2. உது³ம்ப³ரிகஸுத்தவண்ணனா

நிக்³ரோத⁴பரிப்³பா³ஜகவத்து²வண்ணனா

49. உது³ம்ப³ரிகாயாதி ஸம்ப³ந்தே⁴ ஸாமிவசனந்தி ஆஹ ‘‘உது³ம்ப³ரிகாய தே³வியா ஸந்தகே பரிப்³பா³ஜகாராமே’’தி. ‘‘உது³ம்ப³ரிகாய’’ந்தி வா பாடோ², ததா² ஸதி அதி⁴கரணே ஏதம் பு⁴ம்மம். அயஞ்ஹேத்த² அத்தோ² உது³ம்ப³ரிகாய ரஞ்ஞோ தே³வியா நிப்³ப³த்திதோ ஆராமோ உது³ம்ப³ரிகா, தஸ்ஸம் உது³ம்ப³ரிகாயம். தேனாஹ ‘‘உது³ம்ப³ரிகாய தே³வியா ஸந்தகே’’தி. தாய ஹி நிப்³ப³த்திதோ தஸ்ஸா ஸந்தகோ. வரணாதி³பாட²வஸேன சேத்த² நிப்³ப³த்தத்த²போ³த⁴கஸ்ஸ ஸத்³த³ஸ்ஸ அத³ஸ்ஸனம். ஸந்தா⁴னோதி பி⁴ன்னானம்பி தேஸம் ஸந்தா⁴பனேன ‘‘ஸந்தா⁴னோ’’தி ஏவம் லத்³த⁴னாமோ. ஸம்வண்ணிதோதி பஸம்ஸிதோ. இரியதீதி பவத்ததி. அரியேன ஞாணேனாதி கிலேஸேஹி ஆரகத்தா அரியேன லோகுத்தரேன ஞாணேன. அரியாய விமுத்தியாதி ஸுவிஸுத்³தா⁴ய லோகுத்தரப²லவிமுத்தியா.

தி³வா-ஸத்³தோ³ தி³ன-ஸத்³தோ³ விய தி³வஸபரியாயோ, தஸ்ஸ விஸேஸனபா⁴வேன வுச்சமானோ தி³வா-ஸத்³தோ³ ஸவிஸேஸம் தி³வஸபா⁴க³ம் தீ³பேதீதி ஆஹ ‘‘தி³வஸஸ்ஸ தி³வா’’திஆதி³. யஸ்மா ஸமாபன்னஸ்ஸ சித்தம் நானாரம்மணதோ படிஸம்ஹதம் ஹோதி, ஜா²னஸமங்கீ³ ச பவிவேகூபக³மனேன ஸங்க³ணிகாபா⁴வதோ ஏகாகியாய நிலீனோ விய ஹோதி, தஸ்மா வுத்தம் ‘‘ததோ ததோ…பே… க³தோ’’தி. மனோ ப⁴வந்தி மனஸோ விவட்டனிஸ்ஸிதம் வட்³டி⁴ம் ஆவஹந்தீதி மனோபா⁴வனியாதி ஆஹ ‘‘மனவட்³ட⁴கான’’ந்திஆதி³. உன்னமதி ந ஸங்குசதி, அலீனஞ்ச ஹோதீதி அத்தோ².

51. யாவதாதி யாவந்தோதி அயமேத்த² அத்தோ²தி ஆஹ ‘‘யத்தகா’’தி. தேஸந்தி நித்³தா⁴ரணே ஸாமிவசனம். நித்³தா⁴ரணஞ்ச கேனசி விஸேஸேன இச்சி²தப்³ப³ம். யேஹி ச கு³ணவிஸேஸேஹி ஸமன்னாக³தா ப⁴க³வதோ ஸாவகா உபாஸகா ராஜக³ஹே படிவஸந்தி, அயஞ்ச தேஹி ஸமன்னாக³தோதி இமம் விஸேஸம் தீ³பேதும் ‘‘தேஸம் அப்³ப⁴ந்தரோ’’தி வுத்தம். தேனாஹ ‘‘ப⁴க³வதோ கிரா’’திஆதி³.

