3. பஞ்ஹபுச்ச²கவண்ணனா

நனு ச சத்தாரோபி அதி⁴பதயோ ஏகக்க²ணே லப்³ப⁴ந்தி, அஞ்ஞமஞ்ஞஸ்ஸ பன அதி⁴பதயோ ந ப⁴வந்தி ‘‘சத்தாரோ இத்³தி⁴பாதா³ ந மக்³கா³தி⁴பதினோ’’தி வுத்தத்தா. ராஜபுத்தோபமாபி ஹி ஏதமத்த²ம் தீ³பேதீதி? ந, ஏகக்க²ணே து³தியஸ்ஸ அதி⁴பதினோ அபா⁴வதோ ஏவ, ‘‘ந மக்³கா³தி⁴பதினோ’’தி வுத்தத்தா ராஜபுத்தோபமா அதி⁴பதிம் ந கரோந்தீதி இமமேவத்த²ம் தீ³பேதி, ந அதி⁴பதீனம் ஸஹபா⁴வம். தம் கத²ம் ஜானிதப்³ப³ந்தி? படிக்கி²த்தத்தா. அதி⁴பதிபச்சயனித்³தே³ஸே ஹி அட்ட²கதா²யம் (பட்டா². அட்ட². 1.3) வுத்தா ‘‘கஸ்மா பன யதா² ஹேதுபச்சயனித்³தே³ஸே ‘ஹேதூ ஹேதுஸம்பயுத்தகான’ந்தி வுத்தம், ஏவமித⁴ ‘அதி⁴பதீ அதி⁴பதிஸம்பயுத்தகான’ந்தி அவத்வா ‘ச²ந்தா³தி⁴பதி ச²ந்த³ஸம்பயுத்தகான’ந்திஆதி³னா நயேன தே³ஸனா கதாதி? ஏகக்க²ணே அபா⁴வதோ’’தி. ஸதி ச சதுன்னம் அதி⁴பதீனம் ஸஹபா⁴வே ‘‘அரியமக்³க³ஸமங்கி³ஸ்ஸ வீமம்ஸாதி⁴பதேய்யம் மக்³க³ம் பா⁴வேந்தஸ்ஸா’’தி விஸேஸனம் ந கத்தப்³ப³ம் ஸியா அவீமம்ஸாதி⁴பதிகஸ்ஸ மக்³க³ஸ்ஸ அபா⁴வா. ச²ந்தா³தீ³னம் அஞ்ஞமஞ்ஞாதி⁴பதிகரணபா⁴வே ச ‘‘வீமம்ஸம் ட²பேத்வா தம்ஸம்பயுத்தோ’’திஆதி³னா ச²ந்தா³தீ³னம் வீமம்ஸாதி⁴பதிகத்தவசனம் ந வத்தப்³ப³ம் ஸியா. ததா² ‘‘சத்தாரோ அரியமக்³கா³ ஸியா மக்³கா³தி⁴பதினோ, ஸியா ந வத்தப்³பா³ மக்³கா³தி⁴பதினோ’’தி (த⁴. ஸ. 1429) ஏவமாதீ³ஹிபி அதி⁴பதீனம் ஸஹபா⁴வோ படிக்கி²த்தோ ஏவாதி.

பஞ்ஹபுச்ச²கவண்ணனா நிட்டி²தா.

இத்³தி⁴பாத³விப⁴ங்க³வண்ணனா நிட்டி²தா.