1. பச்சயானுலோமவண்ணனா

ஏகேகம் திகது³கந்தி ஏகேகம் திகம் து³கஞ்சாதி அத்தோ², ந திகது³கந்தி.

பச்சயா சேவாதி யே குஸலாதி³த⁴ம்மே படிச்சாதி வுத்தா, தே படிச்சத்த²ம் ப²ரந்தா குஸலாதி³பச்சயா சேவாதி அத்தோ². தேனேவாஹ ‘‘தே ச கோ² ஸஹஜாதாவா’’தி. யேஹி பன ஹேதாதி³பச்சயேஹி உப்பத்தி வுத்தா, தே ஸஹஜாதாபி ஹோந்தி அஸஹஜாதாபீதி. ஏத்த² படிச்சஸஹஜாதவாரேஹி ஸமானத்தே²ஹி படிச்சஸஹஜாதாபி⁴தா⁴னேஹி ஸமானத்த²ம் போ³தே⁴ந்தேன ப⁴க³வதா பச்சி²மவாரேன புரிமவாரோ, புரிமவாரேன ச பச்சி²மவாரோ ச போ³தி⁴தோதி வேதி³தப்³போ³. ஏஸ நயோ பச்சயனிஸ்ஸயவாரேஸு ஸம்ஸட்ட²ஸம்பயுத்தவாரேஸு ச, ஏவஞ்ச நிருத்திகோஸல்லம் ஜனிதம் ஹோதீதி.

‘‘தே தே பன பஞ்ஹே உத்³த⁴ரித்வா புன குஸலோ ஹேது ஹேதுஸம்பயுத்தகானம் த⁴ம்மான’’ந்தி லிகி²தம். ‘‘குஸலா ஹேதூ ஸம்பயுத்தகானம் க²ந்தா⁴ன’’ந்தி (பட்டா². 1.1.401) பஞ்ஹாவாரபாடோ²தி பமாத³லேகா² ஏஸாதி பாளியம் ஆக³தபாட²மேவ பட²ந்தி. புரிமவாரேஸு ஸஹஜாதனிஸ்ஸயஸம்பயுத்தபச்சயபா⁴வேஹி குஸலாதி³த⁴ம்மே நியமேத்வா தஸ்மிம் நியமே குஸலாதீ³னம் ஹேதுபச்சயாதீ³ஹி உப்பத்திம் புச்சி²த்வா விஸ்ஸஜ்ஜனம் கதம், ந தத்த² ‘‘இமே நாம தே த⁴ம்மா ஹேதாதி³பச்சயபூ⁴தா’’தி விஞ்ஞாயந்தி, தஸ்மா தத்த² ‘‘ஸியா குஸலம் த⁴ம்மம் படிச்ச குஸலோ த⁴ம்மோ உப்பஜ்ஜேய்ய ஹேதுபச்சயா’’தி (பட்டா². 1.1.25) ஏவமாதீ³ஹி ஸங்க³ஹிதே படிச்சத்தா²தி³ப²ரணகபா⁴வே ஹேதாதி³பச்சயபச்சயுப்பன்னேஸு ஹேதாதி³பச்சயானம் நிச்ச²யாபா⁴வதோ பஞ்ஹா நிஜ்ஜடா நிக்³கு³ம்பா³ ச கத்வா ந விப⁴த்தா, இத⁴ பன ‘‘ஸியா குஸலோ த⁴ம்மோ குஸலஸ்ஸ த⁴ம்மஸ்ஸ ஹேதுபச்சயேன பச்சயோ’’தி ஏவமாதீ³ஹி ஸங்க³ஹிதா ஹேதாதி³பச்சயபூ⁴தா குஸலாத³யோ பச்சயுப்பன்னா ச நிச்சி²தா, ந கோசி புச்சா²ஸங்க³ஹிதோ அத்தோ² அனிச்சி²தோ நாம அத்தீ²தி ஆஹ ‘‘ஸப்³பே³பி தே பஞ்ஹா நிஜ்ஜடா நிக்³கு³ம்பா³ ச கத்வா விப⁴த்தா’’தி. பஞ்ஹா பன உத்³த⁴ரித்வா விஸ்ஸஜ்ஜனம் ஸப்³ப³த்த² ஸமானந்தி ந தம் ஸந்தா⁴ய நிஜ்ஜடதா வுத்தாதி த³ட்ட²ப்³பா³.