52. தேஸந்தி பரிப்³பா³ஜகானம். கதா²யாதி திரச்சா²னகதா²ய. த³ஸ்ஸனேனாதி தி³ட்டி²த³ஸ்ஸனேன. ஆகப்பேனாதி வேஸேன. குத்தேனாதி கிரியாய. ஆசாரேனாதி அஞ்ஞமஞ்ஞஸ்மிம் ஆசரிதப்³ப³ஆசாரேன. விஹாரேனாதி ரத்திந்தி³வம் விஹரிதப்³ப³விஹரணேன. இரியாபதே²னாதி டா²னாதி³இரியாபதே²ன. அஞ்ஞாகாரதாய அஞ்ஞதித்தே² நியுத்தாதி அஞ்ஞதித்தி²யா. ஸங்க³ந்த்வா ஸமாக³ந்த்வா ராஸீ ஹுத்வா பரேஹி நிஸின்னட்டா²னே. அரஞ்ஞானி ச தானி வனபத்தா²னி சாதி அரஞ்ஞவனபத்தா²னி. தத்த² யம் அரஞ்ஞகங்க³னிப்பா²த³கம் ஆரஞ்ஞகானம், தம் ‘‘அரஞ்ஞ’’ந்தி வேதி³தப்³ப³ம். வனபத்த²ந்தி கா³மந்தம் அதிக்கமித்வா மனுஸ்ஸானம் அனுபசாரட்டா²னம், யத்த² ந கஸீயதி ந வப்பீயதி. வுத்தஞ்ஹேதம் ‘‘வனபத்த²ந்தி தூ³ரானமேதம் ஸேனாஸனானம் அதி⁴வசன’’ந்தி ‘‘வனபத்த²ந்தி வனஸண்டா³னமேதம் ஸேனாஸனானம், வனபத்த²ந்தி பீ⁴ஸனகானமேதம், வனபத்த²ந்தி ஸலோமஹம்ஸானமேதம், வனபத்த²ந்தி பரியந்தானமேதம் வனபத்த²ந்தி ந மனுஸ்ஸூபசாரானமேதம் ஸேனாஸனானம் அதி⁴வசன’’ந்தி (விப⁴. 531). தேன வுத்தம் ‘‘கா³மூபசாரதோ முத்தானீ’’திஆதி³. பந்தானீதி பரியந்தானி அதிதூ³ரானி. தேனாஹ ‘‘தூ³ரதரானீ’’திஆதி³. விஹாரூபசாரேனாதி விஹாரஸ்ஸ உபசாரப்பதே³ஸேன. அத்³தி⁴கஜனஸ்ஸாதி மக்³க³கா³மினோ ஜனஸ்ஸ. மந்த³ஸத்³தா³னீதி உச்சாஸத்³த³மஹாஸத்³தா³பா⁴வதோ தனுஸத்³தா³னி. மனுஸ்ஸேஹி ஸமாக³ம்ம ஏகஜ்ஜ²ம் பவத்திதஸத்³தோ³ நிக்³கோ⁴ஸோ, தஸ்ஸ யஸ்மா அத்தோ² து³ப்³பி³பா⁴விதோ ஹோதி, தஸ்மா வுத்தம் ‘‘அவிபா⁴விதத்தே²ன நிக்³கோ⁴ஸேனா’’தி. விக³தவாதானீதி விக³தஸத்³தா³னி. ‘‘ரஹஸ்ஸ கரணஸ்ஸ யுத்தானீ’’தி இமினாபி தேஸம் டா²னானம் அரஞ்ஞலக்க²ணயுத்ததம், ஜனவிவித்ததம், வனவிவித்தமேவ ச விபா⁴வேதி, ததா² ‘‘ஏகீபா⁴வஸ்ஸ அனுரூபானீ’’தி இமினா.

53. கேனாதி ஹேதும்ஹி, ஸஹயோகே³ ச கரணவசனந்தி ஆஹ ‘‘கேன காரணேன கேன புக்³க³லேன ஸத்³தி⁴’’ந்தி. ஏகோபி ஹி விப⁴த்தினித்³தே³ஸோ அனேகத்த²விபா⁴வனோ ஹோதி, ததா² தத்³தி⁴தத்த²பத³ஸமாஹாரேதி.

ஸம்ஸந்த³னந்தி ஆலாபஸல்லாபவஸேன கதா²ஸம்ஸந்த³னம். ஞாணப்³யத்தபா⁴வந்தி ப்³யத்தஞாணபா⁴வம், ஸோ பன பரஸ்ஸ வசனே உத்தரதா³னவஸேன, பரேன வா வுத்தஉத்தரே பச்சுத்தரதா³னவஸேன ஸியாதி ஆஹ ‘‘உத்தரபச்சுத்தரனயேனா’’தி. யோ ஹி பரஸ்ஸ வசனம் திபுக்க²லேன நயேன ரூபேதி, ததா² பரஸ்ஸ ரூபனவசனம் ஜாதிபா⁴வம் ஆபாதே³தி, தஸ்ஸ தாதி³ஸம் வசனஸபா⁴வம் ஞாணவேய்யத்தியம் விபா⁴வேதி பாகடம் கரோதீதி. ஸுஞ்ஞாகா³ரேஸு நட்டா²தி ஸுஞ்ஞாகா³ரேஸு நிவாஸேஸு நட்டா² வினட்டா² அபா⁴வம் க³தா. நாஸ்ஸ பஞ்ஞா நஸ்ஸேய்ய தேஹி தேஹி கதபுச்ச²னபடிபுச்ச²னனிமித்தம் நானாபடிபா⁴னுப்பத்தியா விஸாரமாபன்னம் புச்சி²தம் பஞ்ஹம் விஸ்ஸஜ்ஜேதும் அஸமத்த²தாய. ஓரோதே⁴ய்யாமாதி நிருஸ்ஸாஹம் விய கரோந்தா அவரோதே⁴ய்யாம, தம் பரஸ்ஸ ஓரோத⁴னம் வாத³ஜாலேன வினந்த⁴னம் விய ஹோதீதி ஆஹ ‘‘வினந்தே⁴ய்யாமா’’தி. தத³த்த²ம் தேன துச்ச²கும்பி⁴னித³ஸ்ஸனம் கதம், தம் ப்³யதிரேகமுகே²ன த³ஸ்ஸேதும் ‘‘பூரிதக⁴டோ ஹீ’’திஆதி³ வுத்தம்.

ப³லம் தீ³பேந்தோதி அபூ⁴தமேவ அத்தனோ ஞாணப³லம் பகாஸேந்தோ. அஸம்பி⁴ன்னந்தி ஜாதிஸம்பே⁴தா³பா⁴வேன அஸம்பி⁴ன்னம். அஞ்ஞஜாதிஸம்பே⁴தே³ ஸதி அஸ்ஸதரஸ்ஸ அஸ்ஸஸ்ஸ ஜாதபா⁴வோ விய ஸீஹஸ்ஸபி ஸீஹதா²மாபா⁴வோ ஸியாதி ஆஹ ‘‘அஸம்பி⁴ன்னகேஸரஸீஹ’’ந்தி. டா²னஸோ வாதி தங்க²ணே ஏவ.

