17. கு²த்³த³கவத்து²விப⁴ங்கோ³

1. ஏககமாதிகாதி³வண்ணனா

832. ‘‘தேத்திம்ஸதி திகா’’தி வுத்தம், தே பன பஞ்சதிம்ஸ. ததா² ‘‘புரிஸமலாத³யோ அட்ட² நவகா’’தி வுத்தம், தே பன ஆகா⁴தவத்து²ஆத³யோ நவ. யே ‘‘த்³வே அட்டா²ரஸகா’’திஆதி³ம்ஹி வுத்தா, தே ஏவ ‘‘இதி அதீதானி ச²த்திம்ஸா’’திஆதி³னா தயோ ச²த்திம்ஸகா கதாதி ஆஹ ‘‘ச² அட்டா²ரஸகா’’தி, த்³வாஸட்டி² பன தி³ட்டி²க³தானி அஞ்ஞத்த² வுத்தபா⁴வேனேவ இத⁴ நிக்கி²த்தானீதி ந க³ஹிதானீதி த³ட்ட²ப்³பா³னி.

ஏககமாதிகாதி³வண்ணனா நிட்டி²தா.

(1.) ஏககனித்³தே³ஸவண்ணனா

843-844. அத்தி² படிச்சம் நாமாதி யதா² ‘‘சக்கு²ஞ்ச படிச்சா’’திஆதீ³ஸு நிஸ்ஸயாதி³பச்சயபா⁴வேன படிச்சாதி வுத்தம், ந ததா² இத⁴ க²த்தியாதி³ஜாதீனம் பரமத்த²தோ அவிஜ்ஜமானானம் நிஸ்ஸயாதி³பச்சயத்தஸ்ஸ அபா⁴வா. யேஸு பன க²ந்தே⁴ஸு ஸந்தேஸு க²த்தியாதி³ஸம்முதி ஹோதி, தேஸம் அப்³போ³ச்சி²ன்னதாவ க²த்தியாதி³ஜாதியா அத்தி²தா, ஸா இத⁴ படிச்ச-ஸத்³தே³ன விபா⁴விதாதி அத்தோ². ஏகிஸ்ஸா ஸேணியாதி அஸம்பி⁴ன்னாயாதி அத்தோ².

பஞ்ஹவிஸ்ஸஜ்ஜனாதி³கிரியாஸு புரதோ கரணம் புரேக்கா²ரோ. நிக்கே²பராஸீதி நிதா⁴னராஸி. பத்த²டாகித்தினோதி வித்தி²ண்ணாகித்தினோ. ரத்தஞ்ஞுமதோ³தி புராணஞ்ஞுதாமதோ³தி வத³ந்தி. சிரரத்திஜாதேன, சிரரத்திபப்³ப³ஜிதேன வா ஜானிதப்³ப³ஸ்ஸ, ரத்தீனமேவ வா ஜானனமதோ³. உபட்டா²பகமானோதி ஆணாகரணமானோ. ஆணாகரணஞ்ஹி விசாரணம் இத⁴ ‘‘யஸோ’’தி வுத்தந்தி. பரிமண்ட³லத்தபா⁴வனிஸ்ஸிதோ மானோ பரிணாஹமதோ³. ஸரீரஸம்பத்திபாரிபூரியா மதோ³ பாரிபூரிமதோ³.

845. வத்து²னா வினாபி வத்தப்³ப³தாய அவத்து²கம், ந வத்து²னோ அபா⁴வா.

846. சித்தஸ்ஸ வோஸ்ஸஜ்ஜனந்தி சித்தஸ்ஸ ஸதிதோ முச்சனம், காயது³ச்சரிதாதீ³ஸு பக்க²ந்த³னம் வா வோஸ்ஸக்³கோ³. பதிட்டா²பா⁴வோதி குஸலகரணே அட்டா²னம், அனுட்டா²னந்தி அத்தோ². பமாத³ஸங்கா²தஸ்ஸ அத்த²ஸ்ஸ காயது³ச்சரிதே சித்தஸ்ஸ வோஸ்ஸக்³கோ³ பாணாதிபாதே மிச்சா²தி³ட்டி²யம் கோதே⁴ உபனாஹேதி ஏவமாதி³கோ பரியாயோ அபரியந்தோ, தத³த்த²தப்பரியாயப்பகாஸகோ வோஸ்ஸக்³க³னிஸ்ஸக்³கா³தி³கோ ப்³யஞ்ஜனபரியாயோ சாதி ஸப்³ப³ம் தம் ஸங்கி²பித்வா ஏவரூபோதி இத³ம் ஆகாரனித³ஸ்ஸனம் ஸப்³ப³பரியாயஸ்ஸ வத்தும் அஸக்குணேய்யத்தா கதந்தி த³ஸ்ஸேந்தோ ஆஹ ‘‘பரியந்தாபா⁴வதோ’’தி. விஸ்ஸட்டா²காரோதி ஸதியா பச்சனீகபூ⁴தே சத்தாரோ க²ந்தே⁴ த³ஸ்ஸேதி.

847. சித்தஸ்ஸ த²த்³த⁴தா ததா²பவத்தசித்தமேவாதி வத³ந்தி, மானவிஸேஸோ வா த³ட்ட²ப்³போ³. உபஸங்கமனே வந்தி³தப்³ப³ம் ஹோதீதி பரியந்தேனேவ சரதி.

848. ‘‘ஆபத்திம் ஆபன்னோஸீ’’தி வுத்தே ‘‘ஆவுஸோ, த்வம் ஆபன்னோஸீ’’திஆதி³னா தேன வுத்தம் தஸ்ஸேவ உபரி கி²பனவஸேன ‘‘படிப்ப²ரித்வா’’தி வத³ந்தி. ‘‘தஸ்மிம் நாம த³லித்³தே³, அகுஸலே வா இத³ம் கரோந்தே அஹம் கஸ்மா ந கரோமீ’’தி ஏவம் இத⁴ படிப்ப²ரணம் யுத்தம். கரணஸ்ஸ உத்தரகிரியா கரணுத்தரியம். அகுஸலபக்கோ² ஏஸாதி ஸாரம்போ⁴தி அதி⁴ப்பாயோ.

849. அதிச்ச இச்ச²தீதி அதிச்சிச்சோ², தஸ்ஸ பா⁴வோ அதிச்சிச்ச²தாதி வத்தப்³பே³ ச்சி-காரலோபம் கத்வா ‘‘அதிச்ச²தா’’தி வுத்தம். அத்ரிச்ச²தாதி ச ஸா ஏவ வுச்சதீதி. தத்ராபி நேருத்திகவிதா⁴னேன பத³ஸித்³தி⁴ வேதி³தப்³பா³. யதா²லத்³த⁴ம் வா அதிக்கமித்வா அத்ர அத்ர இச்ச²னம் அத்ரிச்ச²தா, ஸா ஏவ ர-காரஸ்ஸ த-காரம் கத்வா ‘‘அதிச்ச²தா’’தி வுத்தா.

அத்ரிச்ச²ந்தி அதிச்ச²ம், அத்ர வா இச்ச²ந்தோ. கேன? அதிலோபே⁴ன அதிலோப⁴மிச்சா²ஸங்கா²தேன அதிலோப⁴மதே³ன ச. அத்தனோ ஹிதம் அத்தாதி வுத்தம். ஹாயதி ஜீரதி, ஆதி³ண்ணோ வா அத்தா, பத்தோ வா அத்தா, நம் ஜீரதி சந்த³கின்னரிம் பத்த²யித்வா அஸிதாபூ⁴தே³வியா விஹீனோ விய.

