானம் வஸனகவிமானானீதி வேதி³தப்³பா³னி. ரா-ஸத்³தோ³ தியதி சி²ஜ்ஜதி ஏத்தா²தி ரத்தி, ஸத்தானம் ஸத்³த³ஸ்ஸ வூபஸமனகாலோதி அத்தோ². தி³ப்³ப³ந்தி ஸத்தா கீளந்தி ஜோதந்தி ஏத்தா²தி தி³வா. ஸத்தானம் ஆயும் மினந்தோ விய ஸியதி அந்தம் கரோதீதி மாஸோ. தம் தம் கிரியம் அரதி வத்தேதீதி உது. தம் தம் ஸத்தம், த⁴ம்மப்பவத்திஞ்ச ஸங்க³ம்ம வத³ந்தோ விய ஸரதி வத்தேதீதி ஸம்வச்ச²ரோ.

122. விவஜ்ஜனம் விவஜ்ஜோ, ஸோ ஏவ வேவஜ்ஜம், வண்ணஸ்ஸ வேவஜ்ஜம் வண்ணவேவஜ்ஜம், வண்ணஸம்பத்தியா விக³மோ, தஸ்ஸ பன அத்தி²தா ‘‘வண்ணவேவஜ்ஜதா’’தி வுத்தா. தேனாஹ ‘‘விவஜ்ஜபா⁴வோ’’தி. தேஸந்தி வண்ணவந்தானம் ஸத்தானம். அதிமானப்பச்சயாதி து³ப்³ப³ண்ணவம்ப⁴னவஸேன அதிக்கம்ம அத்தனோ வண்ணம் படிச்ச மானபச்சயா, மானஸம்பக்³க³ண்ஹனனிமித்தந்தி அத்தோ². ஸாதிஸயோ ரஸோ ஏதிஸ்ஸா அத்தீ²தி ரஸாதி லத்³த⁴மானாய, அனுபா⁴ஸிம்ஸூதி அனுரோத⁴வஸேன பா⁴ஸிம்ஸு. லோகுப்பத்திவம்ஸகத²ந்தி லோகுப்பத்திவம்ஸஜம் பவேணீகத²ம், ஆதி³காலே உப்பன்னம் பவேணீஆக³தகத²ந்தி அத்தோ². ‘‘அனுபதந்தீ’’திபி பாடோ², ஸோ ஏவத்தோ².

பூ⁴மிபப்படகபாதுபா⁴வாதி³வண்ணனா

123. ஏதி³ஸோ ஹுத்வாதி அஹிச்ச²த்தகஸதி³ஸோ ஹுத்வா.

124. பதா³லதாதி ‘‘பதா³’’தி ஏவம்னாமா ஏகா லதா, ஸா பன யஸ்மா ஸம்பன்னவண்ணக³ந்த⁴ரஸா, தஸ்மா ‘‘ப⁴த்³த³லதா’’தி வுத்தா. நாளிகாதி நாளிவல்லி. அஹாயீதி நஸ்ஸி.

125. அகட்ட²பாகோதி அகட்டே²யேவ டா²னே உப்பஜ்ஜித்வா பச்சனகோ, நீவாரோ விய ஸஞ்ஜாதோ ஹுத்வா நிப்பஜ்ஜனகோதி அத்தோ². கணோ ‘‘குண்ட³க’’ந்தி ச வுச்சதி. து²ஸந்தி தண்டு³லம் பரியோனந்தி⁴த்வா டி²தத்தசோ, தத³பா⁴வதோ ‘‘அகணோ, அது²ஸோ’’தி ஸாலி வுத்தோ. ‘‘படிவிரூள்ஹ’’ந்தி இத³ம் பக்கபா⁴வஸ்ஸ காரணவசனம். படிவிரூள்ஹதோ ஹி தம் பக்கந்தி. யஸ்மிம் டா²னே ஸாயம் பக்கோ ஸாலி க³ஹிதோ, ததே³வ டா²னம் து³தியதி³வஸே பாதோ பக்கேன ஸாலினா பரிபுண்ணம் ஹுத்வா திட்ட²தீதி ஆஹ ‘‘ஸாயம் க³ஹிதட்டா²னம் பாதோ பக்கம் ஹோதீ’’திஆதி³. அலாயிதந்தி லாயிதட்டா²னம்பி தேஸம் கம்மப்பச்சயா அலாயிதமேவ ஹுத்வா அனூனம் பரிபுண்ணமேவ பஞ்ஞாயதி, ந கேவலம் பஞ்ஞாயனமேவ, அத² கோ² ததா²பூ⁴தமேவ ஹுத்வா திட்ட²தி.