உப்பத்தியா பஞ்ஞாபிதத்தாதி புச்சா²மத்தேனேவ உப்பத்தியா ட²பிதத்தா பகாஸிதத்தா, நானப்பகாரேஹி வா ஞாபிதத்தாதி அத்தோ².

25-34. பரிகப்பபுச்சா²தி விதி⁴புச்சா². கிம் ஸியாதி ஏஸோ விதி⁴ கிம் அத்தீ²தி அத்தோ². கிம் ஸியா, அத² ந ஸியாதி ஸம்புச்ச²னம் வா பரிகப்பபுச்சா²தி வத³தி. கிமித³ம் ஸம்புச்ச²னம் நாம? ஸமேச்ச புச்ச²னம், ‘‘கிம் ஸுத்தந்தம் பரியாபுணேய்ய, அத² அபி⁴த⁴ம்ம’’ந்தி அஞ்ஞேன ஸஹ ஸம்பதா⁴ரணந்தி அத்தோ². யோ குஸலோ த⁴ம்மோ உப்பஜ்ஜேய்ய ஹேதுபச்சயா, ஸோ குஸலம் த⁴ம்மம் படிச்ச ஸியாதி ஏதஸ்மிம் அத்தே² ஸதி பச்சா²ஜாதவிபாகபச்சயேஸுபி ஸப்³ப³புச்சா²னம் பவத்திதோ ‘‘யோ குஸலோ த⁴ம்மோ உப்பஜ்ஜேய்ய பச்சா²ஜாதபச்சயா விபாகபச்சயா, ஸோ குஸலம் த⁴ம்மம் படிச்ச ஸியா’’தி அயமத்தோ² விஞ்ஞாயேய்ய, ததா² ச ஸதி பச்சா²ஜாதபச்சயா விபாகபச்சயாதி உப்பஜ்ஜமானம் நித்³தா⁴ரேத்வா தஸ்ஸ குஸலம் த⁴ம்மம் படிச்ச ப⁴வனஸ்ஸ புச்ச²னதோ குஸலானம் தேஹி பச்சயேஹி உப்பத்தி அனுஞ்ஞாதாதி ஆபஜ்ஜதி, ந ச தம்தம்பச்சயா உப்பஜ்ஜமானானம் குஸலாதீ³னம் குஸலாதி³த⁴ம்மே படிச்ச ப⁴வனமத்தி²தா ஏத்த² புச்சி²தா, அத² கோ² உப்பத்தி, ஏவஞ்ச கத்வா விஸ்ஸஜ்ஜனே ‘‘குஸலம் த⁴ம்மம் படிச்ச குஸலோ த⁴ம்மோ உப்பஜ்ஜதீ’’தி உப்பத்தியேவ விஸ்ஸஜ்ஜிதாதி, தஸ்மா அயமத்தோ² ஸதோ³ஸோதி ‘‘அத² வா’’தி அத்த²ந்தரவசனம் வுத்தம்.

தத்த² ‘‘குஸலோ த⁴ம்மோ உப்பஜ்ஜேய்யா’’தி உப்பத்திம் அனுஜானித்வா ‘‘ஹேதுபச்சயா ஸியா ஏத’’ந்தி தஸ்ஸா ஹேதுபச்சயா ப⁴வனபுச்ச²னம், ‘‘உப்பஜ்ஜேய்ய ஹேதுபச்சயா’’தி ஹேதுபச்சயா உப்பத்திம் அனுஜானித்வா தஸ்ஸா ‘‘ஸியா ஏத’’ந்தி ப⁴வனபுச்ச²னஞ்ச ந யுத்தம். அனுஞ்ஞாதஞ்ஹி நிச்சி²தமேவாதி. தஸ்மா அனனுஜானித்வா ‘‘குஸலம் த⁴ம்மம் படிச்ச குஸலோ த⁴ம்மோ உப்பஜ்ஜேய்ய ஹேதுபச்சயா’’தி ஏவம் யதா²வுத்தம் உப்பஜ்ஜனம் கிம் ஸியாதி புச்ச²தீதி த³ட்ட²ப்³ப³ம். உப்பஜ்ஜேய்யாதி வா இத³ம்பி ஸம்புச்ச²னமேவ, குஸலம் த⁴ம்மம் படிச்ச குஸலோ த⁴ம்மோ கிம் உப்பஜ்ஜேய்ய ஹேதுபச்சயாதி அத்தோ². ஸியாதி யதா²புச்சி²தஸ்ஸேவ உப்பஜ்ஜனஸ்ஸ ஸம்ப⁴வம் புச்ச²தி ‘‘கிம் ஏவம் உப்பஜ்ஜனம் ஸியா ஸம்ப⁴வேய்யா’’தி, அயம் நயோ ஸியாஸத்³த³ஸ்ஸ பச்சா²யோஜனே. யதா²டா²னேயேவ பன டி²தா ‘‘ஸியா’’தி ஏஸா ஸாமஞ்ஞபுச்சா², தாய பன புச்சா²ய ‘‘இத³ம் நாம புச்சி²த’’ந்தி ந விஞ்ஞாயதீதி தஸ்ஸாயேவ புச்சா²ய விஸேஸனத்த²ம் ‘‘குஸலம் த⁴ம்மம் படிச்ச குஸலோ த⁴ம்மோ உப்பஜ்ஜேய்ய ஹேதுபச்சயா’’தி புச்ச²தி, ஏவம் விஸேஸிதப்³ப³விஸேஸனபா⁴வேன த்³வேபி புச்சா² ஏகாயேவ புச்சா²தி த³ட்ட²ப்³பா³.