54. ‘‘ஸுமாக³தா⁴ நாம நதீ³’’தி கேசி, தம் மிச்சா²தி த³ஸ்ஸேந்தோ ‘‘ஸுமாக³தா⁴ நாம போக்க²ரணீ’’தி வத்வா தஸ்ஸா போக்க²ரணிபா⁴வஸ்ஸ ஸுத்தந்தரே ஆக³ததம் த³ஸ்ஸேதும் ‘‘யஸ்ஸா தீரே’’திஆதி³ வுத்தம். மோரானம் நிவாபோ ஏத்தா²தி மோரனிவாபோ. ப்³யதி⁴கரணானம்பி ஹி பதா³னம் பா³ஹிரத்த²ஸமாஸோ ஹோதியேவ யதா² ‘‘உரஸிலோமோ’’தி. அத² வா நிவுத்த²ம் ஏத்தா²தி நிவாபோ, மோரானம் நிவாபோ மோரனிவாபோ, மோரானம் நிவாபதி³ன்னட்டா²னம். தேனாஹ ‘‘யத்த² மோரான’’ந்திஆதி³. யஸ்மா நிக்³ரோதோ⁴ தபோஜிகு³ச்ச²வாதோ³, ஸாஸனே ச பி⁴க்கூ² அத்தகிலமதா²னுயோக³ம் வஜ்ஜேத்வா பா⁴வனானுயோகே³ன பரமஸ்ஸாஸப்பத்தே விஹரந்தே பஸ்ஸதி, தஸ்மா ‘‘கத²ம் நு கோ² ஸமணோ கோ³தமோ காயகிலமதே²ன வினாவ ஸாவகே வினேதீ’’தி ஸஞ்ஜாதஸந்தே³ஹோ ‘‘கோ நாம ஸோ’’திஆதி³னா ப⁴க³வந்தம் புச்சி². அஸ்ஸஸதி அனுஸங்கிதபரிஸங்கிதோ ஹோதி ஏதேனாதி அஸ்ஸாஸோ, பீதிஸோமனஸ்ஸந்தி ஆஹ ‘‘அஸ்ஸாஸப்பத்தாதி துட்டி²ப்பத்தா ஸோமனஸ்ஸப்பத்தா’’தி. அதி⁴கோ ஸேட்டோ² ஆஸயோ நிஸ்ஸயோ அஜ்ஜா²ஸயோதி ஆஹ ‘‘உத்தமனிஸ்ஸயபூ⁴த’’ந்தி. ஆதி³பூ⁴தம் புராதனம் ஸேட்ட²சரியம் ஆதி³ப்³ரஹ்மசரியம், லோகுத்தரமக்³க³ந்தி அத்தோ². ததா² ஹேஸ ஸப்³ப³பு³த்³த⁴பச்சேகபு³த்³த⁴ஸாவகேஹி தேனேவ ஆகாரேன அதி⁴க³தோ. தேனாஹ ‘‘புராண…பே… அரியமக்³க³’’ந்தி. ததா² ஹி தம் ப⁴க³வா ‘‘அத்³த³ஸ புராணம் மக்³க³ம் புராணமஞ்ஜஸ’’ந்தி அவோச. பூரேத்வா பா⁴வனாபாரிபூரிவஸேன. ‘‘பூரேத்வா’’தி வா இத³ம் ‘‘அஜ்ஜா²ஸயம் ஆதி³ப்³ரஹ்மசரிய’’ந்தி ஏத்த² பாட²ஸேஸோதி வத³ந்தி. ‘‘அஜ்ஜா²ஸயம் ஆதி³ப்³ரஹ்மசரியம் படிஜானந்தி அஸ்ஸாஸப்பத்தா’’தி ஏவம் வா ஏத்த² யோஜனா.

தபோஜிகு³ச்சா²வாத³வண்ணனா

55. பகதா ஹுத்வா விச்சி²ன்னா விப்பகதாதி ஆஹ ‘‘அனிட்டி²தாவ ஹுத்வா டி²தா’’தி.

56. வீரியேன பாபஜிகு³ச்ச²னவாதோ³தி லூக²படிபத்திஸாத⁴னேன வீரியேன அத்ததண்ஹாவினோத³னவஸேன பாபகஸ்ஸ ஜிகு³ச்ச²னவாதோ³. ஜிகு³ச்ச²தீதி ஜிகு³ச்சோ², தப்³பா⁴வோ ஜேகு³ச்ச²ம், அதி⁴கம் ஜேகு³ச்ச²ம் அதி⁴ஜேகு³ச்ச²ம், அதிவிய பாபஜிகு³ச்ச²னம், தஸ்மிம் அதி⁴ஜேகு³ச்சே². காயத³ள்ஹீப³ஹுலம் தபதீதி தபோ, அத்தகிலமதா²னுயோக³வஸேன பவத்தம் வீரியம், தேன காயத³ள்ஹீப³ஹுலதானிமித்தஸ்ஸ பாபஸ்ஸ ஜிகு³ச்ச²னம், விரஜ்ஜனம்பி தபோஜிகு³ச்சா²தி ஆஹ ‘‘வீரியேன பாபஜிகு³ச்சா²’’தி. கா⁴ஸச்சா²த³னஸேனாஸனதண்ஹாவினோத³னமுகே²ன அத்தஸ்னேஹவிரஜ்ஜனந்தி அத்தோ². உபரி வுச்சமானேஸு நானாகாரேஸு அசேலகாதி³வதேஸு ஏகஜ்ஜ²ம் ஸமாதி³ன்னானம் பரிஸோத⁴னமேவேத்த² பாரிபூரணம், ந ஸப்³பே³ஸம் அனவஸேஸதோ ஸமாதா³னம் தஸ்ஸ அஸம்ப⁴வதோதி ஆஹ ‘‘பரிபுண்ணாதி பரிஸுத்³தா⁴’’தி. பரிஸோத⁴னஞ்ச நேஸம் ஸகஸமயஸித்³தே⁴ன நயேன படிபஜ்ஜனமேவ. விபரியாயேன அபரிஸுத்³த⁴தா வேதி³தப்³பா³.

