3. சக்கவத்திஸுத்தவண்ணனா

அத்ததீ³பஸரணதாவண்ணனா

80. உத்தானம் வுச்சதி பாகடம், தப்படிக்கே²பேன அனுத்தானம் அபாகடம், படிச்ச²ன்னம், அபசுரம், து³விஞ்ஞேய்யஞ்ச. அனுத்தானானம் பதா³னம் வண்ணனா அனுத்தானபத³வண்ணனா. உத்தானபத³வண்ணனாய பயோஜனாபா⁴வதோ அனுத்தானக்³க³ஹணம். ‘‘மாதுலா’’தி இத்தி²லிங்க³வஸேன லத்³த⁴னாமோ ஏகோ ருக்கோ², தஸ்ஸா ஆஸன்னப்பதே³ஸே மாபிதத்தா நக³ரம்பி ‘‘மாதுலா’’ த்வேவ பஞ்ஞாயித்த². தேன வுத்தம் ‘‘மாதுலாயந்தி ஏவம் நாமகே நக³ரே’’தி. அவிதூ³ரேதி தஸ்ஸ நக³ரஸ்ஸ அவிதூ³ரே.

காமஞ்சேத்த² ஸுத்தே ‘‘பூ⁴தபுப்³ப³ம், பி⁴க்க²வே, ராஜா த³ள்ஹனேமி நாம அஹோஸீ’’திஆதி³னா அதீதவம்ஸதீ³பிகா கதா² ஆதி³தோ பட்டா²ய ஆக³தா, ‘‘அட்³ட⁴தேய்யவஸ்ஸஸதாயுகானம் மனுஸ்ஸானம் வஸ்ஸஸதாயுகா புத்தா ப⁴விஸ்ஸந்தீ’’திஆதி³னா பன ஸவிஸேஸம் அனாக³தத்த²படிஸம்யுத்தா கதா² ஆக³தாதி வுத்தம் ‘‘அனாக³தவம்ஸதீ³பிகாய ஸுத்தந்தகதா²யா’’தி. அனாக³தத்த²தீ³பனஞ்ஹி அச்ச²ரியம், தத்தா²பி அனாக³தஸ்ஸ ஸம்மாஸம்பு³த்³த⁴ஸ்ஸ படிபத்திகித்தனம் அச்ச²ரியதமம். ஸமாக³மேனாதி ஸன்னிபாதேன.

‘‘ப⁴த்தக்³க³ம் அமனாப’’ந்திஆதி³ கேவலம் தேஸம் பரிவிதக்கமத்தம். அமனாபந்தி அமனுஞ்ஞம். பு³த்³தே⁴ஸு கதோ அப்பகோபி அபராதோ⁴ அப்பகோ காரோ விய க³ருதரவிபாகோதி ஆஹ ‘‘பு³த்³தே⁴ஹி ஸத்³தி⁴ம்…பே… ஸதி³ஸம் ஹோதீ’’தி. தத்ராதி தஸ்மிம் மாதுலனக³ரஸ்ஸ ஸமீபே, தஸ்ஸம் வா பரிஸாயம்.

அத்ததீ³பாதி ஏத்த² காமம் யோ பரோ ந ஹோதி, ஸோ அத்தாதி ஸஸந்தானோ ‘‘அத்தா’’தி வுச்சதி, ஹிதஸுகே²ஸிபா⁴வேன பன அத்தனிப்³பி³ஸேஸத்தா த⁴ம்மோ இத⁴ ‘‘அத்தா’’தி அதி⁴ப்பேதோ. தேனாஹ ‘‘அத்தா நாம லோகியலோகுத்தரோ த⁴ம்மோ’’தி. த்³விதா⁴ ஆபோ க³தோ ஏத்தா²தி தீ³போ, ஓகே⁴ன அனஜ்ஜோ²த்த²தோ பூ⁴மிபா⁴கோ³. இத⁴ பன காமோகா⁴தீ³ஹி அனஜ்ஜோ²த்த²ரணீயத்தா தீ³போ வியாதி தீ³போ, அத்தா தீ³போ பதிட்டா² ஏதேஸந்தி அத்ததீ³பா. தேனாஹ ‘‘அத்தானம் தீ³ப’’ந்திஆதி³. தீ³பபா⁴வோ சேத்த² படிஸரணதாதி ஆஹ ‘‘இத³ம் தஸ்ஸேவ வேவசன’’ந்தி. அஞ்ஞஸரணபடிக்கே²பவசனந்தி அஞ்ஞஸரணபா⁴வபடிக்கே²பவசனம். இத³ஞ்ஹி ந அஞ்ஞம் ஸரணம் கத்வா விஹரணஸ்ஸேவ படிக்கே²பவசனம், அத² கோ² அஞ்ஞஸ்ஸ ஸரணஸபா⁴வஸ்ஸேவ படிக்கே²பவசனம் தப்படிக்கே²பே ச தேன இதரஸ்ஸாபி படிக்கே²பஸித்³தி⁴தோ. தேனாஹ ‘‘ந ஹீ’’திஆதி³. இதா³னி தமேவத்த²ம் ஸுத்தந்தரேன ஸாதே⁴தும் ‘‘வுத்தம்பி சேத’’ந்திஆதி³. யதி³ ஏத்த² பாகதிகோ அத்தா இச்சி²தோ, கத²ம் தஸ்ஸ தீ³பஸரணபா⁴வோ, தஸ்மா அதி⁴ப்பாயிகோ ஏத்த² அத்தா ப⁴வேய்யாதி புச்ச²தி ‘‘கோ பனேத்த² அத்தா நாமா’’தி. இதரோ யதா²தி⁴ப்பேதம் அத்தானம் த³ஸ்ஸேந்தோ ‘‘லோகியலோகுத்தரோ த⁴ம்மோ’’தி. து³தியவாரோபி பட²மவாரஸ்ஸேவ பரியாயபா⁴வேன தே³ஸிதோதி த³ஸ்ஸேதும் ‘‘தேனாஹா’’திஆதி³ வுத்தம்.

