4. மஹாஸுத³ஸ்ஸனஸுத்தவண்ணனா

குஸாவதீராஜதா⁴னீவண்ணனா

242. ஸோவண்ணமயாதி ஸுவண்ணமயா. அயம் பாகாரோதி ஸப்³ப³ரதனமயோ பாகாரோ. தயோ தயோதி அந்தோ ச தயோ, ப³ஹி ச தயோதி தயோ தயோ.

ஏஸிகத்த²ம்போ⁴ இந்த³கீ²லோ நக³ரஸோப⁴னோ அலங்காரத்த²ம்போ⁴. அங்கீ³யதி ஞாயதி புது²லபா⁴வோ ஏதேனாதி அங்க³ம், பரிக்கே²போ. திபோரிஸம் அங்க³ம் ஏதிஸ்ஸாதி திபோரிஸங்கா³. தேனாஹ ‘‘தேனா’’திஆதி³. தேன பஞ்சஹத்த²ப்பமாணேன திபோரிஸேன. பண்ணப²லேஸுபீதி ஸப்³ப³ரதனமயானம் தாலானம் பண்ணப²லேஸுபி. ஏஸேவ நயோதி ‘‘பண்ணேஸு ஏகம் பத்தகம் ஸோவண்ணமயம், ஏகம் ரூபியமயம். ப²லேஸுபி ஏகோ லேகா²பா⁴வோ ஸோவண்ணமயோ, ஏகோ ரூபியமயோ’’திஆதி³கோ அயமத்தோ² அதிதி³ட்டோ². பாகாரந்தரேதி த்³வின்னம் த்³வின்னம் பாகாரானம் அந்தரே. ஏகேகா ஹுத்வா டி²தா தாலபந்தி.

சே²கோதி படு ஸுவிஸதோ³, ஸோ சஸ்ஸ படுபா⁴வோ மனோஸாரோதி ஆஹ ‘‘ஸுந்த³ரோ’’தி. ரஞ்ஜேதுந்தி ராக³ம் உப்பாதே³தும். க²மதேவாதி ரோசதேவ. ந பீ³ப⁴ச்சே²தீதி ந தஜ்ஜேதி, ஸோதஸுக²பா⁴வதோ பியாயிதப்³போ³ ச ஹோதி. கும்ப⁴து²ணத³த்³த³ரிகாதி³ ஏகதலம் தூரியம். உப⁴யதலம் பாகடமேவ. ஸப்³ப³தோ பரியோனத்³த⁴ம் சதுரஸ்ஸஅம்ப³ணகம், பணவாதி³ ச. வம்ஸாதீ³தி ஆதி³-ஸத்³தே³ன ஸங்கா²தி³கம் ஸங்க³ண்ஹாதி. ஸுமுச்சி²தஸ்ஸாதி ஸுட்டு² பரியத்தஸ்ஸ. பமாணேதி நாதித³ள்ஹனாதிஸிதி²லதாஸங்கா²தே மஜ்ஜி²மே முச்ச²னப்பமாணே. ஹத்த²ம் வா பாத³ம் வா சாலேத்வாதி ஹத்த²லயபாத³லயே ஸஜ்ஜேத்வா. நச்சந்தாதி ஸாகா²னச்சம் நச்சந்தா.

சக்கரதனவண்ணனா

243. உபோஸத²ம் வுச்சதி அட்ட²ங்க³ஸமன்னாக³தம் ஸப்³ப³தி³வஸேஸு க³ஹட்டே²ஹி ரக்கி²தப்³ப³ஸீலம், ஸமாதா³னவஸேன தம் தஸ்ஸ அத்தீ²தி உபோஸதி²கோ, தஸ்ஸ உபோஸதி²கஸ்ஸ. தேனாஹ ‘‘ஸமாதி³ன்னஉபோஸத²ங்க³ஸ்ஸா’’தி. ததா³தி தஸ்மிம் காலே. கஸ்மிம் பன காலேதி? யஸ்மிம் காலே சக்கவத்திபா⁴வஸம்வத்தனியதா³னஸீலாதி³புஞ்ஞஸம்பா⁴ரஸமுதா³க³மஸம்பன்னோ பூரிதசக்கவத்திவத்தோ காலதீ³பதே³ஸவிஸேஸபச்சாஜாதியா சேவ குலரூபபோ⁴கா³தி⁴பதேய்யாதி³கு³ணவிஸேஸஸம்பத்தியா ச தத³னுரூபே அத்தபா⁴வே டி²தோ ஹோதி, தஸ்மிம் காலே. தாதி³ஸே ஹி காலே சக்கவத்திபா⁴வீ புரிஸவிஸேஸோ யதா²வுத்தகு³ணஸமன்னாக³தோ ராஜா க²த்தியோ முத்³தா⁴வஸித்தோ விஸுத்³த⁴ஸீலோ அனுபோஸத²ம் ஸதஸஹஸ்ஸவிஸ்ஸஜ்ஜனாதி³னா ஸம்மாபடிபத்திம் படிபஜ்ஜதி, ந யதா³ சக்கரதனம் உப்பஜ்ஜதி, ததா³ ஏவ. இமே ச விஸேஸா ஸப்³ப³சக்கவத்தீனம் ஸாதா⁴ரணவஸேன வுத்தா. தேனாஹ ‘‘பாதோவ…பே… த⁴ம்மதா’’தி. போ³தி⁴ஸத்தானம் பன சக்கவத்திபா⁴வாவஹகு³ணாபி சக்கவத்திகு³ணாபி ஸாதிஸயாவ ஹோந்தி.