57. ‘‘ஏகம் பஞ்ஹம்பி ந கதே²தீ’’தி பட²மம் அத்தனா புச்சி²தபஞ்ஹஸ்ஸ அகதி²தத்தா வுத்தம்.

தபனிஸ்ஸிதகோதி அத்தகிலமதா²னுயோக³ஸங்கா²தம் தபம் நிஸ்ஸாய ஸமாதா³ய வத்தனகோ. ஸீஹனாதே³தி ஸீஹனாத³ஸுத்தவண்ணனாயம். யஸ்மா தத்த² வித்தா²ரிதனயேன வேதி³தப்³பா³னி, தஸ்மா தஸ்ஸா அத்த²ப்பகாஸனாய வுத்தனயேனபி வேதி³தப்³பா³னி.

உபக்கிலேஸவண்ணனா

58. ‘‘ஸம்மா ஆதி³யதீ’’தி வத்வா ஸம்மா ஆதி³யனஞ்சஸ்ஸ த³ள்ஹக்³கா³ஹோ ஏவாதி ஆஹ ‘‘த³ள்ஹம் க³ண்ஹாதீ’’தி. ‘‘ஸாஸனாவசரேனாபி தீ³பேதப்³ப³’’ந்தி வத்வா தம் த³ஸ்ஸேதும் ‘‘ஏகச்சோ ஹீ’’திஆதி³ வுத்தம், தேன து⁴தங்க³த⁴ரதாமத்தேன அத்தமனதா, பரிபுண்ணஸங்கப்பதா ஸம்மாபடிபத்தியா உபக்கிலேஸோதி இமமத்த²ம் த³ஸ்ஸேதி, ந யதா²வுத்ததபஸமாதா³னது⁴தங்க³த⁴ரதானம் ஸதிபி அனிய்யானிகத்தே ஸதி³ஸதந்தி த³ட்ட²ப்³ப³ம்.

‘‘து³வித⁴ஸ்ஸாபீதி ‘அத்தமனோ ஹோதி பரிபுண்ணஸங்கப்போ’தி ச ஏவம் உபக்கிலேஸபே⁴தே³ன வுத்தஸ்ஸ து³வித⁴ஸ்ஸாபி தபஸ்ஸினோ’’தி கேசி. யஸ்மா பன அட்ட²கதா²யம் ஸாஸனிகவஸேனாபி அத்தோ² தீ³பிதோ, தஸ்மா பா³ஹிரகஸ்ஸ, ஸாஸனிகஸ்ஸ சாதி ஏவம் து³வித⁴ஸ்ஸாபி தபஸ்ஸினோதி அத்தோ² வேதி³தப்³போ³. ததா² சேவ ஹி உபரிபி அத்த²வண்ணனம் வக்க²தீதி. ஏத்தாவதாதி யதி³த³ம் ‘‘கோ அஞ்ஞோ மயா ஸதி³ஸோ’’தி ஏவம் அதிமானஸ்ஸ, அனிட்டி²தகிச்சஸ்ஸேவ ச ‘‘அலமேத்தாவதா’’தி ஏவம் அதிமானஸ்ஸ ச உப்பாத³னம், ஏத்தாவதா.

உக்கம்ஸதீதி உக்கட்ட²ம் கரோதி. உக்கி²பதீதி அஞ்ஞேஸம் உபரி கி²பதி, பக்³க³ண்ஹாதீதி அத்தோ². பரம் ஸம்ஹாரேதீதி பரம் ஸம்ஹரம் நிஹீனம் கரோதி. அவக்கி²பதீதி அதோ⁴ கி²பதி, அவமஞ்ஞதீதி அத்தோ².

மானமத³கரணேனாதி மானஸங்கா²தஸ்ஸ மத³ஸ்ஸ கரணேன உப்பாத³னேன. முச்சி²தோ ஹோதீதி முச்சா²பன்னோ ஹோதி, ஸா பன முச்சா²பத்தி அபி⁴ஜ்ஜா²ஸீலப்³ப³தபராமாஸகாயக³ந்தே²ஹி க³தி⁴தசித்ததா, தத்த² ச அதிலக்³க³பா⁴வோதி ஆஹ ‘‘க³தி⁴தோ அஜ்ஜோ²ஸன்னோ’’தி. பமஜ்ஜனஞ்சேத்த² பமஜ்ஜனமேவாதி ஆஹ ‘‘பமாத³மாபஜ்ஜதீ’’தி. கேவலம் து⁴தங்க³ஸுத்³தி⁴கோ ஹுத்வா கம்மட்டா²னம் அனனுயுஞ்ஜந்தோ தாய ஏவ து⁴தங்க³ஸுத்³தி⁴கதாய அத்துக்கம்ஸனாதி³வஸேன பவத்தேய்யாதி த³ஸ்ஸேதும் ‘‘ஸாஸனே’’திஆதி³ வுத்தம். தேனாஹ ‘‘து⁴தங்க³மேவ…பே… பச்சேதீ’’தி.

