2. ஆயுப்பமாணவண்ணனா

1026. ஸுபரிமஜ்ஜிதகஞ்சனாதா³ஸம் விய ஸோப⁴தி விஜ்ஜோததீதி ஸுபோ⁴, ஸரீரோபா⁴ஸோ, தேன ஸுபே⁴ன கிண்ணா விகிண்ணாதி ஸுப⁴கிண்ணா.

1027. தம்தம்மனஸிகாரந்தி பரித்தபத²வீகஸிணாதி³க³தமனஸிகாரம். அப்பனாக்க²ணேபீதி பி-ஸத்³தே³ன புப்³ப³பா⁴க³ம் ஸம்பிண்டே³தி. ச²ந்த³னம் ஆரம்மணபரியேஸனம் ச²ந்தோ³, கத்துகம்யதாச²ந்தோ³. பணிதா⁴னம் சித்தட்ட²பனா பணிதி⁴, ஸஞ்ஞாவிராகா³தீ³ஹி ஆரம்மணஸ்ஸ விஸேஸனம் ததா²பவத்தாய பா⁴வனாய ஆரம்மணகரணமேவ.

விபுலம் வுச்சதி மஹந்தம், ஸந்தபா⁴வோபி மஹனீயதாய மஹந்தமேவாதி ஆஹ ‘‘விபுலா ப²லாதி விபுலஸந்தஸுகா²யுவண்ணாதி³ப²லா’’தி.

1028. யம் சாதுமஹாராஜிகானம் ஆயுப்பமாணம், ஸஞ்ஜீவே ஏஸோ ஏகோ ரத்திதி³வோ, தாய ரத்தியா திம்ஸ ரத்தியோ மாஸோ, தேன மாஸேன த்³வாத³ஸமாஸிகோ ஸம்வச்ச²ரோ, தேன ஸம்வச்ச²ரேன பஞ்ச வஸ்ஸஸதானி ஸஞ்ஜீவே ஆயுப்பமாணம். யம் தாவதிம்ஸானம் ஆயுப்பமாணம், ஏஸோ காளஸுத்தே ஏகோ ரத்திதி³வோ…பே… தேன ஸம்வச்ச²ரேன வஸ்ஸஸஹஸ்ஸம் காளஸுத்தே ஆயுப்பமாணம். யம் யாமானம் ஆயுப்பமாணம், ஏஸோ ஸங்கா⁴தே ஏகோ ரத்திதி³வோ…பே… தேன ஸம்வச்ச²ரேன த்³வே வஸ்ஸஸஹஸ்ஸானி ஸங்கா⁴தே ஆயுப்பமாணம். யம் துஸிதானம் ஆயுப்பமாணம், ரோருவே ஏஸோ ஏகோ ரத்திதி³வோ…பே… தேன ஸம்வச்ச²ரேன சத்தாரி வஸ்ஸஸஹஸ்ஸானி ரோருவே ஆயுப்பமாணம். யம் நிம்மானரதீனம் ஆயுப்பமாணம், மஹாரோருவே ஏஸோ ஏகோ ரத்திதி³வோ…பே… தேன ஸம்வச்ச²ரேன அட்ட² வஸ்ஸஸஹஸ்ஸானி மஹாரோருவே ஆயுப்பமாணம். யம் பரனிம்மிதவஸவத்தீனம் தே³வானம் ஆயுப்பமாணம், தாபனே ஏஸோ ஏகோ ரத்திதி³வோ…பே… தேன ஸம்வச்ச²ரேன ஸோளஸ வஸ்ஸஸஹஸ்ஸானி தாபனே ஆயுப்பமாணம். மஹாதாபனே உபட்³ட⁴ந்தரகப்போ. அவீசியம் ஏகோ அந்தரகப்போ ச ஆயுப்பமாணந்தி வத³ந்தி. தே³வானம் அதி⁴முத்தகாலகிரியா விய தாதி³ஸேன புஞ்ஞப³லேன அந்தராபி மரணம் ஹோதீதி ‘‘கம்மமேவ பமாண’’ந்தி வுத்தந்தி வேதி³தப்³ப³ம். ஏவஞ்ச கத்வா அப்³பு³தா³தி³ஆயுபரிச்சே²தோ³பி யுத்ததரோ ஹோதீதி.