இச்சா²ஹதஸ்ஸாதி இச்சா²ய உபத்³து³தஸ்ஸ, முத்³தி³தஸ்ஸ வா.

அதிஹீளயானோதி அவமஞ்ஞமானோ. மலகந்தி ஏவம்னாமகம் ஜனபத³ம், அப்³போ⁴காஸம் வா. கோத³ண்ட³கேனாதி குத³ண்ட³கேன ரஸ்ஸத³ண்ட³கேன. க³த்³து³லேனாதி ச வத³ந்தி. ருஹிரமக்கி²தங்கோ³தி ருஹிரஸின்னக³த்தோ.

850. ஜானந்தஸ்ஸேவ பி⁴ய்யோ பி⁴ய்யோ சோதே³ந்தோ விய ஸம்பா⁴வேதுகாமோ ஹோதி. பச்சயேதி உபாதா³னாதி³பச்சயே.

851. யே பதிரூபேன வஞ்சேந்தி, தே க³ண்டி²கா, து³ராசாரேன வா க³ண்டி²பூ⁴தா. க³ண்டி²கபுத்தா நாம க³ண்டி²கா ஏவ ஹோந்தி, தேன ஸத்³தி⁴விஹாரிகா க³ண்டி²கபா⁴வேன ‘‘தே²ரோ…பே… தீ³க⁴சங்கமே விஹரதீ’’தி வத³ந்தி.

வட்டதி ப⁴ந்தேதி அயம்பி ஏகோ பகாரோ, லாபி⁴னா ஏவ பன ஸக்கா ஞாதுந்தி அத்தனோ ஸமாபத்திலாபி⁴தம் ஸூசேதீதி அத்தோ². பஞ்சத்தயம் நாம உபரிபண்ணாஸகே து³தியஸுத்தம் (ம. நி. 3.21 ஆத³யோ). தஸ்ஸ க³ம்பீ⁴ரத்தா வத³தி ‘‘பஞ்சத்தயம் ஓலோகேந்தஸ்ஸா’’தி.

852. ஸிங்க³ந்தி ஸிங்கா³ரம். தஞ்ஹி குஸலஸ்ஸ விஜ்ஜ²னதோ ஸமாஸேவிததாய ஸீஸே பரிக்க²தம் ஸுனிக²தம் விஸாணம் விய, தி²ரத்தா ச ஸிங்க³ம் வியாதி ஸிங்க³ம், தம் பனத்த²தோ ராகோ³.

853. தேமனகரணத்தே² திந்திண-ஸத்³தோ³ த³ட்ட²ப்³போ³. கீ²யனந்தி ச யேன லோபே⁴ன பரம் மமந்தி வத³ந்தம் கீ²யதி, ஸோ வுத்தோ. கீ²யனம் ப⁴ண்ட³னந்தி ச வத³ந்தி. திந்திணந்தி வா லோலுப்பமிச்சேவ வுத்தம் ஹோதி. ஸஞ்ஞா-ஸத்³தோ³ ஹி ஏஸோ லோலுப்பவாசகோதி.

854. ஊருப்பமாணாபீதி ஏதேன மஹந்தக⁴னபா⁴வேன அபூதிதம் த³ஸ்ஸேதி. அத²வாதிஆதி³னா சீவரமண்ட³னாதீ³னம் விஸேஸனானி ‘‘இமஸ்ஸ வா பூதிகாயஸ்ஸ பா³ஹிரானம் வா பரிக்கா²ரானம் மண்ட³னா’’திஆதீ³னீதி த³ஸ்ஸேதி. சீவரேன ஹி மண்ட³னா சீவரமண்ட³னா, சீவரஸ்ஸ வா மண்ட³னா சீவரமண்ட³னா, ஏவம் பத்தமண்ட³னா ஸேனாஸனமண்ட³னா சாதி அதி⁴ப்பாயோ. ஊனட்டா²னபூரணம் ச²விராக³ஸுஸண்டா²னாதி³கரணஞ்ச சீவராதீ³ஸு காயே ச யதா²யோக³ம் யோஜேதப்³ப³ம். தத³ஹுஜாததா³ரகோ விய ஹோதீதி தா³ரகசாபல்யம் ந முஞ்சதீதி அத்தோ².

855. ஸதி³ஸா அனுரூபா ப⁴த்தி ஸபா⁴கோ³, ந ஸபா⁴கோ³ அஸபா⁴கோ³, மானத²த்³த⁴தா, விரோதோ⁴ வா. தேனஸ்ஸ மாதாதீ³ஸு வத்தனம் அஸபா⁴க³வுத்திதா. ஏவம்விதா⁴னம் மானாதி⁴கானம் அகுஸலானமித³ம் நாமம்.

856. பரிதஸ்ஸிதாதி ஸங்கம்பனா, உக்கண்டி²தஸ்ஸ வா தஸ்ஸ தஸ்ஸ தண்ஹாயனா.

857. குஸலகரணே காயஸ்ஸ அவிப்பா²ரிகதா லீனதா ஜாதிஆலஸ்யம், ந ரோக³உதுபோ⁴ஜனாதீ³ஹி காயகே³லஞ்ஞம் தந்தீ³ நாம, அத² கோ² பகதிஆலஸ்யந்தி அத்தோ². காயாலஸியந்தி நாமகாயஸ்ஸ ஆலஸியம், ததே³வ ரூபகாயஸ்ஸாபீதி த³ட்ட²ப்³ப³ம்.

858. அச்சஸனாதீ³ஹி உப்பன்னதா⁴துக்கோ²ப⁴னிமித்தம் ஆலஸியம் விஜம்பி⁴தா.

859. ப⁴த்தனிமித்தேன உப்பன்னம் ஆலஸ்யம் ப⁴த்தஸம்மதோ³.

860. இமேஹி பனாதி சித்தஸ்ஸ அகல்யதாதீ³ஹி. ஸப்³ப³த்த² கிலேஸவஸேனாதி தி²னமித்³த⁴காரணானம் ராகா³தீ³னம் வஸேனாதி த³ட்ட²ப்³ப³ம்.

861. ஸம்மாஆஜீவதோ அபேதோ கதோதி அபகதோ. ஸோ ஆஜீவுபத்³த³வேன உபத்³து³தோதி கத்வா ஆஹ ‘‘உபத்³து³தஸ்ஸாதி அத்தோ²’’தி.

திவித⁴ம்பி தம் தத்த² ஆக³தம் தஸ்ஸ நிஸ்ஸயபூ⁴தாய இமாய பாளியா த³ஸ்ஸேதுந்தி ஏவமத்தோ² த³ட்ட²ப்³போ³.

பாபணிகானீதி ஆபணதோ ச²ட்³டி³தானி. நந்தகானீதி அந்தரஹிதானி, சீரானி வா. கி³லானஸ்ஸ பச்சயபூ⁴தா பே⁴ஸஜ்ஜஸங்கா²தா ஜீவிதபரிக்கா²ரா கி³லானபச்சயபே⁴ஸஜ்ஜபரிக்கா²ரா. பூதிமுத்தந்தி புராணஸ்ஸ அபுராணஸ்ஸ ச ஸப்³ப³ஸ்ஸ கோ³முத்தஸ்ஸேதம் நாமம். பூதிபா⁴வேன ச²ட்³டி³தோஸத⁴ந்திபி கேசி.

