5. ஸம்ஸட்ட²வாரவண்ணனா

351-368. ஸம்ஸட்ட²வாரே பச்சனீயே ‘‘நவிப்பயுத்தே படிஸந்தி⁴ நத்தீ²’’தி இத³ம் வத்து²விரஹிதாய படிஸந்தி⁴யா விஸும் அனுத்³த⁴ரணதோ வுத்தம். படிச்சவாராதீ³ஸு ஹி ஸஹஜாதஸ்ஸ பச்சயபா⁴வத³ஸ்ஸனத்த²ம் ஸவத்து²கா படிஸந்தி⁴ உத்³த⁴டா, ஸா இதா⁴பி அதி⁴பதிபுரேஜாதாஸேவனேஸு நகம்மனவிபாகனஜா²னனவிப்பயுத்தேஸு ந லப்³ப⁴தி, அஞ்ஞேஸு ச அனுலோமதோ பச்சனீயதோ ச லப்³ப⁴மானபச்சயேஸு லப்³ப⁴தீதி இமஸ்ஸ விஸேஸஸ்ஸ த³ஸ்ஸனத்த²ம் உத்³த⁴டாதி. ஸேஸா தேரஸ ந லப்³ப⁴ந்தீதி ஏத்த² ‘‘ஸேஸா சுத்³த³ஸா’’தி ப⁴விதப்³ப³ம். ந ஜா²னே ஏகந்தி அஹேதுகபஞ்சவிஞ்ஞாணவஸேனாதி பஞ்சவிஞ்ஞாணானம் ஹேதுபச்சயவிரஹிதமத்தத³ஸ்ஸனத்த²ம் அஹேதுகக்³க³ஹணம் கதந்தி த³ட்ட²ப்³ப³ம், ‘‘நமக்³கே³ ஏகந்தி அஹேதுககிரியவஸேனா’’தி வுத்தம், ‘‘அஹேதுகவிபாககிரியவஸேனா’’தி ப⁴விதப்³ப³ம்.

369-391. ஹேட்டா² வுத்தனயேனேவாதி படிச்சவாரே அனுலோமபச்சனீயே வுத்தனயேன. ‘‘நஹேதுபச்சயுப்பன்னேஸு அஹேதுகமோஹோவ ஜா²னமக்³க³பச்சயம் லப⁴தி, ஸேஸா ந லப⁴ந்தீ’’தி வுத்தம், ஸேஸேஸு பன பஞ்சவிஞ்ஞாணவஜ்ஜாஹேதுகக்க²ந்தா⁴ தம்ஸமுட்டா²னா பச்சயுப்பன்னத⁴ம்மா ஜா²னபச்சயம் லப⁴ந்தி, ந பச்சனீயானுலோமே த்³வின்னம் பச்சயானம் அனுலோமேன ஸஹ யோஜனா அத்தீ²தி ஜா²னமக்³க³பச்சயம் ஸஹிதம் லப⁴தீதி ச ந ஸக்கா வத்தும், தஸ்மா ‘‘அஹேதுகமோஹோவ மக்³க³பச்சயம் லப⁴தீ’’தி வத்தப்³ப³ம்.

ஸம்ஸட்ட²வாரவண்ணனா நிட்டி²தா.