க³மனுஸ்ஸுக்கவசனந்தி க³மனஸ்ஸ ஸமானகத்துகபச்சி²மகாலகிரியாபேக்க²வசனந்தி அத்தோ². யதி³பி படிக³மனுப்பத்தீனம் புரிமபச்சி²மகாலதா நத்தி², பச்சயபச்சயுப்பன்னானம் பன ஸஹஜாதானம்பி பச்சயபச்சயுப்பன்னபா⁴வேன க³ஹணம் புரிமபச்சி²மபா⁴வேனேவ ஹோதீதி க³ஹணப்பவத்திஆகாரவஸேன பச்சயாயத்ததாஅத்தபடிலாப⁴ஸங்கா²தானம் படிக³மனுப்பத்திகிரியானம்பி புரிமபச்சி²மகாலவோஹாரோ ஹோதீதி த³ட்ட²ப்³போ³. க³மனம் வா உப்பத்தி ஏவாதி க³ச்ச²ந்தஸ்ஸ படிக³மனம் உப்பஜ்ஜந்தஸ்ஸ படிஉப்பஜ்ஜனம் ஸமானகிரியா. படிகரணஞ்ஹி படிஸத்³த³த்தோ²தி. தஸ்மா ‘‘குஸலம் த⁴ம்ம’’ந்தி உபயோக³னித்³தி³ட்ட²ம் பச்சயம் உப்பஜ்ஜமானம் படிச்ச ததா³யத்துப்பத்தியா படிக³ந்த்வாதி அயமேத்த² அத்தோ², தேன படிச்சாதி ஸஹஜாதபச்சயம் கத்வாதி வுத்தம் ஹோதி. ஸஹஜாதபச்சயகரணஞ்ஹி உப்பஜ்ஜமானாபி⁴முக²உப்பஜ்ஜமானம் படிக³மனம், தம் கத்வாதி படிச்சஸத்³த³ஸ்ஸ அத்தோ²தி.

35-38. தாஸு பாளியம் த்³வேயேவ த³ஸ்ஸிதாதி ஹேதாரம்மணது³கே த்³வின்னம் புச்சா²னம் த³ஸ்ஸிதத்தா வுத்தம். ஏத்த² ச ஏகமூலகாதி³பா⁴வோ புச்சா²னம் வுத்தோதி வேதி³தப்³போ³, பச்சயானம் பன வஸேன ஸப்³ப³பட²மோ பச்சயந்தரேன அவோமிஸ்ஸகத்தா ஸுத்³தி⁴கனயோ, து³தியோ ஆரம்மணாதீ³ஸு ஏகேகஸ்ஸ ஹேது ஏவ ஏகமூலகந்தி கத்வா ஏகமூலகனயோ. ஏவம் ஹேதாரம்மணது³காதீ³னம் அதி⁴பதிஆதீ³னம் மூலபா⁴வதோ து³கமூலகாத³யோ நயா வேதி³தப்³பா³. தேவீஸதிமூலகனயோ ச ததோ பரம் மூலஸ்ஸ அபா⁴வதோ ‘‘ஸப்³ப³மூலக’’ந்தி பாளியம் வுத்தோ. தத்த² நபும்ஸகனித்³தே³ஸேன ஏக…பே… ஸப்³ப³மூலகம் பச்சயக³மனம் பாளிக³மனம் வாதி விஞ்ஞாயதி, ஏக…பே… ஸப்³ப³மூலகம் நயம் அஸம்முய்ஹந்தேனாதி உபயோகோ³ வா, இத⁴ ச ஸப்³ப³மூலகந்தி ச தேவீஸதிமூலகஸ்ஸேவ வுத்தத்தா பச்சனீயே வக்க²தி ‘‘யதா² அனுலோமே ஏகேகஸ்ஸ பத³ஸ்ஸ ஏகமூலகம்…பே… யாவ தேவீஸதிமூலகம், ஏவம் பச்சனீயேபி வித்தா²ரேதப்³ப³’’ந்தி (பட்டா². அட்ட². 1.42-44).