அக³ப்³பி⁴கா ஏகத்³வாரா தீ³க⁴ஸாலா கிர உத்³த³ண்டோ³. குச்சி²தரஜபூ⁴தாய பாபிச்ச²தாய நிரத்த²ககாயவசீவிப்ப²ந்த³னிக்³க³ஹணம் கோரஜம், தம் ஏதஸ்ஸ அத்தீ²தி கோரஜிகோ, அதிவிய கோரஜிகோ கோரஜிககோரஜிகோ. அதிபரிஸங்கிதோதி கேசி. முக²ஸம்பா⁴விதோதி கோரஜிககோரஜிகாதி³பா⁴வேன பவத்தவசனேஹி அத்தனோ முக²மத்தேன அஞ்ஞேஹி ஸம்பா⁴விதோ. ஸோ ஏவரூபோ ஏவரூபதாய ஏவ அத்தானம் பரம் விய கத்வா ‘‘அயம் ஸமணோ’’திஆதி³ம் கதே²தி.

பணிதா⁴யாதி ‘‘அரஹாதி மம் ஜானந்தூ’’தி சித்தம் ட²பேத்வா, பத்தே²த்வா வா. ஆபாத²கஜ்ஜா²யீதி மனுஸ்ஸானம் ஆபாத²ட்டா²னே ஸமாதி⁴ம் ஸமாபன்னோ விய நிஸீத³ந்தோ ஆபாத²கே ஜனஸ்ஸ பாகடட்டா²னே ஜா²யீ.

அஞ்ஞம் விய கத்வா அத்தனோ ஸமீபே ப⁴ணனம் ஸாமந்தஜப்பிதம். ஆகாரஸ்ஸ ரஸ்ஸத்தம் கத்வா ‘‘அட²பனா’’தி வுத்தம். குஹனம் குஹோ, தஸ்ஸ அயனா பவத்தி குஹாயனா, குஹஸ்ஸ வா புக்³க³லஸ்ஸ அயனா க³திகிரியா குஹாயனா.

862. புட்ட²ஸ்ஸாதி ‘‘கோ திஸ்ஸோ, கோ ராஜபூஜிதோ’’தி புட்ட²ஸ்ஸ. நஹனாதி ப³ந்த⁴னா பரிவேட²னா.

863. நிமித்தேன சரந்தோ ஜீவந்தோ நிமித்தகாரகோ நேமித்திகோ, தஸ்ஸ பா⁴வோ நேமித்திகதா. அத்தனோ இச்சா²ய பகாஸனம் ஓபா⁴ஸோ. கோ பன ஸோதி? ‘‘அஜ்ஜ பி⁴க்கூ²னம் பச்சயா து³ல்லபா⁴ ஜாதா’’திஆதி³கா பச்சயபடிஸம்யுத்தகதா². இச்சி²தவத்து²ஸ்ஸ ஸமீபே கத²னம் ஸாமந்தஜப்பா.

864. ப³ஹி ச²ட்³ட³னம் உக்கே²பனா. பரபிட்டி²மம்ஸகா²த³னஸீலோ பரபிட்டி²மம்ஸிகோ, தஸ்ஸ பா⁴வோ பரபிட்டி²மம்ஸிகதா.

865. நிகத்தும் அப்பேன லாபே⁴ன ப³ஹுகம் வஞ்சேத்வா க³ஹேதும் இச்ச²னம் நிஜிகீ³ஸனம், தஸ்ஸ பா⁴வோ நிஜிகீ³ஸனதா. தஸ்ஸேவ இச்ச²னஸ்ஸ பவத்திஆகாரோ, தம்ஸஹஜாதம் வா க³வேஸனகம்மம்.

866. வண்ணஸம்பன்னம் போக்க²ரம் வண்ணபோக்க²ரந்தி உத்தரபத³லோபோ புப்³ப³பத³ஸ்ஸ த³ட்ட²ப்³போ³, வண்ணபாரிபூரீ வா வண்ணபோக்க²ரதா. ‘‘அத்த²ஜாபிகா’’தி ஏத்த² விய ஜப-ஸத்³தோ³ உப்பத்திவாசகோதி ஆஹ ‘‘பவத்தேதீ’’தி.

867. ஸேய்யஸதி³ஸமானா உன்னதிவஸேன பவத்தாதி உப⁴யத்தா²பி ‘‘மானம் ஜப்பேதீ’’தி வுத்தம்.

868. ஹீனமானோ பன ஓனதிவஸேன பவத்திதோ கேவலேன மானஸத்³தே³ன நித்³தே³ஸம் நாரஹதீதி தம்னித்³தே³ஸே ‘‘ஓமானம் ஜப்பேதீ’’தி (விப⁴. 874) வுத்தம்.

872. ராஜபோ⁴கே³ன ரட்ட²பு⁴ஞ்ஜனகோ ராஜனிஸ்ஸிதோ ரட்டி²யோ.

879. புக்³க³லம் அனாமஸித்வாதி யதா² ஸேய்யஸ்ஸ ஸேய்யமானாதி³னித்³தே³ஸேஸு ‘‘பரேஹி ஸேய்யம் அத்தானம் த³ஹதீ’’தி ஸேய்யாதி³புக்³க³லோ மானுப்பாத³கோ ஆமட்டோ², ஏவமேதஸ்ஸ ஸேய்யமானபா⁴வேபி மானுப்பாத³கபுக்³க³லவிஸேஸம் அனாமஸித்வா ‘‘பரே அதிமஞ்ஞதி’’ச்சேவ வுத்தந்தி அத்தோ². பரே அதிக்கமித்வா மஞ்ஞனஞ்ஹி யஸ்ஸ கஸ்ஸசி அதிமானோதி.

880. புரிமமானஸ்ஸ உபரிமானோ மானாதிமானோ, அதி-ஸத்³தோ³ உபரி-ஸத்³த³ஸ்ஸ அத்த²ம் வத³தீதி த³ட்ட²ப்³போ³. புரிமமானம் வா அதிக்கந்தோ மானோ மானாதிமானோ.

881. பக்கி²ஜாதீஸு வாயஸோ அந்தோ லாமகோதி கத்வா ‘‘காகஜாதி வியா’’தி வுத்தம்.

882. தே²ரோ கிர தோ³ஸசரிதோ அஹோஸி, தஸ்மா ஆதி³தோவ ‘‘தும்ஹே அகீ²ணாஸவா’’தி அவத்வா உபாயேன கதே²ஸீதி வத³ந்தி, தோ³ஸசரிதத்தா வா கி²ப்பம் ததியபத³வாரே விராக³ம் உப்பாதே³ஸீதி அதி⁴ப்பாயோ.

883. மானம் அனுக³தச்ச²ந்தோ³தி மானஸம்பயுத்தச²ந்தோ³, மானஸபா⁴வம் அனுக³தோ மானச்ச²ந்தோ³ வா.

884. ‘‘விலம்ப³ன’’ந்தி ச இத்தி²புரிஸஸம்மானனாதி³கிரியாதி³விலம்ப³னபடிஸம்யுத்தம் கத்தப்³ப³ம் த³ட்ட²ப்³ப³ம். தத்த² யுத்தமுத்தஸிலிட்ட²ம் படிபா⁴னம் விலம்ப³னபடிபா⁴னம்.