கோ³சரேதி பி⁴க்கூ²னம் கோ³சரட்டா²னபூ⁴தே. தேனாஹ ‘‘சரிதும் யுத்தட்டா²னே’’தி. ஸகேதி கத²ம் பனாயம் பி⁴க்கூ²னம் ஸகோதி ஆஹ ‘‘பேத்திகே விஸயே’’தி. பிதிதோ ஸம்மாஸம்பு³த்³த⁴தோ ஆக³தத்தா ‘‘அயம் தும்ஹாகம் கோ³சரோ’’தி தேன உத்³தி³ட்ட²த்தா பேத்திகே விஸயேதி. சரந்தந்தி ஸாமிஅத்தே² உபயோக³வசனந்தி ஆஹ ‘‘அயமேவத்தோ²’’தி, சரந்தானந்தி ச அத்தோ², தேனாயம் விப⁴த்திவிபல்லாஸேனபி வசனவிபல்லாஸேனபீதி த³ஸ்ஸேதி. கிலேஸமாரஸ்ஸ ஓதாராலாபே⁴னேவ இதரமாரானம்பி ஓதாராலாபோ⁴ வேதி³தப்³போ³. அயம் பனத்தோ²தி கோ³சரே சரணம் ஸந்தா⁴யாஹ, வத்து² பன ப்³யதிரேகமுகே²ன ஆக³தம்.

ஸகுணே ஹந்தீதி ஸகுணக்³கி⁴, மஹாஸேனஸகுணோ. அஜ்ஜ²ப்பத்தாதி அபி⁴ப⁴வனவஸேன பத்தா உபக³தா. ந ம்யாயந்தி மே அயம் ஸகுணக்³கி⁴ நாலம் அப⁴விஸ்ஸ. நங்க³லகட்ட²கரணந்தி நங்க³லேன கஸிதப்பதே³ஸோ. லேட்³டு³ட்டா²னந்தி லேட்³டூ³னம் உட்ட²பிதட்டா²னம். ஸகே ப³லேதி அத்தனோ ப³லஹேது. அபத்த²த்³தா⁴தி அவகா³ள்ஹத்த²ம்பா⁴ ஸஞ்ஜாதத்த²ம்பா⁴. அஸ்ஸரமானாதி அவ்ஹாயந்தீ.

மஹந்தம் லேட்³டு³ந்தி நங்க³லேன பி⁴ன்னட்டா²னே ஸுக்க²தாய திகி²ணஸிங்க³அயோக⁴னஸதி³ஸம் மஹந்தம் லேட்³டு³ம். அபி⁴ருஹித்வாதி தஸ்ஸ அதோ⁴பா⁴கே³ன அத்தனா பவிஸித்வா நிலீனயோக்³க³ப்பதே³ஸம் ஸல்லக்கே²த்வா தஸ்ஸுபரி சங்கமந்தோ அஸ்ஸரமானோ அட்டா²ஸி. ‘‘ஏஹி கோ²’’திஆதி³ தஸ்ஸ அஸ்ஸரமானாகாரத³ஸ்ஸனம். ஸன்னய்ஹாதி வாதக்³க³ஹணவஸேன உபோ⁴ பக்கே² ஸமம் ட²பேத்வா. பச்சுபாதீ³தி பாவிஸி. தத்தே²வாதி யத்த² புப்³பே³ லாபோ டி²தோ, தத்தே²வ லேட்³டு³ம்ஹி. உரந்தி அத்தனோ உரப்பதே³ஸம். பச்சதாளேஸீதி பதி அதாளேஸி ஸாரம்ப⁴வஸேன வேகே³ன க³ந்த்வா பஹரணதோ விதா⁴ரேந்தீ பதாளேஸி. ஆரம்மணந்தி பச்சயம். ‘‘அவஸர’’ந்தி கேசி.

‘‘குஸலான’’ந்தி ஏவம் பவத்தாய தே³ஸனாய கோ அனுஸந்தி⁴? யதா²அனுஸந்தி⁴ ஏவ. ஆதி³தோ ஹி ‘‘அத்ததீ³பா, பி⁴க்க²வே, விஹரதா²’’திஆதி³னா (தீ³. நி. 3.80) யேவ அத்தத⁴ம்மபரியாயேன லோகியலோகுத்தரத⁴ம்மா க³ஹிதா, தே யேவேத்த² குஸலக்³க³ஹணேன க³ஹிதாதி. அனவஜ்ஜலக்க²ணானந்தி அவஜ்ஜபடிபக்க²ஸபா⁴வானம். ‘‘அவஜ்ஜரஹிதஸபா⁴வான’’ந்தி கேசி. தத்த² புரிமே அத்த²விகப்பே விபாகத⁴ம்மத⁴ம்மா ஏவ க³ஹிதா, து³தியே பன விபாகத⁴ம்மாபி. யதி³ ஏவம், கத²ம் தேஸம் ஸமாதா³ய வத்தனந்தி? ந கோ² பனேதம் ஏவம் த³ட்ட²ப்³ப³ம் ‘‘விபாகத⁴ம்மா ஸீலாதி³ விய ஸமாதா³ய வத்திதப்³பா³’’தி. ஸமாதா³னந்தி பன அத்தனோ ஸந்தானே ஸம்மா ஆதா³னம் பச்சயவஸேன பவத்தி யேவாதி த³ட்ட²ப்³ப³ம். விபாகத⁴ம்மா ஹி பச்சயவிஸேஸேஹி ஸத்தஸந்தானே ஸம்மதே³வ ஆஹிதா ஆயுஆதி³ஸம்பத்திவிஸேஸபூ⁴தா உபரூபரிகுஸலவிஸேஸுப்பத்தியா உபனிஸ்ஸயா ஹோந்தீதி வத³ந்தி. புஞ்ஞம் பவட்³ட⁴தீதி ஏத்த² புஞ்ஞந்தி உத்தரபத³லோபேனாயம் நித்³தே³ஸோதி ஆஹ ‘‘புஞ்ஞப²லம் வட்³ட⁴தீ’’தி. புஞ்ஞப²லந்தி ச ஏகதே³ஸஸரூபேகஸேஸேன வுத்தம் ‘‘புஞ்ஞஞ்ச புஞ்ஞப²லஞ்ச புஞ்ஞப²ல’’ந்தி ஆஹ ‘‘உபரூபரி புஞ்ஞம்பி புஞ்ஞவிபாகோபி வேதி³தப்³போ³’’தி.