வுத்தப்பகாரபுஞ்ஞகம்மபச்சயந்தி சக்கவத்திபா⁴வாவஹதா³னத³மஸம்யமாதி³புஞ்ஞகம்மஹேதுகம். நீலமணிஸங்கா⁴தஸதி³ஸந்தி இந்த³னீலமணிஸஞ்சயஸமானம். தி³ப்³பா³னுபா⁴வயுத்தத்தாதி த³ஸ்ஸனேய்யதா, மனுஞ்ஞகோ⁴ஸதா, ஆகாஸகா³மிதா, ஓபா⁴ஸவிஸ்ஸஜ்ஜனா, அப்படிகா⁴ததா, ரஞ்ஞோ இச்சி²தத்த²னிப்ப²த்திகாரணதாதி ஏவமாதீ³ஹி தி³ப்³ப³ஸதி³ஸேஹி ஆனுபா⁴வேஹி ஸமன்னாக³தத்தா, ஏதேன தி³ப்³ப³ம் வியாதி தி³ப்³ப³ந்தி த³ஸ்ஸேதி. ந ஹி தம் தே³வலோகபரியாபன்னம். ஸஹஸ்ஸம் அரா ஏதஸ்ஸாதி வா ஸஹஸ்ஸாரம். ஸப்³பே³ஹி ஆகாரேஹீதி ஸப்³பே³ஹி ஸுந்த³ரேஹி பரிபுண்ணாவயவே லக்க²ணஸம்பன்னே சக்கே இச்சி²தப்³பே³ஹி ஆகாரேஹி. பரிபூரந்தி பரிபுண்ணம், ஸா சஸ்ஸா பாரிபூரிம் இதா³னேவ வித்தா²ரேஸ்ஸதி.

பனாளீதி சி²த்³த³ம். ஸுத்³த⁴ஸினித்³த⁴த³ந்தபந்தியா நிப்³பி³வராயாதி அதி⁴ப்பாயோ. தஸ்ஸா பன பனாளியா ஸமந்ததோ பஸ்ஸஸ்ஸ ரஜதமயத்தா ஸாரரஜதமயா வுத்தா. யஸ்மா சஸ்ஸ சக்கஸ்ஸ ரத²சக்கஸ்ஸ விய அந்தோபா⁴வோ நாம நத்தி², தஸ்மா வுத்தம் ‘‘உபோ⁴ஸுபி பா³ஹிரந்தேஸூ’’தி. கதபரிக்கே²பா ஹோதி பனாளீதி யோஜனா. நாபி⁴பனாளிபரிக்கே²பபட்டேஸூதி நாபி⁴பரிக்கே²பபட்டே சேவ நாபி⁴யா பனாளிபரிக்கே²பபட்டே ச.

தேஸந்தி அரானம். க⁴டகா நாம அலங்காரபூ⁴தா கு²த்³த³கபுண்ணக⁴டா. ததா² மணிகா நாம முத்தாவளிகா. பரிச்சே²த³லேகா² தஸ்ஸ தஸ்ஸ பரிச்சே²த³த³ஸ்ஸனவஸேன டி²தா பரிச்சி²ன்னலேகா². ஆதி³-ஸத்³தே³ன மாலாகம்மாதி³ம் ஸங்க³ண்ஹாதி. ஸுவிப⁴த்தானேவாதி அஞ்ஞமஞ்ஞம் அஸம்கிண்ணத்தா ஸுட்டு² விப⁴த்தானி.

‘‘ஸுரத்தா’’திஆதீ³ஸு ஸுரத்தக்³க³ஹணேன மஹானாமவண்ணதம் படிக்கி²பதி, ஸுத்³த⁴க்³க³ஹணேன ஸம்ங்கிலிட்ட²தம், ஸினித்³த⁴க்³க³ஹணேன லூக²தம். காமம் தஸ்ஸ சக்கரதனஸ்ஸ நேமிமண்ட³லம் அஸந்தி⁴கமேவ நிப்³ப³த்தம், ஸப்³ப³த்த²கமேவ பன கேவலம் பவாளவண்ணேன ச ஸோப⁴தீதி பகதிசக்கஸ்ஸ ஸந்தி⁴யுத்தட்டா²னே ஸுரத்தஸுவண்ணபட்டாதி³மயாஹி வட்டபரிச்சே²த³லேகா²ஹி பஞ்ஞாயமானாஹி ஸஸந்தி⁴கா விய தி³ஸ்ஸந்தீதி ஆஹ ‘‘ஸந்தீ⁴ஸு பனஸ்ஸா’’திஆதி³.

நேமிமண்ட³லபிட்டி²யந்தி நேமிமண்ட³லஸ்ஸ பிட்டி²பதே³ஸே. ஆகாஸசாரிபா⁴வதோ ஹிஸ்ஸ தத்த² வாதக்³கா³ஹீ பவாளத³ண்டோ³ ஹோதி. த³ஸன்னம் த³ஸன்னம் அரானம் அந்தரேதி த³ஸன்னம் த³ஸன்னம் அரானம் அந்தரே ஸமீபே பதே³ஸே. சி²த்³த³மண்ட³லக²சிதோதி மண்ட³லஸண்டா²னசி²த்³த³விசித்தோ. ஸுகுஸலஸமன்னாஹதஸ்ஸாதி ஸுட்டு² குஸலேன ஸிப்பினா பஹதஸ்ஸ, வாதி³தஸ்ஸாதி அத்தோ². வக்³கூ³தி மனோரமோ. ரஜனீயோதி ஸுணந்தானம் ராகு³ப்பாத³கோ. கமனீயோதி கந்தோ. ஸமோஸரிதகுஸுமதா³மாதி ஓலம்பி³தஸுக³ந்த⁴குஸுமதா³மா. நேமிபரிக்கே²பஸ்ஸாதி நேமிபரியந்தபரிக்கே²பஸ்ஸ. நாபி⁴பனாளியா த்³வின்னம் பஸ்ஸானம் வஸேன ‘‘த்³வின்னம்பி நாபி⁴பனாளீன’’ந்தி வுத்தம். ஏகா ஏவ ஹி ஸா பனாளி. யேஹீதி யேஹி த்³வீஹி முகே²ஹி. புன யேஹீதி யேஹி முத்தகலாபேஹி.

ஓதா⁴பயமானந்தி ஸோதும் அவஹிதானி குருமானம்.

சந்தோ³ புரதோ சக்கரதனம் பச்சா²தி ஏவம் புப்³பா³பரியேன புப்³பா³பரபா⁴வேன.

