8. ஸம்மப்பதா⁴னவிப⁴ங்கோ³

1. ஸுத்தந்தபா⁴ஜனீயவண்ணனா

390. காரணப்பதா⁴னாதி ‘‘அனுப்பன்னபாபகானுப்பாதா³தி³அத்தா²’’தி க³ஹிதா ததே²வ தே ஹோந்தீதி தம் அத்த²ம் ஸாதே⁴ந்தியேவாதி ஏதஸ்ஸ அத்த²ஸ்ஸ தீ³பகோ ஸம்மா-ஸத்³தோ³தி யதா²தி⁴ப்பேதத்த²ஸ்ஸ அனுப்பன்னபாபகானுப்பாதா³தி³னோ காரணபூ⁴தா, பதா⁴னகாரணபூ⁴தாதி அத்தோ². ஸம்மாஸத்³த³ஸ்ஸ உபாயயோனிஸோஅத்த²தீ³பகதம் ஸந்தா⁴ய ‘‘உபாயப்பதா⁴னா யோனிஸோபதா⁴னா’’தி வுத்தம். படிபன்னகோதி பா⁴வனமனுயுத்தோ. பு⁴ஸம் யோகோ³ பயோகோ³, பயோகோ³வ பரக்கமோ பயோக³பரக்கமோ. ஏதானீதி ‘‘வாயமதீ’’திஆதீ³னி ‘‘ஆஸேவமானோ வாயமதீ’’திஆதி³னா யோஜேதப்³பா³னி.

அனுப்பன்னாதி அவத்தப்³ப³தம் ஆபன்னானந்தி பூ⁴மிலத்³தா⁴ரம்மணாதி⁴க்³க³ஹிதாவிக்க²ம்பி⁴தாஸமுக்³கா⁴திதுப்பன்னானம்.

391. த⁴ம்மச்ச²ந்தோ³தி தண்ஹாதி³ட்டி²வீரியச்ச²ந்தா³ விய ந அஞ்ஞோ த⁴ம்மோ, அத² கோ² ச²ந்த³னியஸபா⁴வோ ஏவாதி த³ஸ்ஸேந்தோ ஆஹ ‘‘ஸபா⁴வச்ச²ந்தோ³’’தி. தத்த² ‘‘யோ காமேஸு காமச்ச²ந்தோ³’’திஆதீ³ஸு (த⁴. ஸ. 1103) தண்ஹா ச²ந்தோ³தி வுத்தாதி வேதி³தப்³போ³, ‘‘ஸப்³பே³வ நு கோ², மாரிஸ, ஸமணப்³ராஹ்மணா ஏகந்தவாதா³ ஏகந்தஸீலா ஏகந்தச²ந்தா³ ஏகந்தஅஜ்ஜோ²ஸானா’’தி (தீ³. நி. 2.366) ஏத்த² தி³ட்டி², பமாத³னித்³தே³ஸே ‘‘நிக்கி²த்தச²ந்த³தா நிக்கி²த்தது⁴ரதா’’தி வீரியந்தி வண்ணேதி.

394. வாயமதி வீரியம் ஆரப⁴தீதி பத³த்³வயஸ்ஸபி நித்³தே³ஸோ வீரியனித்³தே³ஸோயேவாதி அதி⁴ப்பாயேனாஹ ‘‘வீரியனித்³தே³ஸே’’தி.

406. ஸப்³ப³புப்³ப³பா⁴கே³தி ஸப்³ப³மக்³கா³னம் புப்³ப³பா⁴கே³. புரிமஸ்மிந்தி ‘‘அனுப்பன்னா மே குஸலா த⁴ம்மா அனுப்பஜ்ஜமானா அனத்தா²ய ஸம்வத்தேய்யு’’ந்தி ஏத்தா²பி ‘‘ஸமத²விபஸ்ஸனாவ க³ஹேதப்³பா³’’தி வுத்தம் அட்ட²கதா²யம், தம் பன மக்³கா³னுப்பன்னதாய பா⁴வதோ அனுப்பஜ்ஜமானே ச தஸ்மிம் வட்டானத்த²ஸம்வத்தனதோ ந யுத்தந்தி படிக்கி²பதி.