887. அமரவாத³படிஸம்யுத்தோ விதக்கோ, அத்தனோ அமரணத்தா²ய தே³வபா⁴வத்தா²ய வா விதக்கோ அமரவிதக்கோ.

888. பரேஸு அனுத்³த³யா ராக³வஸேன அனுத்³த³யகரணம் ஏதஸ்ஸாதி பரானுத்³த³யோ, தஸ்ஸ பா⁴வோ பரானுத்³த³யதா, பரேஸு வா அனுத்³த³யஸ்ஸேவ ஸஹனந்தி³தாதி³கஸ்ஸ பா⁴வோ பரானுத்³த³யதா, தாதி³ஸோ ராகோ³. தத்தா²தி பரானுத்³த³யதாய ஸம்ஸட்ட²விஹாரேன த³ஸ்ஸிதாயாதி அத்தோ² யுஜ்ஜதி.

890. அனவஞ்ஞத்திம் பத்தே²ந்தோ அனவஞ்ஞத்தத்த²மேவ காமகு³ணே ச பத்தே²தீதி ஆஹ ‘‘பஞ்சகாம…பே… நிஸ்ஸிதோ ஹுத்வா’’தி.

ஏககனித்³தே³ஸவண்ணனா நிட்டி²தா.

(2.) து³கனித்³தே³ஸவண்ணனா

891. உபனய்ஹதீதி ப³ந்த⁴தி. அ-காரோ அனந்தரத்த²வாசகோ, மரியாத³வாசகஸ்ஸ வா ஆகாரஸ்ஸ ரஸ்ஸத்தம் கத்வா ‘‘அட்ட²பனா’’தி வுத்தந்தி ‘‘அனந்தரட்ட²பனா’’திஆதி³மாஹ. தத்த² பட²முப்பன்னஸ்ஸ பவத்தாகாரோ மரியாதா³, தம் அனதிக்கமித்வா தஸ்ஸேவ த³ள்ஹீகரணவஸேன ட²பனா மரியாத³ட்ட²பனா. பகதிட்ட²பனாமத்தமேவ, விஸேஸனரஹிதாதி அத்தோ².

892. நிட்டு²ரியம் கே²ளபாதனம், நிட்டு²ரியம் விய நிட்டு²ரியம். த³ஸ்ஸேத்வாதி த³ந்தேஹி சி²ந்தி³த்வா. தேன பன த³ஸ்ஸனம் பளாஸோதி த³ஸ்ஸேதி. பளாஸஸ்ஸ ஆயனாதி யுக³க்³கா³ஹப்பவத்தி. ஸமபா⁴வத³ஹனம் ஜயோ, தஸ்ஸ ஆஹரணதோ ஆஹாரோ. து⁴ரம் ந தே³தீதி பாமோக்க²ம் ந தே³தி.

894. காயேன சேதியங்க³ணாதி³வத்தம் கரோதி ‘‘ஏவம் வத்தஸம்பன்னோ ஸத்³தோ⁴ கத²ம் காயது³ச்சரிதாதீ³னி கரிஸ்ஸதீ’’தி பரேஸம் ஞாபனத்த²ம். அதிச்சாதி அச்சயம் கத்வா. ஆஸரந்தீதி ஆக³ச்ச²ந்தி, புன படிச்சா²த³னே பவத்தந்தீதி அத்தோ². கோனாமேவம் கரோதீதி வோச்சி²ந்த³னச்சா²த³னா வா வோச்சா²த³னா.

ந ஸம்மா பா⁴ஸிதாதி யோ ந ஸம்மா பா⁴ஸதி, ஸோ ஸடோ²தி த³ஸ்ஸேதி. குச்சி² வா பிட்டி² வா ஜானிதும் ந ஸக்காதி அஸந்தகு³ணஸம்பா⁴வனேனேவ சித்தானுரூபகிரியாவிரஹதோ ‘‘ஏவம்சித்தோ ஏவம்கிரியோ’’தி ஜானிதும் ந ஸக்காதி அத்தோ².

அஜோ ஏவ அஜாமிகோ³. நேலகோதி தருணவச்சோ². யதா² ஸோ யக்கோ² தாதி³ஸம் ரூபம் த³ஸ்ஸேத்வா ‘‘அஜா’’தி ஸஞ்ஞாய ஆக³தாக³தே கா²த³தி, ஏவமயம்பி தம்தம்ஸதி³ஸகு³ணஸம்பா⁴வனேன தே தே வஞ்சேதி. தேனேதம் ஸாடே²ய்யம் மாயாதோ ப³லவதரா வஞ்சனாதி த³ட்ட²ப்³ப³ம். தேனேவ ‘‘பரிக்க²த்ததா’’தி வுத்தம்.

908. ஸக்காயதி³ட்டா²தீ³னம் அபா⁴வேபி யம் ஸம்யோஜனம் ஹோதி, தம் ப³ஹித்³தா⁴ ஸம்யோஜனதோ ப³ஹித்³தா⁴ஸம்யோஜனஸ்ஸ புக்³க³லஸ்ஸ விஸேஸனபூ⁴தம் ப³ஹித்³தா⁴ஸம்யோஜனம் நாம.

து³கனித்³தே³ஸவண்ணனா நிட்டி²தா.

(3.) திகனித்³தே³ஸவண்ணனா

909. அகுஸலமூலானேவ வட்டமூலானீதி தேஹி கதி²தேஹி வட்டமூலஸமுதா³சாரோ கதி²தோ ஹோதீதி ஆஹ ‘‘தீஹி…பே… கதி²தோ’’தி.

919. ஸஸ்ஸதோ லோகோதிஆதி³த³ஸ்ஸனமேவ ப்³ரஹ்மசரியம் மோக்க²ஸம்பாபகம் உத்தமசரியந்தி தி³ட்டி²க³திகேஹி ஸம்மதந்தி ஆஹ ‘‘தி³ட்டி²க³திகஸம்மதஸ்ஸா’’தி. ரூபாரூபாவசரவிபாகேஸு ஸாதிஸயோ ப⁴வராகோ³தி அதி⁴ப்பாயேன வுத்தம் ‘‘மஹாப்³ரஹ்மான’’ந்தி.

920. கத²ம்வித⁴ந்தி கேனாகாரேன ஸண்டி²தந்தி அத்தோ²தி கத்வா ஆஹ ‘‘ஆகாரஸண்டா²ன’’ந்தி. மானட²பனாதி ஸேய்யாதி³வஸேன மானேன ட²பனா, மானஸங்கா²தா வா ட²பனா.

921. சேதஸோ உத்ராஸோ தோ³மனஸ்ஸம், தோ³ஸோ வா, தம்ஸம்பயுத்தா வா சேதனாத³யோ.

