1. க²ந்த⁴விப⁴ங்கோ³

1. ஸுத்தந்தபா⁴ஜனீயவண்ணனா

சதுஸச்சந்தோக³த⁴த்தா சதுன்னம் அரியஸச்சானம் கா³தா²யம் ‘‘சதுஸச்சத³ஸோ’’தி நிப்பதே³ஸதோ ஸச்சானி க³ஹிதானீதி நிப்பதே³ஸதோ ஏவ தத³த்த²ம் விபா⁴வேந்தோ ‘‘சத்தாரி ஸச்சானீ’’திஆதி³மாஹ. தத்த² ஸமாஹடானீதி ஸமானீதானி, சித்தேன ஏகதோ க³ஹிதானீதி அதி⁴ப்பாயோ. ‘‘ஸமாஹடானீ’’தி ச ஏதேன ஸமாஹாரே அயம் ஸமாஸோதி த³ஸ்ஸேதி. தேனேவஸ்ஸ கதேகத்தஸ்ஸ சதுஸச்சந்தி நபும்ஸகனித்³தே³ஸோ ‘‘திவட்ட’’ந்திஆதீ³ஸு விய. பத்தாதி³பக்கே²பேன ஹிஸ்ஸ ந இத்தி²லிங்க³தா யதா² பஞ்சபத்தம், சதுயுக³ம், திபு⁴வனந்தி, தம் சதுஸச்சம் பஸ்ஸி அத³க்கி², பரிஞ்ஞாபஹானஸச்சி²கிரியாபா⁴வனாபி⁴ஸமயவஸேன படிவிஜ்ஜீ²தி அத்தோ². கஸ்மா பனேத்த² அனந்தாபரிமாணேஸு அனஞ்ஞஸாதா⁴ரணேஸு மஹாகருணாஸப்³ப³ஞ்ஞுதஞ்ஞாணாதீ³ஸு பு³த்³த⁴கு³ணேஸு ஸம்விஜ்ஜமானேஸு ஸாவகேஹி, பச்சேகபு³த்³தே⁴ஹி ச ஸாதா⁴ரணேன சதுஸச்சத³ஸ்ஸனேன ப⁴க³வந்தம் தோ²மேதீதி சோத³னம் மனஸி கத்வா ஆஹ ‘‘ஸதிபி ஸாவகான’’ந்திஆதி³. தத்த² ‘‘அனஞ்ஞபுப்³ப³கத்தா’’தி இமினா ஸாவகேஹி, ‘‘தத்த² சா’’திஆதி³னா பச்சேகபு³த்³தே⁴ஹி ச ப⁴க³வதோ சதுஸச்சத³ஸ்ஸனஸ்ஸ அஸாதா⁴ரணதம், நிரதிஸயதஞ்ச த³ஸ்ஸேதி. பரஸந்தானேஸு பஸாரிதபா⁴வேன ஸுபாகடத்தாதி தே³ஸனானுபா⁴வேன வேனேய்யஸந்தானேஸு சதுஸச்சத³ஸ்ஸனஸ்ஸ வித்தா²ரிதபா⁴வேன யாவ தே³வமனுஸ்ஸேஸு ஸுப்பகாஸிதத்தா. நாத²ஸத்³த³ம் லோகே யாசனுபதாபிஸ்ஸரியாஸீஸாஸு பட²ந்தீதி தமத்த²ம் த³ஸ்ஸேதும் ‘‘நாத²தீதி நாதோ²’’திஆதி³ வுத்தம். தத்த² யஸ்மா ப⁴க³வா சதுஸச்சத³ஸ்ஸனபா⁴வேனேவ அத்தனோ ஹிதஸுகா²ஸீஸாய கிலேஸப்³யஸனுபதாபனஸ்ஸ, ஹிதபடிபத்தியாசனஸ்ஸ ச மத்த²கம் பத்தோ, தஸ்மா தம் தேனேவ பகாஸிதந்தி அத்து²த்³தா⁴ரம் அனாமஸித்வா பது³த்³தா⁴ரவஸேன நாத²ஸத்³த³ஸ்ஸ அத்த²ம் த³ஸ்ஸேந்தோ ‘‘வேனேய்யானம் ஹிதஸுக²ம் ஆஸீஸதீ’’திஆதி³மாஹ. ‘‘சதுஸச்சத³ஸோ’’தி வா இமினா அனஞ்ஞஸாதா⁴ரணோ ப⁴க³வதோ ஞாணானுபா⁴வோ பகாஸிதோதி ‘‘நாதோ²’’தி இமினா அனஞ்ஞஸாதா⁴ரணம் கருணானுபா⁴வம் விபா⁴வேதும் ‘‘வேனேய்யான’’ந்திஆதி³ வுத்தம். பரமேன சித்திஸ்ஸரியேன ஸமன்னாக³தோ ப⁴க³வா நாதோ²தி வுச்சதீதி யோஜனா. ததா² பரமேன சித்திஸ்ஸரியேன ஸமன்னாக³தோ ஸப்³ப³ஸத்தே கு³ணேஹி ஈஸதீதி யோஜேதப்³ப³ம். சித்திஸ்ஸரியேனாதி அரியித்³தி⁴ஆதி³னா சித்தே வஸீபா⁴வேன. கு³ணேஹி ஈஸதீதி பரமுக்கம்ஸக³தேஹி அத்தனோ ஸீலாதி³கு³ணேஹி த⁴ம்மேன இஸ்ஸரியம் வத்தேதீதி அத்தோ². ஏவம்பூ⁴தோ யஸ்மா ஸப்³பா³பி⁴பூ⁴ நாம ஹோதி, தேன வுத்தம் ‘‘அபி⁴ப⁴வதீ’’தி. ததா² சாஹ ‘‘ஸதே³வகே, பி⁴க்க²வே, லோகே…பே… அபி⁴பூ⁴ அனபி⁴பூ⁴தோ, தஸ்மா ‘ததா²க³தோ’தி வுச்சதீ’’தி (அ. நி. 4.23; தீ³. நி. 1.188). து³விதே⁴னாபி இஸ்ஸரியத்த²ம் நாத²ஸத்³த³ம் த³ஸ்ஸேதி.

அட்டா²ரஸப்பபே⁴தா³ய தே³ஸனாய தோ²மனமேவாதி யோஜனா. ஸமானக³ணனகு³ணேஹீதி ஸமானக³ணனேஹி கு³ணேஹி கரணபூ⁴தேஹி. யதா²வுத்தேன நிரதிஸயேன சதுஸச்சத³ஸ்ஸனேனாதி ஸப்³ப³ஞ்ஞுதஞ்ஞாணஸ்ஸ, த³ஸப³லேஸு வஸீபா⁴வஸ்ஸ ச பத³ட்டா²னபூ⁴தேன. ஸச்சாபி⁴ஸம்போ³தே⁴ன ஹி அபி⁴னீஹாரானுரூபம் ரூபாரூபத⁴ம்மேஸு ச²த்திம்ஸகோடிஸதஸஹஸ்ஸமுக²ப்பவத்தேன ஸாதிஸயம் ஸந்ததிஸமூஹகிச்சாரம்மணக⁴னப்பபே⁴தே³ன மஹாவஜிரஞாணஸங்கா²தேன பு³த்³தா⁴வேணிகேன ஸம்மஸனேன ஸம்பூ⁴தேன ப⁴க³வா ஸம்மாஸம்போ³தி⁴யம் பதிட்டி²தோவ குஸலாதி³பே⁴தே³ன, ப²ஸ்ஸாதி³பே⁴தே³ன ச த⁴ம்மே விப⁴ஜந்தோ சித்துப்பாத³கண்டா³தி³வஸேன த⁴ம்மஸங்க³ஹம் சதுதா⁴ தே³ஸேதும் ஸமத்தோ² அஹோஸி. ததா² அதீதம்ஸே அப்படிஹதஞாணதாதி³பு³த்³த⁴த⁴ம்மஸமன்னாக³தோ ப⁴க³வா அதீதாதி³பே⁴த³தோ க²ந்தா⁴தி³கே விப⁴ஜித்வா தே³ஸேதும் ஸமத்தோ² அஹோஸி. தேன வுத்தம் ‘‘யதா²வுத்தேன…பே… விப⁴ங்க³’’ந்தி. ‘‘ஸப்³ப³ஞ்ஞுபா⁴ஸிதத்தா’’தி வத்வா புன ‘‘அஸப்³ப³ஞ்ஞுனா தே³ஸேதும் அஸக்குணேய்யதம் த³ஸ்ஸேந்தோ’’தி ஏதேன த⁴ம்மஸங்க³ணீவிப⁴ங்கா³னம் அன்வயதோ ப்³யதிரேகதோ ச ஸம்மாஸம்பு³த்³த⁴ப்பவேதி³ததஞ்ஞேவ விபா⁴வேதி. ஸம்மாஸம்பு³த்³த⁴தாதி³கு³ணேதி பு³த்³த⁴ரதனஸ்ஸ ஸம்மாஸம்பு³த்³த⁴தா, த⁴ம்மஸங்க⁴ரதனானம் ஸ்வாக்கா²ததா, ஸுப்படிபன்னதாதி ஏவமாதி³கு³ணே பகாஸேதி.

நனு ச ‘‘சதுஸச்சத³ஸோ’’திஆதி³னா ப⁴க³வதோவ கு³ணா விபா⁴விதாதி? ஸச்சம், தேனேவ த⁴ம்மஸங்கா⁴னம்பி கு³ணா விபா⁴விதா ஹோந்தி தப்பப⁴வஸ்ஸ அனஞ்ஞதா²பா⁴வதோ, தத³பதே³ஸேன வா த⁴ம்மோ, ததா³தா⁴ரோ ச ஸங்கோ⁴ வுத்தோவ ஹோதீதி வுத்தம் ‘‘பு³த்³தா⁴தீ³னம்…பே… விபா⁴வேதீ’’தி.

அதீதம்ஸேதி அதீதகோட்டா²ஸே, புப்³ப³ந்தேதி அத்தோ². அப்படிஹதந்தி நப்படிஹதம், ஞாணஸ்ஸ படிகா⁴தோ நாம அஞ்ஞாணம், ஸப்³ப³ம்பி வா கிலேஸஜாதம். தம் யஸ்மா ப⁴க³வதோ ஸஹ வாஸனாய பஹீனம், தஸ்மாஸ்ஸ அதீதம்ஸே ஸப்³ப³த்த²கமேவ ஞேய்யாவரணப்பஹானேன ஞாணம் அப்படிஹதந்தி வுச்சதி. ஏஸ நயோ ஸேஸேஸுபி. கிம் பனேதானி பாடியேக்கம் விஸும் ஞாணானி, உதா³ஹு அதீதாதீ³ஸு பவத்தனகஞாணானி ஏவ? தீஸு காலேஸு அப்படிஹதஞாணானி நாம பாடியேக்கம் ப⁴க³வதோ தீணி ஞாணானேவாதி வத³ந்தி. ஏகம்யேவ ஹுத்வா தீஸு காலேஸு அப்படிஹதஞாணம் நாம ஸப்³ப³ஞ்ஞுதஞ்ஞாணமேவ. ஸப்³ப³ம் காயகம்மந்தி யம் கிஞ்சி ப⁴க³வதா கத்தப்³ப³ம் காயகம்மம். ஞாணபுப்³ப³ங்க³மந்தி ஞாணபுரேசாரிகம். ஞாணானுபரிவத்தந்தி ஞாணஸ்ஸ அனுபரிவத்தனகம், ஸப்³ப³ம் காயபயோக³ம் பவத்தேந்தோ ப⁴க³வா ஞாணேன பரிச்சி²ந்தி³த்வா ஞாணஸஹிதமேவ பவத்தேதீதி அத்தோ². ஸேஸபத³த்³வயேபி ஏஸேவ நயோ. ச²ந்த³ஸ்ஸாதி கத்துகம்யதாய, மஹாகருணாஸமாயோக³தோ ஸத்தானம் ஏகந்தஹிதேஸிதாய ஹிதகிரியாச²ந்த³ஸ்ஸாதி அத்தோ². த⁴ம்மதே³ஸனாயாதி த⁴ம்மகதா²ய. அபரிக்க²யாபரிமேய்யபடிபா⁴னதாய ஹி ப⁴க³வதோ கரணஸம்பத்தியா ச த⁴ம்மதே³ஸனா நிரந்தரம் பவத்தியமானாபி ந கதா³சிபி பரிக்க²யம் க³ச்ச²தி, அஞ்ஞத³த்து² உபரூபரி வட்³ட⁴தேவ. வீரியஸ்ஸாதி பரஹிதபடிபத்தியம் உஸ்ஸாஹஸ்ஸ. விமுத்தியாதி ப²லவிமுத்தியா. ஏத்த² ச ஸமாதி⁴ஆதீ³னம் அஹானி தம்தம்படிபக்க²ஸ்ஸ ஸவாஸனபஹீனத்தா அனஞ்ஞஸாதா⁴ரணதாய வேதி³தப்³பா³. ச²ந்தா³தீ³னம் பன மஹாகருணாஸமாயோக³தோபி. ஸேஸம் ஸுவிஞ்ஞேய்யமேவ.

1. தே ஏவ த⁴ம்மேதி தே ஏவ குஸலாதி³கே திகது³கேஹி ஸங்க³ஹிதே த⁴ம்மே. ஸுத்தந்தே க²ந்தா⁴தி³வஸேன வுத்தே க²ந்தா⁴தி³வஸேன விப⁴ஜிதுந்தி யோஜனா. நனு ஸுத்தந்தே படிஸம்பி⁴தா³வஸேன தே ந வுத்தாதி? யதி³பி ஸரூபதோ ந வுத்தா, ‘‘ஜராமரணே ஞாணம், ஜராமரணஸமுத³யே ஞாண’’ந்திஆதி³னா (ஸம். நி. 2.33) பன ஹேதுஹேதுப²லாதீ³ஸு ஞாணவிபா⁴க³ஸ்ஸ வுத்தத்தா அத்த²தோ வுத்தா ஏவ ஹோந்தி, படிஸம்பி⁴தா³மக்³கே³ (படி. ம. 2.30) வா படிஸம்பி⁴தா³னம் ஆக³தத்தா ஸுத்தந்தே படிஸம்பி⁴தா³வஸேனபி தே த⁴ம்மா வுத்தா ஏவ. தத்தா²தி தஸ்மிம் ஸுத்தந்தே. ஸங்கே²பேனாதி ஸமாஸேன. உத்³தே³ஸனித்³தே³ஸமத்தேனேவ ஹி ஸுத்தந்தே க²ந்தா⁴த³யோ தே³ஸிதா, ந படினித்³தே³ஸாதி³னாதி ஸங்கே²பேன தே தத்த² வுத்தாதி வுத்தா. தத்தா²தி வா த⁴ம்மஸங்க³ஹே. தத்தா²பி ஹி ‘‘தஸ்மிம் கோ² பன ஸமயே சத்தாரோ க²ந்தா⁴ ஹோந்தீ’’திஆதி³னா (த⁴. ஸ. 58) க²ந்தா⁴த³யோ ஸங்கே²பேன வுத்தாதி. விப⁴ஜீயந்தி ஏத்த², ஏதேன வா க²ந்தா⁴த³யோதி விப⁴ங்கோ³, தே ஏவ பகிரீயந்தி பட்ட²பீயந்தி ஏத்த², ஏதேன வாதி பகரணம், விப⁴ங்கோ³ ச ஸோ பகரணஞ்சாதி விப⁴ங்க³ப்பகரணம். ஆதி³ஸத்³த³த்த²ஜோதகேனாதி ‘‘இதி வா, இதி ஏவரூபா நச்சகீ³தவாதி³தவிஸூகத³ஸ்ஸனா படிவிரதோ’’திஆதீ³ஸு (தீ³. நி. 1.13) விய ஆதி³ஸத்³த³ஸ்ஸ அத்த²தீ³பகேன. பகாரத்த²ஜோதகேனாதி ‘‘இதி கோ², பி⁴க்க²வே, ஸப்படிப⁴யோ பா³லோ, அப்படிப⁴யோ பண்டி³தோ’’திஆதீ³ஸு (அ. நி. 3.1) விய பகாரத்த²விபா⁴வகேன. ‘‘ஏகதே³ஸேன ஸமுதா³யம் நித³ஸ்ஸேதீ’’தி ஏதேன ‘‘ரூபக்க²ந்தோ⁴…பே… விஞ்ஞாணக்க²ந்தோ⁴’’தி ஏத்த² இதிஸத்³த³ஸ்ஸ நித³ஸ்ஸனத்த²தம் த³ஸ்ஸேதி. நித³ஸ்ஸனத்தோ²பி ஹி இதி-ஸத்³தோ³ தி³ட்டோ² யதா² ‘‘அத்தீ²தி கோ², கச்சான, அயமேகோ அந்தோ’’திஆதீ³ஸு (ஸம். நி. 2.15; 3.90). பரிஸமாபனத்தோ² வா ‘‘தஸ்மாதிஹ மே, பி⁴க்க²வே, த⁴ம்மதா³யாதா³ ப⁴வத², நோ ஆமிஸதா³யாதா³. அத்தி² மே தும்ஹேஸு அனுகம்பா ‘கிந்தி மே ஸாவகா த⁴ம்மதா³யாதா³ ப⁴வேய்யும், நோ ஆமிஸதா³யாதா³’தி’’ (ம. நி. 1.29) ஏவமாதீ³ஸு விய. பரிஸமாபனஞ்ஹேதம் ஸுத்தந்தபா⁴ஜனீயஸ்ஸ ஏகதே³ஸத³ஸ்ஸனேன யதி³த³ம் ‘‘பஞ்சக்க²ந்தா⁴ ரூபக்க²ந்தோ⁴…பே… விஞ்ஞாணக்க²ந்தோ⁴’’தி தாவ தத³த்த²ஸ்ஸ ஸங்க³ஹிதத்தா. தத்தா²தி விப⁴ங்க³ப்பகரணே. ‘‘நிப்³பா³னவஜ்ஜான’’ந்தி ஏத்த² யதி³ நிப்³பா³னவஜ்ஜானம்…பே… அப்பகதரபத³த்தா க²ந்தா⁴னம் க²ந்த⁴விப⁴ங்கோ³ ஆதி³ம்ஹி வுத்தோ, நனு ஸஹ நிப்³பா³னேன ஸப்³ப³த⁴ம்மஸங்கா³ஹகத்தா, ஸப்³ப³த⁴ம்மஸங்கா³ஹகேஹி ச ஆயதனாதீ³ஹி க²ந்தே⁴ஹி ச அப்பகதரபத³த்தா ஸச்சவிப⁴ங்கோ³ ஆதி³ம்ஹி வத்தப்³போ³தி? ந, தத்தா²பி து³க்க²ஸச்சவிப⁴ங்கே³ ஏகதே³ஸேன க²ந்தா⁴னம் ஏவ விப⁴ஜிதப்³ப³தோ. யதா²ஹ ‘‘தத்த² கதமம் து³க்க²ம் அரியஸச்சம்? ஜாதிபி து³க்கா²…பே… ஸம்கி²த்தேன பஞ்சுபாதா³னக்க²ந்தா⁴ து³க்கா²’’தி (விப⁴. 190; தீ³. நி. 2.387; ம. நி. 1.120; 3.373). இத⁴ பன அனவஸேஸதோவ க²ந்தா⁴ விப⁴ஜீயந்தீதி நிப்³பா³னவஜ்ஜானம்…பே… அப்பகதரபத³த்தா க²ந்தா⁴னம் க²ந்த⁴விப⁴ங்கோ³ ஆதி³ம்ஹி வுத்தோ.

அபிச ரூபஸம்மூள்ஹா அரூபஸம்மூள்ஹா உப⁴யஸம்மூள்ஹாதி திவிதா⁴ போ³த⁴னேய்யபுக்³க³லா, ததா² ஸம்கி²த்தருசினோ வித்தா²ரருசினோ நாதிஸங்கே²பவித்தா²ரருசினோ, திக்கி²ந்த்³ரியா முதி³ந்த்³ரியா மஜ்ஜி²மிந்த்³ரியாதி ச. தேஸு அரூபஸம்மூள்ஹானம் உபகாராய க²ந்த⁴தே³ஸனா, ரூபஸம்மூள்ஹானம் ஆயதனதே³ஸனா, உப⁴யஸம்மூள்ஹானம் தா⁴துதே³ஸனா. ததா² ஸம்கி²த்தருசீனம் க²ந்த⁴தே³ஸனா, நாதிஸங்கே²பவித்தா²ரருசீனம் ஆயதனதே³ஸனா, வித்தா²ரருசீனம் தா⁴துதே³ஸனா. திக்கி²ந்த்³ரியானம் க²ந்த⁴தே³ஸனா, மஜ்ஜி²மிந்த்³ரியானம் ஆயதனதே³ஸனா, முதி³ந்த்³ரியானம் தா⁴துதே³ஸனாதி இமினா பயோஜனேன அனுக்கமேன ச க²ந்தா⁴யதனதா⁴துவிப⁴ங்கா³னம் தே³ஸனாக்கமோவ வேதி³தப்³போ³. தம் பனேதம் க²ந்தா⁴தி³த்தயம் பவத்தினிவத்திதது³ப⁴யஹேதுமுகே²னேவ ஞாயமானம் யதா²பூ⁴தாவபோ³தா⁴ய ஹோதி, நாஞ்ஞதா²தி த³ஸ்ஸனத்த²ம் ஸச்சவிப⁴ங்க³தே³ஸனா பவத்தா. ஸோ ச யதா²பூ⁴தாவபோ³தோ⁴ விஸேஸதோ இந்த்³ரியஸன்னிஸ்ஸயேனாதி இந்த்³ரியவிப⁴ங்க³தே³ஸனா. இந்த்³ரியானஞ்ச இந்த³ட்டோ² தம்தம்பச்சயத⁴ம்மபூ⁴தானம் யதா²ஸகம் பச்சயுப்பன்னேஸு பச்சயபா⁴வவிஸேஸேனேவாதி பச்சயபச்சயுப்பன்னவிபா⁴க³ஸந்த³ஸ்ஸனீ பச்சயாகாரவிப⁴ங்க³தே³ஸனா. பச்சயாகாரஸ்ஸ க²ந்தா⁴தீ³னஞ்ச அவிபரீதஸபா⁴வாவபோ³தோ⁴ ஸதிபட்டா²னாதீ³ஸு ஸம்மாமனஸிகாரேனாதி ஸதிபட்டா²னஸம்மப்பதா⁴னஇத்³தி⁴பாத³போ³ஜ்ஜ²ங்க³மக்³க³ங்க³விப⁴ங்க³தே³ஸனா. ஸ்வாயம் ஸதிபட்டா²னாதீ³ஸு ஸம்மாமனஸிகாரோ இமாய படிபத்தியா ஹோதீதி ஜா²னஅப்பமஞ்ஞாவிப⁴ங்க³தே³ஸனா, ஸா ஸம்மாபடிபத்தி ஏத்தகே ஸீலே பதிட்டி²தஸ்ஸ ஸம்ப⁴வதீதி ஸிக்கா²பத³விப⁴ங்க³தே³ஸனா, யதா²வுத்தாய ச ஸம்மாபடிபத்தியா இமே ஆனிஸம்ஸாதி படிஸம்பி⁴தா³ஞாணவிப⁴ங்க³தே³ஸனா, தே சிமே ஞாணவிஸேஸா இமேஸு கிலேஸேஸு பஹீயந்தேஸு ச ஸம்ப⁴வந்தி, நாஞ்ஞதா²தி கிலேஸவிப⁴ங்க³தே³ஸனா, ஏவம் வித்தா²ரதோ தே³ஸிதே க²ந்தா⁴தி³கே ஸங்கே²பதோபி ஜானந்தஸ்ஸ அத்த²ஸித்³தி⁴ ஹோதி ஏவாதி த³ஸ்ஸனத்த²ம் பரியோஸானே த⁴ம்மஹத³யவிப⁴ங்க³தே³ஸனா பவத்தாதி ஏவமேதேஸம் அட்டா²ரஸன்னம் மஹாவிப⁴ங்கா³னம் தே³ஸனாக்கமகாரணம் வேதி³தப்³ப³ம்.

