10. த³ஸகமாதிகாவண்ணனா

760. ‘‘சதஸ்ஸோ கோ² இமா, ஸாரிபுத்த, யோனியோ. கதமா…பே… யோ கோ² மம், ஸாரிபுத்த, ஏவம் ஜான’’ந்தி (ம. நி. 1.152) வசனேன சதுயோனிபரிச்சே²த³கஞாணம் வுத்தம், ‘‘நிரயஞ்சாஹம், ஸாரிபுத்த, பஜானாமீ’’திஆதி³னா (ம. நி. 1.153) பஞ்சக³திபரிச்சே²த³கம். ‘‘ஸம்யுத்தகே ஆக³தானி தேஸத்ததி ஞாணானி, ஸத்தஸத்ததி ஞாணானீ’’தி வுத்தம், தத்த² பன நிதா³னவக்³கே³ ஸத்தஸத்ததி ஆக³தானி சதுசத்தாரீஸஞ்ச, தேஸத்ததி பன படிஸம்பி⁴தா³மக்³கே³ ஸுதமயாதீ³னி ஆக³தானி தி³ஸ்ஸந்தி, ந ஸம்யுத்தகேதி. அஞ்ஞானிபீதி ஏதேன இத⁴ ஏககாதி³வஸேன வுத்தம், அஞ்ஞத்த² ச ‘‘புப்³ப³ந்தே ஞாண’’ந்திஆதி³னா, ப்³ரஹ்மஜாலாதீ³ஸு ச ‘‘தயித³ம் ததா²க³தோ பஜானாதி ‘இமானி தி³ட்டி²ட்டா²னானி ஏவம் க³ஹிதானீ’தி’’ஆதி³னா வுத்தம் அனேகஞாணப்பபே⁴த³ம் ஸங்க³ண்ஹாதி. யாதா²வபடிவேத⁴தோ ஸயஞ்ச அகம்பியம் புக்³க³லஞ்ச தம்ஸமங்கி³ம் ஞேய்யேஸு அதி⁴ப³லம் கரோதீதி ஆஹ ‘‘அகம்பியட்டே²ன உபத்த²ம்ப⁴கட்டே²ன சா’’தி.

ஸேட்ட²ட்டா²னம் ஸப்³ப³ஞ்ஞுதம். படிஜானனவஸேன ஸப்³ப³ஞ்ஞுதம் அபி⁴முக²ம் க³ச்ச²ந்தி, அட்ட² வா பரிஸா உபஸங்கமந்தீதி ஆஸபா⁴, பு³த்³தா⁴. இத³ம் பனாதி பு³த்³தா⁴னம் டா²னம் ஸப்³ப³ஞ்ஞுதமேவ வத³தி. திட்ட²மானோவாதி அவத³ந்தோபி திட்ட²மானோவ படிஜானாதி நாமாதி அத்தோ². அட்ட²ஸு பரிஸாஸு ‘‘அபி⁴ஜானாமஹம், ஸாரிபுத்த, அனேகஸதம் க²த்தியபரிஸம்…பே… தத்ர வத மம் ப⁴யம் வா ஸாரஜ்ஜம் வா ஓக்கமிஸ்ஸதீதி நிமித்தமேதம், ஸாரிபுத்த, ந ஸமனுபஸ்ஸாமீ’’தி (ம. நி. 1.151) வசனேன த³ஸ்ஸிதஅகம்பியஞாணயுத்தோ த³ஸப³லோஹந்தி அபீ⁴தனாத³ம் நத³தி. ஸீஹனாத³ஸுத்தேன க²ந்த⁴கவக்³கே³ ஆக³தேன.

‘‘தே³வமனுஸ்ஸானம் சதுசக்கம் வத்ததீ’’தி (அ. நி. 4.31) ஸுத்தஸேஸேன ஸப்புரிஸூபஸ்ஸயாதீ³னம் ப²லஸம்பத்தி பவத்தி, புரிமஸப்புரிஸூபஸ்ஸயாதி³ம் உபனிஸ்ஸாய பச்சி²மஸப்புரிஸூபஸ்ஸயாதீ³னம் ஸம்பத்தி பவத்தி வா வுத்தாதி ஆதி³-ஸத்³தே³ன தத்த² ச சக்க-ஸத்³த³ஸ்ஸ க³ஹணம் வேதி³தப்³ப³ம். படிவேத⁴னிட்ட²த்தா அரஹத்தமக்³க³ஞாணம் படிவேதோ⁴தி ‘‘ப²லக்க²ணே உப்பன்னம் நாமா’’தி வுத்தம். தேன படிலத்³த⁴ஸ்ஸபி தே³ஸனாஞாணஸ்ஸ கிச்சனிப்ப²த்திபரஸ்ஸ பு³ஜ்ஜ²னமத்தேன ஹோதீதி ‘‘அஞ்ஞாஸிகோண்ட³ஞ்ஞஸ்ஸ ஸோதாபத்திப²லக்க²ணே பவத்தம் நாமா’’தி வுத்தம். ததோ பரம் பன யாவ பரினிப்³பா³னா தே³ஸனாஞாணப்பவத்தி தஸ்ஸேவ பவத்திதஸ்ஸ த⁴ம்மசக்கஸ்ஸ டா²னந்தி வேதி³தப்³ப³ம், பவத்திதசக்கஸ்ஸ சக்கவத்தினோ சக்கரதனட்டா²னம் விய.

ஸமாதீ³யந்தீதி ஸமாதா³னானி, தானி பன ஸமாதி³யித்வா கதானி ஹோந்தீதி ஆஹ ‘‘ஸமாதி³யித்வா கதான’’ந்தி. கம்மமேவ வா கம்மஸமாதா³னந்தி ஏதேன ஸமாதா³ன-ஸத்³த³ஸ்ஸ அபுப்³ப³த்தா²பா⁴வம் த³ஸ்ஸேதி முத்தக³த-ஸத்³தே³ க³த-ஸத்³த³ஸ்ஸ விய.

அக³திகா³மினிந்தி நிப்³பா³னகா³மினிம். வுத்தஞ்ஹி ‘‘நிப்³பா³னஞ்சாஹம், ஸாரிபுத்த, பஜானாமி நிப்³பா³னகா³மினிஞ்ச படிபத³’’ந்தி (ம. நி. 1.153).

ஹானபா⁴கி³யத⁴ம்மந்தி ஹானபா⁴கி³யஸபா⁴வம், காமஸஹக³தஸஞ்ஞாதி³த⁴ம்மம் வா. தம் காரணந்தி புப்³பே³வ கதாபி⁴ஸங்கா²ராதி³ம்.

‘‘இதா³னீ’’தி ஏதஸ்ஸ ‘‘இமினா அனுக்கமேன வுத்தானீதி வேதி³தப்³பா³னீ’’தி இமினா ஸஹ யோஜனா காதப்³பா³. கிலேஸாவரணம் தத³பா⁴வஞ்சாதி கிலேஸாவரணாபா⁴வம். கிலேஸக்க²யாதி⁴க³மஸ்ஸ ஹி கிலேஸாவரணம் அட்டா²னம், தத³பா⁴வோ டா²னம். அனதி⁴க³மஸ்ஸ கிலேஸாவரணம் டா²னம், தத³பா⁴வோ அட்டா²னந்தி. தத்த² தத³பா⁴வக்³க³ஹணேன க³ஹிதம் ‘‘அத்தி² தி³ன்ன’’ந்திஆதி³காய ஸம்மாதி³ட்டி²யா டி²திம் தப்³பி³பரீதாய டா²னாபா⁴வஞ்ச அதி⁴க³மஸ்ஸ டா²னம் பஸ்ஸந்தேன இமினா ஞாணேன அதி⁴க³மானதி⁴க³மானம் டா²னாட்டா²னபூ⁴தே கிலேஸாவரணதத³பா⁴வே பஸ்ஸதி ப⁴க³வாதி இமமத்த²ம் ஸாதே⁴ந்தோ ஆஹ ‘‘லோகியஸம்மாதி³ட்டி²டி²தித³ஸ்ஸனதோ நியதமிச்சா²தி³ட்டி²டா²னாபா⁴வத³ஸ்ஸனதோ சா’’தி. ஏத்த² ச அதி⁴க³மட்டா²னத³ஸ்ஸனமேவ அதி⁴ப்பேதம் உபரி ப⁴ப்³ப³புக்³க³லவஸேனேவ விபாகாவரணாபா⁴வத³ஸ்ஸனாதி³கஸ்ஸ வக்க²மானத்தா. இமினா பன ஞாணேன ஸிஜ்ஜ²னதோ பஸங்கே³ன இதரம்பி வுத்தந்தி வேதி³தப்³ப³ம். தா⁴துவேமத்தத³ஸ்ஸனதோதி ராகா³தீ³னம் அதி⁴மத்ததாதி³வஸேன தம்ஸஹிதானம் தா⁴தூனம் வேமத்ததாத³ஸ்ஸனதோ, ‘‘அயம் இமிஸ்ஸா தா⁴துயா அதி⁴மத்தத்தா ராக³சரிதோ’’திஆதி³னா சரியாஹேதூனம் வா, ராகா³த³யோ ஏவ வா பகதிபா⁴வதோ தா⁴தூதி ராகா³தி³வேமத்தத³ஸ்ஸனதோதி அத்தோ². பயோக³ம் அனாதி³யித்வாதி ஸந்ததிமஹாமத்தஅங்கு³லிமாலாதீ³னம் விய காமராக³ப்³யாபாதா³தி³வஸேன பயோக³ம் அனாதி³யித்வா.

