2. வேத³னாத்திகவண்ணனா

1. வேத³னாரூபனிப்³பா³னானி பன திகமுத்தகானி படிச்சாதி³னியமம் பச்சயுப்பன்னவசனஞ்ச ந லப⁴ந்தி. படிச்சவாராதீ³ஸு பன ச²ஸு யதோ ஹேதுபச்சயாதி³தோ திகத⁴ம்மானம் உப்பத்தி வுத்தா, தத்த² யதா²னுரூபதோ ஆரம்மணாதி³பச்சயபா⁴வேன லப்³ப⁴ந்தீதி வேதி³தப்³பா³னீதி.

10. ஸப்³ப³அரூபத⁴ம்மபரிக்³கா³ஹகா பன ஸஹஜாதாத³யோ பச்சயாதி இமினா குஸலத்திகேபி பரிஹீனம் ஸஹஜாதம் ரூபாரூபத⁴ம்மபரிக்³கா³ஹகத்தா ஆதி³ம்ஹி ட²பேத்வா ஆதி³ஸத்³தே³ன ஸப்³பா³ரூபத⁴ம்மபரிக்³கா³ஹகவசனேன ச பச்சயுப்பன்னவஸேன ஸப்³ப³அரூபத⁴ம்மபரிக்³கா³ஹகானம் ஆரம்மணாதீ³னம் பரிஹானிம் த³ஸ்ஸேதீதி த³ட்ட²ப்³ப³ம். தேன குஸலத்திகபரிஹீனானம் ஸப்³ப³ட்டா²னிகானம் சதுன்னம் ஸப்³ப³திகாதீ³ஸு பரிஹானி த³ஸ்ஸிதா ஹோதி. பச்சா²ஜாதபச்சயஞ்ச வினாவ உப்பத்திதோதி ஏதேன பன பச்சா²ஜாதபச்சயஸ்ஸ அனுலோமே பரிஹானிம், பச்சனீயே ச லாப⁴ம் த³ஸ்ஸேதி. ஸஹஜாதாத³யோதி வா ஸஹஜாதமூலகா ஸஹஜாதனிப³ந்த⁴னா படிச்சாதி³ம் ப²ரந்தேஹி ஸஹஜாதத⁴ம்மேஹி வினா பச்சயா அஹோந்தாதி வுத்தம் ஹோதி. கஸ்மா பன ஸஹஜாதனிப³ந்த⁴னா ஸப்³பா³ரூபத⁴ம்மபரிக்³கா³ஹகா ச யே, தேவ பரிஹாயந்தி, ந பன யோ ஸஹஜாதானிப³ந்த⁴னோ ஸப்³பா³ரூபத⁴ம்மபரிக்³கா³ஹகோ ச ந ஹோதி, ஸோ பச்சா²ஜாதோதி தத்த² காரணம் வத³ந்தோ ‘‘ஸஹஜாதாதீ³ஹி வினா அனுப்பத்திதோ பச்சா²ஜாதபச்சயஞ்ச வினாவ உப்பத்திதோ’’தி ஆஹ. தத்த² ஸஹஜாதாதீ³ஹி வினாதி ஸஹஜாதனிப³ந்த⁴னேஹி ஸப்³பா³ரூபத⁴ம்மபரிக்³கா³ஹகேஹி ச வினாதி அத்தோ². அத² வா ஸஹஜாதனிப³ந்த⁴னானமேவ பரிஹானி, ந பச்சா²ஜாதஸ்ஸ ஸஹஜாதானிப³ந்த⁴னஸ்ஸாதி ஏத்தே²வ காரணம் வத³ந்தோ ‘‘ஸஹஜாதாதீ³ஹி வினா அனுப்பத்திதோ பச்சா²ஜாதபச்சயஞ்ச வினாவ உப்பத்திதோ’’தி ஆஹ. ஸஹஜாதனிப³ந்த⁴னாபி பன ஸப்³ப³அரூபத⁴ம்மபரிக்³கா³ஹகாயேவ பரிஹாயந்தீதி த³ஸ்ஸிதமேதந்தி.

17. நவிபாகேபி ஏஸேவ நயோதி நயத³ஸ்ஸனமேவ கரோதி, ந ச பச்சயபச்சயுப்பன்னஸாமஞ்ஞத³ஸ்ஸனம். ஸுகா²ய ஹி அது³க்க²மஸுகா²ய ச வேத³னாய ஸம்பயுத்தே த⁴ம்மே படிச்ச தாஹி வேத³னாஹி ஸம்பயுத்தா அஹேதுககிரியத⁴ம்மா விசிகிச்சு²த்³த⁴ச்சஸஹஜாதமோஹோ சாதி அயஞ்ஹேத்த² நயோதி. நவிப்பயுத்தே ஏகந்தி ஆருப்பே ஆவஜ்ஜனவஸேன வுத்தந்தி இத³ம் ஆவஜ்ஜனாஹேதுகமோஹானம் வஸேன வுத்தந்தி த³ட்ட²ப்³ப³ம்.