922. தே³ஸனாஸுக²தாயாதி திண்ணம் அத்³தா⁴னம் வஸேன விசிகிச்சா²ய தே³ஸனா ஸுகா² ‘‘கங்க²தி விசிகிச்ச²தீ’’தி, ந பன ததா² மோஹேனாதி அதி⁴ப்பாயோ. வண்ணாதி³பே⁴த³ம் ஸுத்வாதி கேசி கிர வத³ந்தி ‘‘க²த்தியஜீவோ பண்டு³வண்ணோ. கஸ்மா? ஸோ ஹி புப்³ப³ண்ஹே ரமதி, புப்³ப³ண்ஹே ச சா²யா பண்டு³வண்ணா. ப்³ராஹ்மணவேஸ்ஸஸுத்³த³ஜீவா ஓதா³தபீதகாளவண்ணா. தே ஹி மஜ்ஜ²ன்ஹஸாயன்ஹரத்தீஸு ஓதா³தபீதகாளசா²யா காளதமகாலேஸு ரமந்தீ’’தி தேஸம் வண்ணபே⁴த³ம், ‘‘ப்³யாபீ பரிமண்ட³லோ’’திஆதி³னா கதே²ந்தானம் ஸண்டா²னபே⁴த³ஞ்ச ஸுத்வா.

923. புரிஸபுக்³க³லோதி பத³த்³வயம் ஏகபத³ம் கத்வா ஜானந்தானம் வஸேனாயம் ஸம்முதிகதா² பவத்தா, பத³ந்தரமேவ வா இத³ம் புக்³க³லவாசகந்தி த³ஸ்ஸேந்தோ ‘‘அயம் பனா’’திஆதி³மாஹ. அத² வா புரிஸோதி வுத்தோ ச புக்³க³லோ ஏவ, ந புரிஸிந்த்³ரியயுத்தோவாதி த³ஸ்ஸனத்த²ம்பி ‘‘புரிஸபுக்³க³லோ’’தி வுத்தந்தி வேதி³தப்³ப³ம். அட்ட²ஸு ஆபா³தே⁴ஸூதி பித்தஸேம்ஹவாதஸமுட்டா²னஉதுவிபரிணாமஜஓபக்கமிகவிஸமபரிஹாரஜஸன்னிபாதஜகம்மஸமுட்டா²னேஸு. புப்³பே³ கதந்தி புராணதரகம்மம் இச்ச²ந்தீதி உபபஜ்ஜவேத³னீயஞ்ச கிர படிக்கி²பந்தி. ஆணத்திமூலகேன வாதி யோபி ஆணாபேத்வா வத⁴ப³ந்தா⁴தி³து³க்க²ம் உப்பாதே³தி, தம்பி தம்மூலகம் ந ஹோதி, இஸ்ஸரனிம்மானமூலமேவாதி அதி⁴ப்பாயோ.

924. மோஹஸ்ஸ அனுத³ஹனம் தா³ஹகாரணதாய வுத்தம், ஸபா⁴வதோபி பன அஸம்படிவேதோ⁴ ஸம்படிவேத⁴ஸுக²ஸ்ஸ பச்சனீகபூ⁴தோ து³க்கோ² ஏவாதி அனுத³ஹனதா வேதி³தப்³பா³. ஏவஞ்ச கத்வா ‘‘உபேக்கா² வேத³னா ஞாணஸுகா² அஞ்ஞாணது³க்கா²’’தி (ம. நி. 1.465) வுத்தா.

926. புது²னிமித்தாரம்மணேஸூதி ஸுப⁴னிமித்தாதி³வஸேன புது²னிமித்தஸபா⁴வேஸு ஆரம்மணேஸு, புது²ஸபா⁴வேஸு வா ஸுப⁴னிமித்தாதி³ஆரம்மணேஸு. கோஸஜ்ஜபமாத³னித்³தே³ஸானம் ஸமானத்தேபி அவிப்பா²ரிகதாஸங்கா²தா லீனவுத்திதா கோஸஜ்ஜம், ஸதிவோஸ்ஸக்³க³ஸங்கா²தம் பமஜ்ஜனம் பமாதோ³தி அயம் விஸேஸோதி.

931. ஸக³ருவாஸந்தி ஸஓத்தப்பவாஸமாஹ, ஸஜேட்ட²கவாஸந்தி ஸஹிரிவாஸம். அனாதி³யனா அனத்³தா³ ஓவாத³அக்³க³ஹணம், அசித்தீகாரோதி அத்தோ². ஸுக்க²கட்ட²ஸ்ஸ விய அனல்லதா, அமுது³தா வா அனத்³தா³. அஸீல்யந்தி அஸுக²ஸீலதா அமுது³தா ஏவ.

934. உபாரம்போ⁴ தோ³ஸஸம்பயுத்தசித்துப்பாதோ³ ஸியா.

936. ‘‘இத⁴ பாஸாணம் கரோதீ’’திஆதி³னா ட²பனத்தே²பி கரோதி-ஸத்³தோ³ யுஜ்ஜதீதி ஆஹ ‘‘கரோதீதி ட²பேதீ’’தி. ஏத்த² சாயம் ஆவஜ்ஜனா அகுஸலானம் ஆஸன்னகாரணத்தா கு²த்³த³கவத்தூ²ஸு வுத்தாதி வேதி³தப்³பா³, தத³னுகூலகிச்சத்தா வா.

திகனித்³தே³ஸவண்ணனா நிட்டி²தா.

(4.) சதுக்கனித்³தே³ஸவண்ணனா

939. இதீதி நித³ஸ்ஸனே நிபாதோதி ஏவம்-ஸத்³தே³ன ஸமானத்தோ²தி த³ஸ்ஸேதி. ப⁴வாப⁴வஹேதூதிபீதி ஏத்த² ப⁴வந்தி ஜாயந்தி ஏதேனாதி ப⁴வோ, ஸப்பிஆதி³பே⁴ஸஜ்ஜம். ப⁴வோ ஏவ பணீததரோ அபி⁴வுத்³தோ⁴ அப⁴வோ. பா⁴வனாராமதாஅரியவம்ஸப்பஹேய்யத்தா வா புரிமதண்ஹாத்தயவஜ்ஜா ஸப்³பா³ தண்ஹா ‘‘ப⁴வாப⁴வஹேது உப்பஜ்ஜதீ’’தி வுத்தாதி வேதி³தப்³பா³.

ஏதாயாதி ச²ந்தா³தி³அக³தியா. ந க³ச்ச²ந்தீதி ந பவத்தந்தி, தம் தம் கிரியம் ந கரோந்தீதி அத்தோ². இமினாதி ச²ந்தா³தி³னா அக³திக³மனேன. ச²ந்தா³தீ³ஸு யேன நின்னோ, தேன க³மனம் யதா²னின்னக³மனம்.

‘‘ராஜா’’திஆதி³னா ராஜாதி³னிமித்தோ விய ஊமிஆதி³னிமித்தோ சித்துத்ராஸோ ஊமிஆதி³ப⁴யம், ‘‘ஊமிப⁴யந்தி கோ², பி⁴க்க²வே, கோது⁴பாயாஸஸ்ஸேதம் அதி⁴வசன’’ந்திஆதி³வசனதோ (ம. நி. 2.162; அ. நி. 4.122; இதிவு. 109) கோது⁴பாயாஸஓத³ரிகத்தபஞ்சகாமகு³ணமாதுகா³மா வா. தத்த² பஞ்சகாமகு³ணமாதுகா³மக்³க³ஹணேன தன்னிஸ்ஸிதச²ந்த³ராக³க்³க³ஹணம் வேதி³தப்³ப³ம், ஓத³ரிகத்தஞ்ச லோபோ⁴வ. உக்கே²பனீயாதி³கம்மம் வினயத³ண்ட³ம்.