ரூபாதீ³னந்தி ரூபவேத³னாஸஞ்ஞாஸங்கா²ரவிஞ்ஞாணானம். வேத³யிதாதி³ஸபா⁴வத்தாபா⁴வாதி யதா²க்கமம் அனுப⁴வனஸஞ்ஜானனாபி⁴ஸங்க²ரணாதி³ஸபா⁴வத்தாபா⁴வா. ந ஹி ரூபம் வேத³யிதாதி³ஸபா⁴வம், வேத³னாதி³ வா ருப்பனாதி³ஸபா⁴வம். யதோ ரூபாதீ³னம் வேத³னாஸமவரோத⁴னேன ‘‘சத்தாரோ க²ந்தா⁴’’திஆதி³னா ஸங்கி²பித்வா க²ந்தா⁴ 06 தே³ஸேதப்³பா³ ஸியும். ருப்பனாதி³தோ அஞ்ஞஸ்ஸாபா⁴வாதி ருப்பனானுப⁴வனாதி³ஸபா⁴வதோ அஞ்ஞஸ்ஸ அதீதாதி³கே க³ஹேத்வா ராஸிவஸேன வத்தப்³ப³ஸ்ஸ ஸம்கி²த்தஸ்ஸ ஸபா⁴வஸ்ஸ அபா⁴வா. ந ஹி சேதஸிகாதி³பா⁴வோ வேத³னாதீ³னம் ஸபா⁴வோ. ஹேட்டா² க³ணனேஸூதி பஞ்சதோ ஹேட்டா² க³ணனேஸு. அனிட்டா²னந்தி அபரியோஸானம். ரூபாதீ³ஸு ஹி கதிபயே, ஏகம்பி வா அக்³க³ஹேத்வா வுச்சமானா க²ந்த⁴வஸேன தே³ஸனா அனவஸேஸஸங்க²தத⁴ம்மஸங்கா³ஹினீ ந ஸம்ப⁴வதி. க²ந்த⁴ஸ்ஸாதி ராஸட்ட²ஸ்ஸ க²ந்த⁴ஸ்ஸ. தேனேவாஹ ‘‘ந ஹீ’’திஆதி³. ஸவிபா⁴க³த⁴ம்மேஹீதி ஸப்பபே⁴த³த⁴ம்மேஹி.

‘‘ஸத்³த³த்த²ஸஹிதம் க²ந்த⁴ஸத்³த³ஸ்ஸ விஸயம் த³ஸ்ஸேதீ’’தி ஏதேன ராஸிஸத்³த³ஸ்ஸ விய ராஸட்டே² க²ந்த⁴ஸத்³த³ஸ்ஸ வாசகபா⁴வேன பவத்திம் த³ஸ்ஸேதி பரியாயந்தரபா⁴வதோ. கு³ணாதீ³ஸு பன கேவலம் தப்³பி³ஸயபயோக³பா⁴வேனேவ பவத்தி, ந வாசகபா⁴வேனாதி ஆஹ ‘‘கு³ணே…பே… ந ஸத்³த³த்த²’’ந்தி. க²ந்த⁴ஸத்³தோ³தி ஸீலாதி³ஸத்³தே³ ஸன்னிதா⁴பிதோ க²ந்த⁴ஸத்³தோ³. தேனேவாஹ ‘‘ஸீலாதி³கு³ணவிஸிட்ட²ம் ராஸட்ட²ம் தீ³பேதீ’’தி. கேசீதி த⁴ம்மஸிரித்தே²ரம் ஸந்தா⁴ய வத³தி. ஏத்தா²தி ‘‘ஸீலக்க²ந்தோ⁴ ஸமாதி⁴க்க²ந்தோ⁴’’தி (தீ³. நி. 3.355) ஏத்த². ந கேவலஞ்ச ஸோ ஏவ, அட்ட²கதா²சரியேஹிபி ஏத்த² கு³ணத்த²தா இச்சி²தா ஏவ. ததா² ஹி அட்ட²ஸாலினியம் ‘‘ஸீலக்க²ந்தோ⁴ ஸமாதி⁴க்க²ந்தோ⁴திஆதீ³ஸு கு³ணட்டே²னா’’தி (த⁴. ஸ. அட்ட². 5) வுத்தம். நனு ச கேவலோபி க²ந்த⁴ஸத்³தோ³ ‘‘திண்ணம் கோ², மாணவ, க²ந்தா⁴னம் வண்ணவாதீ³, ந கோ², ஆவுஸோ விஸாக², தீஹி க²ந்தே⁴ஹி அரியோ அட்ட²ங்கி³கோ மக்³கோ³ ஸங்க³ஹிதோ’’தி (ம. நி. 1.462) ச ஆதீ³ஸு ஸீலாதி³வாசகோ தி³ட்டோ²தி? ந, தத்தா²பி அதி⁴காராதி³வச்சே²த³கவஸேனேவஸ்ஸ ஸீலாதீ³ஸு பவத்தித³ஸ்ஸனதோ. ந க²ந்த⁴ஸத்³தோ³ பஞ்ஞத்திஸத்³த³ஸ்ஸ அத்தே² வத்ததீதி நிருத்திவோஹாராதி³ஸத்³தா³ விய பஞ்ஞத்திபரியாயோ ந ஹோதீதி அத்தோ². தா³ருக்க²ந்தோ⁴தி பஞ்ஞத்தி ஹோதீதி தஸ்ஸ க²ந்த⁴ஸத்³த³ஸ்ஸ பஞ்ஞத்திவிஸேஸப்பவத்திதம் த³ஸ்ஸேதி. விஞ்ஞாணக்க²ந்தோ⁴தி க²ந்த⁴ஸத்³தோ³தி ‘‘விஞ்ஞாணம் விஞ்ஞாணக்க²ந்தோ⁴’’தி (யம. 1.க²ந்த⁴யமக.32) ஏத்த² வுத்தோ க²ந்த⁴ஸத்³தோ³. ஸமுதா³யே நிருள்ஹோதி அதீதாதி³பே⁴த³பி⁴ன்னஸ்ஸ பஞ்ஞாய அபி⁴ஸம்யூஹனேன ராஸிகதே விஞ்ஞாணஸமூஹே நிருள்ஹோ. தாய ஏவ ருள்ஹியா பவத்ததீதி தாய ஸமுதா³யே நிருள்ஹதாய தத³வயவே ஏகஸ்மிம்பி விஞ்ஞாணே பவத்ததீதி. ஏத்த² ச ஞாணஸம்பயுத்தே நிருள்ஹோ கோஸல்லஸம்பூ⁴தட்டே²ன குஸலபா⁴வோ விய ஞாணவிப்பயுத்தே விஞ்ஞாணஸமுதா³யே நிருள்ஹோ ததே³கதே³ஸேபி ருள்ஹியா பவத்ததீதி வேதி³தப்³ப³ம். அத² வா கிஞ்சி நிமித்தம் க³ஹேத்வா ஸதிபி அஞ்ஞஸ்மிம் தன்னிமித்தயுத்தே கிஸ்மிஞ்சிதே³வ விஸயே ஸம்முதியா சிரகாலதாவஸேன நிமித்தவிரஹேபி பவத்தி ருள்ஹி நாம, யதா² மஹியம் ஸேதீதி மஹிம்ஸோ, க³ச்ச²ந்தீதி கா³வோதி, ஏவம் க²ந்த⁴ஸத்³த³ஸ்ஸாபி ருள்ஹிபா⁴வோ வேதி³தப்³போ³.

ராஸிதோ கு³ணதோதி ஸப்³ப³த்த² பு⁴ம்மத்தே² வா நிஸ்ஸக்கவசனம் த³ட்ட²ப்³ப³ம். நியமேத்வாதி வவத்த²பேத்வா. பிண்ட³ட்டோ²தி ஸங்கா⁴தத்தோ². தஸ்மாதி யஸ்மா பஞ்சேவ க²ந்தா⁴ வுத்தா, கோட்டா²ஸட்டே² ச க²ந்த⁴ட்டே² நிப்³பா³னஸ்ஸ வஸேன ச²ட்டே²னாபி க²ந்தே⁴ன ப⁴விதப்³ப³ம், தஸ்மா க²ந்த⁴ட்டோ² நாம ராஸட்டோ²தி யுத்தம். ‘‘யேஸம் வா அதீதாதி³வஸேன பே⁴தோ³ அத்தீ²’’திஆதி³னா அதீதாதி³விபா⁴க³பி⁴ன்னேஸு ருப்பனாதி³ஸபா⁴வத⁴ம்மேஸு விஸும் விஸும் கோட்டா²ஸபா⁴வேன க³ய்ஹமானேஸு தப்³பி³பா⁴க³ரஹிதஸ்ஸ ஏகஸ்ஸ நிப்³பா³னஸ்ஸ ராஸட்ட²தா விய கோட்டா²ஸட்ட²தாபி ந ஸம்ப⁴வதீதி த³ஸ்ஸேதி. ஏதேன பஞ்ஞத்தியாபி க²ந்தே⁴ஸு அக்³க³ஹணே காரணம் வுத்தந்தி வேதி³தப்³ப³ம்.

கஸ்மா பனேத்த² ப²ஸ்ஸாதி³கே விய ஸங்கா²ரக்க²ந்தே⁴ அனவரோதே⁴த்வா வேத³னாஸஞ்ஞா விஸும் க²ந்த⁴பா⁴வேன க³ஹிதாதி? விவாத³மூலதாதி³விஸேஸத³ஸ்ஸனத்த²ம். க³ஹட்டா²னஞ்ஹி விவாத³காரணம் காமஜ்ஜோ²ஸானம். வுத்தஞ்சேதம் ‘‘புன சபரம், பி⁴க்க²வே, காமஹேது காமனிதா³னம் காமாதி⁴கரணம் காமானமேவ ஹேது மாதாபி புத்தேன விவத³தி, புத்தோபி மாதரா விவத³தீ’’திஆதி³ (ம. நி. 1.168, 178). பப்³ப³ஜிதானம் தி³ட்டா²பி⁴னிவேஸோ. வுத்தம்பி சேதம் ‘‘யே தி³ட்டி²முக்³க³ய்ஹ விவாத³யந்தி, ‘இத³மேவ ஸச்ச’ந்தி (ஸு. நி. 838; மஹானி. 67) ச வாத³யந்தீ’’திஆதி³. தேஸு காமஜ்ஜோ²ஸானம் வேத³னஸ்ஸாதே³ன ஹோதி, தி³ட்டா²பி⁴னிவேஸோ ஸஞ்ஞாவிபல்லாஸேன. ஸஞ்ஞாவிபல்லாஸேன ஹி சித்தவிபல்லாஸோ, சித்தவிபல்லாஸேன தி³ட்டி²மானதண்ஹாபபஞ்சானம் விபல்லாஸோதி. ததா² வேத³னானுகி³த்³தோ⁴ விபல்லத்த²ஸஞ்ஞோ ச ஸம்ஸரதி. வேத³னானுகி³த்³த⁴ஸ்ஸ ஹி வேத³னாபச்சயா தண்ஹா ஸித்³தா⁴ ஹோதி, ததோ ச தண்ஹாபச்சயா உபாதா³னந்தி ஆவட்டதி ப⁴வசக்கம். விபல்லத்த²ஸஞ்ஞிஸ்ஸ ச ‘‘ஸஞ்ஞானிதா³னா ஹி பபஞ்சஸங்கா²’’தி (ஸு. நி. 880) வசனதோ தி³ட்டி²மானதண்ஹாபபஞ்சானம் அனுபச்சே²த³தோ ஸம்ஸாரஸ்ஸ அனுபச்சே²தோ³வ. இதி விவாத³காரணானம் காமஜ்ஜோ²ஸானதி³ட்டா²பி⁴னிவேஸானம் காரணபா⁴வோ ஸம்ஸாரஹேதுபா⁴வோதி இமஸ்ஸ விவாத³மூலதாதி³விஸேஸஸ்ஸ த³ஸ்ஸனத்த²ம் ஸங்கா²ரக்க²ந்தே⁴ அனவரோதே⁴த்வா வேத³னாஸஞ்ஞா விஸும் க²ந்த⁴பா⁴வேன க³ஹிதாதி வேதி³தப்³ப³ம்.

ஓகாஸேஸூதி விப⁴ஜனகிரியாய பவத்திட்டா²னபா⁴வதோ அதீதாத³யோ ஓகாஸாதி வுத்தா. இதிஸத்³தே³னாதி ‘‘உபாதா³யரூப’’ந்தி ஏவம் அட்ட²கதா²யம் வுத்தஇதிஸத்³தே³ன. நித³ஸ்ஸனத்தே²னாதி உதா³ஹரணத்தே²ன. ஸப்³போ³தி ஸகலோ ஏகாத³ஸஸு ஓகாஸேஸு விப⁴த்தோ விப⁴ஜனனயோ. இத³ஞ்ச விப⁴ஜனந்தி ‘‘சத்தாரோ ச மஹாபூ⁴தா…பே… உபாதா³யரூப’’ந்தி ஏவம் விப⁴த்தம் இத³ஞ்ச விப⁴ஜனம். ஓளாரிகாதீ³ஸூதி ஓளாரிகஸுகு²மஹீனபணீததூ³ரஸந்திகேஸு. சக்கா²யதனந்திஆதி³விப⁴ஜனஞ்சாதி ‘‘சக்கா²யதனம்…பே… போ²ட்ட²ப்³பா³யதனம் இத்தி²ந்த்³ரியம்…பே… கப³ளீகாரோ ஆஹாரோ ரூபா ஸத்³தா³ க³ந்தா⁴ ரஸா போ²ட்ட²ப்³பா³தி ஏவம் பவத்தம் விப⁴ஜனஞ்ச. யதா²ஸம்ப⁴வந்தி யதா²ரஹம். ஏகாத³ஸஸு ஓகாஸேஸு யம் யத்த² விப⁴ஜனம் யுத்தம், தம் தத்த² யோஜேதப்³ப³ம். ஏவம் வேத³னாக்க²ந்தா⁴தீ³ஸுபீதி யதா² ரூபக்க²ந்தே⁴ யதா²ஸம்ப⁴வம் ஏகாத³ஸஸு ஓகாஸேஸு விப⁴ஜனம் யோஜேதப்³ப³ந்தி வுத்தம், ஏவம் வேத³னாக்க²ந்தா⁴தீ³ஸுபி யதா²ஸம்ப⁴வம் ஏகாத³ஸஸு ஓகாஸேஸு விப⁴ஜனம் யோஜேதப்³ப³ந்தி அத்தோ².

தத்த² வேத³னாக்க²ந்தோ⁴ தாவ புரிமே ஓகாஸபஞ்சகே ஸுகா²தி³வேத³னாத்திகவஸேன விப⁴த்தோ, இதரஸ்மிம் குஸலத்திகவேத³னாத்திகஸமாபன்னது³கஸாஸவது³கவஸேன. ஸஞ்ஞாக்க²ந்தோ⁴ பன புரிமே ஓகாஸபஞ்சகே ச²ப²ஸ்ஸத்³வாரவஸேன, இதரஸ்மிம் ஓளாரிகது³கே படிக⁴ஸம்ப²ஸ்ஸது³கவஸேன சேவ யதா²வுத்தகுஸலத்திகாதி³வஸேன ச விப⁴த்தோ. ஸேஸேஸு குஸலத்திகாதி³வஸேனேவ. ததா² ஸங்கா²ரக்க²ந்தோ⁴. படிக⁴ஸம்ப²ஸ்ஸது³கோ பனேத்த² நத்தே²வ. சேதனாய ஏவ சேத்த² நித்³தே³ஸோ ஸங்கா²ரக்க²ந்த⁴த⁴ம்மானம் சேதனாப்பதா⁴னபா⁴வத³ஸ்ஸனத்த²ம். ததா² ஹி ஸா ‘‘ஸங்கா²ரக்க²ந்தோ⁴’’தி வுத்தா. தத்தா²தி தஸ்மிம் விஞ்ஞாணக்க²ந்த⁴ஸ்ஸ விப⁴ஜனே படினித்³தே³ஸே. தம் பன த்³வயந்தி மனோதா⁴துமனோவிஞ்ஞாணதா⁴துத்³வயம். யஞ்ஹி ஸத்தவிஞ்ஞாணதா⁴துதே³ஸனாயம் ‘‘மனோதா⁴து, மனோவிஞ்ஞாணதா⁴தூ’’தி த்³வயம் தே³ஸிதம், தம் ச²விஞ்ஞாணகாயதே³ஸனாயம் ‘‘மனோவிஞ்ஞாண’’ந்த்வேவ வுச்சதீதி.

பாளினயேனாதி க²ந்த⁴விப⁴ங்க³பாளினயேன. அஞ்ஞேன பகாரேனாதி த⁴ம்மஸங்க³ஹே, தத³ட்ட²கதா²யஞ்ச ஆக³தேன பகாரந்தரேன.

1. ரூபக்க²ந்த⁴னித்³தே³ஸவண்ணனா

2. ‘‘கிஞ்சீ’’தி பத³ம் ‘‘ஏகச்ச’’ந்தி இமினா ஸமானத்த²ந்தி ஆஹ ‘‘கிஞ்சீதி பகாரந்தரபே⁴த³ம் ஆமஸித்வா அனியமனித³ஸ்ஸன’’ந்தி. உப⁴யேனாதி பகாரபே⁴த³ம் அனாமஸித்வா ஆமஸித்வா ச அனியமத³ஸ்ஸனவஸேன பவத்தேன ‘‘யம் கிஞ்சீ’’தி பத³த்³வயேன. அதி⁴ப்பேதத்த²ந்தி ரூபம். அதிச்சாதி அதிக்கமித்வா. பவத்திதோதி பவத்தனதோ. நியமனத்த²ந்தி நிவத்தனத்த²ம்.

‘‘கிஞ்சா’’தி ஏத்த² கிம்-ஸத்³தோ³ புச்சா²யம் ஹேதுஅத்த²தீ³பகோ, கரணே சேதம் பச்சத்தவசனம், ச-ஸத்³தோ³ வசனாலங்காரோதி ஆஹ ‘‘கேன காரணேன வதே³தா²’’தி. து³தியவிகப்பே பன வுத்தனயேனேவ காரணத்தே² பவத்தம் கிம்-ஸத்³த³ம் ‘‘வதே³தா²’’தி கிரியாபத³ஸம்ப³ந்த⁴னேன உபயோக³வஸேன பரிணாமேத்வா வத³தி ‘‘தம் காரணம் வதே³தா²’’தி.