59. தேயேவ பச்சயா. ஸுட்டு² கத்வா படிஸங்க²ரித்வா லத்³தா⁴தி ஆத³ரகா³ரவயோகே³ன ஸக்கச்சம் அபி⁴ஸங்க²ரித்வா தா³னவஸேன உபனயவஸேன லத்³தா⁴. வண்ணப⁴ணனந்தி கு³ணகித்தனம். அஸ்ஸாதி தபஸ்ஸினோ.

60. வோதா³ஸந்தி ப்³யாஸனம், விப⁴ஜ்ஜனந்தி அத்தோ². தம் பனேத்த² விப⁴ஜ்ஜனம் த்³விதா⁴ இச்சி²தந்தி ஆஹ ‘‘த்³வேபா⁴க³ம் ஆபஜ்ஜதீ’’தி. த்³வே பா⁴கே³ கரோதி ருச்சனாருச்சனவஸேன. கே³த⁴ஜாதோதி ஸஞ்ஜாதகே³தோ⁴. முச்ச²னம் நாம ஸதிவிப்பவாஸேனேவ ஹோதி, ந ஸதியா ஸதீதி ஆஹ ‘‘ஸமுட்ட²ஸ்ஸதீ’’தி. ஆதீ³னவமத்தம்பீதி க³தி⁴தாதி³பா⁴வேன பரிபோ⁴கே³ ஆதீ³னவமத்தம்பி ந பஸ்ஸதி. மத்தஞ்ஞுதாதி பரிபோ⁴கே³ மத்தஞ்ஞுதா. பச்சவேக்க²ணபரிபோ⁴க³மத்தம்பீதி பச்சவேக்க²ணமத்தேன பரிபோ⁴க³ம்பி ஏகவாரம் பச்சவேக்கி²த்வாபி பரிபு⁴ஞ்ஜனம்பி ந கரோதி.

61. விசக்கஸண்டா²னாதி விபுலதமசக்கஸண்டா²னா. ஸப்³ப³ஸ்ஸ பு⁴ஞ்ஜனதோ அயோகூடஸதி³ஸா த³ந்தா ஏவ த³ந்தகூடம்.அபஸாதே³தீதி பஸாதே³தி. அசேலகாதி³வஸேனாதி அசேலகவதாதி³வஸேன. லூகா²ஜீவிந்தி ஸல்லேக²படிபத்தியா லூக²ஜீவிகம்.

62. தபம் கரோதீதி பா⁴வனாமனஸிகாரலக்க²ணம் தபம் சரதி சரந்தோ விய ஹோதி. சங்கமம் ஓதரதி பா⁴வனம் அனுயுஞ்ஜந்தோ விய. விஹாரங்க³ணம் ஸம்மஜ்ஜதி வத்தபடிபத்திம் பூரேந்தோ விய.

‘‘ஆத³ஸ்ஸயமானோ’’தி வா பாடோ².

கிஞ்சி வஜ்ஜந்தி கிஞ்சி காயிகம் வா வாசஸிகம் வா தோ³ஸம். தி³ட்டி²க³தந்தி விபரீதத³ஸ்ஸனம். அருச்சமானந்தி அத்தனோ ஸித்³த⁴ந்தே படிக்கி²த்தபா⁴வேன அருச்சமானம். ருச்சதி மேதி ‘‘கப்பதி மே’’தி வத³தி. அனுஜானிதப்³ப³ந்தி தச்சா²விபரீதபூ⁴தபா⁴வேன ‘‘ஏவமேத’’ந்தி அனுஜானிதப்³ப³ம். ஸவனமனோஹாரிதாய ‘‘ஸாது⁴ ஸுட்டூ²’’தி அனுமோதி³தப்³ப³ம்.

63. குஜ்ஜ²னஸீலதாய கோத⁴னோ. வுத்தலக்க²ணோ உபனாஹோ ஏதஸ்ஸ அத்தீ²தி உபனாஹீ. ஏவம்பூ⁴தோ ச தம்ஸமங்கீ³ ஹோதீதி ‘‘ஸமன்னாக³தோ ஹோதீ’’தி வுத்தம். ஏஸ நயோ இதோ பரேஸுபி.

