2. ஆரம்மணபச்சயனித்³தே³ஸவண்ணனா

2. உப்பஜ்ஜனக்க²ணேயேவாதி ஏதேன வத்தமானக்க²ணேகதே³ஸேன ஸப்³ப³ம் வத்தமானக்க²ணம் க³ய்ஹதீதி த³ட்ட²ப்³ப³ம். ந ஹி உப்பஜ்ஜனக்க²ணேயேவ சக்கு²விஞ்ஞாணாதீ³னம் ரூபாதீ³னி ஆரம்மணபச்சயோ, அத² கோ² ஸப்³ப³ஸ்மிம் வத்தமானக்க²ணேதி. தேன ஆலம்பி³யமானானம்பி ரூபாதீ³னம் சக்கு²விஞ்ஞாணாதி³வத்தமானதாய புரே பச்சா² ச விஜ்ஜமானானம் ஆரம்மணபச்சயத்தாபா⁴வம் த³ஸ்ஸேதி, கோ பன வாதோ³ அனாலம்பி³யமானானம். ந ஏகதோ ஹோந்தீதி நீலாதீ³னி ஸப்³ப³ரூபானி ஸஹ ந ஹோந்தி, ததா² ஸத்³தா³த³யோபீதி அத்தோ². ‘‘யம் ய’’ந்தி ஹி வசனம் ரூபாதீ³னி பி⁴ந்த³தீதி. தத்த² புரிமேனத்தே²ன ‘‘உப்பஜ்ஜந்தீ’’தி வசனேன ஆரம்மணபச்சயபா⁴வலக்க²ணதீ³பனத்த²ம் ‘‘யம் யம் த⁴ம்ம’’ந்திஆதி³ வுத்தந்தி த³ஸ்ஸேதி, பச்சி²மேன ‘‘யம் ய’’ந்தி வசனேன ரூபாதி³பே⁴த³தீ³பனத்த²ந்தி. ‘‘யம் யம் வா பனாரப்³பா⁴’’தி ஏதஸ்ஸ வண்ணனாயம் த³ஸ்ஸிதஸப்³பா³ரம்மணாதி³வஸேன வா இதா⁴பி அத்தோ² க³ஹேதப்³போ³தி.

ஏவம் வுத்தந்தி யதா² நதீ³பப்³ப³தானம் ஸந்த³னம் டா²னஞ்ச பவத்தம் அவிரதம் அவிச்சி²ன்னந்தி ஸந்த³ந்தி திட்ட²ந்தீதி வத்தமானவசனம் வுத்தம், ஏவம் ‘‘யே யே த⁴ம்மா’’தி அதீதானாக³தபச்சுப்பன்னானம் ஸப்³ப³ஸங்க³ஹஸமுதா³யவஸேன க³ஹிதத்தா தேஸம் உப்பஜ்ஜனம் பவத்தனம் அவிரதந்தி உப்பஜ்ஜந்தீதி வத்தமானவசனம் வுத்தந்தி அதி⁴ப்பாயோ. இமே பன ந ஹேதாதி³பச்சயா ஸப்³பே³பி அதீதானாக³தானம் ஹோந்தி. ந ஹி அதீதோ ச அனாக³தோ ச அத்தி², யஸ்ஸேதே பச்சயா ஸியும். ஏவஞ்ச கத்வா அதீதத்திகே அதீதானாக³தானம் ந கோசி பச்சயோ வுத்தோ, தஸ்மா இதா⁴பி ‘‘உப்பஜ்ஜந்தீ’’தி வசனேன யேஸம் ரூபாத³யோ ஆரம்மணத⁴ம்மா ஆரம்மணபச்சயா ஹோந்தி, தே பச்சுப்பன்னாவ த³ஸ்ஸிதாதி த³ட்ட²ப்³பா³. தேஸு ஹி த³ஸ்ஸிதேஸு அதீதானாக³தேஸு தம்தம்பச்சயா அஹேஸும் ப⁴விஸ்ஸந்தி சாதி அயமத்தோ² த³ஸ்ஸிதோ ஹோதி, ந பன தம்தம்பச்சயவந்ததா. பச்சயவந்தோ ஹி பச்சுப்பன்னாயேவாதி.