39-40. ‘‘ஆரம்மணபச்சயா ஹேதுபச்சயாதி ஏத்தாவதா ஆரம்மணபச்சயம் ஆதி³ம் கத்வா ஹேதுபச்சயபரியோஸானோ ஏகமூலகனயோ த³ஸ்ஸிதோ’’தி வுத்தம், ஏவம் ஸதி வினயே விய சக்கப³ந்த⁴னவஸேன பாளிக³தி ஆபஜ்ஜதி, ந ஹேட்டி²மஸோத⁴னவஸேன. ஹேட்டி²மஸோத⁴னவஸேன ச இத⁴ அபி⁴த⁴ம்மே பாளி க³தா, ஏவஞ்ச கத்வா விஸ்ஸஜ்ஜனே ‘‘ஆரம்மணபச்சயா ஹேதுயா தீணி, அதி⁴பதிபச்சயா தீணி, அதி⁴பதிபச்சயா ஹேதுயா நவ, ஆரம்மணே தீணீ’’திஆதி³னா ஹேட்டி²மம் ஸோதே⁴த்வாவ பாளி பவத்தா. யோ சேத்த² ‘‘ஏகமூலகனயோ’’தி வுத்தோ, ஸோ ஸுத்³தி⁴கனயோவ. ஸோ ச விஸேஸாபா⁴வதோ ஆரம்மணமூலகாதீ³ஸு ந லப்³ப⁴தி. ந ஹி ஆரம்மணாதீ³ஸு தஸ்மிம் தஸ்மிம் ஆதி³ம்ஹி ட²பிதேபி பச்சயந்தரேன ஸம்ப³ந்தா⁴பா⁴வேன ஆதி³ம்ஹி வுத்தஸுத்³தி⁴கதோ விஸேஸத்தோ² லப்³ப⁴தி, தேனேவ விஸ்ஸஜ்ஜனேபி ஆரம்மணமூலகாதீ³ஸு ஸுத்³தி⁴கனயோ ந த³ஸ்ஸிதோதி, தஸ்மா ‘‘ஆரம்மணபச்சயா ஹேதுபச்சயா ஆரம்மணபச்சயா அதி⁴பதிபச்சயா…பே… ஆரம்மணபச்சயா அவிக³தபச்சயா’’தி (பட்டா². 1.1.39) அயம் ஹேட்டி²மஸோத⁴னவஸேன ஏகஸ்மிம் ஆரம்மணபச்சயே ஹேதுபச்சயாதி³கே யோஜேத்வா வுத்தோ ஏகமூலகனயோ த³ட்ட²ப்³போ³. ‘‘ஆரம்மணபச்சயா…பே… அவிக³தபச்சயா’’தி வா ஏகமூலகேஸு அனந்தரபச்சயஸ்ஸ மூலகம் ஆரம்மணம் த³ஸ்ஸேத்வா ஏகமூலகாதீ³னி ஸம்கி²பித்வா ஸப்³ப³மூலகஸ்ஸாவஸானேன அவிக³தபச்சயேன நிட்டா²பிதந்தி த³ட்ட²ப்³ப³ம். அதி⁴பதிபச்சயா அனந்தரபச்சயா ஸமனந்தரபச்சயா ஸஹஜாதபச்சயா அஞ்ஞமஞ்ஞபச்சயாதி இத³ம் மூலமேவ த³ஸ்ஸேத்வா ஏகமூலகாதீ³னம் ஸம்கி²பனம் த³ட்ட²ப்³ப³ம், ந ஸுத்³தி⁴கத³ஸ்ஸனம், நாபி ஸப்³ப³மூலகே கதிபயபச்சயத³ஸ்ஸனம்.