அந்தேபுரஸ்ஸாதி அனுராத⁴புரே ரஞ்ஞோ அந்தேபுரஸ்ஸ. உத்தரஸீஹபஞ்ஜரஸதி³ஸேதி ததா³ ரஞ்ஞோ பாஸாதே³ தாதி³ஸஸ்ஸ உத்தரதி³ஸாய ஸீஹபஞ்ஜரஸ்ஸ லப்³ப⁴மானத்தா வுத்தம். ஸுகே²ன ஸக்காதி கிஞ்சி அனாருஹித்வா, ஸரீரஞ்ச அனுல்லங்கி⁴த்வா யதா²டி²தேனேவ ஹத்தே²ன புப்ப²முட்டி²யோ கி²பித்வா ஸுகே²ன ஸக்கா ஹோதி பூஜேதும்.

நானாவிராக³ரதனப்பபா⁴ஸமுஜ்ஜலந்தி நானாவித⁴விசித்தவண்ணரதனோபா⁴ஸபப⁴ஸ்ஸரம். ஆகாஸம் அப்³பு⁴க்³க³ந்த்வா பவத்தேதி ஆக³ந்த்வா டி²தட்டா²னதோ உபரி ஆகாஸம் அப்³பு⁴க்³க³ந்த்வா பவத்தே.

244. ராஜாயுத்தாதி ரஞ்ஞோ கிச்சே ஆயுத்தகபுரிஸா.

ஸினேரும் வாமபஸ்ஸேன கத்வா தஸ்ஸ து⁴ரதரம் க³ச்ச²ந்தோ ‘‘வாமபஸ்ஸேன ஸினேரும் பஹாயா’’தி வுத்தம்.

வினிப்³பே³தே⁴னாதி திரியம் வினிவிஜ்ஜ²னவஸேன. ஸன்னிவேஸக்க²மோதி க²ந்தா⁴வாரஸன்னிவேஸயோக்³யோ. ஸுலபா⁴ஹாருபகரணோதி ஸுகே²னேவ லத்³த⁴ப்³ப³த⁴ஞ்ஞகோ³ரஸதா³ருதிணாதி³போ⁴ஜனஸாத⁴னோ.

பரசக்கந்தி பரஸ்ஸ ரஞ்ஞோ ஸேனா, ஆணா வா.

ஆக³மனனந்த³னோதி ஆக³மனேன நந்தி³ஜனனோ. க³மனேன ஸோசேதீதி க³மனஸோசனோ. உபகப்பேதா²தி உபரூபரி கப்பேத², ஸம்வித³ஹத² உபனேதா²தி அத்தோ². உபபரிக்கி²த்வாதி ஹேதுதோபி ஸபா⁴வதோபி ப²லதோபி தி³ட்ட²த⁴ம்மிகஸம்பராயிகாதி³ஆதீ³னவதோபி வீமம்ஸித்வா. விபா⁴வேந்தி பஞ்ஞாய அத்த²ம் விபூ⁴தம் கரோந்தீதி விபா⁴வினோ, பஞ்ஞவந்தோ. அனுயந்தாதி அனுவத்தகா, அனுவத்தகபா⁴வேனேவ, பன ரஞ்ஞோ ச மஹானுபா⁴வேன தே ஜிகு³ச்ச²னவஸேன பாபதோ அனோரமந்தாபி ஏகச்சே ஓத்தப்பவஸேன ஓரமந்தீதி வேதி³தப்³ப³ம்.

ஓக³ச்ச²மானந்தி ஓஸீத³ந்தம். யோஜனமத்தந்தி வித்தா²ரதோ யோஜனமத்தம் பதே³ஸம். க³ம்பீ⁴ரபா⁴வேன பன யதா² பூ⁴மி தி³ஸ்ஸதி, ஏவம் ஓக³ச்ச²தி. தேனாஹ ‘‘மஹாஸமுத்³த³தல’’ந்திஆதி³. அந்தே சக்கரதனம் உத³கேன ஸேனாய அனஜ்ஜோ²த்த²ரணத்த²ம். புரத்தி²மோ மஹாஸமுத்³தோ³ பரியந்தோ ஏதஸ்ஸாதி புரத்தி²மமஹாஸமுத்³த³பரியந்தோ, தம் புரத்தி²மமஹாஸமுத்³த³பரியந்தம், புரத்தி²மமஹாஸமுத்³த³ம் பரியந்தம் கத்வாதி அத்தோ².

சாதுரந்தாயாதி சதுஸமுத்³த³ந்தாய, புரத்தி²மதி³ஸாதி³சதுகோட்டா²ஸந்தாய வா. ஸோப⁴யமானம் வியாதி விய-ஸத்³தோ³ நிபாதமத்தம். அத்தனோ அச்ச²ரியகு³ணேஹி ஸோப⁴ந்தமேவ ஹி தம் திட்ட²தி. பாளியம்பி ஹி ‘‘உபஸோப⁴யமானம்’’ த்வேவ வுத்தம்.

ஹத்தி²ரதனவண்ணனா

246. ஹரிசந்த³னாதீ³ஹீதி ஆதி³-ஸத்³தே³ன சதுஜ்ஜாதியக³ந்தா⁴தி³ம் ஸங்க³ண்ஹாதி. ஆக³மனம் சிந்தேதா²தி வத³ந்தி சக்கவத்திவத்தஸ்ஸ பூரிததாய பரிசிதத்தா. காளதிலகாதீ³னம் அபா⁴வேன விஸுத்³த⁴ஸேதஸரீரோ. ஸத்தபதிட்டோ²தி பூ⁴மிபு²ஸனகேஹி வாலதி⁴, வரங்க³ம், ஹத்தோ²தி இமேஹி ச தீஹி, சதூஹி பாதே³ஹி சாதி ஸத்தஹி அவயவேஹி பதிட்டி²தத்தா ஸத்தபதிட்டோ². ஸப்³ப³கனிட்டோ²தி ஸப்³பே³ஹி ச²த்³த³ந்தகுலஹத்தீ²ஹி ஹீனோ. உபோஸத²குலா ஸப்³ப³ஜேட்டோ²தி உபோஸத²குலதோ ஆக³ச்ச²ந்தோ தத்த² ஸப்³ப³ப்பதா⁴னோ ஆக³ச்ச²தீதி யோஜனா. வுத்தனயேனாதி ‘‘மஹாதா³னம் த³த்வா’’திஆதி³னா வுத்தேன நயேன. சக்கவத்தீனம், சக்கவத்திபுத்தானஞ்ச சக்கவத்திம் உத்³தி³ஸ்ஸ சிந்தயந்தானம் ஆக³ச்ச²தி. அபனேத்வாதி அத்தனோ ஆனுபா⁴வேன அபனேத்வா. க³ந்த⁴மேவ ஹி தஸ்ஸ இதரே ஹத்தீ² ந ஸஹந்தி.