புரிமஸந்தானஸ்ஸ பே⁴த³ந்தி புரிமஸந்தானஸ்ஸ வினாஸம், வினாஸாபதே³ஸேன சேத்த² ஸந்தானே விஸதி³ஸுப்பாத³மேவ த³ஸ்ஸேதி. தேனேவாஹ ‘‘விஸதி³ஸஸந்தானுப்பத்தித³ஸ்ஸனதோ’’தி. நனு ச அரூபத⁴ம்மானம்பி விரோதி⁴பச்சயஸமவாயே விஸதி³ஸுப்பத்தி அத்தீ²தி? ஸச்சம் அத்தி², ஸா பன ந பாகடதரா, பாகடதரா ச இதா⁴தி⁴ப்பேதா. தேனேவாஹ ‘‘ஸீதாதி³ஸன்னிபாதே’’தி. ததா² சாஹ ப⁴க³வா ‘‘ஸீதேனபி ருப்பதி, உண்ஹேனபி ருப்பதீ’’திஆதி³ (ஸம். நி. 3.79). இதா³னி பே⁴த³-ஸத்³தோ³ உஜுகமேவ விகாராபத்திம் வத³தீதி த³ஸ்ஸேந்தோ ‘‘பே⁴தோ³ சா’’திஆதி³மாஹ. விஸதி³ஸரூபுப்பத்தியேவ, ந உப்பன்னஸ்ஸ அஞ்ஞதா²பா⁴வோதி அதி⁴ப்பாயோ. தேன காபிலியம் பரிணாமவாத³ம் படிக்கி²பதி. யதி³ புரிமஸந்தானதோ பே⁴தோ³ விஸதி³ஸுப்பத்தி ருப்பனம், ஏவம் ஸந்தே லக்க²ணஸ்ஸ அதிப்பஸங்கோ³ ஸியாதி சோத³னம் மனஸி கத்வா ஆஹ ‘‘அரூபக்க²ந்தா⁴ன’’ந்திஆதி³. ஏத்த² ஸீதாதீ³ஹீதி ஆதி³-ஸத்³தே³ன யதா² உண்ஹஜிக⁴ச்சா²த³யோ ஸங்க³ய்ஹந்தி, ஏவம் ஆஹாராதீ³னம்பி ஸங்க³ஹோ த³ட்ட²ப்³போ³. யேனாதி யேன ஸீதாதீ³ஹி ஸமாக³மேன. தத்தா²தி தேஸு ரூபத⁴ம்மேஸு. ஆஹாராதி³கஸ்ஸ வா டி²திப்பத்தஸ்ஸாதி ஸம்ப³ந்தோ⁴. யதா² ரூபத⁴ம்மானம் டி²திக்க²ணே ஸீதாதீ³ஹி ஸமாக³மோ ஹோதி, ஏவம் அரூபக்க²ந்தா⁴னம் அஞ்ஞேஹி ஸமாக³மோ நத்தி² அதிலஹுபரிவத்திதோ, தஸ்மா அரூபத⁴ம்மா ரூபத⁴ம்மானம் விய பாகடஸ்ஸ விகாரஸ்ஸ அபா⁴வதோ ‘‘ருப்பந்தீ’’தி, ‘‘ருப்பனலக்க²ணா’’தி ச ந வுச்சந்தீதி ஸம்ப³ந்தோ⁴. ‘‘ருப்பதீ’’தி பத³ஸ்ஸ கத்துகம்மஸாத⁴னானம் வஸேன அத்த²ம் த³ஸ்ஸேதும் அட்ட²கதா²யம் ‘‘குப்பதி க⁴ட்டீயதி பீளீயதி பி⁴ஜ்ஜதீ’’தி வுத்தந்தி தத³த்த²ம் விவரந்தோ ‘‘குப்பதீதி ஏதேனா’’திஆதி³மாஹ. கோபாதி³கிரியாதி கோபஸங்க⁴ட்டனபீளனகிரியா. கோப-ஸத்³தோ³ சேத்த² கோ²ப⁴பரியாயோ வேதி³தப்³போ³. கத்துபூ⁴தோ கம்மபூ⁴தோ ச அத்தோ²தி கத்துகம்மஸாத⁴னானம் வஸேன வுச்சமானோ பூ⁴துபாதா³யரூபஸங்கா²தோ அத்தோ². கம்மகத்துத்தே²ன பி⁴ஜ்ஜதி-ஸத்³தே³னாதி யதா³ கம்மகத்துத்தோ² ருப்பதி-ஸத்³தோ³, ததா³ பி⁴ஜ்ஜதி-ஸத்³தோ³பி தத³த்தோ² ஏவ வேதி³தப்³போ³தி அத்தோ². தத்த² யதா³ கம்மத்தே² ‘‘ருப்பதீ’’தி பத³ம், ததா³ ‘‘ஸீதேனா’’திஆதீ³ஸு கத்துஅத்தே² கரணவசனம். யதா³ பன ‘‘ருப்பதீ’’தி பத³ம் கத்துஅத்தே² கம்மகத்துஅத்தே² வா, ததா³ ஹேதும்ஹி கரணவசனம் வேதி³தப்³ப³ம். ‘‘யம் பன ருப்பதீ’’திஆதி³னா ‘‘குப்பதீ’’திஆதீ³னம் கத்துகம்மத்தா²னம்பி அத்த²வசனானம் வசனே காரணம் த³ஸ்ஸேதி. யதி³பி அத்த²-ஸத்³தோ³ ‘‘பீளனட்டோ²’’திஆதீ³ஸு (படி. ம. 1.17; 2.8) ஸபா⁴வபரியாயோபி ஹோதி, ‘‘கேனட்டே²னா’’தி பனேத்த² அபி⁴தே⁴ய்யபரியாயோ அதி⁴ப்பேதோதி ஆஹ ‘‘கேனட்டே²னாதி புச்சா²ஸபா⁴க³வஸேன ருப்பனட்டே²னா’’தி, ருப்பனஸத்³தா³பி⁴தே⁴ய்யபா⁴வேனாதி அத்தோ². தேனேவாஹ ‘‘ந கேவலம் ஸத்³த³த்தோ²யேவ ருப்பன’’ந்தி. தஸ்ஸ அத்த²ஸ்ஸாதி தஸ்ஸ பூ⁴துபாதா³யப்பபே⁴த³ஸ்ஸ ஸபா⁴வத⁴ம்மஸ்ஸ. ருப்பனலக்க²ணஞ்ச நாமேதம் அனிச்சதாதி³ விய கக்க²ளத்தாதி³தோ அஞ்ஞந்தி ந க³ஹேதப்³ப³ம். பஞ்ஞத்திவிஸேஸோ ஹி தந்தி, கக்க²ளத்தாதீ³னம்யேவ பன அரூபத⁴ம்மவிது⁴ரோ ஸபா⁴வவிஸேஸோதி வேதி³தப்³ப³ம்.

முச்சா²பத்தியாதி முச்சா²ய மோஹஸ்ஸ ஆபஜ்ஜனேன. கப்பஸண்டா²னம் உத³கந்தி கப்பஸண்டா²பகமஹாமேக⁴வுட்ட²ம் உத³கம். ததா²தி தப்பகாரதாய கா²ரபா⁴வே ஸதி உத³கேன கப்பவுட்டா²னகாலே விய பத²வீ விலீயேய்ய. லோகந்தரியஸத்தானம் பன பாபகம்மப³லேன அகா²ரேபி கா²ரே விய ஸரீரஸ்ஸ விலீயனா வேதி³தப்³பா³. தேனேவாதி ஸஉஸ்ஸத³னிஸ்ஸயனிரயஸ்ஸ வுத்தத்தா ஏவ. ந ஹி அவீசிம்ஹி பஞ்சவித⁴ப³ந்த⁴னாதி³கம்மகாரணம் கரோந்தி.

3. பகரணப்பத்தம் ரூபம் பக்கி²பித்வா மாதிகா ட²பிதாதி ஆனேத்வா ஸம்ப³ந்தோ⁴. மஹாபூ⁴து…பே… ஆபஜ்ஜதி தப்பகாரபா⁴வேன அதீதம்ஸே க³ணனம் க³தந்தி வுத்தத்தாதி அதி⁴ப்பாயோ. ‘‘ந ஹீ’’திஆதி³னா த⁴ம்மந்தரனிவத்தனத்த²தா பகாரந்தரனிவத்தனத்த²தா ச பூ⁴துபாதா³யக³ஹணஸ்ஸ நத்தீ²தி த³ஸ்ஸேதி. தம்த³ஸ்ஸனேதி க³ணனந்தரத³ஸ்ஸனே. தம்ஸபா⁴வத்தாதி பூ⁴துபாதா³யஸபா⁴வத்தா. ‘‘ந சா’’திஆதி³னா பூ⁴துபாதா³யஸபா⁴வோ அதீதம்ஸக³ணிததாய தம்ஸபா⁴வஸ்ஸபி அஞ்ஞதா² க³ணிதத்தா, அதம்ஸபா⁴வஸ்ஸ ச ததா² க³ணிதத்தா அகாரணந்தி த³ஸ்ஸேதி. ‘‘அஜ்ஜ²த்த…பே… லப்³ப⁴தீ’’தி ஏதேன து³தியனயே ந கேவலம் யதா²வுத்தோவ தோ³ஸோ, அத² கோ² அப்³யாபிதோபி தோ³ஸோதி த³ஸ்ஸேதி. ததே³தம் பன அகாரணம் காரணபா⁴வஸ்ஸேவ அனதி⁴ப்பேதத்தா. ந ஹேத்த² பூ⁴துபாதா³யரூபபா⁴வோ அதீதம்ஸே க³ணனஸ்ஸ காரணந்தி அதி⁴ப்பேதம், யதோ யதா²வுத்ததோ³ஸாபத்தி ஸியா.

‘‘கிந்தீ’’தி ஏத்த² ‘‘கி’’ந்தி புப்³பே³ யம் ‘‘ரூப’’ந்தி ஸாமஞ்ஞதோ க³ஹிதம், தஸ்ஸ ஸரூபபுச்சா². இதி-ஸத்³தோ³ நித³ஸ்ஸனத்தோ², ந காரணத்தோ². தேனஸ்ஸ யம் ரூபம் அதீதம் நிருத்³த⁴ம்…பே… அதீதம்ஸேன ஸங்க³ஹிதம் அதீதகோட்டா²ஸே க³ணனம் க³தம், தம் கிந்தி சே? ‘‘சத்தாரோ ச…பே… ரூப’’ந்தி பூ⁴துபாதா³யவிபா⁴க³த³ஸ்ஸனமுகே²ன விஸேஸம் நித³ஸ்ஸேதி. யத்தகா ஹி இத⁴ விஸேஸா நித்³தி³ட்டா² சக்கா²யதனாத³யோ, தேஸமித³ம் நித³ஸ்ஸனந்தி. ந சேத்த² புரிமனயதோ அவிஸேஸோ. தத்த² ஹி ரூபஸ்ஸ பூ⁴துபாதா³யதாமத்தஸபா⁴வத³ஸ்ஸனதா வுத்தா. தேனாஹ அட்ட²கதா²யம் ‘‘அதீதரூபம்பி பூ⁴தானி சேவா’’திஆதி³. இத⁴ பன பூ⁴துபாதா³யேன நித³ஸ்ஸனபூ⁴தேன ரூபஸ்ஸ ஸப்³ப³விஸேஸவிபா⁴வனதா த³ஸ்ஸிதா. ஏவஞ்ச கத்வா அப்³யாபிததோ³ஸோபி சேத்த² அனோகாஸோவ, யம் ரூபம் அஜ்ஜ²த்தம்…பே… உபாதி³ன்னம், கிந்தி? சத்தாரோ ச…பே… ரூபந்தி தத³ஞ்ஞவிஸேஸனித³ஸ்ஸனஸ்ஸ அதி⁴ப்பேதத்தா. ததா² சாஹ ‘‘ஏவம் ஸப்³ப³த்த² அத்தோ² வேதி³தப்³போ³’’தி.

பரியாயதே³ஸனத்தாதி ஸபா⁴வதோ பரியாயனம் பரிவத்தனம் பரியாயோ, உஜுகம் அப்பவத்தீதி அத்தோ². பரியாயேன, பரியாயபூ⁴தா வா தே³ஸனா ஏத்தா²தி பரியாயதே³ஸனம், ஸுத்தந்தம். ஸுத்தந்தஞ்ஹி வேனேய்யஜ்ஜா²ஸயவஸேன தே³ஸேதப்³ப³த⁴ம்மே லேஸதோ லப்³ப⁴மானபா⁴வகத²னம், ந உஜுனிப்பதே³ஸபா⁴வகத²னந்தி பரியாயதே³ஸனம் நாம. தேனேவ தம் ‘‘யதா²னுலோமஸாஸன’’ந்தி வுச்சதி. அபி⁴த⁴ம்மோ பன தே³ஸேதப்³ப³த⁴ம்மே உஜுனிப்பதே³ஸகத²னந்தி நிப்பரியாயதே³ஸனம் நாம, யதோ ‘‘யதா²த⁴ம்மஸாஸன’’ந்தி வுச்சதி. நிச்ச²யேன தே³ஸோதி வவத்தா²னதோ கத²னம். ததா² ப⁴த்³தே³கரத்தஸுத்தாதீ³ஸு (ம. நி. 3.272 ஆத³யோ) விய அதீதாதி³பா⁴வோ அதீதானாக³தபச்சுப்பன்னபா⁴வோ அத்³தா⁴வஸேன இதா⁴பி க²ந்த⁴விப⁴ங்கே³ ஸுத்தந்தபா⁴ஜனீயத்தா நித்³தி³ஸிதப்³போ³ ஸியாதி யோஜனா.

ஸன்னிபதிதந்தி ஸமாக³தம். ஸந்தானவஸேனாதி புப்³பா³பரவஸேன. புப்³பே³னாபரஸ்ஸ ஸமப்பமாணதாய அனூனம் அனதி⁴கம், ததோ ஏவ ஏகாகாரம். பவத்திகாலவஸேன வா அனூனம் அனதி⁴கம், ஸமானஸபா⁴வதாய ஏகாகாரம். தேன விஸபா⁴க³உதுனா அனந்தரிததம் த³ஸ்ஸேதி. ஏவம் ஆஹாரேபீதி ஏத்த² விஸபா⁴கா³ஹாரேன அனந்தரிதோ அனேகவாரம் அனேகதி³வஸம்பி பு⁴த்தோ ஸபா⁴கே³காஹாரம் நாம. ‘‘ததோ புப்³பே³ விஸபா⁴க³உதுஆஹாரஸமுட்டா²னம் அதீதம், பச்சா² அனாக³த’’ந்தி ஹி வுத்தந்தி. ‘‘ஏகாஹாரஸமுட்டா²ன’’ந்தி பன வுத்தத்தா ஏகஸ்ஸேவ ஆஹாரஸ்ஸ யோஜனா யுத்தரூபாதி அபரே. பஞ்சத்³வாரவஸேனாதி ஏத்த² பஞ்சத்³வாராவஜ்ஜனதோ பட்டா²ய யாவ ததா³ரம்மணம், யாவ ஜவனம், யாவ வா வோட்ட²ப்³ப³னம், தாவ பவத்தா சித்தஸந்ததி ஏகவீதி². ஏகஜவனஸமுட்டா²னந்தி ஏகஜவனவாரஸமுட்டா²னம். ஏத்த² ச ஸமயம் அனாமஸித்வாவ ஸந்ததிவஸேன, ஸந்ததிஞ்ச அனாமஸித்வாவ ஸமயவஸேன அதீதாதி³விபா⁴கோ³ க³ஹேதப்³போ³.

தேஸந்தி ஹேதுபச்சயானம். கலாபஸ்ஸாதி ரூபகலாபஸ்ஸ. கம்மானந்தராதீ³தி கம்மாதி³, அனந்தராதீ³தி பச்சேகம் ஆதி³-ஸத்³தோ³ யோஜேதப்³போ³. தத்த² பட²மேன ஆதி³ஸத்³தே³ன உபனிஸ்ஸயபச்சயஸ்ஸ ஆஹாராதி³னோ ச து³தியேன ஸமனந்தரானந்தரூபனிஸ்ஸயாதி³னோ ஸங்க³ஹோ வேதி³தப்³போ³. சித்துப்பாத³ஸ்ஸ சேத்த² கம்மானந்தராதி³பச்சயவஸேன, இதரஸ்ஸ கம்மாதி³வஸேனேவ ஜனகபா⁴வே யோஜனா த³ட்ட²ப்³பா³. ததா² சித்துப்பாத³ஸ்ஸ புரேஜாதவஸேன, இதரஸ்ஸ பச்சா²ஜாதவஸேன, உப⁴யேஸம்பி ஸஹஜாதவஸேன உபத்த²ம்ப⁴னம் வேதி³தப்³ப³ம். தேனேவாஹ ‘‘யதா²ஸம்ப⁴வம் யோஜேதப்³ப³’’ந்தி. உப்பாத³க்க²ணேதி ஹேதுகிச்சக்க²ணே. ஹேதுகிச்சம் நாம தஸ்ஸ தஸ்ஸ உப்பாதே³தப்³ப³ஸ்ஸ உப்பத்திகரணம், தஞ்ச தஸ்மிம் க²ணே உப்பன்னப²லத்தா ததோ பரம் கத்தப்³பா³பா⁴வதோ நிட்டி²தஞ்சாதி த³ட்ட²ப்³ப³ம். இதரம் பன தீஸுபி க²ணேஸு பச்சயகிச்சம் த³ட்ட²ப்³ப³ந்தி யோஜனா.

6. அனிட்ட²னாமனிவத்தனஸ்ஸாதி அனிட்ட²னாமனிவத்தியா அகாரணபா⁴வத³ஸ்ஸனேன இட்ட²னாமலாபா⁴பனஸ்ஸ அகாரணபா⁴வம் த³ஸ்ஸேதி.

தே³வமனுஸ்ஸஸம்பத்திப⁴வேதி ஸம்பத்தியுத்தே ஸம்பன்னே தே³வமனுஸ்ஸப⁴வே. ஸமித்³த⁴ஸோப⁴னதாதி அபி⁴வுத்³த⁴ஸோப⁴னதா. ததோ ஏவாதி ஸம்பத்திவிரஹதோ ஏவ, அஸம்பன்னத்தா ஏவாதி அத்தோ². தேஸம்யேவ ஹத்தி²ஆதீ³னம் ஸுக²ஸ்ஸ ஹேதுபா⁴வம் ந க³ச்ச²ந்தி ஸாரணாதி³வஸேன து³க்க²பச்சயத்தா. தேஸந்தி ஹத்தி²ரூபாதீ³னம். ‘‘தஸ்ஸ தஸ்ஸேவா’’திஆதி³னா யதா²வுத்தமத்த²ம் விவரதி. அகுஸலேன அத்தனா கதேன நிப்³ப³த்தம் து³க்க²ஸ்ஸ பச்சயோ ஹோதீதி யோஜனா. தஸ்மாதி யஸ்மா கம்மம் யஸ்மிம் ஸந்தானே நிப்³ப³த்தம், தத்தே²வ ஸுக²து³க்கா²னம் பச்சயோ ஹோதி, ந அஞ்ஞத்த², தஸ்மா. அட்ட²கதா²யம் பனாதி ஏகச்சமதத³ஸ்ஸனம். தத்த² ‘‘அனிட்ட²ம் நாம நத்தீ²’’தி யஸ்மா படிஸேத⁴த்³வயேன குஸலகம்மஜஸ்ஸ இட்ட²பா⁴வோ நியதோ, தஸ்மா ‘‘குஸலகம்மஜமேவ இட்ட²’’ந்தி ஏவம் அனியமேத்வா ‘‘குஸலகம்மஜம் இட்ட²மேவா’’தி ஏவமேத்த² நியமோ க³ஹேதப்³போ³தி த³ஸ்ஸேந்தோ ‘‘அகுஸலகம்மஜம்பீ’’திஆதி³மாஹ. கிந்தி அகுஸலகம்மஜம் ஸோப⁴னம், யம் பரேஸம் இட்ட²ம் நாம ஸியா? யதி³ து³க்³க³தியம் கேஸஞ்சி திரச்சா²னானம் ஸண்டா²னாதி³ஸம்பத்தி ஸுக³தியம் ஸத்தானம் அகுஸலனிஸ்ஸந்தே³ன விரூபரூபதா விய குஸலனிஸ்ஸந்தே³ன, கத²ம் தஸ்ஸா அகுஸலகம்மஜதா. அத² பன யம் கேஸஞ்சி அமனாபம்பி ஸமானம் ரூபம் மனாபம் ஹுத்வா உபட்டா²தி, தம் ஸந்தா⁴ய வுத்தம், ஏவம்பி யதா² கேஸஞ்சி திரச்சா²னாதீ³னம் குஸலகம்மஜம் மனுஸ்ஸாதி³ரூபம் அமனாபதோ உபட்ட²ஹந்தம்பி குஸலவிபாகஸ்ஸேவ ஆரம்மணபா⁴வதோ அத்த²தோ இட்ட²மேவ நாம ஹோதி, ஏவம் அகுஸலகம்மஜம் கேஸஞ்சி மனாபம் ஹுத்வா உபட்ட²ஹந்தம்பி அகுஸலவிபாகஸ்ஸேவ ஆரம்மணபா⁴வதோ அத்த²தோ அனிட்ட²மேவ நாம ஹோதி, ஏவஞ்சேதம் ஸம்படிச்சி²தப்³ப³ம். அஞ்ஞதா² ‘‘அட்டா²னமேதம் அனவகாஸோ, யம் காயது³ச்சரிதஸ்ஸ இட்டோ² கந்தோ மனாபோ விபாகோ உப்பஜ்ஜேய்யா’’திஆதி³அட்டா²னபாளியா (ம. நி. 3.131) விரோதோ⁴ ஸியா. தேனேவாஹ ‘‘குஸலகம்மஜஸ்ஸ பனா’’திஆதி³. ஸப்³பே³ஸந்தி அத்தனோ, பரேஸஞ்ச. இட்ட²ஸ்ஸ அபா⁴வோ வத்தப்³போ³தி யதா² ‘‘குஸலகம்மஜம் அனிட்ட²ம் நாம நத்தீ²’’தி வுத்தம், ஏவம் கிஞ்சாபி ‘‘அகுஸலகம்மஜம் இட்ட²ம் நாம நத்தீ²’’தி அட்ட²கதா²யம் ந வுத்தம், தேன பன நயத³ஸ்ஸனேன அகுஸலகம்மஜஸ்ஸ அபா⁴வோ வுத்தோ ஏவ ஹோதீதி ஸோ ஸம்வண்ணனாவஸேன நித்³தா⁴ரேத்வா வத்தப்³போ³தி அதி⁴ப்பாயோ. ஏதேன குஸலகம்மஜமேவ இட்ட²ந்தி புரிமபதா³வதா⁴ரணஸ்ஸ க³ஹேதப்³ப³தம் த³ஸ்ஸேதி.

இதா³னி ‘‘ஹத்தி²ஆதீ³னம்பீ’’திஆதி³னா தமேவத்த²ம் விவரதி. குஸலவிபாகஸ்ஸாதி ஏத்தா²பி குஸலவிபாகஸ்ஸேவ ஆரம்மணந்தி அத்தோ². மனுஸ்ஸானந்தி ச நித³ஸ்ஸனமத்தம் த³ட்ட²ப்³ப³ம். இதரேஸம்பி ச அகுஸலகம்மஜம் அகுஸலவிபாகஸ்ஸேவ, குஸலகம்மஜஞ்ச குஸலவிபாகஸ்ஸேவ ஆரம்மணந்தி த³ஸ்ஸிதோவாயம் நயோதி. கஸ்மா பன இட்டா²னிட்ட²மிஸ்ஸிதே வத்து²ம்ஹி மனாபதாவ ஸண்டா²தீதி ஆஹ ‘‘இட்டா²ரம்மணேன…பே… ஸக்கா வத்து’’ந்தி. ஸுட்டு² வுத்தந்தி ‘‘இட்டா²னிட்ட²ம் ஏகந்ததோ விபாகேனேவ பரிச்சி²ஜ்ஜதீ’’தி வத³ந்தேஹி இட்டா²னிட்டா²ரம்மணவவத்தா²னம் ஸம்மதே³வ வுத்தம். தம் அனுக³ந்த்வாதி விபாகவஸேன இட்டா²னிட்டா²ரம்மணவவத்தா²னம் அனுக³ந்த்வா. ஸப்³ப³த்தா²தி ஸுக³திது³க்³க³தீஸு, ஸப்³பே³ஸு வா ஆரம்மணேஸு.

‘‘அனிட்டா²’’தி வசனேனேவ தேஸம் இட்ட²தா நிவத்திதாதி ஆஹ ‘‘ஸதி³ஸதா ச ரூபாதி³பா⁴வோயேவா’’தி. இட்டா²னேவ ரூபாதீ³னி காமகு³ணாதி ஸுத்தே வுத்தானீதி மித்தபடிபக்கோ² அமித்தோ விய இட்ட²படிபக்கா² அனிட்டா²தி அதி⁴ப்பேதாதி வுத்தம் ‘‘அனிட்டா²தி…பே… வோஹாரோ வியா’’தி. ஸப்³பா³னி வாதி ஏத்த² ‘‘பியரூபம் ஸாதரூப’’ந்தி (தீ³. நி. 2.400; ம. நி. 1.133; விப⁴. 203) வசனதோ கத²ம் அனிட்டா²னம் ரூபாதீ³னம் காமகு³ணபா⁴வாபத்தீதி சே? தேஸம்பி விபல்லாஸவஸேன தண்ஹாவத்து²பா⁴வதோ பியரூபபா⁴வஸ்ஸ அதி⁴ப்பேதத்தா. யதி³ ஏவம் கத²ம் ‘‘சக்கு²விஞ்ஞேய்யானி ரூபானி இட்டா²னீ’’திஆதி³ஸுத்தபத³ம் (ம. நி. 1.166; 2.155; 3.57; ஸம். நி. 5.30) நீயதீதி ஆஹ ‘‘அதிஸயேனா’’திஆதி³.