அயம் பன விஸேஸோ – இஸ்ஸதி உஸூயதீதி உஸ்ஸுகீ. ஸட²னம் அஸந்தகு³ணஸம்பா⁴வனம் ஸடோ², ஸோ ஏதஸ்ஸ அத்தீ²தி ஸடோ². ஸந்ததோ³ஸபடிச்சா²த³னஸபா⁴வா மாயா, மாயா ஏதஸ்ஸ அத்தீ²தி மாயாவீ. க³ருட்டா²னியானம்பி பணிபாதாகரணலக்க²ணம் த²ம்ப⁴னம் த²த்³த⁴ம், தமேத்த² அத்தீ²தி த²த்³தோ⁴. கு³ணேஹி ஸமானம், அதி⁴கஞ்ச அதிக்கமித்வா நிஹீனம் கத்வா மஞ்ஞனஸீலதாய அதிமானீ. அஸந்தகு³ணஸம்பா⁴வனத்தி²கதாஸங்கா²தா பாபா லாமகா இச்சா² ஏதஸ்ஸாதி பாபிச்சோ². மிச்சா² விபரீதா தி³ட்டி² ஏதஸ்ஸாதி மிச்சா²தி³ட்டி²கோ. ‘‘இத³மேவ ஸச்சம், மோக⁴மஞ்ஞ’’ந்தி (ம. நி. 187, 202, 427; 3.27, 29; உதா³. 55; மஹானி. 20; நேத்தி. 58) ஏவம் அத்தனா அத்தாபி⁴னிவிட்ட²தாய ஸதா தி³ட்டி² ஸந்தி³ட்டி², தமேவ பராமஸதீதி ஸந்தி³ட்டி²பராமாஸீ. அட்ட²கதா²யம் பன ‘‘ஸயம் தி³ட்டி² ஸந்தி³ட்டீ²’’தி வத்து²வஸேன அத்தோ² வுத்தோ. ஆ பா³ள்ஹம் விய தீ⁴யதீதி ஆதா⁴னந்தி ஆஹ ‘‘த³ள்ஹம் ஸுட்டு² ட²பித’’ந்தி. யதா²க³ஹிதம் கா³ஹம் படினிஸ்ஸஜ்ஜனஸீலோ படினிஸ்ஸக்³கீ³, தப்படிக்கே²பேன து³ப்படினிஸ்ஸக்³கீ³. படிஸேத⁴த்தோ² ஹி அயம் து³-ஸத்³தோ³ யதா² ‘‘து³ப்பஞ்ஞோ, (ம. நி. 1.449) து³ஸ்ஸீலோ’’தி (அ. நி. 5.213; 10.75; பாரா. 195; த⁴. ப. 308) ச.

பரிஸுத்³த⁴பபடிகப்பத்தகதா²வண்ணனா

64. இத⁴ நிக்³ரோத⁴ தபஸ்ஸீதி யதா²னுக்கந்தம் புரிமபாளிம் நிக³மனவஸேன ஏகதே³ஸேன த³ஸ்ஸேதி. தேனாஹ ‘‘ஏவம் ப⁴க³வா’’திஆதி³. க³ஹிதலத்³தி⁴ந்தி ‘‘அசேலகாதி³பா⁴வோ ஸேய்யோ, தேன ச ஸம்ஸாரஸுத்³தி⁴ ஹோதீ’’தி ஏவம் க³ஹிதலத்³தி⁴ம். ரக்கி²தம் தபந்தி தாய லத்³தி⁴யா ஸமாதி³யித்வா ரக்கி²தம் அசேலகவதாதி³தபம். ‘‘ஸப்³ப³மேவ ஸம்கிலிட்ட²’’ந்தி இமினா யம் வக்க²தி பரிஸுத்³த⁴பாளிவண்ணனாயம் ‘‘லூக²தபஸ்ஸினோ சேவ து⁴தங்க³த⁴ரஸ்ஸ ச வஸேன யோஜனா வேதி³தப்³பா³’’தி (தீ³. நி. அட்ட². 3.64), தஸ்ஸ பரிகப்பிதரூபஸ்ஸ லூக²ஸ்ஸ தபஸ்ஸினோதி அயமேத்த² அதி⁴ப்பாயோதி த³ஸ்ஸேதி. ‘‘பரிஸுத்³த⁴பாளித³ஸ்ஸனத்த²’’ந்தி ச இமினா தித்தி²யானம் வஸேன பாளி யேவேத்த² லப்³ப⁴தி, ந பன தத³த்தோ²தி த³ஸ்ஸேதி. வுத்தவிபக்க²வஸேனாதி வுத்தஸ்ஸ அத்த²ஸ்ஸ படிபக்க²வஸேன, படிக்கே²பவஸேனாதி அத்தோ². தஸ்மிம் டா²னேதி ஹேதுஅத்தே² பு⁴ம்மந்தி தஸ்ஸ ஹேதுஅத்தே²ன கரணவசனேன அத்த²ம் த³ஸ்ஸேந்தோ ‘‘ஏவம் ஸோ தேனா’’திஆதி³மாஹ. உத்தரி வாயமமானோதி யதா²ஸமாதி³ன்னேஹி து⁴தத⁴ம்மேஹி அபரிதுட்டோ², அபரியோஸிதஸங்கப்போ ச ஹுத்வா உபரி பா⁴வனானுயோக³வஸேன ஸம்மாவாயாமம் கரோந்தோ.

69. இதோ பரந்தி இதோ யதா²வுத்தனயதோ பரம். அக்³க³பா⁴வம் வா ஸாரபா⁴வம் வாதி தபோஜிகு³ச்சா²ய அக்³க³பா⁴வம் வா ஸாரபா⁴வம் வா அஜானந்தோ. ‘‘அயமேவஸ்ஸ அக்³க³பா⁴வோ ஸாரபா⁴வோ’’தி மஞ்ஞமானோ ‘‘அக்³க³ப்பத்தா, ஸாரப்பத்தா சா’’தி ஆஹ.

பரிஸுத்³த⁴தசப்பத்தாதி³கதா²வண்ணனா

70. யமனம் ஸம்யமனம் யாமோ, ஹிம்ஸாதீ³னம் அகரணவஸேன சதுப்³பி³தோ⁴ யாமோவ சாதுயாமோ, ஸோ ஏவ ஸம்வரோ, தேன ஸம்வுதோ கு³த்தஸப்³ப³த்³வாரோ சாதுயாமஸம்வரஸம்வுதோ. தேனாஹ ‘‘சதுப்³பி³தே⁴ன ஸம்வரேன பிஹிதோ’’தி. அதிபாதனம் ஹிம்ஸனந்தி ஆஹ ‘‘பாணம் ந ஹனதீ’’தி. லோப⁴சித்தேன பா⁴விதம் ஸம்பா⁴விதந்தி கத்வா பா⁴விதம் நாம பஞ்ச காமகு³ணா. அயஞ்ச தேஸு தேஸம்யேவ ஸமுதா³சாரோ மக்³கோ³ட்டா²பகம் வியாதி ஆஹ ‘‘தேஸம் ஸஞ்ஞாயா’’தி.