‘‘மாதாபிதூன’’ந்திஆதி³ நித³ஸ்ஸனமத்தம், தஸ்மா அஞ்ஞம்பி ஏவரூபம் ஹேதூபனிஸ்ஸயம் குஸலம் த³ட்ட²ப்³ப³ம். ஸினேஹவஸேனாதி உபனிஸ்ஸயபூ⁴தஸ்ஸ ஸினேஹஸ்ஸ வஸேன, ந ஸம்பயுத்தஸ்ஸ. ந ஹி ஸினேஹஸம்பயுத்தம் நாம குஸலம் அத்தி². முது³மத்³த³வசித்தந்தி மேத்தாவஸேன அதிவிய மத்³த³வந்தம் சித்தம். யதா² மத்த²கப்பத்தம் வட்டகா³மிகுஸலம் த³ஸ்ஸேதும் ‘‘மாதாபிதூனம் …பே… முது³மத்³த³வசித்த’’ந்தி வுத்தம், ஏவம் மத்த²கப்பத்தமேவ விவட்டகா³மிகுஸலம் த³ஸ்ஸேதும் ‘‘சத்தாரோ ஸதி…பே… போ³தி⁴பக்கி²யத⁴ம்மா’’தி வுத்தம். தத³ஞ்ஞேபி பன தா³னஸீலாதி³த⁴ம்மா வட்டஸ்ஸ உபனிஸ்ஸயபூ⁴தா வட்டகா³மிகுஸலம் விவட்டஸ்ஸ உபனிஸ்ஸயபூ⁴தா விவட்டகா³மிகுஸலந்தி வேதி³தப்³பா³. பரியோஸானந்தி ப²லவிஸேஸாவஹதாய ப²லதா³ய கோடி ஸிகா²ப்பத்தி, தே³வலோகே ச பவத்திஸிரிவிப⁴வோதி பரியோஸானம் ‘‘மனுஸ்ஸலோகே’’தி விஸேஸிதம், மனுஸ்ஸலோகவஸேனேவ சாயம் தே³ஸனா ஆக³தாதி. மக்³க³ப²லனிப்³பா³னஸம்பத்தி பரியோஸானந்தி யோஜனா. விவட்டகா³மிகுஸலஸ்ஸ விபாகம் ஸுத்தபரியோஸானே த³ஸ்ஸிஸ்ஸதி ‘‘அத² கோ², பி⁴க்க²வே, ஸங்கோ² நாம ராஜா’’திஆதி³னா (தீ³. நி. 3.108).

த³ள்ஹனேமிசக்கவத்திராஜகதா²வண்ணனா

81. இதா⁴தி இமஸ்மிம் ‘‘குஸலானம், பி⁴க்க²வே, த⁴ம்மான’’ந்திஆதி³னா (தீ³. நி. 3.110) ஸுத்ததே³ஸனாய ஆரத்³த⁴ட்டா²னே வட்டவிவட்டகா³மிபா⁴வேன ஸாதா⁴ரணே குஸலக்³க³ஹணே. தத்த² வட்டகா³மிகுஸலானுஸந்தி⁴வஸேன ‘‘பூ⁴தபுப்³ப³ம் பி⁴க்க²வே’’தி தே³ஸனம் ஆரபி⁴, ஆரப⁴ந்தோ ச தே³ஸியமானமத்தம். த⁴ம்மபடிக்³கா³ஹகானம் பி⁴க்கூ²னம் ஸங்கே²பதோ ஏவம் தீ³பேத்வா ஆரபீ⁴தி த³ஸ்ஸேதும் ‘‘பி⁴க்க²வே’’திஆதி³ வுத்தம், பட²மம் ததா² அதீ³பேந்தோபி ப⁴க³வா அத்த²தோ தீ³பேதி வியாதி அதி⁴ப்பாயோ.

82. ஈஸகம்பீதி அப்பமத்தகம்பி. அவஸக்கிதந்தி ஓக³தப⁴ட்ட²ம். நேமிஅபி⁴முக²ந்தி நேமிப்பதே³ஸஸ்ஸ ஸம்முகா². ப³ந்தி⁴ம்ஸு சக்கரதனஸ்ஸ ஓஸக்கிதானோஸக்கிதபா⁴வம் ஜானிதும். ததே³தந்தி யதா²வுத்தட்டா²னா சவனம். அதிப³லவதோ³ஸேதி ரஞ்ஞோ ப³லவதி அனத்தே² உபட்டி²தே ஸதி.

அப்பமத்தோதி ரஞ்ஞோ ஆணாய பமாத³ம் அகரோந்தோ.

ஏகஸமுத்³த³பரியந்தமேவாதி ஜம்பு³தீ³பமேவ ஸந்தா⁴ய வத³தி. ஸோ உத்தரதோ அஸ்ஸகண்ணபப்³ப³தேன பரிச்சி²ன்னம் ஹுத்வா அத்தானம் பரிக்கி²பித்வா டி²தஏகஸமுத்³த³பரியந்தோ. புஞ்ஞித்³தி⁴வஸேனாதி சக்கவத்திபா⁴வாவஹாய புஞ்ஞித்³தி⁴யா வஸேன.

83. ஏவம் கத்வாதி காஸாயானி வத்தா²னி அச்சா²தே³த்வா. ஸுகதம் கம்மந்தி த³ஸகுஸலகம்மபத²மேவ வத³தி.

‘‘த³ஸவித⁴ம், த்³வாத³ஸவித⁴’’ந்தி ச வுத்தவிபா⁴கோ³ பரதோ ஆக³மிஸ்ஸதி. பூரேந்தேனேவாதி பூரேத்வா டி²தேனேவ. நித்³தோ³ஸேதி சக்கவத்திவத்தஸ்ஸ படிபக்க²பூ⁴தானம் தோ³ஸானம் அபக³மனே நித்³தோ³ஸே. சக்கவத்தீனம் வத்தேதி சக்கவத்திராஜூஹி வத்திதப்³ப³வத்தே. பா⁴வினி பூ⁴தே விய ஹி உபசாரோ யதா² ‘‘அக³மா ராஜக³ஹம் பு³த்³தோ⁴’’தி (ஸு. நி. 410). அதி⁴க³தசக்கவத்திபா⁴வாபி ஹி தே தத்த² வத்தந்தேவாதி ததா² வுத்தம்.