இந்த்³ரியப³த்³த⁴ரூபவஸேன பாளியம் ஹீனது³கனித்³தே³ஸோ பவத்தோதி த³ஸ்ஸேதும் ‘‘த்³வீஸுபி ஹீனபணீதபதே³ஸூ’’திஆதி³மாஹ. அவயவயோகே³ ஸாமிவசனம், ந கத்தரீதி அதி⁴ப்பாயோ. ‘‘தேஸம் தேஸம் ஸத்தான’’ந்தி இந்த்³ரியப³த்³த⁴ரூபே நித்³தி³ட்டே² கஸ்மா கம்மஜவஸேன அத்தோ² வுத்தோ, ந சதுஸந்ததிவஸேனாதி ஆஹ ‘‘ஸத்தஸந்தான…பே… வுத்த’’ந்தி. பதா⁴னத்தா ஹி கம்மஜவஸேன அத்த²ம் வத்வா ஸேஸேஸு ‘‘ஏவம் உதுஸமுட்டா²னாதீ³ஸுபீ’’தி அட்ட²கதா²யம் அதிதே³ஸோ கதோ. ‘‘தேஹி தேஹீதி ஏதஸ்மிம் அத்தே²’’தி இமினா ‘‘தேஸம் தேஸ’’ந்தி கத்தரி ஸாமிவசனம் ஆஸங்கதி. ததா² ஸதி விஸயே வா ஸாமிவசனே லத்³த⁴கு³ணம் த³ஸ்ஸேதி ‘‘ந கம்மஜவஸேனேவா’’திஆதி³னா, கம்மஜக்³க³ஹணஞ்சேத்த² உபலக்க²ணம் த³ட்ட²ப்³ப³ம்.

மரியாதா³பூ⁴தந்தி உத்தமமரியாதா³பூ⁴தம். தேனேவாஹ ‘‘யஸ்ஸ யேவ மனாபா, தஸ்ஸ தேவ பரமா’’தி. தேஸந்தி காமகு³ணானம். ஸபா⁴வதோதி லக்க²ணதோ.

‘‘ஏகஸ்மிம்யேவ அஸ்ஸாத³னகுஜ்ஜ²னதோ’’திஆதி³னா ‘‘யஸ்மா தேயேவ ரூபாத³யோ ஏகோ அஸ்ஸாதே³தீ’’திஆதி³கம் ஸுத்தந்தவிவரணம் இட்டா²னிட்ட²பா⁴வே ஹேதுபா⁴வேன வுத்தந்தி த³ஸ்ஸேதி. இட்டா²னிட்ட²க்³க³ஹணம் ஹோதீதி நிப்³பா³னே விய அனிட்ட²க்³க³ஹணம் ஸஞ்ஞாவிபல்லாஸேன அஞ்ஞேஸுபி ஆரம்மணேஸு இட்டா²னிட்டா²பி⁴னிவேஸோ ஹோதீதி அதி⁴ப்பாயோ.

விபா⁴கோ³ நாம அஸங்கரோ, வித்தா²ரோ சாதி ‘‘விப⁴த்த’’ந்தி பத³ஸ்ஸ ‘‘வவத்தி²தம், பகாஸித’’ந்தி ச அத்த²மாஹ. அஞ்ஞேஸந்தி அதிஅட்³ட⁴த³லித்³தா³னம். இத³ம் இட்ட²ம், அனிட்ட²ஞ்ச ஹோதீதி ஏத்த² ச-ஸத்³தே³ன அனிட்ட²ம், இட்ட²ஞ்ச ஹோதீதி அயம்பி அத்தோ² வுத்தோதி வேதி³தப்³ப³ம். அனிட்ட²ம் இட்ட²ந்தி இட்ட²ஸ்ஸ ‘‘அனிட்ட²’’ந்தி, அனிட்ட²ஸ்ஸ ‘‘இட்ட²’’ந்தி க³ஹணே யதா²ஸங்க்²யம் யோஜனா. இந்த்³ரியவிகாராபத்திஆதி³னாதி ஏத்த² ஆதி³-ஸத்³தே³ன புப்³பா³பி⁴ஸங்கா²ராதி³ம் ஸங்க³ண்ஹாதி. புரேதரம் பவத்தசித்தாபி⁴ஸங்கா²ரவஸேனாபி ஹி வினாவ ஸஞ்ஞாவிபல்லாஸம் இட்ட²ம் ‘‘அனிட்ட²’’ந்தி, அனிட்ட²ஞ்ச ‘‘இட்ட²’’ந்தி க³ய்ஹதீதி.

தேன விபாகேனாதி தேன குஸலாகுஸலவிபாகேன. ஆரம்மணஸ்ஸ இட்டா²னிட்ட²தந்தி யத்த² தம் உப்பஜ்ஜதி, தஸ்ஸ பு³த்³த⁴ரூபாதி³கஸ்ஸ கூ³தா²தி³கஸ்ஸ ச ஆரம்மணஸ்ஸ யதா²க்கமம் இட்ட²தம் அனிட்ட²தஞ்ச நித³ஸ்ஸேதி. விஜ்ஜமானேபி ஸஞ்ஞாவிபல்லாஸே ஆரம்மணேன விபாகனியமத³ஸ்ஸனந்தி இட்டா²ரம்மணே குஸலவிபாகோவ உப்பஜ்ஜதி, அனிட்டா²ரம்மணே அகுஸலவிபாகோவாதி ஏவம் ஆரம்மணேன விபாகனியமத³ஸ்ஸனம். ஆரம்மணனியமத³ஸ்ஸனத்த²ந்தி யம் குஸலவிபாகஸ்ஸ ஆரம்மணம், தம் இட்ட²ம் நாம. யம் அகுஸலவிபாகஸ்ஸ ஆரம்மணம், தம் அனிட்ட²ம் நாமாதி த³ஸ்ஸனத்த²ம். ஆரம்மணேன நியாமிதோ ஹி விபாகோ அத்தனோ உபகாரகஸ்ஸ ஆரம்மணஸ்ஸ நியாமகோ ஹோதீதி.

த்³வாரந்தரே து³க்க²ஸ்ஸ பச்சயபூ⁴தஸ்ஸ ஆரம்மணஸ்ஸ த்³வாரந்தரே ஸுக²விபாகுப்பாத³னதோ, த்³வாரந்தரே ஸுக²ஸ்ஸ பச்சயபூ⁴தஸ்ஸ ஆரம்மணஸ்ஸ த்³வாரந்தரே து³க்க²விபாகுப்பாத³னதோ விபாகேன ஆரம்மணனியமத³ஸ்ஸனேன விபாகவஸேன இட்டா²னிட்ட²தா த³ஸ்ஸிதாதி யோஜனா.

7. து³ப்பரிக்³க³ஹட்டே²ன காரணபூ⁴தேன லக்க²ணஸ்ஸ இந்த்³ரியாதி³ஸபா⁴வஸ்ஸ து³ப்படிவிஜ்ஜ²தா, ஏவம் ஸுபரிக்³க³ஹட்டே²ன லக்க²ணஸுப்படிவிஜ்ஜ²தா வேதி³தப்³பா³. ‘‘தூ³ரே’’தி அவுத்தஸ்ஸாதி லக்க²ணதோ ‘‘தூ³ரே’’தி அகதி²தஸ்ஸ. வுத்தம்பீதி லக்க²ணதோ ‘‘தூ³ரே’’தி வுத்தம்பி ஸுகு²மரூபம்.

‘‘பி⁴ந்த³மானோ’’தி ஸம்பி⁴ந்த³மானோதி வுத்தம் ஹோதீதி ஆஹ ‘‘மிஸ்ஸகம் கரோந்தோ’’தி. யஸ்மா பன பே⁴த³னம் விபா⁴க³கரணம்பி ஹோதி, தஸ்மா து³தியவிகப்பே ‘‘பி⁴ந்த³மானோ’’தி பத³ஸ்ஸ ‘‘விஸும் கரோந்தோ’’தி அத்த²மாஹ. ததியவிகப்பே பன பி⁴ந்த³மானோதி வினாஸேந்தோதி அத்தோ². தேனாஹ ‘‘ஸந்திகபா⁴வம் பி⁴ந்தி³த்வா தூ³ரபா⁴வம், தூ³ரபா⁴வஞ்ச பி⁴ந்தி³த்வா ஸந்திகபா⁴வம் கரோந்தோ’’தி. ந ஹி ஸக்கா ஸந்திகஸ்ஸ தப்³பா⁴வம் அவினாஸேத்வா தூ³ரபா⁴வம் காதும், ததா² இதரஸ்ஸாபி. ஸந்திகபா⁴வகரணேன ந பி⁴ந்த³தி ந வினாஸேதி, ந ச ஓகாஸதூ³ரதோ லக்க²ணதோ தூ³ரம் விஸும் கரணேன பி⁴ந்த³தி விபா⁴க³ம் கரோதி, நாபி ஓகாஸதூ³ரேன லக்க²ணதோ தூ³ரம் வோமிஸ்ஸககரணேன பி⁴ந்த³தி ஸம்பி⁴ந்த³தீதி யோஜனா. ‘‘திதா⁴ அத்தோ² த³ட்ட²ப்³போ³’’தி ஸங்கே²பேன வுத்தமத்த²ம் ‘‘ந ஹீ’’திஆதி³னா விவரதி. விஸும் கரோதி, வோமிஸ்ஸகம் கரோதீதி கரோதி-ஸத்³த³ம் ஆனேத்வா ஸம்ப³ந்தோ⁴. ‘‘ஏத்தா²பீ’’திஆதி³னா யதா² ‘‘ஓகாஸதோ தூ³ரமேவ பி⁴ந்த³தீ’’தி ஏத்த² ஓகாஸதோ தூ³ரஸ்ஸ ஓகாஸதோ ஸந்திகபா⁴வகரணம் அதி⁴ப்பேதந்தி வினாஸனம் பே⁴த³னம், ஏவம் ‘‘ந லக்க²ணதோ தூ³ரம் பி⁴ந்த³தீ’’தி ஏத்தா²பி லக்க²ணதோ தூ³ரஸ்ஸ லக்க²ணதோ ஸந்திகபா⁴வாகரணம் அபே⁴த³னம் அவினாஸனந்தி இமமத்த²ம் த³ஸ்ஸேதி. வோமிஸ்ஸககரணவிபா⁴க³கரணத்த²தம் ஸந்தா⁴யாஹ ‘‘பி⁴ந்த³மானோதி ஏத்த² ச அஞ்ஞதா² பே⁴த³னம் வுத்த’’ந்தி. பச்சி²மனயே வினாஸனத்த²மேவ ஸந்தா⁴ய ‘‘பே⁴த³னம் இத⁴ ச அஞ்ஞதா² வுத்த’’ந்தி அவோச.

ரூபக்க²ந்த⁴னித்³தே³ஸவண்ணனா நிட்டி²தா.

2. வேத³னாக்க²ந்த⁴னித்³தே³ஸவண்ணனா

8. சக்கா²த³யோ பஸாதா³தி ஓளாரிகத்தபா⁴வபரியாபன்னா சக்கு²ஸோதகா⁴னஜிவ்ஹாபஸாதா³, மனோமயத்தபா⁴வபரியாபன்னா சக்கு²ஸோதப்பஸாதா³ ச. காயவோஹாரம் அரஹந்தீதி காயந்தோக³த⁴த்தா காயேகதே³ஸத்தா ச காயோதி வத்தப்³ப³தம் அரஹந்தி. காயோதி ஹி அத்தபா⁴வோபி வுச்சதி ‘‘ஸக்காயதி³ட்டீ²’’திஆதீ³ஸு (ஸம். நி. 1.21; 3.155), கரஜகாயோபி ‘‘ஸோ இமம்ஹா காயா அஞ்ஞம் காயம் அபி⁴னிம்மினாதீ’’திஆதீ³ஸு (படி. ம. 3.14). தப்³ப³த்து²காதி சக்கா²தி³னிஸ்ஸிதா காயிகாதி பரியாயேன வுத்தா, நிப்பரியாயேன பன சேதஸிகாவ. யதா²ஹ ‘‘யம் தஸ்மிம் ஸமயே தஜ்ஜாசக்கு²விஞ்ஞாணதா⁴துஸம்ப²ஸ்ஸஜம் சேதஸிகம் நேவ ஸாதம் நாஸாதம் சேதோஸம்ப²ஸ்ஸஜம் அது³க்க²மஸுக²ம் வேத³யித’’ந்திஆதி³ (த⁴. ஸ. 152). ‘‘ந ஹி சக்கா²த³யோ காயப்பஸாதா³ ஹோந்தீ’’தி இமினா காயபஸாத³னிஸ்ஸிதா வேத³னா நிப்பரியாயேன காயிகாதி த³ஸ்ஸேதி. காயிகசேதஸிகாதி³பா⁴வேனாதி ஆதி³-ஸத்³தே³ன குஸலாகுஸலாப்³யாகதாதி³பா⁴வா ஸங்க³ய்ஹந்தி. தேனாதி ஸுகா²தி³வேத³னேகதே³ஸஸ்ஸ அத்³தா⁴ஸமயவஸேன அதீதாதி³பா⁴வாபா⁴வேன. கேசி பனேத்த² ‘‘ஹேட்டா² த³ஸ்ஸிதனயத்தா பாகடத்தா அத்³தா⁴வஸேன, ஏகமுஹுத்தாதி³புப்³ப³ண்ஹாதீ³ஸு உதுஆதி³னா ரூபஸ்ஸ விய வேத³னாய விபா⁴கோ³ ந க³ய்ஹதீதி ஸமயவஸேன ச அதீதாதி³பே⁴தோ³ ந த³ஸ்ஸிதோ’’தி வத³ந்தி. ஸந்தானவஸேன பவத்தானம்பி வேத³னானம் சித்தேன ஸமூஹதோ க³ஹேதப்³ப³தம் ஸந்தா⁴யாஹ ‘‘வேத³னாஸமுதா³யோ’’தி. தேஹீதி அத்³தா⁴ஸமயவஸேன அதீதாதி³பா⁴வேஹி. ஏத்தா²தி ஏதஸ்மிம் விப⁴ங்கே³. தேதி ‘‘வேத³னேகதே³ஸா’’தி வுத்தா காயிகசேதஸிகாதி³பா⁴வேன பி⁴ன்னா ஸுகா²தி³வேத³னாவிஸேஸா. யதி³ வேத³னேகதே³ஸா ஏத்த² க³ஹிதா, க²ணபரிச்சி²ன்னாவ தே க³ஹேதப்³பா³, ந ஸந்ததிபரிச்சி²ன்னாதி ஆஹ ‘‘ஏகஸந்ததியம் பனா’’திஆதி³. தேஸூதி ஸுகா²தி³பே⁴தே³ஸு. பே⁴தோ³தி விஸேஸோ. தஸ்ஸாதி ஸுகா²தி³விஸேஸஸ்ஸ. யதா² சேத்த², ஏவம் ‘‘தம்ஸஹிததது³ப்பாத³கா’’தி ஏத்தா²பி தம்-ஸத்³தே³ன ஸுகா²தி³விஸேஸோ பச்சாமட்டோ²தி வேதி³தப்³போ³. ஸந்ததி பரிச்சே²தி³கா ப⁴விதும் அரஹதீதி ஸம்ப³ந்தோ⁴. ஸந்ததிக²ணவஸேனேவ பரிச்சே²தோ³ வுத்தோ, ந அத்³தா⁴ஸமயவஸேனாதி அதி⁴ப்பாயோ.

‘‘புப்³ப³ந்தாபரந்தமஜ்ஜ²க³தா’’தி நிட்டி²தஹேதுகிச்சா அனிட்டி²தபச்சயகிச்சாதி வுத்தா, தம் பன அதிக்கந்தஹேதுபச்சயகிச்சந்தி ஏவம் வுத்தஸ்ஸ நயஸ்ஸ உபலக்க²ணந்தி ஆஹ ‘‘புப்³ப³ந்தாபரந்தமஜ்ஜ²க³தாதி ஏதேன ஹேதுபச்சயகிச்சவஸேன வுத்தனயம் த³ஸ்ஸேதீ’’தி. ஏத்த² குஸலாகுஸலகிரியவேத³னானம் ரூபஸ்ஸ விய, விபாகானம் விய ச அயம் நாம ஜனகஹேதூதி நிப்பரியாயேன ந ஸக்கா வத்தும், பரியாயேன பன அனந்தரபச்சயபூ⁴தோ ஹேதூதி வத்தப்³போ³.

11. ஸந்தாபனகிச்சந்தி பரிட³ஹனகிச்சம். ஜாதிஆதி³ஸங்கரந்தி ஜாதிஸபா⁴வபுக்³க³லலோகியலோகுத்தரதோ ஸங்கரம் ஸம்பே⁴த³ம் அகத்வா. ஸமானஜாதியந்தி ஏகஜாதியம். ஸுக²தோ தஜ்ஜாதியா அது³க்க²மஸுகா² பணீதாதி யோஜேதப்³பா³தி ஸம்ப³ந்தோ⁴. ஸமானபே⁴தே³தி பூ⁴மந்தராதி³ஸமானவிபா⁴கே³. உபப்³ரூஹிதானம் தா⁴தூனந்தி உளாரரூபஸமுட்டா²பனேன பணீதானம் ரூபத⁴ம்மானம். விபா³தி⁴தானந்தி நிப்பீளிதானம் மிலாபிதானம். உப⁴யந்தி ஸுகா²தி³த்³வயம். ஏத்த² ச கோ²ப⁴னா, ஆலுளனா ச காயிகஸுக²ஸ்ஸ வஸேன வேதி³தப்³பா³. அபி⁴ஸந்த³னா ஜா²னஸுக²ஸ்ஸ. மத³யனா காமஸுக²ஸ்ஸ. ததா² சா²த³னா. ஆஸிஞ்சனா ஸப்³ப³ஸ்ஸ. சா²த³னா ஆஸிஞ்சனா வா ஸப்³ப³ஸ்ஸ வஸேன வேதி³தப்³பா³.

ஸபா⁴வாதி³பே⁴தே³ன சாதி ஸபா⁴வபுக்³க³லலோகியாதி³பே⁴தே³ன ச. ஏகந்தபணீதே லோகுத்தரே ஹீனபணீதானம் படிபதா³னம் வஸேன ஹீனபணீததா. ஏகந்தஹீனே அகுஸலே ச²ந்தா³தி³வஸேன ஹீனபணீததா, ஓளாரிகஸுகு²மதா ச. ததா² ஹி வுத்தம் அட்ட²கதா²யம் ‘‘யா ஓளாரிகா, ஸா ஹீனா. யா ஸுகு²மா, ஸா பணீதா’’தி (விப⁴. அட்ட². 11). அகுஸலாதீ³ஸு தோ³ஸஸஹக³தாதி³அந்தரபே⁴த³வஸேன உபாதா³யுபாதா³ய ஓளாரிகஸுகு²மதா தம்தம்வாபனவஸேன வுச்சதி, ந குஸலாகுஸலாதி³வஸேனாதி ஆஹ ‘‘தம்தம்வாபனவஸேன கத²னேபி பரிவத்தனம் நத்தீ²’’தி. தோ³ஸுஸ்ஸன்னதாயாதி கிலேஸாதி⁴கதாய. ததா²தி தோ³ஸுஸ்ஸன்னதாய. கத²ம் பன குஸலேஸு தோ³ஸுஸ்ஸன்னதா? உபனிஸ்ஸயவஸேன, கிலேஸாதி⁴கேஹி ஸந்தானே பவத்தமானா குஸலா த⁴ம்மா கிலேஸேஹி ஸம்பா³த⁴ப்பத்தியா திணாதீ³ஹி ஸம்பா³த⁴ப்பத்தானி விய ஸஸ்ஸானி விபுலப²லஉளாரப²லா ந ஹோந்தீதி. ததா²தி மந்த³தோ³ஸதாய. குஸலானம் மந்த³தோ³ஸதாபி வுத்தனயானுஸாரேன வேதி³தப்³பா³. ஓளாரிகஸுகு²மனிகந்தீதி ஏத்த² அந்தோக³த⁴விஸேஸம் நிகந்தியா ஓளாரிகஸுகு²மதாஸாமஞ்ஞம் வுத்தம். யதா² ஹேத்த² ஓளாரிகஸாமஞ்ஞேன ஓளாரிகோளாரிகதரோளாரிகதமா நிகந்தியோ க³ய்ஹந்தி, ததா² ஸுகு²மஸுகு²மதரஸுகு²மதமா ஸுகு²மதாஸாமஞ்ஞேன க³ய்ஹந்தீதி. ஸுகு²மதமனிகந்திவத்து²ந்தி சேத்த² யாவ ப⁴வக்³க³ம் விபஸ்ஸனாஞாணஞ்ச வேதி³தப்³ப³ம்.

13. யதி³ ஸியாதி யதி³ அஸம்பயோகோ³ விஸம்ஸட்டோ² ஸியா.

ஸந்திகதோ அகுஸலதோதி அகுஸலபா⁴வேன ஸந்திகதோ லோப⁴ஸஹக³தாதி³அகுஸலவேத³யிததோ. அகுஸலாதி தோ³ஸஸஹக³தாதி³அகுஸலவேத³னா தூ³ரேதி யதா² உத்³த⁴ரீயதி. ததோ தூ³ரதோ குஸலதோதி ததோ அகுஸலதோ தூ³ரதோ காமாவசராதி³குஸலவேத³யிததோ குஸலா காமாவசராதி³குஸலவேத³னா. ‘‘ந ஸக்கா’’தி வுத்தம் உத்³த⁴ரிதும் அஸக்குணேய்யதம் ‘‘ததா² ஹி ஸதீ’’திஆதி³னா விவரதி. தஸ்மாதி யஸ்மா தூ³ரதோ ஸந்திகுத்³த⁴ரணம் வுத்தனயேன ஸந்திகதோ ஸந்திகுத்³த⁴ரணமேவ ஹோதி, ததா² ஸதி அத்த²விஸேஸோ ந ஹோதி, உபாதா³யுபாதா³ய தூ³ரஸந்திகதா இத⁴ வுச்சதி. தஸ்மா ஸந்திகதோ ஸந்திகுத்³த⁴ரணஞ்ச ந ஸக்கா காதும் அத்த²விஸேஸாபா⁴வதோ, அனதி⁴ப்பேதத்தா சாதி அதி⁴ப்பாயோ.

