1. அபி⁴த⁴ம்மபா⁴ஜனீயவண்ணனா

219. சக்கு²த்³வாரே இந்த³ட்ட²ம் காரேதீதி சக்கு²த்³வாரபா⁴வே தம்த்³வாரிகேஹி அத்தனோ இந்த³பா⁴வம் பரமிஸ்ஸரபா⁴வம் காரயதீதி அத்தோ². தஞ்ஹி தே ரூபக்³க³ஹணே அத்தானம் அனுவத்தேதி, தே ச தம் அனுவத்தந்தீதி. ஏஸ நயோ இதரேஸுபி. யேன தம்ஸமங்கீ³புக்³க³லோ தம்ஸம்பயுத்தத⁴ம்மா வா அஞ்ஞாதாவினோ ஹோந்தி, ஸோ அஞ்ஞாதாவிபா⁴வோ பரினிட்டி²தகிச்சஜானனம்.

கத்த²சி த்³வேதி ‘‘த்³வின்னம் கோ², பி⁴க்க²வே, இந்த்³ரியானம் பா⁴விதத்தா ப³ஹுலீகதத்தா கீ²ணாஸவோ பி⁴க்கு² அஞ்ஞம் ப்³யாகரோதி…பே… அரியாய ச பஞ்ஞாய அரியாய ச விமுத்தியா. யா ஹிஸ்ஸ, பி⁴க்க²வே, அரியா பஞ்ஞா, தத³ஸ்ஸ பஞ்ஞிந்த்³ரியம். யா ஹிஸ்ஸ அரியா விமுத்தி, தத³ஸ்ஸ ஸமாதி⁴ந்த்³ரிய’’ந்திஆதீ³ஸு (ஸம். நி. 5.516) த்³வே, ‘‘திண்ணம் கோ², பி⁴க்க²வே, இந்த்³ரியானம் பா⁴விதத்தா ப³ஹுலீகதத்தா பிண்டோ³லபா⁴ரத்³வாஜேன பி⁴க்கு²னா அஞ்ஞா ப்³யாகதா…பே… ஸதிந்த்³ரியஸ்ஸ ஸமாதி⁴ந்த்³ரியஸ்ஸ பஞ்ஞிந்த்³ரியஸ்ஸா’’தி (ஸம். நி. 5.519), ‘‘தீணிமானி, பி⁴க்க²வே, இந்த்³ரியானி. கதமானி தீணி? அனஞ்ஞாதஞ்ஞஸ்ஸாமீதிந்த்³ரியம் அஞ்ஞிந்த்³ரியம் அஞ்ஞாதாவிந்த்³ரிய’’ந்தி (ஸம். நி. 5.493), ‘‘தீணிமானி…பே… இத்தி²ந்த்³ரியம் புரிஸிந்த்³ரியம் ஜீவிதிந்த்³ரிய’’ந்தி (ஸம். நி. 5.492) ச ஏவமாதீ³ஸு தீணி, ‘‘பஞ்சிமானி, ப்³ராஹ்மண, இந்த்³ரியானி நானாவிஸயானி…பே… சக்கு²ந்த்³ரியம்…பே… காயிந்த்³ரிய’’ந்தி (ஸம். நி. 5.512), ‘‘பஞ்சி…பே… ஸுகி²ந்த்³ரியம்…பே… உபேக்கி²ந்த்³ரிய’’ந்தி (ஸம். நி. 5.501 ஆத³யோ), ‘‘பஞ்சி…பே… ஸத்³தி⁴ந்த்³ரியம்…பே… பஞ்ஞிந்த்³ரிய’’ந்தி (ஸம். நி. 5.486 ஆத³யோ) ச ஏவமாதீ³ஸு பஞ்ச. தத்த² ஸுத்தந்தே து³காதி³வசனம் நிஸ்ஸரணுபாயாதி³பா⁴வதோ து³காதீ³னம். ஸப்³பா³னி பன இந்த்³ரியானி அபி⁴ஞ்ஞேய்யானி, அபி⁴ஞ்ஞேய்யத⁴ம்மதே³ஸனா ச அபி⁴த⁴ம்மோதி இத⁴ ஸப்³பா³னி ஏகதோ வுத்தானி.

கீ²ணாஸவஸ்ஸ பா⁴வபூ⁴தோ ஹுத்வா உப்பத்திதோ ‘‘கீ²ணாஸவஸ்ஸேவ உப்பஜ்ஜனதோ’’தி வுத்தம்.