க⁴ரதே⁴னுவச்ச²கோ வியாதி க⁴ரே பரிசிததே⁴னுயா தத்தே²வ ஜாதஸம்வத்³த⁴வச்ச²கோ விய. ஸகலபத²விந்தி ஸகலம் ஜம்பு³தீ³பஸஞ்ஞிதம் பத²விம்.

அஸ்ஸரதனவண்ணனா

247. ஸிந்த⁴வகுலதோதி ஸிந்த⁴வஸ்ஸாஜானீயகுலதோ.

மணிரதனவண்ணனா

248. ஸகடனாபி⁴ஸமபரிணாஹந்தி பரிணாஹதோ மஹாஸகடஸ்ஸ நாபி⁴யா ஸமப்பமாணம். உபோ⁴ஸு அந்தேஸூதி ஹேட்டா², உபரி சாதி த்³வீஸு அந்தேஸு. கண்ணிகபரியந்ததோதி த்³வின்னம் கஞ்சனபது³மானம் கண்ணிகாய பரியந்ததோ. முத்தாஜாலகே ட²பேத்வாதி ஸுவிஸுத்³தே⁴ முத்தமயே ஜாலகே பதிட்டா²பேத்வா. அருணுக்³க³மனவேலா வியாதி அருணுக்³க³மனஸீஸேன ஸூரியஉத³யக்க²ணம் உபலக்கே²தி.

இத்தி²ரதனவண்ணனா

249. ‘‘இத்தி²ரதனம் பாதுப⁴வதீ’’தி வத்வா குதஸ்ஸா பாதுபா⁴வோதி த³ஸ்ஸேதும் ‘‘மத்³த³ராஜகுலதோ’’திஆதி³ வுத்தம். மத்³த³ரட்ட²ம் கிர ஜம்பு³தீ³பே அபி⁴ரூபானம் இத்தீ²னம் உப்பத்திட்டா²னம். ததா² ஹி ‘‘ஸிஞ்சயமஹாராஜஸ்ஸ தே³வீ, வேஸ்ஸந்தரமஹாராஜஸ்ஸ தே³வீ, ப⁴த்³த³காபிலானீ’’தி ஏவமாதி³ இத்தி²ரதனம் மத்³த³ரட்டே² ஏவ உப்பன்னம். புஞ்ஞானுபா⁴வேனாதி சக்கவத்திரஞ்ஞோ புஞ்ஞதேஜேன.

ஸண்டா²னபாரிபூரியாதி ஹத்த²பாதா³தி³ஸரீராவயவானம் ஸுஸண்டி²தாய. அவயவபாரிபூரியா ஹி ஸமுதா³யபாரிபூரிஸித்³தி⁴. ரூபந்தி ஸரீரம் ‘‘ரூபம் த்வேவ ஸங்க²ம் க³ச்ச²தீ’’திஆதீ³ஸு (ம. நி. 1.306) விய. த³ஸ்ஸனீயாதி ஸுரூபபா⁴வேன பஸ்ஸிதப்³ப³யுத்தா. தேனாஹ ‘‘தி³ஸ்ஸமானாவா’’திஆதி³. ஸோமனஸ்ஸவஸேன சித்தம் பஸாதே³தி யோனிஸோ சிந்தேந்தானம் கம்மப²லஸத்³தா⁴ய வஸேன. பஸாதா³வஹத்தாதி காரணவசனேன யதா² பாஸாதி³கதாய வண்ணபோக்க²ரதாஸித்³தி⁴ வுத்தா, ஏவம் த³ஸ்ஸனீயதாய பாஸாதி³கதாஸித்³தி⁴, அபி⁴ரூபதாய ச த³ஸ்ஸனீயதாஸித்³தி⁴ வத்தப்³பா³தி நயம் த³ஸ்ஸேதி. படிலோமதோ வா வண்ணபோக்க²ரதாய பாஸாதி³கதாஸித்³தி⁴, பாஸாதி³கதாய த³ஸ்ஸனீயதாஸித்³தி⁴, த³ஸ்ஸனீயதாய அபி⁴ரூபதாஸித்³தி⁴ யோஜேதப்³பா³. ஏவம் ஸரீரஸம்பத்திவஸேன அபி⁴ரூபதாதி³கே த³ஸ்ஸேத்வா இதா³னி ஸரீரே தோ³ஸாபா⁴வவஸேனபி தே த³ஸ்ஸேதும் ‘‘அபி⁴ரூபா வா’’திஆதி³ வுத்தம். தத்த² யதா² பமாணயுத்தா, ஏவம் ஆரோஹபரிணாஹயோக³தோ ச பாஸாதி³கா நாதிதீ³க⁴தாத³யோ, ஏவம் மனுஸ்ஸானம் தி³ப்³ப³ரூபதாஸம்பத்திபீதி ‘‘அப்பத்தா தி³ப்³ப³வண்ண’’ந்தி வுத்தம்.