நனு ச அதிஸயவசனிச்சா²வஸேன அத்தே²வ அத்த²விஸேஸோதி சோத³னம் மனஸி கத்வா ஆஹ ‘‘தூ³ரதூ³ரதரதாய விய ஸந்திகஸந்திகதரதாய ச அனதி⁴ப்பேதத்தா’’தி. யாதி அகுஸலவேத³னா. ததோதி குஸலவேத³யிததோ. இத⁴ வுத்தஸ்ஸ தூ³ரஸ்ஸாதி இமஸ்மிம் வேத³னாக்க²ந்த⁴விப⁴ங்கே³ ‘‘அகுஸலா வேத³னா குஸலாப்³யாகதாஹி வேத³னாஹி தூ³ரே’’திஆதி³னா (விப⁴. 13) வுத்தஸ்ஸ தூ³ரஸ்ஸ. தூ³ரதோ அச்சந்தவிஸபா⁴க³த்தாதி யதோ யம் ‘‘தூ³ரே’’தி வுத்தம், ததோ அச்சந்தவிஸதி³ஸத்தா தஸ்ஸ வஸேன தூ³ரே ஸந்திகம் நத்தீ²தி ந ஸக்கா தூ³ரதோ ஸந்திகம் உத்³த⁴ரிதும். அயஞ்ஹேத்த² அதி⁴ப்பாயோ – ஹேட்டா² யா வேத³னா யாய வேத³னாய தூ³ரேதி வுத்தா, ஸா ஏவ தஸ்ஸா கேனசிபி பரியாயேன ஸந்திகேதி ந உத்³த⁴ரிதப்³பா³தி. ஸந்திகேதி வுத்தவேத³னம்யேவ ஸந்தா⁴ய வத³தி. பி⁴ன்னேதி லோப⁴ஸஹக³தாதி³வஸேன விப⁴த்தே. தத்தே²வாதி ‘‘ஸந்திகே’’தி வுத்தஅத்தே² ஏவ. இத³ம் வுத்தம் ஹோதி – ‘‘அகுஸலா வேத³னா அகுஸலாய வேத³னாய ஸந்திகே’’தி ஏவம் வுத்தஅகுஸலாய வேத³னாயமேவ லோப⁴ஸஹக³தாதி³வஸேன விப⁴த்தாய தூ³ரபா⁴வோபி லப்³ப⁴தி. ஏவம் ஸேஸேஸுபீதி.

யதி³ ஸந்திகதோ தூ³ரம் லப்³ப⁴தி, யத³க்³கே³ன தூ³ரம் லப்³ப⁴தி, தத³க்³கே³ன தூ³ரதோ ஸந்திகம் உத்³த⁴ரியேய்யாதி சோத³னம் மனஸி கத்வா ஆஹ ‘‘உபாதா³யுபாதா³ய தூ³ரதோ ச ஸந்திகம் ந ஸக்கா உத்³த⁴ரிது’’ந்திஆதி³. தஸ்ஸத்தோ² – யம் ஸந்திகதோ தூ³ரம் லப்³ப⁴தி, யதி³பி தம் விஸபா⁴க³ட்டே²ன லப்³ப⁴தி, ததா²பி யம் தத்த² ஸந்திகம் லப்³ப⁴தி, தம் ஸபா⁴க³ட்டே²னேவ லப்³ப⁴தீதி ஸந்திகதோவ ஸந்திகம் உத்³த⁴டம் ஸியாதி. தஸ்மாதி யஸ்மா விஸபா⁴க³ட்டே²ன தூ³ரதா, ஸபா⁴க³ட்டே²ன ச ஸந்திகதா இச்சி²தா, தஸ்மா. லோப⁴ஸஹக³தாய தோ³ஸஸஹக³தா விஸபா⁴க³தாய தூ³ரே ஸமானா கத²ம் ஸந்திகே ப⁴வேய்யாதி அதி⁴ப்பாயோ. நனு தாஸம் அகுஸலஸபா⁴க³தா லப்³ப⁴தேவாதி தத்த² உத்தரமாஹ ‘‘விஸபா⁴க³தா’’திஆதி³. தத்த² பே⁴த³ம் அக்³க³ஹேத்வா ந பவத்ததீதி பே⁴த³ம் விஸேஸம் அஸதி³ஸதம் க³ஹேத்வா ஏவ பவத்ததி விஸபா⁴க³தா. தூ³ரதாயாதி இதா⁴தி⁴ப்பேதாய தூ³ரதாய ஸபா⁴க³ஸ்ஸ அப்³யாபகத்தா தூ³ரதோ ஸந்திகுத்³த⁴ரணம் ந ஸக்கா காதும். ஸதி ஹி ஸபா⁴க³ப்³யாபகத்தே ஸியா ஸந்திகதாதி தூ³ரதோ ஸந்திகுத்³த⁴ரணம் ஸக்கா காதுந்தி அதி⁴ப்பாயோ. ‘‘ந ஹீ’’திஆதி³னா தமேவத்த²ம் பாகடம் கரோதி. ஸபா⁴க³தாதி ஸாமஞ்ஞம். பே⁴த³ந்தி விஸேஸம். அந்தோக³த⁴ம் கத்வாவாதி அபி⁴ப்³யாபேத்வாவ. விஸபா⁴க³ப்³யாபகத்தா ஸந்திகதாயாதி இதா⁴தி⁴ப்பேதவிஸபா⁴க³ம் ப்³யாபேத்வா பவத்தனதோ ஹேட்டா² வுத்தஸந்திகதாய ஸந்திகதோ தூ³ருத்³த⁴ரணம் ஸக்கா காதும். தமேவத்த²ம் ‘‘அகுஸலதா ஹீ’’திஆதி³னா பாகடம் கரோதி.

வேத³னாக்க²ந்த⁴னித்³தே³ஸவண்ணனா நிட்டி²தா.

3. ஸஞ்ஞாக்க²ந்த⁴னித்³தே³ஸவண்ணனா

17. தஸ்ஸாபீதி ஸஞ்ஞாயபி. தப்³ப³த்து²கத்தாதி சக்கு²வத்து²கத்தா. படிக⁴விஞ்ஞேய்யோதி யதா²வுத்தபடிக⁴தோ விஜானிதப்³போ³ படிக⁴வஸேன க³ஹேதப்³போ³. உத்தரபத³லோபம் கத்வாதி புரிமபதே³ உத்தரபத³லோபம் கத்வா.

விஞ்ஞேய்யபா⁴வே, ந உப்பத்தியந்தி அதி⁴ப்பாயோ. வசனந்தி ஸத்³தோ³, நாமந்தி அத்தோ². வசனாதீ⁴னாதி க³ஹேதப்³ப³தம் பதி ஸத்³தா³தீ⁴னா, நாமாயத்தக³ஹணாதி அத்தோ². யதே³த்த² வத்தப்³ப³ம், தம் நாமரூபது³கே (த⁴. ஸ. மூலடீ. 101-108) வுத்தமேவ. அதி⁴வசனம் பஞ்ஞத்திபகாஸகம் ஞாபகம் ஏதேஸம் அத்தீ²தி அதி⁴வசனா யதா² அரிஸஸோதி. ததோஜோதி அதி⁴வசனஸங்கா²ததோ அரூபக்க²ந்த⁴தோ ஜாதோ. அரூபக்க²ந்த⁴பரியாபன்னத்தா ப²ஸ்ஸேபி யதா²வுத்தோ அத்தோ² ஸம்ப⁴வதீதி த³ஸ்ஸேதும் ‘‘ஸம்ப²ஸ்ஸோயேவ வா’’திஆதி³மாஹ. ந கேவலம் மனோத்³வாரிகப²ஸ்ஸே ஏவ, அத² கோ² பஞ்சத்³வாரிகப²ஸ்ஸேபி ‘‘விஞ்ஞேய்யபா⁴வே வசனம் அதி⁴கிச்ச பவத்தா அதி⁴வசனா’’திஆதி³வுத்தப்பகாரோ அத்தோ² ஸம்ப⁴வதி. இதீதி தஸ்மா. தேன பரியாயேனாதி மனோஸம்ப²ஸ்ஸஜபரியாயேன. ததோஜாபீதி பஞ்சத்³வாரிகப²ஸ்ஸஜாதாபி. அஞ்ஞப்பகாராஸம்ப⁴வதோதி படிக⁴ஸம்ப²ஸ்ஸஜபரியாயஸ்ஸ அஸம்ப⁴வதோ. ஆவேணிகம் படிக⁴ஸம்ப²ஸ்ஸஜதா. பகாரந்தரம் அதி⁴வசனஸம்ப²ஸ்ஸஜதா.

யதி³ ஏவந்தி யதி³ பஞ்சத்³வாரிகப²ஸ்ஸேஹி உப்பன்னஸஞ்ஞா பரியாயதோ நிப்பரியாயதோ ச ‘‘அதி⁴வசனஸம்ப²ஸ்ஸஜா’’தி வுச்சந்தி, ஏவம் சத்தாரோபி அரூபினோ க²ந்தா⁴ ஏவம் வத்தும் யுத்தா. ஏவம் ஸந்தே ஸஞ்ஞாவ கஸ்மா ‘‘அதி⁴வசனஸம்ப²ஸ்ஸஜா’’தி வுத்தாதி ஆஹ ‘‘திண்ணம் க²ந்தா⁴ன’’ந்திஆதி³. தத்த² திண்ணம் க²ந்தா⁴னந்தி வேத³னாஸங்கா²ரவிஞ்ஞாணக்க²ந்தா⁴னம். அத்த²வஸேனாதி ‘‘வசனம் அதி⁴கிச்ச பவத்தா அதி⁴வசனா’’திஆதி³னா வுத்தஅத்த²வஸேன அன்வத்த²தாவஸேன. அத்தனோ பத்தம்பி நாமந்தி ‘‘அதி⁴வசனஸம்ப²ஸ்ஸஜா’’தி ஏவம் அத்தனோ அனுப்பத்தம்பி நாமம். த⁴ம்மாபி⁴லாபோதி ஸபா⁴வனிருத்தி. புப்³பே³ சதுன்னம் அரூபக்க²ந்தா⁴னம் ஸாதா⁴ரணோபி அதி⁴வசனஸம்ப²ஸ்ஸஜவோஹாரோ ருள்ஹிவஸேன ஸஞ்ஞாய ஏவ பவத்தோதி வத்வா இதா³னி ஸோ தத³ஞ்ஞாரூபக்க²ந்த⁴ஸாதா⁴ரணோ ஸஞ்ஞாய நிவேஸிதோதி த³ஸ்ஸேதும் ‘‘அத² வா’’திஆதி³மாஹ. ரஜ்ஜித்வா ஓலோகனாதீ³ஸூதி ஏத்த² ஆதி³-ஸத்³தே³ன குஜ்ஜி²த்வா ஓலோகனாதி³ விய ரஜ்ஜித்வா ஸவனாதி³பி ஸங்க³ய்ஹதீதி வேதி³தப்³ப³ம், ததா²ஸோதாவதா⁴னாதி³னோபி ரத்ததாதி³விஜானனனிமித்ததாஸம்ப⁴வதோ. சக்கு²ஸம்ப²ஸ்ஸஜாஸஞ்ஞாய பன பாகடபா⁴வம் நித³ஸ்ஸனவஸேன த³ஸ்ஸேதும் ‘‘ஓலோகனம் சக்கு²விஞ்ஞாணவிஸயஸமாக³மே’’திஆதி³மாஹ.

ஓலோகனஸ்ஸ அபாகடபா⁴வே ரத்ததாதி³விஜானனம் ந ஹோதி, பாகடபா⁴வே ச ஹோதீதி ஆஹ ‘‘பஸாத³வத்து²கா ஏவா’’தி. ‘‘அஞ்ஞம் சிந்தேந்த’’ந்தி யம் புப்³பே³ தேன கதி²தம், காயேன வா பகாஸிதம், ததோ அஞ்ஞம் கிஞ்சி அத்த²ம் சிந்தேந்தம். தேனேவாஹ ‘‘ஞாத’’ந்தி.

ஸஞ்ஞாக்க²ந்த⁴னித்³தே³ஸவண்ணனா நிட்டி²தா.

4. ஸங்கா²ரக்க²ந்த⁴னித்³தே³ஸவண்ணனா

20. ‘‘ஹேட்டி²மகோடியாதி ஏத்தா²’’தி இத³ம் பட²மம் ‘‘ஹேட்டி²மகோடியா’’தி வசனம் ஸந்தா⁴ய வுத்தம். தஸ்ஸ ஹி பு⁴ம்மவஸேன அத்தோ² க³ஹேதப்³போ³. தேனாஹ ‘‘தத்த² ஹி பதா⁴னம் த³ஸ்ஸித’’ந்தி. ஹேட்டி²மகோடியாவ பதா⁴னம் த³ஸ்ஸிதந்தி இமமத்த²ம் க³ஹேத்வா ‘‘யதி³ ஏவ’’ந்திஆதி³னா சோதே³தி. இதரோ ‘‘ஹேட்டி²மகோடியா பதா⁴னமேவ த³ஸ்ஸித’’ந்தி ஏவமேத்த² நியமோ க³ஹேதப்³போ³தி த³ஸ்ஸேந்தோ ‘‘உபரிமகோடிக³தபா⁴வேனா’’திஆதி³னா தம் பரிஹரதி. பதா⁴னஸ்ஸேவ த³ஸ்ஸனம். பதா⁴னே ஹி த³ஸ்ஸிதே அப்பதா⁴னம்பி அத்த²தோ த³ஸ்ஸிதமேவ ஹோதீதி. தேனாஹ அட்ட²கதா²யம் ‘‘தம்ஸம்பயுத்தஸங்கா²ரா பன தாய க³ஹிதாய க³ஹிதாவ ஹோந்தீ’’தி. யம் ஹேட்டி²மகோடியம் லப்³ப⁴தி, தம் உபரிமகோடியம்பி லப்³ப⁴தி ஏவாதி ஆஹ ‘‘ஹேட்டி²மகோடி ஹி ஸப்³ப³ப்³யாபிகா’’தி. து³தியே கரணனித்³தே³ஸதம் த³ஸ்ஸேதும் ‘‘ஆக³தாதி ஸம்ப³ந்தோ⁴’’தி ஆஹ. ஆக³மனகிரியா ஹி ஹேட்டி²மகோடியா கரணபா⁴வேன தத்த² வுத்தாதி. யதா² ச ஆக³மனகிரியாய, ஏவம் வசனகிரியாயபி ஹேட்டி²மகோடியா கரணபா⁴வோ ஸம்ப⁴வதீதி த³ஸ்ஸேதும் ‘‘புரிமேபி வா’’திஆதி³மாஹ. ‘‘ஏகூனபஞ்ஞாஸப்பபே⁴தே³’’தி இத³ம் லோகியசித்துப்பாதே³ பாளிஆக³தானம் ஸங்கா²ரக்க²ந்த⁴த⁴ம்மானம் உபரிமகோடிம் ஸந்தா⁴ய வுத்தம். யேவாபனகத⁴ம்மேஹி ஸத்³தி⁴ம் உபரிமகோடியா க³ய்ஹமானாய ‘‘தேபஞ்ஞாஸா’’தி வத்தப்³ப³ம் ஸியா, லோகுத்தரசித்துப்பாத³வஸேன பன ‘‘ஸத்தபஞ்ஞாஸா’’தி.

ஸங்கா²ரக்க²ந்த⁴னித்³தே³ஸவண்ணனா நிட்டி²தா.

பகிண்ணககதா²வண்ணனா

ஸமுக்³க³ம-பத³ஸ்ஸ தத்வதோ பரியாயதோ ச அத்த²ம் த³ஸ்ஸேதி ‘‘ஸஞ்ஜாதியம் ஆதி³உப்பத்திய’’ந்தி. பே⁴த³தோ பன ஸமாயோகே³ உக்³க³மனந்தி. தத்த² கேன ஸமாயோகே³, குதோ, கத²ஞ்ச உக்³க³மனந்தி விசாரணாயம் ஆஹ ‘‘தம்தம்பச்சயஸமாயோகே³’’திஆதி³. தத்தே²வாதி பஞ்சவோகாரப⁴வே ஏவ. தத்த² ஹி பஞ்சக்க²ந்தா⁴ பரிபுண்ணா ஸமுக்³க³ச்ச²ந்தி. யதா²தி⁴க³தானம் அதி⁴க³தப்பகாரானம், படிஸந்தி⁴கானந்தி அத்தோ². ஓபபாதிகஸமுக்³க³மேனேவ சேத்த² ஸம்ஸேத³ஜஸமுக்³க³மோபி க³ஹிதோதி த³ட்ட²ப்³போ³ பஞ்சக்க²ந்த⁴பரியாபன்னானம் ததா³ உப்பஜ்ஜனாரஹானம் உப்பஜ்ஜனதோ. தத்த² ஸம்ஸேத³ஜா உப்பஜ்ஜித்வா வட்³ட⁴ந்தி, இதரே ந வட்³ட⁴ந்தீதி இத³மேதேஸம் நானாகரணம். ஸுகு²மஜாதியலோமா ஏவ கிர கேசி ஏளகா ஹிமவந்தே விஜ்ஜந்தி, தேஸம் லோமம் ஸந்தா⁴ய ‘‘ஜாதிமந்தஏளகலோம’’ந்தி வுத்தம் அதிஸுகு²மத்தா தேஸம் லோமானம். கேசி பன ‘‘அஜபாகதிகேளகாதீ³ஹி ஸங்கரரஹிதானம் தேஸம் ஏளகவிஸேஸானம் நிப்³ப³த்தேளகஸ்ஸ லோமம் ஜாதிஉண்ணா, தம்பி தங்க²ணனிப்³ப³த்தஸ்ஸா’’தி வத³ந்தி. க³ப்³ப⁴ம் பா²லேத்வா க³ஹிதஸ்ஸாதி அபரே. ஏவம்ஸண்டா²னந்தி ஜாதிஉண்ணம்ஸுனோ பக்³க⁴ரித்வா அக்³கே³ டி²ததேலபி³ந்து³ஸண்டா²னம். வண்ணப்படிபா⁴கோ³தி ரூபபடிச்ச²ன்னோ ஸண்டா²னபடிச்ச²ன்னோ ச.

ஸந்ததிமூலானீதி தஸ்மிம் ப⁴வே ரூபஸந்ததியா மூலபூ⁴தானி. அனேகிந்த்³ரியஸமாஹாரபா⁴வதோதி யதா²ரஹம் சக்கா²தி³அனேகிந்த்³ரியஸங்கா⁴தபா⁴வதோ. பதா⁴னங்க³ந்தி உத்தமங்க³ம் ஸிரோ.

ந தஸ்ஸ தஸ்ஸ க²ந்த⁴ஸ்ஸ பரிபுண்ணதம், தம்தம்க²ந்தே⁴கதே³ஸஸ்ஸேவ வுத்தத்தாதி அதி⁴ப்பாயோ. காமாவசரானந்தி காமாவசரஸத்தானம். பரிஹீனாயதனஸ்ஸாதி பரிஹீனஸ்ஸ சக்கா²தி³ஆயதனஸ்ஸ வஸேன. தத்த² து³க்³க³தியம் அந்த⁴ஸ்ஸ சக்கு²த³ஸகவஸேன, ப³தி⁴ரஸ்ஸ ஸோதத³ஸகவஸேன, அந்த⁴ப³தி⁴ரஸ்ஸ உப⁴யவஸேன ஸந்ததிஸீஸஹானி வேதி³தப்³பா³. நபும்ஸகஸ்ஸ பன பா⁴வஹானி வுத்தா ஏவ. ததா² அந்த⁴ப³தி⁴ராகா⁴னகஸ்ஸ சக்கு²ஸோதகா⁴னவஸேன. தம் பன த⁴ம்மஹத³யவிப⁴ங்க³பாளியா விருஜ்ஜ²தி. தம் பரதோ ஆவி ப⁴விஸ்ஸதி. ரூபாவசரானம் பன சக்கு²ஸோதவத்து²ஜீவிதவஸேன சத்தாரி ஸந்ததிஸீஸானீதி இதரேஸம் வஸேன ஸந்ததிஸீஸஹானி வேதி³தப்³பா³.

தேஸந்தி பஞ்சன்னம் க²ந்தா⁴னம். வத்து²பா⁴வேனாதி விசாரணாய அதி⁴ட்டா²னபா⁴வேன. படிஸந்தி⁴யம் உப்பன்னா பவத்தா பஞ்சக்க²ந்தா⁴தி படிஸந்தி⁴க்க²ணே பவத்திக்க²ணே ச பஞ்சக்க²ந்தே⁴ த³ஸ்ஸேதி. பு⁴ம்மனித்³தே³ஸோதி ‘‘பஞ்சஸு க²ந்தே⁴ஸூ’’தி அயம் பு⁴ம்மனித்³தே³ஸோ. அஞ்ஞதா²தி நித்³தா⁴ரணே அனதி⁴ப்பேதே. ‘‘பா⁴வேனபா⁴வலக்க²ணத்தே²’’தி இத³ம் விஸயாதி³அத்தா²னம் இதா⁴ஸம்ப⁴வதோ வுத்தம். உப⁴யந்தி ரூபாரூபம். ரூபாரூபஸந்ததிந்தி ரூபஸமுட்டா²பகம் ரூபஸந்ததிம் அரூபஸந்ததிஞ்ச. ‘‘வத்து² உப்பாத³க்க²ணே து³ப்³ப³லம் ஹோதீ’’தி இத³ம் ந படிஸந்தி⁴க்க²ணம் ஏவ, நாபி வத்து²ரூபம் ஏவ ஸந்தா⁴ய வுத்தந்தி த³ஸ்ஸேந்தோ ஆஹ ‘‘ஸப்³ப³ரூபானம் உப்பாத³க்க²ணே து³ப்³ப³லதம் ஸந்தா⁴ய வுத்த’’ந்தி. ‘‘ததா³ ஹீ’’திஆதி³ யதா²வுத்தஸ்ஸ அத்த²ஸ்ஸ காரணவசனம். தத்த² தந்தி ரூபம். ‘‘கம்மக்கி²த்தத்தா’’தி இத³ம் ந கம்மஜதாமத்தம் ஸந்தா⁴ய வுத்தம், அத² கோ² கம்மஜஸ்ஸ பட²முப்பத்தியம் அபதிட்டி²ததம் ஸந்தா⁴யாதி த³ஸ்ஸேந்தோ ‘‘ஸதிபீ’’திஆதி³மாஹ. ததோ பரந்தி ததோ படிஸந்தி⁴தோ பரம். ஸதி³ஸஸந்தானே யதா² பதிட்டி²தம், ந ததா² விஸதி³ஸஸந்தானேதி ஆஹ ‘‘ஸமானஸந்ததிய’’ந்தி.

அங்க³பா⁴வந்தி காரணபா⁴வம். தேனேவாஹ ‘‘ஸஹாயபா⁴வ’’ந்தி. தேஸம் த⁴ம்மானந்தி யேஹி ஸத்³தி⁴ம் உப்பன்னம், தேஸம் படிஸந்தி⁴யம் சித்தசேதஸிகத⁴ம்மானம். ததா³தி டி²திக்க²ணே ப⁴ங்க³க்க²ணே ச ரூபுப்பாத³னமேவ நத்தி². அனந்தராதி³பச்சயலாபே⁴ன உப்பாத³க்க²ணே ஏவ சித்தஸ்ஸ ப³லவபா⁴வோ, ந இதரத்ர. தேனாஹ ‘‘யதா³ ச ரூபுப்பாத³னம், ததா³ உப்பாத³க்க²ணே’’தி.

