22-23-24. நத்தி²விக³தஅவிக³தபச்சயனித்³தே³ஸவண்ணனா

22-23. பச்சயலக்க²ணமேவ ஹேத்த² நானந்தி ஏதேன நத்தி²விக³தபச்சயேஸு அத்தி²அவிக³தபச்சயேஸு ச ப்³யஞ்ஜனமத்தேயேவ நானத்தம், ந அத்தே²தி இத³ம் யோ பச்சயோதி அத்தோ², தஸ்மிம் நானத்தம் நத்தி², ப்³யஞ்ஜனஸங்க³ஹிதே பச்சயலக்க²ணமத்தேயேவ நானத்தந்தி இமமத்த²ம் ஸந்தா⁴ய வுத்தந்தி விஞ்ஞாயதி.

நத்தி²விக³தஅவிக³தபச்சயனித்³தே³ஸவண்ணனா நிட்டி²தா.

பச்சயனித்³தே³ஸவண்ணனா நிட்டி²தா.

பச்சயனித்³தே³ஸபகிண்ணகவினிச்ச²யகதா²வண்ணனா

‘‘லோப⁴தோ³ஸமோஹா விபாகபச்சயாபி ந ஹோந்தி, ஸேஸானம் ஸத்தரஸன்னம் பச்சயானம் வஸேன பச்சயா ஹோந்தீ’’திஆதி³மபாடோ². ஏத்த² ச லோப⁴தோ³ஸமோஹானம் பச்சேகம் ஸத்தரஸஹி பச்சயேஹி பச்சயபா⁴வோ வுத்தோ, ஸப்³பே³ ஹேதூ ஸஹ அக்³க³ஹேத்வா ஏகத⁴ம்மஸ்ஸ அனேகபச்சயபா⁴வத³ஸ்ஸனத்த²ம் அமோஹாதீ³னம் விஸும் க³ஹிதத்தாதி தோ³ஸஸ்ஸபி ஸத்தரஸஹி பச்சயபா⁴வோ ஆபஜ்ஜதி, ததா² ச ஸதி தோ³ஸஸ்ஸபி க³ருகரணம் பாளியம் வத்தப்³ப³ம் ஸியா. ‘‘அகுஸலோ பன ஆரம்மணாதி⁴பதி நாம லோப⁴ஸஹக³தசித்துப்பாதோ³ வுச்சதீ’’தி (பட்டா². அட்ட². 1.4) ஏத்தா²பி லோப⁴தோ³ஸஸஹக³தசித்துப்பாதா³தி வத்தப்³ப³ம் ஸியா, ந பன வுத்தம், தஸ்மா தோ³ஸஸ்ஸ அதி⁴பதிபச்சயதாபி நிவாரேதப்³பா³. ந ச ‘‘ஸேஸான’’ந்தி வசனேன அதி⁴பதிபச்சயோ நிவாரிதோ, அத² கோ² ஸங்க³ஹிதோ புரேஜாதாதீ³ஹி யதா²வுத்தேஹி ஸேஸத்தாதி தன்னிவாரணத்த²ம் தோ³ஸம் லோப⁴மோஹேஹி ஸஹ அக்³க³ஹேத்வா விஸுஞ்ச அக்³க³ஹேத்வா ‘‘தோ³ஸோ அதி⁴பதிபச்சயோபி ந ஹோதி, ஸேஸானம் பச்சயானம் வஸேன பச்சயோ ஹோதீ’’தி பட²ந்தி. இமினா நயேனாதி ஏதேன போ²ட்ட²ப்³பா³யதனஸ்ஸ ஸஹஜாதாதி³பச்சயபா⁴வம், ஸப்³ப³த⁴ம்மானம் யதா²யோக³ம் ஹேதாதி³பச்சயபா⁴வஞ்ச த³ஸ்ஸேதி. ந ஹி ஏதம் ஏகபச்சயஸ்ஸ அனேகபச்சயபா⁴வத³ஸ்ஸனந்தி ரூபாதீ³னம் பகதூபனிஸ்ஸயபா⁴வோ ச ஏதேன த³ஸ்ஸிதோதி த³ட்ட²ப்³போ³.