சக்கவத்திஅரியவத்தவண்ணனா

84. அஞ்ஞதா² வத்திதும் அதே³ந்தோ ஸோ த⁴ம்மோ அதி⁴ட்டா²னம் ஏதஸ்ஸாதி தத³தி⁴ட்டா²னம், தேன தத³தி⁴ட்டா²னேன சேதஸா. ஸக்கரோந்தோதி ஆத³ரகிரியாவஸேன கரோந்தோ. தேனாஹ ‘‘யதா²’’திஆதி³. க³ரும் கரோந்தோதி பாஸாணச்ச²த்தம் விய க³ருகரணவஸேன க³ரும் கரோந்தோ. தேனேவாஹ ‘‘தஸ்மிம் கா³ரவுப்பத்தியா’’தி. மானேந்தோதி ஸம்பா⁴வனாவஸேன மனேன பியாயந்தோ. தேனாஹ ‘‘தமேவா’’திஆதி³. ஏவம் பூஜயதோ அபசாயதோ ஏவஞ்ச யதா²வுத்தஸக்காராதி³ஸம்ப⁴வோதி தம் த³ஸ்ஸேதும் ‘‘தம் அபதி³ஸித்வா’’திஆதி³ வுத்தம். ‘‘த⁴ம்மாதி⁴பதிபூ⁴தோ ஆக³தபா⁴வேனா’’தி இமினா யதா²வுத்தத⁴ம்மஸ்ஸ ஜேட்ட²கபா⁴வேன புரிமபுரிமதரஅத்தபா⁴வேஸு ஸக்கச்ச ஸமுபசிதபா⁴வம் த³ஸ்ஸேதி. ‘‘த⁴ம்மவஸேனேவ ஸப்³ப³கிரியானம் கரணேனா’’தி ஏதேன டா²னனிஸஜ்ஜாதீ³ஸு யதா²வுத்தத⁴ம்மனின்னபோணபப்³பா⁴ரபா⁴வம் த³ஸ்ஸேதி. அஸ்ஸாதி ரக்கா²வரணகு³த்தியா. பரம் ரக்க²ந்தோ அஞ்ஞம் தி³ட்ட²த⁴ம்மிகாதி³அனத்த²தோ ரக்க²ந்தோ தேனேவ பரத்த²ஸாத⁴னேன க²ந்திஆதி³கு³ணேன அத்தானம் ததோ ஏவ ரக்க²தி. மேத்தசித்ததாதி மேத்தசித்ததாய. நிவாஸனபாருபனகே³ஹாதீ³னம் ஸீதுண்ஹாதி³படிபா³ஹனேன ஆவரணம். அந்தோ ஜனஸ்மிந்தி அப்³ப⁴ந்தரபூ⁴தே புத்ததா³ராதி³ஜனே.

‘‘ஸீலஸம்வரே பதிட்டா²பேஹீ’’தி இமினா ரக்க²ம் த³ஸ்ஸேதி, ‘‘வத்த²க³ந்த⁴மாலாதீ³னி தே³ஹீ’’தி இமினா ஆவரணம், இதரேன கு³த்திம். ப⁴த்தவேதனஸம்பதா³னேனபீதி பி-ஸத்³தே³ன ஸீலஸம்வரே பதிட்டா²பனாதீ³னி ஸம்பிண்டே³தி. ஏஸேவ நயோ இதோ பரேஸுபி பி-ஸத்³த³க்³க³ஹணேஸு. நிக³மோ நிவாஸோ ஏதேஸந்தி நேக³மா, ஏவம் ஜானபதா³தி ஆஹ ‘‘நிக³மவாஸினோ’’திஆதி³.

நவவிதா⁴ மானமதா³தி ‘‘ஸேய்யோஹமஸ்மீ’’திஆதி³ (ஸம். நி. 4.108; த⁴. ஸ. 1121; விப⁴. 866; மஹானி. 21, 178) நயப்பவத்தியா நவவிதா⁴ மானஸங்கா²தா மதா³. மானோ ஏவ ஹேத்த² பமஜ்ஜனாகாரேன பவத்தியா மானமதோ³. ஸோப⁴னே காயிகவாசஸிககம்மே ரதோதி ஸூரதோ உ-காரஸ்ஸ தீ³க⁴ம் கத்வா, தஸ்ஸ பா⁴வோ ஸோரச்சம், காயிகவாசஸிகோ அவீதிக்கமோ, ஸப்³ப³ம் வா காயவசீஸுசரிதம். ஸுட்டு² ஓரதோதி ஸோரதோ, தஸ்ஸ பா⁴வோ ஸோரச்சம், யதா²வுத்தமேவ ஸுசரிதம். ராகா³தீ³னந்தி ராக³தோ³ஸமோஹமானாதீ³னம். த³மனாதீ³ஹீதி த³மனஸமனபரினிப்³பா³பனேஹி. ஏகமத்தானந்தி ஏகம் சித்தம், ஏகச்சம் அத்தனோ சித்தந்தி அத்தோ². ராகா³தீ³னஞ்ஹி புப்³ப³பா⁴கி³யம் த³மனாதி³பச்சேகம் இச்சி²தப்³ப³ம், ந மக்³க³க்க²ணே விய ஏகஜ்ஜ²ம் படிஸங்கா²னமுகே²ன பஜஹனதோ. ஏகமத்தானந்தி வா விவேகவஸேன ஏகம் ஏகாகினம் அத்தானம். காலே காலேதி தேஸம் ஸந்திகம் உபஸங்கமிதப்³பே³ காலே காலே.

இத⁴ ட²த்வாதி ‘‘இத³ம் கோ², தாத, த’’ந்தி ஏவம் நிக³மனவஸேன வுத்தட்டா²னே ட²த்வா. வத்தந்தி அரியசக்கவத்திவத்தம். ஸமானேதப்³ப³ந்தி ‘‘த³ஸவித⁴ம், த்³வாத³ஸவித⁴’’ந்தி ச ஹேட்டா² வுத்தக³ணனாய ச ஸமானம் காதப்³ப³ம் அனூனம் அனதி⁴கம் கத்வா த³ஸ்ஸேதப்³ப³ம். அத⁴ம்மராக³ஸ்ஸாதி அயுத்தட்டா²னே ராக³ஸ்ஸ. விஸமலோப⁴ஸ்ஸாதி யுத்தட்டா²னேபி அதிவிய ப³லவபா⁴வேன பவத்தலோப⁴ஸ்ஸ.

சக்கரதனபாதுபா⁴வவண்ணனா

85. வத்தமானஸ்ஸாதி பரிபுண்ணே சக்கவத்திவத்தே வத்தமானஸ்ஸ, நோ அபரிபுண்ணேதி ஆஹ ‘‘பூரேத்வா வத்தமானஸ்ஸா’’தி. கித்தாவதா பனஸ்ஸ பாரிபூரீ ஹோதீதி? தத்த² ‘‘கதாதி⁴காரஸ்ஸ தாவ ஹேட்டி²மபரிச்சே²தே³ன த்³வாத³ஸஹிபி ஸம்வச்ச²ரேஹி பூரதி, பஞ்சவீஸதியா, பஞ்ஞாஸாய வா ஸம்வச்ச²ரேஹி. அயஞ்ச பே⁴தோ³ த⁴ம்மச்ச²ந்த³ஸ்ஸபி திக்க²மஜ்ஜ²முது³தாவஸேன, இதரஸ்ஸ ததோ பி⁴ய்யோபீ’’தி வத³ந்தி.

து³தியாதி³சக்கவத்திகதா²வண்ணனா

90. அத்தனோ மதியாதி பரம்பராக³தம் புராணம் தந்திம் பவேணிம் லங்கி⁴த்வா அத்தனோ இச்சி²தாகாரேன. தேனாஹ ‘‘போராணக’’ந்திஆதி³.