யேஹாகாரேஹீதி ஆஹாரிந்த்³ரியபச்சயாதி³ஆகாரேஹி. யதா²ஸம்ப⁴வம் பச்சயா ஹோந்தீதி ப²ஸ்ஸாத³யோ ஆஹாராதி³வஸேன யதா²ரஹம் பச்சயா ஹோந்தி. வுத்தஞ்ஹேதம் பட்டா²னே ‘‘படிஸந்தி⁴க்க²ணே விபாகாப்³யாகதா ஆஹாரா ஸம்பயுத்தகானம் க²ந்தா⁴னம், கடத்தா ச ரூபானம் ஆஹாரபச்சயேன பச்சயோ’’திஆதி³ (பட்டா². 1.1.429).

சுதிசித்தேன ஸத்³தி⁴ம் உப்பஜ்ஜமானம், சுதிசித்தேன வா காரணபூ⁴தேன உப்பஜ்ஜமானம். ததோ புரிமதரேஹி உப்பஜ்ஜமானம் வியாதி யதா² சுதிசித்ததோ ஆஸன்னேஹி புரிமதரேஹி உப்பஜ்ஜமானம் ரூபம் ப⁴வந்தரே ந உப்பஜ்ஜதி, ஏவம் சுதிசித்தேன உப்பஜ்ஜமானம்பி அனுபச்சி²ன்னேபி வட்டமூலேதி அகாரணம் வட்டமூலாவூபஸமோ சுதிசித்தஸ்ஸ ரூபுப்பாத³னேதி த³ஸ்ஸேதி.

அரூபஸ்ஸாதி ஆருப்பஸ்ஸ.

உதுனாதி படிஸந்தி⁴சித்தஸ்ஸ டி²திக்க²ணே உப்பன்னேன உதுனா. ஸமுட்டி²தே ரூபேதி படிஸந்தி⁴சித்தஸ்ஸ ப⁴ங்க³க்க²ணே ரூபே ஸமுட்டி²தே படிஸந்தி⁴அனந்தரம் பட²மப⁴வங்க³சித்தம் ரூபம் ஸமுட்டா²பேதி. உப்பாத³னிரோத⁴க்க²ணாதி யதா²வுத்தேஸு ஸோளஸஸு சித்தேஸு ஆதி³சித்தஸ்ஸ உப்பாத³க்க²ணோ, ஸோளஸமசித்தஸ்ஸ நிரோத⁴க்க²ணோ சாதி வத³ந்தி, ரூபஸ்ஸேவ பன உப்பாத³னிரோத⁴க்க²ணா வேதி³தப்³பா³.

த⁴ரமானக்க²ணே ஏவாதி தஸ்ஸ உதுனோ விஜ்ஜமானக்க²ணே ஏவ யதி³ க³ஹிதா, ‘‘ஸோளஸசித்தக்க²ணாயுகம் ரூப’’ந்தி வுத்தம் ஹோதி ஸோளஸஹேவ சித்தேஹி தஸ்ஸ த⁴ரமானதாய பரிச்சி²ன்னத்தா. உப்பாத³க்க²ணம் அக்³க³ஹேத்வாதி உதுனோ த⁴ரமானக்க²ணே உப்பாத³க்க²ணம் அக்³க³ஹேத்வா நிரோத⁴க்க²ணோ அத² க³ஹிதோ, ‘‘ஸத்தரஸசித்தக்க²ணாயுகம்ரூப’’ந்தி வுத்தம் ஹோதி உப்பாத³க்க²ணஸஹிதேன ச ஏகஸ்ஸ சித்தக்க²ணஸ்ஸ க³ஹிதத்தா. ‘‘அதி⁴கஸோளஸசித்தக்க²ணாயுக’’ந்தி வுத்தம் ஹோதி நிரோத⁴க்க²ணஸ்ஸ ப³ஹிகதத்தா.

ஏவம் உப்பாத³னிரோத⁴க்க²ணேஸு க³ஹிதேஸு அக்³க³ஹிதேஸு ச ஸோளஸஸத்தரஸசித்தக்க²ணாயுகதா, ததோ அதி⁴கசித்தக்க²ணாயுகதா ச ஸியாதி த³ஸ்ஸேத்வா இதா³னி தத்த² டி²தபக்க²ம் த³ஸ்ஸேந்தோ ‘‘யஸ்மா பனா’’திஆதி³மாஹ. தத்த² தஸ்ஸ த⁴ரமானக்க²ணே உப்பன்னேஸூதி தஸ்ஸ உதுனோ த⁴ரமானக்க²ணே உப்பன்னேஸு ஸோளஸஸு சித்தேஸு படிஸந்தி⁴பி யஸ்மா க³ஹிதா, தஸ்மா உதுனோ உப்பாத³க்க²ணோ த⁴ரமானக்க²ணே க³ஹிதோதி நிரோத⁴க்க²ணே அக்³க³ஹிதே ‘‘ரூபே த⁴ரந்தேயேவ ஸோளஸ சித்தானி உப்பஜ்ஜித்வா நிருஜ்ஜ²ந்தி, தம் பன ஸத்தரஸமேன சித்தேன ஸத்³தி⁴ம் நிருஜ்ஜ²தீ’’தி (விப⁴. அட்ட². 26 பகிண்ணககதா²) ஏவம் அட்ட²கதா²யம் வக்க²மானா அதி⁴கஸோளஸசித்தக்க²ணாயுகதா அதி⁴ப்பேதா. க³ஹிதே வா நிரோத⁴க்க²ணே ஸோளஸசித்தக்க²ணாயுகதா அதி⁴ப்பேதாதி ஸம்ப³ந்தோ⁴. ஏத்த² ச ‘‘அதி⁴கஸோளஸசித்தக்க²ணாயுகதா’’தி இத³ம் படிஸந்தி⁴சித்தஸ்ஸ உப்பாத³க்க²ணோ க³ஹிதோதி கத்வா வுத்தம். யஸ்மா பன படிச்சஸமுப்பாத³விப⁴ங்க³வண்ணனாயம் ‘‘த்³வே ப⁴வங்கா³னி, ஆவஜ்ஜனம், த³ஸ்ஸனம், ஸம்படிச்ச²னம், ஸந்தீரணம், வோட்ட²ப்³ப³னம், பஞ்ச ஜவனானி, த்³வே ததா³ரம்மணானி, ஏகம் சுதிசித்தந்தி பஞ்சத³ஸ சித்தக்க²ணா அதீதா ஹோந்தி, அதா²வஸேஸஏகசித்தக்க²ணாயுகே’’தி (விப⁴. அட்ட². 227), ததா² ததா³ரம்மணபரியோஸானானி, ‘‘ஏகம் சுதிசித்தம், தத³வஸானே தஸ்மிஞ்ஞேவ ஏகசித்தக்க²ணட்டி²திகே ஆரம்மணே படிஸந்தி⁴சித்தம் உப்பஜ்ஜதீ’’தி (விப⁴. அட்ட². 227) ச வக்க²தி. தஸ்மா ரூபஸ்ஸ ஸோளஸசித்தக்க²ணாயுகதாயபி அத்த²ஸித்³தி⁴ ஹோதியேவ. தேனாஹ ‘‘ஸோளஸசித்தக்க²ணாயுகதா அதி⁴ப்பேதா’’தி. ததா²பி உப்பஜ்ஜித்வா ப⁴வங்க³சலனஸ்ஸ பச்சயோ ஹோதி, ந உப்பஜ்ஜமானமேவாதி ஸத்தரஸசித்தக்க²ணாயுகதா வேதி³தப்³பா³.

ஓஜாய ஸபா⁴வஸுகு²மதா உபாதா³ரூபபா⁴வதோ. ஏத்த² ச மாதரா அஜ்ஜோ²ஹடா ஓஜா பா³ஹிரப்³ப⁴ஞ்ஜனம் விய க³ப்³ப⁴மல்லினா தஸ்மிம் ஸந்தானே ஓஜட்ட²மகரூபுப்பத்தியா பச்சயோ ஹோதி. ஆஹாரஸமுட்டா²னரூபபவேணியா ஓஜாய விய ஸேஸதிஸந்ததிஓஜாய ரூபுப்பாத³னந்தி உத³ரியே ஓஜா ரூபம் ந ஸமுட்டா²பேதி உதுஸமுட்டா²னபா⁴வதோ, உபாதி³ன்னகட்டா²னே ஏவ பன ஸமுட்டா²பேதி, ரஸஹரணீஹி க³ந்த்வா காயானுஸடந்தி வேதி³தப்³ப³ம்.

சித்தஞ்சேவாதி ஏத்த² ச-ஸத்³தே³ன படியோகீ³னம் கம்மமேவ ஸமுச்சினோதி, ந சித்தேன ஸம்பயுத்தத⁴ம்மேதி கத்வா ஆஹ ‘‘சித்தஸ்ஸ புப்³ப³ங்க³மதாய வுத்த’’ந்தி. ‘‘சித்துப்பாத³ம் க³ண்ஹாதி ‘சித்தம் உப்பன்னம் ஹோதீ’திஆதீ³ஸு (த⁴. ஸ. 1) விய, ந கம்மசேதனம் விய ஏகத⁴ம்மமேவா’’தி வுத்தே ‘‘யதா² சித்தஸமுட்டா²னரூபஸ்ஸ ஹேதுஆத³யோ சித்தஸம்பயுத்தத⁴ம்மாபி ஸமுட்டா²பகாவ, ஏவம் கம்மஸமுட்டா²னரூபஸ்ஸ கம்மஸம்பயுத்தாபீ’’தி சோத³னம் ஸமுட்டா²பேத்வா தஸ்ஸ பரிஹாரம் வத்தும் ‘‘கம்மஸமுட்டா²னஞ்சா’’திஆதி³மாஹ.

ரூபஸ்ஸாதி ரூபக்க²ணஸ்ஸ, ரூபஸ்ஸ வா அத்³து⁴னோ. நயத³ஸ்ஸனமத்தம் த³ட்ட²ப்³ப³ம் படிஸந்தி⁴க்க²ணே ஏவ ரூபாரூபத⁴ம்மானம் ஏகக்க²ணே பாதுபா⁴வோதி இமஸ்ஸ அத்த²ஸ்ஸ அனதி⁴ப்பேதத்தா. தேனேவாஹ ‘‘ததோ பரம்பி ரூபாரூபானம் ஸஹுப்பத்திஸப்³பா⁴வதோ’’தி. யதா² ச ‘‘படிஸந்தி⁴க்க²ணே ஏவா’’தி நியமோ ந க³ஹேதப்³போ³, ஏவம் ‘‘ஏகக்க²ணே ஏவ பாதுபா⁴வோ’’திபி நியமோ ந க³ஹேதப்³போ³தி த³ஸ்ஸேந்தோ ‘‘ந பனேத’’ந்திஆதி³மாஹ. தம்தீ³பனத்த²மேவாதி அஸமானகாலதாதீ³பனத்த²மேவ, ந ஸஹுப்பாத³தீ³பனத்த²ம். அத்³தா⁴னபரிச்சே²த³கதா² ஹி அயந்தி.

யதி³ ஏவந்தி யதா² ப²லபத்தானி, ஏவம் ரூபாரூபத⁴ம்மா யதி³ த³ந்த⁴லஹுபரிவத்தினோ. அஸமானத்³த⁴த்தாதி அதுல்யகாலத்தா. நிச்சி²த்³தே³ஸூதி நிப்³பி³வரேஸு. தேன நிரந்தரப்பவத்திம் ஏவ விபா⁴வேதி. அயந்தி அத்³தா⁴னபரிச்சே²த³கதா². சித்தஜரூபாதீ³னம் ந ததா² நிரந்தரபா⁴வேன பவத்தி, யதா² கம்மஜரூபானந்தி ஆஹ ‘‘கம்மஜரூபப்பவத்திம் ஸந்தா⁴யா’’தி. கம்மஜரூபானம் வா இதரேஸம் மூலபா⁴வதோ பதா⁴னந்தி ‘‘கம்மஜரூபப்பவத்திம் ஸந்தா⁴யா’’தி வுத்தம். அசித்துப்பாத³கத்தா அப்³யாப³ஜ்ஜ²தாய நிரோத⁴ஸமாபத்தியா நிப்³பா³னபடிபா⁴க³தா வேதி³தப்³பா³. பதே³ பத³ம் அக்கமித்வாதி லகுண்ட³கபாத³தாய அத்தனோ அக்கந்தபத³ஸமீபே பத³ம் நிக்கி²பித்வா. யோ ஹி ஸீக⁴பத³விக்கமோ லகுண்ட³கபாதோ³, ஸோ இதா⁴தி⁴ப்பேதோதி ஆஹ ‘‘லஹும் லஹும் அக்கமித்வாதி அத்தோ²’’தி. ஸஹேவ நிருஜ்ஜ²ந்தீதி ரூபம் கம்மஜமிதா⁴தி⁴ப்பேதந்தி கத்வா வுத்தம். உதுஜம் பன சுதிதோ உத்³த⁴ம்பி பவத்ததி ஏவ. புப்³பே³ வுத்தந்தி ‘‘ரூபஸ்ஸ ஸத்தரஸசித்தக்க²ணா, அரூபஸ்ஸ ததோ ஏகபா⁴கோ³’’தி (விப⁴. மூலடீ. 20 பகிண்ணககதா²வண்ணனா) ஏவம் வுத்தம் அத்³தா⁴னப்பகாரம்.

ஏகுப்பாத³தோதி ஸமானுப்பாத³தோ. ஸமானத்தோ² ஹி அயம் ஏக-ஸத்³தோ³. ஏகோ த³ட்ட²ப்³பா³காரோதி ஏகோ ஞாதபரிஞ்ஞாய பஸ்ஸிதப்³பா³காரோ. ஏவஞ்ஹி ஸோளஸாகாரா ஸியும், இதரதா² வீஸதி, ததோ அதி⁴கா வா ஏதே ஆகாரா ப⁴வேய்யும். தஸ்ஸாதி பச்சி²மகம்மஜஸ்ஸ. ஹேட்டா² ஸோளஸகேதி பரியோஸானஸோளஸகஸ்ஸ அனந்தராதீதஸோளஸகே. பச்சி²மஸ்ஸாதி தத்த² பச்சி²மசித்தஸ்ஸ. நானானிரோத⁴பா⁴வம் விய ஏகுப்பாத³பா⁴வம்பி பச்சி²மகம்மஜஸ்ஸ ட²பனே காரணம் அனிச்ச²ந்தோ ‘‘யதி³ பனா’’தி ஸாஸங்கம் வத³தி. ‘‘ஸப்³ப³ம்பீ’’திஆதி³னா தத்த² அதிப்பஸங்க³ம் த³ஸ்ஸேதி. வஜ்ஜேதப்³ப³ம் நானுப்பாத³ம் ஏகனிரோத⁴ம். க³ஹேதப்³ப³ம் ஏகுப்பாத³னானானிரோத⁴ம். உப⁴யம்பி ததா³ நத்தி² அனுப்பஜ்ஜனதோ. தேனேவாஹ ‘‘கம்மஜரூபஸ்ஸ அனுப்பத்திதோ’’தி. ததோ புப்³பே³தி பச்சி²மகம்மஜரூபுப்பஜ்ஜனதோ ஓரம். அஞ்ஞஸ்ஸாதி யஸ்ஸ சித்தஸ்ஸ உப்பாத³க்க²ணே உப்பன்னம், ததோ அஞ்ஞஸ்ஸ சித்தஸ்ஸ. டி²திக்க²ணே உப்பன்னஸ்ஸ ஏகுப்பாத³தா, ப⁴ங்க³க்க²ணே உப்பன்னஸ்ஸ நானானிரோத⁴தா ச நத்தீ²தி ஆஹ ‘‘டி²திப⁴ங்க³க்க²ணேஸு உப்பன்னரூபானி வஜ்ஜேத்வா’’தி. தேனாதி ரூபேன. ‘‘ஸங்க²லிகஸ்ஸ விய ஸம்ப³ந்தோ⁴’’தி ஏதேன அவிச்சி²ன்னஸம்ப³ந்தோ⁴ இத⁴ ‘‘பவேணீ’’தி அதி⁴ப்பேதோதி த³ஸ்ஸேதி. அஞ்ஞதா²தி விச்சி²ஜ்ஜமானம்பி க³ஹேத்வா ‘‘பவேணீ’’தி வுச்சமானே. ந ஹி ரூபத⁴ம்மானம் அரூபத⁴ம்மானம் விய அனந்தரபச்சயபா⁴வோ அத்தீ²தி ரூபத⁴ம்மானம் ப⁴ங்க³க்க²ணே உப்பன்னரூபத⁴ம்மே அக்³க³ஹேத்வா ‘‘அட்ட²சத்தாலீஸா’’தி வுத்தம். தேஸம் பன க³ஹணே ஏகூனபஞ்ஞாஸாவ ஸியாதி ஆஹ ‘‘ஏகூனபஞ்ஞாஸகம்மஜியவசனம் கத்தப்³ப³ம் ஸியா’’தி.

ஸுதீ³பனத்தாதி ஸுக²தீ³பனத்தா, நயத³ஸ்ஸனபா⁴வேன வா ஸுட்டு² தீ³பனத்தா. தேனேவாஹ ‘‘ஏதேன ஹி நயேனா’’திஆதி³. தத்த² தந்தி ரூபம். தேனாதி ரூபேன. உப⁴யத்தா²தி பச்சி²மகம்மஜரூபப்பவத்தியம், ததோ புப்³பே³ ச. அஞ்ஞஸ்ஸாதி ஏகஸ்ஸ சித்தஸ்ஸ டி²திக்க²ணே உப்பஜ்ஜித்வா ததோ அஞ்ஞஸ்ஸ சித்தஸ்ஸ. தஸ்ஸாதி ரூபஸ்ஸ. ஏத்த² ச பச்சி²மகம்மஜரூபப்பவத்தியம் நிருஜ்ஜ²னகந்தி வுத்தம் ததோ புரேதரப்பவத்தம் ரூபம் வேதி³தப்³ப³ம். சதுஸந்ததிகரூபேனாதிஆதி³ யதா²வுத்தஸங்க³ஹக³மனத³ஸ்ஸனம். ஏத்தா²தி ஏதஸ்மிம் நானுப்பாதே³கனிரோத⁴தாதீ³பனே. டி²திக்க²ணேதி அரூபஸ்ஸ ரூபஸ்ஸ ச டி²திக்க²ணே உப்பன்னஸ்ஸ ரூபஸ்ஸ ச அரூபஸ்ஸ ச த³ஸ்ஸிதத்தா. அத³ஸ்ஸிதஸ்ஸாதி யதா² ஏவ ஏத்த², ஏவம் தத்த² விப⁴ஜித்வா அத³ஸ்ஸிதஸ்ஸ. கஸ்மா பனேத்த² பச்சி²மகம்மஜேன தீ³பனாயம் ஸமதிம்ஸகம்மஜரூபக்³க³ஹணம் கதந்தி ஆஹ ‘‘ஸமதிம்ஸ…பே… யோஜித’’ந்தி. ததோ கம்மதோ ஜாதா தம்கம்மஜா, தேஸு. ஸங்க²ரோதீதி ஸங்கா²ரோ, ஜீவிதஞ்ச தம் ஸங்கா²ரோ சாதி ஜீவிதஸங்கா²ரோ, ஆயு. ஜீவிதேன ஸங்க²ரீயந்தீதி ஜீவிதஸங்கா²ரா, உஸ்மாத³யோ.

அஞ்ஞஸ்ஸ உப்பாத³க்க²ணேதி யஸ்ஸ சித்தஸ்ஸ உப்பாத³க்க²ணே உப்பன்னம் ரூபம் அஞ்ஞஸ்ஸ ததோ ஸத்தரஸமஸ்ஸ உப்பாத³க்க²ணே, டி²திக்க²ணே உப்பன்னம் அஞ்ஞஸ்ஸ டி²திக்க²ணேதி ஸம்ப³ந்தோ⁴. ‘‘வுத்தந்தி அதி⁴ப்பாயோ’’தி இத³ம் பாளியா விருஜ்ஜ²ந்தம்பி அட்ட²கதா²யம் ஆக³தபா⁴வத³ஸ்ஸனத்த²ம் வுத்தந்தி அயமேத்த² அதி⁴ப்பாயோதி அத்தோ². கஸ்மாதி சித்தஸமுட்டா²னரூபம் ஸந்தா⁴ய பாளி பவத்தா, அட்ட²கதா²யம் பன கம்மஜரூபந்தி ஸா தாய கேன காரணேன விருஜ்ஜ²தீதி ஆஹ ‘‘சது…பே… ப⁴விதப்³ப³த்தா’’தி, நிப்ப²ன்னஸ்ஸாதி அதி⁴ப்பாயோ. தேனாஹ அட்ட²கதா²யம் ‘‘யோ சாயம் சித்தஸமுட்டா²னஸ்ஸ…பே… கம்மாதி³ஸமுட்டா²னஸ்ஸாபி அயமேவ க²ணனியமோ’’தி (விப⁴. அட்ட². 26 பகிண்ணககதா²). ஏதேஹீதி யதா²னீதோ யமகபாடோ², ‘‘காயஸங்கா²ரோ சித்தஸமுட்டா²னோ’’திஆதி³கோ அட்ட²கதா²பதே³ஸோதி ஏதேஹி. நத்தி²யேவ ஏகுப்பாத³ஏகனிரோத⁴தீ³பனதோதி அதி⁴ப்பாயோ. தேன ஹி வுத்தம் ‘‘யேன சித்தேன ஸத்³தி⁴ம் உப்பஜ்ஜதி, ததோ பட்டா²ய ஸத்தரஸமேன ஸத்³தி⁴ம் நிருஜ்ஜ²தீ’’திஆதி³.

புன ‘‘ஏதேஹீ’’தி இமினா ஏகுப்பாத³னானானிரோத⁴னானுப்பாத³ஏகனிரோத⁴தீ³பனவஸேன பவத்தா அட்ட²கதா²பதே³ஸா க³ஹிதாதி வேதி³தப்³ப³ம், உப⁴யத்தா²பி வா ஏதேஹி ஆசரியேஹீதி அத்தோ². ததியோ பா⁴கோ³, தேன அதி⁴கா ஸோளஸசித்தக்க²ணாயுகதா ததிய…பே… யுகதா வுத்தாதி ஸம்ப³ந்தோ⁴. ததிய பா⁴கோ³தி ச உப்பாத³ட்டி²திக்க²ணே உபாதா³ய ப⁴ங்க³க்க²ணோ அதி⁴ப்பேதோ. யஸ்மிம் ஏகாத³ஸ சித்தக்க²ணா அதீதா, அவஸேஸபஞ்சசித்தக்க²ணாயுகே, யஸ்மிம் பஞ்சத³ஸ சித்தக்க²ணா அதீதா, அவஸேஸஏகசித்தக்க²ணாயுகே தஸ்மிம்யேவ ஆரம்மணேதி யோஜேதப்³ப³ம். உப⁴யஞ்சேதம் யதா²க்கமம் மனோத்³வாரே பஞ்சத்³வாரே ச ஆபாத²க³தம் வேதி³தப்³ப³ம். ந கோ² பனேவம் ஸக்கா விஞ்ஞாதும் ஏகசித்தக்க²ணாதீதம் ஆரம்மணம் ஸந்தா⁴ய படிச்சஸமுப்பாத³விப⁴ங்க³ட்ட²கதா²யம் (விப⁴. அட்ட². 227) ததா² வுத்தந்தி த³ஸ்ஸேந்தோ ‘‘ந ஹி ஸக்கா’’திஆதி³மாஹ. பஞ்சத³ஸாதி அதிரேகபஞ்சத³ஸ சித்தக்க²ணா அதீதாதி ஸம்ப³ந்தோ⁴. ‘‘தஸ்மா’’திஆதி³னா யத்த² க²ணேகதே³ஸம் அக்³க³ஹிதந்தி ந ஸக்கா வத்தும், தமேவ த³ஸ்ஸேதி. ஏவம் தாவ ந ரூபம் ஸத்தரஸசித்தக்க²ணாயுகம், நாபி ததியபா⁴கா³தி⁴கஸோளஸசித்தக்க²ணாயுகம், அத² கோ² ஸோளஸசித்தக்க²ணாயுகமேவாதி த³ஸ்ஸிதம் ஹோதி.