41. ததோ நிஸ்ஸயாதீ³னி மூலானிபி ஸம்கி²பித்வா அவிக³தமூலகனயம் த³ஸ்ஸேதும் ‘‘அவிக³தபச்சயா ஹேதுபச்சயா’’திஆதி³ ஆரத்³த⁴ம். ஏதஸ்மிஞ்ச ஸுத்³தி⁴கஸ்ஸ அத³ஸ்ஸனேன ஆரம்மணமூலகாதீ³ஸு விஸும் விஸும் ஸுத்³தி⁴கனயோ ந லப்³ப⁴தீதி ஞாபிதோ ஹோதி. ந ஹி ஆதி³ கத்த²சி ஸம்கே²பந்தரக³தோ ஹோதி. ஆதி³அந்தேஹி மஜ்ஜி²மானம் த³ஸ்ஸனஞ்ஹி ஸங்கே²போ, ஆதி³தோ பபு⁴தி கதிசி வத்வா க³தித³ஸ்ஸனம் வாதி. து³தியசதுக்கம் வத்வா ‘‘விக³தபச்சயா’’தி பத³ம் உத்³த⁴ரித்வா ட²பிதம். தேன ஓஸானசதுக்கம் த³ஸ்ஸேதி. ததியசதுக்கதோ பபு⁴தி வா பஞ்சகமூலானி ஸம்கி²பித்வா ஸப்³ப³மூலகஸ்ஸ அவஸானேன நிட்ட²பேதி.

ஏத்த² ச து³கமூலகாதீ³ஸு யதா² ஹேதுஆரம்மணது³கேன ஸத்³தி⁴ம் அவஸேஸா பச்சயா யோஜிதா, ஹேதாரம்மணாதி⁴பதிதிகாதீ³ஹி ச அவஸேஸாவஸேஸா, ஏவம் ஹேதுஅதி⁴பதிது³காதீ³ஹி ஹேதுஅதி⁴பதிஅனந்தரதிகாதீ³ஹி ச அவஸேஸாவஸேஸா யோஜேதப்³பா³ ஸியும். யதி³ ச ஸப்³பே³ஸம் பச்சயானம் மூலபா⁴வேன யோஜிதத்தா ஹேதுமூலகே ஹேதுஅதி⁴பதிஆதி³து³கானம் அதி⁴பதிமூலகாதீ³ஸு அதி⁴பதிஹேதுஆதி³து³கேஹி விஸேஸோ நத்தி². தே ஏவ ஹி பச்சயா உப்படிபாடியா வுத்தா, ததா²பி ஆரம்மணமூலகாதீ³ஸு ஆரம்மணாதி⁴பதிது³காதீ³னம் அவஸேஸாவஸேஸேஹி, ஹேதுமூலகே ச ஹேதுஅதி⁴பதிஅனந்தரதிகாதீ³னம் அவஸேஸாவஸேஸேஹி யோஜனே அத்தி² விஸேஸோதி. யஸ்மா பன ஏவம் யோஜியமானேஸுபி ஸுக²க்³க³ஹணம் ந ஹோதி, ந ச யதா²வுத்தாய யோஜனாய ஸப்³பா³ ஸா யோஜனா பஞ்ஞவதா ந ஸக்கா விஞ்ஞாதும், தஸ்மா ததா² அயோஜேத்வா அனுபுப்³பே³னேவ யோஜனா கதாதி த³ட்ட²ப்³பா³. த⁴ம்மானம் தே³ஸனாவிதா⁴னே ஹி ப⁴க³வாவ பமாணந்தி. க³ணனாகா³தா² ஆதி³மபாடே² காசி விருத்³தா⁴, தஸ்மா ஸுட்டு² க³ணேத்வா க³ஹேதப்³பா³.

‘‘த்³வாவீஸதியா திகேஸு ஏகேகம் திகம் து³கானம் ஸதேன ஸதேன ஸத்³தி⁴ம் யோஜேத்வா’’தி வுத்தம், தம் து³கதிகபட்டா²னே கேஸஞ்சி போத்த²கானம் வஸேன வுத்தம். கேஸுசி பன ஏகேகோ து³கோ த்³வாவீஸதியா த்³வாவீஸதியா திகேஹி யோஜிதோ, தஞ்ச க³மனம் யுத்தம். ந ஹி தத்த² திகஸ்ஸ யோஜனா அத்தி², அத² கோ² திகானம் ஏகேகேன பதே³ன து³கஸ்ஸாதி. தத்த² ச²ஸட்டி²யா திகபதே³ஸு ஏகேகேன ஸம்ஸந்தி³த்வா ச²ஸட்டி² ஹேதுது³கா, ததா² ஸஹேதுகது³காத³யோ சாதி து³கானம் ச²ஸதாதி⁴கானி ச²ஸஹஸ்ஸானி ஹோந்தி. தேஸு ஏகேகஸ்மிம் படிச்சவாராத³யோ ஸத்த வாரா நயா புச்சா² ச ஸப்³பா³ து³கபட்டா²னே ஹேதுது³கேன ஸமானா.