‘‘அத² கோ² திம்ப³ருகோ பரிப்³பா³ஜகோ யேன ப⁴க³வா…பே… ஏதத³வோச ‘கிம் நு கோ², போ⁴ கோ³தம, ஸயம்கதம் ஸுக²து³க்க²’ந்தி? மா ஹேவம் திம்ப³ருகாதி ப⁴க³வா அவோசா’’திஆதி³னா நிதா³னவக்³கே³ (ஸம். நி. 2.18) ஆக³தத்தா ‘‘திம்ப³ருகதி³ட்டீ²’’தி வுத்தா.

சதுக்கனித்³தே³ஸவண்ணனா நிட்டி²தா.

(5.) பஞ்சகனித்³தே³ஸவண்ணனா

940. ஆக³ந்தும் பன ந தே³ந்தீதி ஆக³மனஸ்ஸ பச்சயா ந ஹோந்தீதி அத்தோ² த³ட்ட²ப்³போ³.

941. அவதே³ஹனதோதி பூரணேன மம்ஸூபசயஹேதுதாய ச உபசயனதோ. கி³ம்ஹகாலே பு⁴ஞ்ஜித்வா ஸயந்தஸ்ஸ ஸுக²ம் ஹோதீதி தம் உதுஸுக²ம் ‘‘ஸேய்யஸுக²’’ந்தி வுத்தம், ஸயனிரியாபத²ஸுக²ந்தி அத்தோ². வதந்தி து⁴தங்கா³னி. தபோதி க²ந்த⁴கவத்தானி, வீரியம் வா. ஸீலக்³க³ஹணேன க²ந்த⁴கவத்தமேது²னவிரதீனம் க³ஹிதத்தா தபப்³ரஹ்மசரியக்³க³ஹணம் ந கத்தப்³ப³ந்தி சே? ந, அஞ்ஞஸீலதோ விஸேஸேத்வா தபப்³ரஹ்மசரியானம் தே³வத்தகாரணத்தக்³க³ஹணஸ்ஸ த³ஸ்ஸனதோ, பா³ஹிரானஞ்சஸ்ஸ வினிப³ந்த⁴ஸ்ஸ பவத்தித³ஸ்ஸனதோ வா. தேஸஞ்ஹி அவிஹிம்ஸாதி³கோ³வதாதி³து³க்கரகாரிகாமேது²னவிரதியோ யதா²க்கமம் ஸீலாதீ³னி, தானி ச தே தே³வனிகாயம் பணிதா⁴ய சரந்தீதி. அஞ்ஞதா² ச ஸத்³தா⁴ருசிஆதீ³ஹி ‘‘யதோ கோ² போ⁴ அயம் அத்தா ரூபீ சாதுமஹாபூ⁴திகோ மாதாபேத்திகஸம்ப⁴வோ காயஸ்ஸ பே⁴தா³ உச்சி²ஜ்ஜதீ’’திஆதி³னா (தீ³. நி. 1.85) விகப்பேத்வா.

942. ப்³யஸனேஸு ஞாதிபோ⁴க³ரோக³ப்³யஸனக்³க³ஹணேன தம்னிமித்தா ஸோகாத³யோ க³ஹிதாதி த³ட்ட²ப்³பா³. த³ஸ்ஸனஸவனேஸு படிகூலதா த³ஸ்ஸனஸவனபடிகூலதா. ஏத்த² ச ஆதீ³னவேஹி பஞ்சஹி தேஸம் காரணபூ⁴தா அக்க²ந்தியேவ பி⁴ந்தி³த்வா கதி²தாதி வேதி³தப்³பா³, அக்க²ந்திமூலகா வா அப்பியதாதி³ஹேதுபூ⁴தா து³க்கடது³ப்³பா⁴ஸிததாதி³தோ³ஸா.

மிச்சா²ஜீவனிமித்தம் மரணகாலே உப்பன்னப⁴யம் ‘‘ஆஜீவகப⁴ய’’ந்தி வுத்தம். ‘‘ஆஜீவிகாப⁴ய’’ந்தி பன பாடே² பச்சயானுப்பத்திம் பஸ்ஸதோ ஆஜீவிகனிமித்தோ சித்துத்ராஸோதி அத்தோ² த³ட்ட²ப்³போ³. கித்திஸத்³தோ³ ஸிலோகந்தி தப்படிபக்கா² அஸிலோகம் அகித்தி. தேனாஹ ‘‘க³ரஹப⁴ய’’ந்தி.

943. உப்பிலாவிதந்தி உத³க்³க³தாஸங்கா²தோ அவூபஸமபா⁴வோ, அவூபஸமஹேதுபூ⁴தோ வா பீதியா ஆகாரோ.

பஞ்சகனித்³தே³ஸவண்ணனா நிட்டி²தா.

(6.) ச²க்கனித்³தே³ஸவண்ணனா

944. ‘‘கோத⁴னோ ஹோதி உபனாஹீ’’திஆதி³னா கோதா⁴தி³ஹேதுகா உபனாஹாத³யோ கோதா⁴தீ³னம் ஸஹாயகாரணபா⁴வேன ஸுத்தந்தே வுத்தாதி கோதா⁴த³யோ ஏவ விவாத³மூலானி, தேனேத்த² தே ஏவ வுத்தா. ஸந்தி³ட்டி²பராமஸிதா அத்தனோ தி³ட்டி²யம் அபி⁴னிவிட்ட²தா.

945. அப்பதிஸ்ஸயோதி பதிஸ்ஸயபூ⁴தேஹி க³ரூஹி விரஹிதோ. அப்பமாத³லக்க²ணந்தி ஸதிஅவிப்பவாஸம் குஸலானுயோக³ஸாதச்சம் வா.

யுத்தபயுத்ததாதி தன்னின்னதாவஸேன ஸுட்டு² யுத்ததா. க³ணஸங்க³ணிகா கிலேஸவஸேன பவத்தா ஸங்க³ணிகா. இத்தி²படிஸம்யுத்தகதா²ஸவனே இத்தி²ஸத்³த³ஸவனே ச அஸ்ஸாதோ³ ஸவனஸம்ஸக்³கோ³. இத்தி²யா கஸ்ஸசி தா³னக்³க³ஹணஸ்ஸாதோ³ பரிபோ⁴க³ஸம்ஸக்³கோ³.

946. ஸோமனஸ்ஸேன ஸத்³தி⁴ம் உபவிசரந்தீதி ஸோமனஸ்ஸுபவிசாராதி அகுஸலஸோமனஸ்ஸஸஹக³தா ரூபவிசாராத³யோ இதா⁴தி⁴ப்பேதாதி வேதி³தப்³பா³, ததா² உபேக்கு²பவிசாரா ச. தம்ஸம்பயுத்தோ வாதி ஏதேன விசாரக்³க³ஹணேன விதக்கோபி க³ஹிதோதி விதக்கப்பவத்தனேன ‘‘உபவிதக்கேதீ’’தி இத³ம்பி வுத்தம் ஹோதீதி த³ஸ்ஸேதி.

947. அஞ்ஞாணஸம்பயுத்தாதி விசிகிச்சு²த்³த⁴ச்சஸஹக³தசித்தேஸு உபேக்கா² மோஹோதி வத³ந்தி, லோப⁴ஸம்பயுத்துபேக்கா²பி பன கே³ஹஸ்ஸிதா ந ந ஹோதி.