மஹந்தம் கா³ரவம் ஹோதி, தஸ்மா ‘‘ஸங்க⁴கா³ரவேன யதா²ருசி விந்தி³தும் ந ஸக்கா’’தி ஸங்கே⁴ன ஸஹ ந நிக்க²மி. அதிமந்தா³னி நோதி நனு அதிமந்தா³னீதி அத்தோ². ஸந்தஸமாபத்திதோ அஞ்ஞம் ஸந்த²ம்ப⁴னகாரணம் ப³லவம் நத்தீ²தி ‘‘ததோ பரிஹீனா ஸந்த²ம்பி⁴தும் ந ஸக்கோந்தீ’’தி ஆஹ. ந ஹி மஹாரஜ்ஜும்ஹி சி²ன்னே ஸுத்ததந்தூ ஸந்தா⁴ரேதும் ஸக்கோந்தீதி. ஸமதே² வத்து²ம் த³ஸ்ஸேத்வா தேன ஸமானக³திகா விபஸ்ஸனா சாதி இமினா அதி⁴ப்பாயேனாஹ ‘‘ஏவம் உப்பன்னா ஸமத²விபஸ்ஸனா…பே… ஸம்வத்தந்தீ’’தி.

தத்த² அனுப்பன்னானந்தி ஏத்த² தத்த² து³விதா⁴ய ஸம்மப்பதா⁴னகதா²ய, தத்த² வா பாளியம் ‘‘அனுப்பன்னான’’ந்தி ஏதஸ்ஸ அயம் வினிச்ச²யோதி அதி⁴ப்பாயோ. ஏதேயேவாதி அனமதக்³கே³ ஸம்ஸாரே உப்பன்னாயேவ.

