(2) ஸங்க்²யாவாரோ

73. ததா² புரேஜாதபச்சயேதி யதா² அஞ்ஞமஞ்ஞபச்சயே விஸேஸோ விப⁴ங்கே³ அத்தி², ததா² புரேஜாதபச்சயேபி அத்தீ²தி அத்தோ². ‘‘வத்து²ம் புரேஜாதபச்சயா’’தி ஹி தத்த² விஸேஸோ படிஸந்தி⁴அபா⁴வோ சாதி. விபாகானி சேவ வீதி²சித்தானி ச ந லப்³ப⁴ந்தீதி ஏதேன ‘‘கிரியாப்³யாகதம் ஏகம் க²ந்த⁴ம் படிச்சா’’திஆதி³கே (பட்டா². 1.1.53) விப⁴ங்கே³ விபாகாப்³யாகதாபா⁴வம் கிரியாப்³யாகதே ச அஜவனஸ்ஸ ஸப்³பே³ன ஸப்³ப³ம் அலப்³ப⁴மானதம் விஸேஸம் த³ஸ்ஸேதி.

74. ஏகமூலகே த³ஸ்ஸிதாய தே³ஸனாய லப்³ப⁴மானக³ணனஞ்ஞேவ ஆதா³யாதி இத³ம் ஏதஸ்மிம் அனுலோமே ஸுத்³தி⁴கனயே த³ஸ்ஸிதக³ணனதோ ததோ பரேஸு நயேஸு அஞ்ஞிஸ்ஸா அபா⁴வம் ஸந்தா⁴ய வுத்தம். அப³ஹுக³ணனேன யுத்தஸ்ஸ தேன ஸமானக³ணனதா ச இமஸ்மிம் அனுலோமேயேவ த³ட்ட²ப்³பா³. பச்சனீயே பன ‘‘நஹேதுபச்சயா நாரம்மணே ஏக’’ந்திஆதி³ம் (பட்டா². 1.1.104) வக்க²தீதி.

76-79. தே பன ஸங்கி²பித்வா தேவீஸதிமூலகோவேத்த² த³ஸ்ஸிதோதி ஏத்த² பச்சா²ஜாதவிபாகானம் பரிஹீனத்தா ‘‘த்³வாவீஸதிமூலகோ’’தி வத்தப்³ப³ம் ஸியா ஸாஸேவனஸவிபாகானம் வஸேன. து³வித⁴ம்பி பன த்³வாவீஸதிமூலகம் ஸஹ க³ஹேத்வா ஸங்க³ஹிதே தஸ்மிம் உப⁴யஸப்³பா⁴வதோ ‘‘தேவீஸதிமூலகோ’’தி ஆஹாதி த³ட்ட²ப்³ப³ம். ஆஸேவனவிபாகானம் வா விரோதா⁴பா⁴வே ஸதி புச்சா²ய த³ஸ்ஸிதனயேன தேவீஸதிமூலகேன ப⁴விதப்³ப³ம், தஸ்ஸ ச நாமம் த்³வாவீஸதிமூலகே ஆரோபேத்வா ‘‘தேவீஸதிமூலகோ’’தி வுத்தந்தி அயமேத்த² ருள்ஹீ.

ஆரம்மணபதே³ சேவாதி ஏதேன ஏகமூலகே அஞ்ஞபதா³னி வஜ்ஜேதி. ந ஹி ஏகமூலகே ஹேதாதீ³ஸு தயோவாதி அதி⁴ப்பாயோ. ஸுத்³தி⁴கனயோ பன ஆரம்மணமூலகாதீ³ஸு ந லப்³ப⁴தீதி ஆரம்மணமூலகே ‘‘நவா’’தி ஏதாய அதி⁴கக³ணனாய அபா⁴வத³ஸ்ஸனத்த²ம் ‘‘ஆரம்மணே டி²தேன ஸப்³ப³த்த² தீணேவ பஞ்ஹா’’தி வுத்தம். தத்த² காதப்³பா³தி வசனஸேஸோ. தீணேவாதி ச ததோ உத்³த⁴ம் க³ணனம் நிவாரேதி, ந அதோ⁴ படிக்கி²பதி. தேன ‘‘விபாகே ஏக’’ந்தி க³ணனா ந நிவாரிதாதி த³ட்ட²ப்³பா³. தீஸு ஏகஸ்ஸ அந்தோக³த⁴தாய ச ‘‘தீணேவா’’தி வுத்தந்தி. இதீதிஆதி³னா ‘‘ஸப்³ப³த்த² தீணேவா’’தி வசனேன அத்தனோ வசனம் த³ள்ஹம் கரோதி.

80-85. யே …பே… தம் த³ஸ்ஸேதுந்தி ஏத்தா²யமதி⁴ப்பாயோ – யதி³பி அவிக³தானந்தரம் ‘‘ஆரம்மணபச்சயா ஹேதுயா தீணீ’’தி வுத்தேபி ஊனதரக³ணனேன ஸத்³தி⁴ம் ஸம்ஸந்த³னே யா க³ணனா லப்³ப⁴தி, ஸா த³ஸ்ஸிதா ஹோதி, ததா²பி ஊனதரக³ணனேஹி ஸமானக³ணனேஹி ச ஸத்³தி⁴ம் ஸம்ஸந்த³னே ஊனதரா ஸமானா ச ஹோதி, ந ஏவம் ஆவிகரணவஸேன த³ஸ்ஸிதா ஹோதி, விபல்லாஸயோஜனாய பன ததா² த³ஸ்ஸேதி. வசனேன வா ஹி லிங்கே³ன வா அத்த²விஸேஸாவிகரணம் ஹோதீதி. தேனேதம் ஆவிகரோதீதி ஏத்தா²பி ஏவமேவ அதி⁴ப்பாயோ யோஜேதப்³போ³. பச்சனீயாதீ³ஸுபி பன ‘‘நாரம்மணபச்சயா நஹேதுயா ஏகம்…பே… நோவிக³தபச்சயா நஹேதுயா ஏக’’ந்திஆதி³னா (பட்டா². 1.1.107) மூலபத³ம் ஆதி³ம்ஹியேவ ட²பேத்வா யோஜனா கதா, ந ச தத்த² ஏதம் லக்க²ணம் லப்³ப⁴தி, தஸ்மா மூலபத³ஸ்ஸ ஆதி³ம்ஹி ட²பேத்வா யோஜனமேவ கமோ, ந சக்கப³ந்த⁴னந்தி ‘‘ஆரம்மணபச்சயா ஹேதுயா தீணீ’’திஆதி³ யோஜிதம், ந ச விஞ்ஞாதே அத்தே² வசனேன லிங்கே³ன ச பயோஜனமத்தீ²தி.

பச்சயானுலோமவண்ணனா நிட்டி²தா.