948. அதி⁴ச்சஸமுப்பன்னிகோ ‘‘அதி⁴ச்ச ஸமுப்பன்னோ அத்தா உப்பன்னோ ப⁴விஸ்ஸதீ’’தி க³ண்ஹந்தோ ஸஸ்ஸததி³ட்டி²கோ ஹோதீதி ஏவரூபஸ்ஸ தி³ட்டி² வியாதி த³ஸ்ஸேந்தோ ‘‘அதி⁴ச்சஸமுப்பன்னிகஸ்ஸேவா’’தி ஆஹ. ந ஸோ ஜாதோதி ஏத்த² ‘‘ஜாதூ’’தி அயம் நிபாதோ உ-காரஸ்ஸ ஓ-காரம் கத்வா ஜாதோதி வுத்தோ, தேன வா ஸமானத்த²ம் நிபாதந்தரம் ஏதம் த³ட்ட²ப்³ப³ம். ஸப்³பா³ஸவதி³ட்டீ²தி ஸப்³பா³ஸவபரியாயேன ஆக³தா தி³ட்டி².

ச²க்கனித்³தே³ஸவண்ணனா நிட்டி²தா.

(7.) ஸத்தகனித்³தே³ஸவண்ணனா

951. த்³வாஸட்டி²யா தி³ட்டீ²ஸு ஸத்தகஸ்ஸ அஞ்ஞஸ்ஸ அபா⁴வா ஸத்த உச்சே²த³வாதா³ ஏவ இத⁴ ததா² அவத்வா ‘‘ஸத்த தி³ட்டீ²’’தி வுத்தா.

ஸத்தகனித்³தே³ஸவண்ணனா நிட்டி²தா.

(8.) அட்ட²கனித்³தே³ஸவண்ணனா

952. ‘‘கம்மம் கோ² மே கத்தப்³ப³ம் ப⁴விஸ்ஸதீ’’திஆதி³னா ஓஸீத³னாகாரேன பவத்தசித்துப்பாதா³ கோஸஜ்ஜகாரணானி, கோஸஜ்ஜமேவ வா கோஸஜ்ஜந்தரகாரணதாய கோஸஜ்ஜகாரணானீதி த³ட்ட²ப்³பா³னி. மாஸாசிதம் மஞ்ஞேதி ஏத்த² ஆசித-ஸத்³தோ³ திந்த-ஸத்³த³ஸ்ஸ, மஞ்ஞே-ஸத்³தோ³ ச விய-ஸத்³த³ஸ்ஸ அத்த²ம் வத³தீதி அதி⁴ப்பாயேன ‘‘திந்தமாஸோ வியா’’தி அயமத்தோ² விபா⁴விதோ, மாஸசயோ வியாதி வா அத்தோ².

957. ப²ரதீதி பு²ஸதி, க⁴ட்டேதீதி அத்தோ². அஞ்ஞேன காரணேனாதி ‘‘அஜ்ஜ தயா விகாலே பு⁴த்தம், தேன த்வம் ஆபத்திம் ஆபன்னோஸீ’’தி வுத்தோ ‘‘ஹிய்யோ மயா காலே பு⁴த்தம், தேனாஹம் அனாபன்னோ’’திஆதி³னா அஞ்ஞேன அயுத்தேன காரணேன அஞ்ஞம் யுத்தம் காரணம் படிச்சா²தே³தீதி அத்தோ². புச்சி²தத்த²தோ ப³ஹித்³தா⁴ யதா² தம் ந அல்லீயதி, ததா² கதா²ய அபனயனம் விக்கி²பனம் ப³ஹித்³தா⁴ அபனாமனா.

958. அஸஞ்ஞீவாதா³தி புக்³க³லேஹி தி³ட்டி²யோ த³ஸ்ஸேதி. யேஹி வா அபி⁴னிவேஸேஹி அஸஞ்ஞீ அத்தானம் வத³ந்தி, தே அஸஞ்ஞீவாதா³. அரூபஸமாபத்தினிமித்தந்தி ஆகாஸாதி³ம்.

அட்ட²கனித்³தே³ஸவண்ணனா நிட்டி²தா.

(9.) நவகனித்³தே³ஸவண்ணனா

960. த³ஸமஸ்ஸ அவுத்தத்தா ‘‘ஸத்தேஸு உப்பத்திவஸேனேவ கதி²தானீ’’தி வுத்தம்.

963. ஸுக²வினிச்ச²யந்தி ஸேவிதப்³பா³ஸேவிதப்³ப³ஸுக²ஸன்னிட்டா²னந்தி அத்தோ². அஜ்ஜ²த்தம் ஸுக²ந்தி ஸேவிதப்³ப³ம் நேக்க²ம்மஸுக²ம். வினிச்ச²யாதி த்³வே வினிச்ச²யாதி இத³ம் –

‘‘ஸாதம் அஸாதந்தி யமாஹு லோகே,

தமூபனிஸ்ஸாய பஹோதி ச²ந்தோ³;

ரூபேஸு தி³ஸ்வா விப⁴வம் ப⁴வஞ்ச,

வினிச்ச²யம் குப்³ப³தி ஜந்து லோகே’’தி. (ஸு. நி. 873; மஹானி. 102) –

ஏதஸ்ஸ நித்³தே³ஸே வுத்தம்.

இத⁴ வினிச்ச²யோதி வுத்தோதி இமிஸ்ஸா விப⁴ங்க³பாளியா யோ ச²ந்த³ராக³ஸ்ஸ பச்சயஸபா⁴வேன வினிச்ச²ய-ஸத்³தே³ன வுத்தோ, ஸக்கபஞ்ஹேபி (தீ³. நி. 2.357) ச²ந்த³ஸ்ஸ நிதா³னபா⁴வேன விதக்க-ஸத்³தே³ன ஸோ ஏவ ஆக³தோதி ஏவம் விதக்கஸ்ஸ வினிச்ச²யபா⁴வம் தஸ்ஸேவ இத⁴ க³ஹிததஞ்ச த³ஸ்ஸேதி. ப³லவஸன்னிட்டா²னந்தி ப³லவதியா தண்ஹாய ஆரம்மணஸ்ஸ நிட்ட²பேத்வா க³ஹணம்.

964. ஸதிபி அஞ்ஞேஸஞ்ச ஸங்க²தபா⁴வே அஹந்தி அஸ்மீதி ச ஸாதிஸயா மானஸ்ஸ ஸங்க²ததாதி கத்வா ‘‘ஸங்க²த’’ந்தி மானோ வுத்தோ. ஸேய்யாதி³வஸேன ‘‘அஹமஸ்மீ’’தி அத்தனோ ஸங்க²ரணம் வா ஸங்க²தம். ஏத்த² ‘‘ப⁴விஸ்ஸந்தீ’’திஆதி³கா பவத்தி தண்ஹாதி³ட்டீ²னம் விஸேஸவதீதி தாஸம்பி இஞ்ஜிதாதி³பா⁴வோ வுத்தோ.

நவகனித்³தே³ஸவண்ணனா நிட்டி²தா.