சதுன்னம் க²ந்தா⁴னம் பே⁴தா³ சக்கு²விஞ்ஞாணதா⁴துஆத³யோதி பே⁴த³ம் அனாமஸித்வா தே ஏவ க³ஹேத்வா ஆஹ ‘‘சதூஸு க²ந்தே⁴ஸூ’’தி. மிச்சா²வாசாகம்மந்தாஜீவா தேஹி சேவ கம்மாஹாரபச்சயேஹி சாதி ஏகூனவீஸதிதா⁴தி இத³மேவம் ந ஸக்கா வத்தும். ந ஹி மிச்சா²வாசாத³யோ மிச்சா²தி³ட்டி² விய மக்³க³பச்சயா ஹோந்தி சேதனாய மக்³க³பச்சயத்தாபா⁴வதோ. யதி³ ச ப⁴வேய்ய, பஞ்ஹாவாரே ‘‘கம்மபச்சயா மக்³கே³ தீணீ’’தி வத்தப்³ப³ம் ஸியா, தஸ்மா மிச்சா²வாசாதீ³னம் மக்³க³பச்சயபா⁴வோ ந வத்தப்³போ³. பட்டா²னஸம்வண்ணனா ஹேஸா. ஸேஸபச்சயபா⁴வோ ச சேதனாய அனேகபச்சயபா⁴வவசனேன வுத்தோயேவாதி ந இத³ம் படி²தப்³ப³ந்தி ந பட²ந்தி. ‘‘அஹிரிகம்…பே… மித்³த⁴ம் உத்³த⁴ச்சம் விசிகிச்சா²’’திஆதி³மபாடோ², விசிகிச்சா² பன அதி⁴பதிபச்சயோ ந ஹோதீதி தம் தத்த² அபடி²த்வா ‘‘விசிகிச்சா²இஸ்ஸாமச்ச²ரியகுக்குச்சானி ததோ அதி⁴பதிபச்சயம் அபனேத்வா’’தி ஏவமேத்த² பட²ந்தி.

‘‘சத்தாரி மஹாபூ⁴தானி ஆரம்மண…பே… புரேஜாதவிப்பயுத்தஅத்தி²அவிக³தவஸேன த³ஸதா⁴ பச்சயா ஹோந்தி, புன ததா² ஹத³யவத்தூ²’’தி புரிமபாடோ², மஹாபூ⁴தானி பன விப்பயுத்தபச்சயா ந ஹோந்தீதி ‘‘புரேஜாதஅத்தி²அவிக³தவஸேன நவதா⁴ பச்சயா ஹோந்தி, விப்பயுத்தபச்சயம் பக்கி²பித்வா த³ஸதா⁴ வத்து²’’ந்தி பட²ந்தி. ஏத்தகமேவேத்த² அபுப்³ப³ந்தி ஏதஸ்மிம் புரேஜாதபச்சயே ஸஹஜாதனிஸ்ஸயேஹி அபுப்³ப³ம் ரூபஸத்³த³க³ந்த⁴ரஸாயதனமத்தமேவாதி அத்தோ², ஆரம்மணானி பனேதானி ஆரம்மணபச்சயத⁴ம்மானம் அனேகபச்சயபா⁴வே வுத்தானீதி ஸப்³பா³திக்கந்தபச்சயாபேக்கா² ஏதேஸம் அபுப்³ப³தா நத்தீ²தி. இந்த்³ரியாதீ³ஸு அபுப்³ப³ம் நத்தீ²தி ரூபஜீவிதிந்த்³ரியஸ்ஸபி அரூபஜீவிதிந்த்³ரியதோ அபுப்³ப³ஸ்ஸ பச்சயபா⁴வஸ்ஸ அபா⁴வம் மஞ்ஞமானேன அபுப்³ப³தா ந வுத்தா. தஸ்ஸ பன புரேஜாதபச்சயபா⁴வதோ அபுப்³ப³தா. கப³ளீகாராஹாரஸ்ஸ ச புரேஜாதேன ஸத்³தி⁴ம் ஸத்ததா⁴ பச்சயபா⁴வோ யோஜேதப்³போ³.