கஸ்மா பனேத்த² ரூபமேவ ஸமானேபி அனிச்சஸங்க²தாதி³பா⁴வே சிராயுகம் ஜாதந்தி? த³ந்த⁴பரிவத்திபா⁴வதோ. அரூபத⁴ம்மா ஹி ஸாரம்மணா சித்தபுப்³ப³ங்க³மா, தே யதா²ப³லம் அத்தனோ ஆரம்மணவிபா⁴வனவஸேன பவத்தந்தீதி தத³த்த²னிப்ப²த்திஸமனந்தரமேவ நிருஜ்ஜ²னதோ லஹுபரிவத்தினோ. தேனாஹ ப⁴க³வா, ‘‘நாஹம், பி⁴க்க²வே, அஞ்ஞம் ஏகத⁴ம்மம்பி ஸமனுபஸ்ஸாமி ஏவம் லஹுபரிவத்தம், யதி³த³ம், பி⁴க்க²வே, சித்த’’ந்தி (அ. நி. 1.48). ரூபத⁴ம்மா பன அனாரம்மணா, தே ஆரம்மணவஸேன அரூபத⁴ம்மேஹி விபா⁴வேதப்³பா³. ஸா ச நேஸம் வோஹாரானுகு³ணா விபா⁴வேதப்³ப³தா அத்தனோ த³ந்த⁴பரிவத்திதாய, தேஸஞ்ச லஹுபரிவத்திதாய ஸோளஸஹி ஸத்தரஸஹி வா சித்தக்க²ணேஹி நிப்பஜ்ஜதீதி ரூபமேவேத்த² சிராயுகம் ஜாதம். கிஞ்ச – லஹுவிஞ்ஞாணவிஸயஸந்ததிமத்தாதீ⁴னவுத்திதாய திண்ணம் க²ந்தா⁴னம், ஆரம்மணூபலத்³தி⁴மத்தபா⁴வதோ விஞ்ஞாணஸ்ஸ ச லஹுபரிவத்திதா, த³ந்த⁴மஹாபூ⁴தப்பச்சயதாய பன ரூபஸ்ஸ த³ந்த⁴பரிவத்திதா. நானாதா⁴தூஸு ததா²க³தஸ்ஸேவ யதா²பூ⁴தஞாணம், தேன ச ரூபமேவ புரேஜாதபச்சயோ வுத்தோ, பச்சா²ஜாதபச்சயோ ச தஸ்ஸேவாதி ந ஏத்த² அனிச்சஸங்க²தாதி³பா⁴வஸாமஞ்ஞேன ரூபாரூபம் ஸமானாயுகம் பரிகப்பேதப்³ப³ம். வுத்தனயேன ரூபமேவ சிராயுகந்தி நிட்ட²மேத்த² க³ந்தப்³ப³ம்.

யதா² ச ரூபஸ்ஸ ஸத்தரஸசித்தக்க²ணாயுகதா, ததியபா⁴கா³தி⁴கஸோளஸசித்தக்க²ணாயுகதா வா ந ஹோதி, தம் த³ஸ்ஸேத்வா ய்வாயம் அட்ட²கதா²யம் சித்தஸ்ஸ டி²திக்க²ணே ரூபுப்பாதோ³ வுத்தோ, தத்த² டி²திக்க²ணமேவ தாவ சித்தஸ்ஸ அனனுஜானந்தோ ‘‘யோ சேத்த²…பே… விசாரேதப்³போ³’’தி வத்வா யமகே உப்பன்னஉப்பஜ்ஜமானவாராதி³பாளிம் ஆஹரந்தோ ‘‘சித்தயமகே’’திஆதி³மாஹ. தத்த² பரிபுண்ணவிஸ்ஸஜ்ஜனேதி உப⁴யம்பி யமகபத³ம் அஹாபேத்வா கதவிஸ்ஸஜ்ஜனே. உப்பாத³க்க²ணே அனாக³தஞ்சாதி உப்பாத³க்க²ணே ச சித்தம், அனாக³தஞ்ச சித்தம் ந நிருத்³த⁴ம், நிருஜ்ஜ²மானந்தி அத்தோ². டி²திக்க²ணாபா⁴வம் சித்தஸ்ஸ தீ³பேதீதி உப்பன்னஉப்பஜ்ஜமானவாராதீ³ஸு ‘‘டி²திக்க²ணே’’தி அவசனம் சித்தஸ்ஸ டி²திக்க²ணம் நாம நத்தீ²தி இமமத்த²ம் தீ³பேதி போ³தே⁴தி. ந ஹி யதா²த⁴ம்மஸாஸனே அபி⁴த⁴ம்மே லப்³ப⁴மானஸ்ஸ அவசனே காரணம் தி³ஸ்ஸதீதி அதி⁴ப்பாயோ. ந கேவலமபி⁴த⁴ம்மே அவசனமேவ சித்தஸ்ஸ டி²திக்க²ணாபா⁴வஜோதகம், அபிச கோ² ஸுத்தந்தபாளிபீதி த³ஸ்ஸேந்தோ ‘‘ஸுத்தேஸுபீ’’திஆதி³மாஹ. தத்த² அஞ்ஞத²த்தம் நாம புப்³பா³பரவிஸேஸோ. க²ணத்³வயஸமங்கி³ம் டி²தந்தி பச்சுப்பன்னஸ்ஸ டி²தபா⁴வமாஹ. அஞ்ஞத²த்தம் பன ஸந்தானேயேவ வேதி³தப்³ப³ம்.

ஏத்த² ச கேசி ‘‘யதா²பூ⁴தோ த⁴ம்மோ உப்பஜ்ஜதி, கிம் ததா²பூ⁴தோவ பி⁴ஜ்ஜதி, உதா³ஹு அஞ்ஞதா²பூ⁴தோ? யதி³ ததா²பூ⁴தோவ பி⁴ஜ்ஜதி, ந ஜரதாய ஸம்ப⁴வோ. அத² அஞ்ஞதா²பூ⁴தோ, அஞ்ஞோ ஏவ ஸோதி ஸப்³ப³தா²பி டி²திக்க²ணஸ்ஸ அபா⁴வோயேவா’’தி வத³ந்தி. தத்த² ஏகத⁴ம்மாதா⁴ரபா⁴வேபி உப்பாத³னிரோதா⁴னம் அஞ்ஞோவ உப்பாத³க்க²ணோ, அஞ்ஞோ நிரோத⁴க்க²ணோ. உப்பாதா³வத்த²ஞ்ஹி உபாதா³ய உப்பாத³க்க²ணோ, நிரோதா⁴வத்த²ம் உபாதா³ய நிரோத⁴க்க²ணோ. உப்பாதா³வத்தா²ய ச பி⁴ன்னா நிரோதா⁴வத்தா²தி ஏகஸ்மிம்யேவ ஸபா⁴வத⁴ம்மே யதா² இச்சி²தப்³பா³, அஞ்ஞதா² அஞ்ஞோவ த⁴ம்மோ உப்பஜ்ஜதி, அஞ்ஞோ த⁴ம்மோ நிருஜ்ஜ²தீதி ஆபஜ்ஜேய்ய, ஏவம் நிரோதா⁴வத்தா²ய விய நிரோதா⁴பி⁴முகா²வத்தா²யபி ப⁴விதப்³ப³ம். ஸா டி²தி, ஜரதா சாதி ஸம்படிச்சி²தப்³ப³மேதம். யதி³ ஏவம் கஸ்மா பாளியம் டி²திக்க²ணோ ந வுத்தோதி? வினேய்யஜ்ஜா²ஸயானுரோதே⁴ன நயத³ஸ்ஸனவஸேன பாளி க³தாதி வேதி³தப்³பா³. அபி⁴த⁴ம்மதே³ஸனாபி ஹி கதா³சி வினேய்யஜ்ஜா²ஸயானுரோதே⁴ன பவத்ததி. ததா² ஹி ரூபஸ்ஸ உப்பாதோ³ ‘‘உபசயோ, ஸந்ததீ’’தி பி⁴ந்தி³த்வா தே³ஸிதோ. ஹேதுஸம்பயுத்தது³காதி³தே³ஸனா சேத்த² நித³ஸ்ஸிதப்³பா³.

‘‘யஸ்ஸ வா பனா’’திஆதி³ புச்சா²வசனம். தஸ்ஸ ‘‘நோ’’தி விஸ்ஸஜ்ஜனம். ஸமுத³யஸச்சம் நிருஜ்ஜ²தீதி சித்துப்பாத³ஸ்ஸ நிரோத⁴க்க²ணோ வுத்தோ. அயமேத்த² அதி⁴ப்பாயோ – யதி³ சித்தஸ்ஸ ப⁴ங்க³க்க²ணே ரூபம் உப்பஜ்ஜேய்ய, தம் து³க்க²ஸச்சந்தி கத்வா ‘‘நோ’’தி வத்தும் ந ஸக்கா, வுத்தஞ்சேதம். தஸ்மா விஞ்ஞாயதி ‘‘சித்தஸ்ஸ நிரோத⁴க்க²ணே ரூபுப்பாதோ³ நத்தீ²’’தி. தயித³மகாரணம். அரூபலோகஞ்ஹி ஸந்தா⁴ய, சித்தஸமுட்டா²னரூபம் வா ‘‘நோ’’தி ஸக்கா வத்துந்தி. அயஞ்ஹி யமகதே³ஸனாய பகதி, யதி³த³ம் யதா²ஸம்ப⁴வயோஜனா. ஏதேன ‘‘ந ச சித்தஸமுட்டா²னரூபமேவா’’திஆதி³வசனம் படிக்கி²த்தம் த³ட்ட²ப்³ப³ம். அத² வா பச்சாஸத்திஞாயேன யம் ஸமுத³யஸச்சம் நிருஜ்ஜ²தி, தேன யம் து³க்க²ஸச்சம் உப்பாதே³தப்³ப³ம் சித்தசேதஸிகதப்படிப³த்³த⁴ரூபஸங்கா²தம், தஸ்ஸ ததா³ உப்பத்தி நத்தீ²தி ‘‘நோ’’தி விஸ்ஸஜ்ஜனம், ந ஸப்³ப³ஸ்ஸ.

ஸஹுப்பாதே³கனிரோத⁴வசனதோதி ‘‘யஸ்ஸ காயஸங்கா²ரோ நிருஜ்ஜ²தி, தஸ்ஸ சித்தஸங்கா²ரோ நிருஜ்ஜ²தீதி? ஆமந்தா’’தி (யம. 2.ஸங்கா²ரயமக.79) ஏவம் ஸஹுப்பாத³ஸஹனிரோத⁴வசனதோ. தேன வசனேனாதி ‘‘யஸ்ஸ காயஸங்கா²ரோ’’திஆதி³வசனேன. அஞ்ஞரூபானந்தி கம்மஉதுஆஹாரஜரூபானம். ஸஹுப்பாத³ஸஹனிரோதா⁴தி³கானந்தி ஏத்தா²யம் யோஜனா – அப்படிக்கி²த்தஸஹுப்பாத³ஸஹனிரோத⁴அனனுஞ்ஞாதனானுப்பாத³னானானிரோத⁴அனிவாரிதஅப்³யாகதபா⁴வானம் கம்மஜாதீ³னந்தி. ஏதேனாதி ‘‘யஸ்ஸ குஸலா த⁴ம்மா உப்பஜ்ஜந்தீ’’திஆதி³கேன (யம. 3.த⁴ம்மயமக.163) பாடே²ன, ‘‘ந சித்தஸமுட்டா²னரூபமேவா’’தி யுத்திவசனேன ச. யமகபாளிஅனுஸ்ஸரணேதி யதா²த³ஸ்ஸிதசித்தயமகபாளியா யதா²ருதவஸேனேவ அனுஸ்ஸரணே விஜ்ஜமானே. பி⁴ஜ்ஜமானதாதி சித்தஸ்ஸ பி⁴ஜ்ஜமானதா நாம நிருஜ்ஜ²மானதா டி²தியா அபா⁴வதோ. ஸஹாயபா⁴வம் நாபி க³ச்ச²தி நிஸ்ஸயத்தி²பா⁴வாதி³னா பச்சயபா⁴வாபா⁴வதோ. உப்பாத³க்க²ணே ஏவ ஹி அனந்தராதி³பச்சயலாபே⁴ன சித்தஸ்ஸ ப³லவதா. ஏவஞ்ச ஸதீதி ஏவஞ்ச உதுனாபி ப⁴வங்க³சித்தஸ்ஸ உப்பாத³க்க²ணேயேவ ரூபஸமுட்டா²பனே ஸதி. தம்சித்தக்க²ணேதி தஸ்ஸ சித்தஸ்ஸ க²ணே, க²ணத்³வயேபீதி அத்தோ². தேனேவாதி அதிலஹுபரிவத்திபா⁴வேனேவ. அத² வா தேனேவாதி த³ந்த⁴பரிவத்திகதாய ரூபஸ்ஸ ஸகலம் ஏகசித்தக்க²ணம் உப்பஜ்ஜமானபா⁴வேனேவ. தந்தி சித்தம். படிஸந்தி⁴சித்தம் ஸம்பயுத்தத⁴ம்மானம் விய ஸஹஜாதரூபத⁴ம்மானம்பி ஸஹஜாதாதி³பச்சயேன பச்சயோ ஹோதீதி ஆஹ ‘‘படிஸந்தி⁴தோ உத்³த⁴’’ந்தி. சித்தஸமுட்டா²னானம் சித்தம் ஸஹஜாதாதி³பச்சயோ ஹோதியேவாதி வுத்தம் ‘‘அசித்தஸமுட்டா²னான’’ந்தி. தத³னந்தரந்தி யேன சித்தேன ஸஹுப்பன்னம், தஸ்ஸ சித்தஸ்ஸ அனந்தரம். தந்தி ரூபம். தத³னந்தரம் சித்தந்தி ஸஹுப்பன்னசித்தானந்தரம் சித்தம். யதி³ ஏவந்தி யதி³ ஸகலம் சித்தக்க²ணம் ரூபம் உப்பஜ்ஜமானமேவ ஹோதி, சித்தஸ்ஸ உப்பாத³க்க²ணே ஏவ ரூபஸ்ஸ உப்பாதா³ரம்போ⁴தி ஆஹ ‘‘ந, சித்தனிரோத⁴க்க²ணே ரூபுப்பாதா³ரம்பா⁴பா⁴வதோ’’தி. சித்தக்க²ணேதி அத்தனா ஸஹுப்பன்னசித்தஸ்ஸ க²ணே. தந்தி ரூபம். ரூபஸமுட்டா²பனபுரேஜாதபச்சயகிச்சந்தி ரூபஸமுட்டா²பனகிச்சஞ்ச புரேஜாதபச்சயகிச்சஞ்ச. டி²திப்பத்திவிஸேஸாலாப⁴ந்தி டி²திப்பத்தியா லத்³த⁴ப்³போ³ யோ விஸேஸோ, தஸ்ஸ அலாப⁴ம். இத³ம் வுத்தந்தி ‘‘யேன ஸஹுப்பஜ்ஜதி, தம்சித்தக்க²ணே ரூபம் உப்பஜ்ஜமானமேவா’’தி இத³ம் பரியாயேன வுத்தம்.

யம் யஸ்ஸ ஸம்ப³ந்தி⁴பா⁴வேன வுத்தம், தம் தூ³ரே டி²தம்பி தேன ஸம்ப³ந்த⁴னீயந்தி ஆஹ ‘‘ததோ பரம்…பே… ஏதேன ஸஹ ஸம்ப³ந்தோ⁴’’தி. தஸ்மா ‘‘ததோ’’தி ஏத்த² தம்ஸத்³தே³ன சுதிம் பச்சாமஸதீதி வுத்தம் ‘‘சுதிதோ பரந்தி அத்தோ²’’தி.

நத்தீ²தி கத்வாதி யதி³பி யதா² அட்ட²கதா²யம் வுத்தம், ததா² ஏகுப்பாதே³கனிரோத⁴தா ரூபானம் அரூபேஹி, அரூபானஞ்ச ரூபேஹி நத்தி². யதா² ச அம்ஹேஹி வுத்தம், ததா² அத்தே²வாதி அதி⁴ப்பாயோ.

சதுத்த²ஸ்ஸ பகாரஸ்ஸ வுச்சமானத்தா ‘‘தயோ பகாரே ஆஹா’’தி வுத்தம்.

‘‘தேஸம்யேவ ரூபானம் காயவிகாரோ’’திஆதி³னா பரினிப்ப²ன்னானம் விகாராதி³பா⁴வம் த³ஸ்ஸேத்வா ‘‘ஸப்³ப³ம் பரினிப்ப²ன்னம் ஸங்க²தமேவா’’தி வத³ந்தேன பரினிப்ப²ன்னதாபரியாயோ த³ஸ்ஸிதோ. புப்³ப³ந்தாபரந்தபரிச்சி²ன்னோதி பாதுபா⁴வவித்³த⁴ம்ஸபா⁴வபரிச்சி²ன்னோ, உத³யப்³ப³யபரிச்சி²ன்னோ வா. ‘‘அயம் த³த்தோ நாம ஹோதூ’’திஆதி³னா நாமகரணம் நாமக்³க³ஹணம். ஸமாபஜ்ஜனம் நிரோத⁴ஸமாபத்தியா ஸமத²விபஸ்ஸனானுக்கமேன நாமகாயஸ்ஸ நிரோத⁴மேவ. ஆதி³-ஸத்³தே³ன ஸத்தகஸிணாதி³பஞ்ஞத்தியா பஞ்ஞாபனம் ஸங்க³ண்ஹாதி. நிப்பா²தி³யமானோதி ஸாதி⁴யமானோ.

பகிண்ணககதா²வண்ணனா நிட்டி²தா.

கமாதி³வினிச்ச²யகதா²வண்ணனா

உப்பத்திக்கமாதீ³ஸு தே³ஸனாக்கமோபி லப்³ப⁴தேவாதி ‘‘சத்தாரோ ஸதிபட்டா²னாதிஆதி³கோ தே³ஸனாக்கமோவா’’தி வுத்தம். அனுபுப்³பு³க்கம்ஸதோதி தா³னஸீலகாமாதீ³னவாதி³த³ஸ்ஸனனேக்க²ம்மகதா²னம் அனுக்கமேன உக்கட்ட²பா⁴வதோ கதா²னம் அனுபுப்³பு³க்கம்ஸதா வுத்தா. தேன உக்கம்ஸக்கமோ நாமாயம் விஸும் கமோதி த³ஸ்ஸேதி. ததா²பி தா³னாதீ³னம் தே³ஸனாக்கமாவரோத⁴னே காரணமாஹ ‘‘உப்பத்திஆதி³வவத்தா²னாபா⁴வதோ’’தி. தத்த² ஆதி³-ஸத்³தே³ன பஹானபடிபத்திபூ⁴மிக்கமே ஸங்க³ண்ஹாதி. ‘‘சக்கு²ஆதீ³னம்பி விஸயபூ⁴த’’ந்தி இமினா பஞ்சரூபிந்த்³ரியகோ³சரதா அதி⁴ப்பேதாதி ஆஹ ‘‘ஏகதே³ஸேனா’’திஆதி³. ஏகதே³ஸேனாதி பா³ஹிரோளாரிகாயதனேஹி. ஏத்தா²தி ‘‘யம் வேத³யதி, தம் ஸஞ்ஜானாதீ’’தி ஏதஸ்மிம் பதே³ வுத்தனயேன.

தம்ஸபா⁴வதானிவத்தனத்த²ந்தி அனாஸவத⁴ம்மஸபா⁴வதானிவத்தனத்த²ம். அனாஸவா க²ந்தே⁴ஸ்வேவ வுத்தாதி அத்தோ² ஸாஸவானம்பி க²ந்தே⁴ஸு வுத்தத்தா. நனு ச அனாஸவத⁴ம்மோ க²ந்தே⁴ஸு அவுத்தோபி அத்தீ²தி? ஸச்சம் அத்தி², க²ந்தா⁴தி⁴காரே க²ந்த⁴பரியாபன்னா ஏவ அனாஸவா க³ய்ஹந்தீதி நாயம் தோ³ஸோ.

யதா² ப²ஸ்ஸாத³யோ விஸேஸதோ தத³னுகு³ணவுத்திதாய ஸங்க²தாபி⁴ஸங்க²ரணஸபா⁴வாதி ஸங்கா²ரக்க²ந்தே⁴ ஸமவருத்³தா⁴, ந ஏவம் வேத³னாஸஞ்ஞாவிஞ்ஞாணானீதி ரூபத⁴ம்மா விய தானி விஸும் க²ந்த⁴பா⁴வேன வுத்தானி. ஏதேன ப²ஸ்ஸாதீ³னம் விஸும் க²ந்த⁴ஸத்³த³வசனீயதாபா⁴வோ வுத்தோதி வேதி³தப்³போ³. தேன வுத்தம் ‘‘பு²ஸனாத³யோ பனா’’திஆதி³. இதிஆதீ³னஞ்ச ஸுத்தானந்தி ஏத்த² ஆதி³-ஸத்³தே³ன ‘‘ரூபே கோ², பி⁴க்க²வே, ஸதி ரூபம் உபாதா³ய ரூபம் அபி⁴னிவிஸ்ஸ உப்பஜ்ஜந்தி ஸம்யோஜனாபி⁴னிவேஸவினிப³ந்தா⁴. வேத³னாய…பே… ஸஞ்ஞாய… ஸங்கா²ரேஸு… விஞ்ஞாணே ஸதி விஞ்ஞாணம் உபாதா³ய விஞ்ஞாணம் அபி⁴னிவிஸ்ஸ உப்பஜ்ஜந்தி ஸம்யோஜனாபி⁴னிவேஸவினிப³ந்தா⁴’’தி (ஸம். நி. 3.158), ததா² ‘‘அஹம் ரூபம், மம ரூபந்தி பரியுட்ட²ட்டா²யீ ஹோதீ’’தி (ஸம். நி. 3.1) ச ஏவமாதீ³னம் ஸுத்தபதா³னம் ஸங்க³ஹோ த³ட்ட²ப்³போ³. ஏதேனாதி அத்தனா த³ஸ்ஸிதஸுத்தேன. வக்க²மானஸுத்தவஸேன சாதி ‘‘ரூபே கோ², பி⁴க்க²வே, ஸதீ’’திஆதி³கஸ்ஸ அட்ட²கதா²யம் (விப⁴. அட்ட². 26 பகிண்ணககதா²) வக்க²மானஸ்ஸ ஸுத்தஸ்ஸ வஸேன. ‘‘பரித்தாரம்மணாதி³வஸேன ந வத்தப்³பா³’’தி ஏதேன நவத்தப்³பா³ரம்மணாபி தி³ட்டி² க²ந்தே⁴ ஏவ நிஸ்ஸாய உப்பஜ்ஜதி, பகே³வ க²ந்தா⁴ரம்மணாதி த³ஸ்ஸேதி.