ந பப்³ப³ந்தீதி ஸமித்³தி⁴யா ந பூரேந்தி, பீ²தா ந ஹோந்தீதி அத்தோ². தேனாஹ ‘‘ந வட்³ட⁴ந்தீ’’தி. ததா² சாஹ ‘‘கத்த²சி ஸுஞ்ஞா ஹோந்தீ’’தி. தத்த² தத்த² ராஜகிச்சே ரஞ்ஞா அமா ஸஹ வத்தந்தீதி அமச்சா, யேஹி வினா ராஜகிச்சம் நப்பவத்ததி. பரம்பராக³தா ஹுத்வா ரஞ்ஞோ பரிஸாய ப⁴வாதி பாரிஸஜ்ஜா. தேனாஹ ‘‘பரிஸாவசரா’’தி. தஸ்மிம் டா²னந்தரே ட²பிதா ஹுத்வா ரஞ்ஞோ ஆயம், வயஞ்ச யாதா²வதோ க³ணேந்தீதி க³ணகா. ஜாதிகுலஸுதாசாராதி³வஸேன புது²த்தம் க³தத்தா மஹதீ மத்தா ஏதேஸந்தி மஹாமத்தா, தே பன மஹானுபா⁴வா அமச்சா ஏவாதி ஆஹ ‘‘மஹாஅமச்சா’’தி. யே ரஞ்ஞோ ஹத்தா²னீகாதீ³ஸு அவட்டி²தா, தே அனீகட்டா²தி ஆஹ ‘‘ஹத்தி²ஆசரியாத³யோ’’தி. மந்தம் பஞ்ஞம் அஸிதா ஹுத்வா ஜீவந்தீதி மந்தஸ்ஸாஜீவினோ, மதிஸஜீவாதி அத்தோ², யே தத்த² தத்த² ராஜகிச்சே உபதே³ஸதா³யினோ. தேனாஹ ‘‘மந்தா வுச்சதி பஞ்ஞா’’திஆதி³.

ஆயுவண்ணாதி³பரிஹானிகதா²வண்ணனா

91. ப³லவலோப⁴த்தாதி ‘‘இமஸ்மிம் லோகே இதா³னி த³லித்³த³மனுஸ்ஸா நாம ப³ஹூ, தேஸம் ஸப்³பே³ஸம் த⁴னே அனுப்பதி³யமானே மய்ஹம் கோஸஸ்ஸ பரிக்க²யோ ஹோதீ’’தி ஏவம் உப்பன்னப³லவலோப⁴த்தா. உபரூபரிபூ⁴மீஸூதி ச²காமஸக்³க³ஸங்கா²தாஸு உபரூபரிகாமபூ⁴மீஸு. கம்மஸ்ஸ ப²லம் அக்³க³ம் நாம, தம் பனேத்த² உத்³த⁴கா³மீதி ஆஹ ‘‘உத்³த⁴ம் அக்³க³ம் அஸ்ஸா’’தி. ஸக்³கே³ நியுத்தா, ஸக்³க³ப்பயோஜனாதி வா ஸோவக்³கி³கா. த³ஸன்னம் விஸேஸானந்தி தி³ப்³ப³ஆயுவண்ணயஸஸுக²ஆதி⁴பதேய்யானஞ்சேவ தி³ப்³ப³ரூபாதீ³னஞ்ச ப²லவிஸேஸானம். வண்ணக்³க³ஹணேன சேத்த² ஸகோ அத்தபா⁴வவண்ணோ க³ஹிதோ, ரூபக்³க³ஹணேன ப³ஹித்³தா⁴ ரூபாரம்மணம்.

92. ஸுட்டு² நிஸித்³த⁴ந்தி யதா²யம் இமினா அத்தபா⁴வேன அதி³ன்னம் ஆதா³தும் ந ஸக்கோதி, ஏவம் ஸம்மதே³வ ததோ நிஸேதி⁴தம் கத்வா. மூலஹதந்தி ஜீவிதா வோரோபனேன மூலே ஏவ ஹதம்.

96. ராக³வஸேன சரணம் சரித்தம், சரித்தமேவ சாரித்தம், மேது²னந்தி அதி⁴ப்பாயோ, தம் பன ‘‘பரேஸம் தா³ரேஸூ’’தி வுத்தத்தா ‘‘மிச்சா²சார’’ந்தி ஆஹ.

100. பச்சனீகதி³ட்டீ²தி ‘‘அத்தி² தி³ன்ன’’ந்திஆதி³காய (ம. நி. 1.441; 2.94; விப⁴. 793) ஸம்மாதி³ட்டி²யா படிபக்க²பூ⁴தா தி³ட்டி².

101. மாதுச்சா²தி³கா உபரி ஸயமேவ வக்க²தி. அதிப³லவலோபோ⁴தி அதிவிய ப³லவா ப³ஹலகிலேஸோ, யேன அகாலே, அதே³ஸே ச பவத்ததி. மிச்சா²த⁴ம்மோதி மிச்சா² விபரீதோ அவிஸபா⁴க³வத்து²கோ லோப⁴த⁴ம்மோ. தேனாஹ ‘‘புரிஸான’’ந்திஆதி³.

தஸ்ஸ பா⁴வோதி யேன மேத்தாகருணாபுப்³ப³ங்க³மேன சித்தேன புக்³க³லோ ‘‘மத்தேய்யோ’’தி வுச்சதி, ஸோ தஸ்ஸ யதா²வுத்தசித்துப்பாதோ³, தம்ஸமுட்டா²னா ச கிரியா மத்தேய்யதா. தேனாஹ ‘‘மாதரி ஸம்மா படிபத்தியா ஏதம் நாம’’ந்தி. யா ஸம்மா பஜ்ஜிதப்³பே³ ஸம்மா அப்படிபத்தி, ஸோபி தோ³ஸோ அகா³ரவகிரியாதி³பா⁴வதோ. விப்படிபத்தியம் பன வத்தப்³ப³மேவ நத்தீ²தி ஆஹ ‘‘தஸ்ஸா அபா⁴வோ சேவ தப்படிபக்க²தா ச அமத்தேய்யதா’’தி. குலே ஜேட்டா²னந்தி அத்தனோ குலே வுத்³தா⁴னம் மஹாபிதுசூளபிதுஜேட்ட²கபா⁴திகாதீ³னம்.

த³ஸவஸ்ஸாயுகஸமயவண்ணனா

103. ‘‘ய’’ந்தி இமினா ஸமயோ ஆமட்டோ², பு⁴ம்மத்தே² சேதம் பச்சத்தவசனந்தி ஆஹ ‘‘யஸ்மிம் ஸமயே’’தி. அலம் பதினோதி அலம்பதேய்யா. தஸ்ஸா பரியத்ததா ப⁴ரியாபா⁴வேனாதி ஆஹ ‘‘தா³தும் யுத்தா’’தி. அக்³க³ரஸானீதி மது⁴ரபா⁴வேன, பே⁴ஸஜ்ஜபா⁴வேன ச அக்³க³பூ⁴தரஸானி.