(1.) ஏககனித்³தே³ஸவண்ணனா

761. ந ஹேதுமேவாதி ஏத்த² ச ந ஹேதூ ஏவாதி அத்தோ², ப்³யஞ்ஜனஸிலிட்ட²தாவஸேன பன ரஸ்ஸத்தம் ம-காரோ ச கதோ ‘‘அது³க்க²மஸுகா²’’தி ஏத்த² விய. இமினாபி நயேனாதி ஏத்த² புரிமனயேன ஹேதுபா⁴வாதி³படிக்கே²போ, பச்சி²மனயேன நஹேதுத⁴ம்மாதி³கோட்டா²ஸஸங்க³ஹோதி அயம் விஸேஸோ வேதி³தப்³போ³. சுதிக்³க³ஹணேன சுதிபரிச்சி²ன்னாய ஏகாய ஜாதியா க³ஹணம் த³ட்ட²ப்³ப³ம், ப⁴வக்³க³ஹணேன நவதா⁴ வுத்தப⁴வஸ்ஸ. தத³ந்தோக³த⁴தாய தத்த² தத்த² பரியாபன்னதா வுத்தா. உப்பன்னம் மனோவிஞ்ஞாணவிஞ்ஞேய்யமேவாதி ‘‘ந ரூபம் விய உப்பன்னா ச²விஞ்ஞாணவிஞ்ஞேய்யா’’தி ரூபதோ ஏதேஸம் விஸேஸனம் கரோதி.

762. கப்பதோ கப்பம் க³ந்த்வாபி ந உப்பஜ்ஜதீதி ந கதா³சி ததா² உப்பஜ்ஜதி. ந ஹி கீ²ராதீ³னம் விய ஏதேஸம் யதா²வுத்தலக்க²ணவிலக்க²ணதா அத்தீ²தி த³ஸ்ஸேதி.

763. ஸமோதா⁴னேத்வாதி லோகே விஜ்ஜமானம் ஸப்³ப³ம் ரூபம் ஸமோதா⁴னேத்வா. ஏதேன மஹத்தேபி அவிபா⁴வகத்தம் த³ஸ்ஸேந்தோ ஸுகு²மத்தா ந விபா⁴வேஸ்ஸதீதி வாத³பத²ம் சி²ந்த³தி. சக்கு²பஸாதே³ மம வத்து²ம்ஹீதி அத்தோ². விஸயோதி இஸ்ஸரியட்டா²னந்தி அதி⁴ப்பாயோ.

764. அப்³போ³கிண்ணாதி அப்³யவஹிதா, அனந்தரிதாதி அத்தோ². வவத்தி²தானம்பி படிபாடினியமோ தேன படிக்கி²த்தோதி அத்தோ². அனந்தரதாதி அனந்தரபச்சயதா ஏதேன படிக்கி²த்தாதி அத்தோ².

765. ஸமனந்தரதாதி ச ஸமனந்தரபச்சயதா.

766. ஆபு⁴ஜனதோதி ஆபு⁴க்³க³கரணதோ, நிவத்தனதோ இச்சேவ அத்தோ². ஏத்த² ச ‘‘பஞ்ச விஞ்ஞாணா அனாபோ⁴கா³’’தி ஆபோ⁴க³ஸபா⁴வா ந ஹோந்தீதி அத்தோ², ‘‘பஞ்சன்னம் விஞ்ஞாணானம் நத்தி² ஆவட்டனா வா’’திஆதீ³ஸுபி ஆவட்டனபா⁴வோ வாதிஆதி³னா அத்தோ² த³ட்ட²ப்³போ³.

ந கஞ்சி த⁴ம்மம் படிவிஜானாதீதி ஏத்த² ந ஸப்³பே³ ரூபாதி³த⁴ம்மா த⁴ம்மக்³க³ஹணேன க³ஹிதாதி யதா²தி⁴ப்பேதத⁴ம்மத³ஸ்ஸனத்த²ம் ‘‘மனோபுப்³ப³ங்க³மா த⁴ம்மாதி ஏவம் வுத்த’’ந்தி ஆஹ.

ரூபாதீ³ஸு அபி⁴னிபதனம் தேஹி ஸமாக³மோ தேஸந்திபி வத்தும் யுஜ்ஜதீதி ஆஹ ‘‘ரூபாதீ³னம் அபி⁴னிபாதமத்த’’ந்தி. கம்மத்தே² வா ஸாமிவசனம். விஞ்ஞாணேஹி அபி⁴னிபதிதப்³பா³னி ஹி ரூபாதீ³னீதி. இத³ம் வுத்தம் ஹோதீதிஆதீ³ஸு ஹி அயம் அதி⁴ப்பாயோ – ஆரம்மணகரணேன படிவிஜானிதப்³பா³னி ரூபாதீ³னி ட²பேத்வா குஸலாகுஸலசேதனாய தம்ஸம்பயுத்தானஞ்ச யதா²வுத்தானம் ஸஹஜபுப்³ப³ங்க³மத⁴ம்மேன படிவிஜானிதப்³பா³னம் படிவிஜானனம் ஏதேஸம் நத்தீ²தி. ஏவஞ்ச கத்வா ‘‘த³ஸ்ஸனாதி³மத்ததோ பன முத்தா அஞ்ஞா ஏதேஸம் குஸலாதி³படிவிஞ்ஞத்தி நாம நத்தீ²’’தி கிச்சந்தரம் படிஸேதே⁴தி.

அவிபாகபா⁴வேன அஞ்ஞம் அப்³யாகதஸாமஞ்ஞம் அனிவாரேந்தோ குஸலாகுஸலக்³க³ஹணஞ்ச கரோதீதி சவனபரியோஸானஞ்ச கிச்சம். பி-ஸத்³தே³ன ஸஹஜவனகானி வீதி²சித்தானி ஸம்பிண்டே³த்வா பஞ்சத்³வாரே படிஸேத⁴னே அயம் அதி⁴ப்பாயோ ஸியா – ‘‘மனஸா சே பது³ட்டே²ன…பே… பஸன்னேன பா⁴ஸதி வா கரோதி வா’’தி (த⁴. ப. 1-2) ஏவம் வுத்தா பா⁴ஸனகரணகரா, தம்ஸதி³ஸா ச ஸுக²து³க்கு²ப்பாத³கா ப³லவந்தோ ச²ட்ட²த்³வாரிகா ஏவ த⁴ம்மக்³க³ஹணேன க³ஹிதாதி ந தேஸம் பஞ்சத்³வாரிகஜவனேன படிவிஜானனம் அத்தி², து³ப்³ப³லானம் பன புப்³ப³ங்க³மபடிவிஜானனம் தத்த² ந படிஸித்³த⁴ம் ‘‘ந காயகம்மம் ந வசீகம்மம் பட்ட²பேதீ’’தி விஞ்ஞத்தித்³வயஜனகஸ்ஸேவ பட்ட²பனபடிக்கே²பேன து³ப்³ப³லஸ்ஸ மனோகம்மஸ்ஸ அனுஞ்ஞாதத்தா. ததா² காயஸுசரிதாதி³குஸலகம்மம் கரோமீதி, தப்³பி³பரீதம் அகுஸலம் கம்மம் கரோமீதி ச குஸலாகுஸலஸமாதா³னம் பஞ்சத்³வாரிகஜவனேன ந ஹோதி. ததா² படிச்சஸமுப்பாத³வண்ணனாயம் வுத்தா ‘‘பஞ்சத்³வாரிகசுதி ச ந பஞ்சத்³வாரிகசித்தேஹி ஹோதி சுதிசித்தஸ்ஸ அதம்த்³வாரிகத்தா’’தி. யா பனாயம் பாளி ‘‘பஞ்சஹி விஞ்ஞாணேஹி ந கஞ்சி த⁴ம்மம் படிவிஜானாதி அஞ்ஞத்ர அபி⁴னிபாதமத்தா’’தி, தஸ்ஸா ரூபாதீ³னம் ஆபாத²மத்தம் முஞ்சித்வா அஞ்ஞம் கஞ்சி த⁴ம்மஸபா⁴வம் ந படிவிஜானாதீதி அயமத்தோ² தி³ஸ்ஸதி. ந ஹி ரூபம் படிக்³க³ண்ஹந்தம்பி சக்கு²விஞ்ஞாணம் ரூபந்தி ச க³ண்ஹாதீதி. ஸம்படிச்ச²னஸ்ஸபி ரூபனீலாதி³ஆகாரபடிவிஜானனம் நத்தீ²தி கிஞ்சி த⁴ம்மஸ்ஸ படிவிஜானனம் படிக்கி²த்தம், பஞ்சஹி பன விஞ்ஞாணேஹி ஸாதிஸயம் தஸ்ஸ விஜானனந்தி ‘‘அஞ்ஞத்ர அபி⁴னிபாதமத்தா’’தி ந வுத்தம். யஸ்ஸ பாளியம் ப³ஹித்³தா⁴பச்சுப்பன்னாரம்மணதா வுத்தா, ததோ அஞ்ஞம் நிருத்திபடிஸம்பி⁴த³ம் இச்ச²ந்தேஹி பஞ்சத்³வாரஜவனேன படிஸம்பி⁴தா³ஞாணஸ்ஸ ஸஹுப்பத்தி படிஸித்³தா⁴. ரூபாரூபத⁴ம்மேதி ரூபாரூபாவசரத⁴ம்மேதி அத்தோ².

