18. த⁴ம்மஹத³யவிப⁴ங்கோ³

1. ஸப்³ப³ஸங்கா³ஹிகவாரவண்ணனா

978. தா⁴துஸம்ப⁴வ…பே… ஸங்க³ஹிதத்தாதி ஏத்த² க²ந்தா⁴தீ³னம் காமதா⁴துஆதி³தா⁴தூஸு ஸம்ப⁴வபே⁴த³பி⁴ன்னானம் நிரவஸேஸதோ ஸங்க³ஹிதத்தாதி விபா⁴கே³ன யோஜனா, ததா² ஸேஸேஸுபி பரியாபன்னபபே⁴த³பி⁴ன்னானந்திஆதி³னா. தத்த² ‘‘நிரவஸேஸதோ ஸங்க³ஹிதத்தா’’தி இமினா ‘‘ஸப்³ப³ஸங்கா³ஹிகவாரோ’’தி அயமஸ்ஸ அத்தா²னுக³தா ஸமஞ்ஞாதி த³ஸ்ஸேதி. யஸ்மா சேத்த² க²ந்தா⁴தீ³னம் த்³வாத³ஸன்னம் கோட்டா²ஸானம் அனவஸேஸஸங்க³ஹோ, தஸ்மா ஏவம் து³தியவாராதீ³னஞ்சேத்த² அனுப்பவேஸோ வேதி³தப்³போ³. க²ந்தா⁴தீ³னமேவ ஹி தேஸம் ஸம்ப⁴வாதி³விசாரோ உப்பத்தானுப்பத்தித³ஸ்ஸனவாரோதி வத்தும் யுத்தோதி யோஜனா. அனுப்பத்தித³ஸ்ஸனஞ்சேத்த² அத்தா²பத்திஸித்³த⁴ம் வேதி³தப்³ப³ம். ந ஹி தத்த² ‘‘கதி க²ந்தா⁴ ந பாதுப⁴வந்தீ’’திஆதி³பாளி அத்தி².

979. புச்சா²னுரூபந்தி யேனாதி⁴ப்பாயேன புச்சா² கதா, தத³னுரூபம். அவிதத²ப்³யாகரணம் நாம பு³த்³தா⁴னம் ஏவ ஆவேணிகம், அஞ்ஞேஸம் தம் யாதி³ச்சி²கம் ஸுதக்க²ரஸதி³ஸந்தி ஆஹ ‘‘ஸப்³ப³ஞ்ஞுவசனம் விஞ்ஞாய கதத்தா’’தி.

ஸப்³ப³ஸங்கா³ஹிகவாரவண்ணனா நிட்டி²தா.

2. உப்பத்தானுப்பத்திவாரவண்ணனா

991. ‘‘காமப⁴வே’’தி இத³ம் ஓகாஸவஸேன வத்வா புன ஸத்தஸந்தானவஸேன வத்தும் ‘‘காமதா⁴துஸம்பூ⁴தானஞ்சா’’தி வுத்தந்தி தமத்த²விஸேஸம் த³ஸ்ஸேந்தோ ‘‘இத்³தி⁴யா…பே… அத்தோ²’’தி ஆஹ. ‘‘ந வத்தப்³ப³ம் ஸியா’’தி கஸ்மா வுத்தம், யதி³பி அஸஞ்ஞஸத்தானம் அசக்கு²கத்தா ரூபாயதனம் அச்சந்தஸுகு²மத்தா ஹேட்டி²மபூ⁴மிகானஞ்ச அகோ³சரோ, ஸமானபூ⁴மிகானம் பன வேஹப்ப²லானம், உபரிபூ⁴மிகானஞ்ச ஸுத்³தா⁴வாஸானம் சக்கா²யதனஸ்ஸ கோ³சரோ ஹோதீதி ஆயதனாதி³கிச்சம் கரோதியேவாதி ஸக்கா வத்தும். யம் பனேத்த² வித்தா²ரதோ வத்தப்³ப³ம், தம் ஹேட்டா² வுத்தமேவ. ‘‘ஹேட்ட²தோ அவீசினிரயம் பரியந்தம் கத்வா உபரிதோ பரனிம்மிதவஸவத்திதே³வே அந்தோகரித்வா யம் ஏதஸ்மி’’ந்திஆதி³னா (த⁴. ஸ. 1287) வுத்தபதே³ஸா காமாவசராதி³ஓகாஸா. தே ஸத்தனிகாயா ச தா⁴தூதி வுச்சந்தி ஸமுதா³யஸ்ஸ அவயவாதா⁴ரபா⁴வதோ யதா² ‘‘மாஸபுஞ்ஜோ மாஸோ’’தி. ஸத்தா உப்பஜ்ஜந்தி ஏத்தா²தி ஸத்துப்பத்தி, உப்பஜ்ஜனட்டே²ன ஸத்தாவ உப்பத்தி ஸத்துப்பத்தீதி ஏவம் ஓகாஸஸத்தலோகத்³வயஸ்ஸ ஸத்துப்பத்திபரியாயோ வேதி³தப்³போ³. ஸத்தபா⁴வேன உப்பத்தி, ந அனுபாதி³ன்னக்க²ந்தா⁴ விய ஸங்கா²ரபா⁴வேனேவாதி அதி⁴ப்பாயோ. கே பன தேதி ஆஹ ‘‘ஸத்தாவாஸவஸேன…பே… உபாதி³ன்னகக்க²ந்தா⁴’’தி. தம்தம்பரியாபன்னானந்தி தம்தம்ஸத்தாவாஸபரியாபன்னானம் ஸத்தானம், ஸங்கா²ரானமேவ வா. ஸதி³ஸாதி⁴ட்டா²னபா⁴வேனாதி ஸதி³ஸாகாரேன பவத்தமானானம் க²ந்தா⁴னம் பதிட்டா²னபா⁴வேன. யேபு⁴ய்யேன ஹி தஸ்மிம் ஸத்தாவாஸே த⁴ம்மா ஸமானாகாரேன பவத்தந்தி.