கிம் ஜா²னந்தி அட்ட²ஸு ஜா²னேஸு கதரம் ஜா²னம். ப⁴வஸீஸானீதி ப⁴வக்³கா³னி, புது²ஜ்ஜனப⁴வக்³க³ம் அரியப⁴வக்³க³ம் ஸப்³ப³ப⁴வக்³க³ந்தி வேஹப்ப²லாதீ³னம் ஸமஞ்ஞா. கஸ்ஸசி ஸத்தாதி புது²ஜ்ஜனஸ்ஸ, கஸ்ஸசி பஞ்சாதி ஸோதாபன்னஸ்ஸ, ஸகதா³கா³மினோ ச, கஸ்ஸசி தயோதி அனாகா³மினோ வஸேன வுத்தம். தஸ்மா ஸோ ப்³ரஹ்மகாயிகாதீ³ஹி சுதோ அரூபம் உபபஜ்ஜந்தோ வேதி³தப்³போ³. ‘‘நவஸு ப்³ரஹ்மலோகேஸு நிப்³ப³த்தஅரியஸாவகானம் தத்ரூபபத்தியேவ ஹோதி, ந ஹேட்டூ²பபத்தீ’’தி (விப⁴. அட்ட². 1028) அயம் அட்ட²கதா²பாடோ²தி அதி⁴ப்பாயேன ‘‘யம் பனா’’திஆதி³ வுத்தம். ‘‘தத்ரூபபத்திபி ஹோதி உபரூபபத்திபி, ந ஹேட்டூ²பபத்தீ’’தி பன பாடோ²தி தேன ‘‘ஹேட்டூ²பபத்தியேவ நிவாரிதா’’திஆதி³வசனேன பயோஜனம் நத்தி². அரூபதா⁴தூபபத்தி ச ந நிவாரிதாதி ஸம்ப³ந்தோ⁴. அரூபதா⁴தூபபத்தி ந நிவாரிதா ‘‘மத்த²கே டி²தோவ பரினிப்³பா³தீ’’தி நியமஸ்ஸ அனிச்சி²தத்தா.

அஞ்ஞத்தா²தி காமலோகே. தத்தா²தி ரூபலோகே. அயம் அட்ட²கதா²தி ‘‘பட²மஜ்ஜா²னபூ⁴மியம் நிப்³ப³த்தோ…பே… பரினிப்³பா³தீ’’தி ஏவம் பவத்தா அட்ட²கதா². தேனேவாதி யஸ்மா ரூபதா⁴துயம் உபபன்னோ அதி⁴ப்பேதோ, ந உபபஜ்ஜனாரஹோ, தேனேவ காரணேன. தஸ்ஸாதி யதா²வுத்தஸ்ஸ ரூபதா⁴துயம் உபபன்னஸ்ஸ அரியஸாவகஸ்ஸ. யேன ரூபராகே³ன தத்த² ரூபப⁴வே உபபன்னோ, தஸ்மிம் அரூபஜ்ஜா²னேன விக்க²ம்பி⁴தே ஸம்மதே³வ தி³ட்டா²தீ³னவேஸு யதா² காமரூபப⁴வேஸு ஆயதிம் ப⁴வாபி⁴லாஸோ ந ப⁴விஸ்ஸதி, ஏவம் அரூபப⁴வேபீதி த³ஸ்ஸேந்தோ ஆஹ ‘‘புன…பே… ப⁴விஸ்ஸதியேவா’’தி. தத்த² நிப்³ப³த்தோதி ரூபதா⁴துயம் உபபன்னோ. அரியமக்³க³ம் பா⁴வேத்வாதி ஹேட்டி²மம் அரியமக்³க³ம் ஸம்பாதே³த்வா. நிப்³ப³த்தப⁴வாதீ³னவத³ஸ்ஸனவஸேனாதி தஸ்மிம் ரூபப⁴வே நிப்³ப³த்தோபி தத்தே²வ ஆதீ³னவத³ஸ்ஸனவஸேன. அனிவத்திதப⁴வாபி⁴லாஸோதி உபரி அரூபப⁴வே அவிஸ்ஸட்ட²ப⁴வபத்த²னோ, யதோ அரூபதா⁴துயம் உபபஜ்ஜனாரஹோ. தஸ்ஸ வஸேனாதி தாதி³ஸஸ்ஸ அரியஸாவகஸ்ஸ வஸேன. ‘‘கஸ்ஸசி பஞ்ச, கஸ்ஸசி தயோ அனுஸயா அனுஸேந்தீ’’தி அயம் யமகபாளி (யம. 2.அனுஸயயமக.312) பவத்தா.

ஆயுப்பமாணவண்ணனா நிட்டி²தா.