சுத்³த³ஸ மஹாவத்தானி க²ந்த⁴கே வுத்தானி ஆக³ந்துகஆவாஸிகக³மிகஅனுமோத³ன ப⁴த்தக்³க³ பிண்ட³சாரிக ஆரஞ்ஞிக ஸேனாஸன ஜந்தாக⁴ரவச்சகுடி ஆசரியஉபஜ்ஜா²யஸத்³தி⁴விஹாரிகஅந்தேவாஸிகவத்தானி சுத்³த³ஸ. ததோ அஞ்ஞானி பன கதா³சி தஜ்ஜனீயகம்மகதாதி³காலே பாரிவாஸிகாதி³காலே ச சரிதப்³பா³னி த்³வாஸீதி கு²த்³த³கவத்தானீதி கதி²தானி த³ட்ட²ப்³பா³னி. ந ஹி தானி ஸப்³பா³ஸு அவத்தா²ஸு சரிதப்³பா³னி, தஸ்மா மஹாவத்தே அக³ணிதானி. தத்த² ‘‘பாரிவாஸிகானம் பி⁴க்கூ²னம் வத்தம் பஞ்ஞாபேஸ்ஸாமீ’’தி ஆரபி⁴த்வா ‘‘ந உபஸம்பாதே³தப்³ப³ம்…பே… ந ச²மாயம் சங்கமந்தே சங்கமே சங்கமிதப்³ப³’’ந்தி (சூளவ. 76) வுத்தானி பகதத்தே சரிதப்³ப³வத்தாவஸானானி ச²ஸட்டி², ததோ பரம் ‘‘ந, பி⁴க்க²வே, பாரிவாஸிகேன பி⁴க்கு²னா பாரிவாஸிகவுட்³ட⁴தரேன பி⁴க்கு²னா ஸத்³தி⁴ம், மூலாயபடிகஸ்ஸனாரஹேன, மானத்தாரஹேன, மானத்தசாரிகேன, அப்³பா⁴னாரஹேன பி⁴க்கு²னா ஸத்³தி⁴ம் ஏகச்ச²ன்னே ஆவாஸே வத்த²ப்³ப³’’ந்திஆதீ³னி (சூளவ. 82) பகதத்தே சரிதப்³பே³ஹி அனஞ்ஞத்தா விஸும் விஸும் அக³ணேத்வா பாரிவாஸிகவுட்³ட⁴தராதீ³ஸு புக்³க³லந்தரேஸு சரிதப்³ப³த்தா தேஸம் வஸேன ஸம்பிண்டே³த்வா ஏகேகம் கத்வா க³ணேதப்³பா³னி பஞ்சாதி ஏகஸத்ததி வத்தானி, உக்கே²பனீயகம்மகதவத்தேஸு வத்தபஞ்ஞாபனவஸேன வுத்தம் ‘‘ந பகதத்தஸ்ஸ பி⁴க்கு²னோ அபி⁴வாத³னம் பச்சுட்டா²னம்…பே… நஹானே பிட்டி²பரிகம்மம் ஸாதி³தப்³ப³’’ந்தி (சூளவ. 75) இத³ம் அபி⁴வாத³னாதீ³னம் அஸ்ஸாதி³யனம் ஏகம், ‘‘ந பகதத்தோ பி⁴க்கு² ஸீலவிபத்தியா அனுத்³த⁴ம்ஸேதப்³போ³’’திஆதீ³னி (சூளவ. 51) ச த³ஸாதி ஏவம் த்³வாஸீதி ஹோந்தி. ஏதேஸ்வேவ கானிசி தஜ்ஜனீயகம்மகதாதி³வத்தானி, கானிசி பாரிவாஸிகாதி³வத்தானீதி அக்³க³ஹிதக்³க³ஹணேன த்³வாஸீதிவத்தந்தி த³ட்ட²ப்³ப³ம்.

இத⁴ விபாகானுப⁴வனவஸேன ததா³ரம்மணம், அவிபக்கவிபாகஸ்ஸ ஸப்³ப³தா² அவிக³தத்தா ப⁴வித்வா விக³தமத்தவஸேன கம்மஞ்ச ‘‘பு⁴த்வா விக³துப்பன்ன’’ந்தி வுத்தம், ந அட்ட²ஸாலினியம் (த⁴. ஸ. அட்ட². 1) விய ரஜ்ஜனாதி³வஸேன அனுபு⁴த்வாபக³தம் ஜவனம், உப்பஜ்ஜித்வா நிருத்³த⁴தாவஸேன பூ⁴தாபக³தஸங்கா²தம் ஸேஸஸங்க²தஞ்ச ‘‘பூ⁴தாபக³துப்பன்ன’’ந்தி, தஸ்மா இத⁴ ஓகாஸகதுப்பன்னம் விபாகமேவ வத³தி, ந தத்த² விய கம்மம்பீதி. அனுஸயிதகிலேஸாதி அப்பஹீனா மக்³கே³ன பஹாதப்³பா³ அதி⁴ப்பேதா. தேனாஹ ‘‘அதீதா வா…பே… ந வத்தப்³பா³’’தி. தேஸஞ்ஹி அம்ப³தருணோபமாய வத்தமானாதி³தா ந வத்தப்³பா³தி.