லிங்கே³தி க³மேதி ஞாபேதீதி லிங்க³ம், லிங்கீ³யதி வா ஏதேனாதி லிங்க³ம், கிம் லிங்கே³தி, கிஞ்ச வா லிங்கீ³யதீதி? இந்த³ம் இந்தோ³ வா, இந்த³ஸ்ஸ லிங்க³ம் இந்த³லிங்க³ம், இந்த³லிங்க³ஸ்ஸ அத்தோ² தம்ஸபா⁴வோ இந்த³லிங்க³ட்டோ², இந்த³லிங்க³மேவ வா இந்த்³ரிய-ஸத்³த³ஸ்ஸ அத்தோ² இந்த³லிங்க³ட்டோ². ஸஜ்ஜிதம் உப்பாதி³தந்தி ஸிட்ட²ம், இந்தே³ன ஸிட்ட²ம் இந்த³ஸிட்ட²ம். ஜுட்ட²ம் ஸேவிதம். கம்மஸங்கா²தஸ்ஸ இந்த³ஸ்ஸ லிங்கா³னி, தேன ச ஸிட்டா²னீதி கம்மஜானேவ யோஜேதப்³பா³னி, ந அஞ்ஞானி. தே ச த்³வே அத்தா² கம்மே ஏவ யோஜேதப்³பா³, இதரே ச ப⁴க³வதி ஏவாதி ‘‘யதா²யோக³’’ந்தி ஆஹ. தேனாதி ப⁴க³வதோ கம்மஸ்ஸ ச இந்த³த்தா. ஏத்தா²தி ஏதேஸு இந்த்³ரியேஸு. உல்லிங்கே³ந்தி பகாஸேந்தி ப²லஸம்பத்திவிபத்தீஹி காரணஸம்பத்திவிபத்திஅவபோ³த⁴தோ. ‘‘ஸோ தம் நிமித்தம் ஆஸேவதீ’’திஆதீ³ஸு (அ. நி. 9.35) கோ³சரகரணம்பி ஆஸேவனாதி வுத்தாதி ஆஹ ‘‘கானிசி கோ³சராஸேவனாயா’’தி. தத்த² ஸப்³பே³ஸம் கோ³சரீகாதப்³ப³த்தேபி ‘‘கானிசீ’’தி வசனம் அவிபஸ்ஸிதப்³பா³னம் ப³ஹுலீமனஸிகரணேன அனாஸேவனீயத்தா. பச்சவேக்க²ணாமத்தமேவ ஹி தேஸு ஹோதீதி. ‘‘தஸ்ஸ தம் மக்³க³ம் ஆஸேவதோ’’திஆதீ³ஸு (அ. நி. 4.170) பா⁴வனா ‘‘ஆஸேவனா’’தி வுத்தாதி பா⁴வேதப்³பா³னி ஸத்³தா⁴தீ³னி ஸந்தா⁴யாஹ ‘‘கானிசி பா⁴வனாஸேவனாயா’’தி. ஆதி⁴பச்சம் இந்த்³ரியபச்சயபா⁴வோ, அஸதி ச இந்த்³ரியபச்சயபா⁴வே இத்தி²புரிஸிந்த்³ரியானம் அத்தனோ பச்சயவஸேன பவத்தமானேஹி தம்ஸஹிதஸந்தானே அஞ்ஞாகாரேன அனுப்பஜ்ஜமானேஹி லிங்கா³தீ³ஹி அனுவத்தனீயபா⁴வோ, இமஸ்மிஞ்சத்தே² இந்த³ந்தி பரமிஸ்ஸரியம் கரோந்திச்சேவ இந்த்³ரியானி. சக்கா²தீ³ஸு த³ஸ்ஸிதேன நயேன அஞ்ஞேஸஞ்ச தத³னுவத்தீஸு ஆதி⁴பச்சம் யதா²ரஹம் யோஜேதப்³ப³ம்.