இத்தி²புரிஸலிங்கா³தி³பாதுபா⁴வவண்ணனா

126. ‘‘மனுஸ்ஸகாலே’’தி இத³ம் புப்³பே³ மனுஸ்ஸபூ⁴தானம்யேவ தத்த² இதா³னி நிகந்திவஸேன உப்பத்தி ஹோதீதி கத்வா வுத்தம், தே³வதானம்பி புரிமஜாதியம் இத்தி²பா⁴வே டி²தானம் தத்த² விராகா³தி³புரிஸத்தப்பச்சயே அஸதி ததா³ இத்தி²லிங்க³மேவ பாதுப⁴வதி. புரிஸத்தபச்சயேதி ‘‘அத்தனோபி அனிஸ்ஸரதா, ஸப்³ப³காலம் பராயத்தவுத்திதா, ரஜஸ்ஸலதா வஞ்சதா, க³ப்³ப⁴தா⁴ரணம், பட²மாய பகதியா நிஹீனபகதிதா, ஸூரவீரதாபா⁴வோ, ‘அப்பகா ஜனா’தி ‘ஹீளேதப்³ப³தா’தி ஏவமாதி³ ஆதீ³னவபச்சவேக்க²ணபுப்³ப³கம்பி இத்தி²பா⁴வே ‘அலம் இத்தி²பா⁴வேன, ந ஹி இத்தி²பா⁴வே ட²த்வா சக்கவத்திஸிரிம், ந ஸக்கமாரப்³ரஹ்மஸிரியோ பச்சனுப⁴விதும், ந பச்சேகபோ³தி⁴ம், ந ஸம்மாஸம்போ³தி⁴ம் அதி⁴க³ந்தும் ஸக்கா’தி ஏவம் இத்தி²பா⁴வவிரஜ்ஜனம், ‘யதா²வுத்தஆதீ³னவவிரஹதோ உத்தமபகதிபா⁴வதோ ஸம்பத³மித³ம் புரிஸத்தம் நாம ஸேட்ட²ம் உத்தமம், ஏத்த² ட²த்வா ஸக்கா ஏதா ஸம்பத்தியோ ஸம்பாபுணிது’ந்தி ஏவம் புரிஸத்தபா⁴வே ஸம்பா⁴வனாபுப்³ப³கம் பத்த²னாட²பனம், ‘தத்த² நின்னபோணபப்³பா⁴ரசித்ததா’தி’’ ஏவமாதி³கே புரிஸபா⁴வஸ்ஸ பச்சயபூ⁴தே த⁴ம்மே. பூரேத்வா வட்³டே⁴த்வா. பச்சக்க²ம் பூ⁴தம், ஸதி³ஸஞ்ச தி³ட்ட²த⁴ம்மிகம், ஸம்பராயிகஞ்ச ஸுவிபுலம் அனத்த²ம் அசிந்தேத்வா புரிஸஸ்ஸ காமேஸு மிச்சா²சரணம் கேவலம் இத்தி²யம் ஆஸாபத்தி ப²லேனேவாதி ஆஸாஆபத்தி இத்தி²பா⁴வாவஹாபி ஹோதியேவ. தன்னின்னபோணபப்³பா⁴ரபா⁴வேன தன்னிகந்தியா நிமித்தபா⁴வாபத்திதோதி வுத்தம் ‘‘புரிஸோ இத்த²த்தபா⁴வம் லப⁴ந்தோ காமேஸுமிச்சா²சாரம் நிஸ்ஸாய லப⁴தீ’’தி. ததா³தி யதா²வுத்தே பட²மகப்பிககாலே. பகதியாதி ஸபா⁴வேன. மாதுகா³மஸ்ஸாதி புரிமத்தபா⁴வே மாதுகா³மபூ⁴தஸ்ஸ. புரிஸஸ்ஸாதி ஏத்தா²பி ‘‘பகதியா’’தி பத³ம் ஆனேத்வா ஸம்ப³ந்தி⁴தப்³ப³ம். உபனிஜ்ஜா²யதந்தி உபேச்ச நிஜ்ஜா²யந்தானம். யதா² அஞ்ஞமஞ்ஞஸ்மிம் ஸாராகோ³ உப்பஜ்ஜதி, ஏவம் ஸாபேக்க²பா⁴வேன ஓலோகேந்தானம். ராக³பரிளாஹோதி ராக³ஜோ பரிளாஹோ.