25-37. அனுலோமபச்சனீயே யதா² குஸலத்திகம், ஏவம் க³ணேதப்³ப³ந்தி ஹேதுமூலகாதீ³னம் நயானம் ஏகமூலகத்³விமூலகாதி³வஸேன ச யோஜேத்வா க³ஹேதப்³ப³தாஸாமஞ்ஞம் ஸந்தா⁴ய வுத்தம், ந க³ணனஸாமஞ்ஞம். இதோ பரேஸுபி ஏவரூபேஸு ஏஸேவ நயோ. அஹேதுகஸ்ஸ பன சித்துப்பாத³ஸ்ஸாதிஆதி³ நஹேதுமூலகம் ஸந்தா⁴ய வுத்தம், ‘‘அஹேதுகஸ்ஸ பன சித்துப்பாத³ஸ்ஸ மோஹஸ்ஸ சா’’தி பனேத்த² வத்தப்³ப³ம். மோஹஸ்ஸ சாபி ஹி அஹேதுகஸ்ஸ அதி⁴பதிஅபா⁴வதோ அதி⁴பதினோ நஹேதுமூலகே அனுலோமதோ அட்டா²னந்தி. பரிவத்தேத்வாபீதி நஹேதுபச்சயா நஅதி⁴பதிபச்சயா ஆரம்மணே தீணீதி ஏவம் புரதோ டி²தம்பி ஆரம்மணாதி³ம் பச்ச²தோ யோஜேத்வாதி அத்தோ².

39. பஞ்ஹாவாரே தோ³மனஸ்ஸம் உப்பஜ்ஜதீதி ஏதேன தம்ஸம்பயுத்தே த³ஸ்ஸேதி. உபனிஸ்ஸயவிப⁴ங்கே³ ‘‘ஸத்³தா⁴பஞ்சகேஸு மானம் ஜப்பேதி தி³ட்டி²ம் க³ண்ஹாதீதி கத்தப்³ப³ம், அவஸேஸேஸு ந கத்தப்³ப³’’ந்தி இத³ம் பாட²க³தித³ஸ்ஸனத்த²ம் வுத்தம், ந பன ராகா³தீ³ஹி மானதி³ட்டீ²னம் அனுப்பத்திதோ. குஸலத்திகேபி ஹி ராகா³தீ³ஸு ‘‘மானம் ஜப்பேதி தி³ட்டி²ம் க³ண்ஹாதீ’’தி பாளி ந வுத்தா, ‘‘ராகோ³ தோ³ஸோ மோஹோ மானோ தி³ட்டி² பத்த²னா ராக³ஸ்ஸ தோ³ஸஸ்ஸ மோஹஸ்ஸ மானஸ்ஸ தி³ட்டி²யா பத்த²னாய உபனிஸ்ஸயபச்சயேன பச்சயோ’’தி (பட்டா². 1.2.53) பன ராகா³தீ³னம் மானதி³ட்டி²உபனிஸ்ஸயபா⁴வோ வுத்தோ. ததா² இதா⁴பி த³ட்ட²ப்³ப³ந்தி. ‘‘ஸுகா²ய வேத³னாய ஸம்பயுத்தேன பன சித்தேன கா³மகா⁴தம் நிக³மகா⁴தம் கரோதீ’’தி ஸோமனஸ்ஸஸம்பயுத்தலோப⁴ஸஹக³தசித்தேன கா³மனிக³மவிலுப்பனம் ஸந்தா⁴ய வுத்தம்.

62. ஸுத்³தா⁴னந்தி பச்சயபச்சயுப்பன்னபதா³னம் அனஞ்ஞத்தம் த³ஸ்ஸேதி. புரேஜாதபச்சா²ஜாதா பனேத்த² ந விஜ்ஜந்தி.ந ஹி புரேஜாதா பச்சா²ஜாதா வா அரூபத⁴ம்மா அரூபத⁴ம்மானம் பச்சயா ஹோந்தீதி ஏத்த² புரேஜாதாதி இமஸ்மிம் திகே வுச்சமானா அதி⁴காரப்பத்தா ஸுகா²ய வேத³னாய ஸம்பயுத்தாத³யோவ அரூபத⁴ம்மானம் புரேஜாதா ஹுத்வா பச்சயா ந ஹோந்தி புரேஜாதத்தாபா⁴வதோதி அதி⁴ப்பாயோ, ததா² பச்சா²ஜாதத்தாபா⁴வதோ பச்சா²ஜாதா வா ஹுத்வா ந ஹோந்தீதி.

63-64. ஸாதி⁴பதிஅமோஹவஸேனாதி அதி⁴பதிபா⁴வஸஹிதாமோஹவஸேனாதி அத்தோ².

83-87. நஹேதுபச்சயா…பே… நஉபனிஸ்ஸயே அட்டா²தி நஹேதுபச்சயா நாரம்மணபச்சயா நஉபனிஸ்ஸயே அட்டா²தி ஏவம் ஸங்கி²பித்வா உத்³த⁴ரதி. நானாக்க²ணிககம்மபச்சயவஸேன வேதி³தப்³பா³தி இத³ம் ‘‘து³க்கா²ய வேத³னாய ஸம்பயுத்தோ ஸுகா²ய வேத³னாய ஸம்பயுத்தஸ்ஸா’’தி ஏதம் வஜ்ஜேத்வா அவஸேஸேஸு அட்ட²ஸுபி நானாக்க²ணிககம்மபச்சயஸம்ப⁴வம் ஸந்தா⁴ய வுத்தம். ந ஹி ஸஹஜாதபச்சயோ அட்ட²ஸுபி லப்³ப⁴தி, அத² கோ² தீஸ்வேவாதி.

வேத³னாத்திகவண்ணனா நிட்டி²தா.