பஞ்சத்³வாரிகசித்தேன ந படிபு³ஜ்ஜ²தீதி கஸ்மா வுத்தம், நனு ரூபாதீ³னம் ஆபாத²க³மனே நித்³தா³படிபோ³தோ⁴ ஹோதீதி? ந, பட²மம் மனோத்³வாரிகஜவனஸ்ஸ உப்பத்திதோதி த³ஸ்ஸேந்தோ ஆஹ ‘‘நித்³தா³யந்தஸ்ஸ ஹீ’’திஆதி³. பலோபே⁴த்வா ஸச்சஸுபினேன.

அப்³யாகதோயேவ ஆவஜ்ஜனமத்தஸ்ஸேவ உப்பஜ்ஜனதோதி வத³ந்தி. ஏவம் வத³ந்தேஹி மனோத்³வாரேபி ஆவஜ்ஜனம் த்³வத்திக்க²த்தும் உப்பஜ்ஜித்வா ஜவனட்டா²னே ட²த்வா ப⁴வங்க³ம் ஓதரதீதி அதி⁴ப்பேதந்தி த³ட்ட²ப்³ப³ம்.

தஸ்ஸா ஏவ வஸேனாதி தஸ்ஸா வஸேன ஏகவிதே⁴ன ஞாணவத்து² ஹோதீதி ச, வேதி³தப்³ப³ந்தி ச யோஜனா காதப்³பா³.

ஏககனித்³தே³ஸவண்ணனா நிட்டி²தா.

(2.) து³கனித்³தே³ஸவண்ணனா

767. அத்த²-ஸத்³தோ³ அஞ்ஞத்ர ஸபா⁴வம் க³ஹேத்வா அதி⁴கரணேஸு பவத்தமானோ அதி⁴கரணவஸேன லிங்க³பரிவத்திம் க³ச்ச²தீதி அதி⁴ப்பாயேன ஜாபிதா ச ஸா அத்தா² சாதி ஜாபிதத்தா²தி அயமத்தோ² விபா⁴விதோதி த³ட்ட²ப்³போ³.

து³கனித்³தே³ஸவண்ணனா நிட்டி²தா.

(3.) திகனித்³தே³ஸவண்ணனா

768. பஞ்ஞாபரிணாமிதேஸூதி பஞ்ஞாய பரிபாசிதேஸு. ‘‘யோக³விஹிதேஸூதி இத³ஞ்ச விஸயவிஸேஸனமத்தமேவ, தஸ்மா யானி பஞ்ஞாய விஹிதானி அஹேஸும் ஹோந்தி ப⁴விஸ்ஸந்தி ச, ஸப்³பா³னி தானி யோக³விஹிதானீதி த³ட்ட²ப்³பா³னி. ஸிக்கி²த்வா காதப்³ப³ம் ஸிப்பம், இதரம் கம்மம். அயமேதேஸம் விஸேஸோ. வட்³ட⁴கீகம்மந்தி ச அஸிக்கி²த்வாபி காதப்³ப³ம் தூ²லகம்மம் ‘‘கம்ம’’ந்தி த³ட்ட²ப்³ப³ம், பஞ்ஞா ஏவ வா தத்த² தத்த² ‘‘கம்மம் ஸிப்ப’’ந்தி ச வேதி³தப்³பா³. நாக³மண்ட³லம் நாம மண்ட³லம் கத்வா ஸப்பே விஜ்ஜாய பக்கோஸித்வா ப³லிம் த³த்வா விஸாபனயனம். பரித்தம் ரக்கா², யேன ‘‘பூ²’’தி முக²வாதம் த³த்வா விஸம் அபனயந்தி, ஸோ உண்ணனாபி⁴ஆதி³மந்தோ பு²த⁴மனகமந்தோ. ‘‘அ ஆ’’திஆதி³கா மாதிகா ‘‘க கா’’திஆதி³கோ தப்பபே⁴தோ³ ச லேகா².

குஸலம் த⁴ம்மம் ஸகம், இதரம் நோஸகம். சதுன்னம் ஸச்சானம் படிவிஜ்ஜி²தப்³பா³னம் தப்படிவேத⁴பச்சயபா⁴வேன அனுலோமனம் த³ட்ட²ப்³ப³ம். புப்³பே³ ‘‘யோக³விஹிதேஸு வா கம்மாயதனேஸூ’’திஆதி³னா பஞ்ஞா வுத்தா, புன தஸ்ஸா வேவசனவஸேன ‘‘அனுலோமிகம் க²ந்தி’’ந்திஆதி³ வுத்தந்தி அதி⁴ப்பாயேன ‘‘அனு…பே… பஞ்ஞாவேவசனானீ’’தி ஆஹ. ஏத்த² ச ஏவரூபிந்தி யதா²வுத்தகம்மாயதனாதி³விஸயம் கம்மஸ்ஸகதஸச்சானுலோமிகஸபா⁴வம் அனிச்சாதி³பவத்திஆகாரஞ்சாதி அத்தோ². யதா²வுத்தா ச பூ⁴மிஸபா⁴வபவத்திஆகாரனித்³தே³ஸா க²ந்திஆதீ³ஹி யோஜேதப்³பா³. யஸ்ஸா பஞ்ஞாய த⁴ம்மா நிஜ்ஜா²னபஜானனகிச்சஸங்கா²தம் ஓலோகனம் க²மந்தி அவிபரீதஸபா⁴வத்தா, ஸா பஞ்ஞா த⁴ம்மானம் நிஜ்ஜா²னக்க²மனம் ஏதிஸ்ஸா அத்தீ²தி த⁴ம்மனிஜ்ஜா²னக்க²ந்தீதி அத்தோ².

769. அஸம்வரம் முஞ்சதீதி ஸமாதா³னஸம்பத்தவிரதிஸம்பயுத்தசேதனா ‘‘ஸீலம் பூரேந்தஸ்ஸ முஞ்சசேதனா’’தி வுத்தா. புப்³பா³பரபஞ்ஞாய ச தா³னஸீலமயதாவசனதோ முஞ்சஅபரசேதனாவஸேன ‘‘ஆரப்³பா⁴’’தி, புப்³ப³சேதனாவஸேன ‘‘அதி⁴கிச்சா’’தி ச வத்தும் யுத்தந்தி ‘‘அதி⁴கிச்சா’’திபி பாடோ² யுஜ்ஜதி.

770. பஞ்சஸீலத³ஸஸீலானி விஞ்ஞாணஸ்ஸ ஜாதியா ச பச்சயபூ⁴தேஸு ஸங்கா²ரப⁴வேஸு அந்தோக³தா⁴னீதி ‘‘உப்பாதா³ வா’’திஆதி³காய த⁴ம்மட்டி²திபாளியா ஸங்க³ஹிதானி. ப⁴வனிப்³ப³த்தகஸீலஸ்ஸ பஞ்ஞாபனம் ஸதிபி ஸவனே ந ததா²க³ததே³ஸனாயத்தந்தி பி⁴க்கு²ஆதீ³னம்பி தம் வுத்தம்.

அதி⁴பஞ்ஞாய பஞ்ஞாதி அதி⁴பஞ்ஞாய அந்தோக³தா⁴ பஞ்ஞா. அத² வா அதி⁴பஞ்ஞானிப்³ப³த்தேஸு, தத³தி⁴ட்டா²னேஸு வா த⁴ம்மேஸு அதி⁴பஞ்ஞா-ஸத்³தோ³ த³ட்ட²ப்³போ³, தத்த² பஞ்ஞா அதி⁴பஞ்ஞாய பஞ்ஞா.

771. அபாயுப்பாத³னகுஸலதா அபாயகோஸல்லம் ஸியாதி மஞ்ஞமானோ புச்ச²தி ‘‘அபாயகோஸல்லம் கத²ம் பஞ்ஞா நாம ஜாதா’’தி. தம் பன பரஸ்ஸ அதி⁴ப்பாயம் நிவத்தேந்தோ ‘‘பஞ்ஞவாயேவ ஹீ’’திஆதி³மாஹ. தத்ருபாயாதி தத்ர தத்ர உபாயபூ⁴தா. டா²னே உப்பத்தி ஏதஸ்ஸாதி டா²னுப்பத்தியம். கிம் தம்? காரணஜானனம், ப⁴யாதீ³னம் உப்பத்திக்க²ணே தஸ்மிம்யேவ டா²னே லஹுஉப்பஜ்ஜனகந்தி வுத்தம் ஹோதி.

திகனித்³தே³ஸவண்ணனா நிட்டி²தா.

(4.) சதுக்கனித்³தே³ஸவண்ணனா

793. ந பரிதஸ்ஸதீதி ‘‘அபி நாம மே தண்டு³லாதீ³னி ஸியு’’ந்தி ந பத்தே²தி, தத³பா⁴வேன வா ந உத்தஸதி.

