6. ஸஹஜாதபச்சயனித்³தே³ஸவண்ணனா

6. ‘‘அஞ்ஞமஞ்ஞஸ்ஸாதி அஞ்ஞோ அஞ்ஞஸ்ஸா’’தி போராணபாடோ². பாளியம் பன ‘‘அஞ்ஞமஞ்ஞம் ஸஹஜாதபச்சயேன பச்சயோ’’தி ஏத்த² வுத்தஸ்ஸ ‘‘அஞ்ஞமஞ்ஞ’’ந்தி இமஸ்ஸ அத்தோ² வத்தப்³போ³, ந அவுத்தஸ்ஸ ‘‘அஞ்ஞமஞ்ஞஸ்ஸா’’தி இமஸ்ஸ, ந ச ஸமானத்த²ஸ்ஸபி ஸத்³த³ந்தரஸ்ஸ அத்தே² வுத்தே ஸத்³த³ந்தரஸ்ஸ அத்தோ² வுத்தோ ஹோதி, தஸ்மா ‘‘அஞ்ஞமஞ்ஞந்தி அஞ்ஞோ அஞ்ஞஸ்ஸா’’தி பட²ந்தி. ஓக்கந்தீதி பஞ்சவோகாரபடிஸந்தி⁴யேவ வுச்சதி, ந இதராதி இமினா அதி⁴ப்பாயேனாஹ ‘‘பஞ்சவோகாரப⁴வே படிஸந்தி⁴க்க²ணே’’தி. ரூபினோ த⁴ம்மா அரூபீனம் த⁴ம்மானந்தி இத³ம் யதி³பி புப்³பே³ ‘‘ஓக்கந்திக்க²ணே நாமரூப’’ந்தி வுத்தம், ததா²பி ந தேன க²ணந்தரே பச்சயபா⁴வோ ரூபீனம் நிவாரிதோதி தன்னிவாரணத்த²ம் வுத்தம். கஞ்சி காலேதி கேசி கிஸ்மிஞ்சி காலேதி வா அத்தோ². தேன ரூபினோ த⁴ம்மா கேசி வத்து²பூ⁴தா கிஸ்மிஞ்சி படிஸந்தி⁴காலேதி ரூபந்தரானம் வத்து²ஸ்ஸ ச காலந்தரே அரூபீனம் ஸஹஜாதபச்சயம் புப்³பே³ அனிவாரிதம் நிவாரேதி. ஏவஞ்ச கத்வா ‘‘கஞ்சி கால’’ந்தி வா ‘‘கிஸ்மிஞ்சி காலே’’தி வா வத்தப்³பே³ விப⁴த்திவிபல்லாஸோ கதோ. தேன ஹி ‘‘கஞ்சீ’’தி உபயோகே³கவசனம் ‘‘ரூபினோ த⁴ம்மா’’தி ஏதேன ஸஹ ஸம்ப³ந்தே⁴ன பச்சத்தப³ஹுவசனஸ்ஸ ஆதே³ஸோ, ‘‘காலே’’தி இமினா ஸம்ப³ந்தே⁴ன பு⁴ம்மேகவசனஸ்ஸாதி விஞ்ஞாயதி. புரிமேன ச ‘‘ஏகோ க²ந்தோ⁴ வத்து² ச திண்ணன்னம் க²ந்தா⁴ன’’ந்திஆதி³னா நாமஸஹிதஸ்ஸேவ வத்து²ஸ்ஸ ‘‘நாமஸ்ஸ பச்சயோ’’தி வத்தப்³ப³த்தே ஆபன்னே ஏதேன கேவலஸ்ஸேவ ததா² வத்தப்³ப³தம் த³ஸ்ஸேதி.

தயோ ந அஞ்ஞமஞ்ஞவஸேனாதி லப்³ப⁴மானேபி கத்த²சி அஞ்ஞமஞ்ஞஸஹஜாதபச்சயபா⁴வே வசனேன அஸங்க³ஹிதத்தா தஸ்ஸ ஏவம் வுத்தந்தி த³ட்ட²ப்³ப³ம். சதுஸமுட்டா²னிகஸ்ஸ ரூபஸ்ஸ ஏகதே³ஸபூ⁴தே கம்மஸமுட்டா²னரூபே ஸமுதா³யேகதே³ஸவஸேன ஸாமிவசனம் த³ட்ட²ப்³ப³ம், நித்³தா⁴ரணே வா.

ஸஹஜாதபச்சயனித்³தே³ஸவண்ணனா நிட்டி²தா.