ஏதந்தி அபி⁴ஹரணம், ஹீனாய அனாவத்தனஞ்ச. தேனாஹ ‘‘ஸோ அபி⁴ஹரதீதி ஆதி³லக்க²ண’’ந்தி. அபி⁴ஹரதீதி அபி⁴பு³த்³தி⁴ம் நேதி. தேனாஹ ‘‘உபரூபரி வட்³டே⁴தீ’’தி. சக்கவத்தினாபி பப்³ப³ஜிதஸ்ஸ அபி⁴வாத³னாதி³ கரீயதேவாதி பப்³ப³ஜ்ஜா ஸேட்டா² கு³ணவிஸேஸயோக³தோ, தோ³ஸவிரஹிததோ ச, யதோ ஸா பண்டி³தபஞ்ஞத்தா வுத்தா. கி³ஹிபா⁴வோ பன நிஹீனோ தது³ப⁴யாபா⁴வதோதி ஆஹ ‘‘ஹீனாய கி³ஹிபா⁴வத்தா²யா’’தி.

71. தசப்பத்தாதி தசம் பத்தா, தசஸதி³ஸா ஹோதீதி அத்தோ².

74. தித்தி²யானம் வஸேனாதி தித்தி²யானம் ஸமயவஸேன. நேஸந்தி தித்தி²யானம். தந்தி தி³ப்³ப³சக்கு²ம். ஸீலஸம்பதா³தி ஸப்³பா³காரஸம்பன்னம் சதுபாரிஸுத்³தி⁴ஸீலம். தசஸாரஸம்பத்திதோதி தசதபோஜிகு³ச்சா²யாஸாரஸம்பத்திதோ. விஸேஸபா⁴வந்தி விஸேஸஸபா⁴வம்.

அசேலகபாளிமத்தம்பீதி அசேலகபாளிஆக³தத்த²மத்தம்பி நத்தி², தஸ்மா மயம் அனஸ்ஸாம வினட்டா²தி அத்தோ². அ-காரோ வா நிபாதமத்தம், நஸ்ஸாமாதி வினஸ்ஸாம. குதோ பரிஸுத்³த⁴பாளீதி குதோ ஏவ அம்ஹேஸு பரிஸுத்³த⁴பாளிஆக³தபடிபத்தி. ஏஸ நயோ ஸேஸேஸுபி. ஸுதிவஸேனாபீதி ஸோதபதா²க³மனமத்தேனாபி ந ஜானாம.

நிக்³ரோத⁴ஸ்ஸபஜ்ஜா²யனவண்ணனா

75. அஸ்ஸாதி ஸந்தா⁴னஸ்ஸ க³ஹபதிஸ்ஸ. கக்க²ளந்தி ப²ருஸம். து³ராஸத³வசனந்தி அவத்தப்³ப³வசனம். யஸ்மா ப²ருஸவசனம் யம் உத்³தி³ஸ்ஸ பயுத்தம், தஸ்மிம் க²மாபிதே க²மாபகஸ்ஸ படிபாகதிகம் ஹோதி, தஸ்மா ‘‘அயம் மயீ’’திஆதி³ வுத்தம்.

76. போ³த⁴த்தா²ய த⁴ம்மம் தே³ஸேதி, ந அத்தனோ பு³த்³த⁴பா⁴வகோ⁴ஸனத்தா²ய. வாத³த்தா²யாதி பரவாத³ப⁴ஞ்ஜனவாத³த்தா²ய. ராகா³தி³ஸமனத்தா²ய த⁴ம்மம் தே³ஸேதி, ந அந்தேவாஸிகம்யதாய. ஓக⁴னித்த²ரணத்தா²யாதி சதுரோக⁴னித்த²ரணத்தா²ய த⁴ம்மம் தே³ஸேதி ஸப்³ப³ஸோ ஓரபாராதிண்ணமாவஹத்தா தே³ஸனாய. ஸப்³ப³கிலேஸபரினிப்³பா³னத்தா²ய த⁴ம்மம் தே³ஸேதி கிலேஸானம் லேஸேனபி தே³ஸனாய அபராமட்ட²பா⁴வதோ.

ப்³ரஹ்மசரியபரியோஸானாதி³வண்ணனா

77. இத³ம் ஸப்³ப³ம்பீதி ஸத்தவஸ்ஸதோ பட்டா²ய யாவ ‘‘ஸத்தாஹ’’ந்தி பத³ம், இத³ம் ஸப்³ப³ம்பி வசனம். அஸடோ² பன அமாயாவீ உஜுஜாதிகோ திக்க²பஞ்ஞோ உக்³க⁴டிதஞ்ஞூதி அதி⁴ப்பாயோ. ஸோ ஹி தம்முஹுத்தேனேவ அரஹத்தம் பத்தும் ஸக்கி²ஸ்ஸதீதி. வங்கவங்கோதி காயவங்காதீ³ஹிபி வங்கேஹி வங்கோ ஜிம்ஹோ குடிலோ. ‘‘ஸட²ம் பனாஹம் அனுஸாஸிதும் ந ஸக்கோமீ’’தி ந இத³ம் ப⁴க³வா கிலாஸுபா⁴வேனேவ வத³தி, அத² கோ² தஸ்ஸ அபா⁴ஜனபா⁴வேனேவ.