நிப்³பு³ய்ஹமானாயாதி பரிணதா ஹுத்வா நிய்யமானாய.

மேது²னத⁴ம்மஸமாசாரவண்ணனா

127. கோ³மயபிண்ட³மத்தம்பி நாலத்தா²தி ஸம்மதே³வ விவாஹகம்மம் நாலத்தா²தி அதி⁴ப்பாயேன வத³ந்தி. பாதப்³யதந்தி தஸ்மிம் அஸத்³த⁴ம்மே கிலேஸகாமேன பிவிதப்³ப³தம் கிஞ்சி பிவிதப்³ப³வத்து²ம் பிவந்தா விய அதிவிய தோஸேத்வா பரிபு⁴ஞ்ஜிதப்³ப³தம் ஆபஜ்ஜிம்ஸு, பாதப்³யதந்தி வா பரிபு⁴ஞ்ஜனகதம் ஆபஜ்ஜிம்ஸு உபக³ச்சி²ம்ஸு. பரிபோ⁴க³த்தோ² ஹி அயம் பா-ஸத்³தோ³, கத்துஸாத⁴னோ ச தப்³ய-ஸத்³தோ³, யதா²ருசி பரிபு⁴ஞ்ஜிம்ஸூதி அத்தோ².

ஸன்னிதி⁴காரகந்தி ஸன்னிதி⁴காரம், க-காரோ பத³வட்³ட⁴னமத்தந்தி ஆஹ ‘‘ஸன்னிதி⁴ம் கத்வா’’தி. அபதா³னந்தி அவக²ண்ட³னம். ஏகேகஸ்மிம் டா²னேதி யத்த² யத்த² வஹிதம், தஸ்மிம் தஸ்மிம் ஏகேகஸ்மிம் டா²னே. கு³ம்ப³கு³ம்பா³தி புஞ்ஜபுஞ்ஜா.

ஸாலிவிபா⁴க³வண்ணனா

128. ஸீமம் ட²பேய்யாமாதி ‘‘அயம் பூ⁴மிபா⁴கோ³ அஸுகஸ்ஸ, அயம் பூ⁴மிபா⁴கோ³ அஸுகஸ்ஸா’’தி ஏவம் பரிச்சே²த³ம் கரேய்யாம. தம் அக்³க³ம் கத்வாதி தம் ஆதி³ம் கத்வா.

மஹாஸம்மதராஜவண்ணனா

130. பகாஸேதப்³ப³ந்தி தோ³ஸவஸேன பகாஸேதப்³ப³ம். கி²பிதப்³ப³ந்தி கே²பம் காதப்³ப³ம். தேனாஹ ‘‘ஹாரேதப்³ப³’’ந்தி, ஸத்தனிகாயதோ நீஹரிதப்³ப³ம்.

நேஸந்தி நித்³தா⁴ரணே ஸாமிவசனம்.