ஆரோஹஸம்பத்தி வுத்தா உப்³பே³தே⁴ன பாஸாதி³கபா⁴வதோ. பரிணாஹஸம்பத்தி வுத்தா கிஸதூ²லதோ³ஸாபா⁴வதோ. வண்ணஸம்பத்தி வுத்தா விவண்ணதாபா⁴வதோ. காயவிபத்தியாதி ஸரீரதோ³ஸஸ்ஸ. ஸதவாரவிஹதஸ்ஸாதி ஸத்தக்க²த்தும் விஹதஸ்ஸ, ‘‘ஸதவாரவிஹதஸ்ஸா’’தி ச இத³ம் கப்பாஸபிசுவஸேன வுத்தம், தூலபிசுனோ பன விஹனனமேவ நத்தி². குங்குமதக³ரதுருக்க²யவனபுப்பா²னி சதுஜ்ஜாதி. ‘‘தமாலதக³ரதுருக்க²யவனபுப்பா²னீ’’தி அபரே.

அக்³கி³த³ட்³டா⁴ வியாதி ஆஸனக³தேன அக்³கி³னா த³ட்³டா⁴ விய. பட²மமேவாதி ராஜானம் தி³ஸ்வாபி கிச்சந்தரப்பஸுதா அஹுத்வா கிச்சந்தரதோ பட²மமேவ, த³ஸ்ஸனஸமகாலம் ஏவாதி அத்தோ². ரஞ்ஞோ நிஸஜ்ஜாய பச்சா² நிபாதனம் நிஸீத³னம் ஸீலம் ஏதிஸ்ஸாதி பச்சா²னிபாதினீ. தம் தம் அத்தனா ரஞ்ஞோ காதப்³ப³கிச்சம் ‘‘கிம் கரோமீ’’தி புச்சி²தப்³ப³தாய கிம் கரணம் படிஸாவேதீதி கிம்காரபடிஸ்ஸாவினீ.

மாதுகா³மோ நாம யேபு⁴ய்யேன ஸட²ஜாதிகோ, இத்தி²ரதனஸ்ஸ பன தம் நத்தீ²தி த³ஸ்ஸேதும் ‘‘ஸ்வாஸ்ஸா’’திஆதி³ வுத்தம்.

கு³ணாதி ரூபகு³ணா சேவ ஆசாரகு³ணா ச. புரிமகம்மானுபா⁴வேனாதி கதஸ்ஸ புரிமகம்மஸ்ஸானுபா⁴வேன இத்தி²ரதனஸ்ஸ தப்³பா⁴வஸம்வத்தனியஸ்ஸ புரிமகம்மஸ்ஸ ஆனுபா⁴வேன. சக்கவத்தினோபி பரிவாரஸம்பத்திஸம்வத்தனியம் புஞ்ஞகம்மம் தாதி³ஸஸ்ஸ ப²லவிஸேஸஸ்ஸ உபனிஸ்ஸயோ ஹோதியேவ. தேனாஹ ‘‘சக்கவத்தினோ புஞ்ஞம் உபனிஸ்ஸாயா’’தி, ஏதேன ஸேஸேஸுபி ஸவிஞ்ஞாணகரதனேஸு அத்தனோ கம்மவஸேன நிப்³ப³த்தேஸுபி தேஸம் தேஸம் விஸேஸானம் தது³பனிஸ்ஸயதா விபா⁴விதா ஏவாதி த³ட்ட²ப்³பா³. புப்³பே³ ஏகதே³ஸவஸேன லப்³ப⁴மானா பாரிபூரீ ரஞ்ஞோ சக்கவத்திபா⁴வூபக³மனதோ பட்டா²ய ஸப்³பா³காரபரிபூரா ஜாதா.

க³ஹபதிரதனவண்ணனா

250. பகதியா வாதி ஸபா⁴வேனேவ சக்கரதனபாதுபா⁴வதோ புப்³பே³பி. யாதி³ஸம் ரஞ்ஞோ சக்கவத்திஸ்ஸ புஞ்ஞப³லம் நிஸ்ஸாய யதா²வுத்தா சக்கரதனானுபா⁴வனிப்³ப³த்தி, தாதி³ஸம் ஏதஸ்ஸ புஞ்ஞப³லம் நிஸ்ஸாய க³ஹபதிரதனஸ்ஸ கம்மவிபாகஜம் தி³ப்³ப³சக்கு²ம் நிப்³ப³த்தேதீதி ஆஹ ‘‘சக்கரதனானுபா⁴வஸஹித’’ந்தி. காரணஸ்ஸ ஹி ஏகஸந்ததிபதிததாய, ப²லஸ்ஸ ச ஸமானகாலிகதாய ததா²வசனம்.

பரிணாயகரதனவண்ணனா

251. ‘‘அயம் த⁴ம்மோ, அயம் அத⁴ம்மோ’’திஆதி³னா கம்மஸ்ஸகதாவபோ³த⁴னஸங்கா²தஸ்ஸ பண்டி³தபா⁴வஸ்ஸ அத்தி²தாய பண்டி³தோ. பா³ஹுஸச்சப்³யத்தியா ப்³யத்தோ. ஸபா⁴வஸித்³தா⁴ய மேதா⁴ஸங்கா²தாய பகதிபஞ்ஞாய அத்தி²தாய மேதா⁴வீ. அத்தனோ யாதா²வபு³த்³த⁴மத்த²ம் பரேஸம் விபா⁴வேதும் பகாஸேதும் ஸமத்த²தாய விபா⁴வீ. வவத்த²பேதுந்தி நிச்சி²தும்.

சதுஇத்³தி⁴ஸமன்னாக³தவண்ணனா

252. விபச்சனம் விபாகோ, விபாகோ ஏவ வேபாகோ யதா² ‘‘விகதமேவ வேகத’’ந்தி. ஸமம் நாதிஸீதனாச்சுண்ஹதாய அவிஸமம் பு⁴த்தஸ்ஸ வேபாகோ ஏதிஸ்ஸா அத்தீ²தி ஸமவேபாகினீ, தாய ஸமவேபாகினியா.