78. பகதியா ஆசரியோதி யோ ஏவ தும்ஹாகம் இதோ புப்³பே³ பகதியா ஆசரியோ அஹோஸி, ஸோ ஏவ இதா³னிபி புப்³பா³சிண்ணவஸேன ஆசரியோ ஹோது, ந மயம் தும்ஹே அந்தேவாஸிகே காதுகாமாதி அதி⁴ப்பாயோ. ந மயம் தும்ஹாகம் உத்³தே³ஸேன அத்தி²கா, த⁴ம்மதந்தி மேவ பன தும்ஹே ஞாபேதுகாமம்ஹாதி அதி⁴ப்பாயோ. ஆஜீவதோதி ஜீவிகாய வுத்திதோ. அகுஸலாதி கோட்டா²ஸம் பத்தாதி அகுஸலாதி தம் தம் கோட்டா²ஸதம்யேவ உபக³தா. கிலேஸத³ரத²ஸம்பயுத்தாதி கிலேஸத³ரத²ஸஹிதா தம்ஸம்ப³ந்த⁴னதோ. ஜாதிஜராமரணானம் ஹிதாதி ஜாதிஜராமரணியா. ஸம்கிலேஸோ ஏத்த² அத்தி², ஸம்கிலேஸே வா நியுத்தாதி ஸம்கிலேஸிகா. வோதா³னம் வுச்சதி விஸுத்³தி⁴, தஸ்ஸ பச்சயபூ⁴தத்தா வோதா³னியா. ததா²பூ⁴தா சேதே வோதா³பேந்தீதி ஆஹ ‘‘ஸத்தே வோதா³பேந்தீ’’தி. ஸிகா²ப்பத்தா பஞ்ஞாய பாரிபூரிவேபுல்லதா மக்³க³ப²லவஸேனேவ இச்சி²தப்³பா³தி ஆஹ ‘‘மக்³க³பஞ்ஞா…பே… வேபுல்லத’’ந்தி. உபோ⁴பி வா ஏதானி பாரிபூரிவேபுல்லானி. யா ஹி தஸ்ஸ பாரிபூரீ, ஸா ஏவ வேபுல்லதாதி. ததோதி ஸம்கிலேஸத⁴ம்மப்பஹானவோதா³னத⁴ம்மாபி⁴பு³த்³தி⁴ஹேது.

79. ‘‘யதா² மாரேனா’’தி நயித³ம் நித³ஸ்ஸனவஸேன வுத்தம், அத² கோ² ததா²பா⁴வகத²னமேவாதி த³ஸ்ஸேதும் ‘‘மாரோ கிரா’’திஆதி³ வுத்தம். அதா²தி மாரேன தேஸம் பரியுட்டா²னப்பத்திதோ பச்சா² அஞ்ஞாஸீதி யோஜனா. கஸ்மா பன ப⁴க³வா பகே³வ ந அஞ்ஞாஸீதி? அனாவஜ்ஜிதத்தா. மாரம் படிபா³ஹித்வாதி மாரேன தேஸு கதம் பரியுட்டா²னம் வித⁴மேத்வா, ந தேஸம் ஸதி பயோஜனே பு³த்³தா⁴னம் து³க்கரம். ஸோதி மக்³க³ப²லுப்பத்திஹேது. தேஸம் பரிப்³பா³ஜகானம்.

பு²ட்டா²தி பரியுட்டா²னவஸேன பு²ட்டா². யத்ராதி நித்³தா⁴ரணே பு⁴ம்மந்தி ஆஹ ‘‘யேஸூ’’தி. அஞ்ஞாணத்த²ந்தி ஆஜானனத்த²ம், உபஸக்³க³மத்தஞ்சேத்த² ஆ-காரோதி ஆஹ ‘‘ஜானனத்த²’’ந்தி, வீமம்ஸனத்த²ந்தி அத்தோ². சித்தம் நுப்பன்னந்தி ‘‘ஜானாம தாவஸ்ஸ த⁴ம்ம’’ந்தி ஆஜானனத்த²ம் ‘‘ப்³ரஹ்மசரியம் சரிஸ்ஸாமா’’தி ஏகஸ்மிம் தி³வஸே ஏகவாரம்பி தேஸம் சித்தம் நுப்பன்னம். ஸத்தாஹோ பன வுச்சமானோ ஏதேஸம் கிம் கரிஸ்ஸதீதி யோஜனா. ஸத்தாஹம் பூரேதுந்தி ஸத்தாஹம் ப்³ரஹ்மசரியம் பூரேதும், ப்³ரஹ்மசரியவஸேன வா ஸத்தாஹம் பூரேதுந்தி அத்தோ². பரவாத³பி⁴ந்த³னந்தி பரவாத³மத்³த³னம். ஸகவாத³ஸமுஸ்ஸாபனந்தி ஸகவாத³பக்³க³ண்ஹனம். வாஸனாயாதி ஸச்சஸம்படிவேத⁴வாஸனாய. நேஸந்தி ச பகரணவஸேன வுத்தம். தத³ஞ்ஞேஸம்பி ஹி ப⁴க³வதோ ஸம்முகா², பரம்பராய ச தே³வமனுஸ்ஸானம் ஸுணந்தானம் வாஸனாய பச்சயோ ஏவாதி. யம் பனேத்த² அத்த²தோ ந விப⁴த்தம், தம் ஸுவிஞ்ஞேய்யமேவாதி.

உது³ம்ப³ரிகஸுத்தவண்ணனாய லீனத்த²ப்பகாஸனா.