உப்பத்தானுப்பத்திவாரவண்ணனா நிட்டி²தா.

3. பரியாபன்னாபரியாபன்னவாரவண்ணனா

999. தத்த², அஞ்ஞத்த² சாதி தஸ்மிம், அஞ்ஞஸ்மிஞ்ச ப⁴வே, ஓகாஸே ச. பரிச்சே²த³காரிகாய காமாதி³தண்ஹாய பரிச்சி²ஜ்ஜ ஆபன்னா க³ஹிதாதி பரியாபன்னாதி தம்தம்ப⁴வாதி³அந்தோக³தா⁴ தம்தம்பரியாபன்னா.

பரியாபன்னாபரியாபன்னவாரவண்ணனா நிட்டி²தா.

6. உப்பாத³ககம்மஆயுப்பமாணவாரோ

1. உப்பாத³ககம்மவண்ணனா

1021. தா⁴துத்தயபூ⁴ததே³வவஸேனாதி காமாதி³தா⁴துத்தயே நிப்³ப³த்ததே³வானம் வஸேன.

உப்பாத³ககம்மவண்ணனா நிட்டி²தா.

2. ஆயுப்பமாணவண்ணனா

1026. ஸுபரிமஜ்ஜிதகஞ்சனாதா³ஸம் விய ஸோப⁴தி விஜ்ஜோததீதி ஸுபோ⁴, ஸரீரோபா⁴ஸோ, தேன ஸுபே⁴ன கிண்ணா விகிண்ணாதி ஸுப⁴கிண்ணா.

1027. தம்தம்மனஸிகாரந்தி பரித்தபத²வீகஸிணாதி³க³தமனஸிகாரம். அப்பனாக்க²ணேபீதி பி-ஸத்³தே³ன புப்³ப³பா⁴க³ம் ஸம்பிண்டே³தி. ச²ந்த³னம் ஆரம்மணபரியேஸனம் ச²ந்தோ³, கத்துகம்யதாச²ந்தோ³. பணிதா⁴னம் சித்தட்ட²பனா பணிதி⁴, ஸஞ்ஞாவிராகா³தீ³ஹி ஆரம்மணஸ்ஸ விஸேஸனம் ததா²பவத்தாய பா⁴வனாய ஆரம்மணகரணமேவ.

விபுலம் வுச்சதி மஹந்தம், ஸந்தபா⁴வோபி மஹனீயதாய மஹந்தமேவாதி ஆஹ ‘‘விபுலா ப²லாதி விபுலஸந்தஸுகா²யுவண்ணாதி³ப²லா’’தி.