796. அபரப்பச்சயேதி பரேன நபத்தியாயிதப்³பே³. த⁴ம்மே ஞாணந்தி ஸச்சவிஸயம் ஞாணம். அரியஸச்சேஸு ஹி த⁴ம்ம-ஸத்³தோ³ தேஸம் அவிபரீதஸபா⁴வத்தாதி. ஸங்க²தபவரோ வா அரியமக்³கோ³ தஸ்ஸ ச ப²லம் த⁴ம்மோ, தத்த² பஞ்ஞா தம்ஸஹக³தா த⁴ம்மே ஞாணம். ந அஞ்ஞஞாணுப்பாத³னம் நயனயனம், ஞாணஸ்ஸேவ பன பவத்திவிஸேஸோதி அதி⁴ப்பாயேனாஹ ‘‘பச்சவேக்க²ணஞாணஸ்ஸ கிச்ச’’ந்தி. ஏத்த² ச இமினா த⁴ம்மேனாதி மக்³க³ஞாணேனாதி வுத்தம், து³வித⁴ம்பி பன மக்³க³ப²லஞாணம் பச்சவேக்க²ணாய ச மூலம், காரணஞ்ச நயனயனஸ்ஸாதி து³விதே⁴னபி தேன த⁴ம்மேனாதி ந ந யுஜ்ஜதி, ததா² சதுஸச்சத⁴ம்மஸ்ஸ ஞாதத்தா, மக்³க³ப²லஸங்கா²தஸ்ஸ ச த⁴ம்மஸ்ஸ ஸச்சபடிவேத⁴ஸம்பயோக³ம் க³தத்தா நயனம் ஹோதீதி தேன இமினா த⁴ம்மேன ஞாணவிஸயபா⁴வேன, ஞாணஸம்பயோகே³ன வா ஞாதேனாதி ச அத்தோ² ந ந யுஜ்ஜதி.

யதி³பி ஸப்³பே³ன ஸப்³ப³ம் அதீதானாக³தபச்சுப்பன்னம் து³க்க²ம் அபி⁴ஜானந்தி, ததா²பி பச்சுப்பன்னே ஸஸந்ததிபரியாபன்னே ஸவிஸேஸே அபி⁴னிவேஸோ ஹோதீதி ஆஹ ‘‘ந தஞ்ஞேவ இம’’ந்தி. தி³ட்டே²ன அதி³ட்டே²ன நயதோ நயனஞாணம், அதி³ட்ட²ஸ்ஸ தி³ட்ட²தாய காரணபூ⁴தத்தா காரணஞாணம், அனுரூபத்த²வாசகோ வா காரண-ஸத்³தோ³தி த⁴ம்மே ஞாணஸ்ஸ அனுரூபஞாணந்தி அத்தோ².

ஸம்முதிம்ஹி ஞாணந்தி த⁴ம்மே ஞாணாதீ³னம் விய ஸாதிஸயஸ்ஸ படிவேத⁴கிச்சஸ்ஸ அபா⁴வா விஸயோபா⁴ஸனமத்தஜானனஸாமஞ்ஞேன ஞாணந்தி ஸம்மதேஸு அந்தோக³த⁴ந்தி அத்தோ². ஸம்முதிவஸேன வா பவத்தம் ஸம்முதிம்ஹி ஞாணம், அவஸேஸம் பன இதரஞாணத்தயவிஸபா⁴க³ம் ஞாணம் தப்³பி³ஸபா⁴க³ஸாமஞ்ஞேன ஸம்முதிஞாணம்ஹி பவிட்ட²த்தா ஸம்முதிஞாணம் நாம ஹோதீதி.

797. கிலேஸமூலகே சாதி நீவரணமூலகே ச காமப⁴வத⁴ம்மே.

798. ஸா ஹிஸ்ஸாதி ஏத்த² அஸ்ஸாதி யோ ‘‘காமேஸு வீதராகோ³ ஹோதீ’’தி ஏவம் வுத்தோ, அஸ்ஸ பட²மஜ்ஜா²னஸமங்கி³ஸ்ஸாதி அத்தோ². ஸ்வேவாதி ஏதேன காமேஸு வீதராக³பா⁴வனாவத்த²ஸ்ஸேவ பட²மஜ்ஜா²னஸமங்கி³ஸ்ஸ க³ஹணே பவத்தே தஸ்ஸ ததோ பரம் அவத்த²ம் த³ஸ்ஸேதும் ‘‘காமேஸு வீதராகோ³ ஸமானோ’’தி வுத்தம். சதுத்த²மக்³க³பஞ்ஞா ச²ட்டா²பி⁴ஞ்ஞாபா⁴வப்பத்தியா தம் படிவிஜ்ஜ²தி நாம, இதரா தது³பனிஸ்ஸயத்தா. யதா²னுரூபம் வா ஆஸவக்க²யபா⁴வதோ, ப²லே வா ஆஸவக்க²யே ஸதி யதா²னுரூபம் தம்னிப்³ப³த்தனதோ சதூஸுபி மக்³கே³ஸு பஞ்ஞா ச²ட்ட²ம் அபி⁴ஞ்ஞம் படிவிஜ்ஜ²தீதி த³ட்ட²ப்³பா³.

799. காமஸஹக³தாதி வத்து²காமாரம்மணா. சோதே³ந்தீதி காமாபி⁴முக²ம் தன்னின்னம் கரோந்தீதி அத்தோ². தத³னுத⁴ம்மதாதி தத³னுத⁴ம்மா இச்சேவ வுத்தம் ஹோதி. தா-ஸத்³த³ஸ்ஸ அபுப்³ப³த்தா²பா⁴வதோதி அதி⁴ப்பாயேனாஹ ‘‘தத³னுரூபஸபா⁴வா’’தி. நிகந்திம், நிகந்திஸஹக³தசித்துப்பாத³ம் வா ‘‘மிச்சா²ஸதீ’’தி வத³தி. ‘‘அஹோ வத மே அவிதக்கம் உப்பஜ்ஜேய்யா’’தி அவிதக்காரம்மணா அவிதக்கஸஹக³தா.

801. அதி⁴க³மபா⁴வேன அபி⁴முக²ம் ஜானந்தஸ்ஸ அபி⁴ஜானந்தஸ்ஸ, அபி⁴விஸிட்டே²ன வா ஞாணேன ஜானந்தஸ்ஸ, அனாரம்மணபூ⁴தஞ்ச தம் டா²னம் பாகடம் கரோந்தஸ்ஸாதி அத்தோ².

802. வஸிதாபஞ்சகரஹிதம் ஜா²னம் அப்பகு³ணம். ஏத்த² சதஸ்ஸோ படிபதா³ சத்தாரி ஆரம்மணானீதி பஞ்ஞாய படிபதா³ரம்மணுத்³தே³ஸேன பஞ்ஞா ஏவ உத்³தி³ட்டா²தி ஸா ஏவ விப⁴த்தாதி.

சதுக்கனித்³தே³ஸவண்ணனா நிட்டி²தா.

(5.) பஞ்சகனித்³தே³ஸவண்ணனா

804. பஞ்சங்கி³கோ ஸம்மாஸமாதீ⁴தி ஸமாதி⁴அங்க³பா⁴வேன பஞ்ஞா உத்³தி³ட்டா²தி. பீதிப²ரணதாதி³வசனேன ஹி தமேவ விப⁴ஜதி, ‘‘ஸோ இமமேவ காயம் விவேகஜேன பீதிஸுகே²ன அபி⁴ஸந்தே³தீ’’திஆதி³னா (தீ³. நி. 1.226; ம. நி. 1.427) நயேன பீதியா ஸுக²ஸ்ஸ ச ப²ரணம் வேதி³தப்³ப³ம். பீதிப²ரணதாஸுக²ப²ரணதாஹி ஆரம்மணே ட²த்வா சதுத்த²ஜ்ஜா²னஸ்ஸ உப்பாத³னதோ ‘‘பாதா³ வியா’’தி தா வுத்தா.

து³தியபஞ்சகே ச ‘‘பஞ்சஞாணிகோ’’தி ஸமாதி⁴முகே²ன பஞ்சஞாணானேவ உத்³தி³ட்டா²னி நித்³தி³ட்டா²னி சாதி த³ட்ட²ப்³பா³னி. லோகியஸமாதி⁴ஸ்ஸ பச்சனீகானி நீவரணபட²மஜ்ஜா²னனிகந்திஆதீ³னி நிக்³க³ஹேதப்³பா³னி. அஞ்ஞே கிலேஸா வாரேதப்³பா³, இமஸ்ஸ பன அரஹத்தஸமாதி⁴ஸ்ஸ படிப்பஸ்ஸத்³த⁴ஸப்³ப³கிலேஸத்தா ந நிக்³க³ஹேதப்³ப³ம் வாரேதப்³ப³ஞ்ச அத்தீ²தி மக்³கா³னந்தரம் ஸமாபத்திக்க²ணே ச அப்பயோகே³னேவ அதி⁴க³தத்தா ச ட²பிதத்தா ச, அபரிஹானிவஸேன ட²பிதத்தா வா ந ஸஸங்கா²ரனிக்³க³ய்ஹவாரிதக³தோ. ஸதிவேபுல்லப்பத்தத்தாதி ஏதேன அப்பவத்தமானாயபி ஸதியா ஸதிப³ஹுலதாய ஸதோ ஏவ நாமாதி த³ஸ்ஸேதி. யதா²பரிச்சி²ன்னகாலவஸேனாதி ஏதேன பரிச்சி²ந்த³னஸதியா ஸதோதி.

பஞ்சகனித்³தே³ஸவண்ணனா நிட்டி²தா.

