8. ஸம்மப்பதா⁴னவிப⁴ங்கோ³

1. ஸுத்தந்தபா⁴ஜனீயவண்ணனா

390. காரணஸத்³தோ³ யுத்திவாசகோ ‘‘ஸப்³ப³மேதம் அகாரணம் வத³தீ’’திஆதீ³ஸு விய, தஸ்மா காரணப்பதா⁴னாதி யுத்திப்பதா⁴னா, அனுப்பன்னபாபகானுப்பாத³னாதி³கிரியாய அனுரூபப்பதா⁴னாதி ஏவம் வா ஏத்த² அத்தோ² த³ட்ட²ப்³போ³. அனுப்பன்னபாபகாதீ³னம் அனுப்பாதா³தி³ அனுப்பன்னபாபகானுப்பாதா³தி³.

391. ‘‘ந அஞ்ஞோ த⁴ம்மோதி யதா² தண்ஹாயனமிச்சா²பி⁴னிவேஸவாயமனஸபா⁴வானம் தண்ஹாதீ³னம் ச²ந்த³பரியாயோ அஞ்ஞத⁴ம்மோ நாம ஹோதி கத்துகம்யதாஸங்கா²தஸ்ஸ ச²ந்த³னியஸ்ஸ தேஸு அபா⁴வா, த⁴ம்மச்ச²ந்தோ³ பன தம்ஸபா⁴வத்தா அஞ்ஞத⁴ம்மோ ந ஹோதி. தேனாஹ ‘‘த⁴ம்மச்ச²ந்தோ³தி ஸபா⁴வச்ச²ந்தோ³’’தி.

406. அட்ட²கதா²யந்தி போராணட்ட²கதா²யம். வட்டானத்த²ஸம்வத்தனதோதி ஸம்ஸாரது³க்க²ஸம்ப⁴வதோ.

ந ஸக்கோந்தீதி ஆஹ ‘‘ஸந்தாய ஸமாபத்தியா பரிஹீனா ப்³ரஹ்மசரியவாஸே ஸந்த²ம்பி⁴தும் ந ஸக்கோந்தீ’’தி.

தத்த² து³விதா⁴யாதி யோஜேதப்³ப³ம். உப்பன்னாயேவாதி உப்பன்னபுப்³பா³ ஏவ உப்பஜ்ஜந்தி ஸமுதா³சாராதி³வஸேன.

ஸப்³பா³ஸு அவத்தா²ஸூதி பகதத்தாதி³அவத்தா²ஸு. பகதத்தாவத்தே²ன ஹி ஸப்³பே³ன ஸப்³ப³ம் தானி ந சரிதப்³பா³னி. இதராவத்தே²ன ச தத³வத்தா²ய தானி தானியேவ சரிதப்³பா³னி. வத்தப்³ப³ந்திஆதீ³னீதி ஆதி³-ஸத்³தே³ன ‘‘ந ஏகச்ச²ன்னே அனாவாஸே வத்த²ப்³ப³ம், ந ஏகச்ச²ன்னே ஆவாஸே வா அனாவாஸே வா வத்த²ப்³ப³ம், ந ஏகாஸனே நிஸீதி³தப்³ப³ம், ந நீசே ஆஸனே நிஸின்னே உச்சே ஆஸனே நிஸீதி³தப்³ப³ம், ந ச²மாயம் நிஸின்னே ஆஸனே நிஸீதி³தப்³ப³ம், ந ஏகசங்கமே சங்கமிதப்³ப³ம், ந நீசே சங்கமே சங்கமந்தே உச்சே சங்கமே சங்கமிதப்³ப³ம், ந ச²மாயம் சங்கமந்தே சங்கமே சங்கமிதப்³ப³’’ந்தி இமானி ஸங்க³ண்ஹாதி. தேஸந்தி பாரிவாஸிகவுட்³ட⁴தராதீ³னம் வஸேன. ஸம்பிண்டே³த்வாதி ஸங்கட்³டி⁴த்வா. ஏகேகம் கத்வாதி நவாபி ஏகமேகம் கத்வா. ‘‘அபி⁴வாத³னபச்சுட்டா²னஞ்ஜலிகம்மஸாமீசிகம்மம் ந ஸாதி³தப்³ப³ம், ஆஸனாபி⁴ஹாரம், ஸேய்யாபி⁴ஹாரம், பாதோ³த³கம், பாத³பீட²ம், பாத³கத²லிகம், பத்தசீவரபடிக்³க³ஹணம் ந ஸாதி³தப்³ப³’’ந்தி இத³ம் ஸப்³ப³ம்பி அஸாதி³யனஸாமஞ்ஞேன ஏகம். த³ஸாதி ‘‘ந ஸீலவிபத்தியா, ந ஆசாரவிபத்தியா, ந தி³ட்டி²விபத்தியா, ந ஆஜீவவிபத்தியா, ந பி⁴க்கூ² பி⁴க்கூ²ஹி பே⁴தே³தப்³பா³, ந கி³ஹித்³த⁴ஜோ தா⁴ரேதப்³போ³, ந தித்தி²யத்³த⁴ஜோ தா⁴ரேதப்³போ³, ந தித்தி²யா ஸேவிதப்³பா³, பி⁴க்கூ² ஸேவிதப்³பா³, பி⁴க்கு²ஸிக்கா²ய ஸிக்கி²தப்³ப³’’ந்தி (சூளவ. 60) ஏவமாக³தா த³ஸ.