1028. யம் சாதுமஹாராஜிகானம் ஆயுப்பமாணம், ஸஞ்ஜீவே ஏஸோ ஏகோ ரத்திதி³வோ, தாய ரத்தியா திம்ஸ ரத்தியோ மாஸோ, தேன மாஸேன த்³வாத³ஸமாஸிகோ ஸம்வச்ச²ரோ, தேன ஸம்வச்ச²ரேன பஞ்ச வஸ்ஸஸதானி ஸஞ்ஜீவே ஆயுப்பமாணம். யம் தாவதிம்ஸானம் ஆயுப்பமாணம், ஏஸோ காளஸுத்தே ஏகோ ரத்திதி³வோ…பே… தேன ஸம்வச்ச²ரேன வஸ்ஸஸஹஸ்ஸம் காளஸுத்தே ஆயுப்பமாணம். யம் யாமானம் ஆயுப்பமாணம், ஏஸோ ஸங்கா⁴தே ஏகோ ரத்திதி³வோ…பே… தேன ஸம்வச்ச²ரேன த்³வே வஸ்ஸஸஹஸ்ஸானி ஸங்கா⁴தே ஆயுப்பமாணம். யம் துஸிதானம் ஆயுப்பமாணம், ரோருவே ஏஸோ ஏகோ ரத்திதி³வோ…பே… தேன ஸம்வச்ச²ரேன சத்தாரி வஸ்ஸஸஹஸ்ஸானி ரோருவே ஆயுப்பமாணம். யம் நிம்மானரதீனம் ஆயுப்பமாணம், மஹாரோருவே ஏஸோ ஏகோ ரத்திதி³வோ…பே… தேன ஸம்வச்ச²ரேன அட்ட² வஸ்ஸஸஹஸ்ஸானி மஹாரோருவே ஆயுப்பமாணம். யம் பரனிம்மிதவஸவத்தீனம் தே³வானம் ஆயுப்பமாணம், தாபனே ஏஸோ ஏகோ ரத்திதி³வோ…பே… தேன ஸம்வச்ச²ரேன ஸோளஸ வஸ்ஸஸஹஸ்ஸானி தாபனே ஆயுப்பமாணம். மஹாதாபனே உபட்³ட⁴ந்தரகப்போ. அவீசியம் ஏகோ அந்தரகப்போ ச ஆயுப்பமாணந்தி வத³ந்தி. தே³வானம் அதி⁴முத்தகாலகிரியா விய தாதி³ஸேன புஞ்ஞப³லேன அந்தராபி மரணம் ஹோதீதி ‘‘கம்மமேவ பமாண’’ந்தி வுத்தந்தி வேதி³தப்³ப³ம். ஏவஞ்ச கத்வா அப்³பு³தா³தி³ஆயுபரிச்சே²தோ³பி யுத்ததரோ ஹோதீதி.

கிம் ஜா²னந்தி அட்ட²ஸு ஜா²னேஸு கதரம் ஜா²னம். ப⁴வஸீஸானீதி ப⁴வக்³கா³னி, புது²ஜ்ஜனப⁴வக்³க³ம் அரியப⁴வக்³க³ம் ஸப்³ப³ப⁴வக்³க³ந்தி வேஹப்ப²லாதீ³னம் ஸமஞ்ஞா. கஸ்ஸசி ஸத்தாதி புது²ஜ்ஜனஸ்ஸ, கஸ்ஸசி பஞ்சாதி ஸோதாபன்னஸ்ஸ, ஸகதா³கா³மினோ ச, கஸ்ஸசி தயோதி அனாகா³மினோ வஸேன வுத்தம். தஸ்மா ஸோ ப்³ரஹ்மகாயிகாதீ³ஹி சுதோ அரூபம் உபபஜ்ஜந்தோ வேதி³தப்³போ³. ‘‘நவஸு ப்³ரஹ்மலோகேஸு நிப்³ப³த்தஅரியஸாவகானம் தத்ரூபபத்தியேவ ஹோதி, ந ஹேட்டூ²பபத்தீ’’தி (விப⁴. அட்ட². 1028) அயம் அட்ட²கதா²பாடோ²தி அதி⁴ப்பாயேன ‘‘யம் பனா’’திஆதி³ வுத்தம். ‘‘தத்ரூபபத்திபி ஹோதி உபரூபபத்திபி, ந ஹேட்டூ²பபத்தீ’’தி பன பாடோ²தி தேன ‘‘ஹேட்டூ²பபத்தியேவ நிவாரிதா’’திஆதி³வசனேன பயோஜனம் நத்தி². அரூபதா⁴தூபபத்தி ச ந நிவாரிதாதி ஸம்ப³ந்தோ⁴. அரூபதா⁴தூபபத்தி ந நிவாரிதா ‘‘மத்த²கே டி²தோவ பரினிப்³பா³தீ’’தி நியமஸ்ஸ அனிச்சி²தத்தா.