த⁴ம்மபாஸாத³போக்க²ரணிவண்ணனா

253. ஜனராஸிம் காரேத்வா தேன ஜனராஸினா க²ணித்வா ந மாபேஸி. கிஞ்சரஹீதி ஆஹ ‘‘ரஞ்ஞோ பனா’’திஆதி³. தத்த² காரணம் பரதோ ஆக³மிஸ்ஸதி. ஏகாய வேதி³காய பரிக்கி²த்தா போக்க²ரணியோ. பரிவேணபரிச்சே²த³பரியந்தேதி ஏத்த² பரிவேணம் நாம ஸமந்ததோ விவடங்க³ணபூ⁴தம் போக்க²ரணியா தீரம், தஸ்ஸ பரிச்சே²த³பூ⁴தே பரியந்தே ஏகாய வேதி³காய பரிக்கி²த்தா போக்க²ரணியோ. ஏதத³ஹோஸீதி ஏதம் ‘‘யம்னூனாஹம் இமாஸு போக்க²ரணீஸூ’’திஆதி³கம் அஹோஸீதி. ஸப்³போ³துகந்தி ஸப்³பே³ஸு உதூஸு புப்ப²னகம். நானாவண்ணஉப்பலபீ³ஜாதீ³னீதி ரத்தனீலாதி³னானாவண்ணபுப்பே²ன புப்ப²னகஉப்பலபீ³ஜாதீ³னி. ஜலஜத²லஜமாலந்தி ஜலஜத²லஜபுப்ப²மாலம்.

254. பரிசாரவஸேனாதி தங்க²ணிகபரிசாரவஸேன, இத³ஞ்ச பட²மம் பட்ட²பிதனியாமேனேவ வுத்தம், பச்சா² பன யானஸயனாதீ³னி விய இத்தி²யோபி அத்தி²கானம் பரிச்சத்தா ஏவ. தேனாஹ ‘‘இத்தீ²ஹிபீ’’திஆதி³. பரிச்சாக³வஸேனாதி நிரபேக்க²பரிச்சாக³வஸேன. தீ³யதீதி தா³னம், தே³ய்யவத்து². தம் அக்³கீ³யதி நிஸ்ஸஜ்ஜீயதி ஏத்தா²தி தா³னக்³க³ம், பரிவேஸனட்டா²னம். தாதி³ஸானி அத்தீ²தி யாதி³ஸானி ரஞ்ஞோ தா³னக்³கே³ கோ²மஸுகு²மாதீ³னி வத்தா²னி, தாதி³ஸானி யேஸம் அத்தனோ ஸந்தகானி ஸந்தி. ஓஹாயாதி பஹாய தத்தே²வ ட²பேத்வா. அத்தோ² அத்தி² யேஸம் தேதி அத்தி²கா. ஏவம் அனத்தி²காபி த³ட்ட²ப்³பா³.

255. கலஹஸத்³தோ³பீதி பி-ஸத்³தே³ன தா³னாதி⁴ப்பாயேன கே³ஹதோ நீஹதம் புன கே³ஹம் பவேஸேதும் ந யுத்தந்தி இமமத்த²ம் ஸமுச்சேதி. தேனாஹ ‘‘ந கோ² ஏதம் அம்ஹாகம் பதிரூப’’ந்திஆதி³ (தீ³. நி. 2.255).

257. உண்ஹீஸமத்த²கேதி ஸிகா²பரியந்தமத்த²கே. பரிச்சே²த³மத்த²கேதி பாஸாத³ங்க³ணபரிச்சே²த³ஸ்ஸ மத்த²கே.

258. ஹரதீதி அதிவிய பப⁴ஸ்ஸரபா⁴வேன சக்கூ²னி படிஹரந்தம் து³த்³தி³க்க²தாய தி³ட்டி²யோ ஹரதி அபனேந்தம் விய ஹோதி. தம் பன ஹரணம் நேஸம் பரிப்ப²ந்த³னேனாதி ஆஹ ‘‘ப²ந்தா³பேதீ’’தி.

பட²மபா⁴ணவாரவண்ணனா நிட்டி²தா.

ஜா²னஸம்பத்திவண்ணனா

260. மஹதியா இத்³தி⁴யாதி மஹந்தேன இச்சி²தத்த²ஸமிஜ்ஜ²னேன. தேஸம்யேவ இச்சி²திச்சி²தத்தா²னம். ‘‘அனுப⁴விதப்³பா³ன’’ந்தி இமினா ஆனுபா⁴வ-ஸத்³த³ஸ்ஸ கம்மஸாத⁴னதம் த³ஸ்ஸேதி. புப்³பே³ ஸம்பன்னம் கத்வா தே³ய்யத⁴ம்மபரிச்சாக³ஸ்ஸ கதபா⁴வம் த³ஸ்ஸேந்தோ ‘‘ஸம்பத்திபரிச்சாக³ஸ்ஸா’’தி ஆஹ. அத்தானம் த³மேதி ஏதேனாதி த³மோ.

போ³தி⁴ஸத்தபுப்³ப³யோக³வண்ணனா

அஸ்ஸாதி மஹாஸுத³ஸ்ஸனரஞ்ஞோ. ஏகோ தே²ரோதி அப்பஞ்ஞாதோ நாமகோ³த்ததோ அஞ்ஞதரோ புது²ஜ்ஜனோ தே²ரோ. தே²ரம் தி³ஸ்வாதி அஞ்ஞதரஸ்மிம் ருக்க²மூலே நிஸின்னம் தி³ஸ்வா. கட்ட²த்த²ரணந்தி கட்ட²மயம் அத்த²ரணம், தா³ருப²லகந்தி அத்தோ².

பரிபோ⁴க³பா⁴ஜனந்தி பானீயபரிபோ⁴ஜனீயாதி³பரிபோ⁴க³யோக்³யம் பா⁴ஜனம். ஆரகண்டகந்தி ஸூசிவிஜ்ஜ²னககண்டகம். பிப்ப²லிகந்தி கு²த்³த³கஸத்த²கம். உத³கதும்ப³கந்தி குண்டி³கம்.

கூடாகா³ரத்³வாரேயேவ நிவத்தேஸீதி கூடாகா³ரம் பவிட்ட²காலதோ பட்டா²ய தேஸம் மிச்சா²விதக்கானம் பவத்தியா ஓகாஸம் நாதா³ஸி.