ஹேட்டா²தி அட்ட²ஸாலினியம். அமோஹோ ஏவ, ந விஸும் சத்தாரோ த⁴ம்மா, தஸ்மா அமோஹஸ்ஸ பஞ்ஞிந்த்³ரியபதே³ விபா⁴விதானி லக்க²ணாதீ³னி தேஸஞ்ச வேதி³தப்³பா³னீதி அதி⁴ப்பாயோ. ஸேஸானி அட்ட²ஸாலினியம் லக்க²ணாதீ³ஹி ஸரூபேனேவ ஆக³தானி. நனு ச ஸுகி²ந்த்³ரியது³க்கி²ந்த்³ரியானம் தத்த² லக்க²ணாதீ³னி ந வுத்தானீதி? கிஞ்சாபி ந வுத்தானி, ஸோமனஸ்ஸதோ³மனஸ்ஸிந்த்³ரியானம் பன வுத்தலக்க²ணாதி³வஸேன விஞ்ஞேய்யதோ ஏதேஸம்பி வுத்தானேவ ஹோந்தி. கத²ம்? இட்ட²போ²ட்ட²ப்³பா³னுப⁴வனலக்க²ணம் ஸுகி²ந்த்³ரியம், இட்டா²காரஸம்போ⁴க³ரஸம், காயிகஸ்ஸாத³பச்சுபட்டா²னம், காயிந்த்³ரியபத³ட்டா²னம். அனிட்ட²போ²ட்ட²ப்³பா³னுப⁴வனலக்க²ணம் து³க்கி²ந்த்³ரியம், அனிட்டா²காரஸம்போ⁴க³ரஸம், காயிகாபா³த⁴பச்சுபட்டா²னம், காயிந்த்³ரியபத³ட்டா²னந்தி. ஏத்த² ச இட்டா²னிட்டா²காரானமேவ ஆரம்மணானம் ஸம்போ⁴க³ரஸதா வேதி³தப்³பா³, ந விபரீதேபி இட்டா²காரேன அனிட்டா²காரேன ச ஸம்போ⁴க³ரஸதாதி.

ஸத்தானம் அரியபூ⁴மிபடிலாபோ⁴ ப⁴க³வதோ தே³ஸனாய ஸாதா⁴ரணம் பதா⁴னஞ்ச பயோஜனந்தி ஆஹ ‘‘அஜ்ஜ²த்தத⁴ம்மம் பரிஞ்ஞாயா’’திஆதி³. அட்ட²கதா²யம் இத்தி²புரிஸிந்த்³ரியானந்தரம் ஜீவிதிந்த்³ரியதே³ஸனக்கமோ வுத்தோ, ஸோ இந்த்³ரியயமகதே³ஸனாய ஸமேதி. இத⁴ பன இந்த்³ரியவிப⁴ங்கே³ மனிந்த்³ரியானந்தரம் ஜீவிதிந்த்³ரியம் வுத்தம், தம் புரிமபச்சி²மானம் அஜ்ஜ²த்திகபா³ஹிரானம் அனுபாலகத்தேன தேஸம் மஜ்ஜே² வுத்தந்தி வேதி³தப்³ப³ம். யஞ்ச கிஞ்சி வேத³யிதம், ஸப்³ப³ம் தம் து³க்க²ம். யாவ ச து³வித⁴த்தபா⁴வானுபாலகஸ்ஸ ஜீவிதிந்த்³ரியஸ்ஸ பவத்தி, தாவ து³க்க²பூ⁴தானம் ஏதேஸம் வேத³யிதானம் அனிவத்தீதி ஞாபனத்த²ம். தேன ச சக்கா²தீ³னம் து³க்கா²னுப³ந்த⁴தாய பரிஞ்ஞேய்யதம் ஞாபேதி. ததோ அனந்தரம் பா⁴வேதப்³ப³த்தாதி பா⁴வனாமக்³க³ஸம்பயுத்தம் அஞ்ஞிந்த்³ரியம் ஸந்தா⁴ய வுத்தம். த³ஸ்ஸனானந்தரா ஹி பா⁴வனாதி.