ஆகாரோதி மூலாதி³ஆகாரோ. அத்தோ²தி தேனாகாரேன உபகாரகதா. ‘‘யேனாகாரேனா’’தி ஏதஸ்ஸ வா அத்த²வசனம் ‘‘யேனத்தே²னா’’தி. விபாகஹேதூஸுயேவ லப்³ப⁴தீதி ஏத்த² அமோஹவிபாகஹேதுஸ்ஸ அதி⁴பதிபச்சயபா⁴வோ ச லோகுத்தரவிபாகேயேவ லப்³ப⁴தீதி. ஏவம் ஸப்³ப³த்த² லப்³ப⁴மானாலப்³ப⁴மானம் ஸல்லக்கே²தப்³ப³ம். விப்பயுத்தம் அபடி²த்வா ‘‘ச²ஹாகாரேஹீ’’தி புரிமபாடோ², தம் பன படி²த்வா ‘‘ஸத்தஹாகாரேஹீ’’தி பட²ந்தி. உக்கட்ட²பரிச்சே²தோ³ ஹேத்த² வுச்சதி, ந ச யம் ஆரம்மணம் நிஸ்ஸயோ ஹோதி, தம் விப்பயுத்தம் ந ஹோதீதி.

அனந்தரஸமனந்தரேஸு யம் கம்மபச்சயோ ஹோதி, தம் ந ஆஸேவனபச்சயோ. யஞ்ச ஆஸேவனபச்சயோ ஹோதி, ந தம் கம்மபச்சயோதி த³ட்ட²ப்³ப³ம். ‘‘பகதூபனிஸ்ஸயோ பகதூபனிஸ்ஸயோவா’’தி வுத்தம், கம்மபச்சயோபி பன ஸோ ஹோதி, தஸ்மா ‘‘கம்மபச்சயோ சா’’தி பட²ந்தி. அயம் பனேத்த² அத்தோ² – பகதூபனிஸ்ஸயோ யேபு⁴ய்யேன பகதூபனிஸ்ஸயோவ ஹோதி, கோசி பனேத்த² கம்மபச்சயோ ச ஹோதீதி. ‘‘ஆரம்மணபுரேஜாதே பனேத்த² இந்த்³ரியவிப்பயுத்தபச்சயதா ந லப்³ப⁴தீ’’தி வுத்தம். தத்த² ஆரம்மணபுரேஜாதந்தி யதி³ கஞ்சி ஆரம்மணபூ⁴தம் புரேஜாதம் வுத்தம், ஆரம்மணபூ⁴தஸ்ஸ வத்து²ஸ்ஸ விப்பயுத்தபச்சயதா லப்³ப⁴தீதி ஸா ந லப்³ப⁴தீதி ந வத்தப்³பா³. அத² பன வத்து²புரேஜாததோ அஞ்ஞம் வத்து²பா⁴வரஹிதாரம்மணமேவ ‘‘ஆரம்மணபுரேஜாத’’ந்தி வுத்தம், தஸ்ஸ நிஸ்ஸயபச்சயதா ந லப்³ப⁴தீதி ‘‘நிஸ்ஸயிந்த்³ரியவிப்பயுத்தபச்சயதா ந லப்³ப⁴தீ’’தி வத்தப்³ப³ம். இதோ உத்தரிபீதி புரேஜாததோ பரதோபீதி அத்தோ², இதோ வா இந்த்³ரியவிப்பயுத்ததோ நிஸ்ஸயிந்த்³ரியவிப்பயுத்ததோ வா உத்தரி ஆரம்மணாதி⁴பதிஆதி³ ச லப்³ப⁴மானாலப்³ப⁴மானம் வேதி³தப்³ப³ந்தி அத்தோ² வத்தப்³போ³. கம்மாதீ³ஸு பன லப்³ப⁴மானாலப்³ப⁴மானம் ந வக்க²தீதி புரிமோயேவேத்த² அத்தோ² அதி⁴ப்பேதோ.

‘‘கப³ளீகாரோ ஆஹாரோ ஆஹாரபச்சயோவா’’தி புரிமபாடோ², அத்தி²அவிக³தபச்சயோபி பன ஸோ ஹோதி, தேன ‘‘கப³ளீகாரோ ஆஹாரோ ஆஹாரபச்சயத்தம் அவிஜஹந்தோவ அத்தி²அவிக³தானம் வஸேன அபரேஹிபி த்³வீஹாகாரேஹி அனேகபச்சயபா⁴வம் க³ச்ச²தீ’’தி பட²ந்தி.