261. கஸிணமேவ பஞ்ஞாயதி மஹாபுரிஸஸ்ஸ தத்த² தத்த² கதாதி⁴காரத்தா, தேஸஞ்ச பதே³ஸானம் ஸுபரிகம்மகதகஸிணஸதி³ஸத்தா.

262. சத்தாரி ஜா²னானீதி சத்தாரி கஸிணஜ்ஜா²னானி. கஸிணஜ்ஜா²னப்பமஞ்ஞானம்யேவ வசனம் தாஸம் ததா³ ஆத³ரகா³ரவவஸேன நிப்³ப³த்திதத்தா. மஹாபோ³தி⁴ஸத்தானஞ்ஹி அரூபஜ்ஜா²னேஸு ஆத³ரோ நத்தி², அபி⁴ஞ்ஞாபத³ட்டா²னதம் பன ஸந்தா⁴ய தானிபி நிப்³ப³த்தேந்தி, தஸ்மா மஹாஸத்தோ தாபஸபரிப்³பா³ஜககாலே யத்தகே லோகியகு³ணே நிப்³ப³த்தேதி, தே ஸப்³பே³பி ததா³ நிப்³ப³த்தேஸியேவ. தேனாஹ ‘‘மஹாபுரிஸோ பனா’’திஆதி³.

சதுராஸீதினக³ரஸஹஸ்ஸாதி³வண்ணனா

263. அபி⁴ஹரிதப்³ப³ப⁴த்தந்தி உபனேதப்³ப³ப⁴த்தம்.

264. நிப³த்³த⁴வத்தந்தி புப்³பே³ உபனிப³த்³த⁴ம் பாகவத்தம்.

ஸுப⁴த்³தா³தே³விஉபஸங்கமனவண்ணனா

265. ஆவட்டேத்வாதி அதிவிஸித்வா. யம் யம் ரஞ்ஞோ இச்சி²தம் தா³னூபகரணஞ்சேவ போ⁴கூ³பகரணஞ்ச, தஸ்ஸ தஸ்ஸ ததே²வ ஸமித்³த⁴பா⁴வம் வித்த²வதி.

266. ஸசே பன ராஜா ஜீவிதே ச²ந்த³ம் ஜனேய்ய, இதோ பரம்பி சிரம் காலம் திட்டே²ய்ய மஹித்³தி⁴கோ மஹானுபா⁴வோதி ஏவம் மஹஜ்ஜா²ஸயா தே³வீ போ⁴கே³ஸு, ஜீவிதே ச ராஜானம் ஸாபேக்க²ம் காதும் வாயமி. தேன வுத்தம் ‘‘மா ஹேவ கோ² ராஜா’’திஆதி³. தேனேவாஹ ‘‘தஸ்ஸ காலங்கிரியம் அனிச்ச²மானா’’திஆதி³. ச²ந்த³ம் ஜனேஹீதி ஏத்த² ச²ந்த³-ஸத்³தோ³ தண்ஹாபரியாயோதி ஆஹ ‘‘பேமம் உப்பாதே³ஹீ’’தி. அபேக்க²தி ஆரம்மணம் ஏதாய ந விஸ்ஸஜ்ஜேதீதி அபேக்கா², தண்ஹா.

267. க³ரஹிதாதி ஏத்த² கேஹி க³ரஹிதா, கஸ்மா ச க³ரஹிதாதி அந்தோலீனம் சோத³னம் விஸ்ஸஜ்ஜேந்தோ ‘‘பு³த்³தே⁴ஹீ’’திஆதி³மாஹ, தேன விஞ்ஞுக³ரஹிதத்தா, து³க்³க³திஸம்வத்தனியதோ ச ஸாபேக்க²காலகிரியா பரிவஜ்ஜேதப்³பா³தி த³ஸ்ஸேதி.

268. ஏகமந்தம் க³ந்த்வாதி ரஞ்ஞோ சக்கு²பத²ம் விஜஹித்வா.

ப்³ரஹ்மலோகூபக³மனவண்ணனா

269. ஸோணஸ்ஸாதி கோளிவீஸஸ்ஸ ஸோணஸ்ஸ. ஏகா ப⁴த்தபாதீதி ஏகம் ப⁴த்தவட்³டி⁴தகம். தாதி³ஸம் ப⁴த்தந்தி ததா²ரூபம் க³ரும் மது⁴ரம் ஸினித்³த⁴ம் ப⁴த்தம். பு⁴த்தானந்தி பு⁴த்தவந்தானம்.

271. தா³ஸமனுஸ்ஸாதி தா³ஸா சேவ ஆயுத்தகமனுஸ்ஸா ச.

இதா³னி யதா²வுத்தாய ரஞ்ஞோ மஹாஸுத³ஸ்ஸனஸ்ஸ போ⁴க³ஸம்பத்தியா கம்மஸரிக்க²தம் உத்³த⁴ரந்தோ ‘‘ஏதானி பனா’’திஆதி³மாஹ, தம் ஸுவிஞ்ஞேய்யமேவ.