(10.) த³ஸகனித்³தே³ஸவண்ணனா

970. ஜாலக்கி²பஸம்விதா⁴னாதி³குஸலதாஸங்கப்பனம் உபாயசிந்தா, தஸ்ஸா மிச்சா²பா⁴வபடிச்சா²த³னபா⁴வேன பவத்தோ ததா³காரோ மோஹோ உபாயசிந்தாவஸேன உப்பன்னோதி த³ட்ட²ப்³போ³. யதா²கதே பன பாபே அனாதீ³னவத³ஸ்ஸனவஸேன பவத்தா ஸஞ்ஞா, ஸங்கப்போ வா பச்சவேக்க²ணா, தஸ்ஸாபி மிச்சா²பா⁴வபடிச்சா²த³கம் ததா³காரம், அனாதீ³னவத³ஸ்ஸனம் வா பச்சவேக்க²ணாகாரேன உப்பன்னோ மோஹோதி. விமுத்தஸஞ்ஞிதாதி அதி⁴மானஸம்பயுத்தம், தித்தி²யானம் வா அத்தனோ தி³ட்டி²யா விமுத்ததாஸஞ்ஜானனம். ‘‘விமுத்தோம்ஹீ’’தி ஏவம் பவத்தோ அகுஸலசித்துப்பாதோ³ மிச்சா²விமுத்தீதி கேசி வத³ந்தி. ப²லம் விய விமுத்தந்தி க³ஹிதே பன தி³ட்டி²ஸம்பயுத்தசித்தே தி³ட்டி² மிச்சா²ஞாணம், ஸமாதி⁴ ச மிச்சா²விமுத்தீதி யுத்தம் ஸியா.

த³ஸகனித்³தே³ஸவண்ணனா நிட்டி²தா.

தண்ஹாவிசரிதனித்³தே³ஸவண்ணனா

973. ஸமூஹகா³ஹதோதி தண்ஹாமானதி³ட்டீ²னம் ஸாதா⁴ரணக்³க³ஹணதோதி வத³ந்தி. ‘‘இத்த²ம் ஏவம் அஞ்ஞதா²’’தி பன விஸேஸம் அகத்வா க³ஹணம் ஸமூஹகா³ஹோதி த³ட்ட²ப்³போ³. அஞ்ஞம் ஆகாரந்தி பரஸந்தானக³தம் ஆகாரம். அத்தீ²தி ஸதா³ ஸம்விஜ்ஜதீதி அத்தோ². ஸீத³தீதி வினஸ்ஸதி. ஸம்ஸயபரிவிதக்கவஸேனாதி ‘‘கிம் நு கோ² அஹம் ஸியம், ந ஸிய’’ந்தி ஏவம் பரிவிதக்கவஸேன. பத்த²னாகப்பனவஸேனாதி ‘‘அபி நாம ஸாது⁴ பனாஹம் ஸிய’’ந்தி ஏவம் பத்த²னாய கப்பனவஸேன.

ஸுத்³த⁴ஸீஸாதி தண்ஹாமானதி³ட்டீ²னம் ஸாதா⁴ரணஸீஸா விஸேஸஸ்ஸ அனிஸ்ஸிதத்தா ‘‘ஸுத்³த⁴ஸீஸா’’தி வுத்தா. தத்த² தி³ட்டி²ஸீஸேஹி தி³ட்டி²யா தண்ஹா த³ஸ்ஸிதா, ஸீஸஸீஸமூலகேஹி மானதி³ட்டீ²ஹி ஸயமேவ சாதி ஆஹ ‘‘ஏவமேதே…பே… தண்ஹா விசரிதத⁴ம்மா வேதி³தப்³பா³’’தி. தி³ட்டி²மானேஸுபி ‘‘தண்ஹாவிசரிதானீ’’தி வசனஞ்ச அஞ்ஞமஞ்ஞம் விப்பயோகீ³னம் தி³ட்டி²மானானம் தண்ஹாய அவிப்பயோகீ³னம் தம்மூலகத்தாவ தப்பதா⁴னதாய கதந்தி வேதி³தப்³ப³ம்.

974. அவக்கரீதி நிபாதோ நானாபா⁴வே வத்ததீதி அனானாகரணம் அனவக்கரி, தம் கத்வா, அவக்கரி வா அகத்வா அனவக்கரி கத்வாதி ஏவம் த³ஸ்ஸேந்தோ ஆஹ ‘‘அவினிப்³போ⁴க³ம் கத்வா’’தி. ‘‘அனவகாரிம் கரித்வா’’தி வா பாடோ², தத்த² அவகிரணம் விக்கே²பனம் ஸமூஹஸ்ஸ ஏகதே³ஸானம் வினிப்³பு⁴ஜ்ஜனம் அவகாரி, தம் அவகாரிம் வினிப்³போ⁴க³ம் அகத்வா, பஞ்சபி க²ந்தே⁴ ஸமூஹதோ ஏகத்தேனேவ க³ஹேத்வா அத்ததோ அவினிப்³பு⁴ஜ்ஜித்வா அஸ்மீதி ச²ந்த³மானதி³ட்டி²யோ படிலப⁴தீதி அத்தோ². அஸிதப்³யாப⁴ங்கி³தாயாதி தா³த்தேன காஜேன சாதி ஏதேன பரிக்கா²ரேன, அஸிதப்³யாப⁴ங்கீ³ஹி லவனவஹனகிரியா வா ‘‘அஸிதப்³யாப⁴ங்கீ³’’தி வுத்தா.

976. அவகாரிம் கரித்வாதி ரூபாதீ³னி அத்ததோ வினிப்³பு⁴ஜ்ஜித்வா இமினா ரூபேன…பே… இமினா விஞ்ஞாணேன அஸ்மீதி ச²ந்த³ம் படிலப⁴தீதி ஏவம் ஸப்³ப³த்த² இமினாதி ஏதஸ்ஸ அத்ததோ அவினிப்³பு⁴த்தேன ரூபாதி³னாதி அத்தோ² த³ட்ட²ப்³போ³. அத்ததோ ஹி அவினிப்³பு⁴த்தானி அப³ஹிகதானி அஹமிச்சேவ க³ஹிதானி ரூபாதீ³னி உபாதா³ய உபக³ந்த்வா பவத்தா தண்ஹா ‘‘அஜ்ஜ²த்திகஸ்ஸ உபாதா³யா’’தி வுத்தா, அத்ததோ ச வினிப்³பு⁴த்தானி ப³ஹிகதானி உபக³ந்த்வா பவத்தா ‘‘பா³ஹிரஸ்ஸ உபாதா³யா’’தி. க²க்³கே³ன வா ச²த்தேன வா அஹம் நிச்சோதி அபி⁴மங்க³லஸம்மதேன க²க்³கா³தி³னா மம வினாஸோ நத்தீ²தி மஞ்ஞதீதி அத்தோ². ஏகேகஸ்ஸாதி இத³ம் அனாதி³ம்ஹி அனந்தே ச ஸம்ஸாரே ஏகேகஸ்ஸ அதீதானாக³தேஸு ச²த்திம்ஸாயபி ஸம்ப⁴வத³ஸ்ஸனத்த²ம் வுத்தம், ஏகேகஸ்ஸ வா புக்³க³லஸ்ஸ யதா²லாப⁴வஸேனாதி இத³ம்பி அனிஸ்ஸிததண்ஹாமானதி³ட்டி²ம் கத்வா புது²ஜ்ஜனஸ்ஸ அத்³தா⁴பச்சுப்பன்னே கஸ்ஸசி ஸம்ப⁴வத³ஸ்ஸனத்த²ம்.

தண்ஹாவிசரிதனித்³தே³ஸவண்ணனா நிட்டி²தா.

கு²த்³த³கவத்து²விப⁴ங்க³வண்ணனா நிட்டி²தா.