131. அக்க²ரந்தி நிருத்திம். ஸா ஹி மஹாஜனேன ஸம்மதோதி நித்³தா⁴ரேத்வா வத்தப்³ப³தோ நிருத்தி, தஸ்மிம்யேவ நிரூள்ஹபா⁴வதோ, அஞ்ஞத்த² அஸஞ்சரணதோ அக்க²ரந்தி ச வுச்சதி, ததா² ஸங்கா²தப்³ப³தோ ஸங்கா², ஸமஞ்ஞாயதீதி ஸமஞ்ஞா, பஞ்ஞாபனதோ பஞ்ஞத்தி, வோஹரணதோ வோஹாரோ. உப்பன்னோதி பவத்தோ. ந கேவலம் அக்க²ரமேவாதி ந கேவலம் ஸமஞ்ஞாகரணமேவ. கே²த்தஸாமினோதி தம் தம் பூ⁴மிபா⁴க³ம் பரிக்³க³ஹேத்வா டி²தஸத்தா. தீஹி ஸங்கே²ஹீதி திவித⁴கிரியாபி⁴ஸங்க²தேஹி தீஹி ஸங்கே²ஹி க²த்தியாதீ³ஹி தீஹி வண்ணேஹி பரிக்³க³ஹிதேஹி. ‘‘க²த்தியானுயந்தப்³ராஹ்மணக³ஹபதிகனேக³மஜானபதே³ஹி தீஹி க³ஹபதீஹி பரிக்³க³ஹிதேஹீ’’தி ச வத³ந்தி. அக்³க³ந்தி ஞாதேனாதி அக்³க³ம் குலந்தி ஞாதேன. க²த்தியகுலஞ்ஹி லோகே ஸப்³ப³ஸேட்ட²ம். யதா²ஹ ‘‘க²த்தியோ ஸேட்டோ² ஜனேதஸ்மிம், யே கோ³த்தபடிஸாரினோ’’தி, (தீ³. நி. 1.277; 3.140; ம. நி. 2.30; ஸம். நி. 1.182, 245) அபே⁴தோ³பசாரேன பன அக்க²ரஸ்ஸ க²த்தியஸத்³த³ஸ்ஸபி ஸேட்ட²தாதி பாளியம் ‘‘அக்³க³ஞ்ஞேன அக்க²ரேனா’’தி வுத்தம். இதா³னி அபே⁴தோ³பசாரேன வினா ஏவ அத்த²ம் த³ஸ்ஸேதும் ‘‘அக்³கே³ வா’’திஆதி³ வுத்தம்.

ப்³ராஹ்மணமண்ட³லாதி³வண்ணனா

132. யேன அனாரம்ப⁴பா⁴வேன பா³ஹிதாகுஸலா ‘‘ப்³ராஹ்மணா’’தி வுத்தா, தமேவ தாவ த³ஸ்ஸேதும் பாளியம் ‘‘வீதங்கா³ரா’’திஆதி³ வுத்தந்தி தத³த்த²ம் த³ஸ்ஸேந்தோ ‘‘பசித்வா’’திஆதி³மாஹ. தமேனந்தி வசனவிபல்லாஸேன நித்³தே³ஸோதி ஆஹ ‘‘தே ஏதே’’தி. அபி⁴ஸங்க²ரோந்தாதி சித்தமந்தபா⁴வேன அஞ்ஞமஞ்ஞம் அபி⁴விஸிட்டே² கரோந்தா, ப்³ராஹ்மணாகப்பபா⁴வேன ஸங்க²ரோந்தா ச. வாசேந்தாதி பரேஸம் கதே²ந்தா, யே ததா² க³ந்தே² காதும் ந ஜானந்தி. அச்ச²ந்தீதி ஆஸந்தி, உபவிஸந்தீதி அத்தோ². தேனாஹ ‘‘வஸந்தீ’’தி. அச்சே²ந்தீதி காலம் கே²பேந்தி. ஹீனஸம்மதம் ஜா²னபா⁴வனானுயோக³ம் ச²ட்³டே³த்வா க³ந்தே² பஸுததாதீ³பனதோ. ஸேட்ட²ஸம்மதம் ஜாதம் ‘‘வேத³த⁴ரா ஸோத்தியா ஸுப்³ராஹ்மணாதி ஏவம் ஸேட்ட²ஸம்மதம் ஜாதம்.