‘‘கம்மஞ்சா’’தி பச்சத்தவஸேன வுத்தம் கம்மம் ‘‘அவிபக்கவிபாகஸ்ஸா’’தி ஏத்த² ‘‘கம்மஸ்ஸா’’தி ஸாமிவசனவஸேன பரிணாமேத்வா யோஜேதப்³ப³ம். பூ⁴தாபக³துப்பன்னந்தி வுத்தந்தி ஸம்ப³ந்தோ⁴. இதா⁴தி இமிஸ்ஸா ஸம்மோஹவினோத³னியா. ‘‘ஏவம் கதே ஓகாஸே விபாகோ…பே… உப்பன்னோதி வுச்சதீ’’தி வத³ந்தோ விபாகமேவ வத³தி. தத்தா²தி அட்ட²ஸாலினியம். மக்³கே³ன ஸமுச்சி²ன்னா தா²மக³தா காமராகா³த³யோ ‘‘அனுஸயா’’தி வுச்சந்தீதி ஆஹ ‘‘அனுஸயித…பே… மக்³கே³ன பஹாதப்³பா³’’தி.

ஆஹதகீ²ரருக்கோ² விய ஆரம்மணம், கத²ம்? நிமித்தக்³கா³ஹவஸேன. தமேவத்த²ம் விவரதி ‘‘அதி⁴க³த’’ந்திஆதி³னா. தத்த² நிமித்தக்³கா³ஹவஸேன ஆரம்மணஸ்ஸ அதி⁴க்³க³ஹிதத்தா தம் ஆரம்மணம் அனுஸ்ஸரிதானுஸ்ஸரிதக்க²ணே கிலேஸுப்பத்திஹேதுபா⁴வேன உப்பத்திட்டா²னதோ அதி⁴க³தமேவ நாம ஹோதீதி ஆஹ ‘‘அதி⁴க³தம் நிமித்தக்³கா³ஹவஸேனா’’தி, தம் ஆரம்மணம் பாதுபூ⁴தகிலேஸந்தி அதி⁴ப்பாயோ. கிலேஸுப்பத்தினிமித்ததாய உப்பத்திரஹம் கிலேஸம் ‘‘ஆரம்மணம் அந்தோக³த⁴கிலேஸ’’ந்தி வுத்தம். தஞ்ச கோ² கா³ஹகே லப்³ப⁴மானம் க³ஹேதப்³பே³ உபசரித்வா, யதா² நிஸ்ஸிதே லப்³ப⁴மானம் நிஸ்ஸயே உபசரித்வா ‘‘மஞ்சா உக்குட்டி²ம் கரோந்தீ’’தி. இதா³னி உபசாரம் முஞ்சித்வா நிப்பரியாயேனேவ அத்த²ம் த³ஸ்ஸேந்தோ ‘‘நிமித்தக்³கா³ஹ…பே… ஸதி³ஸா’’தி ஆஹ. வித்தா²ரேதப்³ப³ந்தி ‘‘யதா² கிம்? ஸசே கீ²ரருக்க²’’ந்திஆதி³னா வித்தா²ரேதப்³ப³ம்.

திதா⁴தி அதீதாதி³வஸேன திதா⁴. ஆப⁴தோ உபமாவஸேன. அப்பஹீனதாத³ஸ்ஸனத்த²ம்பீதி பி-ஸத்³தே³ன ‘‘திதா⁴ நவத்தப்³ப³தாத³ஸ்ஸனத்த²ம்பீ’’தி வுத்தமேவ ஸம்பிண்டே³தி. ஏவம் மக்³கே³ன பஹீனகிலேஸா த³ட்ட²ப்³பா³ மக்³கே³ அனுப்பன்னே உப்பத்திரஹானம்பி உப்பன்னே ஸப்³பே³ன ஸப்³ப³ம் அபா⁴வதோ.

ஸுத்தந்தபா⁴ஜனீயவண்ணனா நிட்டி²தா.

3. பஞ்ஹபுச்ச²கவண்ணனா

427. வீரியஜேட்டி²காய பன மக்³க³பா⁴வனாய ந வத்தப்³பா³னி ஸம்மப்பதா⁴னானி ‘‘மக்³கா³தி⁴பதீனீ’’தி வா ‘‘நமக்³கா³தி⁴பதீனீ’’தி வாதி வாதி ஏத்த² பட²மஸ்ஸ வீரியந்தராபா⁴வோ, இதரஸ்ஸ இதராதி⁴பதினோ, நமக்³க³பூ⁴தவீரியாதி⁴பதினோ ச அபா⁴வோ நவத்தப்³ப³தாய காரணந்தி இமமத்த²மாஹ ‘‘மக்³கா³தி⁴பதீனீ’’திஆதி³னா. ததா³தி வீரியஜேட்டி²கமக்³க³பா⁴வனாகாலே.

பஞ்ஹபுச்ச²கவண்ணனா நிட்டி²தா.

ஸம்மப்பதா⁴னவிப⁴ங்க³வண்ணனா நிட்டி²தா.