‘‘து³கஸதே ஏகேகம் து³கம் த்³வாவீஸதியா திகேஹி ஸத்³தி⁴ம் யோஜேத்வா’’தி ச வுத்தம், தம்பி திகது³கபட்டா²னே கேஸஞ்சி போத்த²கானம் வஸேன வுத்தம். வுத்தனயேன பன யுத்தக³மனேஸு ஏகேகோ திகோ து³கஸதேன யோஜிதோ. தத்த² ஹேதுபத³ம் பக்கி²பித்வா வுத்தோ ஏகோ குஸலத்திகோ, ததா² நஹேதுபத³ம்…பே… அரணபத³ந்தி குஸலத்திகானம் த்³வே ஸதானி ஹோந்தி, ததா² வேத³னாத்திகாதீ³னம்பீதி ஸப்³பே³ஸம் சதுஸதாதி⁴கானி சத்தாரி ஸஹஸ்ஸானி ஹோந்தி. தேஸு ஏகேகஸ்மிம் வாரனயபுச்சா² திகபட்டா²னே குஸலத்திகேன ஸமானா.

‘‘ச² அனுலோமம்ஹி நயா ஸுக³ம்பீ⁴ரா’’தி வசனதோ பனாதி ஏதேன இத³ம் த³ஸ்ஸேதி – ‘‘அனுலோமம்ஹீ’’தி ‘‘திகாத³யோ ச²னயா’’தி ச அவிஸேஸேன வுத்தத்தா படிச்சவாராதி³வஸேன ஸத்தவித⁴ம்பி அனுலோமம் ஸஹ க³ஹேத்வா ‘‘ச² அனுலோமம்ஹீ’’தி வுத்தம், அனுலோமாதி³வஸேன சதுப்³பி³த⁴ம் திகபட்டா²னம் ஸஹ க³ஹேத்வா ‘‘திகஞ்ச பட்டா²னவர’’ந்தி, ததா² சதுப்³பி³தா⁴னி து³கபட்டா²னாதீ³னி ஸஹ க³ஹேத்வா ‘‘து³குத்தம’’ந்திஆதி³ம் வத்வா ‘‘ச² நயா ஸுக³ம்பீ⁴ரா’’தி வுத்தந்தி இமமத்த²ம் க³ஹேத்வா இமஸ்மிம் பச்சயானுலோமே ஸத்தப்பபே⁴தே³ ச²பி ஏதே பட்டா²னா பட்டா²னனயா சதுப்பபே⁴தா³ புச்சா²வஸேன உத்³த⁴ரிதப்³பா³தி. ஏவஞ்ஹி ஸப்³ப³ஸ்மிம் பட்டா²னே ஸப்³போ³ பச்சயானுலோமோ த³ஸ்ஸிதோ ஹோதீதி. பச்சனீயகா³தா²தீ³ஸுபி ஏஸேவ நயோ. ஏத்த² ச து³கதிகபட்டா²னாதீ³ஸு விஸேஸிதப்³பே³ஹி திகேஹி பட்டா²னம் திகபட்டா²னம். து³கானம் திகபட்டா²னம் து³கதிகபட்டா²னம். து³கவிஸேஸிதா வா திகா து³கதிகா, து³கதிகானம் பட்டா²னம் து³கதிகபட்டா²னந்தி இமினா நயேன வசனத்தோ² வேதி³தப்³போ³. து³காதி³விஸேஸிதஸ்ஸ சேத்த² திகாதி³பத³ஸ்ஸ து³காதி³பா⁴வோ த³ட்ட²ப்³போ³. து³கபட்டா²னமேவ ஹி திகபத³ஸம்ஸந்த³னவஸேன து³கபத³ஸம்ஸந்த³னவஸேன ச பவத்தம் து³கதிகபட்டா²னம் து³கது³கபட்டா²னஞ்ச, ததா² திகபட்டா²னமேவ து³கபத³ஸம்ஸந்த³னவஸேன திகபத³ஸம்ஸந்த³னவஸேன ச பவத்தம் திகது³கபட்டா²னம் திகதிகபட்டா²னஞ்சாதி.

பச்சயானுலோமவண்ணனா நிட்டி²தா.