133. மேது²னத⁴ம்மம் ஸமாதி³யித்வாதி ஜாயாபதிகபா⁴வேன த்³வயம் த்³வயம் நிவாஸம் அஜ்ஜு²பக³ந்த்வா. வாணிஜகம்மாதி³கேதி ஆதி³-ஸத்³தே³ன கஸிகம்மாதி³ம் ஸங்க³ண்ஹாதி.

134. லுத்³தா³சாரகம்மகு²த்³தா³சாரகம்முனாதி பரவிஹேட²னாதி³லுத்³தா³சாரகம்முனா, நளகாரதா³ருகம்மாதி³கு²த்³தா³சாரகம்முனா ச. ஸுத்³த³ந்தி ஏத்த² ஸு-இதி ஸீக⁴த்தே² நிபாதோ. தா³-இதி க³ரஹணத்தே²தி ஆஹ ‘‘ஸுத்³த³ம் ஸுத்³த³ம் லஹும் லஹும் குச்சி²தம் க³ச்ச²ந்தீ’’தி.

135. அஹூதி காலவிபல்லாஸவஸேன வுத்தந்தி த³ஸ்ஸேந்தோ ‘‘ஹோதி கோ²’’தி ஆஹ. இமினாதி ‘‘இமேஹி கோ², வாஸேட்ட², சதூஹி மண்ட³லேஹி ஸமணமண்ட³லஸ்ஸ அபி⁴னிப்³ப³த்தி ஹோதீ’’தி இமினா வசனேன. இமம் த³ஸ்ஸேதீதி ஸமணமண்ட³லம் நாம…பே… ஸுத்³தி⁴ம் பாபுணந்தீதி இமம் அத்த²ஜாதம் த³ஸ்ஸேதி. யதி³ இமேஹி…பே… அபி⁴னிப்³ப³த்தி ஹோதி, ஏவம் ஸந்தே இமானேவ சத்தாரி மண்ட³லானி பதா⁴னானி, ஸமணமண்ட³லம் அப்பதா⁴னம் ததோ அபி⁴னிப்³ப³த்தத்தாதி? நயித³மேவந்தி த³ஸ்ஸேதும் ‘‘இமானீ’’திஆதி³ வுத்தம். ஸமணமண்ட³லம் அனுவத்தந்தி கு³ணேஹி விஸிட்ட²பா⁴வதோ. கு³ணோ ஹி விஞ்ஞூனம் அனுவத்தனஹேது, ந கோலபுத்தியம், வண்ணபோக்க²ரதா, வாக்கரணமத்தம் வா. தேனாஹ ‘‘த⁴ம்மேனேவ அனுவத்தந்தி, நோ அத⁴ம்மேனா’’தி. ஸோ த⁴ம்மோ ச லோகுத்தரோவ அதி⁴ப்பேதோ, யேன ஸம்ஸாரதோ விஸுஜ்ஜ²தி, தஸ்மா ஸமணமண்ட³லந்தி ச ஸாஸனிகமேவ ஸமணக³ணம் வத³தீதி த³ட்ட²ப்³ப³ம். தேனாஹ ‘‘ஸமணமண்ட³லஞ்ஹீ’’திஆதி³.