272. ஆதி³தோ பட்டா²யாதி ஸமுதா³க³மனதோ பட்டா²ய. யத்த² தம் புஞ்ஞம் ஆயூஹிதம், யதோ ஸா ஸம்பத்தி நிப்³ப³த்தா, ததோ ததியத்தபா⁴வதோ பபு⁴தி. மஹாஸுத³ஸ்ஸனஸ்ஸ ஜாதகதே³ஸனா ஹி ததா³ ஸமுதா³க³மனதோ பட்டா²ய ப⁴க³வதா தே³ஸிதாதி. பம்ஸ்வாகா³ரகீளம் வியாதி யதா² நாம தா³ரகா பம்ஸூஹி வாபிகே³ஹபோ⁴ஜனாதீ³னி த³ஸ்ஸேந்தா யதா²ருசி கீளித்வா க³மனகாலே ஸப்³ப³ம் தம் வித⁴ம்ஸேந்தா க³ச்ச²ந்தி, ஏவமேவ ப⁴க³வா மஹாஸுத³ஸ்ஸனகாலே அத்தனா அனுபூ⁴தம் தி³ப்³ப³ஸம்பத்திஸதி³ஸம் அசிந்தேய்யானுபா⁴வஸம்பத்திம் வித்தா²ரதோ த³ஸ்ஸேத்வா புன அத்தனோ தே³ஸனம் ஆதீ³னவனிஸ்ஸரணத³ஸ்ஸனவஸேன விவட்டாபி⁴முக²ம் விபரிவத்தேந்தோ ‘‘ஸப்³பா³ ஸா ஸம்பத்தி அனிச்சதாய விபரிணதா வித⁴ம்ஸிதா’’தி த³ஸ்ஸேந்தோ ‘‘பஸ்ஸானந்தா³’’திஆதி³மாஹ. விபரிணதாதி விபரிணாமம் ஸபா⁴வவிக³மம் க³தா. தேனாஹ ‘‘பகதிவிஜஹனேனா’’திஆதி³. பகதீதி ஸபா⁴வத⁴ம்மானம் உத³யவயபரிச்சி²ன்னோ கக்க²ளபு²ஸனாதி³ஸபா⁴வோ, ஸோ ப⁴ங்க³க்க²ணதோ பட்டா²ய ஜஹிதோ, பரிச்சஜந்தோ ஸப்³ப³ஸோ நத்தே²வ. தேனாஹ ‘‘நிப்³பு³தபதீ³போ விய அபஞ்ஞத்திகபா⁴வம் க³தா’’தி.

ஏத்தாவதாதி ஆதி³தோ பட்டா²ய பவத்தேன ஏத்தகேன தே³ஸனாமக்³கே³ன. அனேகானி வஸ்ஸகோடிஸதஸஹஸ்ஸானியேவ உப்³பே³தோ⁴ ஏதிஸ்ஸாதி அனேகவஸ்ஸகோடிஸதஸஹஸ்ஸுப்³பே³தா⁴. அனிச்சலக்க²ணம் ஆதா³யாதி தம் ஸம்பத்திக³தம் அனிச்சலக்க²ணம் தே³ஸனாய க³ஹேத்வா விபா⁴வேத்வா. யதா² நிஸ்ஸேணிமுச்சனே தாதி³ஸம் ஸதஹத்து²ப்³பே³த⁴ம் ருக்க²ம் பகதிபுரிஸேன ஆரோஹிதும் ந ஸக்கா, ஏவம் அனிச்சதாவிபா⁴வனேன தஸ்ஸா ஸம்பத்தியா அபேக்கா²னிஸ்ஸேணிமுச்சனே கேனசி ஆரோஹிதும் ந ஸக்காதி ஆஹ ‘‘அனிச்சலக்க²ணம் ஆதா³ய நிஸ்ஸேணிம் முஞ்சந்தோ வியா’’தி. தேனேவாதி யதா²வுத்தகாரணேனேவ, ஆதி³தோ ஸாதிஸயம் காமேஸு அஸ்ஸாத³ம் த³ஸ்ஸேத்வாபி உபரி நேஸம் ‘‘பஸ்ஸானந்தா³’’திஆதி³னா ஆதீ³னவம், ஓகாரம், ஸம்கிலேஸம், நேக்க²ம்மே ஆனிஸம்ஸஞ்ச விபா⁴வேத்வா தே³ஸனாய நிட்டா²பிதத்தா. புப்³பே³தி அதீதகாலே. வஸப⁴ராஜாதி வஸப⁴னாமகோ ஸீஹளமஹாராஜா.

உத³கபுப்பு²ளாத³யோதி ஆதி³-ஸத்³தே³ன திணக்³கே³ உஸ்ஸாவபி³ந்து³ஆதி³கே ஸங்க³ண்ஹாதி.

மஹாஸுத³ஸ்ஸனஸ்ஸ பனாதி பன-ஸத்³தோ³ விஸேஸத்த²ஜோதனோ, தேன மஹாஸுத³ஸ்ஸனமஹாராஜா ஜா²னாபி⁴ஞ்ஞாஸமாபத்தியோ நிப்³ப³த்தேஸி, தத³க்³கே³ன பரிஸுத்³தே⁴ ச ஸமணபா⁴வே பதிட்டி²தோ, யதோ விது⁴ய ஏவ காமவிதக்காதி³ஸமணபா⁴வஸம்கிலேஸம் ஸுஞ்ஞாகா³ரம் பாவிஸி, ஏவம்பூ⁴தஸ்ஸாபி தஸ்ஸ காலம் கிரியதோ ஸத்தமே தி³வஸே ஸப்³பா³ சக்கவத்திஸம்பத்தி அந்தரஹிதா, ந ததோ பரம், அஹோ அச்ச²ரியமனுஸ்ஸோ அனஞ்ஞஸாதா⁴ரணகு³ணவிஸேஸோதி இமம் விஸேஸம் த³ஸ்ஸேதி.

அனாருள்ஹந்தி ‘‘ராஜா கிர புப்³பே³ க³ஹபதிகுலே நிப்³ப³த்தீ’’திஆதி³னா, (தீ³. நி. அட்ட². 2.260) ‘‘புன தே²ரம் ஆமந்தேஸீ’’திஆதி³னா (தீ³. நி. அட்ட². 2.272) ச வுத்தமத்த²ம் ஸந்தா⁴யாஹ. ஸோ ஹி இமஸ்மிம் ஸுத்தே ஸங்கீ³திம் அனாருள்ஹோ, அஞ்ஞத்த² பன ஆக³தோ இமிஸ்ஸா தே³ஸனாய பிட்டி²வத்தகபா⁴வேன. யம் பனேத்த² அத்த²தோ ந விப⁴த்தம், தம் ஸுவிஞ்ஞேய்யம் ஏவாதி.

மஹாஸுத³ஸ்ஸனஸுத்தவண்ணனாய லீனத்த²ப்பகாஸனா.