ஏத்த² ச ‘‘யம் யம் த⁴ம்மம் ஆரப்³பா⁴’’தி ஏகவசனனித்³தே³ஸம் கத்வா புன ‘‘தே தே த⁴ம்மா’’தி ப³ஹுவசனனித்³தே³ஸோ ‘‘யம் ய’’ந்தி வுத்தஸ்ஸ ஆரம்மணத⁴ம்மஸ்ஸ அனேகபா⁴வோபி அத்தீ²தி த³ஸ்ஸனத்தோ². சத்தாரோ ஹி க²ந்தா⁴ ஸஹேவ ஆரம்மணபச்சயா ஹோந்தி, தே ஸப்³பே³பி ஆரப்³ப⁴ உப்பஜ்ஜமானம்பி தேஸு ஏகேகம் ஆரப்³ப⁴ உப்பஜ்ஜமானம் ந ந ஹோதி, தஸ்மா வேத³னாதீ³ஸு ப²ஸ்ஸாதீ³ஸு ச ஏகேகஸ்ஸபி ஆரம்மணபச்சயபா⁴வத³ஸ்ஸனத்த²ம் ‘‘யம் ய’’ந்தி வுத்தம், ஸப்³பே³ஸம் ஏகசித்துப்பாத³பரியாபன்னானம் ஆரம்மணபச்சயபா⁴வத³ஸ்ஸனத்த²ம் ‘‘தே தே’’தி. தத்த² யோ ச ரூபாதி³கோ ஏகேகோவ யம்யம்-ஸத்³தே³ன வுத்தோ, யே ச அனேகே ப²ஸ்ஸாத³யோ ஏகேகவஸேன யம்யம்-ஸத்³தே³ன வுத்தா, தே ஸப்³பே³ க³ஹேத்வா ‘‘தே தே’’தி வுத்தந்தி த³ட்ட²ப்³ப³ம். அத² வா யஸ்மிம் காலே ஆரப்³ப⁴ உப்பஜ்ஜந்தி, தஸ்மிம் காலே நீலாதீ³ஸு சித்துப்பாதே³ஸு ச ஏகேகமேவ ஆரப்³ப⁴ உப்பஜ்ஜந்தீதி த³ஸ்ஸனத்த²ம் ‘‘யம் ய’’ந்தி வுத்தம், தே பன ஆலம்பி³யமானா ரூபாரம்மணத⁴ம்மா ச அனேகே, ததா² ஸத்³தா³தி³ஆரம்மணத⁴ம்மா சாதி த³ஸ்ஸனத்த²ம் ‘‘தே தே’’தி.

நிப்³பா³னாரம்மணம் காமாவசரரூபாவசரகுஸலஸ்ஸ அபரியாபன்னதோ குஸலவிபாகஸ்ஸ காமாவசரரூபாவசரகிரியஸ்ஸ சாதி இமேஸம் ச²ன்னம் ராஸீனம் ஆரம்மணபச்சயோ ஹோதீதி இத³ம் புப்³பே³னிவாஸானுஸ்ஸதிஞாணேன க²ந்த⁴படிப³த்³தா⁴னுஸ்ஸரணகாலே நிப்³பா³னம்பி ரூபாவசரகுஸலகிரியானம் ஆரம்மணம் ஹோதீதி இமினா அதி⁴ப்பாயேன வுத்தம். ஏவம் ஸதி யதா² ‘‘அப்பமாணா க²ந்தா⁴ புப்³பே³னிவாஸானுஸ்ஸதிஞாணஸ்ஸ ஆரம்மணபச்சயேன பச்சயோ’’தி (பட்டா². 2.12.58) வுத்தம், ஏவம் ‘‘நிப்³பா³ன’’ந்தி ச வத்தப்³ப³ம் ஸியா, ந ச தம் வுத்தம். ந ஹி நிப்³பா³னம் புப்³பே³ நிவுட்ட²ம் அஸங்க²தத்தா, ந ச புப்³பே³னிவாஸானுஸ்ஸதிஞாணேன புப்³பே³ நிவுட்டே²ஸு அப்பமாணக்க²ந்தே⁴ஸு ஞாதேஸு நிப்³பா³னஜானனே ந தேன பயோஜனம் அத்தி². யதா² ஹி சேதோபரியஞாணம் சித்தம் விபா⁴வேந்தமேவ சித்தாரம்மணஜானனஸ்ஸ காமாவசரஸ்ஸ பச்சயோ ஹோதி, ஏவமித³ம்பி அப்பமாணக்க²ந்தே⁴ விபா⁴வேந்தமேவ ததா³ரம்மணஜானனஸ்ஸ காமாவசரஸ்ஸ பச்சயோ ஹோதீதி. தி³ட்ட²னிப்³பா³னோயேவ ச புப்³பே³ நிவுட்டே² அப்பமாணக்க²ந்தே⁴ அனுஸ்ஸரதி, தேன யதா²தி³ட்ட²மேவ நிப்³பா³னம் தேஸம் க²ந்தா⁴னம் ஆரம்மணந்தி த³ட்ட²ப்³ப³ம், ந பன புப்³பே³னிவாஸானுஸ்ஸதிஞாணேன ததா³ரம்மணவிபா⁴வனம் காதப்³ப³ம். விபூ⁴தமேவ ஹி தம் தஸ்ஸாதி. ஏவம் அனாக³தம்ஸஞாணேபி யதா²ரஹம் யோஜேதப்³ப³ம், தஸ்மா நிப்³பா³னம் ந கஸ்ஸசி ரூபாவசரஸ்ஸ ஆரம்மணந்தி ‘‘சதுன்னம் ராஸீன’’ந்தி வத்தும் யுத்தம்.

ஆரம்மணபச்சயனித்³தே³ஸவண்ணனா நிட்டி²தா.