தி³ப்பிஸ்ஸந்தீதி படிபக்க²பா⁴வேன ஸமுஜ்ஜலிஸ்ஸந்தி. தேனாஹ ‘‘குஸலந்திபி ந ப⁴விஸ்ஸதீ’’தி. அஹோ புரிஸோதி மாதாதீ³ஸுபி ஈதி³ஸோ, அஞ்ஞேஸம் கேஸம் கிம் விஸ்ஸஜ்ஜேஸ்ஸதி, அஹோ தேஜவபுரிஸோதி.

கே³ஹே மாதுகா³மம் வியாதி அத்தனோ கே³ஹே தா³ஸிப⁴ரியாபூ⁴தமாதுகா³மம் விய. மிஸ்ஸீபா⁴வந்தி மாதாதீ³ஸு ப⁴ரியாய விய சாரித்தஸங்கரம்.

ப³லவகோபோதி ஹந்துகாமதாவஸேன உப்பத்தியா ப³லவகோபோ. ஆகா⁴தேதீதி ஆஹனதி, அத்தனோ கக்க²ளப²ருஸபா⁴வேன சித்தம் விபா³த⁴தீதி அத்தோ². நிஸ்ஸயத³ஹனரஸோ ஹி தோ³ஸோ. ப்³யாபாதே³தீதி வினாஸேதி, மனோபதூ³ஸனதோ மனஸ்ஸ பகோபனதோ. திப்³ப³ந்தி திக்க²ம், ஸா பனஸ்ஸ திக்க²தா ஸரீரே அவஹந்தேபி ஸினேஹவத்து²ம் லங்கி⁴த்வாபி பவத்தியா வேதி³தப்³பா³தி ஆஹ ‘‘பியமானஸ்ஸபீ’’திஆதி³.

104. கப்பவினாஸோ கப்போ உத்தரபத³லோபேன, அந்தராவ கப்போ அந்தரகப்போ. தண்ஹாதி³பே⁴தோ³ கப்போ ஏதஸ்ஸ அத்தீ²தி கப்போ, ஸத்தலோகோதி ஆஹ ‘‘அந்தராவ லோகவினாஸோ’’தி. ஸ்வாயம் அந்தரகப்போ கதிவிதோ⁴, கத²ஞ்சஸ்ஸ ஸம்ப⁴வோ, கிம் க³திகோதி அந்தோக³த⁴ம் சோத³னம் ஸந்தா⁴யாஹ ‘‘அந்தரகப்போ ச நாமா’’திஆதி³. லோபு⁴ஸ்ஸதா³யாதி லோபா⁴தி⁴காய பஜாய வத்தமானாய.

ஏவம் சிந்தயிம்ஸூதி புப்³பே³ யதா²னுஸ்ஸவானுஸ்ஸரணேன, அத்தனோ ச ஆயுவிஸேஸஸ்ஸ லப⁴னதோ. கு³ம்ப³லதாதீ³ஹி க³ஹனம் டா²னந்தி கு³ம்ப³லதாதீ³ஹி ஸஞ்ச²ன்னதாய க³ஹனபூ⁴தம் டா²னம். ருக்கே²ஹி க³ஹனந்தி ருக்கே²ஹி நிரந்தரனிசிதேஹி க³ஹனபூ⁴தம். நதீ³விது³க்³க³ந்தி சி²ன்னதடாஹி நதீ³ஹி ஓரதோ, பாரதோ ச விது³க்³க³ம். தேனாஹ ‘‘நதீ³ன’’ந்திஆதி³. பப்³ப³தேஹி விஸமம் பப்³ப³தந்தரம். பப்³ப³தேஸு வா சி²ன்னதடேஸு து³ராரோஹம் விஸமட்டா²னம். ஸபா⁴கே³தி ஜீவனவஸேன ஸமானபா⁴கே³ ஸதி³ஸே கரிஸ்ஸந்தி.

ஆயுவண்ணாதி³வட்³ட⁴னகதா²வண்ணனா

105. ஆயதந்தி வா தீ³க⁴ம் சிரகாலிகம். மரணவஸேன ஹி ஞாதிக்க²யோ ஆயதோ அபுனராவத்தனதோ, ந ராஜப⁴யாதி³னா உக்கமனவஸேன புனராவத்தியாபி தஸ்ஸ லப்³ப⁴னதோ. ஓஸக்கேய்யாமாதி ஓரமேய்யாம. விரமணம்பி அத்த²தோ பஜஹனமேவ பரிச்சஜனபா⁴வதோதி ஆஹ ‘‘பஜஹேய்யாமாதி அத்தோ²’’தி. ஸீலக³ப்³பே⁴ வட்³டி⁴தத்தாதி மாது, பிது ச ஸீலவந்ததாய தத³வயவபூ⁴தே க³ப்³பே⁴ வட்³டி⁴ ‘‘ஸீலக³ப்³பே⁴ வட்³டி⁴தா’’தி வுத்தா, ஏதேன உதுஆஹாரஸ்ஸ விய தத³ஞ்ஞஸ்ஸாபி பா³ஹிரஸ்ஸ பச்சயஸ்ஸ வஸேன ஸத்தஸந்தானஸ்ஸ விஸேஸாதா⁴னம் ஹோதீதி த³ஸ்ஸேதி. யம் பனேத்த² வத்தப்³ப³ம், தம் ப்³ரஹ்மஜாலடீகாயம் (தீ³. நி. டீ. 1.7) வுத்தமேவ. கே²த்தவிஸுத்³தி⁴யாதி அதி⁴ட்டா²னபூ⁴தவத்து²விஸுத்³தி⁴யா. நனு ச தம் விஸேஸாதா⁴னம் ஜாயமானம் ரூபஸந்ததியா ஏவ ப⁴வேய்யாதி? ஸச்சமேதம், ரூபஸந்ததியா பன ததா² ஆஹிதவிஸேஸாய அரூபஸந்ததிபி லத்³தூ⁴பகாரா ஏவ ஹோதி தப்படிப³த்³த⁴வுத்திபா⁴வதோ. யதா² கப³ளீகாராஹாரேன உபத்த²ம்பி⁴தே ரூபகாயே ஸப்³போ³பி அத்தபா⁴வோ அனுக்³க³ஹிதோ ஏவ நாம ஹோதி, யதா² பன ரஞ்ஞோ சக்கவத்தினோ புஞ்ஞவிஸேஸம் உபனிஸ்ஸாய தஸ்ஸ இத்தி²ரதனாதீ³னம் அனஞ்ஞஸாதா⁴ரணா தே தே விஸேஸா ஸம்ப⁴வந்தி தப்³பா⁴வே பா⁴வதோ, தத³பா⁴வே ச அபா⁴வதோ, ஏவமேவ தஸ்மிம் காலே மாதாபிதூனம் யதா²வுத்தபுஞ்ஞவிஸேஸம் உபனிஸ்ஸாய தேஸம் புத்தானம் ஜாயமானானம் தீ³கா⁴யுகதா கே²த்தவிஸுத்³தி⁴யாவ ஹோதீதி வேதி³தப்³பா³ ஸம்வேக³த⁴ம்மச²ந்தா³தி³ஸமுபப்³ரூஹிதாய ததா³ தேஸம் குஸலசேதனாய ததா² உளாரபா⁴வேன ஸமுப்பஜ்ஜனதோ. ஏத்தா²தி இமஸ்மிம் மனுஸ்ஸலோகே, தத்தா²தி யதா²வுத்தம் குஸலத⁴ம்மம் ஸமாதா³ய வத்தமானே ஸத்தனிகாயே. தத்தே²வாதி தஸ்மிம்யேவ ஸத்தனிகாயே. ‘‘அத்தனோவ ஸீலஸம்பத்தியா’’தி வுத்தம் ஸஸந்ததிபரியாபன்னஸ்ஸ த⁴ம்மஸ்ஸ தத்த² விஸேஸப்பச்சயபா⁴வதோ. கே²த்தவிஸுத்³தி⁴பி பன இதா⁴பி படிக்கி²பிதும் ந ஸக்கா.