வேத³னாகாரணாயாதி வேத³னாயாதனாய. சா²தா³பனதோதி ரோசாபனதோ. பா³ஹுல்லேனாதி ப³ஹுலபா⁴வேன. உபாதா³னக்க²ந்தா⁴ ஹி பா³ஹுல்லப்பவத்திகா, ந இதரே.

புடம் கத்வாதி ச ச²த்தஸதி³ஸம் புடம் ப³ந்த⁴ம் கத்வா. வத்து²ம்ஹீதி சக்கா²தி³வத்து²ம்ஹி. வட்டக³தவேத³னம் ஸந்தா⁴ய வுத்தம். ஸா ஹி இத⁴ த³ட்ட²ப்³ப³பா⁴வே டி²தா. ஊனேஹீதி வத்து²னா, கிலேஸேஹி ச ஊனேஹி.

மாயாயாதி இந்த³ஜாலாதி³மாயாய பயோகோ³ மாயாதி அதி⁴ப்பாயேனாஹ ‘‘மாயாய த³ஸ்ஸிதம் ரூபம் ‘மாயா’தி ஆஹா’’தி. வத்து²பா⁴வாதி³தோதி ஆதி³-ஸத்³தே³ன ஆரம்மணஸம்பயுத்தாதி³கே ஸங்க³ண்ஹாதி. கத்த²சீதி ரூபக்க²ந்தா⁴தி³கே. கோசி விஸேஸோதி அஸுபா⁴தி³கோவ.

தஸ்ஸாதி அஜ்ஜ²த்திகரூபஸ்ஸ. யஸ்ஸ காமராக³ப்பஹானமுகே²ன ஸப்³ப³ராக³ப்பஹானம் ஸம்ப⁴வதி, தம் ஸந்தா⁴யாஹ ‘‘காமராக³முகே²ன வா ஸப்³ப³லோப⁴ப்பஹானம் வத³தீ’’தி. யோஜேதப்³ப³ந்தி வேத³னாய ச²ந்த³ராக³ம் பஜஹந்தோ தஸ்ஸா ஸமுத³யபூ⁴தே ப²ஸ்ஸேபி ச²ந்த³ராக³ம் பஜஹதீதி யோஜேதப்³ப³ந்தி. பரிஞ்ஞத்தயஸ்ஸ யோஜனா பாகடா ஏவ.

ததோதி து³க்கு²ப்பாத³னஸுக²வினாஸனானம் அத³ஸ்ஸனதோ. பி⁴ந்த³தீதி வினாஸேதி. தந்தி மனோஸஞ்சேதனாஹாரம் ஞாததீரணபரிஞ்ஞாஹி பரிக்³க³ண்ஹாதி தீரேதி.

தம் பஜஹந்தோதி அவிஜ்ஜம் பஜஹந்தோ. பராமட்ட²ந்தி பராமாஸஸங்கா²தாய தி³ட்டி²யா நிச்சாதி³வஸேன க³ஹிதம். விஞ்ஞாணம் நிச்சதோ பஸ்ஸந்தோ தி³ட்டு²பாதா³னம் உபாதி³யதீதி அயமத்தோ² ‘‘ததே³வித³ம் விஞ்ஞாணம் ஸந்தா⁴வதி ஸம்ஸரதி, அனஞ்ஞ’’ந்திஆதி³ஸுத்தபதே³ஹி (ம. நி. 1.396) தீ³பேதப்³போ³.

கமாதி³வினிச்ச²யகதா²வண்ணனா நிட்டி²தா.

ஸுத்தந்தபா⁴ஜனீயவண்ணனா நிட்டி²தா.

2. அபி⁴த⁴ம்மபா⁴ஜனீயவண்ணனா

34. தம் வத்வாதி தம் பூ⁴மிவஸேன ஜானிதப்³ப³தம் ‘‘ஸப்³பா³பி சதுபூ⁴மிகவேத³னா’’திஆதி³னா வத்வா. ஸம்பயுத்ததோ த³ஸ்ஸிததாதீ³தி ஏத்த² ஆதி³-ஸத்³தே³ன ஹேதுஜாதிபூ⁴மிஇந்த்³ரியவத்து²ஸம்ப²ஸ்ஸஜபே⁴த³தோ த³ஸ்ஸிததம் அனவஸேஸதோ ஸங்க³ண்ஹாதி.

யதி³பி தம்-ஸத்³தோ³ புப்³பே³ வுத்தஸ்ஸ ஸாமஞ்ஞதோ படினித்³தே³ஸோ, ததா²பி அனந்தரமேவ பச்சாமஸிதும் யுத்தோ இதரத்த² அஸம்ப⁴வதோதி ஆஹ ‘‘அட்ட²…பே… யோஜனா’’தி. ‘‘அட்ட²வித⁴த்தாபா⁴வதோ’’தி இமினா தம் அஸம்ப⁴வம் த³ஸ்ஸேதி.

பூரணத்த²மேவ வுத்தோ, அபுப்³ப³தாபா⁴வதோதி அத்தோ².

க³ஹணவட்³ட⁴னவஸேனாதி க³ஹணஸ்ஸ வட்³ட⁴னவஸேன. க³ஹணந்தி சேத்த² கத²னம் த³ட்ட²ப்³ப³ம், தஸ்ஸ வட்³ட⁴னம் தஸ்மிம் தஸ்மிம் டா²னே அவுத்தஸ்ஸ கத²னம். தேனாஹ ‘‘புப்³பே³ க³ஹிததோ அஞ்ஞஸ்ஸ க³ஹணம் வட்³ட⁴ன’’ந்தி, ததோ ஏவ ச ‘‘புரிமக³ஹிதே அஞ்ஞுபசயவஸேனா’’தி வுத்தம். ‘‘வட்³ட⁴னஸத்³தோ³ சே²த³னத்தோ²’’தி இத³ம் யதா² அஸிவா ‘‘ஸிவா’’தி, தி³ட்ட²ஞ்ச ‘‘அதி³ட்ட²’’ந்தி வுச்சதி, ஏவம் த³ட்ட²ப்³ப³ம். நயனீஹரணந்தி நீயதீதி நயோ, தே³ஸனா, தஸ்ஸ நீஹரணம் பவத்தனம். வட்³ட⁴னகனயோதி யதா²வுத்தவட்³ட⁴னகவஸேன பவத்தோ தே³ஸனானயோ. அஞ்ஞே பே⁴தா³தி ஏகவித⁴சதுப்³பி³தா⁴த³யோ பே⁴தா³. யதி³ அவிஸிட்டா², கஸ்மா வுத்தாதி ஆஹ ‘‘ததா²பீ’’திஆதி³. தத்த² பஞ்ஞாப்பபே⁴த³ஜனனத்த²ந்தி த⁴ம்மவிஸயாய பபே⁴த³க³தாய பஞ்ஞாய வினேய்யானம் நிப்³ப³த்தனத்த²ம், விஜ்ஜாட்டா²னாதி³வஸேன வினேய்யானம் த⁴ம்மபடிஸம்பி⁴தா³ய உப்பாத³னத்த²ந்தி அத்தோ². அபி⁴ஞ்ஞேய்யத⁴ம்மவிபா⁴க³தாய ஸம்மஸனவாரஸ்ஸ விஸயபா⁴வதோ வுத்தம் ‘‘ஏகேகஸ்ஸ வாரஸ்ஸ க³ஹிதஸ்ஸ நிய்யானமுக²பா⁴வதோ’’தி. இதரேபி பே⁴தா³ வுத்தாதி து³வித⁴திவித⁴பே⁴தா³னம் யம் நானத்தம், தஸ்ஸ வஸேன இதரே பே⁴தா³ அனானத்தாபி யதா²வுத்தகாரணதோ வுத்தா. ‘‘ந கேவல’’ந்திஆதி³னா பே⁴தா³னம் அஞ்ஞமஞ்ஞபேக்க²தம் த³ஸ்ஸேத்வா ‘‘தஸ்மா’’திஆதி³னா தேஸம் விஸிட்ட²தம் த³ஸ்ஸேதி.

யதா² து³கமூலகாதீ³ஸு பே⁴தா³ க³ணனானுபுப்³பி³யா பவத்தா பபே⁴த³ந்தராபேக்கா², ந ஏவமேதே. ஏதே பன ஸத்தவிதா⁴தி³பே⁴தா³ பபே⁴த³ந்தரனிரபேக்கா² கேவலம் ப³ஹுவித⁴பா⁴வஸாமஞ்ஞேனேவ வுத்தாதி த³ஸ்ஸேதி ‘‘அஞ்ஞப்பபே⁴த³னிரபேக்கா²’’திஆதி³னா. து³கதிகபத³த்தா²னம் யதா²ரஹம் அபேக்கி²தப்³பா³பேக்க²கபா⁴வேன வுத்தத்தா யதா² து³கே ட²பேத்வா வுத்தா திகா தத்த² பக்கி²த்தா நாம ஜாதா, ஏவம் திகது³கபத³த்தா²னம் அபேக்கி²தப்³பா³பேக்க²கபா⁴வேன வுத்தத்தா து³கே வத்வா வுத்தேஸுபி திகேஸு தே பக்கி²த்தா நாம ஹோந்தீதி ஆஹ ‘‘பரதோ…பே… யோஜிதத்தா’’தி.

ஸமானவீதி²யந்தி ஏகவீதி²யம். சக்கு²ஸங்க⁴ட்டனாயாதி சக்கு²ரூபபடிகா⁴தேன. ஸோதி சக்கு²ரூபபடிகா⁴தோ. தது³ப்பாதி³காதி தஸ்ஸ சக்கு²ஸம்ப²ஸ்ஸஸ்ஸ உப்பாதி³கா. ஸாதி ஆவஜ்ஜனவேத³னா. நனு ச வேத³னாபச்சயோ ப²ஸ்ஸோ வுத்தோ, ந ப²ஸ்ஸபச்சயா வேத³னாதி? ந, வேத³னாஸீஸேன சித்துப்பாத³ஸ்ஸ க³ஹிதத்தாதி. தப்பயோஜனத்தாதி சக்கு²ஸம்ப²ஸ்ஸபயோஜனத்தா. பயோஜயதீதி பயோஜனம், ப²லம்.

ரூபாவசராரூபாவசரானம் விபாகானந்தி அதி⁴ப்பாயோ. தே ஹி இத⁴ அக்³க³ஹிதா. தேனேவாஹ ‘‘தேஸம் ஸயமேவ மனோத்³வாரபூ⁴தத்தா’’திஆதி³. ததோதி ப⁴வங்க³தோ. சக்கு²ஸம்ப²ஸ்ஸபச்சயாதி³குஸலாதீ³னந்தி ஏத்த² புரிமேன ஆதி³-ஸத்³தே³ன ‘‘ஸோதஸம்ப²ஸ்ஸபச்சயா’’தி ஏவமாத³யோ ஸங்க³ஹிதா, து³தியேன அகுஸலாத³யோ. ‘‘காமாவசரஅட்ட²குஸலசித்தவஸேனா’’திஆதி³னா குஸலாப்³யாகதானம்பி காமாவசரானம்யேவ யோஜிதத்தா வுத்தம் ‘‘ஸமானவீதி²யம் லப்³ப⁴மானதா அட்ட²கதா²யம் வுத்தா’’தி. வேத³னாபீதிஸனித³ஸ்ஸனத்திகவஜ்ஜானம் ஏகூனவீஸதியா திகானம் வஸேன ஏகூனவீஸதிசதுவீஸதிகா. யதி³ அஸமானவீதி²யம்பி குஸலாதீ³னம் லப்³ப⁴மானதா யோஜேதப்³பா³, அத² கஸ்மா ஸமானவீதி²யம்யேவ யோஜிதாதி ஆஹ ‘‘அட்ட²கதா²யம் பனா’’திஆதி³. தேனேவாதி அஸமானவீதி²யம் அப்படிக்கி²த்தத்தாயேவ.

சித்தஸம்ப³ந்தோ⁴தி சித்தேன ஸம்ப³ந்தோ⁴ சித்தஸம்ப³ந்த⁴ம் கத்வா சித்தஸீஸேன வேத³னாய கத²னம். திகபூ⁴மிவஸேனாதி குஸலத்திகாதி³திகவஸேன, காமாவசராதி³பூ⁴மிவஸேன ச. த்³வாரதிகவஸேனாதி சக்கா²தி³உப்பத்தித்³வாரவஸேன, குஸலத்திகாதி³திகவஸேன ச. யத்த² கத்த²சீதி தீ³பேதப்³ப³ஸ்ஸ அத்த²ஸ்ஸ விஸேஸாபா⁴வதோ ஸத்தவித⁴பே⁴தா³தீ³ஸு யத்த² கத்த²சி. ந ச த்³வாரம் அனாமட்ட²ந்தி யோஜனா. தேன ஸத்தவித⁴பே⁴த³தோ திம்ஸவித⁴பே⁴தே³ விஸேஸம் த³ஸ்ஸேதி. யதி³பி உப⁴யத்த² பூ⁴மியோ ஆக³தா, ரூபாவசராதி³பூ⁴மிஆமஸனேன பன அஸமானவீதி²யம் லப்³ப⁴மானதா த³ஸ்ஸிதாதி ஆஹ ‘‘அதிப்³யத்தா ச ஏத்த² ஸமானாஸமானவீதீ²ஸு லப்³ப⁴மானதா’’தி. ஸுக²தீ³பனானி ஹோந்தி த்³வாரபூ⁴மிஆமஸனமுகே²ன வேத³னாக்க²ந்த⁴ஸ்ஸ விப⁴த்தத்தா. ந பூ⁴மியோ அபேக்கி²த்வா ட²பிதாதி கதே²தப்³ப³பா⁴வேன பூ⁴மியோ அபேக்கி²த்வா ந ட²பிதா, பூ⁴மிவிபா⁴கே³ன ந கதி²தாதி அத்தோ². அபேக்கி²தப்³ப³ரஹிதாதி த்³வாரபூ⁴மீனம் அக்³க³ஹிதத்தா ஆகங்கி²தப்³ப³த்³வாராதி³விஸேஸரஹிதா.

‘‘உபனிஸ்ஸயகோடியா’’தி ஏத்த² நிப்பரியாயதோ பரியாயதோ ச உபனிஸ்ஸயகோடித³ஸ்ஸனமுகே²ன இதா⁴தி⁴ப்பேதஉபனிஸ்ஸயகோடிம் த³ஸ்ஸேதும் ‘‘ஸத்³த⁴ம் உபனிஸ்ஸாயா’’திஆதி³ வுத்தம். தத்த² உபனிஸ்ஸயானந்தி வேத³னாய உபனிஸ்ஸயபூ⁴தானம். த³ஸ்ஸனந்தி சக்கு²விஞ்ஞாணம், தி³ஸ்வா வா க³ஹணம். உபனிஸ்ஸயந்தபா⁴வேனாதி லாமகூபனிஸ்ஸயபா⁴வேன. யதி³ கா⁴யனாதீ³னி உபனிஸ்ஸயோ ப⁴வேய்யும், பகதூபனிஸ்ஸயானேவ ஸியும். பகதூபனிஸ்ஸயோ ச நானாவீதி²யம்யேவாதி தத³லாப⁴வசனம் இத⁴ நானாவீதி²ஜோதகந்தி த³ஸ்ஸேதி ‘‘கா⁴னாதி³த்³வாரேஸூ’’திஆதி³னா. கஸிணபரிகம்மாதீ³னந்தி கஸிணபரிகம்மஸமாபத்தினிப்³ப³த்தனவிபஸ்ஸனாவட்³ட⁴னாதீ³னம். தத³லாபோ⁴தி உபனிஸ்ஸயாலாபோ⁴, ஸோ ச கா⁴யனாதீ³ஹி பரேஸம் படிபத்தியா ஜானிதும் அஸக்குணேய்யத்தா. அந்திமப⁴விகபோ³தி⁴ஸத்தாதீ³னம் ஸவனேன வினா தம்பு²ஸனம் ஸியா மூலூபனிஸ்ஸயோதி ‘‘யேபு⁴ய்யேனா’’தி வுத்தம்.

ஸம்பன்னஜ்ஜா²ஸயோதி விவட்டூபனிஸ்ஸயஸம்பத்தியா ஸம்பன்னஜ்ஜா²ஸயோ. தேனாதி ‘‘ஏவம் சக்கு²விஞ்ஞாண’’ந்தி வசனேன. தது³பனிஸ்ஸயந்தி ததோ பரம் உப்பன்னகஸிணரூபத³ஸ்ஸனாதீ³னம் உபனிஸ்ஸயபூ⁴தம்.

தா²மக³மனம் நாம காமராகா³தீ³னம்யேவ ஆவேணிகோ ஸபா⁴வோதி ஆஹ ‘‘அப்பஹீனகாமராகா³தி³கஸ்ஸ வா’’தி. ‘‘ராகோ³ உப்பன்னோ’’திஆதி³னா இட்டா²னிட்டா²ரம்மணே ராக³படிகா⁴னம் உப்பத்திவிசாரணாவ வுத்தா, ந நேஸம் கிச்சவிஸேஸோதி கிச்சவிஸேஸேன வுத்தே த³ஸ்ஸேந்தோ ‘‘அஸமபேக்க²னாயா’’திஆதி³மாஹ. பவத்தா வேத³னாதி அத்தோ². பகாரந்தரேனாதி சக்கு²ஸம்ப²ஸ்ஸபச்சயா உப்பன்னகிலேஸானம் ஸமதிக்கமனஸங்கா²தேன பகாரந்தரேன. ததா² பா⁴வனாவஸேனாதி ஏத்த² ததா²-ஸத்³தே³ன சக்கு²ஸம்ப²ஸ்ஸஸ்ஸ சதுபூ⁴மிகவேத³னாய உபனிஸ்ஸயபா⁴வோ ஏவ பகாரந்தரேன கதி²தோதி இமமேவத்த²ம் ஆகட்³ட⁴தி. பா⁴வனாயேவேத்த² பகாரந்தரம்.

ஸப்³ப³ம் ஸம்மஸனம் பா⁴வனாதி வேதி³தப்³பா³, ந நீவரணப்பஹானபரிஞ்ஞாவ.

அஞ்ஞமஞ்ஞஸ்ஸ சாதி போ²ட்ட²ப்³ப³மஹாபூ⁴தேஸு இதரீதரஸ்ஸ, ஆபோதா⁴துயா ச வஸேன.

தேஸந்தி ஜாதிஆதீ³னம், கம்மத்தே² சேதம் ஸாமிவசனம். ஸஹஜாதஸ்ஸ மனோஸம்ப²ஸ்ஸஸ்ஸ ப³லவபச்சயபா⁴வம் த³ஸ்ஸேதீதி ஸம்ப³ந்தோ⁴. தஸ்ஸ வா த³ஸ்ஸனஸ்ஸாதி தஸ்ஸ வா ஜாதிஆதி³கே ப⁴யதோ த³ஸ்ஸனவஸேன பவத்தஸ்ஸ காமாவசரஞாணஸ்ஸ.

ததே³வ அத்தனோ ப²லஸ்ஸேவ ப²லபா⁴வேனாதி ‘‘மனோஸம்ப²ஸ்ஸோ’’தி ப²ஸ்ஸஸ்ஸ காரணபா⁴வேன யம் வுத்தம், ததே³வ விஞ்ஞாணம் அத்தனோ ப²லஸ்ஸ ப²லபா⁴வேன வுத்தஸ்ஸ ப²ஸ்ஸஸ்ஸ ‘‘சக்கு²ஸம்ப²ஸ்ஸஜ’’ந்திஆதி³னா ப²லபா⁴வேன வத்தும் ந யுத்தம். ‘‘மனோஸம்ப²ஸ்ஸோ’’திஆதி³னா லப்³ப⁴மானோபி விஞ்ஞாணம் படிச்ச ப²ஸ்ஸஸ்ஸ பச்சயபா⁴வோ ஹேதுப²லஸங்கரபரிஹரணத்த²ம் ந வுத்தோதி வத்வா யதி³பி ப²ஸ்ஸோ விஞ்ஞாணஸ்ஸ பச்சயோ ஹோதி, ந பன ப²ஸ்ஸஸ்ஸ விய விஞ்ஞாணம் ஸோ தஸ்ஸ விஸேஸபச்சயோ ஹோதீதி விஞ்ஞாணஸ்ஸ சக்கு²ஸம்ப²ஸ்ஸஜாதி³தா ந வுத்தாதி த³ஸ்ஸேதும் ‘‘யஸ்மா வா’’திஆதி³ வுத்தம்.

அபி⁴த⁴ம்மபா⁴ஜனீயவண்ணனா நிட்டி²தா.

3. பஞ்ஹபுச்ச²கவண்ணனா

150. தம் தம் ஸமுதா³யந்தி தம் தம் சித்துப்பாத³ஸங்கா²தத⁴ம்மஸமுதா³யம், அனவஸேஸரூபத⁴ம்மஸமுதா³யஞ்ச. யதா²ஸம்ப⁴வந்தி சோபனம் பத்தோ ஸம்வரோ ச²ட்ட²த்³வாரே, இதரோ ச²ஸுபீதி ஏவம் யதா²ஸம்ப⁴வம். ததோதி அபி⁴ஜ்ஜா²தோ³மனஸ்ஸாதி³தோ. யதா²யோக³ந்தி யோ ஸம்வரிதப்³போ³, தத³னுரூபம்.

கத்த²சீதி தே ஏவ பரிவட்டே ஸாமஞ்ஞேன வத³தி. கத்த²சீதி வா தேஸு பரிவட்டேஸு கிஸ்மிஞ்சிபி பதே³ஸே. கிஞ்சிபி அப்பகம்பி. ஏகோவ பரிச்சே²தோ³, ந ஆயதனவிப⁴ங்கா³தீ³ஸு விய நானாதி அதி⁴ப்பாயோ.

பஞ்ஹபுச்ச²கவண்ணனா நிட்டி²தா.

க²ந்த⁴விப⁴ங்க³வண்ணனா நிட்டி²தா.