அஞ்ஞத்தா²தி காமலோகே. தத்தா²தி ரூபலோகே. அயம் அட்ட²கதா²தி ‘‘பட²மஜ்ஜா²னபூ⁴மியம் நிப்³ப³த்தோ…பே… பரினிப்³பா³தீ’’தி ஏவம் பவத்தா அட்ட²கதா². தேனேவாதி யஸ்மா ரூபதா⁴துயம் உபபன்னோ அதி⁴ப்பேதோ, ந உபபஜ்ஜனாரஹோ, தேனேவ காரணேன. தஸ்ஸாதி யதா²வுத்தஸ்ஸ ரூபதா⁴துயம் உபபன்னஸ்ஸ அரியஸாவகஸ்ஸ. யேன ரூபராகே³ன தத்த² ரூபப⁴வே உபபன்னோ, தஸ்மிம் அரூபஜ்ஜா²னேன விக்க²ம்பி⁴தே ஸம்மதே³வ தி³ட்டா²தீ³னவேஸு யதா² காமரூபப⁴வேஸு ஆயதிம் ப⁴வாபி⁴லாஸோ ந ப⁴விஸ்ஸதி, ஏவம் அரூபப⁴வேபீதி த³ஸ்ஸேந்தோ ஆஹ ‘‘புன…பே… ப⁴விஸ்ஸதியேவா’’தி. தத்த² நிப்³ப³த்தோதி ரூபதா⁴துயம் உபபன்னோ. அரியமக்³க³ம் பா⁴வேத்வாதி ஹேட்டி²மம் அரியமக்³க³ம் ஸம்பாதே³த்வா. நிப்³ப³த்தப⁴வாதீ³னவத³ஸ்ஸனவஸேனாதி தஸ்மிம் ரூபப⁴வே நிப்³ப³த்தோபி தத்தே²வ ஆதீ³னவத³ஸ்ஸனவஸேன. அனிவத்திதப⁴வாபி⁴லாஸோதி உபரி அரூபப⁴வே அவிஸ்ஸட்ட²ப⁴வபத்த²னோ, யதோ அரூபதா⁴துயம் உபபஜ்ஜனாரஹோ. தஸ்ஸ வஸேனாதி தாதி³ஸஸ்ஸ அரியஸாவகஸ்ஸ வஸேன. ‘‘கஸ்ஸசி பஞ்ச, கஸ்ஸசி தயோ அனுஸயா அனுஸேந்தீ’’தி அயம் யமகபாளி (யம. 2.அனுஸயயமக.312) பவத்தா.

ஆயுப்பமாணவண்ணனா நிட்டி²தா.

7. அபி⁴ஞ்ஞேய்யாதி³வாரவண்ணனா

1030. ‘‘ருப்பனலக்க²ணம் ரூபம், அனுப⁴வனலக்க²ணா வேத³னா’’திஆதி³னா ஸாமஞ்ஞலக்க²ணபரிக்³கா³ஹிகா. ‘‘பு²ஸனலக்க²ணோ ப²ஸ்ஸோ, ஸாதலக்க²ணம் ஸுக²’’ந்திஆதி³னா விஸேஸலக்க²ணபரிக்³கா³ஹிகா.

‘‘சத்தாரோ க²ந்தா⁴ ஸியா குஸலா’’திஆதீ³ஸு இத⁴ யம் வத்தப்³ப³ம், தம் க²ந்த⁴விப⁴ங்கா³தீ³ஸு வுத்தம், தஸ்மா தத்த² வுத்தனயேனேவ க³ஹேதப்³ப³ந்தி அதி⁴ப்பாயோ. ஸேஸம் யதே³த்த² ந வுத்தம், தம் ஸுவிஞ்ஞேய்யமேவாதி.

அபி⁴ஞ்ஞேய்யாதி³வாரவண்ணனா நிட்டி²தா.

த⁴ம்மஹத³யவிப⁴ங்க³வண்ணனா நிட்டி²தா.

இதி ஸம்மோஹவினோத³னியா டீகாய லீனத்த²வண்ணனா

விப⁴ங்க³-அனுடீகா ஸமத்தா.