கோட்டா²ஸாதி சத்தாரீஸவஸ்ஸாயுகாதிஆத³யோ அஸீதிவஸ்ஸஸஹஸ்ஸாயுகபரியோஸானா ஏகாத³ஸ கோட்டா²ஸா. அதி³ன்னாதா³னாதீ³ஹீதி ஆதி³-ஸத்³தே³ன குலே ஜேட்டா²பசாயிகாபரியோஸானானம் த³ஸன்னம் பாபகோட்டா²ஸானம் க³ஹணம்.

ஸங்க²ராஜஉப்பத்திவண்ணனா

106. ஏவம் உப்பஜ்ஜனகதண்ஹாதி ஏவம் வசீபே⁴த³ம் பாபனவஸேன பவத்தா பு⁴ஞ்ஜிதுகாமதா. அனஸனந்தி காயிககிரியாஅஸமத்த²தாஹேதுபூ⁴தோ ஸரீரஸங்கோசோ. தேனாஹ ‘‘அவிப்பா²ரிகபா⁴வோ’’திஆதி³. க⁴னனிவாஸதந்தி கா³மனிக³மராஜதா⁴னீனம் க⁴னனிவிட்ட²தம் அஞ்ஞமஞ்ஞஸ்ஸ நாதிதூ³ரவத்திதம். நிரந்தரபூரிதோதி நிரந்தரம் விய புண்ணோ தத்ருபகா³னம் ஸத்தானம் ப³ஹுபா⁴வதோ.

மேத்தேய்யபு³த்³து⁴ப்பாத³வண்ணனா

107. கிஞ்சாபி புப்³பே³ வட்³ட⁴மானகவஸேன தே³ஸனா ஆக³தம், இத³ம் பன ந வட்³ட⁴மானகவஸேன வுத்தம். கஸ்மாதி சே ஆஹ ‘‘ந ஹீ’’திஆதி³. ஸத்தானம் வட்³ட⁴மானாயுககாலே பு³த்³தா⁴ ந நிப்³ப³த்தந்தி ஸம்ஸாரே ஸம்வேக³ஸ்ஸ து³ப்³பி³பா⁴வனீயத்தா. ததோ வஸ்ஸஸதஸஹஸ்ஸதோ ஓரமேவ பு³த்³து⁴ப்பாத³காலோ.

108. ஸமுஸ்ஸிதட்டே²ன யூபோ வியாதி யூபோ, யூபந்தி ஏத்த² ஸத்தா அனேகபூ⁴மிகூடாகா³ரோவரகாதி³வந்ததாயாதி யூபோ, பாஸாதோ³. ரஞ்ஞோ ஹேதுபூ⁴தேனாதி ஹேதுஅத்தே² கரணவசனந்தித³ஸ்ஸேதிஉஸ்ஸாஹஸம்பத்திஆதி³னா. மஹதா ராஜானுபா⁴வேன, மஹதா ச கித்திஸத்³தே³ன ஸமன்னாக³தத்தா சதூஹி ஸங்க³ஹவத்தூ²ஹி மஹாஜனஸ்ஸ ரஞ்ஜனதோ மஹாபனாதோ³ நாம ராஜா ஜாதோ. ஜாதகேதி மஹாபனாத³ஜாதகே (ஜா. 1.3.40 மஹாபனாத³ஜாதகே).

பனாதோ³ நாம ஸோ ராஜாதி ‘‘அதீதே பனாதோ³ நாம ஸோ ராஜா அஸ்ஸோஸீ’’தி அத்தபா⁴வந்தரதாய அத்தானம் பரம் விய நித்³தி³ஸதி. ஆயஸ்மா ஹி ப⁴த்³த³ஜித்தே²ரோ அத்தனா அஜ்ஜா²வுத்த²புப்³ப³ம் ஸுவண்ணபாஸாத³ம் த³ஸ்ஸேத்வா ஏவமாஹ. யஸ்ஸ யூபோ ஸுவண்ணயோதி யஸ்ஸ ரஞ்ஞோ அயம் யூபோ பாஸாதோ³ ஸுவண்ணயோ ஸுவண்ணமயோ. திரியம் ஸோளஸுப்³பே³தோ⁴தி வித்தா²ரதோ ஸோளஸஸரபாதப்பமாணோ, ஸோ பன அட்³ட⁴யோஜனப்பமாணோ ஹோதி. உப்³ப⁴மாஹு ஸஹஸ்ஸதா⁴தி உப்³ப⁴ம் உச்சபா⁴வம் அஸ்ஸ பாஸாத³ஸ்ஸ ஸஹஸ்ஸதா⁴ ஸஹஸ்ஸகண்ட³ப்பமாணம் ஆஹு, ஸோ பன யோஜனதோ பஞ்சவீஸதியோஜனப்பமாணோ ஹோதி. கேசி பனேத்த² கா³தா²ஸுக²த்த²ம் ‘‘ஆஹூ’’தி தீ³க⁴ம் கதம், அஹு அஹோஸீதி அத்த²ம் வத³ந்தி.