ஸதிபி புரேஜாதாதி³பச்சயபா⁴வே இந்த்³ரியபச்சயபா⁴வேன ஸாதே⁴தப்³ப³மேவ கிச்சம் ‘‘கிச்ச’’ந்தி ஆஹ தஸ்ஸ அனஞ்ஞஸாதா⁴ரணத்தா இந்த்³ரியகதா²ய ச பவத்தத்தா. புப்³ப³ங்க³மபா⁴வேன மனிந்த்³ரியஸ்ஸ வஸவத்தாபனம் ஹோதி, நாஞ்ஞேஸம். தம்ஸம்பயுத்தானிபி ஹி இந்த்³ரியானி ஸாதே⁴தப்³ப³பூ⁴தானேவ அத்தனோ அத்தனோ இந்த்³ரியகிச்சம் ஸாதே⁴ந்தி சேதஸிகத்தாதி. ‘‘ஸப்³ப³த்த² ச இந்த்³ரியபச்சயபா⁴வேன ஸாதே⁴தப்³ப³’’ந்தி அயம் அதி⁴காரோ அனுவத்ததீதி த³ட்ட²ப்³போ³. அனுப்பாத³னே அனுபத்த²ம்பே⁴ ச தப்பச்சயானம் தப்பவத்தனே நிமித்தபா⁴வோ அனுவிதா⁴னம். சா²தே³த்வா ப²ரித்வா உப்பஜ்ஜமானா ஸுக²து³க்க²வேத³னா ஸஹஜாதே அபி⁴ப⁴வித்வா ஸயமேவ பாகடா ஹோதி, ஸஹஜாதா ச தப்³ப³ஸேன ஸுக²து³க்க²பா⁴வப்பத்தா வியாதி ஆஹ ‘‘யதா²ஸகம் ஓளாரிகாகாரானுபாபன’’ந்தி. அஸந்தஸ்ஸ அபணீதஸ்ஸபி அகுஸலதப்³பி³பாகாதி³ஸம்பயுத்தஸ்ஸ மஜ்ஜ²த்தாகாரானுபாபனம் யோஜேதப்³ப³ம், ஸமானஜாதியம் வா ஸுக²து³க்கே²ஹி ஸந்தபணீதாகாரானுபாபனஞ்ச. பஸன்னபக்³க³ஹிதஉபட்டி²தஸமாஹிதத³ஸ்ஸனாகாரானுபாபனம் யதா²க்கமம் ஸத்³தா⁴தீ³னம். ஆதி³-ஸத்³தே³ன உத்³த⁴ம்பா⁴கி³யஸம்யோஜனானி க³ஹிதானி, மக்³க³ஸம்பயுத்தஸ்ஸேவ ச இந்த்³ரியஸ்ஸ கிச்சம் த³ஸ்ஸிதம், தேனேவ ப²லஸம்பயுத்தஸ்ஸ தம்தம்ஸம்யோஜனானம்யேவ படிப்பஸ்ஸத்³தி⁴பஹானகிச்சதா த³ஸ்ஸிதா ஹோதீதி. ஸப்³ப³கதகிச்சம் அஞ்ஞாதாவிந்த்³ரியம் அஞ்ஞஸ்ஸ காதப்³ப³ஸ்ஸ அபா⁴வா அமதாபி⁴முக²மேவ தப்³பா⁴வபச்சயோ ச ஹோதி, ந இதரானி விய கிச்சந்தரபஸுதஞ்ச. தேனாஹ ‘‘அமதாபி⁴முக²பா⁴வபச்சயதா சா’’தி.

220. ஏவம் ஸந்தேபீதி ஸதிபி ஸப்³ப³ஸங்கா³ஹகத்தே வீரியிந்த்³ரியபதா³தீ³ஹி ஸங்க³ஹேதப்³பா³னி குஸலாகுஸலவீரியாதீ³னி, சக்கு²ந்த்³ரியபதா³தீ³ஹி ஸங்க³ஹேதப்³பா³னி காலபுக்³க³லபச்சயாதி³பே⁴தே³ன பி⁴ன்னானி சக்கா²தீ³னி ஸங்க³ண்ஹந்திச்சேவ ஸப்³ப³ஸங்கா³ஹகானி, ந யஸ்ஸா பூ⁴மியா யானி ந விஜ்ஜந்தி, தேஸம் ஸங்கா³ஹகத்தாதி அத்தோ². தேன ச அவிஸேஸிதத்தா ஸப்³பே³ஸம் ஸப்³ப³பூ⁴மிகத்தக³ஹணப்பஸங்கே³ தம்னிவத்தனேன ஸப்³ப³ஸங்கா³ஹகவசனம் அவிஜ்ஜமானஸ்ஸ ஸங்கா³ஹகத்ததீ³பகம் ந ஹோதீதி த³ஸ்ஸேதி.

அபி⁴த⁴ம்மபா⁴ஜனீயவண்ணனா நிட்டி²தா.