(6.) ச²க்கனித்³தே³ஸவண்ணனா

805. விஸுத்³தி⁴பா⁴வம் த³ஸ்ஸேந்தோ ‘‘தூ³ர…பே… ரம்மணாயா’’தி ஆஹ. ஸோததா⁴துவிஸுத்³தீ⁴தி ச சித்தசேதஸிகா த⁴ம்மா வுத்தாதி தத்த² ஞாணம் ஸோததா⁴துவிஸுத்³தி⁴யா ஞாணம். ‘‘சேதோபரியஞாண’’ந்தி இத³மேவ அத்த²வஸேன ‘‘பரசித்தே ஞாண’’ந்தி உத்³த⁴டந்தி த³ட்ட²ப்³ப³ம். சுதூபபாதஞாணஸ்ஸ தி³ப்³ப³சக்கு²ஞாணேகதே³ஸத்தா ‘‘வண்ணதா⁴துஆரம்மணா’’தி வுத்தம். முத்³த⁴ப்பத்தேன சுதூபபாதஞாணஸங்கா²தேன தி³ப்³ப³சக்கு²ஞாணேன ஸப்³ப³ம் தி³ப்³ப³சக்கு²ஞாணந்தி வுத்தந்தி த³ட்ட²ப்³ப³ம்.

ச²க்கனித்³தே³ஸவண்ணனா நிட்டி²தா.

(7.) ஸத்தகனித்³தே³ஸவண்ணனா

806. ததே³வ ஞாணந்தி ச²ப்³பி³த⁴ம்பி பச்சவேக்க²ணஞாணம் விபஸ்ஸனாரம்மணபா⁴வேன ஸஹ க³ஹேத்வா வுத்தந்தி அதி⁴ப்பாயோ. த⁴ம்மட்டி²திஞாணேனாதி ச²பி ஞாணானி ஸங்கி²பித்வா வுத்தேன ஞாணேன. க²யத⁴ம்மந்திஆதி³னா ஹி பகாரேன பவத்தஞாணஸ்ஸ த³ஸ்ஸனம், ஞாணவிபஸ்ஸனாத³ஸ்ஸனதோ விபஸ்ஸனாபடிவிபஸ்ஸனாத³ஸ்ஸனமத்தமேவாதி ந தம் அங்க³ந்தி அதி⁴ப்பாயோ. பாளியம் பன ஸப்³ப³த்த² ஞாணவசனேன அங்கா³னம் வுத்தத்தா நிரோத⁴த⁴ம்மந்தி ஞாணந்தி இதி-ஸத்³தே³ன பகாஸேத்வா வுத்தம் விபஸ்ஸனாஞாணம் ஸத்தமம் ஞாணந்தி அயமத்தோ² தி³ஸ்ஸதி. ந ஹி யம்பி தம் த⁴ம்மட்டி²திஞாணம், தம்பி ஞாணந்தி ஸம்ப³ந்தோ⁴ ஹோதி தம்ஞாணக்³க³ஹணே ஏதஸ்மிம் ஞாணபா⁴வத³ஸ்ஸனஸ்ஸ அனதி⁴ப்பேதத்தா, ‘‘க²யத⁴ம்மம்…பே… நிரோத⁴த⁴ம்ம’’ந்தி ஏதேஸம் ஸம்ப³ந்தா⁴பா⁴வப்பஸங்க³தோ சாதி.

ஸத்தகனித்³தே³ஸவண்ணனா நிட்டி²தா.

(8.) அட்ட²கனித்³தே³ஸவண்ணனா

808. விஹாரிதப்³ப³ட்டே²னாதி பச்சனீகத⁴ம்மே, து³க்க²ம் வா விச்சி²ந்தி³த்வா பவத்தேதப்³ப³ட்டே²ன.

அட்ட²கனித்³தே³ஸவண்ணனா நிட்டி²தா.

(10.) த³ஸகனித்³தே³ஸோ

பட²மப³லனித்³தே³ஸவண்ணனா

809. அவிஜ்ஜமானம் டா²னம் அட்டா²னம், நத்தி² டா²னந்தி வா அட்டா²னம். ஏஸ ‘‘அனவகாஸோ’’தி ஏத்தா²பி நயோ. தத³த்த²னிக³மனமத்தமேவ ஹி ‘‘நேதம் டா²னம் விஜ்ஜதீ’’தி வசனந்தி. அஸுகே² ஸுக²ந்தி தி³ட்டி²விபல்லாஸோவ இத⁴ ஸுக²தோ உபக³மனஸ்ஸ டா²னந்தி அதி⁴ப்பேதந்தி த³ஸ்ஸேந்தோ ‘‘ஏகந்த…பே… அத்ததி³ட்டி²வஸேனா’’தி பதா⁴னதி³ட்டி²மாஹ. பே⁴தா³னுரூபஸ்ஸ ஸாவனம் அனுஸ்ஸாவனம், பே⁴தா³னுரூபேன வா வசனேன விஞ்ஞாபனம்.

லிங்கே³ பரிவத்தே ச ஸோ ஏவ ஏககம்மனிப்³ப³த்திதோ ப⁴வங்க³ப்பப³ந்தோ⁴ ஜீவிதிந்த்³ரியப்பப³ந்தோ⁴ ச, நாஞ்ஞோதி ஆஹ ‘‘அபி பரிவத்தலிங்க³’’ந்தி. அயம் பஞ்ஹோதி ஞாபனிச்சா²னிப்³ப³த்தா கதா².

ஸங்கா³மசதுக்கம் ஸபத்தவஸேன யோஜேதப்³ப³ம். ஸப்³ப³த்த² ச புரிமம் அபி⁴ஸந்தி⁴சித்தம் அப்பமாணம், வத⁴கசித்தம் பன ததா³ரம்மணஞ்ச ஜீவிதிந்த்³ரியம் ஆனந்தரியானானந்தரியபா⁴வே பமாணந்தி த³ட்ட²ப்³ப³ம். புது²ஜ்ஜனஸ்ஸேவ தம் தி³ன்னம் ஹோதி. கஸ்மா? யதா² வத⁴கசித்தம் பச்சுப்பன்னாரம்மணம்பி ஜீவிதிந்த்³ரியப்பப³ந்த⁴விச்சே²த³னவஸேன ஆரம்மணம் கத்வா பவத்ததி, ந ஏவம் சாக³சேதனா. ஸா ஹி சஜிதப்³ப³ம் ஆரம்மணம் கத்வா சஜனமத்தமேவ ஹோதி, அஞ்ஞஸககரணஞ்ச தஸ்ஸ சஜனம், தஸ்மா யஸ்ஸ தம் ஸகம் கதம், தஸ்ஸேவ தி³ன்னம் ஹோதீதி.

ஸண்ட²…பே… கப்பவினாஸேயேவ முச்சதீதி இத³ம் கப்பட்ட²கதா²ய ந ஸமேதி. தத்த² ஹி அட்ட²கதா²யம் (கதா². அட்ட². 654-657) வுத்தம் ‘‘ஆபாயிகோதி இத³ம் ஸுத்தம் யம் ஸோ ஏகம் கப்பம் அஸீதிபா⁴கே³ கத்வா ததோ ஏகபா⁴க³மத்தம் காலம் திட்டே²ய்ய, தம் ஆயுகப்பம் ஸந்தா⁴ய வுத்த’’ந்தி. கப்பவினாஸேயேவாதி பன ஆயுகப்பவினாஸேயேவாதி அத்தே² ஸதி நத்தி² விரோதோ⁴. ஏத்த² ச ஸண்ட²ஹந்தேதி இத³ம் ஸ்வே வினஸ்ஸிஸ்ஸதீதி விய அபூ⁴தபரிகப்பவஸேன வுத்தம். ஏகதி³வஸமேவ பச்சதி ததோ பரம் கப்பாபா⁴வேன ஆயுகப்பஸ்ஸபி அபா⁴வதோதி அவிரோத⁴தோ அத்த²யோஜனா த³ட்ட²ப்³பா³.

பகதத்தோதி அனுக்கி²த்தோ. ஸமானஸம்வாஸகோதி அபாராஜிகோ.

கிம் பன தந்தி யோ ஸோ ‘‘நியதோ’’தி வுத்தோ, தம் கிம் நியமேதீதி அத்தோ². தஸ்ஸேவ பன யதா²புச்சி²தஸ்ஸ நியதஸ்ஸ மிச்ச²த்தஸம்மத்தனியதத⁴ம்மானம் விய ஸபா⁴வதோ விஜ்ஜமானதம் யதா²புச்சி²தஞ்ச நியாமகஹேதும் படிஸேதே⁴த்வா யேன ‘‘நியதோ’’தி ‘‘ஸத்தக்க²த்துபரமாதி³கோ’’தி ச வுச்சதி, தம் யதா²தி⁴ப்பேதகாரணம் த³ஸ்ஸேதும் ‘‘ஸம்மாஸம்பு³த்³தே⁴ன ஹீ’’திஆதி³மாஹ. ஜாதஸ்ஸ குமாரஸ்ஸ விய அரியாய ஜாதியா ஜாதஸ்ஸ நாமமத்தமேதம் நியதஸத்தக்க²த்துபரமாதி³கம், நியதானியதபே⁴த³ம் நாமந்தி அத்தோ². யதி³ புப்³ப³ஹேது நியாமகோ, ஸோதாபன்னோ ச நியதோதி ஸோதாபத்திமக்³க³தோ உத்³த⁴ம் திண்ணம் மக்³கா³னம் உபனிஸ்ஸயபா⁴வதோ புப்³ப³ஹேதுகிச்சம், ததோ புப்³பே³ பன புப்³ப³ஹேதுகிச்சம் நத்தீ²தி ஸோதாபத்திமக்³க³ஸ்ஸ உபனிஸ்ஸயாபா⁴வோ ஆபஜ்ஜதி. யதி³ ஹி தஸ்ஸபி புப்³ப³ஹேது உபனிஸ்ஸயோ ஸியா, ஸோ ச நியாமகோதி ஸோதாபத்திமக்³கு³ப்பத்திதோ புப்³பே³ ஏவ நியதோ ஸியா, தஞ்ச அனிட்ட²ம், தஸ்மாஸ்ஸ புப்³ப³ஹேதுனா அஹேதுகதா ஆபன்னாதி இமமத்த²ம் ஸந்தா⁴யாஹ ‘‘இச்சஸ்ஸ அஹேது அப்பச்சயா நிப்³ப³த்திம் பாபுணாதீ’’தி.