து³ச்சரிதாதி³கதா²வண்ணனா

136. மிச்சா²தி³ட்டி²வஸேன ஸமாதி³ன்னகம்மம் நாம ‘‘கோ அனுப³ந்தி⁴தப்³போ³. அஜோதக்³கி³ஸோட்டி²மிஸோ’’திஆதி³னா யஞ்ஞவிதா⁴னாதி³வஸேன பவத்திதம் ஹிம்ஸாதி³பாபகம்மம். மிச்சா²தி³ட்டி²கம்மஸ்ஸாதி ‘‘ஏஸ ஸத்³தா⁴தி⁴க³தோ தே³வயானோ, யேன யந்தி புத்தினோ விஸோகா’’திஆதி³னா பவத்திதஸ்ஸ மிச்சா²தி³ட்டி²ஸஹக³தகம்மஸ்ஸ. ஸமாதா³னம் தஸ்ஸ ததா² பவத்தனம், தஸ்ஸா வா தி³ட்டி²யா உபக³மனம்.

137. த்³வயகாரீதி குஸலாகுஸலத்³வயஸ்ஸ கத்தா. தயித³ம் த்³வயம் யஸ்மா ஏகஜ்ஜ²ம் நப்பவத்ததி, தஸ்மா ஆஹ ‘‘காலேனா’’திஆதி³. ஏகக்க²ணே உப⁴யவிபாகதா³னட்டா²னம் நாம நத்தி² ஏகஸ்மிம் க²ணே சித்தத்³வயூபஸஞ்ஹிதாய ஸத்தஸந்ததியா அபா⁴வதோ. யதா² பன த்³வயகாரினோ ஸுக²து³க்க²படிஸம்வேதி³தா ஸம்ப⁴வதி, தம் த³ஸ்ஸேதும் ‘‘யேன பனா’’திஆதி³ வுத்தம். ஏவம்பூ⁴தோதி விகலாவயவோ. த்³வேபிஹி குஸலாகுஸலகம்மானி கதூபசிதானி ஸபா⁴வதோ ப³லவந்தானேவ ஹோந்தி, தஸ்மா மரணகாலே உபட்ட²ஹந்தி. தேஸு அகுஸலம் ப³லவதரம் ஹோதி பச்சயலாப⁴தோ. நிகந்திஆத³யோ ஹி பச்சயவிஸேஸா அகுஸலஸ்ஸேவ ஸபா⁴கா³, ந குஸலஸ்ஸ, தஸ்மா கதூபசிதபா⁴வேன ஸமானப³லேஸுபி குஸலாகுஸலேஸு பச்சயலாபே⁴ன விபச்சிதும் லத்³தோ⁴காஸதாய குஸலதோ அகுஸலம் ப³லவதரம் ஹோதீதி, ததா²பூ⁴தம்பி தம் யதா² விபாகதா³னே லத்³தோ⁴காஸஸ்ஸ குஸலஸ்ஸாபி அவஸரோ ஹோதி, ததா² லத்³த⁴பச்சயம் படிஸந்தி⁴தா³னாபி⁴முக²ம் குஸலம் படிபா³ஹித்வா படிஸந்தி⁴ம் தே³ந்தம் திரச்சா²னயோனியம் நிப்³ப³த்தாபேதீதி. ‘‘அகுஸலம் ப³லவதரம் ஹோதீ’’தி ஏத்த² ‘‘அகுஸலம் சே ப³லவதரம் ஹோதி, தம் குஸலம் படிபா³ஹித்வா’’தி வுத்தனயேனேவ அத்த²ம் வத்வா தேஸு குஸலம் சே ப³லவதரம் ஹோதி, தஞ்ச அகுஸலம் படிபா³ஹித்வா மனுஸ்ஸயோனியம் நிப்³ப³த்தாபேதி, அகுஸலம் பவத்திவேத³னீயம் ஹோதி, அத² நம் தம் காணம்பி கரோதி கு²ஜ்ஜம்பி பீட²ஸப்பிம்பி குச்சி²ரோகா³தீ³ஹி வா உபத்³து³தம். ஏவம் ஸோ பவத்தியம் நானப்பகாரம் து³க்க²ம் பச்சனுப⁴வதீதி இத³ம் ஸந்தா⁴ய வுத்தம் ‘‘ஸுக²து³க்க²ப்படிஸம்வேதீ³ ஹோதீ’’தி. தத்ராயம் வினிச்ச²யோ – வுத்தகாலே வா காரேன ஸமானப³லேஸு குஸலாகுஸலகம்மேஸு உபட்ட²ஹந்தேஸு மரணஸ்ஸ ஆஸன்னவேலாயம் யதி³ ப³லவதரானி குஸலஜவனானி ஜவந்தி, யதா²உபட்டி²தம் அகுஸலம் படிபா³ஹித்வா குஸலம் வுத்தனயேன படிஸந்தி⁴ம் தே³தி. அத² ப³லவதரானி அகுஸலஜவனானி ஜவந்தி, யதா²உபட்டி²தம் குஸலம் படிபா³ஹித்வா அகுஸலம் வுத்தனயேனேவ படிஸந்தி⁴ம் தே³தி. தம் கிஸ்ஸ ஹேது? உபி⁴ன்னம் கம்மானம் ஸமானப³லவபா⁴வதோ, பச்சயந்தரஸாபேக்க²தோ சாதி, ஸப்³ப³ம் வீமம்ஸித்வா க³ஹேதப்³ப³ம்.