ஸஹஸ்ஸகண்டோ³தி ஸஹஸ்ஸபூ⁴மிகோ, ‘‘ஸஹஸ்ஸக²ண்டோ³’’ திபி பாடோ², ஸோ ஏவ அத்தோ². ஸதகே³ண்டூ³தி அனேகஸதனியூஹகோ. த⁴ஜாலூதி தத்த² தத்த² நியூஹஸிக²ராதீ³ஸு பதிட்ட²பிதேஹி ஸத்தித⁴ஜவீரங்க³த⁴ஜாதீ³ஹி த⁴ஜேஹி ஸம்பன்னோ. ஹரிதாமயோதி சாமீகரஸுவண்ணமயோ. கேசி பன ஹரிதாமயோதி ‘‘ஹரிதமணிபரிக்க²டோ’’தி வத³ந்தி. க³ந்த⁴ப்³பா³தி நடா. ச²ஸஹஸ்ஸானி ஸத்ததா⁴தி ச²மத்தானி க³ந்த⁴ப்³ப³ஸஹஸ்ஸானி ஸத்ததா⁴ தஸ்ஸ பாஸாத³ஸ்ஸ ஸத்தஸு டா²னேஸு ரஞ்ஞோ அபி⁴ரமாபனத்த²ம் நச்சிம்ஸூதி அத்தோ². தே ஏவம் நச்சந்தாபி கிர ராஜானம் ஹாஸேதும் நாஸக்கி²ம்ஸு. அத² ஸக்கோ தே³வராஜா தே³வனடம் பேஸேத்வா ஸமஜ்ஜம் காரேஸி, ததா³ ராஜா ஹஸீதி.

கோடிகா³மோ நாம மாபிதோ. வத்தூ²தி ப⁴த்³த³ஜித்தே²ரஸ்ஸ வத்து². தம் தே²ரகா³தா²வண்ணனாயம் (தே²ரகா³. அட்ட². ப⁴த்³த³ஜித்தே²ரகா³தா²வண்ணனாய) வித்தா²ரதோ ஆக³தமேவ. இதரஸ்ஸாதி நளகாரதே³வபுத்தஸ்ஸ. ஆனுபா⁴வாதி புஞ்ஞானுபா⁴வனிமித்தம்.

தா³னவஸேன த³த்வாதி தம் பாஸாத³ம் அத்தனோ பரிக்³க³ஹபா⁴வவியோஜனேன தா³னமுகே² நியோஜேத்வா. விஸ்ஸஜ்ஜேத்வாதி சித்தேனேவ பரிச்சஜனவஸேன த³த்வா புன த³க்கி²ணேய்யானம் ஸந்தகபா⁴வகரணேன நிரபேக்க²பரிச்சாக³வஸேன விஸ்ஸஜ்ஜேத்வா. ஏத்தகேனாதி ‘‘பூ⁴தபுப்³ப³ம் பி⁴க்க²வே’’தி ஆதி³ம் கத்வா யாவ ‘‘பப்³ப³ஜிஸ்ஸதீ’’தி பத³ம் ஏத்தகேன தே³ஸனாமக்³கே³ன.

பி⁴க்கு²னோ ஆயுவண்ணாதி³வட்³ட⁴னகதா²வண்ணனா

110. இத³ம் பி⁴க்கு²னோ ஆயுஸ்மிந்தி ஆயுஸ்மிம் ஸாதே⁴தப்³பே³ இத³ம் பி⁴க்கு²னோ இச்சி²தப்³ப³ம் சிரஜீவிதாய ஹேதுபா⁴வதோதி. தேனாஹ ‘‘இத³ம் ஆயுகாரண’’ந்தி.

ஸம்பன்னஸீலஸ்ஸ அவிப்படிஸாரபாமோஜ்ஜபீதிபஸ்ஸத்³தி⁴ஸுக²ஸமாதி⁴யதா²பூ⁴தஞாணாதி³ஸம்ப⁴வதோ தம்ஸமுட்டா²னபணீதரூபேஹி காயஸ்ஸ பு²டத்தா ஸரீரே வண்ணதா⁴து விப்பஸன்னா ஹோதி, கல்யாணோ ச கித்திஸத்³தோ³ அப்³பு⁴க்³க³ச்ச²தீதி ஆஹ ‘‘ஸீலவதோ ஹீ’’திஆதி³.

விவேகஜம் பீதிஸுகா²தீ³தி ஆதி³-ஸத்³தே³ன ஸமாதி⁴ஜம் பீதிஸுக²ம், அபீதிஜம் காயஸுக²ம், ஸதிபாரிஸுத்³தி⁴ஜம் உபேக்கா²ஸுக²ஞ்ச ஸங்க³ண்ஹாதி.

அப்படிக்கூலதாவஹோதி அப்பமாணானம் ஸத்தானம், அத்தனோ ச தேஸு அப்படிக்கூலபா⁴வதோ. ஹிதூபஸம்ஹாராதி³வஸேன பவத்தியா ஸப்³ப³தி³ஸாஸு ப²ரணஅப்பமாணவஸேன ஸப்³ப³தி³ஸாஸு விப்பா²ரிகதா.

‘‘அரஹத்தப²லஸங்கா²தம் ப³ல’’ந்தி வுத்தம் தஸ்ஸ அகுப்பத⁴ம்மதாய கேனசி அனபி⁴ப⁴வனீயபா⁴வதோ.

‘‘லோகே’’தி இத³ம் யதா² ‘‘ஏகப³லம்பீ’’தி இமினா ஸம்ப³ந்தீ⁴யதி, ஏவம் ‘‘து³ப்பஸஹம் து³ரபி⁴ஸம்ப⁴வ’’ந்தி இமேஹிபி ஸம்ப³ந்தி⁴தப்³ப³ம். லோகபரியாபன்னேஹேவ ஹி த⁴ம்மேஹி தேஸம் ப³லஸ்ஸ து³ப்பஸஹதா, து³ரபி⁴ஸம்ப⁴வதா, ந லோகுத்தரேஹீதி. ஏத்தே²வாதி ஏதஸ்மிம் அரஹத்தப²லே ஏவ, தத³த்த²ந்தி அத்தோ².

லோகுத்தரபுஞ்ஞம்பீதி லோகுத்தரபுஞ்ஞம்பி புஞ்ஞப²லம்பி. யாவ ஆஸவக்க²யா பவட்³ட⁴தி விவட்டகா³மிகுஸலத⁴ம்மானம் ஸமாதா³னஹேதூதி யோஜனா. அமதபானம் பிவிம்ஸு ஹேட்டி²மமக்³க³ப²லஸமதி⁴க³மவஸேனாதி அதி⁴ப்பாயோ.

சக்கவத்திஸுத்தவண்ணனாய லீனத்த²ப்பகாஸனா.