படிலத்³த⁴மக்³கோ³ ஸோதாபத்திமக்³கோ³, தேனேவ ஸத்தக்க²த்துபரமாதி³னியமே ஸதி ஸத்தமப⁴வாதி³தோ உத்³த⁴ம் பவத்தனகஸ்ஸ து³க்க²ஸ்ஸ மூலபூ⁴தா கிலேஸா தேனேவ கீ²ணாதி உபரி தயோ மக்³கா³ அகிச்சகா ஹோந்தீதி அத்தோ². யதி³ உபரி தயோ மக்³கா³ ஸத்தக்க²த்துபரமாதி³கம் நியமேந்தி, ததோ ச அஞ்ஞோ ஸோதாபன்னோ நத்தீ²தி ஸோதாபத்திமக்³க³ஸ்ஸ அகிச்சகதா நிப்பயோஜனதா ஆபஜ்ஜதீதி அத்தோ². அத² ஸக்காயதி³ட்டா²தி³ப்பஹானம் த³ஸ்ஸனகிச்சம், தேஸம் பஹானேன ஸத்தக்க²த்துபரமாதி³தாய ப⁴விதப்³ப³ம். ஸா சுபரிமக்³கே³ஹி ஏவ ஹோதீதி ஸத்தமப⁴வாதி³தோ உத்³த⁴ம் பவத்திதோ தேன வினா வுட்டா²னே ஸக்காயதி³ட்டா²தி³ப்பஹானேன ச தேன வினா ப⁴விதப்³ப³ந்தி ஆஹ ‘‘பட²மமக்³கே³ன ச அனுப்பஜ்ஜித்வாவ கிலேஸா கே²பேதப்³பா³ ஹோந்தீ’’தி. ந அஞ்ஞோ கோசி நியமேதீதி நாமகரணனிமித்ததோ விபஸ்ஸனாதோ அஞ்ஞோ கோசி நியாமகோ நாம நத்தீ²தி அத்தோ². விபஸ்ஸனாவ நியமேதீதி ச நாமகரணனிமித்ததம்யேவ ஸந்தா⁴ய வுத்தம். தேனேவாஹ ‘‘இதி ஸம்மாஸம்பு³த்³தே⁴ன க³ஹிதனாமமத்தமேவ த’’ந்தி.

ந உப்பஜ்ஜந்தீதி பன அத்தீ²தி ‘‘ந மே ஆசரியோ அத்தி², ஸதி³ஸோ மே ந விஜ்ஜதீ’’திஆதி³ம் (ம. நி. 1.285; 2.341; மஹாவ. 11; கதா². 405) இமிஸ்ஸா லோகதா⁴துயா ட²த்வா வத³ந்தேன ப⁴க³வதா ‘‘கிம் பனாவுஸோ ஸாரிபுத்த, அத்தே²தரஹி அஞ்ஞே ஸமணா வா ப்³ராஹ்மணா வா ப⁴க³வதா ஸமஸமா ஸம்போ³தி⁴யந்தி ஏவம் புட்டா²ஹம், ப⁴ந்தே, நோதி வதே³ய்ய’’ந்தி (தீ³. நி. 3.161) வத்வா தஸ்ஸ காரணம் த³ஸ்ஸேதும் ‘‘அட்டா²னமேதம் அனவகாஸோ, யம் ஏகிஸ்ஸா லோகதா⁴துயா த்³வே அரஹந்தோ ஸம்மாஸம்பு³த்³தா⁴’’தி (ம. நி. 3.129) இமம் ஸுத்தம் த³ஸ்ஸேந்தேன த⁴ம்மஸேனாபதினா ச பு³த்³த⁴க்கே²த்தபூ⁴தம் இமம் லோகதா⁴தும் ட²பேத்வா அஞ்ஞத்த² அனுப்பத்தி வுத்தா ஹோதீதி அதி⁴ப்பாயோ.

‘‘யோ பன பி⁴க்கூ²’’திஆதி³னா வுத்தானி ஸிக்கா²பதா³னி மாதிகா, தாய அந்தரஹிதாய நிதா³னுத்³தே³ஸஸங்கா²தே பாதிமோக்கே² பப்³ப³ஜ்ஜூபஸம்பதா³கம்மேஸு ச ஸாஸனம் திட்ட²தீதி அத்தோ². பாதிமோக்கே² வா அந்தோக³தா⁴ பப்³ப³ஜ்ஜா உபஸம்பதா³ ச தது³ப⁴யாபா⁴வே பாதிமோக்கா²பா⁴வதோ, தஸ்மா பாதிமோக்கே², தாஸு ச ஸாஸனம் திட்ட²தீதி வுத்தம். ஓஸக்கிதம் நாமாதி பச்சி²மபடிவேத⁴ஸீலபே⁴த³த்³வயம் ஏகதோ கத்வா ததோ பரம் வினட்ட²ம் நாம ஹோதீதி அத்தோ².

தாதி ரஸ்மியோ. காருஞ்ஞந்தி பரிதே³வனகாருஞ்ஞம்.

அனச்ச²ரியத்தாதி த்³வீஸு உப்பஜ்ஜமானேஸு அச்ச²ரியத்தாபா⁴வதோ³ஸதோதி அத்தோ². விவாத³பா⁴வதோதி விவாதா³பா⁴வத்த²ம் த்³வே ந உப்பஜ்ஜந்தீதி அத்தோ².

ஏகம் பு³த்³த⁴ம் தா⁴ரேதீதி ஏகபு³த்³த⁴தா⁴ரணீ. ஏதேன ஏவம்ஸபா⁴வா ஏதே பு³த்³த⁴கு³ணா, யேன து³தியபு³த்³த⁴கு³ணே தா⁴ரேதும் அஸமத்தா² அயம் லோகதா⁴தூதி த³ஸ்ஸேதி. பச்சயவிஸேஸனிப்ப²ன்னானஞ்ஹி த⁴ம்மானம் ஸபா⁴வவிஸேஸோ ந ஸக்கா தா⁴ரேதுந்தி. ஸமம் உத்³த⁴ம் பஜ்ஜதீதி ஸமுபாதி³கா, உத³கஸ்ஸோபரி ஸமம் கா³மினீதி அத்தோ². த்³வின்னம்பீதி த்³வேபி, த்³வின்னம்பி வா ஸரீரபா⁴ரம். சா²தே³ந்தந்தி ரோசயமானம். ஸகிம் பு⁴த்தோவாதி ஏகம்பி ஆலோபம் அஜ்ஜோ²ஹரித்வாவ மரேய்யாதி அத்தோ².

அதித⁴ம்மபா⁴ரேனாதி த⁴ம்மேன நாம பத²வீ திட்டே²ய்ய, ஸா கிம் தேனேவ சலதீதி அதி⁴ப்பாயோ. புன தே²ரோ ‘‘ரதனம் நாம லோகே குடும்ப³ம் ஸந்தா⁴ரேந்தம் அபி⁴மதஞ்ச லோகேன அத்தனோ க³ருஸபா⁴வதாய ஸகடப⁴ங்க³ஸ்ஸ காரணம் அதிபா⁴ரபூ⁴தம் தி³ட்ட²ம். ஏவம் த⁴ம்மோ ச ஹிதஸுக²விஸேஸேஹி தம்ஸமங்கி³னம் தா⁴ரேந்தோ அபி⁴மதோ ச விஞ்ஞூஹி க³ம்பீ⁴ராப்பமேய்யபா⁴வேன க³ருஸபா⁴வத்தா அதிபா⁴ரபூ⁴தோ பத²வீசலனஸ்ஸ காரணம் ஹோதீ’’தி த³ஸ்ஸேந்தோ ‘‘இத⁴, மஹாராஜ, த்³வே ஸகடா’’திஆதி³மாஹ. ஏகஸ்ஸாதி ஏகஸ்மா, ஏகஸ்ஸ வா ஸகடஸ்ஸ ரதனம், தஸ்மா ஸகடதோ க³ஹேத்வாதி அத்தோ². ஓஸாரிதந்தி பவேஸிதம் ஆஹடம் வுத்தந்தி அத்தோ².

ஸபா⁴வபகதிகாதி அகித்திமபகதிகாதி அத்தோ². காரணமஹந்தத்தாதி மஹந்தேஹி பாரமிதாகாரணேஹி பு³த்³த⁴கு³ணானம் நிப்³ப³த்திதோதி வுத்தம் ஹோதி. பத²வீஆத³யோ மஹந்தா அத்தனோ அத்தனோ விஸயே ஏகேகாவ, ஏவம் ஸம்மாஸம்பு³த்³தோ⁴பி மஹந்தோ அத்தனோ விஸயே ஏகோ ஏவ. கோ ச தஸ்ஸ விஸயோ? யாவதகம் ஞேய்யம், ஏவம் ஆகாஸோ விய அனந்தவிஸயோ ப⁴க³வா ஏகோ ஏவ ஹோதீதி வத³ந்தோ லோகதா⁴த்வந்தரேஸுபி து³தியஸ்ஸ அபா⁴வம் த³ஸ்ஸேதி.