போ³தி⁴பக்கி²யபா⁴வனாவண்ணனா

138. போ³தி⁴ வுச்சதி மக்³க³ஸம்மாதி³ட்டி², சத்தாரி அரியஸச்சானி பு³ஜ்ஜ²தீதி கத்வா, ஸபா⁴வதோ, தம்ஸபா⁴வதோ ச தஸ்ஸா பக்கே² ப⁴வாதி போ³தி⁴பக்கி²யா, ஸதிவீரியாத³யோ த⁴ம்மா, தேஸம் போ³தி⁴பக்கி²யானம். படிபாடியாதி போ³தி⁴பக்கி²யதே³ஸனாபடிபாடியா. பா⁴வனம் அனுக³ந்த்வாதி அனுக்கமேன பவத்தம் பா⁴வனம் பத்வா. தேனாஹ ‘‘படிபஜ்ஜித்வா’’தி. ஸஉபாதி³ஸேஸாய நிப்³பா³னதா⁴துயா வஸேன கீ²ணாஸவஸ்ஸ ஸேட்ட²பா⁴வம் லோகஸ்ஸ பாகடம் கத்வா த³ஸ்ஸேதும் ஸக்கா, ந இதராய ஸப்³ப³ஸோ அபஞ்ஞத்திபா⁴வூபக³மனே தஸ்ஸ அத³ஸ்ஸனதோதி வுத்தம் ‘‘பரினிப்³பா³தீதி கிலேஸபரினிப்³பா³னேன பரினிப்³பா³யதீ’’தி. வினிவத்தேத்வாதி ததோ சதுவண்ணதோ நீஹரித்வா.

140. தமேவத்த²ந்தி ‘‘கீ²ணாஸவோவ தே³வமனுஸ்ஸேஸு ஸேட்டோ²’’தி வுத்தமேவத்த²ம்.

ஸேட்ட²ச்சே²த³கவாத³மேவாதி ஜாதிப்³ராஹ்மணானம் ஸேட்ட²பா⁴வஸமுச்சே²த³கமேவ கத²ம். த³ஸ்ஸேத்வா பா⁴ஸித்வா. ஸுத்தந்தம் வினிவத்தேத்வாதி புப்³பே³ லோகியத⁴ம்மஸந்த³ஸ்ஸனவஸேன பவத்தம் அக்³க³ஞ்ஞஸுத்தம் ‘‘ஸத்தன்னம் போ³தி⁴பக்கி²யானம் த⁴ம்மானம் பா⁴வனமன்வாயா’’திஆதி³னா ததோ வினிவத்தேத்வா நீஹரித்வா தேன அஸம்ஸட்ட²ம் கத்வா. ஆவஜ்ஜந்தாதி ஸமன்னாஹரந்தா. அனுமஜ்ஜந்தாதி புப்³பே³னாபரம் அத்த²தோ விசரந்தாதி.

அக்³க³ஞ்ஞஸுத்தவண்ணனாய லீனத்த²ப்பகாஸனா.