ஆஹதகீ²ரருக்கோ² விய நிமித்தக்³கா³ஹவஸேன அதி⁴க³தம் ஆரம்மணம், அனாஹதகீ²ரருக்கோ² விய அவிக்க²ம்பி⁴ததாய அந்தோக³த⁴கிலேஸம் ஆரம்மணம் த³ட்ட²ப்³ப³ம், நிமித்தக்³கா³ஹகாவிக்க²ம்பி⁴தகிலேஸா வா புக்³க³லா ஆஹதானாஹதகீ²ரருக்க²ஸதி³ஸா. புரிமனயேனேவாதி அவிக்க²ம்பி⁴துப்பன்னே விய ‘‘இமஸ்மிம் நாம டா²னே நுப்பஜ்ஜிஸ்ஸந்தீதி ந வத்தப்³பா³ அஸமுக்³கா⁴டிதத்தா’’தி யோஜேத்வா வித்தா²ரேதப்³ப³ம்.

பாளியந்தி படிஸம்பி⁴தா³பாளியம் (படி. ம. 3.21). மக்³கே³ன பஹீனகிலேஸானமேவ திதா⁴ நவத்தப்³ப³தம் அபாகடம் பாகடம் காதும் அஜாதப²லருக்கோ² ஆப⁴தோ, அதீதாதீ³னம் அப்பஹீனதாத³ஸ்ஸனத்த²ம்பி ‘‘ஜாதப²லருக்கே²ன தீ³பேதப்³ப³’’ந்தி ஆஹ. தத்த² யதா² அச்சி²ன்னே ருக்கே² நிப்³ப³த்திரஹானி ப²லானி சி²ன்னே அனுப்பஜ்ஜமானானி ந கதா³சி ஸஸபா⁴வானி அஹேஸும் ஹோந்தி ப⁴விஸ்ஸந்தி சாதி அதீதாதி³பா⁴வேன ந வத்தப்³பா³னி, ஏவம் மக்³கே³ன பஹீனகிலேஸா ச த³ட்ட²ப்³பா³. யதா² ச சே²தே³ அஸதி ப²லானி உப்பஜ்ஜிஸ்ஸந்தி, ஸதி ச நுப்பஜ்ஜிஸ்ஸந்தீதி சே²த³ஸ்ஸ ஸாத்த²கதா, ஏவம் மக்³க³பா⁴வனாய ச ஸாத்த²கதா யோஜேதப்³பா³.

ஸுத்தந்தபா⁴ஜனீயவண்ணனா நிட்டி²தா.

3. பஞ்ஹபுச்ச²கவண்ணனா

427. பஞ்ஹபுச்ச²கே யம் வுத்தம் ‘‘வீரியஜேட்டி²காய பன அஞ்ஞஸ்ஸ வீரியஸ்ஸ அபா⁴வா ந வத்தப்³பா³னி மக்³கா³தி⁴பதீனீதி வா ந மக்³கா³தி⁴பதீனீதி வா’’தி, ஏத்த² ‘‘மக்³கா³தி⁴பதீனீ’’தி ந வத்தப்³ப³தாய ஏவ அஞ்ஞஸ்ஸ வீரியஸ்ஸ அபா⁴வோ காரணந்தி த³ட்ட²ப்³ப³ம். ச²ந்த³ஸ்ஸ பன சித்தஸ்ஸ வா நமக்³க³பூ⁴தஸ்ஸ அதி⁴பதினோ ததா³ அபா⁴வா ‘‘ந மக்³கா³தி⁴பதீனீ’’தி ந வத்தப்³பா³னீதி வுத்தம். ச²ந்த³சித்தானம் விய நமக்³க³பூ⁴தஸ்ஸ அஞ்ஞஸ்ஸ வீரியாதி⁴பதினோ அபா⁴வாதி வா அதி⁴ப்பாயோ. ஸம்மப்பதா⁴னானம் ததா³ மக்³க³ஸங்கா²தஅதி⁴பதிபா⁴வதோ வா ‘‘ந மக்³கா³தி⁴பதீனீ’’தி நவத்தப்³ப³தா வுத்தாதி வேதி³தப்³பா³.

பஞ்ஹபுச்ச²கவண்ணனா நிட்டி²தா.

ஸம்மப்பதா⁴னவிப⁴ங்க³வண்ணனா நிட்டி²தா.