புப்³ப³பா⁴கே³ ஆயூஹனவஸேன ஆயூஹனஸமங்கி³தா ஸன்னிட்டா²னசேதனாவஸேன சேதனாஸமங்கி³தா ச வேதி³தப்³பா³, ஸந்ததிக²ணவஸேன வா. விபாகாரஹந்தி து³தியப⁴வாதீ³ஸு விபச்சனபகதிதம் ஸந்தா⁴ய வத³தி. சலதீதி பரிவத்ததி. ஸுனகே²ஹி வஜனஸீலோ ஸுனக²வாஜிகோ.

பட²மப³லனித்³தே³ஸவண்ணனா நிட்டி²தா.

து³தியப³லனித்³தே³ஸவண்ணனா

810. க³திதோ அஞ்ஞா க³திஸம்பத்தி நாம நத்தீ²தி த³ஸ்ஸேந்தோ ‘‘ஸம்பன்னா க³தீ’’தி ஆஹ. மஹாஸுத³ஸ்ஸனாதி³ஸுராஜகாலோ பட²மகப்பிகாதி³ஸுமனுஸ்ஸகாலோ ச காலஸம்பத்தி.

ஏகந்தம் குஸலஸ்ஸேவ ஓகாஸோதி இத³ம் யதி³பி கோசி காயஸுசரிதாதி³பயோக³ஸம்பத்தியம் டி²தம் பா³தே⁴ய்ய, தம் பன பா³த⁴னம் பா³த⁴கஸ்ஸேவ இஸ்ஸாதி³னிமித்தேன விபரீதக்³கா³ஹேன ஜாதம். ஸா பயோக³ஸம்பத்தி ஸபா⁴வதோ ஸுக²விபாகஸ்ஸேவ பச்சயோ, ந து³க்க²விபாகஸ்ஸாதி இமமத்த²ம் ஸந்தா⁴ய வுத்தம். மக்கடோ ப⁴த்தபுடம் ப³ந்த⁴ட்டா²னே முஞ்சித்வா பு⁴ஞ்ஜிதும் ந ஜானாதி, யத்த² வா தத்த² வா பி⁴ந்தி³த்வா வினாஸேதி, ஏவம் அனுபாயஞ்ஞூபி போ⁴கே³. ஸுஸானே ச²ட்³டே³த்வாதிஆதி³னா கா⁴தேத்வா ச²ட்³டி³தஸ்ஸ வுட்டா²னாபா⁴வோ விய அபாயதோ வுட்டா²னாபா⁴வோதி த³ஸ்ஸேதி.

‘‘பச்சரீ’’திபி உளும்பஸ்ஸ நாமம், தேன ஏத்த² கதா ‘‘மஹாபச்சரீ’’தி வுச்சதி. உத³கே மரணம் த²லே மரணஞ்ச ஏகமேவாதி கஸ்மா வுத்தம், நனு ஸக்கேன ‘‘ஸமுத்³தா³ரக்க²ம் கரிஸ்ஸாமீ’’தி வுத்தந்தி? ஸச்சம் வுத்தம், ஜீவிதஸ்ஸ லஹுபரிவத்திதம் பகாஸேந்தேஹி தே²ரேஹி ஏவம் வுத்தம், லஹுபரிவத்திதாய ஜீவிதஹேது ந க³மிஸ்ஸாமாதி அதி⁴ப்பாயோ. அத² வா உத³கேதி நாக³தீ³பம் ஸந்தா⁴ய வுத்தம், த²லேதி ஜம்பு³தீ³பம்.

தே²ரோ ந தே³தீதி கத²மஹம் ஏதேன ஞாதோ, கேனசி கிஞ்சி ஆசிக்கி²தம் ஸியாதி ஸஞ்ஞாய ந அதா³ஸி. தேனேவ ‘‘மயம்பி ந ஜானாமா’’தி வுத்தம். அபரஸ்ஸாதி அபரஸ்ஸ பி⁴க்கு²னோ பத்தம் ஆதா³ய…பே… தே²ரஸ்ஸ ஹத்தே² ட²பேஸீதி யோஜனா. அனாயதனேதி நிக்காரணே, அயுத்தே வா நஸ்ஸனட்டா²னே. துவம் அத்தானம் ரக்கே²ய்யாஸி, மயம் பன மஹல்லகத்தா கிம் ரக்கி²த்வா கரிஸ்ஸாம, மஹல்லகத்தா ஏவ ச ரக்கி²தும் ந ஸக்கி²ஸ்ஸாமாதி அதி⁴ப்பாயோ. அனாகா³மித்தா வா தே²ரோ அத்தனா வத்தப்³ப³ம் ஜானித்வா ஓவத³தி.

ஸம்மாபயோக³ஸ்ஸ க³தமக்³கோ³தி ஸம்மாபயோகே³ன நிப்பா²தி³தத்தா தஸ்ஸ ஸஞ்ஜானனகாரணந்தி அத்தோ².

பூ⁴தமத்த²ம் கத்வா அபூ⁴தோபமம் கத²யிஸ்ஸதீதி அதி⁴ப்பாயோ. மனுஸ்ஸாதி ப⁴ண்டா³கா³ரிகாதி³னியுத்தா மனுஸ்ஸா மஹந்தத்தா ஸம்படிச்சி²தும் நாஸக்கி²ம்ஸு.

து³தியப³லனித்³தே³ஸவண்ணனா நிட்டி²தா.

ததியப³லனித்³தே³ஸவண்ணனா

811. அஞ்சிதாதி க³தா. பேச்சாதி புன, மரித்வாதி வா அத்தோ². உஸ்ஸன்னத்தாதி விதக்கப³ஹுலதாய உஸ்ஸன்னத்தாதி வத³ந்தி, ஸூரதாதீ³ஹி வா உஸ்ஸன்னத்தா. தி³ப்³ப³ந்தீதி கீளந்தி.

ஸஞ்ஜீவகாளஸுத்தஸங்கா⁴தரோருவமஹாரோருவதாபனமஹாதாபனஅவீசியோ அட்ட² மஹானிரயா. ஏகேகஸ்ஸ சத்தாரி த்³வாரானி, ஏகேகஸ்மிம் த்³வாரே சத்தாரோ சத்தாரோ கூ³த²னிரயாத³யோதி ஏவம் ஸோளஸ உஸ்ஸத³னிரயே வண்ணயந்தி.

ஸக்கஸுயாமாத³யோ விய ஜேட்ட²கதே³வராஜா. பஜாபதிவருணஈஸானாத³யோ விய து³தியாதி³ட்டா²னந்தரகாரகோ பரிசாரகோ ஹுத்வா.

ததியப³லனித்³தே³ஸவண்ணனா நிட்டி²தா.

சதுத்த²ப³லனித்³தே³ஸவண்ணனா

812. கப்போதி த்³வேதா⁴பூ⁴தக்³கோ³. ஏத்த² ச பீ³ஜாதி³தா⁴துனானத்தவஸேன க²ந்தா⁴தி³தா⁴துனானத்தம் வேதி³தப்³ப³ம்.

சதுத்த²ப³லனித்³தே³ஸவண்ணனா நிட்டி²தா.

பஞ்சமப³லனித்³தே³ஸவண்ணனா

813. அஜ்ஜா²ஸயதா⁴தூதி அஜ்ஜா²ஸயஸபா⁴வோ. யதா² கூ³தா²தீ³னம் தா⁴துஸபா⁴வோ ஏஸோ, யம் கூ³தா²தீ³ஹேவ ஸம்ஸந்த³தி, ஏவம் புக்³க³லானம் அஜ்ஜா²ஸயஸ்ஸேவேஸ ஸபா⁴வோ, யம் து³ஸ்ஸீலாத³யோ து³ஸ்ஸீலாதி³கேஹேவ ஸம்ஸந்த³ந்தீதி வுத்தம் ஹோதி. பி⁴க்கூ²பி ஆஹம்ஸூதி அஞ்ஞமஞ்ஞம் ஆஹம்ஸு. ஆவுஸோ இமே மனுஸ்ஸா ‘‘யதா²ஸபா⁴கே³ன பரிபு⁴ஞ்ஜதா²’’தி வத³ந்தா அம்ஹே ஸபா⁴கா³ஸபா⁴கே³ விதி³த்வா ஹீனஜ்ஜா²ஸயபணீதஜ்ஜா²ஸயதம் பரிச்சி²ந்தி³த்வா தா⁴துஸம்யுத்தகம்மே உபனேந்தி தஸ்ஸ பயோக³ம் த³ட்டு²காமாதி அத்தோ², ஏவம் ஸபா⁴க³வஸேனேவ அஜ்ஜா²ஸயதா⁴துபரிச்சி²ந்த³னதோ அஜ்ஜா²ஸயதா⁴துஸபா⁴க³வஸேன நியமேதீதி அதி⁴ப்பாயோ.

பஞ்சமப³லனித்³தே³ஸவண்ணனா நிட்டி²தா.

ச²ட்ட²ப³லனித்³தே³ஸவண்ணனா

சரிதந்தி இத⁴ து³ச்சரிதம் ஸுசரிதந்தி வுத்தம். அப்பரஜம் அக்க²ம் ஏதேஸந்தி அப்பரஜக்கா²தி அத்தோ² விபா⁴விதோ, அப்பரஜம் அக்கி²ம்ஹி ஏதேஸந்தி அப்பரஜக்கா²திபி ஸத்³த³த்தோ² ஸம்ப⁴வதி. ஏத்த² ச ஆஸயஜானனாதி³னா யேஹி இந்த்³ரியேஹி பரோபரேஹி ஸத்தா கல்யாணபாபாஸயாதி³கா ஹோந்தி, தேஸம் ஜானனம் விபா⁴வேதீதி வேதி³தப்³ப³ம். ஏவஞ்ச கத்வா இந்த்³ரியபரோபரியத்தஆஸயானுஸயஞாணானம் விஸும் அஸாதா⁴ரணதா, இந்த்³ரியபரோபரியத்தனானாதி⁴முத்திகதாஞாணானம் விஸும் ப³லதா ச ஸித்³தா⁴ ஹோதி.