‘‘யதா²னுரூபம் ஜா²னபச்சயே வுத்தானம் த³ஸன்னம் ஹேதுஅதி⁴பதீனஞ்சாதி இமேஸம் வஸேனா’’தி புரிமபாடோ², ‘‘யதா²னுரூபம் ஜா²னபச்சயே வுத்தானம் மக்³க³வஜ்ஜானம் நவன்னம் ஹேதுஅதி⁴பதிஜா²னானஞ்சாதி இமேஸம் வஸேனா’’தி பச்சி²மபாடோ², தேஸு விசாரேத்வா யுத்தோ க³ஹேதப்³போ³.

ஸமனந்தரனிருத்³த⁴தாய ஆரம்மணபா⁴வேன ச ஸதி³ஸோ பச்சயபா⁴வோ பச்சயஸபா⁴க³தா, விருத்³த⁴பச்சயதா பச்சயவிஸபா⁴க³தா. ‘‘இமினா உபாயேனா’’தி வசனதோ ஹேதுஆதீ³னம் ஸஹஜாதானம் ஸஹஜாதபா⁴வேன ஸபா⁴க³தா, ஸஹஜாதாஸஹஜாதானம் ஹேதுஆரம்மணாதீ³னம் அஞ்ஞமஞ்ஞவிஸபா⁴க³தாதி ஏவமாதி³னா உபாயேன ஸபா⁴க³தா விஸபா⁴க³தா யோஜேதப்³பா³.

ஜனகாயேவ, ந அஜனகாதி ஜனகபா⁴வப்பதா⁴னாயேவ ஹுத்வா பச்சயா ஹோந்தி, ந உபத்த²ம்ப⁴கபா⁴வப்பதா⁴னாதி அத்தோ² த³ட்ட²ப்³போ³. யேஸம் ஹேதுஆத³யோ பச்சயா ஹோந்தி, தே தேஹி வினா நேவ உப்பஜ்ஜந்தி, ந ச பவத்தந்தீதி தேஸம் உப⁴யப்பதா⁴னதா வுத்தா. ந ஹி தே அனந்தராத³யோ விய ஜனனேனேவ பவத்திம் கரோந்தீதி.

ஸப்³பே³ஸம் டா²னம் காரணபா⁴வோ ஸப்³ப³ட்டா²னம், தம் ஏதேஸம் அத்தீ²தி ஸப்³ப³ட்டா²னிகா. உபனிஸ்ஸயம் பி⁴ந்த³ந்தேன தயோபி உபனிஸ்ஸயா வத்தப்³பா³, அபி⁴ந்தி³த்வா வா உபனிஸ்ஸயக்³க³ஹணமேவ காதப்³ப³ம். தத்த² பி⁴ந்த³னம் பகதூபனிஸ்ஸயஸ்ஸ ரூபானம் பச்சயத்தாபா⁴வத³ஸ்ஸனத்த²ம், ஆரம்மணானந்தரூபனிஸ்ஸயானம் பன புப்³பே³ ஆரம்மணாதி⁴பதிஅனந்தரக்³க³ஹணேஹி க³ஹிதத்தா தேஸு ஏகதே³ஸேன அனந்தரூபனிஸ்ஸயேன இதரம்பி த³ஸ்ஸேதீதி த³ட்ட²ப்³ப³ம். புரேஜாதபச்சா²ஜாதாபி அஸப்³ப³ட்டா²னிகா அரூபரூபானஞ்ஞேவ யதா²க்கமேன பச்சயபா⁴வதோதி ஏத்த² புரேஜாதபச்சயோ அனந்தராதீ³ஸு ஏவ வத்தப்³போ³ தம்ஸமானக³திகத்தா, ந ச யுக³ளபா⁴வோ பச்சா²ஜாதேன ஸஹ கத²னே காரணம் அஸப்³ப³ட்டா²னிகத³ஸ்ஸனமத்தஸ்ஸ அதி⁴ப்பேதத்தாதி தம் தத்த² படி²த்வா ‘‘பச்சா²ஜாதோபி அஸப்³ப³ட்டா²னிகோ ரூபானம்யேவ பச்சயபா⁴வதோ’’தி பட²ந்தி.

பச்சயனித்³தே³ஸபகிண்ணகவினிச்ச²யகதா²வண்ணனா நிட்டி²தா.