815. யத³ரியாதி யே அரியா. ஆவஸிம்ஸூதி நிஸ்ஸாய வஸிம்ஸு. கே பன தே? ‘‘இத⁴, பி⁴க்க²வே, பி⁴க்கு² பஞ்சங்க³விப்பஹீனோ ஹோதி ச²ளங்க³ஸமன்னாக³தோ ஏகாரக்கோ² சதுராபஸ்ஸேனோ பனுண்ணபச்சேகஸச்சோ ஸமவயஸட்டே²ஸனோ அனாவிலஸங்கப்போ பஸ்ஸத்³த⁴காயஸங்கா²ரோ ஸுவிமுத்தசித்தோ ஸுவிமுத்தபஞ்ஞோ’’தி (தீ³. நி. 3.348; அ. நி. 10.19) ஏவம் வுத்தா. ஏதேஸு பஞ்சங்க³விப்பஹீனபச்சேகஸச்சபனோத³னஏஸனாஸமவயஸஜ்ஜனானி ‘‘ஸங்கா²யேகம் படிஸேவதி அதி⁴வாஸேதி பரிவஜ்ஜேதி வினோதே³தீ’’தி (ம. நி. 2.168) வுத்தேஸு அபஸ்ஸேனேஸு வினோத³னஞ்ச மக்³க³கிச்சானேவ, இதரே ச மக்³கே³னேவ ஸமிஜ்ஜ²ந்தி. தேனாஹ ‘‘ஏதஞ்ஹி ஸுத்தம்…பே… தீ³பேதீ’’தி.

816. ஆரம்மணஸந்தானானுஸயனேஸு இட்டா²ரம்மணே ஆரம்மணானுஸயனேன அனுஸேதி. ஆசிண்ணஸமாசிண்ணாதி ஏதேன ஸமந்ததோ வேடே²த்வா விய டி²தபா⁴வேன அனுஸயிததம் த³ஸ்ஸேதி. ப⁴வஸ்ஸபி வத்து²காமத்தா, ராக³வஸேன வா ஸமானத்தா ‘‘ப⁴வராகா³னுஸயோ…பே… ஸங்க³ஹிதோ’’தி ஆஹ.

818. ‘‘பணீதாதி⁴முத்திகா திக்கி²ந்த்³ரியா, இதரே முதி³ந்த்³ரியா’’தி ஏவம் இந்த்³ரியவிஸேஸத³ஸ்ஸனத்த²மேவ அதி⁴முத்திக்³க³ஹணந்தி ஆஹ ‘‘திக்கி²ந்த்³ரியமுதி³ந்த்³ரியபா⁴வத³ஸ்ஸனத்த²’’ந்தி.

819. பஹானக்கமவஸேனாதி ஏத்த² பஹாதப்³ப³பஜஹனக்கமோ பஹானக்கமோதி த³ட்ட²ப்³போ³, யஸ்ஸ பஹானேன ப⁴விதப்³ப³ம், தம் தேனேவ பஹானேன பட²மம் வுச்சதி, ததோ அப்பஹாதப்³ப³ந்தி அயம் வா பஹானக்கமோ.

820. மக்³க³ஸ்ஸ உபனிஸ்ஸயபூ⁴தானி இந்த்³ரியானி உபனிஸ்ஸயஇந்த்³ரியானி.

826. நிப்³பு³திச²ந்த³ரஹிதத்தா அச்ச²ந்தி³கட்டா²னம் பவிட்டா². யஸ்மிம் ப⁴வங்கே³ பவத்தமானே தம்ஸந்ததியம் லோகுத்தரம் நிப்³ப³த்ததி, தம் தஸ்ஸ பாத³கம்.

ச²ட்ட²ப³லனித்³தே³ஸவண்ணனா நிட்டி²தா.

ஸத்தமப³லனித்³தே³ஸவண்ணனா

828. நித்³தா³யித்வாதி கம்மட்டா²னம் மனஸி கரோந்தோ நித்³த³ம் ஓக்கமித்வா படிபு³த்³தோ⁴ ஸமாபத்திம் ஸமாபன்னோம்ஹீதி அத்தோ². நீவரணாதீ³ஹி விஸுத்³த⁴சித்தஸந்ததி ஏவ சித்தமஞ்ஜூஸா, ஸமாதி⁴ வா, கம்மட்டா²னம் வா. சித்தம் ட²பேதுந்தி ஸமாபத்திசித்தம் ட²பேதும். ஸஞ்ஞாவேத³யிதானம் அபக³மோ ஏவ அபக³மவிமோக்கோ².

ஸஞ்ஞாமனஸிகாரானம் காமாதி³து³தியஜ்ஜா²னாதி³பக்க²ந்த³னானி ‘‘ஹானபா⁴கி³யவிஸேஸபா⁴கி³யத⁴ம்மா’’தி த³ஸ்ஸிதானி, தேஹி பன ஜா²னானம் தம்ஸபா⁴வதா த⁴ம்ம-ஸத்³தே³ன வுத்தா. பகு³ணபா⁴வவோதா³னம் பகு³ணவோதா³னம். ததே³வ பட²மஜ்ஜா²னாதீ³ஹி வுட்ட²ஹித்வா து³தியஜ்ஜா²னாதி³அதி⁴க³மஸ்ஸ பச்சயத்தா ‘‘வுட்டா²னம் நாமா’’தி வுத்தம். ‘‘வோதா³னம்பி வுட்டா²னம், தம்ஹா தம்ஹா ஸமாதி⁴ம்ஹா வுட்டா²னம்பி வுட்டா²ன’’ந்தி இமாய வுட்டா²னபாளியா அஸங்க³ஹிதத்தா நிரோத⁴ஸமாபத்தியா வுட்டா²னம் ‘‘பாளிமுத்தகவுட்டா²னம் நாமா’’தி வுத்தம். யே பன ‘‘நிரோத⁴தோ ப²லஸமாபத்தியா வுட்டா²ன’’ந்தி பாளி நத்தீ²தி வதே³ய்யும், தே ‘‘நிரோதா⁴ வுட்ட²ஹந்தஸ்ஸ நேவஸஞ்ஞானாஸஞ்ஞாயதனம் ப²லஸமாபத்தியா அனந்தரபச்சயேன பச்சயோ’’தி (பட்டா². 1.1.417) இமாய பாளியா படிஸேதே⁴தப்³பா³.

ஸத்தமப³லனித்³தே³ஸவண்ணனா நிட்டி²தா.

த³ஸமப³லனித்³தே³ஸவண்ணனா

831. ராகா³தீ³ஹி சேதஸோ விமுத்திபூ⁴தோ ஸமாதி⁴ சேதோவிமுத்தி. பஞ்ஞாவ விமுத்தி பஞ்ஞாவிமுத்தி. கம்மந்தரவிபாகந்தரமேவாதி கம்மந்தரஸ்ஸ விபாகந்தரமேவாதி அத்தோ². சேதனாசேதனாஸம்பயுத்தகத⁴ம்மே நிரயாதி³னிப்³பா³னகா³மினிபடிபதா³பூ⁴தே கம்மந்தி க³ஹேத்வா ஆஹ ‘‘கம்மபரிச்சே²த³மேவா’’தி. அப்பேதும் ந ஸக்கோதி அட்ட²மனவமப³லானி விய, தம்ஸதி³ஸம் இத்³தி⁴வித⁴ஞாணம் விய விகுப்³பி³தும். ஏதேன த³ஸப³லஸதி³ஸதஞ்ச வாரேதி, ஜா²னாதி³ஞாணம் விய வா அப்பேதும் விகுப்³பி³துஞ்ச. யதி³பி ஹி ஜா²னாதி³பச்சவேக்க²ணஞாணம் ஸத்தமப³லந்தி தஸ்ஸ ஸவிதக்கஸவிசாரதா வுத்தா, ததா²பி ஜா²னாதீ³ஹி வினா பச்சவேக்க²ணா நத்தீ²தி ஜா²னாதி³ஸஹக³தம் ஞாணம் தத³ந்தோக³த⁴ம் கத்வா ஏவம் வுத்தந்தி வேதி³தப்³ப³ம். அத² வா ஸப்³ப³ஞ்ஞுதஞ்ஞாணம் ஜா²னாதி³கிச்சம் விய ந ஸப்³ப³ம் ப³லகிச்சம் காதும் ஸக்கோதீதி த³ஸ்ஸேதும் ‘‘தஞ்ஹி ஜா²னம் ஹுத்வா அப்பேதும் இத்³தி⁴ ஹுத்வா விகுப்³பி³துஞ்ச ந ஸக்கோதீ’’தி வுத்தம், ந பன கஸ்ஸசி ப³லஸ்ஸ ஜா²னஇத்³தி⁴பா⁴வதோதி த³ட்ட²ப்³ப³ம்.

த³ஸமப³லனித்³தே³ஸவண்ணனா நிட்டி²தா.

ஞாணவிப⁴ங்க³வண்ணனா நிட்டி²தா.